ᓰᑏᐱᕆ 29, 2016 – ᖁᔭᓐᓇᒦᕈᒪᔭᕋ ᕉᓵᓐ ᕋᓐᑦ, ᑳᕈᑕᓐ ᓯᓚᑦᑐᖅᓴᕐᕕᔾᔪᐊᖓᓐᓂ ᐊᖏᔪᖅᑳᖅ, ᐃᓕᓐᓂᐊᑎᒍᓐᓇᕐᖔᖓ ᐅᓪᓗᒥᐅᔪᖅ. ᖁᔭᓐᓇᒦᕈᒪᓪᓗᒋᓪᓗ ᐃᔅᓯᕙᐅᑕᐃᑦ ᑐᖏᓕᕆᔭᐅᔪᑦ, ᔮᓐ ᕼᐃᒋᓐᐸᑕᒻ ᐊᒻᒪᓗ ᔭᓂᐳ ᓯᐸᓐᔅ ᐱᓕᕆᑦᑎᐊᖅᑐᐊᓘᖅᑲᐅᒻᒪᑕ ᐅᓪᓛᖅ ᑐᑭᒧᐊᑦᑎᑎᓪᓗᑎᒃ.
ᐱᒻᒪᕆᐅᒻᒪᑦ ᖁᕕᐊᓲᑎᖃᕆᐊᖃᕋᑦᑕ ᐱᐅᔪᓂᑦ ᐱᑕᖃᕋᐃᒻᒪᑦ ᐃᓅᓯᑦᑎᓐᓂ − ᓄᓇᓕᕐᔪᐊᑦᑎᓐᓂᓪᓗ! ᖁᕕᐊᑦᑐᖓ ᐅᕙᓃᖃᑕᐅᔪᓐᓇᓂᕐᓂᑦ ᐊᕙᑎᓄᑦ ᐅᑭᐅᓄᑦ ᓇᓪᓕᐅᓂᖅᓯᐅᖃᖅᑎᓪᓗᒋᒃ ᐅᑭᐅᖅᑕᖅᑐᒥ ᑲᑎᒪᔩᑦ − ᐅᐱᓐᓇᕋᓂ ᐱᐅᔪᐊᓗᐃᑦ ᖃᓄᐃᑦᑐᒥᓂᐅᓯᒪᔪᑦ ᐅᑭᐅᓂᑦ ᐊᕙᑎᐅᔪᓂᒃ ᐊᓂᒍᖅᓯᒪᔪᓂᒃ.
ᐅᓪᓗᒥᐅᔪᖅ, ᐃᓱᒪᒋᔭᒃᑲ ᐅᖃᐅᓯᕆᔪᒪᒐᒃᑭᑦ ᓱᒻᒪᑦ ᐅᑭᐅᖅᑕᖅᑐᒥ ᑲᑎᒫᔨᑦ ᐱᐅᔪᐊᓘᓚᐅᖅᓯᒪᒻᒪᑕ.
ᐅᓪᓗᒥᐅᓕᖅᑐᖅ ᓇᓗᓇᖅᑐᒥᑦ ᐃᓅᓯᖃᓕᕋᑦᑕ. ᐊᔅᓱᕈᓇᖅᑑᔪᒥᑦ, ᐊᓯᔾᔨᐸᓪᓕᐊᖏᓐᓇᑦᑎᐊᖅᑐᓂᑦ ᐊᕙᑎᑦᑎᓐᓂ, ᓄᓇᒥᐅᒐᓗᐊᖅᑲᑦ ᐃᓄᓐᓂᐅᒐᓗᐊᖅᑲᑦ.
ᑕᑯᓐᓇᖅᑐᒋᑦ ᐱᕙᓪᓕᐊᔪᑦ ᐃᓄᓐᓄᓪᓗ ᑎᑎᕋᖅᑕᐅᕙᑦᑐᑦ, ᐅᓇᑕᖅᑐᐊᓗᓐᓂ ᑕᑯᕙᑦᑐᒍᑦ ᓯᓚᕐᔪᐊᒥ, ᖄᖅᑎᑦᑎᔪᐊᓗᓂᓪᓗ ᖁᑭᐊᔪᐊᓗᓐᓂᓪᓗ ᐊᑦᑕᓇᓪᓚᕆᓕᖅᑐᖅ, ᐃᓄᓐᓂᓪᓗ ᑕᑯᕙᑦᑐᑕ ᐃᐱᔪᒥᓂᕐᓂᑦ ᕿᒫᔪᒥᓂᕐᓂᑦ, ᐃᓄᐊᖅᑕᒥᓂᕐᓂᓪᓗ ᔭᒐᓯᒪᔪᓪᓗ ᐊᕐᓇᓂᑦ ᐃᓅᓱᑦᑐᓂᓪᓗ ᐊᔪᓕᖅᑐᓂᑦ ᓴᐱᓕᖅᑐᓂᑦ ᑕᑯᕙᑦᑐᑕ. ᑭᓯᐊᓂᓕᓂ, ᑕᑯᓐᓇᕐᒥᔪᒍᑦᑕᐅ ᐃᓄᓐᓂᑦ ᓯᓚᕐᔪᐊᑦᑎᐊᕙᒻᒥᐅᑕᐅᒍᒪᔪᓂᒃ.
ᑕᐃᒪᐃᑦᑑᒐᓗᐊᖅᑎᓪᓗᒍ, ᐃᓱᒪᑦᑎᐊᕋᓱᐃᓐᓇᖅᑐᖓ. ᓂᕆᐅᒋᔭᔅᓴᖅᑕᓕᒃ ᐊᒥᓱᓂᒃ ᐱᐅᔪᓂᒃ ᓱᕙᓪᓕᐊᔪᖃᖅᐸᑦᑐᖅ. ᑕᒪᒃᑯᐊ ᑲᒪᒋᕙᓪᓕᐊᒐᑦᑎᒍ ᐃᓚᓕᐅᔾᔨᓪᓗᑕ ᐱᓕᕆᖃᑎᖃᖅᑐᑕᓗ. ᖁᕕᐊᓲᑎᖃᑐᐃᓐᓇᖏᓪᓗᑕ ᐱᐅᔪᓂᒃ, ᑭᓯᐊᓂᓕ ᐊᒥᓱᕈᖅᑎᑲᓐᓂᕆᐊᓕᕗᑦ ᖁᕕᐊᓲᑎᔅᓴᐃᑦ.
ᐱᐅᔪᓂᑦ ᓴᖅᑭᖅᑐᖃᓲᖅ ᐃᓄᑦᑎᐊᕙᐃᑦ ᓂᓪᓕᐊᖃᑎᒌᓕᕋᐃᒻᒪᑕ. ᐱᐅᔪᓂᑦ ᓴᖅᑭᖅᑐᖃᓲᖅ ᑖᒃᑯᐊᔅᓴᐃᓐᓇᐃᑦ ᐱᒋᐊᑐᐊᕋᐃᒻᒪᑕ ᐅᖃᐅᓯᕐᒥᓂᒃ. ᑕᒪᑐᒥᖓᓕ ᐅᑭᐅᖅᑕᖅᑐᒥ ᑲᑎᒪᔨᖏᓐᓂ, ᐱᐅᔪᓂᑦ ᓴᖅᑭᖅᑐᖃᖃᑦᑕᖅᑐᖅ − ᐱᕙᓪᓕᐊᖏᓐᓇᖅᑐᑎᓪᓗ − ᐅᐱᓐᓇᕋᓂ ᓄᓇᖃᖅᑳᖅᑐᒥᓃᑦ ᑐᑭᖃᑦᑎᐊᖅᑐᒥᑦ ᐱᓕᕆᖁᔭᐅᓚᐅᖅᑐᑦ ᑲᑎᒪᔨᓄᑦ ᐱᒋᐊᖅᑕᐅᓯᒪᔪᒥᑦ. ᐅᖃᖃᑎᒌᓐᓂᒃᑯᑦ, ᐱᓕᕆᖃᑎᒌᓐᓂᒃᑯᑦ, ᐱᒋᐊᖅᐸᓪᓕᐊᓂᒃᑯᑦ ᑕᒪᒃᑯᐊᖑᒻᒪᑕ ᐃᓚᓕᐅᑎᓗᒋᑦ, ᑭᓪᓕᓕᐅᑐᐃᓐᓇᖏᓪᓗᒋᑦ, ᑭᓯᐊᓂᓕ ᐊᔾᔨᐅᖏᑦᑐᓕᓗᑎᑦ.
ᖁᕕᐊᓇᓪᓚᕆᑦᑐᖅ ᐃᓄᑦᑎᐊᕚᓗᓐᓂᑦ ᑕᑯᓪᓗᓂ ᐅᕙᓂ ᐅᓪᓗᒥ ᐊᔾᔨᐅᖏᑦᑐᓕᓯᒪᔪᕐᔪᐊᕌᓗᓐᓂᒃ ᐊᔅᓱᕈᓐᓇᖅᑐᐊᓗᓐᓂᒃ ᐅᑭᐅᓂᑦ ᐊᕙᑎᓂᒃ ᐊᓂᒍᖅᑐᓂᒃ ᓯᕗᓂᑐᖄᓗᐊᓂᓘᒐᓗᐊᖅ. ᐅᐱᑦᑎᐊᖅᑐᖓ ᐅᕙᓃᖃᑕᐅᓂᕐᓂᑦ ᐃᓕᔅᓯᓐᓂ, ᐃᓕᑦᑐᖅᐹᓘᔪᖓ ᓈᓚᑐᐃᓐᓇᖅᑐᖓ ᐅᖃᖃᑎᖃᖅᑐᖓᓪᓗ ᐅᓪᓛ ᒪᓐᓇ. ᐊᔾᔨᐅᖏᑦᑐᓕᓯᒪᕗᓯ.
ᓂᕈᐊᕋᔅᓴᐅᖃᑕᐅᔪᒪᕗᖓ ᐊᖏᔪᖅᑳᖑᓂᕐᒧᑦ ᑲᓇᑕᒥ ᑖᒃᑯᓂᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐅᑉᐱᕆᔭᖃᕋᒪ ᐅᖃᖃᑎᒌᖃᑦᑕᕐᓗᓂ, ᐱᓕᕆᖃᑎᒌᖃᑦᑕᕐᓗᓂ ᑲᒪᕙᓪᓕᐊᓗᓂᓗ, ᐊᔅᓱᕉᑎᒋᔭᕗᑦ ᖄᖏᕈᓐᓇᕋᑦᑎᒍ ᒪᑭᒪᔾᔪᑎᐅᓕᕐᓗᑎᑦ ᐊᒻᒪᓗ ᐊᔅᓱᕈᓐᓇᖅᑐᖅ ᐱᐅᓯᑎᓪᓗᒋᑦ.
ᐃᖅᑲᓇᐃᔮᕆᖃᑦᑕᖅᓯᒪᔭᕐᓂᑦ ᓂᕈᐊᕋᔅᓴᐅᓚᐅᖅᓯᒪᒻᒥᒐᒪ ᒪᓕᒐᓕᐅᖅᑎᕐᔪᐊᒧᑦ. ᐅᐱᓐᓇᕋᓂ ᐃᑉᐱᒍᓱᓚᐅᖅᓯᒪᔪᖓ ᐊᔾᔨᐅᖏᑦᑐᓕᒍᓐᓇᕆᐊᖓ, ᐱᓕᕆᖃᑎᖃᕐᓗᖓ ᐊᓯᖏᓐᓂ, ᐱᐅᓂᖅᓴᒥᑦ ᐃᓅᓯᖅᑖᖅᑎᑦᑎᓇᓱᐊᕐᓗᖓ ᐃᓅᖃᑎᓐᓂᑦ, ᐃᓄᓐᓂᑦ ᑲᓇᑕᒥ. ᐱᖃᓯᐅᔾᔭᐅᑦᑎᐊᖃᑦᑕᖁᓪᓗᒋᓪᓗ ᐃᓱᒪᓕᐅᖅᐸᑦᑐᓂᑦ ᓇᒥᑐᐃᓐᓇᖅ.
ᑕᐃᒃᑯᐊ ᐃᑲᔪᓚᐅᖅᓯᒪᔪᑦ ᓴᖅᑮᑎᓪᓗᒋᑦ ᐅᑭᐅᖅᑕᖅᑐᒥ ᑲᑎᒪᔨᓂᒃ ᐊᕙᑎᐅᔪᓂᒃ ᐅᑭᐅᓂᑦ ᐊᓂᒍᖅᑐᓂᑦ ᑕᐃᒪᐃᔅᓴᐃᓐᓇᓚᐅᖅᓯᒪᔪᑦ. ᐅᖃᖃᑎᒌᓪᓗᓂ, ᐱᓕᕆᖃᑎᒌᓪᓗᓂ ᐱᒋᐊᕐᓗᓂᓗ ᐅᑭᐅᖅᑕᖅᑐᒥ, ᓯᓚᕐᔪᐊᒥᓗ ᓇᓗᓇᓐᖏᑦᑐᖅ, ᐱᐅᓂᖅᓴᓪᓚᕆᐅᒐᔭᕐᖓᑦ.
ᑕᐃᒃᑯᐊ ᐃᑲᔪᖅᓯᒪᔪᑦ ᓴᖅᑮᓯᒪᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐅᑭᐅᓂᑦ 40−ᐸᓗᓐᓂ ᑕᐃᒫᓐᓇᐃᓐᓇᖅᑕᐅ ᐱᓚᐅᖅᓯᒪᒻᒥᔪᑦ.
ᐃᓄᐃᑦ ᑲᑐᔾᔨᖃᑎᒌᖏᓐᓂᐅᖏᑉᐸᑦ ᑕᐃᔅᓱᒪᓂ ᐱᓕᕆᖃᑎᒌᓪᓗᑎᑦ, ᓯᓚᕐᔪᐊᒥᓗ, ᐱᓕᕆᖃᑎᒌᒃᑲᓗᐊᖅᑎᓪᓗᒋᑦ ᓈᒻᒪᒋᔭᐅᓐᓂᖏᑉᐸᑕ ᑐᓴᕈᒪᓐᖏᑦᑐᓂᓪᓘᓐᓃᑦ ᑕᒪᒃᑯᐊ ᓴᖅᑭᕋᔭᓚᐅᓐᖏᑦᑐᑦ. ᐊᒻᒪᓗ ᑖᓐᓇ ᐅᑭᐅᖅᑕᖅᑐᒥ ᑲᑎᒪᔨ, ᑲᔪᓯᒍᓐᓇᕋᔭᓚᐅᓐᖏᑦᑐᖅ ᐃᓚᓕᐅᔾᔭᐅᓂᓐᖏᑉᐸᑕ ᐃᓄᐃᑦ ᐊᓯᖏᓪᓗ ᓄᓇᖃᖅᑳᖅᑐᒥᓂᑦ ᑭᒡᒐᖅᑐᖅᑕᐅᔪᑦ ᐅᓪᓗᒥᐅᔪᖅ. ᐊᑦᑐᐊᓂᖃᑦᑎᐊᕐᖓᑕ ᓴᓐᖏᔪᐊᓗᒻᒥᑦ. ᒐᕙᒪᒃᑯᑦ ᐅᖃᐅᑎᓲᕆᒐᒃᑭᑦ, ᓴᓇᔨᑦ, ᐃᓕᓐᓂᐊᑎᑦᑎᔩᑦ, ᑐᓐᖓᕕᔪᑦ ᐊᓯᖏᓪᓗ ᐱᖃᓯᐅᔾᔨᖃᑦᑕᕆᔅᓯ ᐅᕙᑦᑎᓐᓂ ᑐᑭᖃᑦᑎᐊᖅᑎᓪᓗᒋᓪᓗ, ᐊᔅᓱᕉᑎᒋᑦᑎᐊᕐᓗᒋᓪᓗ, ᐃᑲᔪᖅᑐᕐᓗᒋᑦ ᓴᖅᑮᔪᒪᓂᖏᓐᓂ ᓴᓐᖏᓂᖏᓐᓂᓪᓗ ᑲᑐᔾᔨᖃᑎᒌᑦᑎᓐᓂ. ᑭᓱᑐᐃᓐᓇᐃᑦ ᐱᐅᔪᑦ ᓴᖅᑭᕈᓐᓇᕐᖓᑕ.
ᓱᒻᒪᓪᓕ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᖏᑦ ᓴᖅᑭᓚᐅᖅᓯᒪᕙᑦ ᖃᓄᕐᓗ ᐊᔅᓱᕈᖅᑎᒋᓚᐅᖅᓯᒪᕙᑦ ᑲᑐᔾᔨᖃᑎᒌᒥᑦ ᓴᖅᑮᓇᓱᐊᖅᑐᑎᑦ?
ᐊᔅᓱᕈᓐᓇᑐᕐᔪᐊᕌᓘᓚᐅᖅᓯᒪᔪᖅ 1970−ᖏᓐᓂ, ᐃᓄᐃᑦ ᐅᓇᑕᓚᐅᓐᖏᒻᒪᑕᓕ ᐅᓇᑕᖅᑎᑎᑐᑦ, ᓄᓇᖏᓐᓂᓪᓗ ᔭᒐᐃᓕᖅᑐᑎᑦ, ᓱᓇᒃᑯᑖᕐᓂᓪᓗ ᐊᕙᑎᖓᓐᓂᓪᓗ. ᐃᓚᐃᓐᓈᖅᑕᐅᔪᕐᔪᐊᕌᓘᓪᓗᑎᓪᓗ ᑖᒃᑯᐊ ᑲᓛᖡᑦ ᓄᓈᓂᑦ, ᐅᓛᓴᑦ, ᑲᓇᑕᒥᐅᑦ ᐊᓛᔅᑲᒻᒥᐅᓪᓗ.
ᐱᑕᖃᓐᖏᓗᐊᕐᖓᑦ ᒪᑭᒪᔾᔪᑎᔅᓴᐅᔪᓂᒃ ᓯᓚᕐᔪᐊᒥ ᐅᓪᓗᒥᐅᔪᖅ ᐊᔅᓱᕉᑎᒋᔭᕐᔪᐊᕌᓗᒋᓪᓗᑎᒍ. ᐃᓕᓐᓂᐊᕕᖃᓐᖏᓗᐊᕋᑦᑕ, ᐳᕝᕕᕆᔪᓄᑦ ᐋᓐᓂᐊᕕᓐᓂᑦ, ᐋᓐᓂᐊᕖᑦ, ᐊᖏᔪᐊᓗᑦ ᓱᓕ ᑎᑎᕋᕋᔅᓴᑦ. ᐅᕙᒎᓐᖏᑉᐸᑦ, ᓴᓇᕖᑦ ᐊᒻᒪᓗ ᒐᕙᒪᒃᑯᑦ ᐸᕐᓇᐅᑎᖏᑦ ᐱᓕᕆᐊᔅᓴᐃᑦ, ᐊᓯᔾᔩᒐᔭᖅᑐᑦ ᐃᓄᐃᑦ ᓄᓇᖏᓐᓂ, ᐊᖏᕐᕋᑎᓐᓂ ᑖᕙᓐᖔᓗᒃ ᐱᒋᐊᕐᓗᒍ ᐅᓛᓵᒥᑦ ᑲᓛᖡᐅᑉ ᓄᓈᓄᑦ ᑎᑭᓪᓗᓂ, ᐊᓯᔾᔨᕋᔅᓴᐅᖏᖅᑐᑦ ᐃᓄᐃᑦ ᓄᓇᖓ, ᐊᖏᕐᕋᕗᑦ ᐱᒋᐊᖅᑐᒍ ᐅᓛᓵᒥᑦ ᑲᓛᓖᑦ ᓄᓈᓄᑦ. ᐱᑦᑎᐊᖅᑕᐅᓚᐅᓐᖏᑦᑎᐊᕋᑦᑕ.
ᐱᒋᐊᕐᖓᕐᓂᐸᓗᖓᓐᓂ 1970, ᐅᖅᓱᐊᓗᑦᑕᑦᑏᑦ ᐃᑲᔪᖅᑕᐅᓪᓗᑎᑦ ᑎᒥᐅᔪᒥᑦ ᒐᕙᒪᑐᖃᒃᑯᓂᓪᓗ ᐅᑭᐅᖅᑕᖅᑐᒨᓚᐅᖅᓯᒪᒻᒪᑕ ᐊᓛᔅᑲᒧᑦ ᐃᓱᒫᓗᓐᖑᐊᖏᑦᑎᐊᖅᑐᑎᑦ ᐃᓄᓐᓂᑦ ᑕᐅᕙᓂᒥᐅᑕᕐᓂᑦ ᐊᑯᓂᕐᔪᐊᕌᓗᒃ 1000−ᖏᓐᓃᑦᑐᓂᑦ ᑕᒫᓂᒥᐅᑕᐅᓯᒪᔪᓂᒃ. ᐊᓛᔅᑲ ᐃᓄᒃ, ᐃᐸᓐ ᕼᐊᑉᓴᓐ, ᐊᖏᔪᑦᑎ − ᐊᓯᖏᓪᓗ ᐃᓄᐃᑦ ᐅᖃᓚᐅᖅᓯᒪᔪᑦ “ᐋᒡᒐ!” ᓯᕗᓕᖅᑏᑦ ᐃᓄᑐᐃᓐᓇᐃᓪᓗ ᑲᑐᔾᔨᓪᓗᑎᑦ ᐊᔅᓱᕈᓚᐅᖅᓯᒪᔪᑦ ᐅᑭᐅᒐᓴᕐᓄᑦ, ᓄᓇᓕᕈᖅᑐᑎᓪᓗ. ᑕᐃᑲᓂ ᐅᐊᖕᓇᖓᓂ ᓯᕕᖓᔪᖅ ᓂᐅᕕᐊᒥᑦ ᓴᖅᑭᓪᓗᑎᑦ. ᐄᐸᓐ ᕼᐊᑉᓴᓐ ᒪᐃᔭᕈᖅᑐᓂ.
ᑲᓇᑕᒥᐅᑦ, ᑲᓛᖡᑦ ᓄᓈᓂ, ᐅᓛᓵᒥᓪᓗ ᐃᓄᐃᑦ ᐊᔾᔨᒌᐸᓕᓐᓂᑦ ᐊᑐᓚᐅᖅᓯᒪᒻᒥᒻᒪᑕ ᓴᓇᔨᓂᒃ ᒐᕙᒪᒃᑯᓂᓪᓗ. ᐅᔾᔨᕈᓱᓕᓚᐅᖅᓯᒪᒻᒪᑕ ᐅᑭᐅᖅᑕᖅᑐᒥ ᐊᓯᔾᔨᐸᓪᓕᐊᓪᓚᕆᓕᕐᓂᖓᓐᓂ ᐅᑎᔾᔮᕈᓐᓃᖅᑐᑎᓪᓗ. ᐃᓄᐃᑦ ᑕᑯᓚᐅᖅᑐᑦ ᐃᑉᐱᒋᔭᐅᓐᖏᑦᑎᐊᖅᑐᑎᑦ ᐅᑭᐅᖅᑕᖅᑐᒥ ᐱᕙᓪᓕᐊᔪᓂᒃ ᐸᕐᓇᑦᑐᓂᑦ, ᐃᑉᐱᒋᔭᐅᓐᖏᑦᑎᐊᖅᑐᑎᓪᓗ.
ᖁᔭᒋᔭᒃᑲ ᓯᕗᓕᖅᑎᒋᓚᐅᖅᑕᕗᑦ ᑕᐃᔅᓱᒪᓂ ᐊᔅᓱᕈᖅᑐᐊᓘᒐᓗᐊᖅᑐᑎᑦ ᓴᐱᓕᓚᐅᖅᓯᒪᓐᖏᓐᓂᖏᓐᓄᑦ ᐅᐸᑦᑕᐅᒐᔪᓐᖏᑦᑐᒦᖏᓐᓇᕐᓇᑎᓪᓗ ᓇᒻᒥᖅ ᓯᓚᕐᔪᐊᒥᓂᒃ. ᖃᐅᔨᒪᓚᐅᖅᑐᑦ ᐱᓕᕆᖃᑎᒌᒃᑯᑎᒃ, ᐱᔪᓐᓇᐅᑎᕗᑦ ᐱᔪᒪᔭᕗᓪᓗ ᐸᖅᑭᔭᐅᔪᓐᓇᕐᓂᖏᓐᓂ, ᑕᐃᒫᒃ ᑕᒪᓐᓇ ᐅᑭᐅᖅᑕᖅᑐᖅ ᓂᑲᓇᕐᓂᖓᓐᓄᑦ.
ᐃᓅᓱᑦᑑᓚᐅᖅᓯᒪᔪᖓ ᑕᐃᔅᓱᒪᓂ 1970−ᖏᓐᓂ. ᐋᑐᐋᒧᑦ ᐃᓕᓐᓂᐊᕕᔾᔪᐊᒧᑦ ᐃᓕᓐᓂᐊᕆᐊᖅᑐᖓ; ᑕᐃᔅᓱᒪᓂᓕ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑎᑕᐅᓂᐅᓴᓐᖏᒪᕆᑉᐳᖓ, ᑕᒑᖅ ᑰᓕᒥ ᐃᓪᓗᖃᑎᖃᖅᑐ, ᐊᖑᔭᑐᐊᕆᓚᐅᓐᖏᑕᕋ ᑭᓯᐊᓂᓕ ᑕᐃᓐᓇ ᐱᒋᐊᖅᑎᐅᖃᑕᐅᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᒻᒪᓗ ᓯᕗᓪᓕᖅᐹᖑᓪᓗᓂ ᐊᖏᔪᖅᑳᖑᓪᓗᓂ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᐃᓄᐃᑦ ᑕᐱᕇᑦ ᑲᓇᑕᒥ, ᐅᕝᕙᓘᓐᓃᑦ ᐃᓄᐃᑦ ᑕᐸᕆᓴᑦ ᑲᓇᑕᒥᑦ ᑕᐃᒫᒃ ᑕᐃᔭᐅᖃᑦᑕᓚᐅᖅᓯᒪᒻᒪᑦ ᐅᐊᑦᑎᐊᕈ.
ᐃᓄᐃᑦ ᓯᕗᓕᖅᑏᑦ ᖃᐃᒐᔪᖃᑦᑕᓚᐅᖅᓯᒪᔪᑦ ᐊᒃᑲᒃᑯᑎᓐᓄᑦ ᐅᖃᖃᑎᒌᒋᐊᖅᑐᖅᑐᑎᒃ ᐅᓐᓄᐊᒧᓄᑦ, ᐱᐅᓂᖅᓴᒥᑦ ᐃᓅᓯᖃᖁᔨᓪᓗᑎᑦ ᐃᓄᓐᓂᑦ ᐊᖏᕐᕋᒥᓂᑦ.
ᐃᓄᓐᓂᑦ ᑲᑎᓯᓪᓗᖓ ᓲᕐᓗ ᐱᐅᓪ ᐃᐊᑦᒪᒥᑦ ᓄᓇᑦᓯᐊᕗᒻᒥ, ᓵᓕ ᐅᐊᑦᔅ ᓄᓇᕕᒻᒥ, ᓵᒻᒪ ᕋᑎ ᐃᓅᕕᐊᓗᐃᑦ ᓄᓇᑖᕈᑎᖓᓐᓂ, ᒥᐊᓕ ᓴᐃᒪᓐ, ᐅᕙᓃᖃᑕᐅᔪᖅ ᐃᓄᓂᓪᓗᓪᓗ ᐋᑐᐋᒥᐅᑕᕐᓂᑦ ᓲᕐᓗ ᐊᒃᑲᒐ. ᖃᐅᔨᒪᑦᑎᐊᓚᐅᓐᖏᑦᑐᖓᓕ ᑖᒃᑯᐊ ᐊᔾᔨᐅᖏᑦᑐᓕᓂᐊᓐᖏᒋᐊᖏᑕ. ᐅᐊᑦᑐᐊᕈᒃᑲᓐᓂᖅ ᐱᓕᕆᖃᑎᒋᓕᖅᑐᒍ ᐊᒃᑲᒐ, ᐅᐊᖕᓇᖓᓂ ᓯᕕᖓᔪᖅ ᓂᐅᕕᐊᒥ ᑐᓴᕈᒪᑦᑎᐊᓚᐅᕋᒪ ᑭᓱᓕᕆᒻᒪᖔᑕ. ᑕᑯᓚᐅᖅᑐᖓ ᓄᓇᓕᕐᔪᐊᑎᓐᓂ, ᐃᓄᐃᑦ ᐱᓕᕆᖃᑎᒌᒋᐊᖃᕐᓂᖏᓐᓂ ᑕᐃᒫᒃ ᑭᓯᐊᓂ ᑐᓴᖅᑕᐅᔪᓐᓇᕐᓂᐊᕐᖓᑕ ᒐᕙᒪᒃᑯᑎᓐᓄ ᐱᔪᓐᓇᖅᑕᖏᓐᓂᓪᓗ ᐃᓕᓯᓗᑎᑦ.
ᐊᓚᔅᑲᒥ, ᐃᐸᓐ ᕼᐊᑉᓴᓐ, ᐅᓗᕆᐊᓇᖅᑐᒥ ᑕᑯᓚᐅᖅᓯᒪᔪᖅ ᐅᖓᓯᑦᑐᒥᐅᑕᐅᓂᑦᑎᓐᓂ, ᑕᐃᒫᔅᓴᐃᓐᓇᕐᓗ ᐃᓱᒪᓪᓗᓂ ᑕᐃᒃᑯᐊᓴᐃᓐᓇᐃᑦ ᖃᐃᖁᓕᓚᐅᖅᓯᒪᔭᖏᑦ ᐃᓄᐃᑦ, ᐊᓯᖏᓪᓗ − ᑕᐃᑯᖓ ᐅᐊᖕᓇᖓᓂ ᓯᕕᖓᔪᒧᑦ 1977−ᒥ.
ᑕᐃᑲᓂᔅᓴᐃᓐᓇᖅ, ᐅᑭᐅᑦ 40−ᑲᓴᑦ ᐊᓂᒍᖅᓯᒪᓕᖅᑐᓪᓗᒋᑦ, ᐃᓄᐃᑦ ᑲᑎᒃᑲᓐᓂᓚᐅᖅᑐᑦ ᑲᓛᖡᑦ ᓄᓈᓂᒥᐅᑦ, ᑲᓇᑕᒥᐅᑦ, ᐊᒻᒪᓗ ᐊᓛᔅᑲᒥᐅᑦ ᐱᓕᕆᖃᑎᒌᓐᓂᐊᖅᑐᑎᑦ, ᓇᓪᓕᐅᓂᖅᓱᐅᑎᖃᕐᓗᑎᑦ ᐃᓄᓐᓂᑦ ᐊᔾᔨᐅᖏᑦᑐᓂᑦ, ᐱᐅᖅᓱᐊᖃᑎᒌᓪᓗᑎᑦ ᐅᑭᐅᖅᑕᖅᑑᑉ ᐊᕙᑎᖓᓐᓂ ᓯᕗᓂᑦᑎᓐᓄᑦ ᑭᖑᕚᑦᑎᓐᓄᑦ ᐊᑐᖅᑕᔪᒫᕐᓂᐊᖅᑐᓂᒃ, ᐃᓄᐃᓪᓗ ᐸᕐᓇᐅᑎᒋᓂᐊᖅᑕᖏᓐᓂ ᐱᒋᐊᖅᑎᓪᓗᒋᑦ, ᐱᖁᔭᕐᓂᑦ ᐃᓱᒪᒋᔭᖏᓐᓂᓪᓗ ᐊᓯᖏᓐᓂ ᓄᓇᖓᓐᓅᖓᔪᓂᑦ. ᐃᓄᐃᑦ ᐅᑭᐅᖅᑕᖅᑐᒥᐅᖑᖃᑎᒌᑦ ᑲᑎᒪᔨᖏᑦ ᓴᖅᑭᖅᑐᓂᓗ. ᖃᐅᔨᒪᓗᐊᓚᐅᓐᖏᑦᑐᖓᓕ ᑕᐃᒃᑯᐊ ᐅᖃᐅᓯᕆᔭᐅᕙᑦᑐᒥᓃᑦ ᑐᓴᐱᓪᓚᓚᐅᖅᓯᒪᔭᒃᑲ ᐊᒃᑲᒃᑯᑎᓐᓂ ᐱᒻᒪᕆᐅᓂᐊᕆᐊᖏᑕ ᓯᕗᓂᑦᑎᓐᓂ ᐃᓄᓐᓄᑦ ᓯᓚᕐᔪᐊᒥ ᐱᓕᕆᖃᑎᒌᑦᑎᐅᓂᐊᖅᑐᑎᑦ.
ᐊᓪᓛᒃ ᖃᐅᔨᒪᓚᐅᖅᓯᒪᓐᖏᑦᑐᖓ ᖃᓄᑎᒋ ᐱᒻᒪᕆᐅᑎᒋᓂᐊᕐᒪᖔᖅ ᑕᐃᒃᑯᐊ ᐅᖃᖃᑎᒌᓐᓂᖏᓐᓂ ᑲᔪᓯᓐᓂᐊᑦᑎᐊᓛᖅᑐᑦ, ᓴᖅᑭᑎᑦᑎᓂᐅᓐᓂᖏᑉᐸᑕᓕ ᐅᑭᐅᖅᑕᖅᑐᒥ ᑲᑎᒪᔨᓄᑦ.
ᐱᔾᔪᑎᒋᓪᓗᒋᑦ ᐅᓇᑕᕕᔾᔪᐊᕐᓂᖅ ᑕᐃᔅᓱᒪᓂ, ᐃᓄᐃᑦ ᓯᑳᒃᑲᒥᐅᑦ ᐅᓛᓵᒥᐅᑦ ᑲᑐᔾᔨᖃᑎᒌᖏᑦ ᐱᖃᑕᐅᔪᓐᓇᓚᐅᖅᓯᒪᓐᖏᒻᒪᑕ 1977−ᒥ ᑲᑎᒪᓂᐅᔪᒥᑦ. ᑭᖑᓂᖓᓂᓕ, ᐊᑐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᑎᒪᕕᔾᔪᐊᕐᓂᖏᓐᓂ, ᐃᓄᖃᓐᖏᑦᑐᒥᑦ ᐃᔅᓯᕙᐅᑕᑦᑕᖃᐃᓐᓇᓚᐅᖅᓯᒪᔪᖅ ᐃᓚᒋᔭᐅᒐᔭᓐᖑᐊᕋᓗᐊᖅᑐᒥᑦ ᓈᒪᓂᕈᖅᓯᒪᓂᖏᓐᓄᑦ ᐊᒻᒪᓗᑭᑖᖅ. ᑕᐃᑲᓂ ᔪᑉᐱᒻᒥ − ᐅᕝᕙᓘᓐᓃᑦ ᐅᓛᓵᒥᑦ ᐃᓄᒻᒥᑦ − ᐱᖃᑕᔪᓐᓇᖅᓯᔪᖃᑕᐃᓐᓇᓚᐅᖅᓯᒪᔪᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ.
ᑎᑎᕋᖅᑕᐃᓐᓇᕆᔾᔮᖏᑦᑕᒃᑲᓕ ᑲᔪᓯᓐᓂᕆᖃᑦᑕᖅᓯᒪᔭᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐅᓪᓗᒥᒧᑦ. ᖃᐅᔨᒪᒐᔅᓯᐅ ᐊᒥᓱᑦ. ᐃᓛᒃ, ᑭᓯᐊᓂᓕ, ᐅᖃᑲᐃᓐᓇᕈᒪᔪᖓ ᐱᒻᒪᕆᐅᔪᒥᑦ ᐱᖁᔭᕐᒥᑦ ᑲᔪᓯᑎᑕᐅᓚᐅᖅᓯᒪᔪᒥᑦ ᓯᕗᓕᖅᑎᒧᑦ ᒥᐊᓕ ᓴᐃᒪᓐᒧᑦ ᓯᓚᕐᔪᐊᑉ ᖁᑦᑎᓂᖅᐹᒨᖅᐸᓪᓕᐊᓕᓚᐅᖅᓯᒪᔪᒥᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᓱᐸᓗᖏᓐᓂ 1980 ᐱᒋᐊᕐᖓᕐᓂᐸᓗᖏᓐᓂ 1990. ᐱᑕᖃᓚᐅᖅᓯᒪᓐᖏᒪᑦ ᑲᑐᔾᔨᖃᑎᒌᒻᒥᑦ ᐅᑭᐅᖅᑕᖅᑐᒥ ᐱᖁᔭᕐᓂᑦ ᓇᒥᓕᒫᖅ ᐅᑭᐅᖅᑕᖅᑐᒥ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓇᒻᒥᓂᖅ ᐱᕙᓪᓕᐊᓕᓚᐅᖅᓯᒪᔪᑦ ᑲᑎᒪᖃᑎᖃᖅᑐᑎᑦ ᐃᓄᓐᓂᑦ ᓇᒥᑐᐃᓐᓈᑦᑎᐊᖅᑐᓂ ᐃᓄᐃᑦ ᓄᓇᖏᓐᓂ ᓇᒻᒥᓂᕆᓂᐊᖅᑕᒥᓂᒃ ᐋᖅᑭᔅᓱᐃᓗᑎᒃ − ᑐᕌᖓᔪᑑᔾᔮᖏᑦᑐᓂᓪᓗ ᐃᓄᓐᓄᑦ ᑭᓯᐊᓂᑦᑕᐅ ᓴᓇᕕᓐᓄᑦ, ᒐᕙᒪᒃᑯᓐᓄᑦ, ᐃᓕᓐᓂᐊᑎᑦᑎᕙᑦᑐᓄᑦ, ᐊᓯᖏᓐᓄᓪᓗ. ᑕᒪᓐᓇ ᐃᓱᓕᓚᐅᖅᓯᒪᔪᖅ 1991−ᒥ, ᐱᔭᕆᐊᑐᔪᓂᒃ ᓴᑭᖅᑕᐅᔪᓐᓇᓕᖅᑐᑎᑦ ᑭᒃᑯᑐᐃᓐᓇᕐᓄᑦ ᐊᑎᓕᒻᒥᑦ “ᒪᓕᒐᐃᑦ ᐃᓗᓕᖏᓪᓗ ᓈᒪᔪᑦ ᐅᑭᐅᖅᑕᖅᑐᒥ ᐱᖁᔭᐃᑦ”. ᐅᓪᓗᒥᒧᑦ ᑎᑭᑦᑐᒍ, ᑖᒃᑯᐊ ᒪᓕᒐᐃᑦ ᐃᓗᓕᖏᓪᓗ ᓱᓕ ᐊᑐᖅᑕᐅᕙᑦᑐᑦ ᐱᐅᔪᓂᒃ ᐊᓯᔾᔩᔾᔪᑕᐅᓇᓱᐊᖅᑐᑎᑦ ᐃᓄᐃᑦ ᓄᓇᓕᖏᓐᓄᑦ ᐅᑭᐅᖅᑕᖅᑐᒥᓪᓗ ᓇᒥᑐᐃᓐᓇᖅ.
ᑖᒃᑯᐊ ᐱᒋᐊᕐᖓᕐᓂᖏᓐᓂ ᑕᑯᓐᓇᖅᑕᐅᔪᑦ ᐃᓄᓐᓄᑦ ᑎᒍᒥᐊᖅᑕᐅᖏᓐᓇᖅᑐᑦ ᐅᓪᓗᒥᒧᑦ ᐅᑭᐅᖅᑕᖅᑐᒧ ᑲᑎᒪᔨᖏᓐᓄᑦ ᐊᐃᕙᔾᔪᐅᖃᑦᑕᓕᓚᐅᖅᓯᒪᔪᑦ ᑕᐃᔅᓱᒪᓂᐅᕙᓪᓚᐃᔪᖅ.
ᑲᓇᑕᒥᐅᑦ ᐃᓄᐃᑦ ᐅᐱᒋᔭᖃᕆᐊᖃᓪᓚᕆᑦᑐᑦ ᐊᒥᓱᓂᑦ ᓯᕗᓕᖅᑎᖏᑦ ᓴᓐᖏᔪᐊᓘᓂᖏᓐᓄᑦ ᓴᖅᑭᓯᒪᒻᒪᑕ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓯᕗᒧᓪᓗ ᑕᑯᓐᓇᕐᓗᑎᑦ ᖁᕕᐊᓲᑎᖃᕐᓗᑎᑦ ᑲᑐᔾᔨᖃᑎᒌᒻᒥᑦ ᐅᑭᐅᓄᑦ 40−ᑲᓐᓂᕐᓄᑦ ᐊᒡᒋᖅᑐᓄᑦ!
ᐅᖃᖃᑎᒌᒐᐃᒐᑦᑕ, ᐱᓕᕆᖃᑎᒌᑦᑐᑕ, ᐱᒋᐊᖅᑐᑕᓗ, ᐊᒥᓱᓂᑦ ᐱᐅᔪᓂᒃ ᓴᖅᑭᖅᑐᖃᓲᖅ. ᐃᓄᐃᑦ ᑕᐃᒪᐃᓯᒪᓕᖅᑐᑦ ᐅᑭᐅᓄᑦ 40−ᑲᓴᓐᓄᑦ, ᖁᕕᐊᑉᐳᖓᓗ ᐅᑭᐅᓄᑦ ᐊᕙᑎᐅᓕᖅᑐᑦ ᑎᓴᒪᐅᔪᖅᑐᓂᒃ ᐅᑭᐅᖅᑕᖅᑐᒥ ᑎᒥᑦᑕᖃᓕᖅᑐᖅ − ᑖᒃᑯᐊᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ, ᓵᒥ ᑲᑎᒪᔨᖏᑦ ᐊᒻᒪᓗ ᐅᓛᓵᑦ ᑲᑐᔾᔨᖃᑎᒌᖏᑦ ᓄᓇᖃᖅᑳᖅᑐᒥᓂᕐᓄᑦ ᐅᑭᐅᖅᑕᖅᑐᒥ, ᑕᐃᒪᐃᓯᒪᒻᒥᔪᑦ. ᒍᐃᑦᓯᓐ ᑲᑎᒪᔨᖏᑦ ᓯᓚᕐᔪᐊᒥ ᐊᒻᒪᓗ ᐅᑭᐅᖅᑕᖅᑐᒥ ᐊᑕᐸᔅᑲᓐ ᑲᑎᒪᔨᖏᑦ – ᐅᓪᓗᒥᐅᔪᖅ ᐃᓚᒋᔭᐅᔪᑦ ᐅᕙᑦᑎᓐᓄᑦ − ᐱᓕᕆᖃᑕᐅᖏᓐᓇᖅᑑᓕᖅᑐᑎᓪᓗ. ᐱᓕᕆᖃᑎᖃᕆᐊᔅᓴᓪᓗ ᖁᕕᐊᓇᑦᑎᐊᖅᑐᖅ!
ᑐᓴᖅᓯᒪᒐᑦᑕ ᐊᒥᓱᓂᑦ ᑎᒥᐅᔪᓂᒃ ᐅᑭᐅᖅᑕᖅᑐᒥ ᑲᑎᒪᔨᐅᔪᓂᒃ ᐅᓪᓛᖑᔪᖅ, ᓱᓕ ᐅᖃᐅᓯᕆᒃᑲᓂᕐᓂᐊᕋᑦᑎᒍ ᐅᓐᓄᓴᐅᔪᖅ, ᑎᑎᕋᖅᑕᐃᓐᓇᕆᔾᔮᖏᓐᓇᒃᑭᑦ ᑲᔪᓯᓯᒪᑦᑎᐊᖅᑐᑦ. ᑭᓯᐊᓂᓕ ᐅᖃᒃᑲᓐᓂᕈᒪᕗᒍ ᑕᒪᒃᑯᐊ ᑲᔪᓯᑎᑕᐅᖃᑦᑕᖅᑐᑦ ᑲᑎᒪᔨᓄᑦ − ᐊᒥᓱᐊᓘᒻᒪᑕᓗ − ᐱᓕᕆᖃᑕᐅᓂᖏᓐᓂ ᐱᖓᓲᔪᖅᑐᓂᒃ ᓄᓇᖃᖅᑳᖅᑐᒦᓃᑦ ᑲᑐᔾᔨᖃᑎᒌᑦ, ᒥᓂᔅᑕᐅᑉ ᓂᕐᕆᕕᖓᓐᓃᖔᖅᓯᒪᔪᑦ ᐊᕐᕌᒎᒃ ᒪᕐᕉᒃ ᐊᓂᒍᕋᐃᒻᒪᑕ, ᐊᖏᔪᖅᑲᐅᑎᓂᒃ ᐅᑭᐅᖅᑕᖅᑐᒥ ᒪᕐᕉᓐᓂᒃ ᐱᖓᓱᓂᓪᓘᓐᓂᑦ ᐊᕐᕌᒍᑕᒫᑦ ᑲᑎᒪᕙᑦᑐᑦ, ᐊᑐᓂᓪᓗ ᐱᓕᕆᔨᓂᒃ ᑎᒃᑯᐊᖅᓯᓯᒪᓪᓗᑎᑦ. ᑖᓐᓇ − ᐅᓪᓛᒃ ᑐᓴᖅᑲᐅᔭᕗᑦ − ᐊᔾᔨᐅᓐᖏᑦᑐᖅ ᐊᔪᕆᔅᓯᒪᓐᖏᑦᑐᓂᑦ ᖃᓄᐃᑦᑐᑐᐃᓐᓇᕐᓂᑦ ᓯᓚᕐᔪᐊᒦᑦᑐᒥᑦ ᑎᒥᐅᓂᕐᒥᑦ.
ᐱᖃᑕᐅᒍᓐᓇᓐᖑᐊᑕᖅᓯᓐᓇᓚᐅᖅᓯᒪᒻᒥᔪᖓ, ᒥᓂᔅᑑᓗᖓ ᒪᓕᒐᓕᐅᕐᕕᔾᔪᐊᕐᒥ, ᐱᖃᑕᐅᔪᓐᓇᖅᑐᖓᓗ ᓯᕗᓪᓕᖅᐹᒥ ᐅᑭᐅᖅᑕᖅᑐᒥ ᑲᑎᒪᔨᖏᓐᓂ ᒥᓂᔅᑕᓂᑦ ᒪᕐᕉᓐᓂᒃ ᐅᑭᐅᓐᓂᒃ ᐃᓕᓯᒪᓕᖅᑎᓪᓗᖓ ᑲᑎᒪᔨᑦ ᓴᖅᑭᓚᐅᖅᑎᓪᓗᒋᐅᓚᐅᖅᓯᒪᔪᖅ. ᑲᓇᑕᐅᑉ ᒐᕙᒪᒃᑯᖏᑦ ᑲᑎᒪᑎᑦᑎᓚᐅᖅᓯᒪᒻᒥᔪᑦ ᐃᖃᓗᓐᓂ. ᐅᐱᓐᓇᓪᓚᕆᓚᐅᖅᓯᒪᔪᖅ ᐱᖓᓲᓪᓗᑕ ᐊᕐᓇᐅᓪᓗᑕ ᑕᐃᑲᓂ ᐅᑭᐅᖅᑕᖅᑐᒥ ᑲᑎᒪᔨᐅᖃᑕᐅᓪᓗᑕ. ᒥᓂᔅᑕᐃᑦ ᐃᓄᓕᕆᔨᑐᖃᒃᑯᓐᓂ ᔭᐃᓐ ᓯᑑᕗᑦ, ᒥᐊᓕ ᓴᐃᒪᓐ, ᑲᓇᑕᒥᓗ ᑭᒡᒐᖅᑐᐃᔨ ᐅᑭᐅᖅᑕᖅᑐᒧ ᐊᒻᒪᓗ ᐅᕙᖓ ᓯᕗᓪᓕᖅᐹᖑᓪᓗᖓ ᐊᕐᓇᐅᓪᓗᖓ ᒪᓕᒐᓕᐅᖅᑎᔾᔪᐊᖑᓚᐅᖅᓯᒪᔪᖓ ᓄᓇᕗᒻᒧᑦ.
ᐅᑭᐅᓄᑦ ᐊᕙᑎᓄᑦ ᐊᓂᒍᖅᑐᓄᑦ ᐊᒥᓱᑦ ᐃᓄᐃᑦ ᑕᑯᓐᓇᓐᖑᐊᖅᑕᒥᓂᒃ ᐅᖃᐅᓯᖃᖅᓯᒪᒻᒪᑕ ᐊᔅᓱᕈᖅᓯᒪᔪᖅᐹᓘᓪᓗᑎᓪᓗ ᐅᑭᐅᖅᑕᖅᑐᒥ ᑲᑎᒪᔨᐅᓂᕐᒥᑦ ᓴᖅᑮᓇᓱᐊᕐᓂᖏᓐᓂ ᓱᓕ ᒫᓐᓇᒧᑦ ᐊᔅᓱᕈᖃᑦᑕᖅᑐᑦ − ᐱᐅᔪᐊᓗᓐᓂ ᓯᕗᓂᑦᑎᓐᓂ ᐅᑭᐅᖅᑕᖅᑐᒥ ᓴᖅᑮᓇᓱᐊᖃᑦᑕᕐᖓᑕ ᐊᒻᒪᓗ ᐃᓄᖁᑎᖏᓐᓄᑦ. ᐅᖃᖅᑲᐅᒻᒥᒐᑦᑕ ᐅᓪᓗᒥᐅᔪᖅ ᐃᓄᐃᑦ ᑲᑎᒪᔨᕈᔫᖃᑦᑕᖅᑐᑦ ᓯᕗᒃᑲᖅᑕᐃᓕᒪᓕᖅᑐᑦ ᑕᒪᑐᒥᖓ ᐊᓱᕉᑎᐅᖃᑦᑕᖅᓯᒪᔪᒥᑦ, ᑭᓯᐊᓂᓕ ᐃᓱᓕᑦᑎᓕᕐᓗᖓ ᐃᓕᓴᖅᓯᖄᕈᒪᒐᒪ ᒪᕐᕉᓐᓂᒃ ᐱᓕᕆᔪᒪᕆᔪᐊᓘᓐᓂᒃ ᐊᔅᓱᕈᖃᑦᑕᖅᓯᒪᔫᓐᓂᒃ ᑲᔪᓯᑎᑦᑎᓇᓱᐊᖅᑐᑎᒃ ᐅᑭᐅᖅᑕᖅᑐᒥ ᑲᑎᒪᔨᓂᒃ, ᑭᓯᐊᓂᓕ ᖁᓅᒻᒥᓇᖅᑐᖅ ᐊᐃᑉᐸᖓ ᐃᓅᒍᓐᓃᓚᐅᖅᓯᒪᒻᒪᑦ − ᐅᐊᑐ ᓯᓕᑉᓴᓐᑯ ᐊᒻᒪᓗ ᑎᐅᕆ ᕕᓐᔨ. ᖁᕕᐊᓲᑎᖃᕐᓂᑎᓐᓂ ᓇᓪᓕᐅᓂᖅᓯᐅᓐᓂᑎᓐᓂᓪᓗ, ᐃᖅᑲᐅᒪᐃᓐᓇᖃᑦᑕᖅᑕᕗᑦ ᐅᕙᓃᖃᑕᐅᔪᓐᓇᖏᑦᑐᑦ ᒫᓐᓇ ᑭᖑᓂᖃᓈᑦᑎᐊᖅᑐᒋᓪᓗ.
ᖁᔭᓐᓇᒥᒃ.