ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᒪᓕᒐᐃᑦ

ᑭᓲᓂᖓᓐᓂ ᓇᓗᓇᐃᖅᑕᐅᔪᖅ – ᐃᓕᓴᖅᓯᓯᒪᔪᑦ

ᐃᒪᐃᒻᒪᑦ ᐅᕙᒍᑦ, ᐃᓄᐃᑦ, ᓄᓇᖃᖅᑳᖅᑐᒥᓂᐅᔪᒍᑦ, ᐊᔾᔨᐅᖏᑦᑐᓃᓐᖔᖅᓯᒪᓪᓗᑕ, ᐊᔾᔨᐅᖏᑦᑐᓂᑦ ᐱᖅᑯᓯᖃᖅᑐᑕ, ᐊᖏᕐᕋᖃᖅᑐᑕᓗ;

ᐃᒪᐃᒻᒪᑦ ᓯᓚᕐᔪᐊᑉ ᐅᑭᐅᖅᑕᖅᑐᖓ ᖃᓂᒋᔭᖏᓪᓗ ᐊᑐᖅᐸᑦᑕᕗᑦ ᓄᓇᒋᔭᕗᑦ ᑭᓪᓕᖃᖅᑐᑎᑦ ᑲᑎᒪᔨᐅᑎᒍᑦ;

ᐃᒪᐃᒻᒪᑦ ᐱᔾᔪᑎᖃᖅᑐᑕ ᓇᑭᓐᖔᖅᓯᒪᓂᑦᑎᓐᓂ ᐊᑐᖃᑦᑕᖅᑕᑎᓐᓂ ᓇᔪᖅᑕᑎᓐᓂᓪᓗ ᓄᓇᒋᔭᑦᑎᓐᓂᒥ ᖁᕕᐊᒋᔭᖃᖅᑐᒍᑦ ᐱᖅᑯᓯᑦᑎᓐᓂ ᐱᔪᓐᓇᐅᑎᖃᕐᓂᑎᓐᓂᐊᔾᔨᐅᖏᑦᑐᓂᑦ ᓄᓇᖃᖅᑳᖅᑐᒥᓂᐅᓪᓗᑕ ᑲᑐᔾᔨᓪᓗᑕᓗ ᐃᓕᖅᑯᓯᑦᑎᓐᓂ, ᐅᑉᐱᕆᔭᑦᑎᓐᓂ ᐃᓱᒫᓘᑎᑦᑎᓂᓪᓗ;

ᐃᒪᐃᒻᒪᑦ ᐃᓄᐃᑦ ᐊᖏᕐᕋᖓ ᐊᒻᒪᓗ ᓱᓇᒃᑯᑖᖏᑦ ᐱᒻᒪᕆᐊᓘᒻᒪᑕ ᓯᓚᕐᔪᐊᒥ ᓄᓇᓕᖏᓐᓄᑦ;

ᐃᒪᐃᒻᒪᑦ ᓯᓚᕐᔪᐊᒥ ᐊᕕᑦᑐᖅᓯᒪᔪᓪᓗ ᐱᖁᔭᖏᑦ ᐃᓕᖅᑯᓯᕆᕙᑦᑕᖏᓪᓗ ᐃᓱᒪᒋᔭᐅᒋᐊᓖᑦ ᐸᖅᑭᔭᐅᖁᓪᓗᒋᑦ ᐅᑭᐅᖅᑕᖅᑐᖅ ᖃᓂᒋᔭᖏᓪᓗ ᐊᕙᑎᖏᑦ ᐊᒻᒪᓗ ᐱᐅᖅᓱᐊᕐᓗᒋᑦ ᐱᕙᓪᓕᐊᑎᓪᓗᒋᓪᓗ ᐃᓄᐃᑦ ᐱᖅᑯᓯᖏᑦ ᐃᓄᓕᕆᔾᔪᓯᖏᓪᓗ;

ᐃᒪᐃᒻᒪᑦ ᐱᔪᓐᓇᐅᑎᕗᑦ ᐱᔪᓐᓇᐅᑎᕗᑦ ᓇᒻᒥᓂᖅ ᐱᔪᓐᓇᓂᑦᑎᓐᓂ ᓇᓗᓇᐃᖅᑕᐅᒋᐊᓕᒃ ᐃᓄᐃᑦ ᐱᖃᑕᐅᒋᐊᖃᕐᓂᖏᓐᓂ ᐱᖁᔭᕐᓂᑦ ᖃᓄᐃᓗᕐᓂᐅᔪᓂᓪᓗ ᐊᑦᑐᐃᓂᖃᖅᑐᓂᑦ ᐊᖏᕐᕋᒥᓂᒃ;

ᐃᒪᐃᒻᒪᑦ ᐊᒻᒪᑲᓐᓂᖅ ᐅᑉᐱᕆᔭᕗᑦ ᐱᓕᕆᖃᑎᖃᕐᓂᕐᒥᑦ ᓯᓚᕐᔪᐊᒥᐅᑕᕐᓂᑦ, ᓴᖅᑭᔮᖅᑎᑦᑎᑲᓐᓂᕈᒪᓪᓗᑕᓗ ᓯᓚᕐᔪᐊᒥ ᓴᐃᓕᓂᕐᒥᑦ ᐊᒻᒪᓗ ᑐᕌᒐᖃᕐᓗᑎᑦ ᑕᒪᑐᒥᖓ ᒪᓕᒐᕐᓂᑦ;

ᐃᒪᐃᒻᒪᑦ ᓯᓚᕐᔪᐊᒥ ᑲᑐᔾᔨᖃᑎᒌᓐᓂᒃ ᐃᓄᓐᓂᑦ, ᖃᐅᔨᒪᔭᐅᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐸᑦᑎᑦᑎᒍᒫᕐᖓᑕ ᓯᕗᕙᖅᑎᓪᓗᓂᒋᓪᓗ ᐃᓄᐃᑦ ᐱᔪᓐᓇᐅᑎᖏᑦ ᐱᔪᒪᔭᖏᓪᓗ ᓯᓚᕐᔪᐊᒥ, ᓴᖅᑭᖅᑕᐅᓯᒪᓪᓗᑎᑦ ᐱᖁᔨᕗᖔᖅᑎᒍᑦ ᐊᖏᖅᓯᒪᔪᐃᓐᓇᐅᓪᓗᑎᓪᓗ ᑎᒍᔭᐅᓚᐅᖅᓯᒪᓪᓗᓂ ᔫᓂᒥ 15, 1977−ᖑᑎᓪᓗᒍ ᐱᐊᕈ, ᐊᓛᔅᑲᒥ;

ᑕᐃᒪᐃᒻᒪᑦ

ᑎᑎᕋᖅᓯᒪᔪᒥᑦ ᒪᓕᒐᕐᒥᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᓐᓄᑦ ᐱᑕᖃᕆᐊᓕᒃ ᑕᐃᒪᒃ ᒪᓕᑦᑕᐅᑦᑎᐊᖃᑦᑕᕐᓂᐊᕐᖓᑦ ᓯᕗᓪᓕᖅᐹᒥ ᑲᑎᒪᒋᐊᓐᖓᑎᓪᓗᒋᑦ ᐊᑐᓕᖅᑎᑕᐅᓗᑎᓪᓗ ᐱᖁᔨᕗᖔᖅᑎᒍᑦ ᐅᕙᒍᓪᓗ, ᐃᓄᑦᑎᒍᑦ ᐅᑭᐅᖅᑕᖅᑐᒥᐅᑕᐅᔪᒍᑦ, ᒪᓕᓪᓗᑕ ᒪᓕᒐᕐᓂᑦ ᑕᐃᒪᐃᓪᓗᐊᖅᑎᑕᐅᓂᕐᒥᑦ, ᐃᓚᒋᔭᐅᓂᕐᒥᑦ ᐅᑉᐱᕆᔭᑦᑎᐊᕐᓗᑕᓗ, ᓈᒻᒪᓴᖅᑐᒍ ᐊᖏᖅᑐᑕᓗ ᑕᒪᑐᒥᖓ ᒪᓕᒐᕐᒥᑦ, ᒪᓕᒐᐃᑦ ᐋᖅᑭᑦᑕᐅᓯᒪᔪᑦ ᐊᑖᓃᑦᑐᑦ.

ᒪᓕᒐᖅ 1 – ᑐᑭᖏᑦ

1. “ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᑦ ᐱᔪᒪᔭᖏᓪᓗ”ᑐᑭᓕᒃ ᑕᐃᒃᑯᓂᖓ ᐃᒻᒥᒃᑰᖅᑐᓂᑦ ᑎᒍᒥᐊᖅᑕᖏᓐᓂ ᐱᔪᓐᓇᐅᑎᓂᒃ ᐱᔪᒪᔭᖏᓐᓂᓪᓗ ᐊᔾᔨᐅᖏᑦᑐᓂᑦ ᓄᓇᖃᖅᑳᖅᑐᒥᕐᓄᑦ.
2. “ᐅᑭᐅᖅᑕᖅᑐᒥᐅᑕᐃᑦ”ᑐᑭᓕᒃ ᐃᓄᐃᑦ ᓄᓇᖓᓐᓂ.
3. “ᑎᓕᔭᐅᓯᒪᔪᖅ”ᑐᑭᓕᒃ ᑎᓕᔭᐅᓯᒪᔪᖅ ᐃᓚᒋᔭᖅ ᑎᒃᑯᐊᖅᑕᐅᓯᒪᓪᓗᓂ ᒪᓕᑦᑐᒋᑦ ᒪᓕᒐᐃᑦ ᒪᓕᒐᕐᔪᐊᓂᑦ.
4. “ᑎᓕᔭᐅᓯᒪᓂᖅ”ᑐᑭᓕᒃ ᑎᒃᑯᐊᖅᑕᐅᓯᒪᔪᓕᒫᑦ ᓂᕈᐊᖅᑕᐅᓯᒪᔪᓕᒫᓪᓘᓐᓃᑦ ᐃᓚᒋᔭᐅᔪᓄᑦ ᑲᑎᒪᖃᑕᕐᓄᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᒃᑯᓐᓄᑦ.
5. “ᐃᓄᐃᑦ ᐅᑯᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ”ᑐᑭᓕᒃ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ.
6. “ᐃᓄᐃᑦ”ᑐᑭᓕᒃ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐊᖏᕐᕋᖓᓂᒥᐅᑦ ᐃᓕᓴᕆᔭᐅᓯᒪᓪᓗᑎᑦ ᐃᓄᓐᓄᑦ ᐃᓅᖃᑎᖏᑦ ᐱᖃᓯᐅᑎᓪᓗᒋᑦ ᒪᑯᐊ ᐃᓄᑉᐱᐊᑦ, ᔪᑉᐱᒃ (ᐊᓛᔅᑲ), ᐃᓄᐃᑦ, ᐃᓅᕕᐊᓗᐃᑦ (ᑲᓇᑕ), ᑲᓛᖡᑦ (ᑲᓛᖡᑦ ᓈᓂ) ᐊᒻᒪᓗ ᔪᑉᐱᒃ (ᐅᓛᓴᑦ).
7. “ᐃᓄᐃᑦ ᓄᓇᖓ”ᑐᑭᓕᒃ ᐅᑭᐅᖅᑕᖅᑐᒥ ᖃᓂᒋᔭᖏᓐᓂᓪᓗ, ᒫᓐᓇᐅᔪᖅ ᐅᐊᑦᑎᐊᕉᓚᐅᖅᓯᒪᔪᕐᓗ, ᐃᓄᐃᑦ ᓄᓇᖃᖅᑳᖅᑐᒥᓂᕐᓂᑦ ᐱᔪᓐᓇᐅᑎᓖᑦ ᐱᔪᒪᓂᖃᖅᑐᓪᓗ.
8. “ᐃᓚᒋᔭᐅᔪᑦ” ᑐᑭᓕᒃ ᐊᑐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᑲᓇᑕᒥ) ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ − ᐊᓛᔅᑲ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓛᖡᑦ ᓄᓈᓂ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᓛᓵᒥ. ᐊᑐᓂ ᐃᓚᒋᔭᐅᔪᑦ ᐋᖅᑭᔅᓱᐃᒋᐊᖃᖅᑐᑎᑦ ᓇᒻᒥᓂᖅ ᒪᓕᒐᖏᓐᓂ ᑭᓪᓕᖏᑦ ᒪᓕᑦᑐᒋᑦ ᓄᓇᖓᓐᓂ ᐱᔪᓐᓇᐅᑎᒋᓂᐊᖅᑕᖏᓐᓂ.

ᒪᓕᒐᖅ 2 – ᐊᑎᖓ ᐃᓕᓴᕆᔭᐅᓯᒪᔪᖅ

ᐃᓕᓴᕆᔭᐅᓯᒪᔪᖅ ᐊᑎᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐃᒪᐃᑦᑑᒐᔭᖅᑐᖅ “ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ”.

ᒪᓕᒐᖅ 3 – ᐱᔪᑎᖏᑦ

ᐱᔾᔪᑎᖏᑦ ᑲᑎᒪᓂᐅᔪᑦ ᐃᒪᐃᑦᑑᓗᑎᑦ:

1. a) ᓴᓐᖓᑦᑎᖁᓪᓗᒋᑦ ᐊᔾᔨᐅᓐᖏᑦᑐᑦ ᐃᓄᐃᑦ ᐅᑭᐅᖅᑕᖅᑐᓕᒫᒥ;
2. b) ᓴᖅᑭᔮᖅᑎᑦᑎᖁᓪᓗᒋᑦ ᐃᓄᐃᑦ ᐱᔪᓐᓇᐅᑎᖏᓐᓂ ᐊᒻᒪᓗ ᐱᔪᒪᓂᖏᓐᓂ ᓯᓚᕐᔪᐊᓕᒫᒥ;
3. c) ᑕᒪᒃᑯᐊᓗ ᐃᓄᐃᑦ ᐱᖃᑕᐅᖃᑦᑕᖁᓪᓗᒋᑦ ᑲᑎᒪᔨᐅᔪᓂᒃ, ᐱᕙᓪᓕᐊᓂᕐᒥᑦ ᐃᓄᓕᕆᓂᕐᒥᓪᓗ, ᐃᓄᐃᑦ, ᓈᒻᒪᑦᑑᔮᕐᖓᑕ ᑕᐃᒫᒃ;
4. d) ᓴᖅᑭᔮᖅᑎᑲᓂᕐᓗᒋᑦ ᓇᒻᒥᓂᖅᓱᑦᑎᐊᕈᓐᓇᕐᓂᖏᓐᓂ ᐃᓄᐃᑦ ᐅᑭᐅᖅᑕᖅᑐᒥ;
5. e) ᑕᒪᒃᑯᐊ ᑲᔪᓯᑦᑎᐊᕋᓗᐊᕐᒪᖓᑕ ᐱᕈᖅᐸᓪᓕᐊᓗᑎᓪᓗ ᐃᓄᐃᑦ ᐱᖅᑯᓯᖏᑦ ᐃᓄᓕᕆᔾᔪᓯᖏᑦ ᒫᓐᓇᐅᔪᖅ ᑭᖑᕚᔅᓴᑎᓐᓄᓪᓗ;
6. f) ᐊᑯᓂᒧᑦ ᐊᐅᓚᑦᑎᒍᓐᓇᕐᓗᑎᑦ ᐸᖅᑭᑦᑎᓗᑎᓪᓗ ᐅᑭᐅᖅᑕᖅᑐᒥ ᐊᒻᒪᓗ ᖃᓂᒋᔭᖏᓐᓂ ᓂᕐᔪᑎᓂᒃ, ᐊᕙᑎᑦᑎᓐᓂ, ᐱᕈᖅᑐᓂᓪᓗ ᐊᒥᓱᕈᖅᐸᓪᓕᐊᒋᐊᖃᕐᓂᖏᓐᓂ; ᐊᒻᒪᓗ
7. g) ᓴᖅᑭᔮᖅᑎᑦᑎᑲᓐᓂᕐᓗᑎᑦ ᐊᐅᓚᑦᑎᑦᑎᐊᕐᓗᑎᑦ ᐅᑎᖅᑕᓲᖑᓐᖏᑦᑐᓂᑦ ᐊᑐᖅᑕᐅᕙᑦᑐᓂᑦ ᐅᑭᐅᖅᑕᖅᑐᒥ ᐊᑐᕐᓗᑎᓪᓗ ᑕᐃᒪᐃᑦᑐᓂᑦ ᒫᓐᓇᐅᔪᖅ ᓯᕗᓂᑦᑎᓂᓪᓗ ᐱᕙᓪᓕᐊᖁᓪᓗᒋᑦ ᐃᓄᐃᑦ ᒪᑭᒪᔾᔪᑎᔅᓴᖏᑎᒍᑦ, ᐃᓱᒪᒋᒋᐊᕐᓗᒋᓪᓗᐊ ᐊᓯᖏᑦ ᐃᓄᐃᑦ ᐱᔪᒪᔭᖏᑦ.

ᒪᓕᒐᖅ 4 – ᐊᐅᓚᓂᖏᑦ ᓴᓐᖏᓂᖏᓪᓗ

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐅᑯᓂᖓ ᐊᐅᓚᑦᑎᒍᓐᓇᖅᑐᑦ ᓴᓐᖏᓂᖃᕐᓗᑎᓪᓗ ᐱᔾᔪᑎᖏᓐᓂ ᓇᓗᓇᐃᖅᓯᒪᔪᓂᑦ ᒪᓕᒐᖏᓐᓂᓪᓗ ᓇᓗᓇᐃᖅᓯᒪᔪᓂᒃ ᒪᓕᒐᕐᔪᐊᖏᓐᓂ:

1. a) ᐱᖁᔭᓕᐅᕐᓗᑎᑦ, ᒪᓕᒐᔅᓴᓂᒃ ᐊᑦᑐᐃᓂᖃᕐᓂᐊᖅᑐᓂᓪᓗ ᐃᓄᓐᓂ ᐊᒻᒪᓗ ᐅᑭᐅᖅᑕᖅᑐᒥᐅᑕᕐᓂᑦ, ᒪᓕᓪᓗᒋᑦ ᐱᖁᔨᕗᖔᕈᑏᑦ ᑲᔪᓯᑎᑕᐅᓯᒪᔪᑦ ᑕᒪᑐᒧᖓ ᐱᔾᔪᑎᖃᖅᑐᑎᑦ;
2. b) ᑐᓴᐅᒪᖃᑦᑕᐅᑎᖃᑦᑕᕐᓗᑎᑦ ᐃᓚᒌᑦ ᐊᒻᒪᓗ ᓴᖅᑮᖃᑦᑕᕐᒥᓗᑎᑦ ᓯᓚᕐᔪᐊᒥᐅᑕᕐᓄᑦ;
3. c) ᐃᑲᔪᖅᑐᕐᓗᒋᑦ ᐱᒋᐊᕈᑎᖏᓐᓂ ᑲᑎᒪᔩᑦ, ᐱᕙᓪᓕᐊᓂᕐᒧᑦ ᐃᖅᑲᖅᑐᐃᕕᓕᕆᓂᕐᒧᓪᓗ ᐃᓄᓐᓄᑦ;
4. d) ᐱᖃᑕᐅᖃᑦᑕᕐᓗᑎᑦ, ᐅᕝᕙᓘᓐᓃᑦ ᑭᒡᒐᖅᑐᐃᓗᑎᒃ, ᓯᓚᕐᔪᐊᒥ ᑲᑐᔾᔨᖃᑎᒌᑦ ᐃᓱᒫᓘᑎᖃᖅᑐᓂᑦ ᑕᐃᒪᐃᑦᑐᓴᐃᓐᓇᕐᓂᑦ ᐊᑦᑐᖅᑕᐅᓂᐊᕐᓂᖏᓐᓂ ᐃᓄᐃᑦ ᐱᔪᒪᓂᖏᓐᓂ;
5. e) ᐱᒋᐊᕈᑎᑦᑎᐊᕙᖃᕐᓗᑎᑦ, ᑕᐃᒪᐃᒋᐊᖃᖅᑲᑕ, ᒪᓕᓪᓗᑎᑦ ᐱᖁᔨᕗᖔᕈᑎᒃ ᑲᔪᓯᑎᑕᒥᓂᕐᓂᑦ ᑕᒪᑐᒥᖓ ᐱᔾᔪᑎᖓᓐᓄᑦ;
6. f) ᑲᒪᖃᑦᑕᕐᓗᑎᑦ ᐃᑲᔪᖃᑦᑕᕐᓗᑎᓪᓗ ᖃᐅᔨᓴᕐᓂᕐᒥᑦ ᒪᑯᓂᖓ ᐱᔪᒪᔭᖏᓐᓂ ᐃᓄᐃᑦ;
7. g) ᐊᑐᓕᖁᔨᓪᓗᑎᑦ ᑕᒪᒃᑯᓂᖓ ᑲᒪᒋᔭᐅᒋᐊᓕᓐᓂᒃ ᐃᓄᓐᓄᑦ ᐱᔪᒪᔭᖏᓐᓂ ᐊᓯᖏᓐᓂ;
8. h) ᑲᒪᖃᑦᑕᕐᓗᑎᑦ ᑎᒍᒥᐊᖅᑕᖏᓐᓂ ᐱᔾᔪᑎᖏᑦ ᒪᓕᒐᕐᔪᐊᑦ ᒪᓕᓪᓗᖏᑦ.

ᒪᓕᒐᖅ 5 – ᐃᓚᒋᔭᐃᑦ

ᐃᓚᒋᔭᐅᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᒧᑦ ᐃᓚᒋᔭᐅᔪᓐᓇᖅᑐᑦ ᓇᓗᓇᐃᖅᓯᒪᔪᑦ ᒪᓕᓪᓗᒋᑦ ᒪᓕᒐᒥᕐ 1(8−ᒥ).

ᒪᓕᒐᖅ 6 – ᑲᑐᔾᔨᖃᑎᒌᑦ

ᐋᖅᑭᑦᑕᐅᓯᒪᔪᓂᑦ ᒪᓕᒐᕐᓂᑦ ᑲᑐᔾᔨᖃᑎᒋᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᐊᕐᕌᒍᑕᒫᖅᓯᐅᑎᖓᓐᓂ ᒪᓕᑦᑐᑎᑦ ᐊᒻᒪᓗ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ, ᐊᑐᓂ ᓯᕗᓕᖅᑎᖏᑦ ᐃᔅᓯᕙᐅᑕᖃᕈᓐᓇᖅᑐᑦ ᓯᕗᒃᑲᖅᑕᐅᓗᑎᑦ. ᐊᒻᒪᓗ, ᐊᑐᓂ ᐃᓚᒋᔭᐅᔪᑦ ᐱᓕᕇᓐᓇᕈᓐᓇᖅᑐᑦ ᐊᖏᕐᕋᒥᓂᒃ ᑲᔪᓯᖁᓪᓗᒋᑦ ᐱᔾᔪᑎᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ.

ᒪᓕᒐᖅ 7 – ᑲᑎᒪᕕᔾᔪᐊᕐᓂᖏᑦ

1. ᐅᑯᐊᖑᓗᑎᑦ

ᑲᑎᒪᕕᔾᔪᐊᕐᓂᖓᓐᓂ ᐃᓕᓴᕆᔭᐅᓯᒪᔪᑦ ᑎᓕᔭᐅᓯᒪᔪᑦ ᑲᑎᒪᒐᔭᖅᑐᑦ ᑲᑎᒪᓂᖅ ᐱᒋᐊᖅᑎᑕᐅᔪᓐᓇᖅᑐᓂ ᐊᒻᒪᓗ ᑲᔪᓯᑎᑕᐅᓗᓂ.

2. ᑎᓕᔭᐅᓯᒪᔪᑦ

ᐊᑐᓂ ᑲᑎᒪᓂᐅᔪᑦ ᑲᑎᒪᕕᔾᔪᐊᕐᓂᖓᓐᓂ ᐱᑕᖃᐅᖃᑦᑕᕋᔭᖅᑐᑦ ᑎᓕᔭᐅᓯᒪᔪᑦ. ᐊᑐᓂ ᐃᓚᒋᔭᐅᔪᑦ ᓇᓗᓇᐃᖅᓯᒍᓐᓇᖅᑐᑦ 18−ᓂᒃ ᑎᓕᓯᓗᑎᑦ ᑲᑎᒪᔭᖅᑐᖃᑕᐅᓂᐊᖅᑐᓂᒃ ᑲᑎᒪᓂᕐᔪᐊᕐᒥ ᒪᓕᓪᓗᒋᑦ ᒪᓕᒐᕋᓛᑦ. ᑲᒪᖃᑦᑕᕋᔭᖅᑐᑦ ᐱᕙᓪᓗᐊᓗᑎᑦ ᓴᖅᑭᔮᖅᑎᑦᑎᓗᑎᓪᓗ ᑐᕌᒐᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐃᓄᐃᑦ ᐊᖏᕐᕋᖏᓐᓂ ᐊᒻᒪᓗ ᐃᓚᒋᔭᐅᔪᑦ ᓄᓇᓕᖓᓐᓂ.

3. ᓴᓐᖏᓂᖏᑦ

ᑲᑎᒪᕕᔾᔪᐊᕐᓇᒥ ᐃᒪᐃᒍᓐᓇᖅᑐᑦ:

1. a) ᐃᓱᒪᒋᓗᒋᑦ ᑎᓕᓯᓗᑎᓪᓗ ᑲᒪᒋᐊᓕᓐᓂᒃ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐊᓯᖏᓐᓂ ᓯᓚᕐᔪᐊᒥ ᑎᒥᐅᔪᓂᑦ;
2. b) ᖃᐅᔨᓴᕐᓗᑎᑦ ᐱᖁᔭᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐊᑐᑦᑎᐊᕐᓗᒋᓪᓗ ᐊᓯᖏᓪᓗ ᓴᓐᖏᓂᐅᔪᑦ ᒪᓕᒐᕐᔪᐊᒦᑦᑐᓂᑦ ᒪᓕᒐᕋᓛᓂᓪᓗ ᒪᓕᓪᓗᑎᑦ;
3. c) ᑎᓕᓯᓗᑎᑦ ᐅᓂᒃᑳᓕᐅᖃᑦᑕᕆᐊᖏᓐᓂ ᐅᕝᕙᓗᓐᓂᑦ ᖃᐅᔨᓴᕐᓗᑎᑦ ᐊᓪᓚᕕᖓᑦᑕ ᐃᓗᐊᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐅᕝᕙᓘᓐᓃᑦ ᑐᓂᓯᒋᐊᖃᕐᓂᖏᓐᓂ ᐊᓯᖏᓐᓄ ᓯᓚᕐᔪᐊᒥ ᑲᑐᔾᔨᖃᑎᒌᓐᓄᑦ ᑎᒥᐅᔪᓄᓪᓘᓐᓃᑦ;
4. d) ᐅᖃᖃᑎᒌᓪᓗᑎᑦ ᐊᓯᖏᓐᓂ ᐱᓕᕆᐊᔅᓴᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ;
5. e) ᓂᕈᐊᕐᓗᑎᑦ ᐃᔅᓯᕙᐅᑕᕐᒥᑦ;
6. f) ᐊᓯᓕᒫᖏᑦ ᓴᓐᖏᓂᕆᔭᐅᔪᑦ ᑲᒪᒋᔭᐅᖃᑦᑕᕐᓗᑎᑦ ᐱᓕᕆᓂᖏᓐᓂ;
7. g) ᑎᒃᑯᐊᖅᓯᖃᑦᑕᕐᓗᑎᑦ ᓯᕗᓕᖅᑏᑦ ᑲᑎᒪᔨᕋᓛᕆᓂᐊᖅᑕᖏᓐᓂ ᓂᕈᐊᖅᑕᓂᒃ; ᐊᒻᒪᓗ
8. h) ᐃᓱᒪᓕᐊᒥᓂᕐᓂᑦ ᑲᒪᖃᑦᑕᕐᓗᑎᑦ ᐱᔾᔪᑎᖏᑦ ᒪᓕᓪᓗᒋᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐊᒻᒪᓗ ᑲᒪᒋᔭᕆᐊᓕᖏᑦ ᐃᓱᒪᒋᔭᕆᐊᖃᖅᑕᖏᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᑐᔅᓯᕋᐅᓐᓇᕐᓗᑎᑦ ᑕᐃᑲᓐᖓᑦ ᐅᓂᒃᑳᓕᐅᕆᐊᖃᕐᓂᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒨᖓᓂᐊᖅᑐᓂᒃ.

ᑲᑎᒪᓂᐅᔪᑦ

ᑲᑎᒪᓂᐅᔪᑦ ᑲᑎᒪᓂᕐᔪᐊᒥ ᐊᕐᕌᒍᑦ ᑎᓴᒪᑦ ᐊᓂᒍᕋᐃᒻᒪᑕ ᑲᑎᒪᖃᑦᑕᕆᐊᓖᑦ ᐅᕝᕙᓘᓐᓃᑦ ᐊᓯᐊᒍᑦ ᓇᓗᓇᐃᖅᑕᐅᓯᒪᑉᐸᑕ ᑲᑎᒪᓂᖅᓴᐅᖃᑦᑕᕐᓗᑎᑦ ᐅᕝᕙᓘᓐᓃᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ. ᑲᑎᒪᓂᓕᒫᑦ ᑲᑎᒪᕕᔾᔪᐊᕐᓇᒥ ᒪᑐᐃᖓᔪᑦ ᑭᒃᑯᓕᒫᓄᑦ ᑭᓯᐊᓂ ᓇᓗᓇᐃᖅᑕᐅᓂᖅᑲᑦ ᐊᓯᐊᒍᑦ ᓯᕗᓕᖅᑏᑦ ᑲᑎᒪᔨᕋᓚᖏᓐᓄᑦ ᐅᕝᕙᓘᓐᓃᑦ ᐊᕐᕌᒍᑕᒫᖅᓯᐅᑎᖓᓐᓂ.

ᒪᓕᒐᖅ 8 – ᓯᕗᓕᖅᑏᑦ ᑲᑎᒪᔨᕋᓛᖏᑦ

1. ᐅᑯᐊᖑᓗᑎᑦ

ᓯᕗᓕᖅᑏᑦ ᑲᑎᒪᔨᕋᓛᖏᑦ ᐅᑯᐊᖑᒐᔭᖅᑐᑦ ᐃᔅᓯᕙᐅᑕᖅ ᑎᓴᒪᐅᔪᖅᑐᓪᓗ ᐃᓚᒋᔭᐅᔪᑦ, ᒪᕐᕉᒃ ᓂᕈᐊᖅᑕᐅᓗᑎᑦ ᑭᒡᒐᖅᑐᐃᔨᐅᓗᑎᒃ ᐃᓚᒋᔭᐅᔪᓂᒃ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ.

ᑭᒡᒐᖅᑐᐃᔩᑦ ᓂᕈᐊᖅᑕᐅᔪᓐᓇᖅᑐᑦ ᐃᓚᒋᔭᐅᓕᕐᓗᑎᑦ ᒪᓕᓪᓗᑎᑦ ᓇᒻᒥᓂᖅ ᒪᓕᒐᖏᓐᓂ ᐊᑐᐊᒐᖏᓐᓂᓪᓗ ᐊᒻᒪᓗ ᐊᑐᓂ ᐃᓚᒋᔭᐅᔪᑦ ᐃᓐᓄᔅᓯᖃᑦᑕᕐᓗᑎᑦ ᐃᓄᖃᓐᖏᑦᑐᓂᑦ.

2. ᐃᔅᓯᕙᐅᑕᐅᑉ ᑐᖏᓕᖏᑦ

ᑎᓴᒪᓂᒃ ᐃᔅᓯᕙᐅᑕᐅᑉ ᑐᖏᓕᕆᔭᖏᓐᓂ ᐱᑕᖃᕋᔭᖅᑐᖅ, ᐊᑐᓂ ᐃᓚᒋᔭᐅᔪᓂᒃ. ᒪᕐᕉᒃ ᓯᕗᓕᖅᑏᒃ ᑲᑎᒪᔨᕋᓛᖏᓐᓂ ᐃᓚᒋᔭᐅᔪᑦ ᐃᓱᒪᓕᐊᖏᓯᒪᔪᑦ ᓇᒻᒥᓂᖅ ᐅᕝᕙᓘᓐᓃᑦ ᐊᖏᖃᑎᒌᓐᓂᖅᑲᑕ ᐃᓚᒋᔭᐅᔪᑦ ᐃᒻᒥᒃᑰᖅᑐᓂᑦ ᐃᔅᓯᕙᐅᑕᐅᑉ ᑐᖏᓕᕆᔪᒪᑉᐸᒋᑦ. ᐃᔅᓯᕙᐅᑕᐅᑉ ᑐᖏᓕᖏᑦ ᑲᒪᖃᑦᑕᕋᔭᖅᑐᑦ ᐸᐃᑉᐹᓕᕆᓂᕐᒥᑦ ᐊᖏᔪᖅᑳᖑᓗᑎᓪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐊᓪᓚᕕᖏᓐᓂ ᑭᓪᓕᖏᑦ ᒪᓕᑦᑐᒋᑦ ᐊᒻᒪᓗ ᐊᐅᓚᑦᑎᖃᑦᑕᕐᓗᑎᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐃᓚᒋᔭᐅᔪᓂᑦ ᑭᓪᓕᖏᑦ ᒪᓕᑦᑐᒋᑦ.

3. ᓴᓐᖏᓂᖏᑦ

ᓯᕗᓕᖅᑏᑦ ᑲᑎᒪᔨᕋᓛᖏᑦ ᐊᒻᒪᓗ ᐃᔅᓯᕙᐅᑕᑦ ᑐᖏᓕᖏᑦ ᐊᐅᓚᑦᑎᒐᔭᖅᑐᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᑲᑎᒪᓂᐅᔪᓂᒃ ᐊᕐᕌᒍᑕᒪᖅᓯᐅᑎᖓᓐᓂ. ᓯᕗᓕᖅᑏᑦ ᑲᑎᒪᔨᕋᓛᖏᑦ ᐊᐅᓚᑦᑎᓗᑎᑦ ᐊᖏᖃᑎᒌᓐᓂᒃᑯᑦ.

4. ᑎᓕᔭᐅᓯᒪᔪᑦ

ᓯᕗᓕᖅᑏᑦ ᑲᑎᒪᔨᕋᓛᖏᑦ ᐊᒻᒪᓗ ᐃᔅᓯᕙᐅᑕᑦ ᑲᒪᑦᑕᐅᑎᒋᒐᔭᖅᑐᓪᓕ 18−ᓂᑦ ᑎᓕᔭᐅᓯᒪᔪᓂᒃ ᓲᕐᓗ ᐃᓚᒋᔭᐅᔪᓂᒃ ᑭᖑᓪᓕᕐᒥ ᐊᕐᕌᖑᑕᒫᖅᓯᐅᑎᖓᓐᓂ ᑲᑎᒪᓕᖅᑲᑕ.

5. ᑲᑎᒪᓂᐅᔪᑦ

ᓯᕗᓕᖅᑏᑦ ᑲᑎᒪᔨᕋᓛᖏᑦ ᐋᖅᑭᔅᓯᒪᑦᑎᐊᕐᓗᑎᑦ ᐊᐅᓚᑦᑎᖃᑦᑕᕋᔭᖅᑐᑦ ᒪᕐᕈᐊᖅᑎᕐᔪᐊᖑᓐᓃᑦ ᑲᑎᒪᖃᑦᑕᕐᓗᑎᑦ ᐊᕐᕌᒎᑉ ᐃᓗᐊᓂ. ᒪᐅᓇᑐᐃᓐᓇᕐᓗ ᑲᑎᒪᑎᑦᑎᒍᓐᓇᕆᓪᓗᓂ ᐃᔅᓯᕙᐅᑕᖅ ᖃᖓᑐᐃᓐᓇᒃᑯᑦ.

ᒪᓕᒐᖅ 9 – ᐃᔅᓯᕙᐅᑕᖅ

ᐃᔅᓯᕙᐅᑕᑦ ᓂᕈᐊᖅᑕᐅᔪᓐᓇᖅᑐᑦ ᑎᓕᔭᐅᓯᒪᔪᓂᒃ ᑲᑎᒪᕕᔾᔪᐊᖅᑎᓪᓗᒋᑦ ᒪᓕᒐᕋᓛᕐᓂᑦ ᒪᓕᓪᓗᑎᑦ ᓂᕈᐊᕐᓗᑎᓪᓗ 2/3 ᑲᑎᒪᔩᑦ ᓂᕈᐊᕈᓐᓇᖅᑐᑦ. ᐃᔅᓯᕙᐅᑕᖅ ᓯᕗᒃᑲᑦᑕᐃᒐᔭᖅᑐᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᐊᒻᒪᓗ ᐊᓪᓚᕕᓕᕆᓂᐅᔪᑦ ᐃᑲᔫᑎᔅᓴᓪᓗ ᐃᖏᕐᕋᑦᑎᐊᕋᓗᐊᕐᒪᖔᑕ ᖃᐅᔨᓴᖃᑦᑕᕐᓗᑎᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᐊᒻᒪᓗ ᑲᑎᒪᔪᓕᒫᓂᓪᓗ ᑲᑎᒪᕕᔾᔪᐊᕐᓂᖏᓐᓂ.

ᒪᓕᒐᖅ 10 – ᑮᓇᐅᔭᐃᑦ ᑎᑎᕋᖅᓯᒪᓂᖏᑦ

ᐊᑐᓂ ᐃᓚᒋᔭᐅᔪᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓂᖅᑕᒫᑦ ᐃᒪᐃᒍᓐᓇᖅᑐᑦ (i) ᓴᖅᑮᓗᑎᑦ ᑎᑎᕋᖅᓯᒪᔪᓂᒃ ᑮᓇᐅᔭᓕᕆᓂᕐᒥᑦ ᐊᕐᕌᒍᖓᓐᓄᑦ ᑕᐃᒪᓐᖓᓂ ᑲᑎᒪᓂᐅᓚᐅᖅᓯᒪᔪᒦᓐᖔᕐᓗᑎᑦ ᐊᕐᕌᒍᑕᒫᖅᓯᐅᑎᖓᓐᓂ ᐊᒻᒪᓗ (ii) ᕿᒥᕐᕈᒍᓐᓇᕐᓗᒋᑦ ᐊᕐᕌᒎᑉ ᐃᓗᐊᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᑮᓇᐅᔾᔭᓕᕆᔾᔪᓯᖏᓐᓂ.

ᒪᓕᒐᖅ 11 – ᒪᓕᒐᕋᓛᑦ

ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᑎᒍᓯᒍᓐᓇᖅᑐᑦ ᒪᓕᒐᕋᓛᕐᓂᑦ ᐊᑐᓕᖅᑎᑦᑎᓗᑎᑦ ᐱᓗᐊᖅᑐᒥᑦ ᒪᓕᓪᓗᑎᑦ ᒪᓕᒐᕐᔪᐊᖓᓐᓂ. ᒪᓕᒐᕋᓛᓕᒫᑦ ᒪᓕᑦᑎᐊᕆᐊᓖᑦ ᑎᑎᕋᖅᓯᒪᔪᓂᒃ ᑕᕝᕙᓂ ᒪᓕᒐᕐᔪᐊᒥ.

ᒪᓕᒐᖅ 12 – ᐊᓯᔾᔨᖅᑕᐅᓂᖏᑦ

ᒪᓕᒐᕐᔪᐊᖅ ᐊᓯᔾᔨᖅᑕᐅᔪᓐᓇᖅᑐᖅ ᐃᒫᒃ (i) ᓈᒻᒪᓴᖅᑐᐃᓐᓇᐅᓗᑎᑦ ᐊᑐᓕᖁᔭᐅᔪᓂᒃ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᓴᖅᑮᖅᑲᐅᔪᓄᑦ ᐊᒻᒪᓗ (ii)ᓂᕈᐊᕐᓂᐅᔪᑦ 2/3−ᖑᓗᑎᒃ ᐊᑐᓂ ᓂᕈᐊᕈᓐᓇᖅᑐᓂᒃ ᑲᑎᒪᑎᓪᓗᒋᑦ ᐊᕐᕌᒍᑕᒫᖅᓯᐅᑎᖓᓐᓂ.