ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᓇᑕ – ᐃᓄᐃᓴᓐᓂᖅᓴᐃᑦ ᓕᐳᕈ ᒐᕙᒪᒃᑯᖏᑦ ᐱᐅᔪᓂᒃ ᓯᓚᕐᔪᐊᒥ ᐅᑭᐅᖅᑕᖅᑐᒥ ᐱᔾᔪᑎᓖᑦ

ᐅᑐᐱᕆ 22, 2019 – ᐋᑐᐋ, ᐊᓐᑎᐅᕆᔪ – ᓂᕈᐊᕐᓂᐅᓚᐅᖅᑐᖅ ᐃᓄᐃᓴᓐᓂᖅᓴᓂ ᓕᐳᕈᒥ ᒐᕙᒪᒃᑯᑦ ᑐᑭᓕᐊᑦᑎᐊᖅᑐᑦ ᓯᓚᕐᔪᐊᒥ ᐅᑭᐅᖅᑕᖅᑐᓕᕆᓂᕐᒥᑦ ᑕᒪᑐᒥᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ. ᓂᕈᐊᕐᓂᖅ ᓕᐳᕈᒥ ᒪᕐᕉᒻᒪᑎᒃ ᑎᓴᒪᐅᔪᓂᒃ ᐅᑭᐅᖅᑕᖅᑐᒦᑦᑐᑦ ᐱᐅᑦᑎᐊᖅᑐᓂᑦ ᓴᖅᑭᖅᑐᖃᖅᑐᓂ ᓂᕈᐊᕐᓂᖅ NDP−ᑯᓐᓂ ᐃᓅᓱᑦᑐᓄᑦ ᓂᕈᐊᕋᔅᓴᖅ ᒧᒥᓈᖅ ᖃᖅᑲᖅ ᓄᓇᕗᒻᒥ ᑐᓐᖓᓱᑦᑎᑦᑎᓚᐅᖅᑐᖅ, ᐊᒻᒪᓗ ᐅᖃᐅᓯᖃᖅᑐᓂ ᐃᓅᓱᑦᑐᐃᑦ ᐊᒥᓲᓂᖏᓐᓂ ᐃᓄᐃᑦ ᓄᓇᖓᓐᓂ. ᓄᓇᕕᒻᒥ ᐸᓛᒃ ᑯᐸᒻᒥ ᓯᐅᕕᐊ ᐱᕈᑉ ᓂᕈᐊᖅᑕᐅᓪᓗᓂ, ᐱᓕᕆᖃᑎᖃᕐᓂᐊᖅᑐᑎᑦ ᑖᒃᑯᓂᖓ ᐊᒻᒪᓗ ᓯᓚ ᐊᓯᔾᔨᐸᓪᓕᐊᓂᖓᓐᓂ ᐅᖃᐅᓯᕐᓗ ᐸᖅᑭᔭᐅᒋᐊᖃᕐᓂᖓᓐᓂ.

“ᑕᒪᓐᓇ ᓂᕈᐊᕐᓇᖅ ᑕᑯᓐᓇᕋᑦᑎᒍ ᐱᐅᔫᓪᓗᓂ ᑕᒪᑐᒧᖓ ᐅᖃᐅᓯᕆᕙᑦᑕᑎᓐᓄ ᓯᓚᕐᔪᐊᒥ ᐃᓚᒋᔭᐅᓂᖏᑦ ᐃᓄᐃᑦ ᑲᓇᑕᒦᑦᑐᑦ,” ᐅᖃᖅᑐᓂ ᒫᓂᑲ ᐃᐅᓪ−ᑲᓇᔪᖅ, ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ. “ᓂᕈᐊᕐᓇᐅᓚᐅᓐᖏᓱᖓᖅᑎᓪᓗᒍ ᒐᕙᒪᒃᑯᑦ ᑲᓇᑕᒥ ᓴᖅᑮᓚᐅᖅᓯᒪᒻᒥᒻᒪᑕ ᐊᑯᓂ ᐅᑕᖅᑭᔭᐅᔪᓂᑦ ᐱᖁᔭᕐᓂᑦ ᐅᑭᐅᖅᑕᖅᑐᒨᖓᔪᓂᒃ. ᐊᑐᓕᖅᑎᑕᐅᖁᒐᑦᑎᒍ, ᑲᒪᒋᔭᐅᑦᑎᐊᕐᓗᓂ ᐱᓯᒪᔭᐅᑦᑎᐊᕐᓗᓂᓗ, ᐃᓚᒋᔭᐅᒐᑦᑕ ᑕᒪᑐᒥᖓ ᐱᓕᕆᐊᖑᔪᓂᒃ. ᖃᐅᔨᒪᓇᓱᓐᓂᐊᕐᒥᔪᒍᑦ ᑕᒪᓐᓇ ᓯᓚ ᐊᓯᔾᔨᐸᓪᓕᐅᓂᐅᑉ ᒥᔅᓵᓅᖓᔪᖅ ᑲᑎᒪᔾᔪᑕᐅᓛᖅᑐᖅ, ᐅᖓᑖᓅᓐᖏᑉᐸᑦ ᐱᓕᕆᐊᖑᓂᐊᖅᑐᓂᑦ ᑐᕌᕐᖓᑦ ᐸᕇᔅᒥ ᓯᓚᐅᑉ ᒪᓕᒐᖓᓐᓂ.”

ᐅᑯᐊ ᓴᖅᑭᓚᐅᖅᑐᑦ ᑎᓴᒪᑦ ᐅᑭᐅᖅᑕᖅᑐᒥ ᓂᕈᐊᕋᔅᓴᐅᔪᖃᖅᑎᓪᓗᒍ ᑲᓇᓐᓇᕐᒧᑦ ᐅᐊᓐᓇᒧᓪᓗ:
• ᓛᐸᑐᐊ, ᓕᐳᕈᓗ ᐃᕚᓐ ᔭᐅᓐᔅ ᐃᔅᓯᕚᖏᓐᓇᓚᐅᖅᑐᖅ ᓂᕈᐊᖅᑕᐅᓪᓗᓂ 4,821−ᓄᑦ, ᑭᒡᒐᖅᑐᐃᓕᖅᑐᓂ 42.3%−ᓂᑦ ᓂᕈᐊᖅᑕᐅᓂᖓᓐᓄᑦ. ᓂᕈᐊᕆᐊᖅᑐᔅᓯᒪᔪᓪᓗ ᑲᑎᑦᑐᒋᑦ 56.9%−ᖑᓚᐅᖅᑐᑦ.
• ᑯᐸᐃᑦ ᑕᕐᕋᖓᓂ ᐸᐱᑎᐱ-ᐸᐃ−ᔭᒥᔅ-ᓄᓇᕕᑦ−ᐃᕗ ᓂᕈᐊᖅᑕᐅᓪᓗᓄ ᐸᓛᒃ ᑯᐸᒻᒥ ᓯᐅᕕᐊ ᐳᐱ 37.7%−ᖑᓪᓗᑎᑦ. 170-ᖑᔪᑦ 197-ᖑᔪᓂᑦ ᓂᕈᐊᕆᐊᖅᑐᕐᕖᑦ ᐅᓂᒃᑳᓕᐅᖅᓯᒪᕗᑦ ᑕᒪᑐᒥᙵ.
• ᓄᓇᕗᒻᒥ NDP−ᒥ ᓂᕈᐊᕋᔅᓴᐅᓚᐅᖅᑐᖅ ᒧᒥᓛᖅ ᖃᖅᑲᖅ ᓄᑖᖑᓪᓗᓂ ᒪᓕᒐᓕᐅᖅᑎᐅᓪᓗᓂ. ᓂᕈᐊᖅᑕᐅᓪᓗᓂ 3,717−ᓄᑦ ᐊᒻᒪᓗ 41.2%−ᒥ ᓂᕈᐊᖅᑕᐅᓪᓗᑎᑦ. 55−ᓂᑦ 59−ᒧᑦ ᓂᕈᐊᕋᔅᓴᐅᔪᓂᐅᓚᐅᖅᑐᖅ.
• ᓄᓇᑦᑎᐊᕐᒥ ᓂᕈᐊᕐᓂᕐᒧᑦ ᓕᐳᕈᒧᑦ ᒪᐃᑯ ᒪᑲᓚᐅᑦ 6,638−ᓄᑦ ᓂᕈᐊᖅᑕᐅᓪᓗᓂ ᑭᒡᒐᖅᑐᐃᓪᓗᓂ 40%−ᓄᑦ ᓂᕈᐊᖅᑕᓂᒃ. ᓂᕈᐊᕆᐊᖅᓯᒪᔪᑦ ᐊᒥᓱᓂᖏᑦ 54.86%−ᖑᓚᐅᖅᑐᑦ.

ᐃᐅᓪ−ᑲᓇᔪᖅ ᐅᖃᓱᖓᐅᑎᓪᓗᓂ, “ᐱᓕᕆᖃᑎᖃᖅᓯᒪᒐᑦᑕ ᑲᓇᑕᒥ ᒐᕙᒪᒃᑯᖏᓐᓂ ᓯᓚᕐᔪᐊᒥ ᑲᑎᒪᓂᐅᔪᓂᒃ ᐃᓄᐃᑦ ᓂᐱᖏᑦ ᑐᓴᖅᑎᑦᑎᔾᔪᑎᒋᓪᓗᒋᑦ, ᓲᕐᓗ ᐅᑭᐅᖅᑕᖅᑐᒥ ᑲᑎᒪᔨᖏᓐᓂ, ᓯᓚᕐᔪᐊᒥ ᑲᑐᔾᔨᖃᑎᒌᑦ ᐱᖃᑕᐅᖏᓐᓇᖅᑐᓂᒃ ᓄᓇᖃᖅᑳᖅᑐᓕᕆᓂᕐᒨᖓᔪᓂᒃ ᐊᒻᒪᓗ, ᐱᒋᐊᕐᖓᕐᓂᖓᓂ ᑎᓯᐱᕆᒥ, ᓯᓚ ᐊᓯᔾᔨᐸᓪᓕᐊᓂᖓᓐᓄᑦ COP25 ᑲᑎᒪᓂᐅᓚᐅᖅᑐᖅ ᓵᓐᑎᐊᐃᒍᒥ, ᓯᓕ.”