ᑰᔾᔪᐊᖅ, ᑯᐸᐃ ᑕᕐᕋᖓ – ᐋᒡᒌᔅᓯ 11-16, 2002

9−ᖓᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᑎᒪᓂᕐᔪᐊᖑᔪᖅ ᑰᔾᔪᐊᒦᓚᐅᖅᓯᒪᔪᑦ, ᓄᓇᕗᒻᒥ, ᑲᓇᑕᒥ ᐋᒡᒌᔅᓯᒥ 11 16, 2002. ᐱᔾᔪᑎᖓ ᐃᓄᐃᑦ ᓂᐱᖏᑦ − ᐃᓕᓐᓂᐊᑎᑦᑎᑲᓐᓂᕋᓱᐊᕐᓂᖅ ᓯᓚᕐᔪᐊᒥᑦ. ᐱᓕᕆᔨᒻᒪᕆᐊᓗᒃ ᐊᐃᑐᕆᐊᓐ ᑲᓛᒃᓴᓐ, ᒐᕙᓄ ᔭᓄᕉᓪᓗᓂ ᑲᓇᑕᒥ ᐃᓚᒋᔭᐅᓚᐅᖅᓯᒪᔪᖅ. ᑲᑎᒪᕕᔾᔪᐊᑎᓪᓗᒋᑦ ᖁᕕᐊᓲᑎᖃᓚᐅᕐᒥᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ 25−ᖓᓐᓂ ᓇᓪᓕᐅᓂᖅᓯᐅᖃᑎᒌᑦ. ᑲᑭᕙᒃᑯᑦ ᒐᕙᒪᒃᑯᖏᑦ ᑰᔾᔪᐊᕐᓗ ᑐᓐᖓᓱᑦᑎᑦᑎᔨᐅᓚᐅᖅᑑᒃ.

ᑲᑎᒪᕕᔾᔪᐊᕐᓂᖅ 68−ᓂᑦ ᐃᓄᓐᓂᑦ ᓯᕗᓕᖅᑐᓂᑦ/ᐅᐸᔅᓯᒪᔪᓂᒃ ᐱᖃᑕᐅᔪᖃᖅᑐᓂ ᑎᓴᒪᓂᒃ ᓄᓇᓕᕐᔪᐊᕐᓂᑦ. ᑲᑎᑦᑐᒋᑦ 900−ᖑᓚᐅᖅᓯᒪᔪᑦ ᒐᕙᒪᒃᑯᑦ ᑭᒡᒐᖅᑐᐃᔨᖏᓐᓂ, ᓈᓚᒋᐊᖅᑐᖅᓯᒪᔪᓂᒃ, ᐱᓐᖑᐊᕆᐊᖅᑐᖅᓯᒪᔪᓂᒃ ᐅᑭᐅᖅᑕᖅᑐᓕᕆᔨᒻᒪᕆᓐᓂᓪᓗ ᓯᓚᕐᔪᐊᒥ ᐱᖃᑕᐅᓚᐅᖅᑐᑦ ᓲᕐᓗ ᐃᒪᐃᑦᑐᓂᒃ: ᐊᕙᑎᓕᕆᓂᕐᒧᑦ ᐱᓗᐊᖅᑕᐃᓕᒪᓇᓱᐊᕐᓂᒧᓪᓗ; ᓯᓚᕐᔪᐊᒥ ᑲᑐᔾᔨᖃᑎᒌᑦ ᐊᒻᒪᓗ ᐃᓄᓐᓄᑦ ᐱᔪᓐᓇᐅᑎᓕᕆᔩᑦ; ᓄᓇᑕᕈᑎᓂᑦ ᒐᕙᒪᖃᕐᓂᖏᓐᓂᓪᓗ ᓇᒻᒥᓂᖅ; ᐊᒻᒪᓗ ᐅᖃᐅᓯᓕᕆᓂᕐᒥᑦ, ᑐᓴᐅᒪᖃᑦᑕᐅᑎᓕᕆᓂᕐᒥᑦ; ᑕᐅᖅᓰᓂᕐᒥᓪᓗ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐸᕐᓇᑦᑎᖏᑦ ᑕᐅᖅᓰᓂᕐᒧᑦ ᑐᓴᐅᒪᖃᑦᑕᐅᑎᓕᕆᓂᕐᒧᓪᓗ ᐅᖃᐅᓯᓕᕆᓂᕐᒧᓪᓗ ᑲᒥᓴᓇᖏᑦ ᐅᓂᒃᑳᖅᑐᑎᑦ ᑲᑎᒪᔭᖅᑐᖅᓯᒪᔪᓄᑦ ᐊᑐᓕᖁᔭᒥᓂᒃ.

ᑲᑎᒪᓂᖅ ᐃᓱᓕᑦᑐᓂ ᑎᒍᓯᓪᓗᑎᑦ ᑰᔾᔪᐊᕐᒥ ᓇᓗᓇᐃᖅᑕᐅᓯᒪᔪᒥᑦ ᐱᔨᑦᑎᑐᖅ ᐱᓕᕆᐊᖏᓐᓂ ᑲᑐᔾᔨᖃᑎᒌᑦ ᐅᑭᐅᓄᑦ ᑎᓴᒪᓄᑦ. ᐊᑐᓕᖅᑎᑕᐅᓛᖅᑐᑎᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓄᑖᕐᒧᑦ, ᓰᓚ ᐅᐊᑦ−ᑯᓘᑦᓯᐊᒧᑦ. ᓂᔾᔭᐅᓯᔭᕐᓂᖅ, ᐱᖅᑯᓯᖏᓐᓂ ᐊᑐᖅᑐᑎᑦ ᐱᓐᖑᐊᖅᑐᑦ ᐊᒻᒪᓗ ᓴᓇᐅᒐᕐᓂᑦ ᑕᑯᔅᓴᐅᑎᑦᑎᓚᐅᖅᑐᑦ ᐱᓇᓱᐊᕈᓯᐅᑉ ᐃᓗᐊᓂ; ᓂᕆᕕᔾᔪᐊᑎᑦᑎᖃᑦᑕᖅᑐᑎᑦ ᐃᓄᔅᓯᐅᑎᓂᒃ ᐊᑐᓂ ᓄᓇᓕᕐᔪᐊᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ 25−ᖓᓐᓄᑦ ᐊᕐᕌᒍᖃᓕᖅᑎᓪᓗᒋᑦ ᐃᖅᑲᐅᒪᔭᐅᓇᓱᐊᖅᑐᓂ.