ᓄᕕᐱᕆ 23, 2017 – ᑰᐸᓐᕼᐊᐃᒐᓐ, ᑕᓐᒫᒃ; ᓅᒃ, ᑲᓛᖡᑦ ᓄᓈ; ᐃᖃᓗᐃᑦ, ᓄᓇᕗᑦ − ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᑭᐊᓚᓱᕐᓱᐊᖅ ᑎᓕᔭᐅᔾᔪᑎᒋᓯᒪᔭᖏᓐᓂ ᓴᖅᑮᖁᔨᕗᑦ ᐃᓄᓐᓂᑦ − ᓇᓗᓇᐃᖅᑕᐅᓯᒪᓗᑎᑦ, ᐃᓄᓐᓄᑦ ᐊᐅᓚᑕᐅᓗᑎᑦ ᐸᖅᑭᔭᐅᓂᖏᑦ ᐱᕈᖅᑐᓂᒃ ᐱᖅᑯᓯᕐᓂᓪᓗ ᐊᔾᔨᐅᖏᑦᑐᓂᑦ ᐅᖃᐅᓯᐅᕙᑦᑐᓂᒃ ᑲᓇᑕᒥ ᑲᓛᖡᑦ ᓄᓈᓂᓗ ᖁᑦᑎᑦᑐᒥ, ᐊᒻᒪᓗ ᐅᖃᒃᑲᓂᖅᑐᑎᑦ ᐃᓱᒪᖅᓱᕐᓂᖏᓐᓂ ᐃᓄᐃᑦ ᐅᐊᑦᑎᐊᕈᕐᓂᓴᐅᓚᐅᖅᓯᒪᔪᒥᑦ ᓄᓇᓕᓐᓂ ᐅᓪᓗᒥᐅᔪᕐᓗ ᓄᓇᓕᕐᔪᐊᓂᑦ.
ᐱᑭᐊᓚᓱᕐᓱᐊᖅ ᐅᐊᓐᓇᖓᓂ ᑲᓛᖡᑦ ᓄᓈᓂ ᐊᑎᖃᖅᑐᖅ ᐅᑭᐅᖅᑕᖅᑐᒥ ᐃᒪᖓ ᐊᐅᒃᑲᕐᓂᓕᒃ − ᐅᐊᑦᑎᐊᕈᕐᓂᓴᑐᖄᓗᒃ ᐃᒪᖅ ᓯᑯᒍᓐᓇᖏᑦᑐᖅ ᓂᕿᑦᑎᐊᕙᓕᐊᓗᒃ ᐃᒪᕕᒻᒦᓐᖔᖅᑐᓂᒃ ᐊᓄᕆᒥᑦ ᑕᐃᑲᓃᓐᓂᖓᓐᓂ. ᑎᓕᔭᐅᔾᔪᑎᓖᑦ ᑲᒪᒋᐅᓪᓗᑎᑦ ᐃᓄᓐᓄᑦ ᑲᓛᖡᑦ ᓄᓈᓂᒥᐅᑕᕐᓄᑦ ᑲᓇᑕᒥᓪᓗ, ᐊᒻᒪᓗ ᓯᕗᓪᓕᖅᐹᒥ ᐅᓂᒃᑳᓕᐅᓚᐅᖅᑐᑎᑦ, “ᐃᓄᐃᑦ ᓯᑯᐃᑦ ᐊᖅᑯᑎᖓᓐᓂ: ᓯᕗᓂᑦᑎᓐᓂ ᐱᑭᐊᓚᓱᕐᓱᐊᖅ “http://pikialasorsuaq.org ᐊᑐᓕᖁᔭᒥᓂᒃ ᑎᑎᕋᖅᓯᒪᔪᑦ ᐱᐅᖅᓱᐊᓂᕐᒥᑦ ᐊᐅᓚᑦᑎᒍᓐᓇᓂᕐᒥᓪᓗ ᑕᒪᑐᒥᖓ:
• ᐋᖅᑮᓗᑎᑦ ᐊᐅᓚᑦᑎᓂᕐᒧᑦ ᒪᓕᒐᐅᒐᔭᖅᑐᒥ ᑲᒪᒋᔭᐅᓗᑎ ᐃᓄᓐᓄᑦ ᑭᒡᒐᖅᑐᐃᔨᖃᕐᓗᑎᑦ ᓄᓇᓕᓐᓂ ᐱᑭᐊᓚᓱᕐᓱᐊᕐᒥᑦ.
• ᑲᑎᒪᖃᑎᖃᖃᑦᑕᕐᓗᑎᑦ ᓄᓇᓕᓐᓂ ᖃᓂᑦᑐᒦᑦᑐᓄᑦ ᐱᑭᐊᓚᓱᕐᓱᐊᕐᒧᑦ, ᓇᓗᓇᐃᔭᐃᓗᑎᓪᓗ ᐸᖅᑭᔭᐅᖁᔭᖏᓐᓂ ᐊᐅᒃᑲᓐᓂᓕᕐᒥ ᐊᒻᒪᓗ ᐊᖏᓂᖅᓴᓂᑦ ᓄᓇᖓᓐᓂ ᐊᑦᑐᐃᓂᖃᖅᑐᓂᑦ ᑲᑎᓐᖓᔭᖏᓐᓂᓪᓗ ᓄᓇᓕᓐᓄᑦ, ᓄᓇᒥᑦᑐᓂᓪᓗ ᐊᐅᒃᑲᓐᓂᓕᓪᓚᕆᒥᓪᓗ. ᑕᒪᒃᑯᐊ ᖃᐅᔨᓴᖅᑕᐅᖏᓐᓇᖃᑦᑕᕐᓗᑎᑦ ᐊᐅᓚᑕᐅᓗᑎᓪᓗ ᐃᓄᓐᓄᑦ ᐊᖏᖅᓯᒪᔪᓂᑦ ᐱᓕᕆᖃᑕᐅᔪᓕᒪᓄᑦ ᐊᒻᒪᓗ ᐃᓕᓴᕆᔭᐅᑦᑎᐊᖅᓯᒪᓗᑎᓪᓗ ᒐᕙᒪᒃᑯᓐᓄᑦ.
• ᐃᓄᓐᓄᑦ ᐃᓱᒪᖅᓲᑕᐅᓗᓂ ᐅᐸᑦᑕᐅᒍᓐᓇᖃᑦᑕᕐᓗᓂ ᑖᓐᓇ ᐱᑭᐊᓚᓱᕐᓱᐊᖅ.
“ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᑭᐊᓚᓱᕐᓱᐊᖅ ᑎᓕᔭᐅᔾᔪᑎᒋᓯᒪᔭᖏᑦ ᐱᒋᐊᓚᐅᖅᓯᒪᔪᖅ ᓄᓇᓕᓐᓂ ᐅᓂᒃᑳᓕᐊᕆᓯᒪᓪᓗᓂᒋᓪᓗ ᐅᑯᐊ. ᐱᑭᐊᓚᓱᕐᓱᐊᖅ ᑎᓕᔭᐅᔾᔪᑎᒋᓯᒪᔭᖓ ᐱᕙᓪᓕᐊᔭᐅᓯᒪᓕᖅᑐᖅ ᑕᐅᓇᓐᖓᑦ ᐱᒋᐊᕐᓗᑎᑦ ᖁᒻᒧᐊᐸᓪᓕᐊᓂᐊᖅᑐᑎᑦ ᓇᓗᓇᓐᖏᑦᑐᖅ ᐃᓄᐃᑦ ᐱᑭᐊᓚᓱᕐᓱᐊᕐᒦᑦᑐᑦ ᐊᐅᓚᑦᑎᒍᒪᒻᒪᑕ ᑕᒪᑐᒥᖓᒪ,” ᐅᑲᓕᖅ ᐃᔨᑦᓯᐊᖅ ᐅᖃᖅᑐᓂ, ᐃᔅᓯᕙᐅᑕᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC).
“ᑲᓛᖡᑦ ᓄᓈᓂ ᑲᓇᑕᒥᓗ ᑲᑐᔾᔨᒻᒪᑕ ᐱᐅᔪᕐᔪᐊᕌᓗᒻᒥᑦ. ᑐᓴᓪᓚᕆᓚᐅᖅᑐᒍᑦ ᐃᓄᐃᑦ ᓄᓇᓕᓐᓂ ᐊᑦᑐᐊᔪᓄᑦ ᐱᑭᐊᓚᓱᕐᓱᐊᕐᒧᑦ ᐱᒋᐊᕈᒪᓕᕐᖓᑕ ᐸᖅᑭᑦᑎᓗᑎᑦ ᑭᖑᕚᑦᑎᓐᓄᑦ. ᐃᓄᐃᑦ ᓄᓇᓖᑦ ᖃᓂᑦᑐᑦ ᐱᑭᐊᓚᓱᕐᓱᐊᕐᒧᑦ ᐱᖃᑕᐅᔪᒪᒻᒪᑕ ᐊᐅᓚᑦᑎᓂᖏᓐᓂ ᖃᐅᔨᓴᐃᓐᓇᕐᓂᖏᓐᓂᓪᓗ ᑕᒪᑐᒥᖓ ᐊᔾᔨᐅᓐᖏᑦᑐᒥᑦ ᐆᒪᔪᓂᒃ. ᐃᓕᓴᖅᓯᓯᒪᒻᒪᑕ ᑕᒪᒃᑯᐊ ᓂᕐᔪᑏᑦ ᑎᒥᑦᑎᐊᕆᑦᑐᐊᓘᒻᒪᑕ ᐊᑦᑐᐊᓂᖏᓐᓄᓪᓗ ᐱᑭᐊᓚᓱᕐᓱᐊᕐᒧᑦ,” ᐅᖃᖅᑐᓂ ᑰᐱᒃ ᑲᓚᐃᑦᔅ, ᑲᓛᖡᑦ ᓄᓈᓂ ᑲᒥᓴᓄ ᐊᒻᒪᓗ ᐊᖏᔪᖅᑳᖑᓚᐅᖅᓯᒪᓪᓗᓂ ᑲᓛᖡᑦ ᓄᓈᓂ.
ᑎᓕᔭᐅᔾᔪᑎᒋᓯᒪᔭᖏᓐᓂ ᐃᑲᔪᖅᑐᖅᑕᐅᔪᒪᓯᒪᔪᑦ ᒐᕙᒪᒃᑯᓐᓂ ᐊᑐᓕᖅᑎᑦᑎᓗᑎᑦ ᐊᑐᓕᖁᔭᐅᓯᒪᔪᓂᒃ ᐅᓂᒃᑳᕐᓂᑦ. “ᓴᓐᖏᓕᕇᓐᓂᒃ ᒐᕙᒪᒃᑯᓐᓃᓐᖔᕆᐊᓕᒃ ᐱᒻᒪᕆᐅᑎᒋᓂᖓᓐᓂ ᑕᑯᔭᐅᓂᐊᖅᑲᑦ ᑕᒪᓐᓇ ᐃᓄᓐᓂᑦ ᓇᒻᒥᓂᖅ ᑲᒪᒋᔪᒪᔭᖓ ᐊᐅᓚᒍᒪᔭᖏᓪᓗ ᓄᓇᖏᑦ ᐃᒪᖏᓪᓗ. ᑎᓕᔭᐅᔾᔪᑎᐅᓯᒪᔪᖅ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᔭᐅᖅᑐᐃᕗᑦ ᒐᕙᒪᒃᑯᓐᓂ ᑲᓇᑕᒥ, ᑲᓛᖡᑦ ᓄᓈᓂ ᐊᒻᒪᓗ ᑕᓐᒫᒃᒥ ᐱᓕᕆᖃᑎᖃᖁᓪᓗᒋᑦ ᐃᓄᓐᓂᑦ ᓴᖅᑮᓗᑎᓪᓗ ᐱᐅᑦᑎᐊᖅᑐᒥ ᓯᕗᓂᖃᑦᑎᐊᖁᔭᐅᓪᓗᓂ ᐱᑭᐊᓚᓱᕐᓱᐊᖅ ᐃᓄᖏᓪᓗ,” ᐅᖃᖅᑐᓂ ᐄᕙ ᐋᕆᐊᒃ, ᑲᓇᑕᒥ ᑲᒥᓴᓇ, ᐊᒻᒪᓗ ᓯᕗᓕᖅᑎᐅᓚᐅᖅᓯᒪᓪᓗᓂ ᓄᓇᕗᒻᒥ.
ᐱᑭᐊᓚᓱᕐᓱᐊᖅ ᒥᔅᓵᓄᑦ
ᐱᑭᐊᓚᓱᕐᓱᐊᖅ, ᐅᕝᕙᓘᓐᓃᑦ “ᓴᖅᑭᖅᑎᐊᖅᑐᐊᓗᒃ ᐱᐅᔪᐊᓗᒃ”, ᐊᖏᓂᖅᐹᖑᒻᒪᑦ ᐅᑭᐅᖅᑕᖅᑐᒥ ᐊᐅᒃᑲᕐᓂᓕᒃ ᐊᒻᒪᓗ ᐆᒪᔪᖃᕐᓂᖅᐹᖑᓪᓗᓂ ᑕᒪᓐᓇ ᐃᒪᕐᒥᐅᑕᕐᓂᑦ ᐅᑭᐅᖅᑕᖅᑐᒥ ᓯᓚᕐᔪᐊᑉ ᑲᔾᔨᖓᓐᓃᑦᑐᖅ. ᐱᑭᐊᓚᓱᕐᓱᐊᖅ ᐃᓕᓴᕆᔭᐅᓯᒪᔪᖅ ᐃᓄᓐᓄᑦ ᑭᖑᕚᕇᒐᓛᓗᓐᓄᑦ ᐆᒪᔪᖃᕐᕕᐅᒻᒪᑦ, ᓄᓇᓕᓐᓄᓪᓗ ᕿᑭᖅᑖᓗᒻᒥ ᐊᕙᓂᕐᓱᐊᕐᒥᓪᓗ ᑕᑎᖃᖃᑦᑕᖅᑐᑦ ᐊᐅᒃᑲᓐᓂᓕᕐᒥᑦ ᐱᕈᖅᑐᖃᖃᑦᑕᕐᓂᖓᓐᓄᑦ.
ᐱᑭᐊᓚᓱᕐᓱᐊᖅ ᐱᓪᓚᕆᐊᓘᔪᖅ ᑎᒻᒥᐊᓄᑦ ᐊᒥᓱᓄᑦ ᓄᓇᓕᓐᓄᑦ ᐊᓯᖏᓐᓄᓪᓗ ᐱᔭᐅᕙᑦᑐᓄᑦ. ᓂᕐᔪᑏᓪᓗ ᐅᑭᐅᖅᑕᖅᑑᑉ ᐃᒪᖓᓐᓂ ᓂᕆᕙᑦᑐᓄᑦ ᐊᐅᒃᑲᓐᓂᓕᕐᒥ ᑕᒪᒃᑯᓂᖓ ᑑᒑᓕᓐᓂᒃ, ᕿᓚᓗᒐᕐᓂᑦ, ᐃᖃᓗᓐᓂ, ᐊᐅᒃᓂᑦ, ᒥᑎᕐᓂᑦ ᓇᐅᔭᕐᓂᑦ, ᐊᓯᖏᓐᓂᓪᓗ (kittiwakes), ᓇᑦᑎᕐᓂᑦ, ᐅᔾᔪᓐᓂᑦ, ᖃᐃᕈᓕᓐᓂ ᐊᓯᖏᓐᓂᓪᓗ ᐃᒪᕐᒥᐅᑕᕐᓂᑦ ᒪᑯᐊᓗ ᓇᓄᐃᑦ ᑕᒫᓂ ᓂᕿᔅᓴᖅᓯᐅᖅᐸᑦᑐᑎᑦ.
ᒫᓐᓇᕈᓗᒃ ᐊᕐᕌᒍᒐᓚᐅᓕᖅᑐᓂᒃ, ᐅᑭᐅᖅᑕᖅᑐᒥ ᑕᒪᓐᓇ ᓯᑭᓕᒃ ᑲᐃᓐ ᐃᒪᖓᓐᓂ (Kane Basin), ᓂᐅᓗ (Nares Straight) ᐊᒻᒪᓗ ᓯᒥᑦᒥ (Smith Sound) (ᐃᑭᖅ) ᐱᕕᐅᓐᖏᓂᖅᓴᐅᖃᑦᑕᓕᖅᑐᖅ ᐊᒻᒪᓗ ᐊᐅᒃᑲᓐᓂᓕᖓᓗ ᐅᖃᐅᓯᐅᓐᖏᓂᖅᓴᐅᖃᑦᑕᓕᖅᑐᓂ. ᑕᒪᓐᓇ ᐱᔾᔪᑎᖃᖅᑐᖅ ᐊᓯᔾᔨᕐᓂᖏᓐᓂ, ᐊᖏᓂᖅᓴᑎᒍ ᓯᓚ ᐊᓯᔾᔨᕐᓂᖓᓐᓂ ᑕᐃᔭᐅᓯᒪᓪᓗᓂ ᐊᒥᓱᓂᑦ ᓇᒥᑐᐃᓐᓈᖅᑐᖅ ᐅᑭᐅᖅᑕᖅᑐᒥ, ᑭᓯᐊᓂᓕ ᖃᐅᔨᒪᔭᐅᓪᓚᕆᓐᖏᑦᑐᑦ.
ᑎᓕᐅᔭᐅᔾᔪᑎᐅᓯᒪᔫᑉ ᒥᔅᓵᓄᑦ
ᐱᑭᐊᓚᓱᕐᓱᐊᖅ ᑎᓕᔭᐅᔾᔪᑎᒋᓯᒪᔭᖓ ᐱᓕᐊᖑᖁᔭᐅᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᑎᒪᖃᑎᖃᕐᓗᑎᑦ ᓄᓇᓕᓐᓂ ᓄᓇᕗᒻᒥ ᐊᒻᒪᓗ ᑲᓛᖡᑦ ᓄᓈᓂ ᖃᓂᒋᔭᖃᖅᑐᓄᑦ ᐱᑭᐊᓚᓱᕐᓱᐊᕐᒥᑦ.
ᑲᒥᓴᓇᐃᑦ ᑲᑎᒪᖃᑎᖃᖅᑐᑎᓪᓗ ᓄᓇᓕᓐᓂ ᐊᕕᑦᑐᖅᓯᒪᔪᓂᓪᓗ ᑐᓴᕈᒪᓪᓗᑎᑦ, ᐋᖅᑮᒍᒪᓂᖏᓐᓂ ᐃᓄᐃᑦ ᖃᐅᔨᒪᓂᖏᓐᓂ, ᐊᒻᒪᓗ ᐊᑐᓕᖁᔨᓪᓗᑎᑦ ᐃᓄᓐᓂᑦ ᐸᕐᓇᐅᑎᓂᒃ ᐊᑦᑕᓇᐃᖅᑕᐅᖁᓪᓗᒋᑦ, ᖃᐅᔨᓴᖅᑕᐅᖁᓪᓗᒋᑦ ᐊᐅᓚᑕᐅᓗᑎᓪᓗ ᑕᒪᓐᓇ ᐱᐅᓂᐊᓗᐊ ᐱᑭᐊᓚᓱᕐᓱᐊᖅ ᑭᖑᕚᑦᑎᓐᓄ ᐊᑐᖅᑕᐅᖁᓪᓗᒋᑦ. ᑲᑎᒪᑎᑦᑎᓚᐅᖅᓯᒪᔪᑦ ᑲᓇᑕᒥ ᐃᓄᐃᑦ ᓄᓇᓕᖏᓐᓂ (ᐊᐅᓱᐃᑦᑐᖅ, ᖃᐅᓱᐃᑦᑐᖅ, ᐃᒃᐱᐊᕐᔪᒃ, ᒥᑦᑎᒪᑕᓕᒃ, ᑲᖏᖅᑐᒑᐱᓪᓗ) ᐊᒻᒪᓗ ᐅᑭᐅᖅᑕᖅᑐᒥ ᑲᓛᖡᑦ ᓄᓈᓂ ᓄᓇᓖᑦ (ᓯᐅᕋᐸᓗᒃ, ᖄᓈᖅ, ᑕᕕᔅᓯᕕᒃ, ᑯᓪᓗᕐᓱᐊᖅ, ᓅᔅᓴᐅᖅ ᐊᒻᒪᓗ ᐅᐱᕐᓇᕕᒃ).
ᐱᖓᓱᓄᑦ ᑲᒥᓴᓇᓐᓄᑦ ᐊᐅᓚᑕᐅᓪᓗᓂ:
ᓯᓚᕐᔪᐊᒧᑦ ᑲᒥᓴᓇ ᐅᑲᓕᖅ ᐃᔨᑦᓯᐊᖅ (ᐃᔅᓯᕙᐅᑕᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ
ᑲᓇᑕᒥ ᑲᒥᓴᓇ ᐄᕙ ᐋᕆᐊᒃ (ᓯᕗᓕᖅᑎᐅᓚᐅᖅᓯᒪᔪᖅ ᓄᓇᕗᒻᒧᑦ) ᐊᒻᒪᓗ ᑲᓛᖡᑦ ᓄᓈᓂ ᑲᒥᓴᓇ
ᑰᐱᒃ ᑲᓚᐃᔅ (ᑲᓛᖡᑦ ᓄᓈᓂ ᓯᕗᓕᐅᖅᑎᓚᐅᖅᓯᒪᔪᖅ).