Tisipiri 8, 2015 – Vaankuuvu, Kanata – Tuain Simis, Angajuqqaaq Inuit Ukiuqtaqtumiuqatigiit Katimajinginnut Kanatamut Vaankuuvumiippuq, Putisi Kalampia upagutisimalluni Ukiuqtaqtumi Sururnaqtunut Piliriap miksaanut qanuisimajuqalirmangaaq kamajaqturutigisimallugu. Taanna NCP−ukiuqtaqtumi Sururnaqtunut Piliriaq qanuiliurutausimaliqtut kinguningani qatimaniq, arraaguliqqigaimmat katimatitsiniuvattuq, aqqutillarituaq Kanatami killisiniaqtinut qaujisaqtuliriningmaritigu nunaqaqqaaqsimajut ammalu atuagaliuqtiit turaagaqaqullugit qaujisaqtauluni nakingaarningi pijjutaujut attuajut sururnaqtunut sivitujumik atuqtaugunnaqtut kanataup ukiuqtaqtunginni, iligutaulutik uqaqatigiigutaulutillu qanuilingaliurniujut kingulmi qaujijaugutiminiqtigu, ullumimut qanuilingalirmangaata qaujimanirmuungajut ammalu atuagarnuungajut, parnautaujurlu sivuniksami aturatsanut tamatumungalingajut.
“Ungataanut arraagut avatit atausirlu Gavamakkukut Kiinaujaqaqtitsisimaliqput Ukiuqtaqtumi Sururnaqtunut Piliriamut tukisiumajaulilauqsimammat piliriqatigiingniq pimmariuninganik sanngijumik nangminiqaqatigiitsiarniarumajuqaruni inungnit inuusilingnik Ukiuqtaqtumi” uqaqtuminiq Tuain Simis. “Kanatami piliriangulluni, Inuit sitamaniinngaaqsimajut nunait avittuqtausimaninginni Inuit Nunaanik asinginnilu ukiuqtaqtumi nunaqaqqaaqsimajuni qaujimanirmik tigumiaqtiit, ilinniaqsimaniliit ilinniarvitigu ammalu gavamakkut killisiniaqtiqutigit qaujisaqtulirinikkut. Inuit sivulirunnaqsimavut qaujisaqtulirinirmi kiuqattaqsimallutillu apiqqutigijaujunik pimmariujunik atuutiqarninginnut nunaliqutittinnut” nilliajuminiq Nataan Uupat, Angajuqqaaq Inuit Kanatami Tapiriikkunnut.
Uqausiminiq Iksivaarvimmi Tisipiri 4−ngutillugu titiraqtauniqpuuq nalunaikkutarijauniarluni isumaliurutaujuqaliraipat − tukitaarasuarutauniaqtumik − Avatilirinirmut attuinirluttut tukisijauniarmata ikullaqtaulunilu attuinirlunniq. Isumaliurutaujut tusaqtitsigutaugajaqtut killisiniarnikkut qaujijausimajutigu ammalu nunaqaqqaaqsimajut piqatauniqarniqsauniarmata qimirrunarniujuni nautsiturnirnilu pirjuanguniqsanik nunami atuqtaugunnaqtuq pillugu pivallianirmut piliriaksani.
Taanna NCP piliriaq pilirijjutauqattaqsimaliqtuq Kanatami nunarjuamilu Ukiuqtaqtumi qaujisaqtulirinirmut – kajusigutauqattaqsimatsiaqtuq. “Taanna piliriaq NCP turaaqtaqaqtuminiq sivitujukkut usikattaqtauvanningit sururnaqtut kingunaangit ammalu attuinirlunningit Ukiuqtatuup avatinganik inunginnillu, nalunarunniiqtunik nalunaiqtausimalirmata aajiiqatigigutaujariaqalirninganik Sitaakhuum Qatimanirmi Iniqainnaliqtut Sururnaqtut Tuqunnaqtuqauqtut ammalu atuinnautitsiviulutik pivitsaqaqtitaunirmik qaujisarnirmut piviqaqtitauviqarluni amisunut naasaratsaugunniiqtunut Kanatami nunarjuamilu atuagarni,” nalunaiqsijuminiq Simis “nalunarunniiqtumik saqqitsiviugavarmat atuagaliuqtuni pivalliatuinnaqtunut isumaaluutaujununit ukiurasannut aggiqtunut”.
“Taanna piliriaq NCP atuutiqarninga kajusiniqatsiaqsimavuq, atuutiqarningata piliriqatiqarniit Inungnik, tukisiniqattitsikannirninga qaujimanangittut ammalu sukattumik asijjirutaujut takuvalliatuinnaqtavut tariurmiutani ammalu pisuktiit nunamiutait uumajut silamut asijjiqtumut ammalu attuinirlugutitaujutigut uumajut najugangingnit silaqatigiingninginnillu, ammalu attunirluttauningata ilusingita qanuingitsiariaqarningitalu Inuit,” Simis uqaqtuminiq.
Simiskuk Uupatkuk tiliurijaqaqpuuk Gavamakkunginnik Kanataup, “pivaalliriaqtauqullugu piliriaq turaangatsiarluni pivalliatuinnaqtunik isumaaluutiqaqtunik Ukiuqtaqtumi atuqtauliqtunut, ilitarijausimagiatsiarlutik tavvuuna piliriangujukkukut atuutiqarningit nautsiturnirmi uumajut attuaqatigiingningita silaqatigiingningitalu ilusinginnik attuaniqarmat nunaqaqqaaqsimajut ilusinginnut piqqusinganullu, niqiqausinganut ammalu atuutiqarajarmat tamakkua ilulirippangit atuagaup.”