Ullutuinnarmi Maajji 11−mi, 2016 – Inuit Ukiuqtaqtumiuqatigiit Katimajingit pattaqtulauqtut piliriqatauniarnirminik saqqiimmata Mialigarmiut Kanataup Gavamakkunginni Ukiuqtaqtulirinirmit. Piluaqtumit Inuit Ukiuqtaqtumiuqatigiit Katimajingit qujagijaqattiarngata naalattauninginni tamatumunga sila asijjipallianingannut, uummaqqutitaariaqarniujumit, attananngittumit attuiluanngittunillu umiarjuaqtaqaqattarniq, Ukiuqtaqtumi iqalugasuarnirmit, Nunaqaqqaaqtuminiit qaujimaninginni, pimmariuninginnillu nunaqaqqaaqtuminiit ukiuqtaqtumi ammalu pitaqariaqarninginni qaujimattiarlutit isumaliurunnarninginni. Ippassaq nalunaiqsijuqarngat nalunarunniilauqtuq sivuliqtissangit sanngijualuit Upaama Turuutuulu Pilirijumaningit, ammalu pitaqariaqarninginni tamakkuninga kamagijauqattarniaqtunit amisunit isumaaluutiuvattunik silarjuatinni ullumiujuq.
Inuit Ukiuqtaqtumiuqatigiit Katimajingit Issivautanga Ukaliq Ijitsiaq uqalauqtuq nuna asijjipallianinganni nuuppallianinginnut ukiuqtaqtumut tamakkua isumaaluutiuvattut silarjuami isumaalugijauniqsaulirngataguuq, ilisaqsisimajut attuaninginni ukiuqtaqtu ilangallu nunarjuaq. “Ippassaq iqqaijjutiqalauqtunga siqiniq takukkannilirmigattigu taqqigalannut takulaurnatigu ukiuqtaqtuq taaqattarninginni ukiukkut. Ukiuqtaqtulimaaq quviasuutiqarialik tamatuminga angirutiujumit ullumiujuq, taimaapaluttauti.”
Jim Sitaats, Inuit Ukiuqtaqtumiuqatigiit Katimajingit – Alaakkaup Angijuqqaanga uqalauqtuq, “Qunuummiqsimallarittugut inuit qaujikkaqtausimanngimmata sivuninganni angirutiliangulauqtumit. Mialigait Ukiuqtaqtumi piqujanginni katimatittiqqaariaqasuungugaluarngata Inunnit. Kisianili, tamanna ukiuqtaqtuliriniq inunnuungajuq quviagijaummat. Sivumuaqpallialiqtugut, upattauqqaariaqaqattarniaratta isumaliurniaqtillugit uvattinnut attuiniqarniaqtunik.”
Takujumaluannguaqtangilli Inuit Ukiuqtaqtumiuqatigiit Katimajingit tukisiumammata ilisaqsisimallutillu pimmariuninginni isumaliuqtauvattunik tusaqsimallutit atuinnaujunik ammalu tamakkua tukisigiarutiit tamakkiinngaangajut qaujisaqtimmarinnit ammalu Nunaqaqqaaqtuminiit Qaujimaninginni. Inuit ilagijaummata ukiuqtaqtumi uumajunik ammalu piqqusingittigu attanaiqsimallutit. Inuit Ukiuqtaqtumiuqatigiit Katimajingit iqqaitittivattut gavamakkunilimaaq pimmariuninginni tamakkuninga piruqtunik ukiuqtaqtumi pivalliajjutajunnaqnituk kamagijauvattunuk tigumiaqtaujunullu inunnut Tamakkua aturiaqarattigu assurunnaqtuujut ullumiujuq taimailluatittigasuarniaqtilluta kisutuinnattiarnit.
Amisuummata asijjiqsimajut sila pijjutigillugu uvvaluunniit silarjuaq asijjipallianinganni. Parismi sila uqausiulauqtillugit piuniqsaujunik uqausiqaqtutit amisuuniqsanik asijjiqtunik. Parismi silamit uqausiqalauqsimajut Tisipirimi, Ijitsiaq tilijaulauqsimajuq Inunnit nillialluni silarjuap sivuliqtinginni ukiuqtaqtunik, attuqtaugajunniqpaangummata pijariakittutillu uumajunik. Uqaqtunilu, “Pimmariuniqpaangummijuq ilanga tunngavigijaujuq tamatuminga makimajjutaunasuaqtumit kajusititauttialauqtuq parismi. Quviallarittugut ilisarijaummigatta pimmariunittinni ammalu attuqtaujunnattiarninganni ukiuqtaqtuq piliriqatigiinniaqtilluta quvianarniaqtuq.”
Amisut uqaqatigiilauqsimajut silarjuamiinngaaqsimajut nakituinnaq piqujait pijjutigillugit isumaaluutaujut, Inuit nunalingit qautamaat assuruutiqaqattaqtut, suurlu akittupallianginnatillugit uummaqqutiit pijittirautiillu. Marruunnik pilirijuunnik qaujisaqatiqarumammata, nalunaijarlugit atuliqtillugillu tamakkua uummaqqutiujunnaqtut sannginiqsaulirunnarajaqtugu nunaliullutit taimaittutiguuna.
Piliriqatiqarumattiaqtugut Mialigarnit, Kanatamiutarnit asinginnillu gavamaujunik tamatuminga uqausiqarlutit assuruarilutigullu.
Inuit Ukiuqtaqtumiuqatigiit Katimajingit nunaqaqqqaaqtiminiulluni katujjiqatigii kiggaqtuijut 160,000−nit Inunnit Sikaatkami, Alaskami, Kanatami Kalaałiillu Nunaani ammalu silarjualimaamit isumaaluutaujunik pimmariugijaqarmijut. Inuit Ukiuqtaqtumiuqatigiit Katimajingit Piliriqatiqarunnattiaqtutit Tigumiarmijut II Silarjuap Katujjiqatigiinganni ammalu Piqataunginnaqtitaullutit Ukiuqtaqtumi Katimajinginnut.
