ᓰᑏᐱᕆ 29, 2016 – ᐅᐊᓯᓐᑕᓐ, ᑏ.ᓰ. – “ᑐᓐᖓᕕᐅᒻᒪᑦ ᑕᐃᒪᐃᓪᓗᐊᑎᑦᑎᓂᖅ ᑕᒪᒃᑯᓂᖓ ᑲᒪᓂᐊᖅᑎᓪᓗᑕ ᐊᓯᔾᔨᐸᓪᓕᐊᔪᓂᒃ ᐅᑭᐅᖅᑕᖅᑐᒥ ᐃᑲᔪᖅᑐᐃᒻᒪᑦ ᐃᓄᖁᑎᑦᑎᓐᓂ ᓄᓇᓕᑦᑎᓂᓪᓗ.” ᑕᒪᓐᓇ ᑐᓴᕋᔅᓴᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖓᑕ ᐃᔅᓯᕙᐅᑕᖓᓂ, ᐅᑲᓕᖅ ᐃᔨᑦᓯᐊᕐᒥᑦ, ᓯᕗᓕᖅᑎᓄᑦ ᓯᓚᕐᔪᐊᒥ ᓇᑭᑐᐃᓐᓈᖅᓯᒪᔪᓄᑦ ᐅᖃᐅᓯᕆᓚᐅᖅᑕᖓ, ᐃᑉᐸᔅᓴᖅ ᑲᑎᓚᐅᖅᑐᑦ ᐅᐊᓯᓐᑕᓐ ᑏ.ᓰ.ᒥ, ᓯᕗᓪᓕᖅᐹᖅᑎᐊᕐᒥ ᐃᓪᓗᕐᔪᐊᒨᖅᑐᑎᑦ ᖃᑯᖅᑖᓗᒻᒧᑦ ᖃᐅᔨᓴᖅᑎᒻᒪᕇᑦ ᒥᓂᔅᑕᖏᓐᓄᑦ.
ᒥᓂᔅᑕᐃᑦ ᑕᑯᓐᓇᓂᖅᓴᐅᓚᐅᖅᑐᑦ ᐊᒥᓱᑲᓪᓚᓐᓂᑦ ᐱᔾᔪᑎᖏᓐᓂ ᐊᒻᒪᓗ ᐱᒋᐊᕈᒪᔪᖃᖅᑲᑦ ᒪᓂᒪᕝᕕᐅᓪᓗᑎᒃ ᓄᑖᕐᓂᑦ ᐱᒋᐊᕈᑎᔅᓴᓂᒃ ᑐᑭᓯᐅᒪᑦᑎᐊᑲᓐᓂᕐᓂᐊᕐᖓᑕ, ᑲᒪᓗᑎᓪᓗ ᐃᓕᑦᑐᕐᓗᑎᓪᓗ ᐊᓯᔾᔨᐸᓕᐊᔪᓂᒃ ᐅᑭᐅᖅᑕᖅᑐᒥ. ᐃᔨᑦᓯᐊᖅ ᓯᕗᓕᖅᑎ ᐅᖃᐅᔾᔨᓚᐅᖅᑐᖅ ᖃᐅᔨᓴᖅᑎᓂᒃ ᑕᐃᒪᐃᓪᓗᐊᑎᑦᑎᖃᑦᑕᖁᔨᓪᓗᓂ ᐱᓕᕆᖃᑎᖃᖅᑎᓪᓗᒋᑦ ᐃᓄᓐᓂᑦ, ᖃᓄᑐᐃᓐᓇᑦᑎᐊᖅ ᑐᓴᐅᒪᖃᑦᑕᐅᑎᑎᓪᓗᒋᑦ.
“ᖃᐅᔨᓴᖅᑏᑦ ᐃᓅᓯᖃᓲᖑᒻᒪᑕ ᐊᓂᖅᓵᖅᑐᖅᑐᓂᒋᓪᓗ ᖃᐅᔨᓴᕐᓂᖏᓐᓂ ᖃᐅᑕᒫᑦ. ᐃᓄᐃᑦ ᐃᓅᓇᓱᐊᓲᖑᒻᒪᑕ ᐊᓂᖅᓵᖅᑐᖅᑐᓂᒋᓪᓗ ᐅᑭᐅᖅᑕᖅᑐᖅ ᐊᖏᕐᕋᖓᓐᓂ ᖃᐅᑕᒪᑦ − ᐅᕙᒍᑦ ᑕᒫᓃᓐᖏᓐᓇᕋᑦᑕᓕ ᐊᕐᕌᒍᓕᒫᑦᑎᐊᖅ. ᐱᓕᕆᖃᑎᒋᓪᓗᑕ, ᑕᐃᒪᐃᓪᓗᐊᖅᑎᑕᐅᓗᑕᓗ, ᓴᓐᖏᓂᖅᑖᑲᓐᓂᕈᓐᓇᖅᑐᒍᑦ, ᐱᔭᕆᐊᓕᑉᐳᓪᓗ ᑭᓐᖒᒪᔭᕗᑦ ᐱᓗᑎᒍ ᖃᐅᔨᒪᓂᑦᑎᒍᑦ ᐅᓪᓗᒥᐅᔪᖅ ᑕᒪᒃᑯᐊ ᐊᑐᕐᓗᒋᑦ.”
ᐃᔨᑦᓯᐊᖅ ᐅᖃᖅᑐᓂ ᓱᓕ ᑕᒪᒃᑯᐊ ᓯᕗᓪᓕᖅᐸᐅᔾᔭᐅᒋᐊᓖᑦ ᐊᑐᖅᑕᐅᓗᑎᑦ ᖃᐅᔨᓴᕐᓂᖏᓐᓂ ᖃᐅᔨᒪᓂᖏᓐᓂ ᐃᓄᓂᑦ ᑕᐃᒪᐃᓪᓗᐊᑎᑦᑎᓐᖏᖃᑦᑕᕐᓂᖏᓐᓄᑦ ᐃᓄᐃᑦ ᓄᓇᓕᖏᓐᓂ ᐱᑕᖃᖁᓇᒋᑦ ᐅᑭᐅᖅᑕᖅᑐᒥ.
ᐃᔨᑦᓯᐊᖅ ᐅᖃᓚᐅᕐᒥᔪᖅ ᒫᓐᓇ ᑕᕝᕙ ᐱᒍᑦᑕ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᒥᑦ ᖃᐅᔨᓴᕐᓂᐅᔪᓪᓗ ᐃᓚᖃᕐᓗᑎᑦ ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᓐᓂ, ᑐᓐᖓᕕᐅᔪᓐᓇᕐᖓᑦ ᑕᒪᓐᓇ ᐋᖅᑭᔅᓱᐃᑎᓪᓗᒋᑦ ᖃᐅᔨᓴᕐᓂᕐᒥᑦ ᐱᓕᕆᐊᕆᓂᐊᖅᑕᖏᓐᓂ ᐃᓄᐃᑦ ᐅᑭᐅᖅᑕᖅᑐᒥ ᑕᑎᒋᔭᐅᑦᑎᐊᖃᑦᑕᕐᓗᑎᑦ ᖃᐅᔨᒪᓂᖏᑦ ᑲᔪᓯᒍᓐᓇᕐᖓᑕ ᑕᐃᒫᒃ ᐅᑭᐅᖅᑕᖅᑐᒥ.
“ᐊᒥᓱᐊᖅᑎᐅᓗᐊᖅᑐᖅ, ᐃᓱᒫᓘᑏᑦ ᐱᔭᐅᔪᒪᔪᓪᓗ ᐊᓯᖏᓐᓄ ᓇᓗᓇᐃᔭᖅᓯᒪᔫᔮᕇᖅᑐᓂᑦ ᖃᐅᔨᓴᓱᖑᒻᒪᑕ ᖃᐅᔨᓴᖅᑎᒻᒪᕆᓪᓗ ᐅᑭᐅᖅᑕᖅᑐᒥ ᐃᓄᓪᓗ ᐱᔪᓐᓇᐅᑎᖏᑦ ᐱᔪᒪᔭᕋᓗᐊᖏᓪᓗ ᑭᓪᓕᖃᖅᑎᑕᐅᓪᓗᑎᑦ,” ᐃᔨᑦᓯᐊᖅ ᐅᖃᖅᑐᓂ, “ᑕᒪᓐᓇ ᒥᓂᔅᑕᐅᓂᖅ ᐊᓯᔾᔨᕈᑕᐅᔪᓐᓇᖅᑐᖅ ᓯᓚᕐᔪᐊᒥ ᐅᑭᐅᖅᑕᖅᑐᒥ ᓄᓇᓕᓐᓂ ᐱᔪᓐᓇᐅᑎᖏᑦ ᐊᑐᖅᑕᐅᓗᑎᑦ ᑕᐃᒪᐃᓪᓗᐊᖅᑎᑕᐅᓗᑎᑦ ᐃᓄᐃᑦ. ᖁᔭᓕᔪᖓ ᓂᐱᕗᑦ ᑐᓴᖅᑕᐅᕙᓕᕐᖓᑕ. ᓂᕆᐅᒋᔭᖃᖅᑐᖓᓪᓗ ᐱᒋᐊᖅᐸᓪᓕᐊᒍᓐᓇᓐᖏᓱᓕᕋᑦᑕ ᑕᒪᒃᑯᓂᖓ.”
