Press Releases

Documenting our Progress

ᐃᓄᐃᑦ ᕿᒥᕐᕈᓂᖏᑦ IPCC 6-ᒋᓕᖅᑕᖓᓂ ᖃᐅᔨᓴᐃᓚᐅᖅᑎᓪᓗᒋᑦ ᐅᓂᒃᑳᓕᐊᓂᒃ ᖃᓄᐃᓕᖓᓪᓚᕆᓕᕐᒪᖔᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᖃᐅᔨᓴᐃᓂᕐᒧᑦ ᐊᒻᒪᓗ ᐸᕐᓇᐃᓂᕐᒧᑦ ᐱᒻᒪᕆᐅᔪᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ COP26 ᑲᑎᒪᕐᔪᐊᕐᓂᐊᒃᓴᒧᑦ ᓄᓇᖓᓐᓂ ᒐᓛᔅᑯᒥ

ᐋᒌᓯ 10, 2021 – ᐋᓐᑯᕆᔾ, ᐊᓛᔅᑲ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐸᕐᓇᒃᐸᓪᓕᐊᓕᖅᑎᓪᓗᒋᑦ ᓄᓇᕐᔪᐊᕐᒥ ᑲᑐᔾᔨᖃᑎᒌᕐᔪᐊᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑲᑎᒪᕐᔪᐊᕐᓂᒃᓴᒧᑦ (COP 26) ᓄᓇᖓᓐᓂ ᒐᓛᔅᑯ, ᓯᑳᑦᓚᓐᒥ ᓄᕕᐱᕆᐅᓕᖅᐸᑦ ᑖᒃᑯᐊ ᓴᖅᑭᑕᐅᓂᐊᖅᑐᑦ ᓄᓇᕐᔪᐊᕐᒥ ᑲᑎᒪᔨᖏᓐᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ (IPCC) ᐊᕐᕕᓂᓕᖓᓐᓂ ᖃᐅᔨᓴᐃᓚᐅᖅᑎᓪᓗᒋᑦ ᐅᓂᒃᑳᓕᐊᖅ (AR6) ᐊᒃᓱᑲᓪᓚᒃ ᑖᒃᑯᐊ ᐅᓄᖅᑐᓄᑦ ᑕᑯᔭᐅᔪᒪᔪᑦ. ᑖᒃᑯᐊ ᐅᓂᒃᑳᑦ ᓇᓗᓇᐃᖅᓯᑦᑎᐊᒃᑲᓐᓂᖅᑐᑦ ᐃᓄᐃᑦ ᐅᖃᐃᓐᓇᖃᑦᑕᖅᓯᒪᔭᖏᓐᓂᒃ ᑕᑯᖃᑦᑕᖅᑕᖏᓐᓂᒃ ᐊᕐᕌᒍᑦ 30 ᐊᓂᒍᖅᓯᒪᓕᖅᑐᑦ – ᓴᓇᕕᒡᔪᐊᖃᖅᑐᒧᑦ ᐊᓯᔾᔨᖅᑕᐅᓂᖓᓂᒃ ᓯᓚᕗᑦ ᑕᒪᓐᓇᓗ ᐱᓪᓚᑦᑖᖑᓂᖓᓂᒃ, ᐅᑭᐅᓐᑕᖅᑐᖅ ᐊᒃᓱᐊᓗᒃ ᐊᓯᔾᔨᖅᐸᓪᓕᐊᓕᖅᑐᖅ ᓱᒃᑲᔪᒥᒃ ᐊᒻᒪᓗ ᐊᑦᑕᕐᓇᖅᑐᒦᓕᖅᑐᖅ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐃᒃᓯᕙᐅᑕᖅ ᑕᐃᓕ ᓵᒻᐳ ᑐᕈ ᐃᒪᓐᓇ ᐅᖃᓚᐅᖅᑐᖅ, “ᐃᓄᐃᑦ ᐅᖃᐃᓐᓇᖃᑦᑕᖅᓯᒪᖕᒪᑕ “ᐱᓪᓚᒃᑖᖑᒃᐸᑦ” ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐱᓪᓚᑦᑖᒃᑯᑦ ᐊᐅᓚᔾᔭᐃᒋᐊᖃᓕᖅᑐᑦ ᓴᐳᒻᒥᐅᓯᖅᑕᐅᖁᓪᓗᒍ ᐃᓄᐃᑦ ᓄᓇᖓᑦ – ᐃᓅᓪᓗᑕ ᐊᖏᕐᕋᕗᑦ – ᐱᖃᓯᐅᑎᓪᓗᑎᒃ ᐅᑭᐅᖅᑕᖅᑐᑉ ᓄᓇᖓ, ᐃᒪᖓ, ᓯᑯᖓ ᐊᒻᒪᓗ ᐃᓄᐃᑦ ᐃᓕᖅᑯᓯᖓᑦ. ᐃᓄᐃᑦ ᑐᒃᓯᕋᐃᓐᓇᖅᓯᒪᓕᖅᑐᑦ ᐃᕐᖐᓐᓇᖅ ᐊᐅᓚᔾᔭᐃᒋᐊᖁᔨᓪᓗᑎᒃ ᐅᖅᑰᓯᕙᓪᓕᐊᓂᖓ ᐃᓱᖃᖁᔭᐅᓪᓗᓂ ᑕᕝᕗᖓ 1.5^oc ᑕᐃᒪᓐᓇᑎᒋ, ᓯᑯᐃᐸᓪᓕᐊᓕᖅᑐᒥᒃ ᑕᑯᓂᐊᖅᑐᑦ ᐅᑭᐅᖅᑕᖅᑐᕐᒥ, ᐊᐳᑎᖃᑦᑎᐊᖏᑦᑐᒥᒡᓗ ᐊᒻᒪᓗ ᓄᓇᐅᑉ ᖁᐊᖑᓂᖓ ᐊᐅᖕᓗᓂ. ᑕᒪᒃᑮᒃ ᑖᒃᑯᐊᒃ ᐊᑐᐊᒐᓄᑦ ᓇᐃᓈᖅᓯᒪᔪᑦ ᐊᒻᒪᓗ ᐱᔭᕐᓂᖏᑦᑐᓂᓕᕆᓂᕐᒧᑦ ᓇᐃᓈᖅᓯᒪᔪᑦ ᐅᓂᒃᑳᑦ ᑎᑎᕋᖅᓯᒪᔪᑦ ᐅᒃᐱᕈᓱᑦᑎᐊᖅᑐᑦ ᐊᓯᔾᔨᖅᐸᓪᓕᖓᓂᖓᑕ ᓱᒃᑲᓂᖓ ᑲᔪᓯᒃᐸᑦ ᑕᐃᒪᓐᓇ, ᓯᑯᑐᖃᐃᑦ ᓄᖑᑉᐸᓪᓕᐊᓂᐊᖅᑐᑦ, ᓯᑯ ᓵᒡᓕᕙᓪᓕᐊᓗᓂ ᐊᒻᒪᓗ ᐊᒃᓱᑲᓪᓛᕐᓗᓂ (ᑕᒪᓐᓇ ᖃᐅᔨᒪᔭᐅᓪᓗᓂ ᐅᒃᐱᕆᔭᐅᑦᑎᐊᖅᑐᖅ). ᑕᐃᒪᐃᑦᑐᒥᒃ ᐊᓯᔾᔨᕐᓂᖃᖅᐸᑦ ᐊᒃᓱᐊᓗᒃ ᐊᒃᑐᐃᓂᖃᕐᓂᐊᖅᑐᑦ ᓂᕿᑦᑎᓐᓂᒃ ᐊᒻᒪᓗ ᐅᓄᖅᑐᓂᒃ ᖃᐅᑕᒫᓐ ᐊᑐᖅᐸᑦᑕᑦᑎᓐᓂᒃ ᐃᓅᒐᓱᐊᖅᑎᓪᓗᑕ.”

“ᐃᓄᐃᑦ ᐃᓕᓴᖅᓯᓚᐅᖅᑐᑦ ᐱᒋᐊᕐᓂᖓᓂ ᓴᐳᒻᒥᐅᓯᖅᑕᐅᓯᒪᔭᕆᐊᖃᕐᓂᖓ ᐅᑭᐅᖅᑕᖅᑐᖅ ᑕᐃᒪᐃᓕᖓᒃᐸᑦ ᓄᓇᕐᔪᐊᖅ ᓴᐳᒻᒥᔭᐅᒐᔭᕐᒪᑦ – ᑭᓯᐊᓂᓕ, ᑖᒃᑯᐊ ᑐᒃᓯᕋᐅᑎᒋᔭᕗᑦ ᓱᓕ ᑐᓴᖅᑕᐅᓚᐅᖏᑦᑐᑦ. ᓈᓚᒃᑎᐅᓪᓗᑎᒃ ᑲᑎᒪᔪᓄᑦ IPPCC ᑲᑎᒪᓂᖏᓐᓄᑦ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᔭᐅᖅᑐᐃᓚᐅᖅᑐᑦ ᐃᑲᔪᖃᑎᒌᒡᓗᑎᒃ ᓴᓇᖃᑎᒌᖁᓪᓗᒋᑦ ᖃᐅᔨᒪᓂᖏᓐᓂᒃ ᐊᕐᕕᓂᓕᖓᓐᓂ ᖃᐅᔨᓴᐃᓚᐅᖅᑎᓪᓗᒋᑦ ᖃᐅᔨᓴᕈᑎᓂᒃ ᑲᑎᒪᓕᖅᐸᑕ, ᑖᒃᑯᐊ ᐱᖃᓯᐅᔾᔨᒐᔭᕐᒪᑕ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᓐᓂᒃ ᑕᒪᒃᑯᐊᓗ ᐱᒻᒪᕆᐅᓂᖏᓐᓂᒃ ᖃᐅᔨᒪᓂᕆᔭᖏᑦ,” ᑕᐃᒪᓐᓇ ᐅᖃᓚᐅᖅᑐᖅ ᓖᓴ ᖁᐱᕐᕈᐊᓗᒃ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑲᓇᑕᒥ ᑐᒡᓕᒋᔭᐅᔪᖅ ᐊᖓᔪᖅᑳᑉ (ᓄᓇᕐᔪᐊᕐᒥ ᑲᑎᒪᔨᖏᓐᓄᑦ)

ᑖᒃᑯᐊ IPCC-ᑯᑦ 6-ᒋᓕᖅᑕᖓᓂ ᖃᐅᔨᓴᐃᓚᐅᕐᖢᑎᒃ ᐅᓂᒃᑳᓕᐊᖓᑦ – ᖃᓄᐃᓕᖓᓪᓚᕆᓕᕐᒪᖔᑦ ᖃᐅᔨᓴᖅᑎᒻᒪᕆᑦ ᑐᓐᖓᕕᒋᔭᖓᑦ ᐊᕐᕌᒍᓄᑦ 8-ᓄᑦ ᐊᑯᓂᐅᓂᖃᕐᖢᓂ ᓴᓇᔭᐅᓚᐅᖅᑐᖅ. ᑭᒡᒐᖅᑐᐃᔪᖅ ᐅᓄᖅᑐᓂᒃ ᐃᖅᑲᓇᐃᔭᖅᑕᐅᓯᒪᔪᓂᒃ ᖃᐅᔨᓴᖅᑎᒻᒪᕆᐅᔪᓄᑦ 100 ᐅᖓᑖᓃᑦᑐᓄᑦ ᐊᒻᒪᓗ ᑭᒡᒐᖅᑐᐃᔪᖅ ᐃᓗᐃᑦᑑᓂᖅᐹᑦᑎᐊᒃᑯᑦ ᖃᐅᔨᓴᕈᑕᐅᓯᒪᔪᓂᒃ ᐅᓪᓗᒥᒧᑦ ᑎᑭᓪᓗᒍ ᖃᓄᐃᓪᓚᑦᑖᓕᕐᒪᖔᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ. ᖃᓄᐃᓕᖓᓪᓚᑦᑖᓕᕐᒪᖔᑦ ᖃᐅᔨᓴᖅᑎᒻᒪᕆᐅᔪᓄᑦ ᖃᐅᔨᓴᖅᑕᐅᔪᑦ ᑐᓐᖓᕕᖃᓚᐅᖅᑐᑦ ᐱᖓᓱᓂᒃ ᐱᔭᕆᐊᑭᒡᓕᑎᑦᑎᔨᑦ ᑲᑎᒪᔨᖏᑕ ᐅᓂᒃᑳᓕᐊᖏᑦᓂᒃ ᐱᖃᓯᐅᔾᔨᓚᐅᖅᑐᑦ ᐊᕐᕕᓂᓕᖓᓐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᐅᔨᓴᕈᑕᐅᓚᐅᖅᑐᓄᑦ ᐅᓂᒃᑳᓕᐊᓂᒃ ᐊᑐᐃᓐᓇᕈᖅᑕᐅᔭᕆᐊᖃᖅᑐᑦ 2022-ᒥ ᐱᖃᓯᐅᔾᔨᖅᓯᒪᓗᑎᒃ ᖃᓄᐃᓕᐅᕈᑕᐅᓂᐊᕐᒪᖔᑦ ᐅᓂᒃᑲᓕᐊᓂᒃ. ᓇᓗᓇᐃᖅᓯᓯᒪᑦᑎᐊᖅᑐᑦ ᑕᐃᒪᐃᓕᕐᓂᖓᓄᑦ ᓴᓇᕕᒡᔪᐊᖃᖅᑐᓂᑦ ᓴᖅᑭᓯᒪᓂᖓᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓱᒃᑲᔪᐊᓗᖕᒥᒃ. ᑖᒃᑯᐊ ᐱᖃᐅᓯᔾᔨᓯᒪᔪᑦ ᓯᑯᑐᖄᓗᐃᑦ ᐊᐅᒃᐸᓪᓕᐊᓂᖏᓐᓂᒃ ᐊᒻᒪᓗ ᓯᕐᒦᑦ ᐊᐅᒃᐸᓪᓕᐊᓂᖏᓐᓂᒃ, ᑕᕆᐅᕐᓗ ᐃᒪᐃᕈᐃᕙᓪᓕᐊᑐᐃᓐᓇᓕᕐᓂᖓᓂᒃ ᐳᖅᑐᓯᒪᓪᓕᐊᓪᓗᓂ, ᐅᖅᑰᕐᔪᐊᖅᑑᐊᓘᕙᓕᕐᖢᓂᓗ, ᐊᒻᒪᓗ ᓄᓇᐅᑉ ᐃᒪᖏᑦ ᐸᓂᖅᐸᓪᓕᐊᓪᓗᑎᒃ.

-30-

ᖃᐅᔨᒋᐊᕐᕕᒃᓴᖅ:

ᑲᓕ ᐃᓄᙳᐊᖅ ᐃᓄᐃᑦ ᐅᑭᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᐊᓛᔅᑲ) 907-274-9058 kelly@iccalaska.org

ᑐᑯᒻᒥᙳᐊᖅ ᓂᒃᔭᐃᕐ ᐆᓪᓴᓐ ᐃᓄᐃᑦ ᐅᑭᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᑲᓛᖦᖡᑦ ᓄᓈᑦ) tukumminnguaq@inuit.org

ᑲᐅᕈ ᓴᐃᒪᓐ ᐃᓄᐃᑦ ᐅᑭᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᑲᓇᑕ) 613 293-9728 csimon@inuitcircumpolar.com

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.