Inuit Ukiuqtaqtumi Katimajingit Atuinnautittimmata Silarjuami Imalirinirmut Katujjiqatigiinginni (IMO) Piliriqatiqarlutit Nunaqaqqaaqtuminirnit Aaqqiqtausimajumit 1.5 Namiinninganni (Degree) Aqqutaugajaqtumi Silarjuami Umiarjuakkut

Julai 7 2023 – Lantan, Tariup Akiani (UK) – Inuit Ukiuqtaqtumi Katimajingit (ICC) atuinnaqaqtittimmata Nunaqaqqaaqtuminirnit piqasiujjauqullugit parnautinik sila asijjipallialuaqugunniiqtugu umiarjuat aqqutingit pillugit tamaani katimagumaaqtut Silarjuami Imalirinirmut Katujjiqatigiinginni (IMO). Katimaqataujumaaqtut Inuit Ukiuqtaqtumi Katimajingit (ICC) ilaliujjauqullugit Nunaqaqqaaqtuminiit ammalu Inuit isumagijanginni asijjiigumanniqqata Silarjuami Imalirinirmut Katujjiqatigiinginni (IMO) parnautinginni nunguppaalliqullugit Issaaqijunik Anirniqarvitinnuupattunik (Greenhouse Gas) (GHG) umiarjuamiinngaaqtunik − tamakkua Qinniqtaaqijuq Surunnaqtuq (Black Carbon) tamaanimmata 20% silarjuami attuiniqaqtunik silanganni.

“Kisianilittau, Silarjuami Imalirinirmut Katujjiqatigiinginni (IMO) aivaningit Lantami aaqqiilaunngimmata 1.5 namiinninginni (degree) Issaaqijunik Anirniqarvitinnuupalliajunik (GHG) aqqutaujunut silarjuami umiarjuakkut,” uqalauqtuq Inuit Ukiuqtaqtumi Katimajingit Issivautangata Tungilinga Liisa Qupirrualuk. “Nutaarmit mikillivaallitittigutaugunnaqtunik pitaqarunniitiammarillugulu tamaaniqai 2050−mi angirutiqaqtugut, ammalu 2030−mi ammalu 2040−mi “qaujisarlugit, tamakkua uuttuqtaujunnaqtullu suli nalunaqattarngata tukisijassauttianngittut malittiarnatilluummata.”

Kisianili pinasuarusinganni kajusinnilaunngittut Inuit takuvattangillu angiqtaugialiit imavimmi nipiqaluaqtunut atuagait atuliqujausimammata umiarjuaqtaqaqattatillugu Inuit Nunanganni. Atuagait iluliqaqtuq isumagijaugiaqaqtutillu Inuit Qaujimajatuqanginni ammalu Inuit isumagijanginni aulattitillugit imavimmi nipiqaluaqujinnatit inuit nunanganni, Inuit angirranginni. Ammalu, tussirauti Kanatami saqqiigumaninginni Ukiuqtaqtumi Saqqipattuni Issaaqijunik Aulataugiaqarngata nalunaiqtaulutit piluaqtuq Qinniqtat Surunnaqtut Saqqipattut (Black Carbon) umiarjuaniinngaaqtut, tamakkua tunngasuttitaulauqtut Inuit Ukiuqtaqtumi Katimajinginnut (ICC) amisunullu nunalirjuanu uqausiuqujaullutit.

2023−mi Silarjuami Katimajingit Sila Asijjipallianingannut pingasuujuqtunganni qaujisaqtaujuq (AR6) unikkaaliulauqsimajut ilaliujjillutit silar asijjipalliajurjuaraaluulirninganni sukkalijumillu attuiniqaqtuni Inunnit, piluaqtumi Inunnit asinginnillu Nunaqaqqaaqtuminirnit.

“Inuit sila asijjipallianingannut uqquujumut attuqtaulirngata pingasuaqti tisamaraaqtimmarittunilluunniit uqquuniqsauliqtuq ilanginni silarjuami,” uqalauqtuq Qupirrualuk. “Inuit nunaliit ilittupalliagasualiqtut aaqqissuinasuaqtutillu, tamakkuninga naammangittuni atulauqsimanngitanginni ullumiuliqtullu piqujajiliurlutit kisianili piqatautitaunngittiaqtutit.”

“Silarjuami Katimajingit Sila Asijjipallianingannut pingasuujuqtanganni qaujisaqtaujuq (AR6) unikkaanganni uqaqsimajuq qaujimattiaqtut pittaulimatittinasuarluni ulurianaqtailimatittikannirasuarlunilu attuqtauqunagit Ukiuqtaqtuq assurullarittualuulutit kisiani”, Qupirrualuk uqaqtuni. “Ilisaqsisimajut pimmariuninginni ilaliujjaugiaqarngata Nunaqaqqaaqtusuminiit, suurlu Inuit, sila asijjipallianingannut aulattijjutissanik saqqijaaqsitittikannirlutillu piliriqataugiaqarninginni ajjiungimmata qaujimaningit atuqattaqtangit.”

“Ilisarijaummata tigujausimajut avanngaaluk pijunnautingit Nunaqaqqaaqtuminiit saqqiikanniriaqarninginni, taimailluaqtitaulutit sivunittinni kikkulimaattiarnut,” uqaqtuni Siara Ulsvig, Inuit Ukiuqtaqtumi Katimajinginnut (ICC) silarjuami issivautarijaujuq. “Ammalukkanniq atuliqtittilutit Silarjuami Katujjijinik Nalunaiqtausimaninginni Pijunautingit Nunaqaqqaaqtuminiit (UNDRIP), asijjiqtausimajuq Silarjuami Imalirinirmut Katujjiqatigiinginni (IMO) Issaaqijunik Anirniqarvitinnuupalliajunik (GHG) Mikillivaallitittinirmut Parnautiit ammalu atuliqtitaugiaqallarittutit Nunaqaqqaaqtuminiit isumagijangit, aturlugit, isumaliangit qaujimaningillu ilaliujjaulutik. ”

Inuit Ukiuqtaqtumi Katimajinginnut (ICC) katimatittilauqsimammata taikani Silarjuami Imalirinirmut Katujjiqatigiinginni (IMO) tamaani pinasuarusinganni qaiqujisimallutit Siurili ᕼapumit, titiraqtimmarik marruunnik Silarjuami Katimajiujunik Sila Asijjipallianingannut (IPCC) unikkaaliuqattaqtuq, uqausirilugit taakkua Silarjuami Katimajiujunik Sila Asijjipallianingannut (IPCC) unikkaaq, uqausirilugit qanuq Silarjuami Katimajiujunik Sila Asijjipallianingannut (IPCC) piliriqataujunnarmangaata Nunaqaqqaaqtuminiit ammalu Nunaqaqqaaqtuminii Qaujimajatuqanginni pilirisuunguninginni ammalu unikkaanginni sila asijjipalliajut attuiniqarninganni.

“Silarjuami Katimajiujunik Sila Asijjipallianingannut (IPCC) unikkaaliuqsimajut isumagijaugajummata “piuniqpaattiaqtigut maligiaqarninginni” sila asijjipallianingannut qaujisaqtauninginni, tukisigiarutinillu atuinnaqarlutit ikajuqtuijjutiugajaqtut sila asijjipalianingannut isumaliurasuarninginni ammalu silarjuami aivajjutaugajaqtunik, suurlu taimaimmat tamaani pinasuarusirmi.” uqaqtuni Suurili ᕼapu, Kanatami Qaujisaqtimmarinnut Issivautaq Sila Asijjipallianingannut ammalu Aanniaqtailimajulirinirmut, Silattuqsarvijjuami Aupuutami. “Pimmariummat qaujimagiaqaratta Silarjuami Katimajiujunik Sila Asijjipallianingannut (IPCC) Unikkaaq nalunaiqsisimattiarluni Nunaqaqqaaqtuminiit qaujimaninginni iliqqusiriqattaqtanginni pimmariummata tukisijaugiaqarngata, kamagijaulutik, aulattijjutaulutillu sila asijjipallianingannut. Nalunanngitittimatattau kamagijaugiaqarninginni aulattigasuarninginni qallunaat ammalu tigumianginnarasuarninginnillu Nunaqaqqaaqtuminiit Pijunnautinginni piusivaallitittikannirutiugunnarngata sila asijjipallianingannut pigiarutaulutit,’ ᕼapu uqakkaniqtuni.

Tukisigiarviujunnaqtut: