ᓰᑏᐱᕆᒥ 27, 2016 – (ᐅᖃᐅᓯᒥᓂᕐᓂᑦ) ᐅᓐᓄᓴᒃᑯᑦ. ᓈᓐᓯ ᖃᕆᑕᖅ−ᓕᓐᑎᐅᖑᔪᖓ. ᐃᓅᓚᐅᖅᓯᒪᔪᖓ ᓯᔾᔭᖏᓐᓂ ᐅᐊᓐᓇᖓᓐᓂ ᑲᖏᖅᑐᐊᓗᑉ ᐃᓗᐊᓂ ᐊᕐᕕᐊᓂᑦ ᑭᕙᓪᓕᕐᒥ ᓄᓇᕗᒻᒥ. ᒪᓕᒐᓕᐅᕐᕕᔾᔪᐊᒥ ᐃᓚᒋᔭᐅᓚᐅᖅᓯᒪᔪᖓ ᓄᓇᕗᒻᒧᑦ ᐱᒋᐊᖅᑐᒍ 1997 ᑎᑭᑦᑐᒍ 2008. ᐃᑲᔪᕋᓱᐃᓐᓇᕋᓗᐊᕋᒪ ᓄᓇᖅᑲᑎᓐᓄᑦ ᐅᑭᐅᖅᑕᖅᑐᒥ ᖃᓄᑐᐃᓐᓇᖅᑎᒍᑦ ᐃᓱᒪᒋᔭᕐᓂᑦ ᓄᓇᓕᓐᓂ ᐱᕙᓪᓕᐊᑎᑦᑎᓂᕐᒧᑦ, ᓄᓇᓕᑦᑎᐊᕙᕈᖅᑎᒐᓱᐊᕐᓗᒍ ᐃᓅᓇᓱᕝᕕᑦᑎᐊᕙᐅᓗᓂ. ᑕᒪᒃᑯᐊ ᐊᑐᖅᓯᒪᔭᒃᑲ ᐃᓱᒪᒋᔭᒃᑲᓗ ᐱᕙᓪᓕᐊᓂᑎᑦᑎᓂᕐᒥᑦ ᐅᑭᐅᖅᑕᖅᑐᒥ ᓴᖅᑭᖅᓯᒪᔪᑦ − ᑭᓱᓪᓗ ᐊᔪᕐᓇᖏᒻᒪᖔᑕ, ᑭᓱᓂᓗ ᐱᔭᕆᐊᖃᕐᒪᖔᑕ ᖃᓄᐃᑦᑐᓂᓪᓗ ᐊᔅᓱᕈᑎᖃᕆᐊᖃᕐᒪᖔᑦᑕ.
ᖁᔭᓐᓇᒦᒃ, ᓯᕗᓪᓕᖅᐹᒥ ᓇᐃᑕᓐ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᖃᐃᖁᔭᐅᓚᐅᕐᓂᓐᓄᑦ ᓂᓪᓕᐊᒋᐊᖅᑐᖁᔭᐅᓪᓗᖓ ᑲᑎᒪᓂᕐᔪᐊᖑᔪᒧᑦ. ᒫᓐᓇᐅᔪᖅ ᐱᒻᒪᕆᐅᔪᒦᒃᑲᑦᑕ ᐅᑭᐅᖅᑕᖅᑐᒥ. ᓄᑖᕐᒥ ᓱᓕᓪᓚᕆᑦᑐᒥ ᐱᕙᓪᓕᐊᒋᐊᖃᕋᑦᑕ ᐅᖃᐅᓯᕆᓗᒋᑦ ᐅᑭᐅᖅᑕᖅᑐᒥ, ᓯᓚᕐᔪᐊᓗ ᐅᖃᐅᓯᕆᒻᒥᓗᒍ. ᒫᓇᐅᔪᖅ ᐃᑳᖅᑕᖃᑦᑕᕐᓂᐊᕋᑕᑦ ᑕᐃᓱᒪᓂᐅᓪᓗᑕᓗ ᓯᕗᓂᑦᑎᓐᓄᑦ ᐋᖅᑭᔅᓱᐃᓗᑕ ᐅᑭᐅᖅᑕᖅᑐᒥ ᐃᓄᖁᑎᑦᑎᓂᓪᓗ. ᐅᖃᖃᑎᒌᓐᓂᒃᑯᑦ ᑕᒪᒃᑯᓂᖓ ᐋᖅᑮᒍᓐᓇᕋᑦᑕ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᕙᓪᓕᐊᓂᒃᑯᑦ ᑲᑎᒪᓂᐅᓛᖅᑐᒥ ᐊᓛᔅᑲᒥ ᐊᕐᕌᒎᓛᖅᑐᒥ − ᐃᓄᐃᑦ ᓄᑖᕐᓂᑦ ᐱᕙᓪᓕᐊᒍᓐᓇᕐᓂᐊᕐᖓᑕ, ᐱᓕᕆᖃᑎᖃᑦᑎᐊᓂᒃᑯᑦ, ᐱᕙᓪᓕᐊᓂᒃᑯᑦ ᐅᕙᒍᑦ ᐱᔪᒪᔭᑦᑎᓐᓂ ᒪᓕᖔᕐᓗᑕ − ᐱᕙᓪᓕᐊᓂᕐᒥᑦ ᑕᒪᑐᒥᖓᑑᓐᖏᑦᑑᒐᓗᐊᖅ − ᑭᐊᓂᓕ ᐃᑲᔪᖅᑏᒌᓪᓗᑕ ᑕᐃᒪᐃᓪᓗᐊᖃᑎᒌᓐᓂᒃᑯᑦ ᓄᓇᓕᑦᑎᓐᓂ.
ᐊᖏᔪᖅᑳᕗᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕ – ᐊᑕᐅᓯᖅ ᑎᓴᒪᖓᓐᓃᑦᑐᖅ ᐊᖏᔪᖅᑳᕐᓂᑦ ᓯᕗᓕᖅᑎᐅᖃᑕᐅᔪᑦ ᐃᓄᐃᑦ ᐅᖃᐅᖅᑕᖅᑐᒦᖃᑎᒌᑦ ᑲᑎᒪᔨᖏᓐᓄᑦ – ᐱᕙᓪᓕᐊᔪᓕᕆᓂᕐᒥᑦ ᓴᖅᑮᖅᐸᑕ ᐃᓄᓕᕆᓂᒃᑯᑦ ᐃᑲᔫᑎᖃᕋᔭᖅᑐᑦ ᓯᕗᓂᑦᑎᓐᓂ ᐃᓚᒌᑦᑎᓐᓄᑦ ᓄᓇᖅᑲᑎᑦᑎᓄᓪᓗ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓯᓚᕐᔪᐊᒥ ᑲᑐᔾᔨᖃᑎᒌᖏᓪᓗᑎᒃ ᐃᓕᓴᕆᔭᐅᓯᒪᔪᖅ ᐃᓗᐊᓂ ᓯᓚᕐᔪᐊᒥ ᑲᑐᔾᔨᖃᑎᒌᓐᓄᑦ ᐊᒻᒪᓗ ᐱᖃᑕᐅᖏᓐᓇᓂᕐᓂᕐᒧᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ, ᓂᐱᖃᖅᑎᐅᔪᑦ 160,000−ᓄᑦ ᐃᓄᓐᓄᑦ ᑲᓇᑕᒥ, ᑲᓛᖡᑦ ᓄᓈᓂ, ᐊᓛᔅᑲᒥ ᓴᑳᑦᑕᒥᓗ − ᑎᓴᒪᓂᒃ ᐊᔾᔨᒌᓐᖏᑦᑐᓂᑦ ᑲᑎᒪᔨᐅᔪᓂᒃ. ᐃᓄᐃᑦ ᐃᓄᐃᓴᑦᑐᕈᓘᒻᒪᑕ − ᓯᓚᕐᔪᐊᒦᓛᒃ, ᑭᓯᐊᓂᓕ ᐊᖏᕐᕋᖏᑦ ᐊᖏᔪᐊᓗᐃᑦ ᐊᒻᒪᓗ ᓂᐱᖃᖅᑎᐅᓪᓗᑕ ᓴᓐᖏᔪᐊᓗᒻᒧᓪᓗ ᐊᐅᓯᕐᒥᑦ ᐅᖃᐅᓯᖃᖅᑐᑎᑦ ᐊᑕᐅᓯᕐᒥᓪᓗ ᐱᖅᑯᓯᖃᖅᑐᑎᑦ.
ᐊᔅᓱᕉᑎᒋᔭᕗᑦ ᐃᓱᒪᒋᔭᕆᐊᖃᕋᑦᑎᒍᑦ ᐱᔭᐅᒋᐊᓖᑦ ᓄᓇᓕᑦᑎᓐᓂ ᐊᓯᔾᔨᐸᓪᓕᐊᔪᖅ ᓯᓚᕐᔪᐊᖅ ᒪᓕᓪᓗᒍ, ᑕᕝᕙᑦᑕᐅᑎᒋᓪᓗ ᐊᔅᓱᕉᑎᐅᓪᓗᑎᑦ ᐊᒻᒪᓗ ᑕᑯᓐᓇᖅᑕᐃᓐᓇᐅᓗᑎᑦ ᐅᑭᐅᖅᑕᖅᑐᒥ. ᐅᑭᐅᖅᑕᖅᑐᖅ ᓯᓚᕐᔪᐊᒥ ᑕᑯᓐᓇᖅᑕᐅᖏᓐᓇᕐᖓᑦ − ᑕᐃᒃᑯᐊᓗ ᐊᑐᕈᒪᔪᑦ, ᐅᒥᐊᕐᔪᐊᒃᑰᕈᒪᔪᑦ, ᕿᒥᕐᕈᒍᒪᔪᑦ, ᐅᔭᕋᕐᓂᐊᕈᒪᔪᑦ, ᖃᐅᔨᓴᕈᒪᔪᑦ ᐸᖅᑭᑦᑎᔪᒪᔪᓪᓘᒻᒪᑕ. ᐊᒻᒪᓗ, ᑮᓇᐅᔭᓕᐅᕈᑎᒋᓗᒋᑦ. ᑕᒫᓃᑦᑐᒍᑦ ᖃᓄᖅ ᑲᓇᑕᒥᐅ ᐃᓄᐃᑦ ᐱᐅᓂᖅᐹᖅᑎᒍᑦ ᐊᑑᑎᖃᖅᑎᑦᑎᓂᐊᕐᖓᑕ ᒪᓂᒪᔾᔪᑎᔅᓴᐅᔪᓂᒃ ᐊᓯᔾᔨᐸᓪᓕᐊᔪᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐱᓕᒻᒪᐸᓪᓕᐊᓗᑕ ᐃᓕᑦᑐᐸᓪᓕᐊᓗᒍᓗ ᐊᔅᓱᕉᑎᐅᖃᑦᑕᕐᓂᐊᖅᑐᑦ ᓯᕗᓂᑦᑎᓐᓂ.
ᐅᑭᐅᖅᑕᖅᑐᖅ ᐊᖏᕐᕋᕆᒐᑦᑎᒍ ᐱᓯᒪᑦᑎᔨᐅᓪᓗᑕᓗ. ᓄᓇ, ᐃᒪᕕᒃ ᓯᑯᐃᓪᓗ ᐊᖅᑯᑎᒋᒐᑦᑎᒍ, ᖃᐅᔨᓴᖃᑦᑕᕋᑦᑎᒍᓪᓗ ᐃᓕᑦᑐᖅᑐᑎᒍᓪᓗ ᐊᓯᔾᔨᕈᑎᔪᐃᑦ. ᐃᓚᒋᔭᐅᒋᐊᖃᕋᑦᑕ ᑮᓇᐅᔭᓕᐅᕈᑕᐅᓇᓱᐊᖅᑐᓂᒃ ᐅᑭᐅᖅᑕᖅᑐᒥ ᐅᕙᒍᓪᓗ ᐃᓱᒪᒋᔭᐅᒋᐊᖃᕐᒥᔪᒍᑦ ᐊᕐᕌᒍᓄᑦ 30−ᓄᑦ ᑕᑯᓐᓇᖅᑕᐅᓗᓂ ᐅᑭᐅᖅᑕᖅᑐᖅ − ᐅᑭᐅᖅᑕᖅᑐ ᓄᓇᓕᕗᓪᓗ ᑕᑯᓐᓇᕐᓂᐊᖅᑐᔅᓴᐅᒐᓗᐊᖅᑯᖅ ᑕᒪᑐᒥᖓ ᑕᐅᕗᖔᓗᒃ 2050−ᒧᑦ?
ᑕᒪᓐᓇ ᐃᓱᒪᒋᓪᓗᒍ ᐱᕈᖅᐸᓪᓕᐊᒍᒪᓂᐅᔪᖅ ᒪᑭᒪᔾᔪᑕᐅᔪᓂᒃ ᐱᕙᓪᓕᐊᓂᕐᒧᑦ ᐅᑭᐅᖅᑕᖅᑐᒥ, ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᖏᑦ ᓴᖅᑮᓚᐅᖅᓯᒪᔪᑦ ᐃᓗᐊᓂ ᑲᓇᑕᒥ ᐃᔅᓯᕙᐅᑕᐅᔪᓂᒃ ᐅᑭᐅᖅᑕᖅᑐᒧ ᑲᑎᒪᔨᓂᑦ 2014−ᒥ, ᑭᓯᐊᓂᓕ ᑲᑎᒪᔨᖏᑦ ᑮᓇᐅᔭᖃᖅᑎᑦᑎᔪᓂᒃ ᑐᕉᒻᓱᒦᑦᑐᖅ, ᓄᐊᐅᐃ. ᑖᒃᑯᐊ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᖏᑦ ᐊᐅᓚᑦᑎᖃᑦᑕᖅᑐᑦ ᐅᑭᐅᖅᑕᖅᑐᒥ ᓇᒻᒥᓂᖃᖅᑎᐅᔪᓂᒃ ᐊᐅᓚᑦᑎᓂᕐᒥᑦ ᑲᒪᖃᑦᑕᓂᕐᒥᓪᓗ ᐱᕙᓪᓕᐊᔪᓂᒃ. ᑕᑯᔪᒪᔪᑦ ᐱᓕᕆᖃᑎᒌᑦᑐᓂᒃ ᐅᑭᐅᖅᑕᖅᑐᒥ ᑲᑎᒪᔨᖏᓐᓂ ᐊᒻᒪᓗ ᐊᓯᖏᓐᓂ ᐅᑭᐅᖅᑕᖅᑐᖓᓐᓂ ᓯᓚᕐᔪᐊᑉ ᓇᒻᒥᓂᖁᑎᓕᕆᓂᕐᒥᑦ. ᑖᒃᑯᐊ 42−ᓂᒃ ᑲᑎᒪᔨᓖᑦ ᑎᓴᒪᐅᔪᖅᑐᓂᒃ ᐅᑭᐅᖅᑕᖅᑐᒦᓐᖔᖅᓯᒪᓪᓗᑎᑦ ᐱᖓᓲᔪᖅᑐᑦ ᐱᖃᑕᐅᖏᓐᓇᖅᑐᒦᓪᓗᑎᑦ ᑲᑐᔾᔨᖃᑎᒌᒻᒥᑦ
ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᖏᑦ ᑎᓴᒪᓂᒃ ᐸᕐᓇᑦᑎᖃᖅᑐᑦ ᐃᓱᒪᒋᐊᓕᓐᓂᒃ ᐃᒪᐃᑦᑐᓂᒃ:
1) ᐃᒪᒃᑯᑦ ᐃᖏᕐᕋᕙᑦᑐᓂᒃ;
2) ᑐᓴᐅᒪᖃᑦᑕᐅᑎᓕᕆᓂᖅ/ᖃᕋᓴᐅᔭᒃᑰᑦ ᐃᓕᕆᔩᑦ;
3) ᑲᒪᔪᑦ ᑭᓱᑐᐃᓐᓇᕐᓂᑦ ᐱᕙᓪᓕᐊᓂᕐᒧᑦ; ᐊᒻᒪᓗ,
4) ᐅᑭᐅᖅᑕᖅᑐᒥ ᑲᒪᑦᑎᐊᕐᓂᕐᒥᑦ.
ᑕᐅᕋ ᓱᐄᓂ, ᐅᑭᐅᖅᑕᖅᑐᒥ ᑎᒥᐅᔪᑦ ᐊᕕᑦᑐᖅᓯᒪᔪᓂᒃ ᑯᐊᐳᕇᓴᐅᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᓛᔅᑲᒥ ᑭᒡᒐᖅᑐᐃᔩᑦ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐱᒋᐊᖅᑎᑦᑎᕙᓪᓕᐊᔪᖅ ᓂᕈᐊᕋᔅᓴᓕᐅᖅᑐᑎᑦ ᑲᓇᑕᒥᐅᑕᕐᓂᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑭᒡᒐᖅᑐᐃᔨᔅᓴᖓᓐᓂ. ᓯᕗᓂᑦᑎᓐᓂ ᑖᒃᑯᐊ ᑲᑎᒪᔩᑦ ᐊᒻᒪᓗ ᐊᑦᑐᐃᓂᖃᕋᔭᕐᓂᖏᑦ ᓇᓗᓇᐃᖅᑕᐅᒐᔭᖅᑐᑦ ᑕᐃᒪᐃᓪᓗᐊᑎᑦᑎᓂᕐᒧᑦ ᐃᓄᓐᓂᑦ ᓄᓇᖅᑲᑎᒌᓐᓂᓪᓗ ᐱᕙᓪᓕᐊᑎᑦᑎᓂᕐᒥᑦ.
ᐊᒻᒪᓗᒃᑲᓐᓂᖅ, ᐅᑭᐅᖅᑕᖅᑐᒥ ᑲᑎᒫᔨᑦ ᒫᓐᓇ ᕿᒥᕐᕈᕙᓪᓕᐊᔪᖅ ᖃᓄᖅ ᐱᐅᓂᖅᐹᖑᒐᔭᕐᒪᖔᖅ ᐱᕙᓪᓕᐊᔪᓕᕆᓂᕐᒨᖓᔪᓂᒃ ᑲᑐᔨᖃᑎᒌᑦ ᐃᓗᐊᓂ. ᕿᒥᕐᕈᒻᒥᔪᑦ ᖃᓄᖅ ᐱᐅᓂᖅᐹᖑᒐᔭᕐᒪᖔᖅ ᓯᓚᑖᓃᓐᓂᖅᑲᑦ ᑎᒥᐅᔫᑉ, ᓲᕐᓗ ᓯᓚᕐᔪᐊᒥ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᖓᓐᓂ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᒧᑦ ᒪᓕᒐᐃᑦ. ᑖᒃᑯᐊ ᐱᕕᖃᖅᑐᑦ ᓴᖅᑮᓗᑎᑦ ᐊᑕᐅᓯᕐᒥᑦ ᓂᐱᒥᑦ − ᐊᑕᐅᓯᕐᒥᑦ ᑕᑯᓐᓇᖅᑕᖏᓐᓂ − ᐅᑭᐅᖅᑕᖅᑐᒥ ᐱᕙᓪᓕᐊᔪᓂᕆᓂᕐᒨᖓᔪᓂᒃ ᐃᓄᓐᓂᑦ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕ ᐱᕙᓪᓕᐊᔪᓕᕆᓂᕐᒥᑦ ᐃᓱᒪᖅᓴᖅᓯᐅᖅᓯᒪᔪᖅᐹᓗᐃᑦ. ᑕᐃᒫᒃ ᐅᖃᐅᓯᐅᓚᐅᖅᓯᒪᒻᒪᑦ 2019−ᒥ ᐅᑭᐅᖅᑕᖅᑐᒥ ᐃᓄᐃᑦ ᓇᓗᓇᐃᖅᑕᐅᓚᐅᖅᓯᒪᔪᖅ ᐊᑐᐃᓐᓇᐅᓂᖏᓐᓂ”, ᐃᓄᐃᑦ ᐃᑲᔪᖅᑐᐃᓪᓗᑎᑦ ᑕᒪᑐᒥᖓ ᐅᑭᐅᖅᑕᖅᑐᒥ ᐱᕙᓪᓕᐊᓂᕐᒥᑦ − ᑭᓯᐊᓂᓕᓂ ᐊᑭᖃᓐᖏᑦᑎᐊᖅᑐ. ᐱᑦᑎᐊᕆᐊᖃᓪᓚᕆᑦᑐᓂ. ᑕᐃᒪᐃᓕ, ᐱᑦᑎᐊᕆᐊᖃᕐᓂᖅ ᖃᓄᖅ ᑐᑭᖃᕐᖓᑦ, ᐱᓗᐊᖅᑐᒥᑦ ᖃᓄᖅ ᑐᑭᖃᖅᑲ ᑲᓇᑕᐅᑉ ᐅᑭᐅᖅᑕᖅᑐᖓᓐᓂ ᓯᓚᕐᔪᐊᒧᓪᓗ? ᐊᒻᒪᓗ ᐅᕙᑦᑎᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ ᐅᑲᓕᖅ ᐃᔨᑦᓯᐊᖅ ᐅᖃᓚᐅᖅᑐᖅ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᒥᓂᔅᑕᖓ ᑲᑎᒪᑎᑦᑎᓚᐅᖅᓯᒪᔪᑦ ᐱᓇᓱᐊᕈᓯᕆᓚᐅᖅᑕᑎᓐᓂ ᐃᖃᓗᓐᓂ, “ᑕᐃᒪᔅᓴᐃᓐᓇᖅᑕᐅ ᐱᒻᒪᕆᐅᔪᒥᑦ, ᖃᓄᖅ ᑕᒪᓐᓇ ᑎᑭᒐᓱᐊᕋᔭᕋᑦᑎᒍ”?
ᑖᓐᓇ ᐃᓄᐃᑦ ᑕᐱᕇᑦ ᑲᓇᑕᒥ ᐱᕙᓪᓕᐊᓂᕐᒧᑦ ᑲᑎᒪᓚᐅᖅᓯᒪᔪᑦ ᑕᐅᑯᖓ ᑎᑭᒐᓱᐊᖅᑐᑎᑦ. ᑲᑎᒪᓂᕐᒥᑦ ᐱᕙᓪᓕᐊᒐᓱᐊᖅᑐᑎᑦ, ᐊᓯᖏᓐᓂᓪᓗ ᐱᕕᖃᕋᓱᐊᖅᑐᑎᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓯᓚᕐᔪᐊᑉ ᑲᔾᔨᖓᓐᓂ ᐅᑭᐅᖅᑕᖅᑐᒥ ᐃᓄᐃᑦ ᐱᕙᓪᓕᐊᓂᕐᒧᑦ ᑲᑎᒪᓪᓗᑎᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖁᔭᐅᓕᓚᐅᖅᓯᒪᔪᑦ ᐃᓄᓐᓄᑦ 2014 ᐊᖅᑯᑎᖃᕐᓗᑎᑦ ᑭᑎᒑᕐᔪᐃᑦ ᓇᓗᓇᐃᖅᑕᐅᓗᑎᑦ, ᐸᕐᓇᓪᓗᑎᑦ ᑲᑎᒪᕕᔾᔪᐊᕐᓗᑎᓪᓗ ᐱᕙᓪᓕᐊᕐᓂᕐᒧᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᓛᔅᑲᒥ ᓯᕗᒃᑲᖅᑕᐃᓗᑎᑦ ᐊᒻᒪᓗ ᑲᑎᒪᑎᑦᑎᓗᑎᑦ ᐸᕐᓇᔅᓯᒪᔪᑦ ᕖᕝᕗᐊᕆᒥ 2017−ᒥ ᖃᓂᒋᔭᖓᓐᓂ ᐊᓐᑯᕆᔅᒥ. ᑐᕌᒐᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᕙᓪᓕᐊᓂᕐᒧᑦ ᑲᑎᒪᓂᐅᔪᑦ ᐱᓕᕆᖃᑎᖃᒃᑲᓐᓂᕈᒪᓚᐅᖅᓯᒪᔪᑦ ᐃᓄᐃᑦ ᓇᒻᒥᓂᖃᖅᑎᐅᔪᑦ ᐊᒻᒪᓗ ᐊᐅᓚᑦᑎᓗᑎᑦ ᐃᓄᓐᓂᑦ ᓇᒻᒥᓂᖃᕐᓂᐅᔪᓂᒃ ᑲᑐᔾᔨᓗᑎᒃ ᐊᑐᖅᓯᒪᔭᖏᓐᓂ.
ᑲᑎᒪᖃᑕᐅᔪᑦ ᐊᕕᑦᑐᖅᓯᒪᔪᓂᒃ ᓄᓇᓕᓐᓂᓪᓗ ᑯᐊᐳᕇᓴᓐᓂᑦ, ᒐᕙᒪᐅᔪᓂᓪᓗ ᑎᓴᒪᐅᔪᓂᒃ ᐃᓄᓐᓂᑦ ᓄᓇᓕᕐᔪᐊᕐᓂᑦ ᐊᓯᖏᓐᓂᓪᓗ ᐅᑭᐅᖅᑕᖅᑐᒥ ᐱᕙᓪᓕᐊᓂᕐᒧᑦ ᐱᖃᑕᐅᒍᒪᓯᒪᔪᑦ ᑎᒥᐅᔪᓂᒃ ᒪᑯᓂᖓ ᐅᔭᕋᕐᓂᐊᕐᓂᕐᒧᑦ, ᐅᖅᓱᐊᓗᓐᓂ ᒑᓯᓂᓪᓗ, ᐃᖏᕐᕋᔪᓕᕆᓂᕐᒥᑦ, ᐳᓚᕋᖅᑐᓕᕆᓂᕐᒥᑦ, ᑮᓇᐅᔭᒃᑯᕕᓕᕆᓂᕐᒥᑦ, ᑐᓴᐅᒪᖃᑦᑕᐅᑎᓕᕆᓂᕐᒥᑦ ᐃᖃᓗᓕᕆᓂᕐᒥᓪᓗ ᑲᑎᒪᖃᑕᐅᓗᑎᑦ. ᐅᖃᖃᑎᒌᑦᑐᑦ ᐱᕙᓪᓕᐊᓂᕐᒨᖓᔪᓂᒃ ᐊᐱᖅᑯᑎᔅᓴᖃᐅᖅᑐᑎᓪᓗ.
ᓲᕐᓗ: ᐅᑉᐱᕆᔭᐅᓂᖏᑦ ᐱᔪᒪᓯᒪᔪᒃ ᐊᒻᒪᓗ ᐅᓗᕆᐊᕈᓐᓇᕐᓂᖏᓪᓗ − ᐃᓄᓪᓗᑕ, ᖃᓄᐃᑦᑐᒥᑦ ᐅᓗᕆᐊᓇᕈᑎᖃᖅᑭᑕ? ᐱᔾᔪᑎᓖᑦ ᐃᑯᐱᑦᑐᓕᕆᓂᕐᒥᑦ: ᑕᒪᓐᓇ ᖃᓄᖅ ᑐᑭᖃᖅᑲ ᐃᓄᓐᓄᑦ ᐃᓱᒪᒋᔭᖏᓐᓄᑦ ᐊᑭᔅᓴᒃᑯᑦ? ᑕᒪᑐᒥᖓ ᑭᒃᑯᑐᐃᓐᓇᕐᓄᑦ/ᐃᒻᒥᒃᑯᓪᓘᓐᓃᑦ ᐱᖃᑕᐅᔪᓂᑦ – ᖃᓄᖅ ᑕᒪᒃᑯᐊ ᓇᓕᒧᒌᖅᑎᓕᒐᓱᒍᓐᓇᖅᑲᕗᑦ ᐊᑐᕐᓗᑎᒍ ᓄᓇᓕᓐᓂᑦ? ᑕᒪᑐᒥᖓ ᐃᓪᓗᐃᑦ ᒥᔅᓵᓄᑦ − ᖃᓄᐃᑦᑐᓂᑦ ᓴᓇᕕᓐᓂᑦ ᐃᑲᔪᖅᑐᐃᒍᒪᒐᔭᖅᑭᑕ ᐃᓪᓗᓂᑦ ᓄᓇᓕᓐᓂᑦ ᓱᓇᒃᑯᑖᓂᓪᓗ ᐊᒻᒪᓗ ᖃᓄᐃᑦᑐᓂᑦ ᐃᓕᓐᓂᐊᑎᑦᑎᒋᐊᖃᕋᔭᖅᑭᑕ ᐃᖅᑲᓇᐃᔭᖅᑐᔅᓴᓂᑦ? ᐊᒻᒪᓗ, ᑭᖑᓪᓕᖅᐹᒥᓪᓕ, ᖃᓄᖅ ᑕᒪᒃᑯᐊ ᐃᓄᐃᑦ ᓇᒻᒥᓂᖃᖅᑐᑦ ᑕᐃᒪᓪᓗᐊᖅ ᐱᔪᓐᓇᕐᓂᖃᕋᔭᖅᑲᑦ ᐃᑲᔪᖅᑐᖅᑕᐅᑦᑎᐊᕐᓗᑎᑦ ᐱᓕᕆᓇᓱᐊᕐᓗᑎᑦ ᐃᑲᔫᑎᖃᕐᓗᑎᑦ ᐱᕙᓪᓕᐊᓂᕐᒥᑦ ᐅᑭᐅᖅᑕᖅᑐᒦᖏᓐᓇᕐᓗᑎᑦ ᐅᕙᑦᑎᓂᓪᓘᓐᓃᑦ? ᓇᒻᒥᓂᕆᔭᐅᒐᔭᖅᑲᑦ ᐃᓄᓐᓄᑦ ᐅᑭᐅᖅᑕᖅᑐᒥ?
ᓂᕆᐅᒋᔭᖃᑦᑎᐊᖅᑯᖓ ᐊᒥᓱᑦ ᑲᑎᒪᖃᑕᐅᔪᑦ ᑕᑯᓐᓇᓂᖅᓴᐅᓂᐊᓕᕐᖓᑕ ᐃᒻᒥᒃᑯᑦ ᓇᒻᒥᓂᖃᕐᓂᕐᒥᑦ ᐱᔪᒪᔭᒥᓂᒃ ᐃᓪᓗᓂᒃ ᕿᒥᕐᕈᑦᑎᐊᕐᓗᑎᑦ ᑕᒪᑐᒥᖓ ᐅᑭᐅᖅᑕᖅᑐᒥ. ᑲᑎᒪᖃᑕᐅᑦᑎᐊᖁᕙᒋᑦ ᑕᒪᑐᒥᖓ ᐱᒻᒪᕆᐅᔪᒥᑦ ᕖᕝᕗᐊᕆᒥ ᐊᓛᔅᑲᒥ ᐅᖃᐅᓯᕆᒃᑲᓂᕐᓂᐊᕋᑦᑎᒍ ᐱᕙᓪᓕᐊᓗᑎᒍᓪᓗ ᐅᑭᐅᖅᑕᖅᑐᒥ ᓯᓚᕐᔪᐊᒥᓗ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᓛᔅᑲᒥ ᐋᖅᑮᓚᐅᖅᓯᒪᔪᑦ ᐊᓛᔅᑲᒥ ᐸᕐᓇᐃᔨᐅᓂᐊᖅᑐᓂᒃ ᑲᑎᒪᔨᕋᓛᕐᓂᑦ ᑭᒡᒐᖅᑐᐃᔨᓂᒃ ᑎᓴᒪᓂᒃ ᐊᕕᑦᑐᖅᓯᒪᔪᓂᒃ ᑯᐊᐳᕇᓴᒃᑯᓐᓂ ᐊᒻᒪᓗ ᔨᒻ ᓯᑖᑦᔅ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᓛᔅᑲᒥ ᐊᖏᔪᖅᑳᖓᓐᓂ, ᑲᑎᒪᔨᕋᓛᒧᑦ ᐃᔅᓯᕙᐅᑕᐅᓗᓂ. ᑲᑎᒪᔨᕋᓛᑦ ᐸᕐᓇᒋᐊᖅᓯᒪᓕᖅᑐᑦ ᓴᖅᑮᓯᒪᓪᓗᑎᓪᓗ ᐅᑭᐅᖅᑕᖅᑐᒥ ᐸᕐᓇᑦᑏᑦ ᑲᑎᒪᔨᕋᓛᖏᑦ. ᑭᓕᓐᑦ ᑕᐃᕙᔅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᑎᓕᓯᓯᒪᔪᖅ ᐅᑭᐅᖅᑕᖅᑐᒥ ᐸᕐᓇᑦᑏᑦ ᑲᑎᒪᔨᕋᓛᖏᓐᓂ ᖁᔭᓐᓇᒦᓪᓗ ᐊᖏᖅᓯᒪᒻᒪᑦ ᑕᒪᑐᒥᖓ. ᐊᑐᓕᖁᔭᐅᓯᒪᔪᑦ ᐊᒻᒪᓗ ᐅᓂᒃᑳᑦ ᑕᒪᑐᒥᖓ ᐊᑑᑎᖃᓪᓚᕆᓛᖅᑐᑦ ᐱᕙᓪᓕᐊᒐᓱᐊᖅᑎᓪᓗᒋᑦ ᐅᖃᐅᓯᕆᔭᐅᖃᑦᑕᕐᓗᑎᑦ ᑲᓇᑕᒥᐅᑕᕐᓂᑦ ᐱᕙᓪᓕᐊᒐᓱᒍᒪᓂᖏᓐᓂ ᐅᑭᐅᖅᑕᖅᑐᒥ.
ᐱᕙᓪᓕᐊᑎᑦᑎᓂᕐᒥᑦ ᑐᑭᓕᒃ ᐊᔾᔨᒌᓐᖏᑦᑐᓂᒃ ᐅᑭᐅᖅᑕᖅᑐᑦ ᓄᓇᓕᕐᔪᐊᖏᓐᓂ, ᐊᔾᔨᒌᓐᖏᑦᑐᑦ ᐅᑭᐅᖅᑕᖅᑐᒥ ᐊᒻᒪᓗ ᐊᓪᓛᒃ ᐊᔾᔨᒌᓐᖏᑦᑐᓂᒃ ᓄᓇᓕᓐᓂᑦ ᐃᓄᐃᑦ ᓄᓇᖏᓐᓂ ᐊᕕᑦᑐᖅᓯᒪᔪᓂᒃ. ᑭᓯᐊᓂᓕ ᓇᓗᓇᓐᖏᑦᒃᑐᖅ – ᐱᕙᓪᓕᐊᑎᑦᑎᓂᖅ ᑲᔪᓯᑎᑕᐅᑦᑎᐊᑐᐊᖅᑲᑦ ᑕᐃᒪᐃᓪᓗᐊᑎᑦᑎᓂᐅᕗᖅ. ᑐᑭᓕᒃ ᐊᑯᓂᒧᑦ ᑲᔪᓰᓐᓇᖅᑎᐊᓗᓂ ᓄᓇᑦᑎᓐᓂ, ᓯᕗᓂᑦᑎᓐᓄᑦ ᐃᓄᓱᑦᑐᓄᑦ, ᐱᑕᖃᕈᓐᓃᖅᑎᓪᓗᒋᑦ ᐊᔪᖅᓴᕐᓂᐅᖃᑦᑕᖅᑐᑦ ᓄᓇᓕᓐᓂᑦ. ᑐᑭᓕᒃ ᐱᕙᓪᓕᐊᑎᑦᑎᓂᖅ ᐱᔭᕆᐊᑭᑦᑐᑯᓘᓐᖏᒻᒪᑦ ᐃᓄᓐᓄᑦ ᐅᑭᐅᖅᑕᖅᑐᒥ.
ᐊᒻᒪᓗ ᑐᕌᖓᓪᓗᓂ ᐃᓄᓐᓄᑦ ᐅᑭᐅᖅᑕᖅᑐᒥ. ᐱᕙᓪᓕᐊᑎᑦᑎᓂᕐᒥᑦ ᐃᓱᒪᒋᐊᖃᖅᑐᒍᑦ ᐃᓄᓐᓂᑦ ᑕᐃᒪᐃᓪᓗᐊᑎᑦᑎᒐᓱᐊᕐᓗᑕ ᐱᒻᒪᕆᐅᒋᔭᕆᔭᕆᐊᖃᖅᑕᕗᑦ, ᐱᒻᒪᕆᐅᓂᖅᓴᐅᖏᓪᓗᓂ ᑎᒍᒥᐊᖅᑎᓂᒃ ᐊᑭᖏᓐᓂᓪᓘᓐᓃᑦ. ᐱᕙᓪᓕᐊᔪᓕᕆᓂᕐᒥᑦ ᒪᑭᒪᔾᔪᑕᖃᖅᑎᑦᑎᒋᐊᖃᖅᑐᒍᑦ ᓴᓇᓗᑕ ᐱᖅᑯᓯᖅᑎᓐᓅᖓᔪᓂᒃ ᓄᓇᖃᑦᑎᐊᖅᑐᓕᕆᓂᕐᒥᓪᓗ ᐊᑭᑦᑐᕋᐅᑎᓐᖏᓪᓗᑕ, ᑕᐃᒪᐃᓕᒐᓱᓕᖃᑦᑕᕐᖓᑦ ᐊᒥᓱᐊᖅᑎ.
ᐱᕕᖃᕐᒥᒐᑦᑕ ᓇᓗᓇᐃᖅᓯᓗᑕ ᐃᓕᓐᓂᐊᕈᑎᔅᓴᓂᒃ ᐃᒻᒥᒃᑯᑦ ᐱᔪᒪᓂᖅᑖᑲᓐᓂᖁᓪᓗᑕ ᐱᕙᓪᓕᐊᓂᒃᑯᑦ ᑐᑭᓯᓇᖅᑐᒥᑦ ᑲᒪᒋᔭᖃᖅᑐᓂᑦ ᐃᓄᓕᕆᓂᕐᒥᑦ, ᐱᖅᑯᓯᓕᕆᓂᕐᒥᑦ ᐊᕙᑎᑦᑎᓂᓪᓗ ᐊᔅᓱᕉᑕᐅᕙᑦᑐᓂᒃ ᒪᑭᒪᔾᔪᑕᐅᑎᓇᓱᐊᕐᓗᒋᑦ ᐃᓄᐃᑦ ᓄᓇᖓᓐᓂ. ᐱᕙᓪᓕᐊᓂᕐᒧᑦ ᐋᖅᑭᐅᒪᔾᔪᑏᑦ ᒪᑯᓄᖓ ᑕᕝᕙᑦᑕᐅᑎᒋ ᐃᓄᓐᓄᑦ ᐊᔅᓱᕉᑕᐅᕙᑦᑐᓂᒃ ᑲᔪᓯᑎᑦᑎᓂᖅ ᓲᕐᓗ ᓂᕿᖃᑦᑎᐊᖃᑦᑕᖏᑦᑐᓄᑦ, ᐃᓄᓕᕆᓂᕐᒥᑦ ᐱᕙᓪᓕᐊᓂᕐᒥᑦ, ᓯᓚᓗ ᐊᓯᔨᐸᓪᓕᐊᓂᖓᓐᓂ, ᐊᓯᖏᓐᓂᓪᓗ ᓄᑖᕐᓂᑦ ᓴᖅᑭᐸᑦᑐᓂᑦ ᐅᓪᓗᒥᐅᓕᖅᑐᖅ. ᑭᓯᐊᓂᓕ, ᑕᐃᒪᐃᓐᓂᐊᕈᑦᑕ, ᐃᓱᒪᓐᖑᐊᑲᓐᓂᕋᓱᒋᐊᖃᖅᑯᒍᑦ ᐊᖅᑭᒐᓱᒃᑲᓂᕐᓗᒍᓗ ᐱᕙᓪᓕᐊᑎᑦᑎᓂᕐᒧᑦ ᐅᑉᐱᕆᔭᕗᑦ ᐱᐅᓂᖅᐹᒃᑯᑦ ᐊᑦᑐᐃᓂᖃᑦᑎᐊᕐᓂᐊᕐᖓᑕ ᐃᓄᓕᕆᓂᕐᒥᑦ ᓄᓇᖃᑦᑎᐊᖅᑐᓕᕆᓂᕐᒥᓪᓗ ᐊᔪᕐᓇᓐᖏᑐᐊᖅᑲᑦ. ᑖᒃᑯᐊ ᓇᓕᒧᒌᑦᑎᓇᓱᒋᐊᖃᖅᑕᕗᑦ ᐅᑭᐅᖅᑕᖅᑐᒥ ᐱᕙᓪᓕᐊᓂᕐᒧᑦ ᑐᕌᒐᐃᔭᐅᔪᑦ ᐃᓄᓐᓄᑦ ᑎᒍᓯᑐᐃᓐᓇᖏᓪᓗᑕ ᐊᓯᖏᓐᓂ ᐃᓕᑦᑐᑐᐃᓐᓇᓐᖏᓪᓗᑕᓗ ᐱᕙᓪᓕᐊᑎᑦᑎᓂᕐᒥᑦ ᖃᓪᓗᓈᓃᓐᖔᖅᑐᓂᒃ. ᐱᐅᓂᖅᐹᕐᓂᑦ, ᐃᓕᓐᓂᐊᖅᓯᒪᔪᓂᒃ, ᓇᒻᒥᓂᖅ ᐱᔪᒪᑦᑎᐊᕐᓂᖏᓐᓂ ᐱᓕᒻᒪᔅᓯᒪᔪᓂᓪᓗ ᐃᖅᑲᓇᐃᔭᕐᕕᓐᓂᑦ ᑖᒃᓰᔭᕈᑎᓂᓪᓗ ᐅᑭᐅᖅᑕᖅᑐᒥ, ᐃᓅᓇᓱᐊᕐᓂᖅ ᐅᑭᐅᖅᑕᖅᑐᒥ ᐊᑭᖏᓐᓂ ᑲᒪᑦᑎᐊᕋᓱᓐᓂᖅᓴᐅᓗᓂ ᐊᒻᒪᓗ ᒐᕙᒪᒃᑯᓐᓂ − ᑕᐃᒫᒃ ᑕᒪᒃᑮᓐᓄᒃ ᐃᑲᔪᕐᓂᖃᖅᑐᐃᓐᓇᐅᒐᔭᖅᑐᑦ.
ᐃᓕᕋᓇᖅᑐᐊᓘᔮᖅᑑᒐᓗᐊᖅ ᐱᓕᕆᐊᕆᓇᓱᐊᕐᓗᒍ ᐃᓄᑑᑎᔪᓐᓇᕐᓇᑎᒍᓪᓗ. ᐃᑲᔪᖅᑎᒌᑦᑐᐃᓐᓇᐅᓗᑕ ᑭᓯᐊᓂ ᑲᔪᓯᒍᓐᓇᕋᔭᕋᑦᑎᒍ, ᓄᓇᓕᒻᒥᐅᑕᐅᒐᓗᐊᕈᕕᑦ, ᖃᐅᔨᓴᖅᑎᒻᒪᕆᐅᒍᕕᑦ, ᓴᓇᔨᓄᑦ ᐊᖏᔪᖅᑳᖑᒍᕕᑦ, ᐱᐅᖅᓱᐊᖅᑎᐅᒍᕕᑦ ᐅᕝᕙᓘᓐᓃᑦ ᒐᕙᒪᐅᒐᓗᐊᕈᕕᑦ − ᑕᐃᒃᑯᐊ ᐅᑉᐱᕆᔭᖃᑦᑎᐊᖅᑐᑦ ᐱᓕᕆᖃᑎᒋᓐᓂᕐᒥᑦ ᐅᑭᐅᖅᑕᖅᑐᒥ ᐱᓕᕆᖃᑎᒌᓇᓱᑦᑎᐊᖏᓐᓇᕐᓗᑎᑦ ᓄᓇᓕᐅᑉ ᐅᑉᐱᕆᔭᖏᓐᓂ ᑲᔪᓯᑎᑦᑎᓇᓱᐊᕐᓗᑎᑦ.
ᑐᓴᕈᒥᓇᖅᑐᕐᓕ ᐱᒋᐊᖓᕐᓂᓪᓚᕆᑯᓗᐊᓂ ᐱᒋᐊᖃᔾᔮᖏᓐᓇᑦᑕ. ᐊᒥᓱᓂᑦ ᑕᖏᓕᓐᓂᑦ ᑲᔪᓯᓯᑦᑎᓯᒪᒌᖅᑐᒍ ᑕᕝᕙᓐᖓᑦ ᐱᒋᐊᕈᓐᓇᖅᑐᒍᑦ. ᐅᐊᑦᑎᐊᕈᕐᓂᓴᕐᓂᓪᓗ ᐊᑐᕐᓗᑕ ᐊᑐᐊᖅᓯᒍᓐᓇᖅᑐᒍᑦ, ᑕᐃᒪᒃ ᐱᖅᑯᓯᒋᔭᕗᑦ, ᓲᕐᓗ ᐃᑲᔫᑎᖃᕐᓂᖅ ᑎᒍᑦᑎᐊᕋᓱᐊᕐᓗᑎᒍ, ᑐᓐᖓᕕᒋᓗᒋᑦ ᖃᓄᖅ ᓯᕗᒧᐊᒃᑲᓐᓂᕈᓐᓇᕋᔭᕐᒪᖔᑦᑕ. ᐊᒻᒪᓗ, ᐱᓕᕆᔪᒪᑦᑎᐊᖅᑐᑕ ᓄᓇᑦᑎᓐᓂ ᐃᓄᓱᑦᑐᐃᓪᓗ ᓯᕗᓕᖅᑎᐅᒍᓐᓇᕐᓗᑎᑦ ᓴᖅᑮᑲᓐᓂᕋᓱᐊᕐᓗᑎᑦ ᐅᑉᐱᕆᔭᒥᓂᒃ ᓄᓇᓕᖏᓐᓂ ᐱᕙᓪᓕᐊᓂᑦᑎᒍᑦ. ᐊᒥᓱᓂᑦ ᑕᑯᓯᒪᔪᒍᑦ ᑲᔪᓯᑦᑎᐊᖅᓯᒪᔪᓂᒃ ᐃᓄᓐᓂ ᐅᑉᐱᕆᔭᖏᑎᒍᑦ ᑲᔪᓯᑎᑦᑎᓯᒪᔪᓂᒃ ᐃᑲᔪᖅᓯᒪᔪᓂᒃ, ᐱᓕᕆᖃᑎᖃᖅᓯᒪᔪᓂᒃ ᓯᕗᒃᑲᖅᑕᐃᓯᒪᔪᓂᓪᓗ.
ᐆᑑᑎᖃᖅᑐᒍᑦ ᐱᓕᕆᔪᒪᑦᑎᐊᕐᓂᕐᒥᑦ ᐊᔾᔨᐅᖏᑦᑐᓂᑦ, ᑲᔪᓯᑦᑎᐊᖅᓯᒪᔪᓂᒃ ᐃᖃᓗᓕᕆᓂᕐᒥᑦ, ᐆᒻᒪᖅᑯᑎᓕᕆᓂᕐᒥᑦ, ᐳᓚᕋᖅᑐᓕᕆᓂᕐᒥᑦ, ᐅᒥᐊᕐᔪᐊᑦ ᐅᔭᕋᕐᓂᐊᕐᓂᒥᓪᓗ ᐊᓯᖏᓐᓂᓪᓗ ᐱᑕᓕᒃ. ᑕᒪᒃᑯᓂᖓ ᑲᒪᒋᔭᖃᖅᑐᑎᑦ ᐃᓄᐃᓐᓄᑦ ᓯᕗᒃᑲᖅᑕᖅᑕᐅᓗᑎᑦ ᑲᔪᓯᑦᑎᐊᖅᓯᒪᔪᓂᒃ ᐅᓂᒃᑳᖃᖅᑐᒍᑦ ᐱᕙᓪᓕᐊᑎᑦᑎᓂᕐᒧᑦ ᐅᑭᐅᖅᑕᖅᑐᒥ ᓇᒥᑐᐃᓐᓇᖅ ᑎᒍᒥᐊᖅᑎᓄᑦ ᐅᑉᐱᕆᔭᐅᔪᓂᒃ ᐊᒻᒪᓗ ᓄᓇᓕᓐᓄᓪᓗ ᐅᑉᐱᕆᔭᐅᔪᓂᒃ ᑕᐃᒪᐃᓪᓗᐊᑎᑦᑎᓂᕐᒥᑦ ᒪᑯᓂᖓ ᒪᑭᒪᓂᕐᒥᑦ, ᐱᖅᑯᓯᖏᓐᓂ ᐃᓄᓕᕆᓂᕐᒥᓪᓗ ᐱᕙᓪᓕᐊᓂᖏᓐᓂ ᐊᒻᒪᓗ ᐊᖏᓂᖅᐹᖅᒍᑦ ᐊᑐᖅᑕᐅᑦᑎᐊᕐᓗᑎᑦ ᑮᓇᐅᔭᓕᒫᑦ ᐊᑐᑦᑎᐊᕐᓗᒋᑦ. ᐊᒥᓱᓂᑦ ᐆᑦᑑᑎᑕᖃᒃᑲᓂᕐᒥᔪᖅ ᑭᓯᐊᓂ ᐊᕐᕌᒍᒐᓴᕐᓄᑦ ᐱᓕᕆᖃᑎᖃᖃᑦᑕᖅᑐᑎᑦ ᓇᒻᒥᓂᖃᖅᑎᐅᔪᓂᒃ, ᒐᕙᒪᒃᑯᓐᓂ ᓄᓇᓕᓐᓂᓪᓗ ᑲᔪᓯᑦᑎᐊᖅᓯᒪᔪᑦ ᑕᒪᒃᑯᐊ.
ᓲᕐᓗ ᐆᒻᒪᖅᑯᑎᓕᕆᓂᖅ ᐆᑦᑑᑎᒋᓗᒍ, ᓱᕈᓐᓇᖅᑐᕈᔪᖃᑦᑎᐊᓐᖏᑦᑐᓂᑦ ᒪᑭᒪᔾᔪᑎᖃᕐᓂᖅ, ᐃᓄᐃᑦ ᑕᒪᑐᒥᖓ ᓯᕗᒃᑲᖅᑕᐃᔪᓐᓇᖅᑐᑦ ᐊᔾᔨᐅᖏᑦᑐᒃᑯᑦ ᓇᒻᒥᓂᖃᕐᓂᕐᒨᖓᔪᓂᒃ ᐃᓄᓕᕆᓂᕐᒨᖓᔪᓂᓪᓗ − ᑕᒪᒃᑯᐊ ᐃᓕᖅᑯᓯᐅᔪᑦ ᐱᐅᓯᕚᓪᓕᑎᑦᑎᒍᑕᐅᕙᑦᑐᑦ ᐅᖅᑰᓇᓱᐊᑦᑎᐊᕐᓂᕐᒥᑦ. ᐃᓕᖅᑯᓯᐅᔪᑦ ᐱᐅᓯᕚᓪᓕᕈᑕᐅᔪᑦ ᐊᖏᕐᕋᑎᓐᓄᑦ ᐃᓕᖅᑯᓯᐅᔪᑦ ᐱᓕᒻᒪᓴᕐᓂᕐᒧᑦ ᐃᓕᓐᓂᐊᑎᑦᑎᒍᑕᐅᔪᓐᓇᖅᑐᑦ, ᐊᖏᔪᓂᑦ ᐱᕙᓪᓕᐊᑲᓐᓂᕈᓐᓇᓂᕐᒥᑦ ᐃᖅᑲᓇᐃᔭᖅᑎᑦᑎᓂᕐᒥᓪᓗ. ᑕᐃᒫᒃ ᔮᓐ ᑭᐅᕆ ᐅᖃᓚᐅᕐᖓᑦ ᐅᓂᒃᑳᕐᒥᓂᑦ ᐊᖏᔪᖅᑳᕐᒥᑦ ᐅᑭᐅᖅᑕᖅᑐᒥ ᑲᑎᒪᔨᑦ ᐃᔅᓯᕙᐅᑕᕆᓪᓗᓂᐅᒃ ᐊᐃᐳᓗᒥ 2015−ᒥ “ᐱᕙᓪᓕᐊᓇᓱᐊᕐᓂᖅ ᐅᒻᒪᖅᑯᑎᓕᕆᓂᕐᒥᑦ ᐊᑦᑐᐊᓪᓚᕆᑦᑐᖅ ᐱᕙᓪᓕᐊᓂᕐᒨᖓᔪᓂᒃ ᐅᑭᐅᖅᑕᖅᑐᒥ – ᐃᖅᑲᓇᐃᔭᑦᑎᐊᕙᖃᕐᓗᑎᑦ ᐊᑭᓕᖅᓱᐃᖅᑎᐊᖅᑐᓂᑦ ᓄᓇᓕᓐᓂᑦ, ᑮᓇᐅᔭᐃᓪᓗ ᓄᓇᓕᒻᒦᓂᖅᓴᐅᖏᓐᓇᕐᓗᑎᑦ ᐅᖅᓱᐊᓗᑦᑕᖏᓐᓂᖅᓴᐅᓗᑎᑦ ᐅᒥᐊᕐᔪᐊᒥ, ᐅᑎᖅᑕᑦᑎᐊᖅᑐᓂᓪᓗ, ᓄᓇᓕᖃᑦᑎᐊᓂᖅᓴᐅᒍᓐᓇᖅᑐᑎᓪᓗ. “
ᖃᓄᕐᓕ ᐅᑎᖅᑕᑎᑦᑎᑲᓐᓂᕈᓐᓇᖅᑭᑕ ᑮᓇᐅᔭᓂᑦ ᓄᓇᑦᑎᓐᓂ ᐊᒥᐊᓱᖅᑎᕋᔪᓪᓗᒋᓪᓗ? ᐃᓄᐃᑦ ᐱᓕᕆᖃᑎᖃᕐᖓᑕ ᑲᒪᓇᓱᐊᖅᑐᑎᑦ ᐆᒻᒪᖅᑯᑎᓂᑦ ᐱᔭᕆᐊᓕᖏᓐᓂ ᐋᖅᑭᔅᓴᐃᓇᓱᔅᓯᓐᓈᖅᑐᑎᑦ ᐃᑲᔫᑎᐅᒐᔭᖅᑐᑦ ᐊᑦᑐᖅᑕᐅᓯᒪᓂᖏᓐᓂ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ. ᓄᓇᓖᑦ ᑲᓛᖡᑦ ᓄᓈᓂ ᐆᒻᒪᖅᑯᑎᓂᑦ ᐱᕙᓪᓕᐊᖃᑦᑕᕐᒥᔪᑦ ᓯᕐᒥᓕᐅᑉ ᐊᐅᑉᐸᓪᓕᐊᓂᖓᓐᓂ ᐊᒻᒪᓗ 70%−ᒥᑦ ᐆᒻᒪᖅᑯᑎᖓᓐᓂ ᑰᑦᑐᓂᓐᖔᖅᑐᖅ. ᐃᓄᑉᐱᐊᑦ ᐱᖃᑕᐅᕋᑖᓚᐅᕐᒥᔪᑦ ᐊᕕᑦᑐᖅᓯᒪᔪᓄᑦ ᐆᒻᒪᖅᑯᑎᓕᕆᓂᕐᒧᑦ ᐸᕐᓇᐅᑎᓕᐅᖅᑐᓂᒃ ᓇᓗᓇᐃᔭᐃᓪᓗᑎᓪᓗ ᓯᕗᓪᓕᖅᐸᐅᑎᔭᐊᓕᖏᓐᓂᓪᓗ ᐆᒻᒪᖅᑯᑎᖃᕆᐊᖃᕐᓂᖏᓐᓂ ᐊᒻᒪᓗ ᐱᔾᔪᑎᖏᓐᓂ ᐊᒻᒪᓗ ᐱᖃᓯᐅᔾᔨᓪᓗᑎᑦ ᐊᓄᕆᒧᑦ ᐱᕙᓪᓕᐊᓂᕐᒥᑦ, ᐆᒪᔪᕐᓃᓐᖔᖅᑐᓂᑦ ᐊᒻᒪᓗ ᓯᕿᓂᕐᒦᓐᖔᖅᑐᓂᑦ ᐆᒻᒪᖅᑯᑎᔅᓴᓂᒃ. ᑕᒪᒃᑯᐊ ᐃᓚᐃᓐᓇᖏᑦ ᐆᑦᑑᑎᐅᔪᑦ.
ᓄᓇᓕᓐᓂᑦ ᐅᑭᐅᖅᑕᖅᑐᒥ, ᖃᐅᔨᓴᐅᑎᓂᑦ ᐋᖅᑮᓯᒪᒻᒥᒻᒪᑕ ᓯᕿᓂᕐᒧᑦ ᐆᒻᒪᖅᑯᑎᔅᓴᖅᑖᕋᓱᐊᕐᓂᕐᒥᑦ − ᐆᓇᕐᓂᖓᓐᓄᑦ, ᓯᕿᓂᕐᒥᑦ ᐃᒪᕐᒥᑦ ᐆᓇᖅᓯᑎᑦᑎᖃᑦᑕᕐᓂᖏᓐᓂ ᐊᒻᒪᓗ ᓯᕿᓂᒻᒦᓐᖔᖅᑐᓂᒃ ᐆᒻᒪᖅᑯᑎᓂᒃ ᑐᖅᑯᐃᔾᔪᑎᓂᒃ. ᐱᐅᓯᕙᓪᓕᐊᑎᑕᐅᒐᓱᐊᕐᓂᖓᓐᓂ ᐆᒻᒪᖅᑯᑎᓂᒃ ᐊᕙᑎᑦᑎᓂᓪᓗ ᐊᑦᑐᐃᑲᒻᒪᒐᓱᓐᖏᓂᖅᓴᐅᓗᑕ, ᐃᓱᒪᑐᒐᓱᒋᐊᖃᕋᑦᑕ. ᐋᖅᑭᔅᓱᐃᒋᐊᖃᓕᖅᑐᒍᑦ ᐃᓕᓐᓂᐊᕈᑎᔅᓴᓂᒃ ᓄᑖᕐᓄᑦ ᒪᑭᒪᔾᔪᑕᐅᔪᓴᖅᑐᓂᒃ ᑕᐃᒪᐃᑦᑐᓂᒃ. ᐃᓱᒪᒋᐊᖃᖅᑐᒍᑦ ᖃᓄᐃᑦᑐᓂᑦ ᓇᒻᒥᓂᖁᑎᐅᔪᓂᒃ ᐋᖅᑭᔅᓱᐃᔭᕆᐊᖃᕐᒪᖔᑦᑕ ᐅᑭᐅᖅᑕᖅᑐᒥ, ᓲᕐᓗ ᐃᓄᓕᕆᓂᕐᒥᑦ, ᐊᒃᑯᐊᓗ ᐊᑦᑐᖅᑕᐅᓂᖅᐹᖑᔪᑦ ᐃᓱᒪᒋᔭᕆᐊᕐᓗᒋᑦ − ᐃᓄᓱᑦᑐᐃᑦ “ᐃᖅᑲᓇᐃᔭᖏᑦᑐᑦ” ᐅᖃᖅᐸᒻᒪᑕ ᑕᐃᒫᒃ, ᑕᐃᒪᐃᑦᑐᒥᑦ ᒪᑭᒪᓇᓱᐊᕐᓂᕐᒥᑦ ᑲᒪᖃᑕᐅᒋᐊᖃᓕᖅᑐᑦ.
ᐃᓱᓕᑉᐸᓪᓕᐊᓗᓂ, ᐃᖅᑲᒪᑦᑎᐊᕆᐊᖃᖅᑐᒍᑦ ᐱᓕᕆᐊᕗᑦ ᓯᕗᓕᖅᑎᐅᓪᓗᑕ ᐊᓯᑦᑎᓐᓂ ᒪᑭᑦᑎᑲᓐᓂᕆᐊᖃᕐᓂᑎᓐᓂ − ᖁᕝᕙᖅᑎᒋᐊᕐᓗᒋᑦ. ᓇᓗᓇᐃᖅᑕᐅᕙᒃᑲᑦᑕ ᐱᓕᕆᐊᑦᑎᓐᓂ ᐊᔅᓱᕉᑎᖃᖃᑦᑕᑲᐃᓐᓇᐸᑦᑐᑕᓗ ᖃᓄᕐᓗ ᑕᒪᒃᑯᐊ ᖃᓄᖅᑑᕆᐊᖃᖅᑐᑎᒍ ᒪᑭᒪᔾᔪᑎᔅᓴᐅᔪᑦ. ᓂᕈᐊᓐᖏᖔᕐᓗᑕ ᐃᓄᓕᕆᓇᓱᑐᐃᓐᓇᓂᕐᒥᑦ. ᓯᕗᓪᓕᐹᖑᔭᕆᐊᖃᕋᑦᑕ. ᓴᓐᖏᔫᒋᐊᕐᓗᑕ. ᐃᓕᔅᓯᒪᓗᒋᑦ ᐅᐊᑦᑎᐊᕈ ᐊᑐᖃᑦᑕᖅᑕᒥᓂᖅᐳᑦ ᑲᔪᓯᓗᑕᓗ ᑲᔪᓯᑦᑎᐊᕋᓱᐊᕐᓗᑕ, ᐃᓕᓐᓂᐊᕈᑎᒃᑰᒐᓗᐊᖅᑲᑦ, ᐊᐅᓚᑦᑎᔾᔪᑎᒃᑰᒐᓗᐊᖅᑲᑦ ᐅᕝᕙᓘᓐᓃᑦ ᐊᑦᑐᐃᓂᒃᑰᒐᓗᐊᖅᑲᑦ ᐊᒻᒪᓗ ᐱᕚᓪᓕᕈᑎᑎᒍᑦ ᐊᖏᕈᑎᑎᒍᑦ, ᓴᖅᑮᑲᓐᓂᕋᓱᐊᕐᓗᑕ ᖃᓄᐃᑦᑑᓂᕆᓂᐊᖅᑕᖏᓐᓂ ᐱᓇᓱᐊᑦᑎᐊᖏᓐᓇᕐᓗᑕ ᓄᓇᖅᑲᑎᒌᖑᔪᒍᑦ. ᐃᓱᒪᓇᓱᒃᑲᓐᓂᕋᓱᒋᐊᖃᓕᕋᑦᑕ ᒪᑭᒪᓇᓱᐊᕐᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐊᔾᔨᐅᖏᑦᑐᓕᓇᓱᐊᕐᓗᑕ. ᓴᓇᓚᐅᖅᑕ ᓴᓇᕕᓐᓂᒃ ᐅᑭᐅᖅᑕᖅᑐᒥ ᕿᒥᕆᔾᔪᑎᒋᒐᔭᖅᑕᑎᓐᓂ ᐃᓄᓐᓂᑦ, ᐆᒻᒪᖅᑯᑎᓕᐅᕐᓗᑕ, ᐃᑲᔪᖅᑐᐃᓗᑕ ᓴᓇᓐᖑᐊᕐᓂᕐᒥᑦ ᐱᖅᑯᓯᑦᑎᓂᓪᓗ, ᐃᑯᐱᑦᑐᓕᕆᓂᕐᒥᓪᓗ ᓴᖅᑮᓗᑕ ᓱᓇᒃᑯᑖᖁᑎᑯᓗᑦᑎᓐᓂᓐᖔᖅᑐᓂᒃ ᐱᑕᓕᐊᓗᓐᓂᒃ ᓄᓇᒥᑦ.
ᐃᑲᔪᖅᑎᒋᓪᓗᑕ, ᑲᔪᓯᒍᓐᓇᖅᑐᒍᑦ 2050−ᒥ, ᐃᓄᐃᑦ ᑕᑯᔭᐅᒐᔭᖅᑐᑦ ᓯᕗᓕᖅᑎᐅᓗᑎᑦ ᐃᑯᐱᑦᑐᓕᕆᓂᕐᒥᑦ ᐊᒻᒪᓗ ᑕᐃᒪᐃᓪᓗᐊᑎᑦᑎᓂᕐᒥᑦ ᐱᕈᖅᐸᓪᓕᐊᓂᖑᓐᓂ ᐅᑭᐅᖅᑕᖅᑐᒥ ᐃᑲᔫᑎᖃᑦᑎᐊᕐᓗᑎᑦ ᐊᖏᕐᕋᕆᓂᕋᖅᑕᒥᓂᒃ. ᑎᓴᒪᓂᑦ ᐃᕐᓂᖃᕋᒪ 12−ᓂᑦ ᐃᕐᖑᑕᖃᖅᑐᖓ. ᐊᔅᓱᕈᕈᒪᒐᒪ ᑕᒪᒃᑯᐊ ᓯᕗᓂᑦᑎᓐᓂ ᑕᑯᔅᓴᐅᑦᑎᐊᓕᖁᓪᓗᒋᑦ ᐱᔪᓐᓇᐅᑎᖃᕐᓂᖏᓐᓂ ᐃᓅᓇᓱᖃᑕᐅᓗᑎᒃ ᐊᓯᖏᓪᓗ ᑲᓇᑕᒥᐅᑕᓕᒪᑦ. ᑲᔪᓯᑎᒍᓐᓇᕋᑦᑎᒍ ᐱᓕᕆᖃᑎᒌᓪᓗᑕ.
ᒪᑦᓇ.