ᓯᑎᐱᕆ 14, 2020 – ᐋᓐᑯᕆᑦᔅ, ᐊᓛᔅᑲ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᓚᔅᑲᒥ, ᐱᓕᕆᖃᑎᖃᖅᑐᑎᑦ, ᓴᖅᑮᓚᐅᖅᓯᒪᔪᑦ ᐅᓂᒃᑳᕐᒥᑦ: ᓂᕿᔅᓴᖃᕐᓂᖅ ᓇᒻᒥᓂᕐᓗ ᒐᕙᒪᖃᕐᓂᕐᒥᑦ – ᐃᓄᐃᑦ ᐱᓕᕆᓂᖏᓐᓂ ᐅᑭᐅᖅᑕᖅᑐᒥ ᐃᒪᕐᒥᐅᑕᕐᓂᑦ ᐊᑐᕈᓐᓇᓂᖏᓐᓂ ᐊᐅᓚᑦᑎᒍᓐᓇᕐᓂᖏᓐᓄ. ᐃᓄᓐᓄᑦ ᐅᓂᒃᑳᓕᐊᖑᓯᒪᔪᑦ ᐊᔾᔨᐅᓐᖏᑦᑐᖅ ᐱᐅᔪᐊᓗᐃᑦ ᐃᓄᐃᑦ ᐅᑉᐱᕆᔭᖏᑦ ᐊᐅᓚᑦᑎᖃᑦᑕᕐᓂᖏᓪᓗ ᑕᒪᒃᑯᓂ ᑲᔪᓯᑦᑎᐊᖃᑦᑕᖅᓯᒪᔪᑦ ᐅᑭᐅᖅᑕᖅᑐᒥ ᐅᑭᐅᒐᓴᕐᔪᐊᕌᓗᓐᓄᑦ ᑕᒪᓂ 1000−ᖏᓐᓃᑦᑐᐊᓗᓐᓂᑦ.
ᐅᕙᒍᑦ, ᐃᓅᓪᓗᑕ, ᐊᑦᑐᖅᑕᐅᓪᓚᕆᑦᑐᒍᑦ ᐊᓯᔾᔨᖅᑐᐊᓗᓐᓂᑦ ᐅᑭᐅᖅᑕᖅᑐᒥ. ᓯᓚᕐᔪᐊᕐᒥ ᓄᓇᓖᑦ ᑕᑯᓐᓇᓂᖅᓴᐅᓕᕐᒥᔪᑦ ᐅᑭᐅᖅᑕᖅᑐᒥ, ᐱᒻᒪᕆᐅᓂᖓᓐᓂ ᑕᒪᒃᑯᐊ ᐃᓄᐃᑦ ᓂᕿᖃᑦᑎᐊᖁᓪᓗᒋᑦ ᓯᕗᓪᓕᖅᐸᐅᔾᔭᐅᒋᐊᖃᖅᑐᓂᓗ ᑕᒪᓐᓇ. ᑖᓐᓇ ᐅᓂᒃᑳᖅ ᐃᓄᐃᑦ ᓴᓐᖏᓂᖏᓐᓂ ᓂᕿᓄᑦ ᐃᓗᐃᑦᑑᒻᒪᑦ ᐃᓕᑦᑐᖅᑕᐅᔪᓐᓇᖅᑐᓂᓗ ᐊᐅᓚᑦᑎᔾᔪᑎᔅᓴᓂᑦ ᐸᕐᓇᐅᑎᓕᐅᕐᓗᑎᑦ ᓂᕿᔅᓴᖃᑦᑎᐊᖁᓪᓗᒋᑦ, ᐋᓐᓂᐊᖅᑕᐃᓕᒪᓂᕐᒥᑦ ᐃᓅᓇᓱᐊᑦᑎᐊᕐᓂᒥᓪᓗ ᐃᓄᐃᓐᓂᑦ ᐅᑭᐅᖅᑕᖅᑐᒥ ᑭᖑᕚᖏᓐᓄᑦ ᐊᕗᖔᓗᓪᓗ ᑎᑭᖁᓪᓗᖏᑦ.
ᒪᓕᒐᓕᕆᓂᕐᒥᑦ ᓇᐃᓈᖅᓯᓯᒪᓪᓗᑎᑦ ᐅᓂᒃᑳᓕᐅᖅᓯᒪᒻᒥᔪᑦ ᐱᖃᓯᐅᔾᔨᓚᐅᖅᓯᒪᒻᒥᔪᑦ ᓄᓇᖃᖅᑳᖅᑐᒥᓃᑦ ᖃᐅᔨᒪᔭᑐᖃᖏᓐᓂ ᐊᒻᒪᓗ ᐃᓄᐃᑦ ᐊᐅᓚᑦᑎᒍᓐᓇᕐᓂᖏᓐᓂ ᐃᓕᓴᕆᔭᐅᓐᖏᓗᐊᓚᐅᖅᓯᒪᒻᒪᑕ ᖃᓪᓗᓈᑦ ᐱᖅᑯᓯᖏᑎᒍᑦ. 1000−ᖏᓐᓃᑦᑐᐊᓗᓐᓂ ᐅᑭᐅᒐᓵᓗᓐᓂᑦ, ᐅᑭᐅᖅᑕᖅᑐᒥ ᐱᓇᓱᐊᖏᓐᓇᕋᑦᑕ. ᐱᖅᑯᓯᕗᑦ ᐅᑉᐱᕆᔭᐅᔪᓐᓃᓐᖔᖅᓯᒪᒻᒪᑕ ᑐᓐᖓᕕᖏᓐᓂ ᑎᒍᒥᐊᖏᓐᓇᖅᑐᑎᒍᓪᓗ ᐃᓗᐊᓂ ᐅᑭᐅᖅᑕᖅᑐᒥ ᒪᑭᒪᔪᑎᔅᓴᑎᒍᑦ. ᐅᑉᐱᕆᔭᕗᑦ – ᒪᑯᐊᓗ ᐅᑉᐱᕆᔭᐅᓂᖏᑦ, ᐱᓕᕆᖃᑎᖃᕐᓂᕐᒥᑦ, ᑲᑐᔾᔨᓂᕐᒥᑦ – ᐊᑐᖅᑐᐃᓐᓇᐃᑦ ᐋᓐᓂᐊᖅᑕᐃᓕᒪᓂᕐᒧᑦ ᐃᖏᕐᕋᑦᑎᐊᕐᓂᕐᒧᑦ ᐱᓕᕆᖃᑎᒌᑦᑎᐊᕐᓗᑎᑦ ᓄᓇᖅᑲᑎᒌᑦ. ᑕᒪᒃᑯᐊ ᐅᑉᐱᕆᔭᕗᑦ ᑐᓐᖓᕕᓪᓚᕆᐊᓗᔪᑦ ᐱᖅᑯᓯᑐᖃᑦᑎᓐᓂ ᐊᐅᓚᑦᑎᓂᕐᒥᑦ ᐊᑐᖃᑦᑕᖅᑕᑎᓐᓂ.
ᖃᓪᓗᓈᑦ ᐊᐅᓚᔾᔪᓯᖏᑦ ᖁᓛᓃᐸᑦᑎᐅᒐᓱᑦᑐᑦ ᐃᓄᐃᑦ ᐃᓕᖅᑯᓯᕆᖃᑦᑕᖅᑕᖏᓐᓂ ᐊᔾᔨᒋᓐᖏᑦᑎᐊᖅᑕᖏᓐᓂᓪᓗ ᐱᓇᓱᐊᕈᑕᐅᓪᓗᑎᑦ, ᐃᓛᓐᓂᒃᑯᑦ ᐅᐊᑦᑎᐊᕈᐊᓗᓂᑦ ᑕᐃᒫᑦᑎᐊᖑᓐᖏᑐᖅᐹᓗ ᐱᓪᓗᑎᑦ. ᑖᓐᓇ ᐅᓂᒃᑳᖅ ᐅᖃᐅᓯᖃᖅᑐᖅ ᐅᑉᐱᕆᔭᑦᑎᓐᓂ, ᖃᐅᔨᒪᓂᑦᑎᓐᓂ ᐊᑐᖃᑦᑕᖅᑎᓂᓪᓗ ᐱᓕᕆᓂᑦᑎᓐᓂ ᐃᓱᒪᒋᔭᑦᑎᓐᓂ ᐃᓄᐃᑦ ᐃᑲᔪᖅᑐᐃᖃᑦᑕᖅᑐᑎᑦ ᑕᐃᒪᐃᓪᓗᐊᑎᑦᑎᖃᑦᑕᕐᓂᒥᑦ ᓂᕿᓂᓪᓗ ᑎᒍᒥᐊᕈᓐᓇᕐᓂᖏᓐᓂ.
ᑖᓐᓇ ᐅᓂᒃᑳᖅ ᐊᑐᖅᓯᒪᔪᑦ ᑎᓴᒪᓂᒃ ᖃᐅᔨᓴᐅᑎᒥᓂᕐᓂᑦ ᒪᑯᓂᖓ ᐊᐃᕕᕐᓄᑦ, ᐃᖃᓗᓐᓄᑦ, ᕿᓚᓗᒐᕐᓄᑦ ᐃᖃᓗᐲᑦ ᒫᓐᓇ ᐊᐅᓚᑦᑎᓂᕐᒧᑦ ᐊᐅᓚᑦᑎᖃᑎᖃᕐᓂᒧᓪᓗ ᑲᒪᔪᑦ ᐊᓛᔅᑲᒥ ᐊᒻᒪᓗ ᐃᓄᕕᐊᓗᐃᑦ ᓄᓇᖏᓐᓂ. ᐅᓂᒃᑳᑦ ᐅᖃᖅᓯᒪᔪᒧᑦ ᖃᓄᑎᒋ ᐱᒻᒪᕆᐅᒻᒪᖔᑕ ᑕᒪᒃᑯᐊ ᐃᓗᓕᖏᑦ, ᓲᕐᓗ ᓯᓚ ᐊᓯᔾᔨᐸᓪᓕᐊᓂᖓᓐᓂ, ᒪᑭᒪᔾᔪᑎᔅᓴᐃᓪᓗ ᐱᕈᖅᑐᑦ ᖃᓄᖅ ᑲᒪᒋᔭᕆᐊᖃᕐᒪᖔᑦᑎᒍ, ᐊᑦᑐᐃᓂᖃᕐᓂᖏᓪᓗ ᒪᑯᐊ ᓯᓚᑖᓂᓐᖓᖅᓯᒪᔪᑦ ᓄᓇᓕᕐᔪᐊᕐᒥᑦ, ᐊᒻᒪᓗ ᓴᓐᖏᓂᖏᑦ ᐃᓕᑦᑐᖅᓯᒪᓂᖏᓪᓗ ᐃᓄᐃᑦ ᐱᖅᑯᓯᖏᑎᒍᑦ.
ᑕᒪᒃᑯᓂᖓ ᐱᓕᕆᓪᓗᓂ, ᑎᑎᕋᖅᓯᒪᔪᖅ ᐅᖃᐃᓐᓇᓚᐅᖅᑐᖅ ᐱᒻᒪᕆᐅᒋᐊᖏᓐᓂ ᒪᓕᒐᐃᑦ ᐱᖁᔭᐃᓪᓗ ᐱᑕᖃᕆᐊᖃᕐᓂᖏᓐᓂᓄ ᑕᒪᑐᒥᖓ ᐃᓱᒪᖏᓐᓂ ᐃᓄᐃᑦ. ᐊᒻᒪᓗ, ᑐᑭᓯᔭᐅᓂᖏᑦ ᐊᑐᓕᖅᑎᑕᐅᓂᖏᓪᓗ ᓲᕐᓗ ᒪᓕᒐᐃᑦ ᐱᖁᔭᐃᓪᓗ ᑐᑭᓯᔭᐅᑦᑎᐊᕆᐊᖃᕐᖓᑕ ᖃᓄᖅ ᐃᑲᔪᖅᑐᐃᒻᒪᖔᑕ ᐅᕝᕙᓘᓐᓃᑦ ᑭᖑᕙᕆᐊᖅᑎᑦᑎᒻᒪᖔᑕ ᓂᕿᔅᓴᖃᑦᑎᐊᕈᓇᓂᑦᑎᓐᓂ ᓴᓐᖏᓂᖃᕐᓗᑕ ᐊᓯᔾᔨᐸᓪᓕᐊᔪᕐᔪᐊᕌᓗᒻᒥ ᐅᑭᐅᖅᑕᖅᑐᒥ.
ᑕᒪᒃᑯᐊᓕᒫᑦ ᓇᒻᒥᓂᖅᓱᕋᓱᐊᕈᓐᓇᕐᓂᖅ ᐊᐅᓚᑦᑎᓂᕐᒨᖓᒻᒪᑕ ᐊᐅᓚᑦᑎᖃᑎᖃᕐᓂᒧᓪᓗ ᐊᓯᔾᔨᐸᓪᓕᐊᓂᖏᓐᓂ ᐊᑐᓕᖁᔭᐅᔪᑦ ᑎᑎᕋᖅᑐᒧᑦ ᒪᓕᓪᓗᒋᑦ. ᑕᒪᒃᑯᐊ ᐊᑐᓕᖁᔭᐅᔪᑦ ᐊᖏᔪᐊᓗᓐᓄᖓᒻᒪᑕ ᐊᕗᖔᓗᒃ ᑲᓇᑕᒥ ᓯᓚᕐᔪᐊᒥᓗ. ᐊᑐᓕᖅᑎᑕᐅᑉᐸᑕ, ᐊᑐᖁᔭᐅᓯᒪᔪᑦ ᐃᑲᔪᖅᑐᐃᒐᔭᖅᑐᑦ ᓂᕿᔅᓴᖃᑦᑎᐊᕐᓂᕐᒥᑦ, ᓇᒪᔪᓂᒃ ᑎᒍᓯᕙᓪᓕᐊᓗᑎᓪᓗ ᐃᓱᒪᓕᐅᕐᓂᐊᖅᑎᓪᓗᒋᑦ, ᐊᒻᒪᓗ ᐃᓄᓇᓱᐊᑦᑎᐊᕐᓂᕐᒥᑦ ᐅᑭᐅᖅᑕᖅᑐᒥ.
ᑕᒪᓐᓇ ᐱᓕᕆᐊᖅ ᑲᔪᓯᓚᐅᖅᓯᒪᔪᖅ ᐱᓕᕆᖃᑎᖃᖅᑐᑎᑦ ᐃᔅᑭᒨ ᐊᐃᕕᑦ ᑲᑎᒪᔨᖏᓐᓂ, ᐃᓅᕕᐊᓗᐃᑦ ᓂᕐᔪᑎᓕᕆᓂᕐᒧᑦ ᑲᑎᒪᔨᖏᓐᓂ, ᐃᖃᓗᓕᕆᔨᒃᑯᑦ ᑲᑐᔾᔨᓪᓗᑎᑦ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᑦ, ᑯᔅᑯᒃᐅᐃᒻ ᑰᖓ ᐊᓪᓚᐃᑦ ᐃᖃᓗᓕᕆᓂᕐᒧᑦ ᑲᑎᒪᔨᖏᑦ, ᑲᑐᔾᔨᖃᑎᒌᑦ ᑲᑎᒪᔨᖏᑦ ᐊᖏᔪᖅᑳᕐᓗ, ᐊᕙᑎᓕᕆᓂᕐᒧᑦ ᒪᓕᒐᓕᕆᔩᑦ, ᐊᒻᒪᓗ ᐅᖃᐅᔾᔨᒋᐊᖅᑏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ. ᐅᓂᒃᑳᖅ ᑎᒍᓯᓯᒪᔪᖅ 90−ᓃᓐᖔᖅᑐᓂᑦ ᐃᓄᓐᓂᑦ ᑎᑎᕋᖅᓯᒪᔪᓂᒃ ᐊᒻᒪᓗ 9−ᓂᑦ ᐅᖃᐅᔾᔨᒋᐊᖅᑎᓂᑦ ᑲᑎᒪᔨᕋᓛᓐᓃᓐᖔᖅᑐᑎᑦ.
ᑖᓐᓇ ᐅᓂᒃᑳᖅ ᐊᑐᖅᑕᐅᓂᐊᖅᑐᖅ ᐃᓄᓐᓄᑦ ᑭᓱᑐᐃᓐᓇᕐᓄᑦ. ᐃᓄᐃᑦ ᓄᓇᓕᖏᑦ ᐱᓕᕆᖃᑎᖏᓪᓗ ᐊᑐᕈᓐᓇᕐᒥᔪᑦ ᐅᓂᒃᑳᕐᒥᑦ ᑐᓴᖅᑎᑦᑎᓂᐊᕐᓗᑎᑦ ᓯᓚᑖᓃᓐᖔᖅᓯᒪᔪᓂᒃ ᓄᓇᓖᑦ. ᐃᓱᒪᓕᐅᖅᑏᑦ, ᒐᕙᒪᑐᖃᒃᑯᑦ/ᐊᕕᑦᑐᖅᓯᒪᔪᑦ/ᐅᑭᐅᖅᑕᖅᑐᒥ ᒐᕙᒪᒃᑯᓪᓗ, ᐃᓕᓐᓂᐊᖅᑏᑦ ᓯᓚᑦᑐᖅᓴᕐᕕᕈᔪᐃᑦ, ᐊᕙᑎᓕᕆᔨᒃᑯᑦ, ᐱᖁᔭᓕᐅᖅᑏᑦ, ᓴᓇᔩᓪᓗ ᐊᑐᕈᓐᓇᖅᑐᑦ ᑭᖑᓪᓕᖅᐹᒥ ᐅᓂᒃᑳᓕᐊᖑᓯᒪᔪᒥᑦ ᑐᑭᓯᓇᓱᒃᑲᓐᓂᕋᓱᒋᐊᖃᕐᓂᖅᑲᑕ ᐅᑭᐅᖅᑕᖅᑐᒥ ᐊᒻᒪᓗ ᐱᐅᓯᕚᓪᓕᑎᑦᑎᓇᓱᐊᖅᑎᓪᓗᒋᑦ ᓂᕿᓂᑦ ᑎᒍᒥᐊᒃᑲᓐᓂᕋᓱᐊᕐᓂᕐᒥᑦ.
ᑖᓐᓇ ᐅᓂᒃᑳᖅ ᖃᕋᓴᐅᔭᒃᑯᑦ ᑕᑯᔭᔅᓴᐅᒻᒥᔪᖅ ᐅᕙᓂ www.iccalaska.org.
ᐊᓯᖏᑦᑕᐅ ᐅᓂᒃᑳᑦ ᑕᑯᔪᓐᓇᕐᒥᔭᓯ ᐅᕙᓂ – https://iccalaska.org/media-and-reports/inuit-food-security-project/
ᑖᓐᓇ ᐃᑲᔪᖅᑐᖅᑕᐅᔪᖅ ᑲᓇᑕᒥ ᖃᐅᔨᓴᖅᑏᑦ ᑐᓐᖓᕕᖏᓐᓂ ᑐᓂᕐᕈᑎᑎᒍᑦ ᓈᓴᐅᑎᓕᒃ 1732373−ᒥᑦ. ᐃᓱᒪᒋᔭᐅᔪᑦ, ᖃᐅᔨᔭᐅᔪᑦ, ᐱᔭᕇᕐᓂᖏᓪᓗ ᐅᕝᕙᓘᓐᓃᑦ ᐊᑐᓕᖁᔭᐅᓯᒪᔪᑦ ᐅᖃᐅᓯᒥᓂᒃ ᑎᑎᕋᖅᑑᑉ ᐃᓱᒪᑐᐊᖏᑦ ᑖᒃᑯᐊᖑᓐᖏᑦᑐᑦ ᐅᖃᓕᒫᒐᕐᒥᑦ ᑲᑎᖅᓱᐃᔪᒥᓂᕐᓂᑦ ᑲᓇᑕᒥ ᖃᐅᔨᓴᖅᑐᓕᕆᓂᕐᒥᑦ ᑐᓐᖓᕕᐅᔪᒥᑦ.
ᑐᑭᓯᒋᐊᕐᕕᔅᓴᖅ:
Carolina Behe
ICC (Alaska)
Cell # – 917.415.7345
carolina@iccalaska.org
ᐱᒋᐊᖅᑎᑕᐅᓯᒪᔪᖅ 1977−ᒥ ᐃᐸᓐ ᕼᐊᑉᓴᓐᖑᓚᐅᖅᓯᒪᔪᖅ ᐊᖏᔪᖅᑎ ᐅᑦᕿᐊᕕᒻᒥ (ᐳᕉᒥ ᑕᐃᔭᐅᓚᐅᖅᓯᒪᔪᖅ), ᐊᓛᔅᑲ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓴᖅᑭᓚᐅᖅᓯᒪᔪᖅ ᐱᕈᖅᑐᓂᓗ ᐊᖏᔪᐊᓗᓕᖅᑐᓂ ᓯᓚᕐᔪᐊᓕᒪᒥ ᒐᕙᒪᐅᓇᓂ ᑲᑐᔾᔨᖃᑎᒌᖑᓪᓗᓂ ᓴᖅᑭᓚᐅᖅᓯᒪᔪᖅ ᑭᒡᒐᖅᑐᐃᓪᓗᑎᑦ 180,000−ᓂᑦ ᐃᓄᓐᓂᑦ ᐊᓛᔅᑲᒥ, ᑲᓇᑕᒥ, ᑲᓛᖡᑦ ᓄᓈᓂ, ᓱᑲᑦᑲᒥᓗ (ᐅᓛᓵᒥ). ᑲᑐᔾᔨᖃᑎᒌᑦ ᐱᓕᕆᖃᑕᐅᕙᑦᑐᑦ ᐃᓚᒋᔭᐅᓪᓗᑎᑦ ᐊᐃᑉᐸᖓᓐᓂ ᑲᑐᔾᔨᖃᑎᒌᕐᔪᐊᑦ ᓯᓚᕐᔪᐊᒥ ᒪᑭᒪᔾᔪᑎᔅᓴᓕᕆᔨᒃᑯᓐᓂ ᐃᓄᓕᕆᓂᕐᒥᓪᓗ ᑲᑎᒪᔨᖏᓐᓄᑦ ᐊᒻᒪᓗ ᐱᖃᑕᐅᖏᓐᓇᖅᑐᑎᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ. ᐱᕙᓪᓕᐊᓗᑕ ᐅᑭᐅᖅᑕᖅᑐᒥ ᓄᓇᑦᑎᓐᓂ ᐃᓄᐃᑦ ᓄᓇᖏᓐᓂ, ᑕᑯᓐᓇᖅᓯᒪᒐᑦᑕ ᓂᓪᓕᐊᒋᐊᖃᕐᓂᑎᓐᓂ ᑲᑐᔾᔨᖃᑎᒌᓪᓗᑕ ᐃᓱᒫᓘᑎᒋᔭᑦᑎᓐᓂ ᐊᔾᔨᒌᓐᓂᒃ ᑲᑎᖅᓱᕐᓗᒋᓪᓗ ᓴᓐᖏᓂᕗᑦ ᐱᔪᓐᓇᕐᓂᕗᓪᓗ ᐸᖅᑭᑦᑎᒍᒪᓂᑦᑎᓐᓂ ᓴᖅᑭᔮᖅᑎᑦᑎᒍᒪᓂᑦᑎᓂᓪᓗ ᐃᓄᓱᑦᑎᓐᓂ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑭᒡᒐᖅᑐᐃᒻᒪᑕ ᐱᔭᐅᔪᒪᔪᓂᒃ ᐃᓄᓐᓂᑦ ᐊᒻᒪᓗ ᐊᓪᓚᕕᖃᖅᑐᑎᑦ ᑎᓴᒪᓂᒃ ᐊᕕᑦᑐᖅᓯᒪᔪᓂᒃ ᐅᑭᐅᑦᑕᖅᑐᒥ − ᐊᓛᔅᑲ, ᑲᓇᑕ, ᑲᓛᖡᑦ ᓄᓈᓂ, ᓱᑳᑦᑲᒥᓗ. ᐊᑐᓂ ᓄᓇᓖᑦ ᐊᔾᔨᒌᓐᖏᒃᑲᓗᐊᖅᑎᓪᓗᒋᑦ, ᐊᑕᐅᓯᐅᒐᑦᑐ ᐃᓅᓪᓗᑕ, ᐊᑕᐅᓯᕐᒥᑦ ᓄᓇᖃᕋᑦᑕ, ᑖᒃᑯᓂᖓ ᑎᓴᒪᓂᒃ ᐊᕕᑦᑐᖅᓯᒪᔪᓂᒃ.