ᐃᓄᐃᑦ ᐅᑭᐅᖅᑕᖅᑐᒥᐅᑕᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ

ᕼᐅᑉ ᓇᑭᒪᔪᖅ

ᐊᖏᔪᖅᑳᑉ ᑐᖏᓕᖓ – ᓯᓚᕐᔪᐊᒥ ᐱᓕᕆᐊᖑᔪᓄᑦ

ᕼᐅᑉ ᓇᑭᒪᔪᖅ ᓂᕈᐊᖅᑕᒥᓂᖅ ICC−ᑯᑦ ᑲᓇᑕᒥ ᑐᒡᓕᐊᓄᑦ−ᐊᖓᔪᖅᑳᑉ (ᓄᓇᕐᔪᐊᒥ) 14−ᖓᓂᒃ ᑲᑎᒪᓂᕐᒥ ᑰᔾᔪᐊᒥ ᑲᓇᑕᒥ ᔪᓚᐃᖑᑎᓪᓗᒍ 2022. ᓇᑭᒪᔪᖅ ᑲᑎᒪᔨᐅᖃᑕᐅᓪᓗᓂ ᐃᒃᓯᕙᐅᑕᐅᓯᒪᔪᖅ ICC−ᑯᓐᓄᑦ ᑲᓇᑕᒥ (ᓄᓇᕐᔪᐊᒥ) ᐱᒋᐊᖅᓂ ᔪᓚᐃ 2014−ᒥ ᑎᑭᑦᓱᒍ 2018.

ᕼᐅᑉ ᓇᑭᒪᔪᖅ ᓂᕈᐊᖅᑕᒥᓂᖅ 18−ᒋᓕᖅᑕᖓᓂᒃ ᒪᓕᒐᓕᐅᕐᕕᖕᒥ ᓄᓇᑦᓯᐊᒥ ᓅᕙᐃᒻᕙᐅᑎᓪᓗᒍ 2015 ᑎᑭᑦᓱᒍ 2019, ᒪᓕᒐᓕᐅᖅᑎᐅᓪᓗᓂ ᓄᓇᒃᐳᖕᒧᑦ. ᓇᑭᒪᔪᖅ ᐃᖅᑲᓇᐃᔭᓕᖅᑐᒥᓂᖅ ᐃᒪᕐᒥᐅᑕᓕᕆᔨᒃᑯᓐᓄᑦ ᑲᓇᑕᒥ ᐊᖓᔪᖅᑳᖑᓪᓗᓂ ᐊᐅᓚᑦᓯᔨᐅᓪᓗᓂ 2020−ᒥ ᖃᐅᔨᔭᐅᑎᕙᓪᓕᐊᑦᓱᒋᑦ ᐃᒪᕐᒥᐅᑕᓂᑦ ᐱᐅᖅᓱᐊᕆᐊᖃᕐᓃᑦ ᐅᐊᖕᓇᖅᐸᓯᖓᓂ ᐅᑭᐅᖅᑕᖅᑑᑉ. ᐃᒃᓯᕙᐅᑕᕆᔭᐅᓯᒪᔪᖅ ᐃᒪᕐᒥᐅᑕᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂ ᐊᐅᓚᑦᓯᓂᕐᒧᑦ ᑲᑎᒪᔨᕋᓚᖏᓐᓄᑦ ᐃᓅᕕᖕᒥ. ᓄᓇᑦᓯᐊᒥ ᑎᒃᑯᐊᖅᑕᒥᓂᐅᓪᓗᓂᓗ ᐃᒃᓯᕙᐅᑕᐅᓂᕐᒧᑦ ᑲᑐᔾᔨᖃᑎᒌᑦᑐᓄᑦ ᐸᕐᓇᑎᓄᑦ 2022−ᒥ.

ᓇᑭᒪᔪᖅ ᐃᓕᓐᓂᐊᖅᓯᒪᔪᖅ ᓇᖕᒥᓂᖅᓱᑎᐅᓂᕐᒥᒃ ᒪᐅᑦ ᕈᐃᓪ ᓯᓚᑦᑐᓴᕐᕕᔾᔪᐊᖓᓂ, ᐱᓕᕆᐊᒧᑦ ᐊᐅᓚᑦᓯᔨᒃᓴᐅᓂᕐᒥᒃ ᐃᐅᓪᒑᓐᒍᐃᓐ ᓯᓚᑦᑐᓴᕐᕕᒻᒥ, ᐃᓕᓐᓂᐊᕇᖅᓯᒪᓪᓗᓂᓗ ᐃᓱᓕᑦᓱᒍ ᐅᖅᓱᐊᓗᓕᕆᓂᕐᒧᑦ ᐊᐅᓚᑦᓯᔨᐅᓂᕐᒧᑦ ᐸᐃᑉᐹᖁᑎᑖᕈᑎᒋᓪᓗᒍ ᐅᑭᐅᖅᑕᖅᑐᒥ ᐊᓪᐴᑕᒥ ᐃᓕᓐᓂᐊᕕᖕᒥ ᓴᓇᕐᕈᑏᑦ ᐊᑐᖅᑕᐅᒍᓐᓇᖅᑐᑦ ᖃᐅᔨᒪᔭᐅᓂᖏᓐᓂ.

ᐊᖏᖅᓯᒪᕕᖃᖅᑐᖅ ᑲᔪᓯᑎᑦᓯᓂᕐᒥᒃ ᐱᖅᑯᓯᑐᖃᒃᑯᑦ ᐃᓅᓇᓱᐊᕈᓯᕐᓂᒃ ᐅᓂᒃᑳᖏᑎᒍᑦ ᐃᓄᑐᖃᐃᑦ ᐊᖑᓇᓱᐊᖅᑏᓪᓗ ᒥᑭᒋᐊᕐᓂᐊᖅᑏᓪᓗ ᐱᖃᓯᐅᑎᓪᓗᒍᓗ ᑲᔪᓯᓂᖅ “ᓄᓇᒥ ᐃᓄᓇᓱᐊᕐᓂᕐᒥᒃ” ᐱᓕᕆᐊᑎᒍᑦ ᐃᓄᑐᖃᕐᓄᑦ ᐃᓄᓱᑦᑐᓄᓪᓗ. ᐊᒥᓱᓂ ᓯᕗᓕᖅᑎᐅᓂᕐᒧᑦ ᑲᑎᒪᓂᕐᓂ ᑲᑎᒪᖃᑕᐅᖃᑦᑕᖅᓯᒪᔪᖅ ᐃᓕᓐᓂᐊᓂᕐᓂᓗ ᓲᕐᓗ ᔮ C. ᒫᒃᓯᕕᐅᑉ ᐅᐃᕐᖓᑦᓵᒃᑯᑦ ᓯᕗᓕᖅᑎᐅᓂᕐᒥᒃ ᐃᓕᓐᓂᐊᓂᕐᒥ ᓯᐳᒃᐋᓐ, ᐅᐊᓯᖕᑕᓐᒥ ᐊᒻᒪᓗ ᐊᓪᒑᓐᒍᐃᓐ ᓯᓚᑦᑐᓴᕐᕕᒻᒥ ᐋᓐᑎᐅᕆᐅᒥ.

ᓇᑖᓐ ᐅᐸᑦ

ᐊᖏᔪᖅᑳᑉ ᑐᖏᓕᖓ – ᑲᓇᑕᒥ ᐱᓕᕆᐊᓂᑦ

ᓇᑖᓐ ᐅᐸᑦ ᓂᕈᐊᖅᑕᐅᓚᐅᖅᓯᒪᔪᖅ ᓯᑎᐱᕆ 2015−ᖑᑎᓪᓗᒍ ᐊᖏᔪᖅᑳᖅᑖᖑᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ ᑲᒪᓪᓗᓂ ᓱᓕ ᐊᖏᔪᖅᑳᑉ ᑐᖏᓕᕆᓪᓗᓂᐅᒃ ᑲᓇᑕᒥ ᐱᓕᕆᐊᖑᔪᓄᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ. ᓂᕈᐊᓕᖅᑭᑦᑕᐅᓪᓗᓂ ᐃᓄᐃᑦ ᑕᐱᕇᒃᑯᓐᓄᑦ ᐊᖏᔪᖅᑳᖑᓂᕐᒧᑦ ᐋᒡᒌᔅᓯᐅᑎᓪᓗᒍ, 2018−ᒥ.

ᓇᑖᓐ ᓇᐃᓐᓂᐅᔅᓴᔭ, ᓄᓇᑦᓯᐊᕗᒻᒥ. ᓯᕗᓂᖓᓐᓂ ᐋᑐᐋᒨᓚᐅᖅᑎᓐᓇᒍ ᐃᖃᓗᒻᒥᐅᑕᐅᓚᐅᖅᓯᒪᔪᖅ, ᓄᓇᕗᒻᒥ ᐅᑭᐅᓄᑦ ᖁᓕᓄᑦ, ᐃᖅᑲᓇᐃᔭᖅᑐᓂ ᓄᓇᕗᑦ ᑐᙵᕕᒃᑯᖏᓐᓄᑦ ᐊᐅᓚᑦᑎᔨᐅᓪᓗᓂ ᐃᓄᓕᕆᓂᕐᒧᑦ ᐱᖅᑯᓯᕆᓂᕐᒧᓪᓗ. ᓄᓇᕗᑦ ᑐᙵᕕᒃᑯᓐᓂ ᑭᒡᒐᖅᑐᐃᓪᓗᓂ ᐱᔪᓐᓇᐅᑎᖏᑦᑕ ᐊᑎᖃᖃᑕᐅᔪᓂᑦ ᓄᓇᕗᑦ ᓄᓇᑖᕈᑎᒥᑦ ᐊᖏᕈᑎᖏᓐᓂ.

ᐱᓕᕇᓐᓇᖅᑐᖅ ᑕᒪᑐᒥᖓ ᑭᒡᒐᖅᑐᐃᓪᓗᓂ ᐃᓄᓐᓂᑦ ᑲᑐᔾᔨᖃᑎᒌᓐᓂᒃ ᐱᐅᓯᕚᓪᓕᑎᑦᑎᓇᓱᐊᖅᑐᓂ ᐋᓐᓂᐊᖅᑕᐃᓕᒪᔪᓕᕆᓂᕐᒥᑦ ᐊᒻᒪᓗ ᐃᓅᓇᓱᐊᑦᑎᐊᕐᓂᕐᒥᑦ ᐃᓄᓐᓂᑦ ᑲᓇᑕᒥ.