Press Releases

Documenting our Progress

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᓇᑕᒥ ᑐᓴᕋᑦᓴᓕᐊᖓ

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐊᕐᕌᒍᑕᒫᖅᓯᐅᑎᒥᖕᓂᑦ ᑲᑎᒪᓂᓖᑦ ᑰᔾᔪᐊᒥ

ᓂᕈᐊᖅᓂᖃᖅᓱᑎᒃ ᐊᖓᔪᖅᑳᑦᓴᒥᒃ ᑐᖏᓕᑦᓴᖓᓂᓪᓗ ᐊᖓᔪᖅᑳᑉ (ᓄᓇᕐᔪᐊᒧᑦ)

ᔪᓚᐃ 18, 2022 – ᑰᔾᔪᐊᖅ, ᓄᓇᕕᒃ, ᑯᐸᐃᒃᒥ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᑲᓇᑕ) ᐊᕐᕌᒍᑕᒫᖅᓯᐅᑎᒥᖕᓂᑦ ᑲᑎᒪᓂᖃᖅᑐᒥᓃᑦ ᑲᑎᕕᖕᒥ ᓄᓇᓕᐅᑉ ᐱᙳᐊᕐᕕᖁᑎᖓᓂ ᑰᔾᔪᐊᒥ ᐃᓚᖏᑦ ᑲᑎᒪᖃᑕᐅᑎᓪᓗᒋᑦ ᖃᕆᑕᐅᔭᑎᒍᑦ. ICC−ᑯᑦ ᑲᓇᑕᒥ ᓂᕈᐊᖅᓂᖃᖅᑎᕐᓯᓂᕐᒥᔪᑦ ᐊᖓᔪᖅᑳᑦᓴᒥᒃ ᑐᖏᓕᒃᓴᖓᓂᓪᓗ ᐊᖓᔪᖅᑳᑉ (ᓄᓇᕐᔪᐊᒧᑦ).

“ᐃᖅᑲᒋᑦᓯᐊᖅᓱᒍ ᖁᕕᐊᒋᓯᒪᕙᕋ ᐱᔨᑦᓯᕐᓂᕋ ᐊᖓᔪᖅᑳᖑᓪᓗᖓ ICC−ᑯᓐᓄᑦ ᑲᓇᑕᒥ ᐊᕐᕌᒍᓂᒃ ᓯᑕᒪᓂᒃ ᐊᓂᕈᖅᑐᓂᒃ,” ᐅᖃᖅᑐᒥᓂᖅ ᒫᓂᑲ ᐃᐅᓪ−ᑲᓇᔪᖅ. “ᑭᒡᒐᑐᖅᓱᒋᑦ ᐃᓅᖃᑎᒃᑲ ᓄᓇᕐᔪᐊᒥ ᑲᑎᒪᑎᑦᓯᓂᕐᓂ ᓲᕐᓗ ᐅᑭᐅᖅᑕᖅᑐᒧᑦ ᑲᑎᒪᔩᑦ ᑲᑎᒪᓂᖃᖅᑎᓪᓗᒋᑦ ᓄᐊᐅᐃᒥ, ᐊᒻᒪᓗ ᔫᓇᐃᑦ ᓇᐃᓴᓐᓄᑦ ᑲᑎᒪᔨᐅᖏᓐᓇᕐᕕᓖᑦ ᓄᓇᖃᖅᑳᖅᓯᒪᔪᑦ ᐃᓱᒫᓘᑕᐅᔪᑦ ᐱᔾᔪᑎᒋᓪᓗᒋᑦ (UNPFII) ᓂᐅ ᔪᐊᒃᒥ ᐃᖅᑲᐅᒪᓇᕐᓂᖅᐸᐅᖃᓯᐅᑎᓯᒪᔪᑦ ᐊᑐᖅᓯᒪᔭᖕᓂ ᐱᒻᒪᕆᐅᓪᓗᓂᓗ ᓂᐱᖃᐅᑎᒋᓗᒋᑦ ᓂᓪᓕᐊᒍᑎᒋᔭᕆᐊᓕᕗᑦ ᑲᑎᒪᓂᕐᒥ. ᖁᔭᒋᔪᒪᒻᒥᔭᒃᑲᑦᑕᐅᖅ ᒪᑭᕕᒃᑯᑦ ᑯᐊᐳᕇᓴᖓᑦ ᑲᑎᒪᓂᖃᖅᑎᑦᓯᒍᓐᓇᖅᓯᒪᒻᒪᑕ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᓂᖃᖅᑎᓪᓗᑕ, ᐊᑕᖏᖅᓱᒋᓪᓗ ᑲᑎᒪᔭᖅᑐᖅᓯᒪᔪᒥᓃᑦ ᐱᓇᓱᐊᕈᓯᕐᒥ ᑕᕝᕙᓂ ICC-ᑯᑦ 14−ᖓᓂᒃ ᑲᑎᒪᓂᖃᖅᑎᓪᓗᑕ ᑲᑎᒪᓂᕐᒥ (GA), ᖃᕆᑕᐅᔭᒃᑯᑦ ᑲᑎᒪᖃᑎᒌᖕᓂᐅᓪᓗᓂ.”

ᐃᓱᒪᒋᓪᓗᒍ ᓄᓇᒡᓇᕐᔪᐊᒧᑦ ᖃᓂᒪᓐᓇᑦ ᐊᑦᑐᐃᓂᓕᒃ ᓄᓇᕐᔪᐊᒥ ᓄᓇᓕᖕᓂᑦ ᑕᐃᒪᖓᓐᓂᒃ ᒫᑦᓯᒥᓂᒃ 2020 ᑖᓐᓇ ICC−ᑯᑦ ᑲᓇᑕᒥ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᓂᖅ, ᐊᒻᒪᓗ ᑲᑎᒪᓂᑐᐃᓐᓇᖅ ᑐᕌᒐᓖᒃ ᑲᑎᒪᔾᔪᑕᐅᒋᐊᖃᖅᑐᓂᒃ ᐱᓕᕆᐊᓂᑦ ᑲᑎᒪᔾᔪᑎᖃᕐᓂᕐᒥ ᒪᓕᒋᐊᓕᓐᓂᒃ ᒪᓕᓪᓗᑎᒃ ᒪᓕᒐᕋᓛᓂᒃ ᑕᒪᒃᑮᓐᓄᒃ ICC−ᑯᓐᓄᑦ ᑲᓇᑕᒥ, ᐊᒻᒪᓗ ICC−ᑯᓐᓄᑦ ᐃᓘᓐᓇᐃᓐᓄᑦ. ᑖᓐᓇ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᓂᖅ ᐅᓪᓗᒥ ᓈᒻᒪᒋᔭᖃᖅᓱᓂ ᑲᔪᓯᑎᑦᓯᓂᒃᑯᑦ ᐊᓂᒍᖅᓯᒪᔪᓂᒃ ᑲᑎᒪᔾᔪᑎᒥᓂᕐᓂᑦ, ᐊᖓᔪᖅᑳᑉ ᐅᓂᒃᑳᓕᐊᕆᓯᒪᔭᖏᓐᓂᑦ, ᐊᒻᒪᓗ ᓈᒻᒪᑦᓴᓂᒃᑯᑦ ᑲᔪᓯᑎᑦᓯᓪᓗᑎᒃ ᓈᓴᐃᔨᓄᑦ ᓈᓴᖅᑕᐅᓯᒪᔪᓂᑦ ᑮᓇᐅᔭᓕᕆᔾᔪᑎᒥᓂᕐᓂᒃ ᐊᕐᕌᒎᒧᑦ 2021-2022.

ᑲᑎᒪᔭᖅᑐᖅᓯᒪᔪᒥᓃᑦ ᑕᕝᕗᖓ ICC−ᑯᑦ ᑲᓇᑕᒥ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᓂᕐᒧᑦ ᐅᑯᐊᖑᓪᓗᑎᒃ:

ᒫᓂᑲ ᐃᐅᓪ−ᑲᓇᔪᖅ − ICC−ᑯᑦ ᑲᓇᑕᒥ ᐊᖓᔪᖅᑳᖓ

ᓖᓴ ᖁᐱᕐᕈᐊᓗᒃ – ICC−ᑯᑦ ᑲᓇᑕᒥ ᑐᒡᓕᐊ-ᐊᖓᔪᖅᑳᑉ (ᓄᓇᕐᔪᐊᒥ)

ᓇᑕᓐ ᐅᐱᐊᑦ – ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ ᐊᖓᔪᖅᑳᖅ

ᔨᐅᕆ ᓵᐸᐃ – ᐊᖓᔪᖅᑳᖓ ᐸᐅᑦᑑᑎᒃᑯᓐᓄᑦ ᐃᓄᓐᓄᑦ ᐊᕐᓇᓄᑦ

ᐳᕋᐃᔭᓐ ᐸᑦᑐᓪ – ᐊᖓᔪᖅᑳᖅ ᑲᓇᑕᒥ ᐃᓅᓱᑦᑐᓄᑦ ᑲᑎᒪᔨᓄᑦ

ᓄᓇᕕᒃ

ᐱᑕ ᐋᑕᒥ – ᐊᖓᔪᖅᑳᖓ ᒪᑭᕕᒃ ᑯᐊᐳᕇᓴᒃᑯᑦ

ᐋᑕᒥ ᑎᓚᐃᓪ−ᐊᓚᑯ – ᑐᒡᓕᐊ-ᐊᖓᔪᖅᑳᑉ ᐊᕙᑎᓕᕆᓂᕐᒥ, ᐆᒪᔪᓕᕆᓂᕐᒥ ᐊᒻᒪᓗ ᖃᐅᔨᓴᖅᑐᓕᕆᓂᕐᒥ ᒪᑭᕕᒃ ᑯᐊᐳᕇᓴᒃᑯᓐᓄᑦ

ᔪᐊᔾ ᐴᕐᑎ – ᑮᓇᐅᔭᓕᕆᔨ ᒪᑭᕕᒃ ᑯᐊᐳᕇᓴᒃᑯᓐᓄᑦ

ᓄᓇᑦᓯᐊᕗᑦ

ᔫᕼᐊᓇᔅ ᓛᑉ – ᐊᖓᔪᖅᑳᖅ ᓄᓇᑦᓯᐊᕗᑦ ᒐᕙᒪᖓᓄᑦ

ᔪᕌᑦ ᐋᓯᕙᒃ – ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓅᖃᑎᒌᒍᓯᐅᓪᓗ ᐱᕙᓪᓕᐊᑎᑕᐅᓂᖓᓄᑦ, ᓄᓇᑦᓯᐊᕗᑦ ᒐᕙᒪᖓ

ᑎᐅᕆ ᕕᓐᓴᑦ – ᒥᓂᔅᑕ ᓄᓇᓕᕆᓂᕐᓄᑦ ᐊᒻᒪᓗ ᓱᕐᕋᐃᑦᑐᓄᑦ ᐊᑐᕈᓐᓇᖅᑐᓄᑦ, ᓄᓇᑦᓯᐊᕗᑦ ᒐᕙᒪᖓ

ᓄᓇᕗᑦ

ᐊᓗᑭ ᑰᑦᑎᖅ – ᐊᖓᔪᖅᑳᖅ ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓᓄᑦ (NTI)

ᐅᓛᔪᒃ ᐊᑭᓱᒃ – ᐊᖓᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ (QIA)

ᓯᑖᓐᓕ ᐊᓇᑉᓚᒃ – ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ (KitIA)

ᐃᓄᕕᐊᓗᖕᒥᐅᓂ

ᑐᐊᐃᓐ ᓯᒥᔅ – ᐃᒃᓯᕙᐅᑕᕆᔭᖅ ᐊᖓᔪᖅᑳᖑᓪᓗᓂᓗ ᐃᓄᕕᐊᓗᐃᑦ ᓄᓇᓕᖏᑕ ᑯᐊᐳᕇᓴᖓᓄᑦ

ᐃᐊᕙᓕᓐ ᔅᑐᐊᕐ− ᐊᐅᓚᑦᓯᔨ ᑐᑭᒧᐊᑦᑎᑦᓯᔨ ᐊᑎᖃᖃᑕᐅᔪᓄᑦ ᐱᔨᑦᓯᕈᑕᐅᔪᓄᑦ, ᐃᓄᕕᐊᓗᐃᑦ ᓄᓇᓕᖏᑕ ᑯᐊᐳᕇᓴᖓᓄᑦ

ᐊᓚᒃᓴᓐᑏᐊ ᑰᑕᓐ – ᐃᓄᕕᐊᓗᐃᑦ ᓄᓇᓕᖏᑕ ᑯᐊᐳᕇᓴᖓᓄᑦ

ᑭᖑᓂᖓᓂ ICC−ᑯᑦ ᓂᕈᐊᕐᓂᖏᑕ:

ᐊᖓᔪᖅᑳᖅ – ᓖᓴ ᖁᐱᕐᕈᐊᓗᒃ ᖁᕕᐊᒋᔭᐅᓪᓗᓂ ᐊᖓᔪᖅᑳᖅᑖᒥᓂᖅ ᓄᑖᖑᓂᐊᕐᓗᓂ ICC−ᑯᑦ ᑲᓇᑕᒥ ᐊᖓᔪᖅᑳᖑᓂᐊᓕᖅᓱᓂ.

ICC−ᑯᑦ ᑲᓇᑕᒥ ᑐᒡᓕᐊ-ᐊᖓᔪᖅᑳᑉ (ᓄᓇᕐᔪᐊᒥ) – ᕼᐅᑉ ᓇᑭᒪᔪᖅ ᓂᕈᐊᖅᑕᒥᓂᖅ ᓄᑖᖑᓪᓗᓂ ICC−ᑯᓐᓄᑦ ᑲᓇᑕᒥ ᑐᒡᓕᐊᓄᑦ-ᐊᖓᔪᖅᑳᑉ (ᓄᓇᕐᔪᐊᒥ). ᒪᕐᕉᒃ ᓂᕈᐊᕋᑦᓴᐅᔪᒥᓃᒃ ᓂᕈᐊᖅᑕᐅᒐᓱᐊᖅᓱᑎᒃ ᑕᕝᕗᖓ ᐃᓂᐅᔪᒧᑦ: ᑯᕆᔅᑐ ᒫᑎᓐ−ᓚᐱᐊᓐᓯᑭ ᐊᒻᒪᓗ ᕼᐅᑉ ᓇᑭᒪᔪᖅ.

ᑲᑎᒪᓂᖅ ICC−ᑯᑦ ᑲᑎᒪᓂᕐᒥᖕᓂᒃ ᑲᑎᒪᓂᖓᓂᒃ ᐱᒋᐊᖅᓱᓂ ᐊᐃᑉᐱᕐᒥ ᔪᓚᐃ 19 ᑎᑭᓪᓗᒍ ᓯᑕᕐᒥᒃ ᔪᓚᐃ 21 ᖃᕆᑕᐅᔭᒃᑯᑦ 3−ᒥ ᑲᓇᖕᓇᐅᑉ ᓯᕿᙳᔭᖓ ᒪᓕᓪᓗᒍ – 7−ᒧᑦ ᑲᓇᖕᓇᐅᑉ ᓯᕿᙳᔭᖓ ᒪᓕᓪᓗᒍ ᐊᑐᓂᒃ ᐅᓪᓗᓂ.

ᑕᑯᒋᐊᕐᓗᒍ ICC−ᑯᑦ ᑲᓇᑕᒥ ᐃᑭᐊᖅᑭᕕᖓ ᐅᕙᓂ www.inuitcircumpolar.com ᖃᓄᐃᓕᐅᖃᑦᑕᕐᓂᖏᑕ ᒥᒃᓵᓄᑦ ᑎᑎᕋᖅᑕᐅᓯᒪᔪᑦ, ᖃᕆᑕᐅᔭᒃᑯᓪᓗ ᑐᕌᕈᑦ ᕿᒥᕐᕈᓂᐊᕐᓗᒋᑦ ᑲᑎᒪᔾᔪᑎᒥᓃᑦ. ICC−ᑯᑦ ᑲᓇᑕᒥ ᐊᕆᑕᐅᔭᒃᑯᑦ ᑐᓴᕋᑦᓴᖁᑎᖏᑦ− ᑐᕕᑐᒃᑯᑦ, ᕙᐃᔅᐳᒃᑯᑦ, ᐃᓐᔅᑕᒍᕌᒻᑯᓪᓗ – ᑐᕌᕈᑎᒃᑯᑦ ᑕᕝᕘᓇ ᑐᕌᖅᑎᑦᓯᖃᓯᐅᑎᒍᓐᓇᕐᒥᔪᑦ ᖃᕆᑕᐅᔭᒃᑯᑦ ᐃᑭᐊᖅᑭᕕᖓᓄᑦ.

-30-

ᖃᐅᔨᒋᐊᕐᕕᒋᓗᒍ:

ᒥᐊᓗᑎ ᓚᕙᓖ

ICC−ᑯᑦ (ᑲᓇᑕ)

mlavallee@inuitcircumpolar.com

ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ (ICC−ᑯᑦ) ᓄᓇᖃᖅᑳᖅᓯᒪᔪᑦ ᑎᒥᖁᑎᖓᑦ (IPO) ᐱᒋᐊᖅᑎᑕᒥᓂᖅ 1977−ᒥ ᑲᔪᖏᖅᓴᐃᒍᑎᖃᕐᓂᐊᕋᒥᒃ ᖁᕕᐊᓲᑎᒋᓗᒍᓗ ᐊᑕᐅᓯᐅᖃᑎᒌᖕᓂᖓᑦ 180,000−ᓃᑦᑐᑦ ᐃᓄᐃᑦ ᐊᓛᔅᑲᒥᐅᑦ (ᒥᐊᓕᒐᐃ ᓄᓇᖓᑦ), ᑲᓇᑕ ᑲᓛᖠᑦ ᓄᓈᑦ, ᐊᒻᒪᓗ ᓱᑯᑦᑲ (ᕋᓴ) . ICC−ᑯᑦ ᐃᖅᑲᓇᐃᔮᖃᖅᐸᑦᑐᑦ ᐃᑲᔪᖅᑐᖅᓱᒋᑦ ᐃᓄᐃᑦ ᐱᔪᓐᓇᐅᑎᖏᑦ, ᓇᐅᑦᓯᑐᕐᓂᖏᑦ ᐅᑭᐅᖅᑕᖅᑑᑉ ᐊᕙᑎᖓᓂᒃ, ᐊᒻᒪᓗ ᓴᐳᑎᓗᒍ ᖃᐅᔨᔭᐅᑎᓪᓗᒋᓪᓗ ᐃᓄᐃᑦ ᐱᖅᑯᓯᕐᒥᒍᑦ ᐃᓅᓯᖃᐅᓯᓂᖏᑦ.

ᐃᖅᑲᓇᐃᔮᕆᓗᒍ ᓯᓚᐅᑉ ᐊᓯᔾᔨᕐᓂᖓ, ᓱᓕᔪᖅᓴᕋᑦᑕ ᐱᔭᕆᐊᖃᓪᓚᕆᓕᕐᒪᑕ ᓄᓇᕐᔪᐊᒥ ᓯᕗᓕᖅᑏᑦ ᒐᕙᒪᐃᓪᓗ ᐃᓕᑕᖅᓯᓗᑎᒃ, ᐃᖅᑲᒋᑦᓯᐊᕐᓗᒍᓗ ᐊᑕᖏᖅᑐᒥᓪᓗ ᐊᑐᓕᖅᑎᓪᓗᒍ ᐃᓅᑉ ᑎᒥᓕᐅᑉ ᐱᔪᓐᓇᐅᑎᖏᑦ ᐃᓄᐃᑦ ᐊᓯᖏᑕᓗ ᓄᓇᖃᖅᑳᖅᓯᒪᔪᓕᒫᑦ ᓄᓇᕐᔪᐊᓕᒫᒥ.

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.