ᒥᓂ ᒍᕋᐃ, ᐃᔅᓯᕙᑕᖅ ᓯᓚᕐᔪᐊᒥ ᐅᑭᐅᖅᑕᖅᑐᓂᑦ ᐃᓄᓐᓂᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑲᑎᒪᔨᕋᓛᖏᑦ, ᐊᐱᖅᓱᖅᑕᐅᑎᓪᓗᒍ ᓯᕗᓪᓕᖅᐸᒥ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑲᑎᒪᓂᖏᓐᓂ 2009−ᒥ.

ᐃᓄᐃᑦ ᐃᓱᒪᒋᔭᖏᑎᒍᑦ, ᐋᓐᓂᐊᖅᑕᐃᓕᒪᔪᓕᕆᓂᖅ ᐃᓅᓇᓱᐊᑦᑎᐊᕐᓂᕐᓗ ᑕᑯᓐᓇᖅᑕᐅᒻᒪᑦ ᐃᓗᐃᑦᑑᓪᓗᒍ ᑎᒥᒃᑯᑦ ᐃᓱᒪᒃᑯᓪᓗ ᐃᓛᒃᑰᖅᑎᕐᓗᒋᑦ ᑲᒪᒋᔭᐅᔅᓴᐅᓐᖏᑦᑑᒃ ᑲᑎᓐᖓᔫᒃ ᐋᓐᓂᐊᖅᑕᐃᓕᒪᔪᓕᕆᓂᖅ ᓄᓇᑦᑎᓐᓂ ᐊᒻᒪᓗ ᐋᓐᓂᐊᖅᑕᐃᓕᒪᔪᓂᕆᓂᖅ ᓄᓇᒥᑦ. ᐃᓄᐃᑦ ᑲᒪᒋᖃᑦᑕᖅᓯᒪᔭᖏᑦ ᐋᖅᑭᐅᒪᔾᔪᑏᑦ ᐋᓐᓂᐊᖅᑕᐃᓕᒪᓂᕐᒧᑦ ᐊᔅᓱᕉᑕᐅᖃᑦᑕᖅᓯᒪᔪᑦ ᐊᑐᖅᑐᑎᑦ ᐱᐅᔪᐊᓗᒻᒥ ᐊᖏᔪᐊᓗᒻᒥᓪᓗ ᖃᐅᔨᒪᓂᖏᓐᓂ ᓴᓐᖏᓂᖏᓐᓂᓪᓗ ᓄᓇᖏᓐᓂ.

ᐃᓄᐃᑦ ᓄᓇᖓᓐᓂ, ᐊᒥᓱᑦ ᐃᓄᐃᑦ ᐊᔾᔨᒌᓐᖏᑦᑐᓂᒃ ᐋᓐᓂᐊᖅᑕᐃᓕᒪᔪᓕᕆᓂᕐᒥᑦ ᐊᑐᖅᐸᑉᐳᑦ. ᐃᓅᓯᕐᒥᑦ ᓂᕆᐅᓇᖅᑐᒥᑦ, ᓄᑕᕋᐅᓪᓗ ᐃᓅᒍᓃᐸᑦᑐᑦ, ᐊᒥᓱᓪᓗ ᐋᓐᓂᐊᒍᕙᑦᑐᑦ ᐃᒻᒥᓃᖃᑦᑕᖅᑐᓪᓗ ᑕᒪᒃᑯᐊ ᐃᓱᒫᓘᑎᓪᓚᕆᐊᓘᒻᒪᑕ. ᑎᒥᒃᑯᑦ ᐃᓱᒪᒃᑯᓪᓗ ᐱᔨᑦᑎᖅᑕᐅᒋᐊᓕᑦ, ᐱᖃᓯᐅᑎᓗᒋᑦ ᐋᓐᓂᐊᕕᓐᓂᑦ, ᑮᓇᐅᔭᖅᑎᒍᑦ, ᐃᓅᓯᓕᕆᓂᒃᑯᓪᓗ ᓈᒻᒪᖏᒻᒪᑕ ᐱᑕᖃᓐᖏᒻᒪᑦ ᑕᐃᒪᐃᑦᑐᓂᒃ ᐃᓄᐃᑦ ᓄᓇᖏᓐᓂ.

ᐱᓗᐊᖅᑐᒥᑦ, ᐃᓱᒪᓕᕆᓂᕐᒧᑦ ᐊᔅᓱᕈᓐᓇᖅᑐᒃᑰᖅᑐᓂᑦ ᐃᓄᓐᓂᑦ ᐊᒥᓱᓂᑦ ᐅᓪᓗᒥᐅᔪᖅ ᓈᒻᒪᖏᒻᒪᑕ ᓯᓚᕐᔪᐊᓕᒫᑦ ᒪᓕᒐᖏᐅᒐᓗᐊᖅᑎᓪᓗᒋᑦ. ᐊᒥᓲᓂᖅᓴᐅᒻᒪᑕ ᐃᒻᒥᓃᖃᑦᑕᖅᑐᑦ ᐃᓄᐃᑦ ᑕᒪᓐᓇ ᑐᐊᕕᕐᓇᖅᓯᓕᖅᑐᖅ. ᑲᑎᑦᑐᒋᑦ ᑭᓱᑐᐃᓐᓇᐃᑦ ᓄᓇᓕᓐᓂ ᑕᑯᔅᓴᓕᑦᑎᐊᖅᑐᑎᓪᓗ, ᓯᓚᕐᔪᐊᒥᓪᓗ ᑐᓴᐅᒪᔭᐅᓪᓗᑎᑦ, ᐱᖅᑯᓯᖏᓐᓃᓐᖔᖅᑐᓂᒃ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᐸᕐᓇᐅᑎᓂᒃ ᐱᒋᐊᕈᑎᓂᓪᓗ ᐋᖅᑭᔅᓱᐃᒋᐊᖃᓕᖅᑐᑦ ᐊᑐᓕᖅᑎᑕᐅᓗᑎᓪᓗ ᐃᓄᐃᑦ ᓄᓇᖏᓐᓂ ᑲᒪᒋᔭᐅᓗᑎᑦ ᐅᓗᕆᐊᓇᖅᑐᑦ, ᓴᖅᑭᔮᖅᑎᑦᑎᑲᓐᓂᕐᓗᑎᑦ ᓄᖅᑲᖓᑎᑦᑎᔾᔪᑎᔅᓴᓂᒃ, ᐃᒻᒥᓃᓐᖏᓂᖅᓴᐅᖃᑦᑕᖁᓪᓗᒋᑦ ᐃᓄᐃᑦ. ᐱᓗᐊᖅᑐᒥᑦ, ᓱᕈᓰᑦ ᐃᓅᓱᑦᑐᐃᓪᓗ ᐃᓱᒪᖏᑦ ᐊᔾᔨᐅᖏᑦᑐᒥᑦ ᐃᑲᔪᖅᑐᖅᑕᐅᒋᐊᖃᕐᖓᑕ ᐃᑲᔪᖅᑕᐅᓗᑎᓪᓗ ᖃᐅᔨᒪᑦᑎᐊᖅᑐᓂᑦ ᓯᓚᕐᔪᐊᒥ ᑲᑐᔾᔨᖃᑎᒌᓐᓂᒃ ᑲᑎᒪᓂᖏᓐᓂ ᒪᓕᓪᓗᑎᑦ ᐱᔪᓐᓇᐅᑎᒋᔭᐅᔪᓂᒃ ᓱᕈᓯᕐᓄᑦ ᒪᓕᒐᖅ 19 ᒪᓕᑦᑐᒍ ᐊᒻᒪᓗ 39.

ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᓇᑕᒥ ᓂᓪᓕᐊᔾᔪᑎᖃᐃᓐᓇᕐᖓᑕ ᑭᒡᒐᖅᑐᐃᓪᓗᑎᑦ ᐃᓄᓐᓂᑦ. ᑕᒪᓐᓇ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᐅᔪᖅ ᐃᓗᓕᖃᖅᑐᖅ ᖃᓄᖅ ᑲᒪᒋᔭᐅᔪᓐᓇᕐᒪᖔᑕ ᐃᓄᐃᑦ ᐋᓐᓂᐊᖅᑕᐃᓕᒪᔪᓕᕆᓂᖏᓐᓂ, ᓲᕐᓗ ᓯᓚᕐᔪᐊᒥ ᐅᑭᐅᖅᑕᖅᑐᒦᖑᖃᑎᒌᑦ ᐃᓄᐃᑦ ᑲᑎᒪᔨᕋᓛᖏᑦ, ᓲᕐᓗ ᐃᒪᐃᑦᑐᓂᑦ ᐱᓕᕆᐊᖑᔪᑦ ᓴᖅᑮᓂᖏᑦ (CREATeS), ᓄᓇᓕᓐᓂᑦ 2 ᓯᓚᕐᔪᐊᒧᑦ (L2G), 2021−ᒥ ᐃᓄᐃᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑲᑎᒪᓂᖏᑦ, ᐳᕝᕕᕆᓐᓇᖅ, ᐊᒻᒪᓗ ᑕᒪᒃᑯᐊ ᑐᖅᑯᖅᑕᐅᓯᒪᔪᑦ ᑎᑎᕋᖅᓯᒪᔪᑦ ᐊᕗᖔᓘᖓᔪᑦ ᐅᑭᐅᒐᓴᕐᓄᑦ ᐊᓂᒍᖅᓯᒪᓕᖅᑐᓄᑦ.