ᑏᓰᑉᐱᕆ 19, 2019 – ᓅ ᔪᐊᒃ – ᓯᓚᕐᔪᐊᒥ ᑲᑐᔾᔨᖃᑎᒌᑦ ᑲᑎᒪᓂᕐᔪᐊᖓᓐᓂ ᑎᒍᓯᓚᐅᖅᓯᒪᔪᑦ ᐱᖁᔨᕗᖔᕈᑎᒥᑦ “ᓇᓗᓇᐃᖅᓯᓪᓗᑎᑦ ᑖᒃᑯᓂᖓ 2022–2032 ᐊᕐᕌᒍᖏᓐᓂ ᓯᓚᕐᔪᐊᒥ ᐅᑭᐅᓄᑦ ᖁᓕᓄᑦ ᓄᓇᖃᖅᑳᖅᑐᒥᓃᑦ ᐅᖃᐅᓯᖏᓐᓂ, ᐅᖃᐅᓯᐅᖁᔭᐅᓪᓗᓂ ᑕᒪᓐᓇ ᔭᒐᑉᐸᓪᓕᐊᓕᕐᓂᖓᓐᓂ ᓄᓇᖃᖅᑳᖅᑐᒥᓃᑦ ᐅᖃᐅᓯᖏᑦ ᑐᐊᕕᕐᓇᖅᓯᓕᕐᖓᑦ ᐸᖅᑭᔭᕆᐊᖃᕋᑦᑎᒍ, ᐆᒻᒪᓕᖅᑭᑎᓪᓗᑎᒍᓪᓗ ᓴᖅᑭᔮᖅᑎᑲᓐᓂᕐᓗᑎᒍᓪᓗ ᓄᓇᖃᖅᑳᖅᑐᒥᓃᑦ ᐅᖃᐅᓯᖏᑦ ᐊᒻᒪᓗ ᑐᐊᕕᕐᓇᖅᑐᒥᑦ ᑲᓇᑕᒥ ᓯᓚᕐᔪᐊᒥᓗ ᑲᒪᒋᓕᕐᓗᑎᒍ.”
ᑭᖑᓪᓕᖅᐹᒥ ᐱᖁᔨᕗᖔᕈᑎᓂᑦ “ᖃᐃᖁᔨᒻᒥᔪᖅ ᑎᒥᐅᔪᓂᒃ ᐋᖅᑭᔅᓱᐃᖃᑕᐅᒍᒪᔪᓂᒃ ᑲᓇᑕᒥ ᐃᓕᖅᑯᓯᐅᒐᔭᖅᑐᓂᒃ ᑮᓇᐅᔭᖅᑖᔅᓴᓄᑦ ᐊᑐᓕᖅᑎᑎᑦᑎᐊᕋᓱᐊᕐᓂᕐᒧᑦ ᓯᓚᕐᔪᐊᒥ ᐅᑭᐅᓄᑦ ᖁᓕᓄᑦ ᓄᓇᖃᖅᑳᖅᑐᒥᓂᕐᒥᑦ ᐅᖃᐅᓯᓕᕆᓂᕐᒧᑦ ᐱᓕᕆᖃᑕᐅᒍᒪᔪᓂᒃ ᓄᓇᖃᖅᑲᖅᑐᒥᓂᕐᓂᑦ, ᖃᐃᖁᔨᕗᑦ, ᐅᖃᐅᓯᓕᕆᓂᕐᒦᑎᓪᓗᒍ, ᐱᒋᐊᕈᑎᖃᕐᓗᑎᑦ ᖃᓄᖅ ᐊᑐᓕᖅᑎᑦᑎᑲᓐᓂᕈᓐᓇᕋᔭᕐᒪᖓᑖ ᓯᓚᕐᔪᐊᒥ ᐅᑭᐅᓄᑦ ᖁᓕᐅᔪᓄᑦ.”
ᒫᓐᓇᐅᔪᖅ ᖁᑦᑎᓂᖅᐹᖑᒻᒪᑦ ᒪᑐᓂᐊᓕᖅᑎᓪᓗᒍ 2019 ᓯᓚᕐᔪᐊᒥ ᓄᓇᖃᖅᑳᖅᑐᓄᑦ ᐅᖃᐅᓯᓕᕆᓂᕐᒥᑦ (ᑎᓯᐱᕆ 17, ᓯᓚᕐᔪᐊᑉ ᑲᑐᔾᔨᖃᑎᒌᖏᑕ ᐊᓪᓚᕕᖓᓐᓂ, ᓅ ᔪᐊᒃᒥ, ᒥᐊᓕᒐᐅᓪᓗ ᓄᓇᖓᓐᓂ) ᐅᖃᐅᓯᕆᓗᒋᑦ ᑕᒪᒃᑯᐊ ᑭᒡᒐᑐᕐᓗᒋᑦ ᐅᑭᐅᖅᑕᖅᑐᒥ ᐃᓄᓕᕆᓂᕐᒧᑦ, ᐊᓗᑭ ᑰᑦᑎᖅ, ᐊᖏᔪᖅᑳᖅ ᓄᓇᕗᑦ ᑐᓐᖓᕕᒃᑯᓐᓂ ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐱᖁᔨᕗᖔᕈᑎᒥᒃ ᐃᑲᔪᖅᑐᐃᔪᓂᑦ ᐅᑭᐅᓄᑦ ᖁᓕᓄᑦ ᐊᒻᒪᓗ ᐱᓕᕆᒃᑲᓂᖅᑐᑎᑦ “ᐱᓕᕆᐊᔅᓴᖃᓪᓚᕆᒃᑲᑕ ᑕᒪᑐᒥᖓ ᐅᖃᐅᓯᓕᕆᓂᕐᒥᑦ ᑕᐃᒪᐃᓪᓗᐊᖅᑎᑕᐅᖃᑦᑕᖏᓐᓂᖏᓐᓂ.” ᐅᖃᖅᑐᓂᓗ ᓄᓇᕗᑦ ᐃᓗᐊᓂ “ᐃᓄᐃᑦ 85%−ᖑᒻᒪᑕ ᐊᒻᒪᓗ 70%−ᖑᓪᓗᑎᒃ ᐃᓄᐃᑦ ᐊᓈᓇᖏᑕ ᐅᖃᐅᓯᖏᓐᓂ ᐅᖃᕈᓐᓇᖅᑐᑦ” ᑭᓯᓕ “ᑭᓪᓕᖃᖅᑐᑐᐊᖅ ᑲᓇᑕᒥ ᐊᖏᓂᖅᐹᒥ ᐅᖃᐅᓯᕐᒥᑦ ᒐᕙᒪᑐᖃᒃᑯᓐᓄ ᐃᓕᓴᕆᔭᐅᓯᒪᓐᖏᑦᑐᒥᑦ ᐅᖃᐅᓯᕐᒥᑦ… ᐃᒪᐃᑦᑑᒐᓗᐊᖅᑎᓪᓗᒍ, ᐃᓄᒃᑐᑦ ᒐᕙᒪᒃᑯᓐᓂ ᐊᑐᖅᑕᐅᓗᓂ ᐃᖅᑲᓇᐃᔭᕈᑎᐅᓐᖏᑦᑐᖅ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᖅᑎᐅᔫᒐᓗᐊᓄᑦ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᑉ ᑐᖏᓂᖓᓐᓂ (ᓯᓚᕐᔪᐊᒥ) ᓖᓴ ᖁᐱᕐᕈᐊᓗᒃ ᓴᖅᑮᖃᑕᐅᓚᐅᖅᑐᖅ ᓯᓚᕐᔪᐊᒥ ᐊᕐᕌᒍᖓᓐᓂ ᓄᓇᖃᖅᑳᖅᑐᒥᓃᑦ ᐅᖃᐅᓯᖓᓐᓂ ᑲᑐᔾᔨᖃᑎᒌᑦ ᓯᓚᕐᔪᐊᒧᑦ ᐱᒋᐊᕐᖓᕐᓂᖓᓐᓂ 2019. ᐅᖃᖅᑐᓂᓗ, “ᑕᕝᕙᓂ ᐊᕐᕌᒍᒥ ᐱᒻᒪᕆᐊᓘᒻᒧᑦ ᐅᔾᔨᕈᓱᑦᑎᑦᑎᑲᓐᓂᕆᐊᖃᕋᑦᑕ ᐃᓄᐃᑦ ᐅᖃᐅᓯᖏᓐᓂ, ᐅᖃᐅᓰᑦ ᔭᒐᐃᔭᐅᓕᕐᖓᑕ, ᐊᔅᓱᕈᒃᑲᓐᓂᕆᐊᖃᖅᑐᒍᑦ ᓴᓐᖏᑎᓇᓱᐊᖏᓐᓇᕐᓗᑎᒍ, ᐊᒻᒪᓗ ᐊᑦᑐᐊᓂᖃᓪᓚᕆᒻᒪᑦ ᐱᖅᑯᓯᑦᑎᓐᓄᑦ. ᐃᓕᓴᖅᓯᓯᒪᔪᒍᑦ ᑕᕝᕙᓂ ᐊᕐᕌᒍᒥ ᒥᑭᓗᐊᖅᑐᖅ ᑲᒪᒋᔭᓇᐊᕐᓗᒍ ᑕᒪᓐᓇ ᐅᖃᐅᓯᓕᕆᓂᖅ. ᐅᑭᐅᓄᑦ ᖁᓕᓄᑦ ᐱᕕᖃᖅᑎᑕᐅᔪᑦ ᑲᒪᒋᓂᐊᕐᓗᑎᒍ, ᓴᓐᖏᑎᓐᓇᓱᐊᕐᓗᒍ, ᐆᒻᒪᑎᒃᑲᓐᓂᕋᓱᐊᕐᓗᒍᓗ ᐅᖃᐅᓯᕗᑦ.”
ᓕᐅᐸᕝ ᑕᐃᐊᓐ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᔅᓯᕙᐅᑕᐅᑉ ᑐᖏᓕᖓ ᓯᑳᑦᑲᒧᑦ, ᐅᖃᓚᐅᖅᑐᖅ “ᐅᕙᒍᑦ, ᑭᒡᒐᖅᑐᐃᔨᐅᔪᒍᑦ ᐃᓄᓐᓂᑦ (ᔪᑉᐱᒋᑦ) ᐅᑭᐅᖅᑕᖅᑐᒥ ᐅᓛᓵᒥ, ᑐᓐᖓᓱᑦᑎᑦᑎᕗᒍᑦ ᐃᑲᔪᖅᑐᖅᑕᐅᖁᔨᓪᓗᑕᓗ ᓇᓗᓇᐃᖅᓯᓪᓗᑕ ᓯᓚᕐᔪᐊᒥ ᐅᑭᐅᓄᑦ ᖁᓕᓄᑦ ᓄᓇᖃᖅᑳᖅᑐᒥᓂᕐᓄᑦ ᐅᖃᐅᓯᖏᓐᓂ. ᐅᖃᐅᓯᓕᕆᓂᖅ ᐱᓪᓚᕆᐊᓘᒻᒪᑦ ᑭᒃᑰᓂᑦᑎᓐᓂ ᓇᓗᓇᐃᖅᓯᔾᔪᑎᐅᒻᒪᑦ ᐃᓅᓂᑦᑎᓐᓂ ᐃᒻᒥᒃᑯᑦ ᑕᕝᕙᐅᓂᑦᑎᓂᓪᓗ. ᐸᕐᓇᐅᑎᑕᖃᕐᖓᑦ ᓯᕗᒧᐊᑉᐸᓪᓕᐊᓂᐊᕐᓗᓂ ᐃᑯᐱᑦᑐᓕᕆᓂᕐᒥᑦ ᐋᖅᑭᔅᓱᐃᑦᑎᐊᕐᓗᓂᓗ ᓯᓚᕐᔪᐊᒥ ᓄᓇᓕᓐᓂᓪᓗ ᐱᔭᐅᔪᒪᔪᓂᒃ ᑕᐃᒪᐃᓪᓗᐊᖅᑎᓪᓗᒋᑦ. ᑐᕌᒐᒋᔭᐅᒐᔪᑦᑐᖅ ᐃᓕᓴᕆᔭᐅᓂᖏᓐᓂ ᐊᕕᑦᑐᖅᓯᒪᔪᓂᒃ, ᓯᓚᕐᔪᐊᒥᓗ ᐱᒻᒪᕆᐅᒻᒪᑕ ᐅᖃᐅᓯᓕᕆᓂᐅᔪᑦ ᐊᔾᔨᒌᓐᖏᑦᑐᑦ ᐊᒥᓲᓪᓗᑎᓪᓗ ᓇᑭᑐᐃᓐᓇᖅᓯᒪᔪᑦ ᐃᓕᓐᓂᐊᖅᑐᓕᕆᓂᕐᓗ, ᐊᓪᓚᕕᓕᕆᓂᖅ ᒪᓕᒐᓕᕆᓂᕐᓗ, ᐱᖅᑯᓯᓕᕆᓂᕐᒥᓪᓗ ᐊᒻᒪᓗ ᐱᕙᓪᓕᐊᔪᓕᕆᓂᕐᒥᑦ ᐊᒻᒪᓗ ᖃᕋᓴᐅᔭᒃᑯᑦ ᓂᐅᕐᕈᑎᖃᕐᓂᑯᓪᓗ ᐱᑕᓕᐊᓘᒻᒪᑕ.”
ᕕᐅᕋ ᒪᒃᑳᑉ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓯᕗᓕᖅᑏᑦ ᑲᑎᒪᔨᕋᖓ ᐊᓛᔅᑲᒥ ᐅᓂᒃᑳᓚᐅᕐᒥᔪᖅ ᓯᕗᓪᓕᖅᐹᒥ ᐱᒻᒪᕆᐅᓂᖅᐹᖑᒻᒪᑦ ᓴᐃᓐᑦ ᓗᐊᕋᓐᔅ ᕿᑭᖅᑕᖓᓂ ᔪᑉᐱᒃ “ᓇᓗᓇᐃᖅᑕᐅᓯᒪᔪᖅ ᐱᑕᖃᕆᐊᖃᓪᓚᕆᓐᓂᖓᓂ ᐊᒻᒪᓗ ᐃᑲᔫᑎᖃᖅᑐᖅ ᓄᓇᖃᖅᑳᑦᑐᓕᒫᑦ ᐅᖃᐅᓯᖏᓐᓄᑦ ᓂᓪᓕᐊᓲᓄᑦ. ᐱᒻᒪᕆᐅᒋᓪᓗᓂᓗ, ᐃᓕᓴᕆᔭᐅᓯᒪᒋᐊᖃᕐᓂᖏᑦ ᓄᓇᖃᖅᑳᖅᑐᒥᓃᑦ ᐅᖃᐅᓯᖏᑦ ᐱᖅᑯᓯᕗᓪᓗ ᑭᒃᑰᓂᕗᓪᓗ ᓴᖅᑭᔮᒃᑲᓐᓂᖅᑎᑕᐅᕆᐊᖃᓪᓚᕆᑦᑐᑦ.”
ᐃᓄᐃᑦ ᐅᑭᐅᖅᑕᖅᑐᒦᑦᑐᑦ, ᐅᖃᐅᓯᖏᑦ ᑐᓐᖓᕕᒋᔭᐅᒻᒪᑕ ᐱᖅᑯᓯᖏᑎᒍᑦ ᑭᒃᑰᓂᖏᑎᒍᓪᓗ ᐊᒻᒪᓗ ᐆᒻᒪᑎᒃᑲᓐᓂᕆᐊᖃᕐᖓᒍ, ᑲᒪᒋᑦᑎᐊᖏᓐᓇᕐᓗᓂᒋᑦ, ᐊᑐᑦᑎᐊᕐᓗᒋᑦ, ᓴᖅᑭᔮᖅᑎᓪᓗᒋᓪᓗ ᐱᐅᓂᖅᐹᖅᑎᒍᑦ. ᓇᓗᓇᐃᖅᓯᓯᒪᒐᑦᑕ ᑐᕌᒐᑦᑎᓐᓂ ᑲᔪᓯᒍᓐᓇᖓᑦ ᑭᓯᐊᓂ ᐱᒋᐊᕈᑕᐅᓗᓂ, ᐱᔭᐅᓇᓱᓪᓗᓂ, ᐃᖏᕐᕋᑎᓐᓇᕐᓗᒍᓗ ᐃᓕᓴᕆᔭᐅᓯᒪᔪᖅ ᐅᖃᐅᓰᑦ ᖃᓄᐃᓕᖓᓂᖏᓐᓂ ᑎᒥᐅᔪᓂᒃ, ᓄᓇᓕᕐᔪᐊᓂᑦ ᒐᕙᒪᒃᑯᓂᓪᓗ ᑭᓪᓕᖃᖅᑐᓂᓪᓗ ᐃᓄᐃᑦ ᐃᓅᕕᖏᓐᓂ, ᓲᕐᓗ ᖃᓄᐃᑦᑐᒦᓐᓂᖓ ᐅᖃᐅᓯᕗᑦ ᖁᕝᕙᓯᑦᑎᑲᓐᓂᕆᐊᖃᕋᑦᑎᒍ ᐃᓅᓪᓗᑕ ᐊᑐᑦᑎᐊᕐᓗᑎᒍᓪᓗ ᐃᑲᔪᖅᑐᐃᓐᓇᖃᑦᑕᕐᓗᑕᓗ ᐅᖃᐅᓯᓕᕆᓂᕐᒥᑦ ᐱᔪᖃᓕᕋᐃᑉᐸᑦ.
ᐅᖃᐅᓯᕇᓐᓇᑦᑎᐊᕋᑦᑎᒍ ᐱᒋᐊᖅᑕᐅᒋᐊᖃᓕᕐᓂᖏᑦ ᓴᖅᑭᔮᖅᑎᑕᐅᓗᑎᑦ ᐅᖃᐅᓯᕗᑦ ᐊᔾᔨᒌᓐᖏᑦᑐᑦ ᐅᖃᐅᓰᑦ, ᒥᑭᓪᓕᕚᓪᓕᑎᖅᑕᐅᒋᐊᖃᓐᖏᑦᑐᖅ ᑐᐊᕕᕐᓇᖅᓯᓕᕐᖓᑦ ᑲᒪᒋᐊᑦᑎᐊᕆᐊᖃᖅᑐᑎᒍ ᐃᓄᓕᓅᕐᓂᑦ, ᑎᒍᒥᐊᖅᑎᐅᔪᓂᒃ ᓂᐱᖃᓐᖏᑦᑑᒐᓗᐊᓂᑦ ᐅᖃᖅᑐᓂ. ᐅᖃᐅᓯᕇᓐᓇᕆᐊᖃᕋᑦᑎᒍ ᓇᓗᓇᐃᕐᓗᑎᒍᓪᓗ ᑲᓇᑕᒥ ᒥᐊᓕᒐᐃᓪᓗ ᓄᓇᖓᓐᓂ ᐅᖃᐅᓯᐅᒻᒪᑦ ᐊᑐᖅᑕᐅᕙᑦᑐᖅ ᐅᑭᐅᖅᑕᖅᑐᒥ ᓇᓗᓇᐃᖅᑕᐅᓚᐅᖅᑐᓂᓗ ᔫᓂᒥ 26, 2019, ᐃᓕᓴᕆᒻᒥᒐᖅᑎᒍ ᑕᒪᓐᓇ ᐃᓚᓕᐅᔾᔭᐅᒋᐊᖃᓂᖏᓐᓂ ᐊᔾᔨᒌᓐᖏᑦᑐᑦ ᐅᖃᐅᓰᑦ ᖃᓂᒌᑦᑑᒐᓗᐊᑦ, ᐊᒻᒪᓗ ᐅᓗᕆᐊᓇᖅᑐᒦᓕᖅᑐᑦ. ᓲᕐᓗ, ᓅᒃᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐊᓪᓚᕕᖓᓐᓂ ᐱᒻᒪᕆᐅᔪᒥᑦ ᐅᖃᐅᓯᖃᑎᒌᓐᓂᖏᑦ ᐃᓄᐃᑦ ᑲᓇᓐᓇᖓᓃᑦᑐᑦ ᐊᑯᑭᑦᑐᕐᒥᐅᓄᑦ ᑕᒪᑐᒥᖓ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᓕᓴᖅᓯᒌᖅᓯᒪᔪᑦ ᐃᑲᔪᖅᑕᐅᔭᕆᐊᖃᕐᓂᖏᓐᓂ ᐃᓄᐃᑦ ᐅᖃᐅᓯᖏᓐᓂ ᐃᓕᓐᓂᐊᖅᑎᑕᐅᖃᑦᑕᕐᓗᑎᑦ ᐃᓕᓐᓂᕈᑎᖃᕐᓗᑎᓪᓗ ᐃᓕᓐᓂᐊᖅᑐᓕᕆᔨᒻᒪᕆᓐᓂᑦ ᐃᓕᓐᓂᐊᕕᓐᓂᑦ. ᐃᓕᓐᓂᐊᖅᑐᓕᕆᓂᖅ ᐊᑑᑎᖃᑦᑎᐊᖅᑐᖅ ᐃᓄᐃᑦ ᓄᓇᖓᓐᓂ, ᐃᓕᓐᓂᐊᖅᑐᓕᕆᔨᒻᒪᕇᑦ ᒪᓕᑦᑎᐊᖅᑐᑦ ᐅᑉᐱᕆᔭᐅᔪᓂᒃ, ᐱᖅᑯᓯᖏᓐᓂ ᐅᖃᐅᓯᕐᓂᓪᓗ, ᐱᖃᓯᐅᑎᓪᓗᒋᑦ ᐊᑦᑐᐊᓂᖏᑦ ᐅᖃᐅᓯᓕᕆᓂᖅ, ᐊᔾᔨᐅᖏᑦᑐᕐᓗ ᐅᑭᐅᖅᑕᖅᑐᖅ ᐊᕙᑎᕗᑦ ᖃᐅᔨᒪᓂᕗᓪᓗ. ᐅᑦᕿᐊᕕᒃ ᓇᓗᓇᐃᖅᑕᐅᓯᒪᓂᖓ ᐃᑲᔪᖅᑐᐃᒻᒪᑦ ᓴᖅᑭᖅᑕᐅᓂᖏᓐᓂ ᐃᓕᓐᓂᐊᖅᑐᓕᕆᓂᒻᒪᕆᒻᒥᑦ ᐃᓄᐃᑦ ᐅᑉᐱᕆᔭᖏᓐᓂ ᐱᖅᑯᓯᖏᓐᓂᓪᓗ ᑕᒪᒃᑯᐊ ᖃᓪᓗᓈᕈᖅᑎᑕᐅᒐᓱᖃᑦᑕᓚᐅᕋᓗᐊᖅᑎᓪᓗᒋᑦ ᐃᓱᒪᒋᔭᐅᔪᑦ.
ᑎᑎᕋᖅᓯᒪᔪᑦ ᑲᑐᔾᔨᖃᑎᒌᑦ ᓯᓚᕐᔪᐊᒥ ᑲᑎᒪᓂᕐᔪᐊᖓᓐᓂ ᐱᖁᔨᕗᖔᕈᑏᑦ ᐅᕙᓃᑦᑐᑦ https://undocs.org/A/74/396
-30-
Contact:
Kelly Eningowuk
ICC (Alaska)
(907) 274-9058
kelly@iccalaska.org
Carole Simon
ICC (Canada)
(613) 563-2642 CSimon@inuitcircumpolar.com