Pinasuarusiani Juuni 6-10, 2022 pilirinnallauqtuq Inuit Ukiuqtaqtumiuqatigiit Katimajinginnut. Katujjijut Gavamaqatigiingittukkut Nunarjuarmiutigut Tariurnut Katimajingit (IMO), Tariurnik Avatimik Sapujjinirnut Katimajingit (MEPC) 78 katilauqtut Lantanmi. Taimaitillugit, Pan, Juumanimi, katilauqtut Katujjijut Gavamaqatigiingittut Tunngavinnut Katimaningat Silait Asijjirninginnut (UNFCCC) Ilangit Timinginnut.
Inuit Ukiuqtaqtumiuqatigiit Katimajingit Kanatami Issivautangata Tullia Nunarjuarmiutigut Liisa Qupirrualuk ilaulauqtuq katittuni Juumanimi upattutik, Lantanmilu, Qaritaujatigut.
Juuni 6-mi Liisa Qupirrualuk ilaulauqtuq qaritaujatigut ilinniarniqtunut taijaujumut “Uqquusivalliajut, Tariut Immiqpalliajut”. Uqausiqalauqtut unikkaanik sanajaujunik Gavamaqatigiingittunik Katimajiit Silait Asijjirninginnut (IPCC) 6-nganut qimirrunnaqsinirmut, piluaqtumik unikkaamut qanuilajjaikkutiliurnirnut qangattiaq saqqitaujuq, qanuilinganinginnullu silait asijjirninginnit nunalinnut Ukiuqtaqtumi Uannanganullu Pasiviup. Parnattaulauqtut Salumajut Ukiuqtaqtut Katujjiqatigiinit, piqasiujjillutik angajuqqautinik gavamanganit Tanngaup. Uvva takunagvik qarasaujatigut ilinniarmut: https://bit.ly/3Hl64gF.
Juuni 9-mi Panmi katimajunit, asiagut katinniq atauttikkuuqataujuq Nunarjuarmiutigut Katimajiralaanut Nunaqaqqaaqsimajunut Pilirinirnit (IWGIA) asinullu katujjiqataujunut katilauqtut. Liisa Qupirrualuk 6-nit katimajiuqataulauqtuq uqausiqaqtutik pirjuanguninginnik Nunaqaqqaaqsimajut Inuit Nunarjuarmiutigut silanut qanuigiarningit.
Uqarialisaarami Liisa Uqalauqtuq, ”Ilsarijausimanivut malittugu nunarjuarmiutigut katittuni suurlutut Katujjijut Gavamaqatigiingittut, Ukiuqtaqtuni Katimajinginni, Gavamaqatigiingittunik Katimajiit Silait Asijjirninginnut, Nunarjuarmiutigut Tariurnut Katimajinginni, piliriqatigivavut katujjiqativut taakkunani katinnirni tukisijaullattaaqullugit nakinngaarnittinnik, piluaqtumik pijjutigillugit pijunnarnivut, qaujimajavut, Inuit iliqqusituqakkut ukpirijavut qanurlu katiqatigijariassaq piliriqatigilutigullu naammaktukkut pilirinikkut.”
Uqausiqalirmilluni aulajjattaulisaaqtumik Ukiuqtaqtuuqatigiini Inuit Pilirijjusinginnik Nalimuttukkut Pittiaqtukkullu Katinnirnut, saqqitaulauqtut Inuit Ukiuqtaqtumiuqatigiit Katimajinginnit Juuni 2-mi, qarasaujatigullu uvani https://bit.ly/3txKgZT Liisa unikkaalauqtuq katinnittinnut Gavamaqatigiingittunikkunnut Katimajiit Silait Asijjirninginnut qaujimajitaulluta takunattiit, ikajuqataulluta uqalimaagalianut, ammalu maannarataaq takunnaqtillariulluni Uqausirilaurmijangit Inuit Ukiuqtaqtumiuqatigiit Katimajingita ilauningit Aulajjaigiaqtunut Katimajiralaanut iluani Nunalinni Nunaqaqqaaqsimajunullu Inunnut Pivissamut (LCIPP).
Pinasuarusiup ilangani Nunarjuarmiutigut Tariurnut Katimajingita, Tarirurni Avatinik Sapujjinirnut Katimajingitalu 78 katimaningat Lantanmi, Inuit Ukiuqtaqtumiuqatigiit Katimajingit katiqatiqalauqtut tamakkiini aivaqatigiittuni Aaqqigiaqtauninganut Uqquusinaqtunut Pujunut (GᕼG) pujuunginniqsauliqtittinirnut qanuqtuuqtunut, ilaliujjijariaqarnirmillu kinirniqsat kiniqtunik taimainginnaqattarninginnut qimirrunirnut tariurni uqusunik.
Kingulliqpaamik, Inuit Ukiuqtaqtumiuqatigiit Katimajingit uqausiqalauqtut Nunarjuarmiutigut Tariurnut Katimajinginnut kinirniqsanut kiniqtunut titiratigut katujjijunut assuruutiqarumajunut sanajauninginnut pujuuvviuluaqujaungittunik nunanik, sukkanirnik sukkaillitittinirnut sanalutillu maligialinnik qanuigiarutinik aturunniiqtillugit kinirniqsanik kiniqtunik (HFO) Ukiuqtaqtumi.