ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᒥᒃᓵᓄᑦ: ᐅᑭᐅᖅᑕᖅᑐᒧᑦ ᑲᑎᒪᔩᑦ

ᑖᒃᑯᐊ ᐅᑭᐅᖅᑕᖅᑐᒧᑦ ᑲᑎᒪᔩᑦ ᓯᕗᓪᓕᕐᒥ−ᖃᐅᔨᒪᔭᐅᓯᒪᔪᖅ ᒐᕙᒪᐅᑎᒌᑦ ᑲᑎᒪᓂᖓ ᐅᑭᐅᖅᑕᖅᑐᒥ ᐱᖃᑕᐅᓂᕐᒧᑦ. ᓯᕗᓪᓕᖅᐹᒥ ᐱᒋᐊᖅᑎᑕᒥᓂᖅ 1991−ᒥ ᓯᑕᒪᐅᔪᖅᑐᖅ ᐅᑭᐅᖅᑕᖅᑐᒥ ᓄᓇᓖᑦ ᐊᑎᓕᐅᕐᒪᑕ ᐅᑭᐅᖅᑕᖅᑐᒥ ᐊᕙᑎᓕᕆᓂᕐᒧᑦ ᓴᐳᑎᑕᐅᔾᔪᑎᒧᑦ ᑐᑭᒧᐊᒍᑎᒥᒃ. ᐅᐱᒋᕙᖃᖅᐳᒍᑦ ᐃᖅᑲᓇᐃᔮᕆᓯᒪᔭᑦᑎᓐᓂᑦ ᐱᒋᐊᖅᑎᑕᐅᕙᓪᓕᐊᓂᖓᓂ ᐅᑭᐅᖅᑕᖅᑐᒧᑦ ᑲᑎᒪᔩᑦ, ᐱᓗᐊᖅᑐᒥ ᐱᓕᕆᓂᕆᓯᒪᔭᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᓇᑕᒥ ᐃᒃᓯᕙᑕᕆᓯᒪᔭᖓᑕ ᒥᐊᓕ ᓴᐃᒪᓐ. ᐱᒋᐊᖅᑎᑕᒥᓂᖅ ᐋᑐᐋᒥ ᓯᑎᐱᕆ 19, 1996, ᐊᒻᒪᓗ ᑲᓇᑕ ᓯᕗᓪᓕᖅᐹᒥ ᐃᒃᓯᕙᐅᑕᐅᓪᓗᓂ ᐱᒋᐊᖅᓱᓂ 1996 ᑎᑭᑦᓱᒍ 1998. ᐃᒃᓯᕙᐅᑕᖓ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐊᕐᕌᒎᒃ ᒪᕐᕉᒃ ᐊᓂᒍᕋᐃᒻᒪᑎᒃ ᑭᖑᕐᕕᖅᑕᐅᑎᒻᒪᑕ.

ᑖᒃᑯᐊ ᐅᑭᐅᖅᑕᖅᑐᒧᑦ ᑲᑎᒪᔩᑦ ᓯᑕᒪᐅᔪᙱᒐᖅᑐᓂ ᓄᓇᓂ ᐅᑭᐅᖅᑕᖅᑐᒥ ᐱᓯᒪᔪᑦ – ᑲᓇᑕ, ᒥᐊᓕᒐᐃᑦ ᓄᓇᖓᓐᓂ, ᓄᐊᕗᐊᐃ, ᕕᓐᓚᓐ, ᓱᐄᑕᓐ, ᕈᔅᓯᐊ, ᐊᐃᓯᓚᓐ, ᐊᒻᒪᓗ ᑎᐊᓐᒫᒃ. ᑭᓯᐊᓂ ᓄᓇᐃᑦ ᐊᕕᑦᑐᖅᑕᐅᓯᒪᔪᓂ ᓄᓇᖁᑎᓖᑦ ᐅᑭᐅᖅᑕᖅᑐᒥ ᐃᓚᐅᒍᓐᓇᖅᑐᑦ.

ᑲᑎᒪᓂᐅᒐᔪᑦᑐᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᒥᓂᑕᖏᑕ ᑲᑎᒪᓂᖏᑦ, ᐊᕐᕌᒎᒃ ᒪᕐᕉᒃ ᐊᓂᒍᕋᐃᒻᒪᑎᒃ ᑲᑎᒪᕙᑦᑐᑦ. ᑖᒃᑯᐊ ᐊᖓᔪᖅᑳᑦ ᐅᑭᐅᖅᑕᖅᑐᒥ ᑲᒪᔩᑦ ᑲᑎᒪᓂᖏᑦ ᐊᕐᕌᒍᒥ ᑲᑎᒪᓂᐅᕙᑦᑐᑦ ᐊᐅᓚᓂᐊᕐᓗᒍ ᐃᖅᑲᓇᐃᔮᖓᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᓇᓗᓇᐃᖅᑕᐅᔪᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᒥᓂᑕᖏᑕ ᑲᑎᒪᓂᖏᓐᓂ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᖓᓲᔪᖅᑐᕆᔭᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᑕᐃᓐᓇᕐᓂᐊᕐᓗᑎᒃ ᐱᖃᑕᐅᔪᑦ ᑎᒥᐅᔪᓄᑦ. ᑲᑐᔾᔨᖃᑎᒌᙳᖅᑕᐅᓂᒥᓂᖏᑦ ᐊᑕᐃᓐᓇᕐᓂᓕᕐᓗᑎᒃ ᐱᖃᑕᐅᔪᑦ ᐱᒋᐊᖅᑎᑕᒥᓂᖅ ᐊᑐᐃᓐᓇᐅᕕᖃᕐᓂᐊᕐᒪᑦ ᑕᐃᒪᙵᓕᒫᖅ ᐊᒻᒪᓗ ᐊᑕᖏᖅᑐᒥᒃ ᑐᑭᓯᓂᐊᕐᕕᐅᒍᓐᓇᕐᓗᓂ ᐅᑭᐅᖅᑕᖅᑐᒧᑦ ᓄᓇᖃᖅᑳᖅᓯᒪᔪᓄᑦ ᑭᒡᒐᖅᑐᐃᔪᓄᑦ ᑖᒃᑯᓇᓂ ᐅᑭᐅᖅᑕᖅᑐᒧᑦ ᑲᑎᒪᔨᓂ. ᑖᓐᓇ ᐊᑐᐊᒐᖅ ᐊᑐᖅᑐᖅ ᐃᓘᓐᓇᖏᓐᓄᑦ ᑲᑎᒪᓂᕐᓄᑦ ᐊᒻᒪᓗ ᐱᓕᕆᐊᖏᓐᓄᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ.

ᐊᑕᐃᓐᓇᕐᓂᐊᕐᓗᑎᒃ ᐱᖃᑕᐅᔪᑦ ᐊᐅᓚᑦᓯᒍᓐᓇᖅᑐᑦ ᑲᑎᒪᓂᕐᓂ, ᐊᒻᒪᓗ ᐊᐅᓚᓂᕐᒧᑦ ᑐᑭᒧᐊᒍᑎᒃᓴᓂᒃ ᐅᖃᐅᓯᖃᕈᓐᓇᖅᓱᑎᒃ ᑐᑭᑖᕈᑎᒋᑦᓴᐅᑎᒋᒋᐊᓕᖏᓐᓂᑦ ᐃᒃᓯᕙᐅᑕᕆᔭᐅᔫᑉ. ᑲᑎᒪᔾᔪᑎᒃᓴᐃᑦ ᐊᒻᒪᓗ ᒥᓂᔅᑕᐃᑦ ᑲᑎᒪᓂᖏᑦ ᕿᒥᕐᕈᓇᑦᑕᐅᒋᐊᖃᓲᖑᕗᑦ ᓯᕗᕐᖓᓂ ᑐᑭᓯᓂᐊᕈᑕᐅᓗᑎᒃ ᑖᒃᑯᓄᖓ; ᐃᓚᓕᐅᔾᔭᐅᖁᔨᒍᓐᓇᖅᑐᑦ ᑲᑎᒪᔾᔪᑎᒃᓴᓄᑦ. ᐊᕐᕌᒎᒃ ᒪᕐᕉᒃ ᐊᓂᒍᖅᑎᓪᓗᒋᒃ ᑲᑎᒪᓂᖃᕈᒪᑉᐸᑕ ᐊᖓᔪᖅᑳᑦ ᐅᑭᐅᖅᑕᖅᑐᒥ ᑲᒪᔩᑦ, ᐊᑕᐃᓐᓇᕐᓂᐊᕐᓗᑎᒃ ᐱᖃᑕᐅᔪᑦ ᐃᓱᒪᓯᐅᖅᑕᐅᒋᐊᖃᖅᓯᒪᒋᐊᓖᑦ ᓯᕗᕐᖓᓂ.

ᐊᑕᐃᓐᓇᕐᓂᐊᕐᓗᑎᒃ ᐱᖃᑕᐅᔪᑦ ᐱᓕᕆᖃᑎᒌᒍᑕᐅᒍᓐᓇᖅᑐᓂᑦ ᑐᒃᓯᕋᕈᓐᓇᖅᑐᑦ, ᓲᕐᓗ ᐱᓕᕆᐊᖅᓴᐅᔪᓂᑦ. ᑕᒪᓐᓇ ᐃᓘᓐᓈᒍᑦ ᐃᓂᖓᓂᒃ ᑖᒃᑯᐊ ᐅᑭᐅᖅᑕᖅᑐᒥᓄᓇᖃᖅᑳᖅᓯᒪᔪᑦ ᐃᓄᐃᑦ ᑖᒃᑯᓇᓂ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐊᔾᔨᖃᙱᑦᑐᑦ ᒥᑦᓴᐅᓴᓪᓗᒋᑦ (ᐃᓛᓐᓂᒃᑯᑦ ᐊᑉᐸᓯᑉᐸᑦᑐᖅ) ᐱᓕᕆᔪᑦ ᐃᓄᖕᓂ ᓄᓇᕐᔪᐊᒥ ᐊᓯᖏᓐᓂ ᒐᕙᒪᐅᓂᕐᒧᑦ ᑲᑎᒪᓂᐅᕙᑦᑐᓂ. ᑭᓯᐊᓂᓕ, ᑐᑭᑖᕈᑎᖃᕐᓂᐊᓂᕐᒧᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐃᓚᒋᔭᐅᖏᓐᓇᐸᑦᑐᑦ ᑖᒃᑯᓇᓂ ᓯᑕᒪᐅᔪᙱᒐᖅᑐᓂ ᓄᓇᓕᐸᐅᔭᐅᔪᓂ, ᒪᓕᓪᓗᒍ ᐊᖏᖃᑎᒌᒍᑕᐅᓯᒪᔪᖅ. ᑖᒃᑯᐊ ᐊᑕᐃᓐᓇᕐᓂᐊᕐᓗᑎᒃ ᐱᖃᑕᐅᔪᑦ ᐃᑲᔪᖅᑐᖅᑕᐅᔪᑦ ᓄᓇᖃᖅᑳᖅᓯᒪᔪᒧᑦ ᐃᓄᖕᓄᑦ ᑎᑎᕋᖅᑎᒋᔭᐅᑲᐃᓐᓇᖅᑐᒧᑦ, ᐃᓂᓕᒃ ᑐᕌᒻᓱᒥ, ᓄᐊᕙᐃᒥ.

ᐊᒥᓱᑦ ᐅᖓᑖᓃᑦᑐᑦ ᖁᓕᑦ ᒪᕐᕈᓪᓗ “ᓇᐅᑦᓯᑐᖅᑏᑦ ᓄᓇᕐᔪᐊᑦ” ᑖᒃᑯᓇᓂ ᐅᑭᐅᖅᑕᖅᑐᒧᑦ ᑲᑎᒪᔨᓂ. ᓇᐅᑦᓯᑐᖅᑏᑦ ᓂᕈᐊᕈᓐᓇᐅᑎᖃᙱᑦᑐᑦ ᐅᑭᐅᖅᑕᖅᑐᒧᑦ ᑲᑎᒪᔨᓂ.

ᑖᒃᑯᐊ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐃᖅᑲᓇᐃᔮᖓ ᑐᕌᖅᑎᑦᓯᓯᒪᕗᖅ ᐱᕙᓪᓕᐊᔭᐅᓂᖏᓐᓄᑦ ᐊᓯᖏᑦ ᑲᑎᒪᓃᑦ ᖃᐅᔨᓴᖅᐸᑦᑐᑦ ᑐᕌᖅᑕᖃᖅᓱᑎᒃ ᐃᓱᒫᓘᑕᐅᔪᒥᒃ, ᓲᕐᓗ ᑐᑭᒧᐊᑦᑎᑕᐅᓪᓗᓂ ᑐᐊᕕᕐᓇᖅᑐᖃᖅᑎᓪᓗᒍ ᑕᕆᐅᒥ ᖃᓄᖅ ᐱᓕᕆᒋᐊᖃᕐᓂᕐᒥᒃ ᐅᑭᐅᖅᑕᖅᑐᒥ ᓯᔾᔭᓂᒃ ᓇᐅᑦᓯᑐᕐᓂᕐᒧᑦ ᑲᑎᒪᓂᕐᓂᖅ; ᑮᓇᐅᔭᓕᐅᕋᓱᐊᕈᑎᑎᒍᑦ ᐱᕙᓪᓕᐊᑎᑦᓯᓂᖅ ᑕᕝᕘᓇ ᐅᑭᐅᖅᑕᖅᑐᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᑲᑎᒪᔨᖏᑎᒍᑦ; ᐊᒻᒪᓗ ᐅᑭᐅᖅᑕᖅᑐᒥ ᐃᓕᓐᓂᐊᕐᓂᓕᕆᓂᖅ ᐊᒻᒪᓗ ᖃᐅᔨᓴᖅᑐᓕᕆᓂᖅ ᓯᓚᑦᑐᓴᕐᕕᔾᔪᐊᖓᓂ ᐅᑭᐅᖅᑕᖅᑐᒥ.

ᑖᒃᑯᐊ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐊᑐᐃᓐᓇᐅᑎᑦᓯᓯᒪᔪᑦ ᑲᑎᒪᓂᕐᒥᒃ ᐋᔩᖃᑎᒌᒍᑕᐅᑎᓪᓗᒋᑦ ᐱᖓᓱᑦ ᐱᔭᕆᐊᖃᓪᓚᕆᑦᓯᒪᔪᑦ ᒪᓕᒐᑎᒍᑦ ᐊᓪᓚᓂ ᓄᓇᓕᐅᔪᑦ ᑭᓪᓕᓯᓂᐊᖅᑕᐅᑎᓪᓗᒍ ᐱᓕᕆᖃᑕᐅᓂᕐᒥ, ᐅᖅᓱᖅᑎᕈᑎᒥᒃ ᑯᕕᔪᖃᖅᐸᑦ ᐱᕙᒌᔭᖅᓯᒪᓂᖅ ᐊᒻᒪᓗ ᖃᓄᐃᒋᐊᕐᕕᖃᕐᓂᖅ, ᐊᒻᒪᓗ ᕿᓂᖅᑐᓕᕆᓂᖅ. ᓯᕗᓪᓕᖅ ᑲᑎᒪᓂᒥᓂᖅ 2011−ᖑᑎᓪᓗᒍ ᐅᑭᐅᖅᑕᖅᑐᒥ ᕿᓂᖅᑐᓕᕆᓂᕐᒧᑦ ᐊᖏᖃᑎᒌᒍᑎᒥᒃ. ᓄᓇᓕᐅᔪᑦ ᐊᓪᓚᐃᑦ ᐋᔩᖃᑎᒌᒍᑕᐅᓯᒪᒻᒥᔪᑦ ᓯᓚᑖᓂ ᐃᑲᔪᖅᑐᐃᓂᖏᑦᑕ ᐅᑭᐅᖅᑕᖅᑐᒥ ᑲᑎᒪᔩᑦ ᐃᓱᒫᓘᑕᐅᔪᑦ ᐱᓪᓗᒋᑦ ᓲᕐᓗ ᐃᖃᓗᓕᕆᓂᖅ, ᓇᓄᓕᕆᓂᖅ ᐊᒻᒪᓗ ᑐᒃᑐᓂᒃ ᐊᐅᓚᑦᓯᓂᖅ, ᑖᒃᑯᐊ ᐃᓄᐃᓴᑦᑐᑦ ᑕᐃᓗᒋᑦ.

ᐅᑭᐅᖅᑕᖅᑐᒧᑦ ᑲᑎᒪᔩᑦ ᓴᖅᑭᑎᑦᓯᖏᓐᓇᐅᔭᖅᑐᑦ ᐊᑕᖏᖅᑐᓂᒃ, ᓯᕗᓕᖅᑕᐅᔪᓂᒃ−ᓱᓕᔪᓂᒃ ᐊᕙᑎᓕᕆᓂᕐᒨᖓᔪᓂᒃ, ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᑦᑑᓂᖏᑕ ᐊᒻᒪᓗ ᖃᓄᐃᑦᑑᕙᓐᓂᖏᑦ ᐱᓪᓗᒋᑦ ᖃᐅᔨᓴᐅᑎᓂᒃ ᐱᓕᕆᖃᑎᒌᑦᑐᓄᑦ ᑲᑐᔾᔨᖃᑎᒌᒃᑐᖁᑎᒥᑎᒍᑦ ᐅᑯᑎᒎᓇ ᑎᑎᖅᑲᖅ ᓯᕗᓪᓕᖅ ᑎᑎᖅᓯᒪᔪᑦ ᓇᓗᓇᐃᖅᓯᒍᑏᑦ ᑲᑐᔾᔨᖃᑎᒌᙳᔪᓂᒃ (ᐅᑭᐅᖅᑕᖅᑐᒥ ᓱᕈᕈᑕᐅᒍᓐᓇᖅᑐᑦ ᐱᓪᓗᒋᑦ ᖃᓄᐃᒋᐊᕐᓂᐊᓂᕐᒧᑦ ᐱᓕᕆᐊᖅ, ᐅᑭᐅᖅᑕᖅᑐᒥ ᓇᐅᑦᓯᑐᕐᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ ᐱᓕᕆᐊᖅ, ᐱᐅᖅᓱᐊᖅᑕᐅᓂᖏᑦ ᐅᑭᐅᖅᑕᖅᑐᒥ ᐆᒪᔪᑦ ᐊᒻᒪᓗ ᓄᓇᕋᐃᑦ, ᐅᐸᓗᕐᓇᖅᑐᒦᑦᑕᐃᓕᒪᓂᖅ, ᐱᕙᒌᔭᖅᓯᒪᓂᖅ ᐊᒻᒪᓗ ᖃᓄᐃᒋᐊᕐᓂᐊᕐᓂᖅ, ᓴᐳᑎᔭᐅᓂᖓ ᐅᑭᐅᖅᑕᖅᑐᒥ ᑕᕆᐅᑉ ᐊᕙᑎᖏᑕ, ᐊᒻᒪᓗ ᐊᐅᓚᑦᓯᓂᕐᒥᒃ ᐱᕙᓪᓕᐊᓂᕐᒧᑦ ᐱᓕᕆᖃᑎᒌᑦ ᑲᑐᔾᔨᖃᑎᒌᙱᑦ). ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑖᒃᑯᓇᓂ ᐊᑐᓂᒃ ᐱᖃᑕᐅᕕᓖᑦ ᐱᓕᕆᖃᑎᒌᑦᑐᓄᑦ ᑲᑐᔾᔨᖃᑎᒌᓄᑦ. ᓇᓗᓇᐃᔭᐃᒋᐊᒃᑲᓐᓂᖅᓯᒪᔪᑦ ᐱᓕᕆᖃᑦᑕᖅᓯᒪᓂᑦᑕ ᒥᒃᓵᓄᑦ ᑖᒃᑯᓇᓂ ᐅᓂᒃᑳᓕᐊᖑᓯᒪᔪᑦ ᑖᒃᑯᓇᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ (ᑲᓇᑕ) ᐊᕐᕌᒍᑕᒫᖅᓯᐅᑎᖏᓐᓂᒃ ᐅᓂᒃᑳᓕᐊᕆᓯᒪᔪᓂ, ᐱᖃᓯᐅᑎᒻᒥᔪᑦᑕᐅᖅ ᐱᓕᕆᓂᕐᓄᑦ ᐅᓂᒃᑳᓕᐊᕆᓯᒪᔪᑦ ᐊᒃᑐᐊᔪᑦ ᑲᑎᒪᓂᕆᓲᑦᑎᓐᓄᑦ, ᐊᕐᕌᒍᑦ ᓯᑕᒪᑦ ᐊᓂᒍᕋᐃᒻᒪᑕ ᑲᑎᒪᖃᑎᒌᓐᓂᐅᓲᖅ.

ᐱᓕᕆᖃᑎᒌᑦ ᑲᑐᔾᔨᖃᑎᒌᑦ ᐱᒋᐊᖅᑎᑦᓯᓲᑦ ᐱᓕᕿᐊᒃᓴᓂᑦ ᐊᒻᒪᓗ ᐱᓕᕆᐊᒃᓴᐃᑦ ᑎᓕᔭᐅᔾᔪᑕᐅᔪᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᒥᓂᔅᑕᖏᓐᓄᑦ, ᑎᑎᕋᖅᑕᐅᓯᒪᒻᒪᑦ ᑕᐃᒫᒃ ᒥᓂᔅᑕᐃᑦ ᐊᖏᕈᑎᖏᓐᓂ, ᑖᓐᓇ ᑎᑎᕋᖅᑕᐅᓯᒪᔪᑦ ᐱᓯᒪᔪᑦ ᒥᓂᔅᑕᐃᑦ ᑲᑎᒪᖃᑦᑕᕐᓂᒥᓂᖏᑕ ᑭᖑᓂᖓᓂ.

ᐅᕝᕙᐅᑯᐊ ᑎᑎᕋᖅᑕᐅᓯᒪᔪᑦ ᐊᑕᖏᖅᑐᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐱᓕᕆᖃᑎᒌᖕᓂᕐᒧᑦ ᑲᑐᔾᔨᖃᑎᒌᑦ:

• ᐅᑭᐅᖅᑕᖅᑐᒥ ᓱᕈᕈᑕᐅᒍᓐᓇᖅᑐᑦ ᐱᓪᓗᒋᑦ ᖃᓄᐃᒋᐊᕐᓂᐊᓂᕐᒧᑦ ᐱᓕᕆᐊᖅ
• ᐅᑭᐅᖅᑕᖅᑐᒥ ᓇᐅᑦᓯᑐᕐᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ ᐱᓕᕆᐊᖅ
• ᐱᐅᖅᓱᐊᖅᑕᐅᓂᖏᑦ ᐅᑭᐅᖅᑕᖅᑐᒥ ᐆᒪᔪᑦ ᐊᒻᒪᓗ ᓄᓇᕋᐃᑦ
• ᐅᐸᓗᕐᓇᖅᑐᒦᑦᑕᐃᓕᒪᓂᖅ, ᐱᕙᒌᔭᖅᓯᒪᓂᖅ ᐊᒻᒪᓗ ᖃᓄᐃᒋᐊᕐᓂᐊᕐᓂᖅ
• ᓴᐳᑎᔭᐅᓂᖓ ᐅᑭᐅᖅᑕᖅᑐᒥ ᑕᕆᐅᑉ ᐊᕙᑎᖏᑕ
• ᐊᐅᓚᑦᓯᓂᕐᒥᒃ ᐱᕙᓪᓕᐊᓂᕐᒧᑦ ᐱᓕᕆᖃᑎᒌᑦ ᑲᑐᔾᔨᖃᑎᒌᙱᑦ

ᐊᑐᑯᓂᒃ ᐱᓕᕆᖃᑎᒌᑦᑐᑦ ᑲᑐᔾᔨᖃᑎᒌᑦ ᐃᑭᐊᖅᑭᕕᓖᑦ, ᐊᑕᖏᖅᑐᓂᒃ ᓇᓗᓇᐃᔭᖅᓯᒪᔪᓂᒃ ᑎᑎᕋᖅᓯᒪᔪᖅᑕᓕᓐᓂᒃ ᐱᓕᕆᐊᖏᑕ ᐱᒻᒪᕆᐅᔪᑦ ᒥᒃᓵᓄᑦ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᒥᒃᓵᓄᑦ: ᑲᑐᔾᔨᖃᑎᒌᑦ ᓄᓇᓕᐅᖃᑎᒌᑦ

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑕᑯᓐᓇᙳᐊᖃᑦᑕᖅᓯᒪᔭᖓ ᑕᐃᒪᙵᓕᒫᖅ ᐃᖅᑲᓇᐃᔭᖃᑎᖃᕐᓗᓂ ᑲᑐᔾᔨᖃᑎᒌᑦᑐᓂᒃ ᓄᓇᓕᐅᖃᑎᒌᓂᑦ, ᐊᒥᓱᓪᓗ ᐊᒃᑐᐊᔪᑦ ᑎᒥᖁᑎᒋᔭᐅᔪᑦ, ᐱᕚᓪᓕᖅᑎᑲᓐᓂᕈᒪᓪᓗᒍ ᑎᒥᖃᕐᓂᕐᒧᑦ ᐃᓄᖕᒥᒃ ᐱᔪᓐᓇᐅᑎᖏᑦ ᐃᓄᐃᑦ, ᐊᓯᖏᓪᓗ ᐃᓱᒫᓘᑕᐅᔪᑦ ᓲᕐᓗ ᓴᐳᑎᔭᐅᔭᕆᐊᖃᕐᓂᖏᑦ ᐆᒪᔪᑦ ᐊᒻᒪᓗ ᐊᕙᑎ. 1983−ᖑᑎᓪᓗᒍ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑐᓂᔭᒥᓃᑦ “ᖃᐅᔨᒋᐊᕐᕕᐅᕙᓐᓂᐊᖅᑐᑦ ᖃᓄᐃᓕᖓᔪᖃᓕᕐᒪᖔᖅ” ᑲᑐᔾᔨᖃᑎᒌᑦᑐᑦ ᓄᓇᓕᐅᖃᑎᒌᑦ ᐊᑖᓂ ᐱᓕᕆᔨᐅᓪᓗᑎᒃ ᑖᒃᑯᐊ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒻᒪᓗ ᐃᓅᓯᖃᐅᓯᖅ ᐱᓪᓗᒍ ᑲᑎᒪᔩᑦ – ᖃᐅᔨᒪᔭᐅᔪᖅ ᐃᒫᒃ ECOSOC.

2000−ᖑᑎᓪᓗᒍ ᑖᒃᑯᐊ ᑲᑐᔾᔨᖃᑎᒌᑦᑐᑦ ᓄᓇᓕᐅᖃᑎᒌᓄᑦ ᑲᑎᒪᔨᐅᖏᓐᓇᕐᓂᐊᕐᓗᑎᒃ ᑲᑎᒪᔩᑦ ᓄᓇᖃᖅᑳᖅᓯᒪᔪᑦ ᐃᓱᒫᓘᑎᒋᔭᖏᑦ ᐱᓪᓗᒋᑦ ᐱᒋᐊᖅᑎᑕᒥᓂᖅ. ᑎᑖᓐᓇ ᐅᑭᐅᖅᑕᖅᑐᖅ ᐃᓕᑕᕆᔭᐅᓪᓗᓂ ᓄᓇᓕᐅᓂᖓᓂᒃ ᐃᓄᖕᓄᑦ ᓵᒥᓄᓪᓗ ᐃᒃᓯᕚᕐᕕᐅᒍᓐᓇᕐᓗᓂ ᑲᑎᒪᓂᕐᒥ. ᑲᑎᒪᔨᐅᖏᓐᓇᕐᓂᐊᕐᓗᑎᒃ ᑲᑎᒪᔩᑦ ᑲᑎᒪᓂᖓᑦ ᐊᖅᑯᑎᑦᓯᐊᕙᐅᕗᖅ ᑖᒃᑯᓄᖓ ᑲᑐᔾᔨᖃᑎᒌᑦᑐᑦ ᓄᓇᓕᐅᖃᑎᒌᑦ ᑎᒥᖁᑎᖓᓄᑦ ᐱᓕᕆᐊᓕᓐᓄᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᑦ.

ᐃᓚᓕᐅᑎᑎᓪᓗᒍ, ᖃᐅᔨᒪᓕᑕᖅ ᐱᔾᔪᓯᓕᒃ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐱᓪᓗᒋᑦ ᐅᖃᐅᔾᔨᒋᐊᖅᐸᑦᑐᑦ ᑖᒃᑯᓂᖓ ᑲᑐᔾᔨᖃᑎᒌᑦᑐᓂᑦ ᓄᓇᓕᐅᖃᑎᒌᓂᑦ ᐃᓅᑉ ᐱᔪᓐᓇᐅᑎᖃᕐᓂᖏᓐᓄᑦ ᑲᑎᒪᔩᓂᑦ.

ᐃᖅᑲᓇᐃᔭᖃᑎᖃᕐᓂᒃᑯᑦ ᑖᒃᑯᓂᖓ ᑲᑐᔾᔨᖃᑎᒌᑦᑐᓂᑦ ᓄᓇᓕᐅᖃᑎᒌᓂᑦ ᐃᓄᐃᑦ ᐃᑲᔪᖅᓯᓯᒪᔪᑦ ᓴᖅᑭᑕᐅᓂᖓᓄᑦ ᑖᓐᓇ ᑲᑐᔾᔨᖃᑎᒌᑦᑐᑦ ᓄᓇᓕᐅᖃᑎᒌᑦ ᐊᖏᕈᑎᒥᓂᖓ ᑎᑎᕋᖅᑕᐅᓯᒪᔪᖅ ᐱᔪᓐᓇᐅᑎᖏᑕ ᓄᓇᖃᖅᑳᖅᓯᒪᔪᑦ ᐃᓄᐃᑦ, ᐊᑐᓕᖅᑕᒥᓂᖅ ᓯᑎᐱᕆ 13−ᖑᑎᓪᓗᒍ, 2007. ᑖᓐᓇ ᐊᑐᖅᑕᐅᓯᒪᔪᒥᒃ ᑎᑎᕋᖅᑕᐅᓯᒪᔪᖅ ᐊᑑᑎᖃᓪᓚᕆᑦᑐᖅ ᐱᓕᕆᔾᔪᑎᒋᓗᒍ ᐃᓄᓐᓄᑦ ᐊᒃᓱᕈᐊᖃᐃᓐᓇᖅᑐᓂᒃ ᓴᐳᔾᔨᓂᕐᒥᒃ ᐱᔪᓐᓇᐅᑎᑦᑎᓐᓂᒃ, ᐃᓕᖅᑯᓯᒃᑯᑦ ᐱᖅᑯᓯᑐᖃᐃᑦ, ᑮᓇᐅᔭᓕᐅᕈᓐᓇᖅᓯᑲᓐᓂᕈᓐᓇᓂᒃᑯᑦ, ᐊᒻᒪᓗ ᒐᕙᒪᓕᕆᓂᒃᑯᑦ ᐱᕙᓪᓕᐊᓂᕐᒥᒃ.

ᐃᑲᔪᖅᓯᓯᒪᔪᒍᑦ ᑭᓪᓕᓯᐊᓂᕐᓂᕐᒧᑦ ᖃᐅᔨᓴᖅᑐᓕᕆᓂᕐᒧᑦ ᓱᑲᑦᑐᒥᒃ ᐊᓯᔾᔨᐸᓪᓕᐊᓂᖓᑕ ᓯᓚᐅᑉ ᒥᒃᓵᓄᑦ ᓲᕐᓗ ᐅᓂᒃᑳᖏᑎᒍᑦ ᒐᕙᒪᐅᖃᑎᒌᑦᑐᑦ ᑲᑎᒪᔨᖏᑦ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ. ᐃᖅᑲᓇᐃᔭᖃᑦᑕᖅᓯᒪᔪᒍᑦ ᐊᔪᐃᓐᓇᖅᓱᑕ ᑲᑎᒪᓂᖏᓐᓂ ᐱᓕᕆᖃᑎᒌᑦ (ᐱᓕᕆᖃᑎᒌᑦ ᑲᑎᒪᓂᖏᑦ) ᑖᒃᑯᓄᖓ ᑲᑐᔾᔨᖃᑎᒌᑦᑐᓄᑦ ᓄᓇᓕᐅᖃᑎᒌᓄᑦ ᐊᑐᕐᓂᐊᖅᑕᖓᓂᒃ ᑎᑎᕋᖅᓯᒪᔪᖅ ᑲᑎᒪᐅᑎᖃᕐᓂᕐᒧᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᑕ ᒥᒃᓵᓄᑦ ᑐᓴᖅᑕᐅᑎᑦᓯᓗᑎᒃ ᐊᓯᔾᔨᑕᖏᑦᑐᒥᒃ ᐱᔾᔪᑎᓕᒻᒥᒃ ᐊᓗᕆᐊᓇᖅᑐᑦ ᐊᑦᑐᐃᓂᕐᓗᒍᓐᓇᖅᑐᑦ ᓯᓚᐅᑉ ᐊᓯᔾᔨᕐᓂᖓᓄᑦ ᐱᓪᓗᒋᑦ ᐅᑭᐅᖅᑕᖅᑐᒥ ᓄᓇᑦᑎᓐᓂ ᐊᑦᑐᐃᓂᕐᓗᑦᑐᑦ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖃᑕᐅᖏᓐᓇᖅᑐᑦ ᑖᒃᑯᓇᓂ ᑲᑐᔾᔨᖃᑎᒌᑦ ᓄᓇᓕᐅᖃᑎᒌᓄᑦ ᐊᕙᑎᓕᕆᓂᕐᒧᑦ ᐱᓕᕆᐊᒥ. ᓯᕗᓕᖅᑐᖅ ᓄᓇᕐᔪᐊᒥ ᐊᕙᑎᓕᕆᓂᕐᒧᑦ ᐱᔪᓐᓇᐅᑎᖃᖅᑎᑕᐅᓂᒃᑯᑦ ᐋᖅᑭᒃᓯᔾᔪᑕᐅᕙᑦᑐᖅ ᓄᓇᕐᔪᐊᒥ ᐊᕙᑎᓕᕆᓂᕐᒧᑦ ᑲᑎᒪᔾᔪᑕᐅᓂᐊᖅᑐᒥ, ᑲᔪᖏᖅᓴᐃᒍᑎᓕᒃ ᐊᑐᓕᖅᑎᑕᐅᓯᒪᓂᖓᓂᒃ ᐊᕙᑎᓕᕆᓂᕐᒧᑦ ᐊᒥᓲᓂᖏᑕ ᐊᐅᓚᓯᑦᓯᓂᕐᒧᑦ ᐱᕙᓪᓕᐊᔾᔪᑕᐅᒍᓐᓇᖅᑐᑦ ᑖᒃᑯᓇᓂ ᑲᑐᔾᔨᖃᑎᒌᑐᑦ  ᓄᓇᓕᐅᖃᑎᒌᑦ ᐊᐅᓚᔾᔪᓯᖓᓐᓂ, ᐊᒻᒪᓗ ᐱᔨᑦᓯᖅᓱᓂ ᐱᔪᓐᓇᕐᓂᖃᖅᑎᑕᐅᓪᓗᓂ ᓂᐱᒋᔭᖅ ᓄᓇᕐᔪᐊᒥ ᐊᕙᑎᓕᕆᓂᕐᒧᑦ.

ᑲᑐᔾᔨᖃᑎᒌᑦ ᓄᓇᓕᐅᖃᑎᒌᑦ ᐊᕙᑎᓕᕆᓂᕐᒧᑦ ᐱᓕᕆᐊᑉ ᑎᓕᔭᐅᔾᔪᑎᒋᓯᒪᔭᖓ ᐱᓕᕆᐊᕆᓂᐊᕐᓗᒍ ᓯᕗᓕᕐᕕᖃᕐᓗᓂ ᐊᒻᒪᓗ ᑲᔪᖏᖅᓴᐃᒍᑎᖃᕐᓗᓂ ᓇᒻᒥᓂᖃᖃᒌᖕᓂᕐᒥᒃ ᑲᒪᑦᓯᐊᓂᕐᒧᑦ ᐊᕙᑎᒥᒃ ᐱᓂᐊᕐᓂᒥᒍᑦ, ᑐᓴᐅᒪᑎᑦᓯᓂᒃᑯᑦ, ᐊᒻᒪᓗ ᐱᕕᖃᖅᑎᓪᓗᒋᑦ ᐊᔭᐅᖅᑐᕐᓗᒋᑦ ᓄᓇᓕᐅᔪᑦ ᐊᒻᒪᓗ ᐃᓄᖏᑦ ᐃᓅᓯᕐᒥᓐᓂ ᑲᒪᑦᓯᐊᕆᐊᒃᑲᓐᓂᖁᓪᓗᒋᑦ ᑭᖑᕚᖑᔪᓄᑦ ᐊᐅᓚᒪᑕᐅᓕᖁᓇᒋᑦ. ᑐᑦᑕᕝᕕᒃ ᐊᓪᓚᕝᕕᖃᕐᕕᐅᔪᖅ ᓇᐃᕉᐱ, ᑭᐊᓐᔭ.

ᐃᖅᑲᓇᐃᔮᖓ ᑲᑎᖅᓱᕐᓗᒋᑦ ᓯᑕᒪᐅᔪᖏᒐᖅᑐᓄᑦ ᓄᓇᕐᔪᐊᒥ ᑲᑎᒪᔾᔪᑕᐅᒍᒪᔪᓄᑦ ᐅᑯᐊᖑᓗᑎᒃ: ᓯᓚᐅᑉ ᐊᓯᔾᔨᕐᓂᖓ, ᓱᕋᐃᔭᐃᒧᑦ ᐊᒻᒪᓗ ᐊᐳᕈᑕᐅᖃᑦᑕᖅᑐᑦ, ᐆᒪᓂᖃᖅᑐᑦ ᓇᔪᒐᕐᒥᓂᑦ ᐊᑦᑐᐊᖃᑎᒌᓐᓂᖏᓐᓂᒃ ᐊᐅᓚᑦᓯᓂᖅ, ᐊᕙᑎᓕᕆᓂᕐᒧᑦ ᒐᕙᒪᐅᓂᖃᕐᓂᖅ, ᓱᕈᕐᓇᖅᑐᓖᑦ ᐊᒻᒪᓗ ᐊᑦᑕᑯᐃᑦ, ᐊᑐᕈᓐᓇᖅᑐᑎᒍᑦ ᓱᕐᕋᐃᑐᑎᒍᑦ ᐊᑐᖅᑎᑎᑦᓯᐊᕐᓂᖅ, ᐊᒻᒪᓗ ᐊᕙᑎᓕᕆᓂᕐᒨᖓᔪᑦ ᕿᒥᕐᕈᔭᐅᓂᖓ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᑑᑎᓕᒻᒥᒃ ᐃᓕᑦᓯᓯᒪᕕᖃᖅᐳᑦ ᐃᓚᖓᓐᓂ ᑲᑐᔾᔨᖃᑎᒌᑦ ᓄᓇᓕᐅᖃᑎᒌᓄᑦ ᐊᕙᑎᓕᕆᓂᕐᒧᑦ ᐱᓕᕆᐊᒥ ᐱᓕᕆᔾᔪᑕᐅᔪᓂ ᖃᐅᔨᒪᔭᐅᔪᒥᒃ ᓯᑖᒃᕼᐆᒻ ᑲᑎᒪᔨᖏᑦ ᐊᒃᑐᐃᔪᑦ ᓱᕈᕐᓇᖅᑐᑦ ᓱᕉᑕᐅᔪᑦ, ᖃᐅᔨᒪᔭᐅᔪᑦ POP−ᓂᑦ. ᓄᓇᕐᔪᐊᒥ ᓄᓇᓕᐅᖃᑎᒌᑦ ᓴᐳᐅᔾᔨᒋᐊᖃᕐᒪᑕ ᐃᓅᑉ ᑎᒥᖓᓂᒃ ᐊᒻᒪᓗ ᐊᕙᑎᒥᒃ ᓴᐳᑎᓗᒋᑦ ᓱᕈᖅᓴᐅᑎᓖᑦ ᐊᕙᑎᒦᖏᓐᓂᓕᓲᑦ ᐊᑯᓂᐅᔪᒥᒃ, ᓯᐊᒻᒪᐸᑦᓱᓂ ᓄᓇᐃᑦ ᐊᓯᖏᓐᓄᑦ, ᓄᐊᑉᐸᓪᓕᐊᓪᓗᓂ ᐃᓅᑉ ᑎᒥᖓᑕ ᐅᖅᓲᓂᖏᓐᓂ ᐊᒻᒪᓗ ᐆᒪᔪᑦ ᑕᐃᒫᒃᓴᐃᓐᓇᖅ ᐊᑦᑐᖅᑕᐅᓪᓗᑎᒃ, ᐅᓗᕆᐊᓇᖅᑐᓂᑦ ᐊᒃᑐᐃᓂᕐᓗᒍᑎᖃᕈᓐᓇᖅᑐᑦ ᐃᓅᑉ ᑎᒥᖓᓂᒃ ᐅᕝᕙᓘᓐᓂᑦ ᐊᕙᑎᒥᒃ.

ᐊᓂᖅᑎᕆᔭᖃᕐᓂᖅ ᑲᑎᒪᔨᖏᑦ ᐊᒃᑐᐃᔪᓂᑦ ᓱᕈᕐᓇᖅᑐᓂᑦ ᓱᕉᑕᐅᔪᓂᒃ ᐋᓐᓂᐊᖅᑖᕈᑕᐅᒍᓐᓇᖅᐳᖅ ᐱᖃᓯᐅᑎᓪᓗᒋᑦ ᐋᖅᑭᑦᑕᐅᒍᓐᓇᖏᓐᓂᕋᖅᑕᖅ, ᐃᓗᓯᕐᓗᑦᑐᒥᒃ ᐃᕐᓂᓃᑦ, ᑎᒥᐅᑉ ᐅᓇᑕᐅᑎᖏᑦ ᓱᕐᕋᑦᑕᐅᓯᒪᓗᑎᒃ ᓴᙲᑦᑑᓗᑎᒃ ᐊᒻᒪᓗ ᐃᕐᓂᐅᕈᑎᖏᑦ ᐊᑦᑐᓂᕐᓗᑦᑕᐅᓯᒪᓗᑎᒃ, ᐊᒻᒪᓗ ᐋᓐᓂᐊᖃᓕᕈᑕᐅᒍᓐᓇᓂᖅᓴᐅᓪᓗᓂ ᐊᒻᒪᓗ ᓱᕋᑦᑕᐅᓗᑎᒃ ᑎᒥᒧᑦ ᐊᕙᓚᖓᔪᑦ ᐃᑉᐱᓐᓂᐊᔾᔪᑎᑦ. ᐱᓕᕆᓂᖓᑦ ᓯᕕᑐᔪᒧᑦ ᐃᖏᕐᕋᒐᓱᐊᕐᓂᕐᒧᑦ, ᐊᑕᐅᓯᖅ ᒐᕙᒪ ᑖᓐᓇᑑᓗᓂ ᐱᔪᓐᓇᖏᓚᖅ ᓴᐳᑎᓗᒋᑦ ᐃᓄᖁᑎᓂ ᐅᕝᕙᓘᓐᓂᑦ ᐊᕙᑎᒥᒃ ᓯᑖᒃᕼᐆᒻ ᑲᑎᒪᔨᖏᑦ ᐊᒃᑐᐃᔪᑦ ᓱᕈᕐᓇᖅᑐᑦ ᓱᕉᑕᐅᔪᑦ,ᑕᒪᓐᓇ ᑲᒪᒋᓂᐊᕐᓗᒍ ᓄᓇᕐᔪᐊᓕᒫᒥ ᐊᑲᐅᙱᓪᓕᐅᕈᑕᐅᔪ, ᓯᑖᒃᕼᐆᒻ ᑲᑎᒪᔨᖏᑦ ᐊᒃᑐᐃᔪᑦ ᓱᕈᕐᓇᖅᑐᑦ ᓱᕉᑕᐅᔪᑦ ᐱᓪᓗᒋᑦ, ᐊᑐᓕᖅᑕᒥᓂᖅ 2001−ᖑᑎᓪᓗᒍ, ᐱᔭᕆᐊᖃᖅᑎᑦᓯᔪᑦ ᐱᓕᕆᔨᖁᑎᒥᓐᓂᒃ ᖃᐅᔨᓴᖁᓪᓗᒋᑦ ᐱᑕᖃᕈᓐᓃᖁᓪᓗᒍ ᒥᒃᑭᓪᓕᕚᓪᓕᖁᓗᒍᓘᓐᓃᑦ ᑲᑎᒪᔨᖏᑦ ᐊᒃᑐᐃᔪᑦ ᓱᕈᕐᓇᖅᑐᑦ ᓱᕉᑕᐅᔪᑦ ᐊᕙᑎᒨᖅᖃᕐᓂᖓ.

ᒥᑦᓴᐅᑦᑐᒥᒃ, ᒥᓇᒥᑕ ᐊᖏᖃᑎᒌᒍᑎᖓᑦ ᓴᕕᒃᓴᒃᐊᑐᓕᖅᑕᒥᓂᖅ 2013−ᖑᑎᓪᓗᒍ, ᓄᓇᕐᔪᐊᒥ ᐃᓄᐃᑦ ᓴᐳᐅᔾᔨᒋᐊᖃᕐᒪᑕ ᐃᓅᑉ ᑎᒥᖓᓂᒃ ᐊᕙᑎᒥᓪᓗ ᓴᕕᒃᓴᖅ ᐊᑦᑐᐃᓂᕐᓗᐸᓐᓂᖓ ᐱᓪᓗᒍ. ᐊᑐᖅᑎᑕᐅᒋᐊᓕᖅᑐᒥᓂᖅ 2017−ᒥ. ᐊᖏᖃᑎᒌᒍᑦ ᖃᐅᔨᑎᑦᓯᕙᓪᓕᐊᒻᒪᑦ ᓄᓇᕐᔪᐊᒥ ᓴᕕᒃᓴᖅ ᐃᒪᐃᒍᓐᓴᕐᓂᖓᓂᒃ, ᓄᓇᒥ ᑕᕝᕗᕈᖅᐸᓪᓕᐊᖏᓐᓇᕋᓗᐊᖅᑎᓪᓗᒍ, ᐊᑑᑎᓕᒃ ᖃᐅᑕᒫᑦ ᐊᑐᖅᑕᐅᕙᑦᑐᓂ ᑭᓱᑐᐃᓐᓇᕐᓂ ᐊᒻᒪᓗ ᓯᓚᒧᑦ ᓄᐊᑉᐸᓪᓕᐊᓪᓗᓂ, ᐃᔾᔪᒧᑦ ᐊᒻᒪᓗ ᐃᒪᕐᓄᑦ ᐊᔾᔨᒌᖏᑦᑐᑎᒍᑦ. ᐊᐅᓚᑦᓯᓂᖅ ᓯᓚᒧᑦ ᓄᐊᑉᐸᓪᓕᐊᓂᖓᓂᒃ ᓴᕕᒃᓴᐅᑉ ᓴᕕᒃᓴᐅᓂᓕᒫᒥᓂ ᓯᕗᓪᓕᐅᑎᔭᐅᒍᑕᐅᓯᒪᕗᖅ ᐋᖅᑭᓱᖅᑕᐅᕙᓪᓕᐊᓂᖏᓐᓄᑦ ᐱᔭᒃᓴᐃᑦ ᐊᖏᖃᑎᒌᒍᑦ ᒪᓕᓪᓗᒍ.

ᐱᓕᕆᐊᕆᓯᒪᔭᖏᓐᓂ ᐊᖏᔫᑕᐅᖃᑕᐅᔪᑦ ᑖᒃᑯᐊ ᒥᓇᒥᑕ ᐊᖏᖃᑎᒌᒍᑎᖓᓂ ᐱᖃᓯᐅᑎᑦᓱᒍ ᓄᖅᑲᖅᑎᑦᓯᓂᖅ ᓄᑕᓂ ᓴᕕᒃᓴᓂᐊᖅᑐᓂ ᐅᔭᕋᕐᓂᐊᕐᕕᖕᓂᒃ, ᓄᖅᑲᖅᑎᑕᐅᕙᓪᓕᐊᓂᖏᑦ ᐅᓪᓗᒥ ᐊᐅᓚᔪᑦ ᐅᔭᕋᕐᓂᐊᕐᕖᑦ, ᓄᖅᑲᖅᑎᑕᐅᕙᓪᓕᐊᓂᖏᑦ ᐊᒻᒪᓗ ᓄᖅᑲᖅᑎᑕᐅᓂᖓ ᓴᕕᒃᓴᒥᒃ ᐊᑐᖅᐸᓐᓂᐅᑉ ᐊᒥᓱᓂ ᐱᖁᑎᓂ ᐊᒻᒪᓗ ᐱᕙᓪᓕᐊᒍᑕᐅᔪᓂ, ᐊᐅᓚᓗᒋᑦ ᐊᑐᐊᒐᖓᖃᐅᖅᑎᓪᓗᒋᑦ ᓯᓚᒧᑦ ᐳᔪᕐᓗᐃᔭᕐᓃᑦ ᓄᐊᑉᐸᓪᓕᐊᕙᓐᓂᖏᓪᓗ ᓄᓇᒧᑦ ᐃᒪᕐᒧᓪᓗ, ᐊᒻᒪᓗ ᐊᑐᐊᒐᖅ ᑎᑎᕋᖅᑕᐅᓯᒪᑦᓯᐊᖅᑐᒥ ᐃᓚᖓᓂ ᓴᓇᓂᖅ ᐊᒻᒪᓗ ᐊᖏᓗᐊᖏᑦᑐᒥᒃ−ᐅᑯᒪᐃᓐᓂᖏᑎᒍᑦ ᒎᓗᒥᒃ ᐅᔭᕋᕐᓂᐊᕐᓂᖅ.

ᑖᓐᓇ ᑲᑐᔾᔨᖃᑎᒌᑦ ᓄᓇᓕᐅᖃᑎᒌᑦ ᐊᖏᖃᑎᒌᒎᑎᖓᑦ ᐱᓪᓗᒍ ᒪᓕᒐᖅ ᑕᕆᐅᒧᑦ ᓄᓇᕐᔪᐊᒥ ᒪᓕᒐᖅ ᐊᑐᓕᖅᑕᒥᓂᖅ 1982−ᖑᑎᓪᓗᒍ. ᑭᖑᕝᕕᐅᑎᔪᒥᓂᖅ ᓯᑕᒪᓄᑦ ᔨᓂᕙ ᐊᖏᖃᑎᒌᖒᑎᓄᑦ ᐅᑭᐅᖅ 1958 ᑕᒫᓂ ᐱᒋᐊᖅᑐᒥᓂᖅ ᐃᓱᒫᓘᑎᒋᓪᓗᒍ ᓄᓇᓕᐅᔪᑦ ᑕᕆᐅᖓ ᐊᒻᒪᓗ ᖃᓂᒋᔭᖏᓐᓂ ᑭᓪᓕᓕᐅᖅᑕᐅᓯᒪᓂᖏᑎᒍ ᓄᓇᓖᑦ, ᓄᓇᒥᐅᑉ, ᖁᑦᓯᑦᑐᒥ ᑕᕆᐅᑦ, ᐃᖃᓗᒐᓱᐊᕐᕖᑦ ᐊᒻᒪᓗ ᐱᐅᖅᓱᐊᖅᑕᐅᓂᖏᑦ ᐆᒪᔪᑦ ᐊᑐᖅᑕᐅᒍᓐᓇᖅᑐᑦ ᖁᑦᓯᑦᑐᓂ ᑕᕆᐅᓃᑦᑐᑦ. ᑖᒃᑯᐊ ᓴᖅᑭᑎᑦᓯᓯᒪᔪᑦ ᐱᖓᓱᓂᒃ ᓄᑖᓂᒃ ᐱᓕᕆᕕᖕᓂᒃ: ᓄᓇᕐᔪᐊᒥ ᒪᓕᒐᖅ ᑕᕆᐅᖅ ᐱᓪᓗᒍ ; ᓄᓇᕐᔪᐊᒥ ᐃᖅᑲᕐᒧᑦ ᐱᔪᓐᓇᕐᓂᖃᖅᑎᑕᐅᓂᖅ; ᐊᒻᒪᓗ ᒪᓕᒐᖅ ᑭᓪᒡᓕᖃᖅᑎᑕᐅᒍᑎᖏᓐᓄᑦ ᓄᓇᐅᓂᐅᑉ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖃᑎᖃᖅᐸᑦᑐᑦ ᑲᑐᔾᔨᖃᑎᒌᑦ ᓄᓇᓕᐅᖃᑎᒌᓄᑦ ᐊᖏᖃᑎᒌᒍᑎᖓᑦ ᒪᓕᒐᕐᒧᑦ ᑕᕆᐅᒧᑦ ᑲᑎᒪᔨᓂᑦ ᓄᓇᕐᔪᐊᒥ ᐃᒪᕐᒥᐅᑕᓕᕆᓂᕐᒧᑦ ᑎᒥᖁᑎᖏᔭᐅᔪᒥ ᐱᔾᔪᑎᒋᓪᓗᒍ ᐅᓯᑲᑕᖃᑦᑕᕐᓃᑦ ᐊᑐᖃᑦᑕᕐᓂᕐᓗ ᓴᙱᓂᖅᓴᓂᒃ ᑕᖏᖃᕐᓂᖅᓴᓂᒃ ᐅᖅᓱᖅᑎᕈᑎᓂᒃ ᐅᑭᐅᖅᑕᖅᑐᒥ, ᓲᕐᓗ, ᐅᕙᓂᑦᑕᐅᖅ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᐅᖅᓱᐊᖅᑕᐅᖁᓪᓗᒍ ᓄᓇ ᐱᔾᔪᑎᒋᓪᓗᒍ ᓱᐳᔾᔭᐅᓂᖓᑦ ᐆᒪᔪᑦ ᐅᑭᐅᖅᑕᖅᑐᒥ.

ᑲᑐᔾᔨᖃᑎᒌᑦ ᓄᓇᓕᐅᖃᑎᒌᓄᑦ ᐊᖏᖃᑎᒌᒍᑎᖓᑦ ᒪᓕᒐᕐᒧᑦ ᑕᕆᐅᒧᑦ ᒪᓕᒐᓕᕆᓂᕐᒨᖓᔪᓄᑦ ᐱᓕᕆᔨᐅᓂᐊᖅᑎᓪᓗᒋᑦ ᑎᑎᕋᖅᑕᐅᓯᒪᔪᑦ ᑕᕆᐅᕐᒥᐅᑕᓄᑦ ᐊᒻᒪᓗ ᑕᕆᐅᒥ ᖃᓄᐃᓕᐅᕈᓘᔭᕐᓂᐅᕙᑦᑐᓄᑦ. ᑖᒃᑯᐊ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᐅᖅᓱᐊᖅᑕᐅᖁᓪᓗᒍ ᓄᓇ ᓇᖕᒥᓂᖃᖃᑎᒥᖕᓂᑦ ᐱᓕᕆᖃᑎᓖᑦ ᑐᕌᖅᑕᖃᖅᓱᑎᒃ ᐊᑐᓕᖅᑕᐅᑎᑦᓯᓂᕐᒥᒃ ᐊᖏᖃᑎᒌᒎᑎᒥᒃ (ᑲᑐᔾᔨᖃᑎᒌᑦ ᓄᓇᓕᐅᖃᑎᒌᓄᑦ ᐊᖏᖃᑎᒌᒍᑎᖓᑦ ᒪᓕᒐᕐᒧᑦ ᑕᕆᐅᒧᑦ UNCLOS IA) ᒪᑐᓯᓂᐊᖅᑐᓂᒃ ᐱᒻᒪᕆᐅᔪᓂᒃ ᐊᑯᓐᓂᕋᖁᑕᐅᔪᓂᒃ ᒐᕙᒪᐅᓂᕐᒧᑦ.

ᑖᓐᓇ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᐅᖅᓱᐊᖅᑕᐅᖁᓪᓗᒍ ᓄᓇ ᐃᓚᒋᔭᐅᔾᔪᑎᖃᖅᓱᓂ ᑲᑐᔾᔨᖃᑎᒌᑦ ᑕᒪᒃᑮᓐᓂᒃ ᑖᒃᑯᓇᓂ ᒐᕙᒪᒃᑯᓐᓂᒃ ᐊᒻᒪᓗ ᐃᓅᖃᑎᒌᑦ ᐱᓪᓗᒍ ᑲᑐᔾᔨᖃᑎᒌᑦ ᑎᒥᖁᑎᒋᔭᐅᔪᓂ. ᐃᖅᑲᓇᐃᔭᖃᑎᖃᖅᐸᑦᑐᖅ ᑲᑐᔾᔨᖃᑎᒌᑦᑐᓂᒃ ᓄᓇᓕᐅᖃᑎᒌᑦ. ᐊᐅᓚᓕᖅᑕᒥᓂᖓᑦ ᐊᑐᖅᓱᒍᓗ ᐊᖅᑯᓵᖅᑕᐅᔪᓂ, ᐃᑲᔫᑎᔪᑦ ᐊᒻᒪᓗ ᑎᑭᐅᑎᔪᒥᓂᐅᓪᓗᓂᓗ ᐅᖓᑖᓂᑦᑐᑦ 1,400 ᐃᓚᐅᔾᔪᑎᓖᑦ ᑎᒥᖁᑎᒋᔭᐅᔪᑦ ᐊᒻᒪᓗ ᑐᓴᕐᕕᐅᓂᖅᓱᑎᒃ ᐅᖓᑖᓃᑦᑐᑦ 17,000 ᖃᐅᔨᒪᓕᑕᐃᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᓚᐅᔾᔪᑎᓕᒃ ᑖᒃᑯᓇᓂ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᐅᖅᓱᐊᖅᑕᐅᖁᓪᓗᒍ ᓄᓇ. ᑕᒪᓐᓇ ᐊᔾᔨᒌᙱᓐᓂᓕᒃ ᐊᒻᒪᓗ ᐊᒥᓱᑦ ᖃᐅᔨᒪᓂᓖᑦ ᐱᔪᓐᓇᑎᑦᓯᕗᑦ ᑖᒃᑯᓂᖓ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᐅᖅᓱᐊᖅᑕᐅᖁᓪᓗᒍ ᓄᓇ ᓄᓇᕐᔪᐊᒥ ᐱᔪᓐᓇᐅᑎᖃᖅᑎᑕᐅᓪᓗᓂ ᖃᓄᐃᓕᖓᓕᕐᒪᖔᖅ ᖃᐅᔨᒪᓇᐊᓱᐊᖅᑏᑦ ᓄᓇ ᓱᕐᕋᐃᑦᑐᖅ, ᖃᐅᔨᓴᖅᐸᑦᓱᑎᓪᓗ ᖃᓄᖅ ᓴᐳᑎᑦᓯᐊᕆᐊᖃᕐᒪᖔᖅ.

ᐊᑑᑎᖃᓪᓚᕆᑦᑐᖅ ᐃᓚᖓᑦ ᐱᓕᕆᔾᔪᓯᐅᔫᑦ ᑖᒃᑯᓇᖓᑦ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᐅᖅᓱᐊᖅᑕᐅᖁᓪᓗᒍ ᓄᓇ ᐊᖏᖃᑎᒌᒍᑎ ᓄᓇᕐᔪᐊᒥ ᑕᐅᖅᓰᖃᑦᑕᓂᕐᒧᑦ ᓄᖑᑐᐃᓐᓇᕆᐊᖃᓕᖅᑐᓂᒃ ᐆᒪᔪᓂᒃ ᓯᓚᒥᐅᑕᓂᒃ ᐊᒻᒪᓗ ᓄᓇᕋᓂᑦ, ᓄᓇᕐᔪᐊᒥ ᐊᖏᖃᑎᒌᒍᑦ ᑖᒃᑯᓇᓂ ᒐᕙᒪᓂ. ᑐᕌᖅᑕᓕᒃ ᓄᓇᕐᔪᐊᒥ ᑕᐅᖅᓰᕙᓐᓂᖅ ᖃᐅᔨᓴᐅᑕᐅᓂᐊᖅᑐᓂᑦ ᐆᒪᔪᓂᑦ ᐊᒻᒪᓗ ᓄᓇᖃᕐᓂᑦ ᐃᓕᒪᓇᖅᑐᒦᑎᑦᓯᙱᖏᒃᑲᓗᐊᕐᒪᖔᖅ  ᐋᓐᓇᐅᒪᓇᓱᐊᕐᓂᖏᓐᓂᒃ ᐆᒪᔪᑦ.

ᐃᓄᐃᑦ ᐅᑭᐅᓕᕆᖃᑕᐅᖏᓐᓇᖅᑐᑦ ᐊᖏᖃᑎᒌᒍᑎ ᓄᓇᕐᔪᐊᒥ ᑕᐅᖅᓰᖃᑦᑕᓂᕐᒧᑦ ᓄᖑᑐᐃᓐᓇᕆᐊᖃᓕᖅᑐᓂᒃ ᐆᒪᔪᓂᒃ ᓯᓚᒥᐅᑕᓂᒃ ᐊᒻᒪᓗ ᓄᓇᕋᓂᑦ ᑲᑎᒪᓂᖏᓐᓂ ᓴᐳᑎᔭᐅᖁᓪᓗᒋᑦ ᐃᓄᑦ ᑕᐅᖅᓰᒍᑎᖃᖅᐸᓐᓂᖓ ᓇᓄᕋᕐᒥᒃ, ᐊᒻᒪᓗᑦᑕᐅᖅ ᑑᒑᙱᓐᓂᒃ ᑐᒑᓕᐅᑉ ᐊᒻᒪᓗ ᐊᐃᕖᐅᑉ, ᓲᕐᓗ ᑕᒪᒃᑯᐊ. ᐊᕐᕌᒍᑕᒫᑦ, ᓄᓇᕐᔪᐊᒥ ᐆᒪᔪᓂᒃ ᑕᐅᖅᓰᓂᖅ ᒥᑦᓴᐅᓴᖅᑕᐅᓯᒪᔪᖅ ᐱᓕᐊᖏᓐᓃᑦᑐᑦ ᑮᓇᐅᔭᐃᑦ ᐊᑭᖏᓐᓄᑦ ᐊᒻᒪᓗ ᐱᖃᓯᐅᑎᓗᒍ ᕼᐋᓐᓇᒪᖏᓐᓃᑦᑐᑦ ᒥᓕᐊᖑᓪᓗᑎᒃ ᓄᓇᕋᐃᑦ ᐊᒻᒪᓗ ᒪᔪᑦ ᖃᐅᔨᓴᐅᑎᑦᓴᐃᑦ. ᑕᐅᖅᓰᓂᖅ ᓱᓇᑐᐃᓐᓇᕐᓂᖅ, ᐆᒪᔪᓂᒃ ᐆᒪᑎᓪᓗᒋᑦ ᓄᓇᕋᐃᓪᓗ ᐃᓚᐅᕈᑕᐅᓕᖅᓱᑎᒃ ᓴᓇᔭᐅᔪᓄᑦ ᐊᑐᒐᒃᓴᓄᑦ ᐆᒪᔪᒦᙶᖅᑐᑦ. ᓴᖅᑭᔮᖅᑎᑕᐅᓂᖏᑦ ᐃᓚᖏᑕ ᐆᒪᔪᑦ ᐊᒻᒪᓗ ᓄᓇᕋᐃᑦ ᖁᕝᕙᓯᑦᑐᑦ ᐊᒻᒪᓗ ᑕᐅᖅᓰᒍᑕᐅᕙᑦᑐᑦ, ᑲᑎᑕᐅᑦᓱᑎᒃ ᐱᔾᔪᑕᐅᔪᑦ, ᓲᕐᓗ ᐱᓇᓱᐊᖅᑕᐅᔪᖅ ᐱᓪᓗᒍ ᑭᓯᐊᕈᑕᐅᓗᐊᓕᒧᑦ,  ᓄᖑᑎᑦᓯᕙᓪᓕᐊᒻᒪᑦ ᓱᑲᑦᑐᒥᒃ ᐊᒥᓲᓂᖏᓐᓂᑦ ᐃᓚᖏᓐᓂ ᓄᖑᑕᐅᑲᓴᖅᓯᒪᓪᓗᑎᒃ ᐆᒪᔪᑦ. ᐊᒥᓱᑦ ᐆᒪᔪᑦ ᑕᐅᖅᓰᒍᑕᐅᕙᑦᑐᑦ ᓄᖑᓐᓂᐅᔭᙱᑦᑐᑦ, ᑭᓯᐊᓂ ᐋᖅᑭᑦᑕᐅᓯᒪᓂᖓ ᐊᑐᖅᑕᐅᓂᖓᓗ ᐊᖏᖃᑎᒌᒍᑎᐅᑉ ᐊᐅᓚᑕᐅᑦᓯᐊᖁᓪᓗᒋᑦ ᑕᐅᖅᓰᓃᑦ ᐱᒻᒪᕆᐅᒻᒪᑦ ᐊᐅᓚᑦᓯᓯᐊᕐᓂᖅ ᓴᐳᑎᑦᓯᐊᕐᓂᐊᕐᓗᒋᑦ ᑕᒪᒃᑯᐊ ᐊᑑᑎᓖᑦ ᓯᕗᓂᒃᓴᒥ.

ᐱᔾᔪᑎᒋᓪᓗᒍ ᑕᐅᓰᖃᑦᑕᕐᓂᖅ ᐆᒪᔪᓂᒃ ᓯᓚᒥᐅᑕᓂᒃ ᐊᒻᒪᓗ ᓄᓇᕋᕐᓂᒃ ᑕᕆᐅᑉ ᐊᑭᐊᓄᑦ ᑖᒃᑯᓇᓂ ᓄᓇᓕᐅᔪᓄᑦ, ᐱᓇᓱᐊᕈᑕᐅᓂᖓ ᒪᓕᒐᓕᐅᖅᑕᐅᓂᕐᒧᑦ ᓄᓇᕐᔪᐊᒥ ᑲᑐᔾᔨᖃᑎᒌᒎᑕᐅᒋᐊᖃᖅᐳᖅ ᓴᐳᑎᔭᐅᑦᓯᐊᖁᓪᓗᒋᑦ ᐆᒪᔪᑦ ᓴᐳᑎᔭᐅᔭᕆᐊᓖᑦ ᐱᔭᐅᓗᐊᖁᓇᒋᑦ−ᓄᖑᑕᐅᖁᓇᒋᑦ. ᐊᖏᖃᑎᒌᒍᑎ ᓄᓇᕐᔪᐊᒥ ᑕᐅᖅᓰᖃᑦᑕᓂᕐᒧᑦ ᓄᖑᑐᐃᓐᓇᕆᐊᖃᓕᖅᑐᓂᒃ ᐆᒪᔪᓂᒃ ᓯᓚᒥᐅᑕᓂᒃ ᐊᒻᒪᓗ ᓄᓇᕋᓂᑦ ᐱᒋᐊᖅᑐᒥᓂᖅ ᑲᑐᔾᔨᖃᑎᒌᓐᓂᖅᑕᖃᖁᓪᓗᒍ ᑕᒪᑐᒧᖓ. ᐅᓪᓗᒥ, ᐊᖏᕈᑎᖃᖅᓯᒪᔪᑦ ᐊᔾᔨᒌᖏᑦᑐᓂᒃ ᓴᐳᔾᔨᓂᐊᕐᓂᕐᒥᒃ ᐅᖓᑖᓂᑦᑐᓂᑦ 37,000 ᐆᒪᔪᓂᑦ ᐊᒻᒪᓗ ᓄᓇᕋᓂᑦ, ᑕᐅᖅᓰᒍᑕᐅᑉᐸᑕᓘᓐᓃᑦ ᐆᒪᑎᓪᓗᒋᑦ, ᒥᖅᑯᖃᖅᑎᓪᓗᒋᑦ ᐊᑎᒋᒋᔭᐅᒍᑎᒃ ᐅᕝᕙᓘᓐᓃᑦ ᐸᓂᖅᑎᑦᓯᒪᔪᑦ ᓄᓇᕋᐃᑦ ᐅᐊᕗᑎᒃᓴᔭᐃᑦ.

ᐱᒋᐊᖅᑎᑦᓯᒍᑎᒥᓂᖅ ᑲᑐᔾᔨᖃᑎᒌᑦ ᓄᓇᓕᐅᖃᑎᒌᑦ ᐱᕙᓪᓕᐊᑎᑦᓯᓂᕐᒧᑦ ᐱᓕᕆᐊᖓᓄᑦ ᑲᔪᓯᑎᑦᓯᒍᑕᐅᓯᒪᔪᖅ ᐋᖅᑭᑦᓯᒪᔪᓄᑦ ᑐᕌᖅᑕᐅᔪᓄᑦ – ᖃᐅᔨᒪᔭᐅᔪᑦ ᐊᐅᓚᑦᓯᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᑐᕌᒐᐅᔪᑦ. ᖄᖃᑦᑕᕈᓐᓃᖁᔨᔪᑦ, ᓱᐳᑎᓗᒍ ᓄᓇᕐᔪᐊᖅ ᐊᒻᒪᓗ ᒪᑭᒪᑦᓯᐊᕐᓂᖃᕐᓗᓂ ᐃᓚᒋᓪᓗᒋᑦ ᑖᒃᑯᐊ ᓄᑖᒥ 2030−ᒥ ᑲᑎᒪᐅᑎᒃᓴᖅ ᐊᐅᓚᑦᓯᓂᕐᒥᒃ ᐱᕙᓪᓕᐊᑎᑦᓯᓂᖅ.

ᑕᒪᓐᓇᑕᒡᒐ ᐱᓕᕆᐊᖓᑦ ᖁᕕᐊᒋᓪᓗᒍ ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐱᒋᐊᖅᑎᑕᒥᓂᖓ ᑕᑯᓐᓇᒐᕆᓪᓗᓂᔾᔪᒃ. ᐊᑐᓕᖅᑕᖅ ᐃᓘᓐᓇᐃᓐᓄᑦ ᑖᒃᑯᓄᖓ ᑲᑐᔾᔨᖃᑎᒌᑦ ᓄᓇᓕᐅᖃᑎᒌᑦ ᐃᓚᐅᔾᔪᑎᓕᓐᓄᑦ ᓄᓇᓕᕐᔪᐊᓄᑦ ᐱᒋᐊᖅᑎᑕᐅᓪᓗᓂ 2015−ᒥ, ᑖᓐᓇ 2030−ᖑᓕᖅᐸᑦ ᑲᑎᒪᓪᔪᑎᒃᓴᖅ ᐊᑐᐃᓐᓇᐅᑎᑦᓯᔪᖅ ᑎᑎᖅᑐᒐᖅᑕᐅᓯᒪᔪᓂᒃ ᓴᐃᓕᓂᕐᒧᑦ ᐊᒻᒪᓗ ᐱᕙᓪᓕᐊᖁᓪᓗᒋᑦ ᐃᓄᐃᑦ ᐊᒻᒪᓗ ᓄᓇ ᐃᓂᒋᔭᖓᑦ. ᐃᖅᑲᓇᐃᔮᕆᒍᒪᔭᖓ ᐆᒻᒪᑎᒥᐅᑕᕆᓪᓗᓂᔾᔪᒃ ᑖᒃᑯᐊ ᖁᓕᓪᓗ ᓯᑕᒪᐅᔪᖏᒐᖅᑐᓪᓗ ᐊᐅᓚᑦᓯᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᑐᕌᖅᑕᐅᔪᑦ, ᑐᐊᕕᕆᔭᐅᔪᑦ ᐱᒋᐊᖅᑕᐅᒍᒪᓪᓗᑎᒃ ᑖᒃᑯᓄᖓ ᓄᓇᕐᔪᐊᒥᐅᓄᑦ – ᐱᒋᐊᖅᑎᑕᒥᓂᖅ ᐊᒻᒪᓗ ᐱᕙᓪᓕᐊᑐᐃᓐᓇᖅᑐᖅ – ᓄᓇᕐᔪᐊᒥ ᓇᖕᒥᓂᖃᖃᑎᒌᑦᑐᓄᑦ ᐱᓕᕆᖃᑎᒌᑦᑐᓄᑦ. ᐃᓕᑕᖅᓯᓯᒪᒻᒪᑕ ᖄᖓᑦᑕᕈᓐᓃᓐᓂᖅ ᐊᒻᒪᓗ ᐊᓯᖏᑦ ᐊᔪᖅᓴᓇᖅᑐᑦ ᑲᑐᔾᔭᐅᒋᐊᖃᕐᒪᑎᒃ ᑐᑭᒧᐊᒍᑎᓕᐅᖅᑐᖃᕐᓂᐊᑎᓪᓗᒍ ᐋᖅᑭᒋᐊᕆᒍᑕᐅᓂᐊᖅᑐᓂᒃ ᐃᓗᓯᕐᒥᒃ ᐊᒻᒪᓗ ᐃᓕᓐᓂᐊᖅᑐᓕᕆᓂᕐᒥᒃ, ᐊᑦᓯᑎᒋᐊᕐᓗᒍ ᐊᔾᔨᒌᖏᑎᑦᓯᓂᖅ, ᐊᒻᒪᓗ ᐃᑲᔪᖅᑐᕐᓗᒍ ᑮᓇᐅᔭᓕᐅᕈᓐᓇᓂᒃᑯᑦ ᐱᕈᖅᐸᓪᓕᐊᒍᓐᓇᕐᓂᖅ – ᐱᖃᓯᐅᑏᓐᓇᕐᓗᒍ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐊᒻᒪᓗ ᐃᖅᑲᓇᐃᔮᖃᕐᓂᖅ ᐱᐅᖅᓱᐊᕐᓗᒍ ᓱᕐᕋᐃᑦᑑᑯᕐᓗᒍ ᑕᕆᐅᕗᑦ ᐊᒻᒪᓗ ᓇᐹᖅᑐᕗᑦ. ᑖᓐᓇ ᐊᐅᓚᑦᓯᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᑐᕌᖅᑕᐅᔪᑦ ᑲᔪᓯᑎᑦᓯᔪᖅ ᐱᕈᖅᐸᓪᓕᐊᑐᐃᓐᓇᖅᑐᒥᒃ ᐃᖅᑲᓇᐃᔮᖑᖃᑦᑕᖅᓯᒪᓂᖓᓄᑦ ᓄᓇᕐᔪᐊᒥᐅᖃᑎᒌᑦ ᐊᒻᒪᓗ ᑖᒃᑯᐊ ᑲᑐᔾᔨᖃᑎᒌᑦᑐᑦ ᓄᓇᓕᐅᖃᑎᒌᑦ, ᐱᖃᑎᐅᑎᑦᓱᒍ  ᑲᑐᔾᔨᖃᑎᒌᑦᑐᑦ ᓄᓇᓕᐅᖃᑎᒌᑦ ᐱᓕᕆᕕᖓ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒻᒪᓗ ᐃᓅᖃᑎᒌᒍᓰᑦ ᐱᓪᓗᒋᑦ..

ᐅᓇ ᓇᐃᑦᑐᖅ ᑲᑐᔾᔨᖃᑎᒌᑦ ᓄᓇᓕᐅᖃᑎᒌᑦ ᑲᑎᒪᓂᕆᖃᑦᑕᖅᓯᒪᔭᖏᑦ , ᐊᒻᒪᓗ ᐊᖏᖃᑎᒌᒍᑎᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᖃᑕᐅᖏᓐᓇᖅᑐᑦ ᐅᑯᓇᓂ:

• ᑲᑐᔾᔨᖃᑎᒌᑦ ᑲᑎᒪᔾᔪᑎᖃᖅᑎᓪᓗᒋᑦ ᑲᔪᓯᓐᓈᓂᐊᖅᑎᓪᓗᒍ ᑲᑎᒪᓂᖅ ᐱᓪᓗᒋᑦ ᓄᓇᖃᖅᑳᖅᓯᒪᔪᑦ ᐃᓱᒫᓘᑎᖏᑦ
• ᑲᑐᔾᔨᖃᑎᒌᑦ ᑎᑎᕋᖅᓯᒪᔭᖓᑦ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ
• ᑲᑐᔾᔨᖃᑎᒌᑦ ᓄᓇᕐᔪᐊᒥ ᐃᒪᕐᒥᐅᑕᓕᕆᓂᕐᒧᑦ ᑎᒥᖁᑎᖏᔭᐅᔪᖅ
• ᑲᑐᔾᔨᖃᑎᒌᑦ ᓄᓇᓕᐅᖃᑎᒌᓄᑦ ᐊᖏᖃᑎᒌᒍᑎᖓᑦ ᒪᓕᒐᕐᒧᑦ ᑕᕆᐅᒧᑦ
• ᑲᑐᔾᔨᖃᑎᒌᑦ ᓄᓇᓕᐅᖃᑎᒌᓄᑦ ᐊᕙᑎᓕᕆᓂᕐᒧᑦ ᐱᓕᕆᐊᖅ
• ᓯᑖᒃᕼᐆᒻ ᐊᖏᖃᑎᒌᒍᑎᖓᑦ ᐱᓪᓗᒋᑦ ᐱᑕᖃᐃᓐᓇᖅᑐᑦ ᓱᕈᕐᓇᖅᑐᑦ ᓱᕉᑕᐅᔪᑦ
• ᒥᓇᒥᑕ ᐊᖏᖃᑎᒌᒍᑎᖓᑦ ᓴᕕᒃᓴᒃ ᐱᓪᓗᒍ (ᒥᓇᒥᑕ ᐊᖏᖃᑎᒌᒍᑎᖓᑦ)
• ᑲᑐᔾᔨᖃᑎᒌᑦ ᓄᓇᓕᐅᖃᑎᒌᓄᑦ ᐱᓕᕆᕕᒃ ᐊᐅᓚᑦᓯᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᑐᕚᖑᔪᓂᒃ
• ᑲᑐᔾᔨᖃᑎᒌᑦ ᓄᓇᓕᐅᖃᑎᒌᓄᑦ ᑎᑎᕋᖅᑕᐅᓯᒪᓂᖓ ᐱᔪᓐᓇᐅᑎᖏᑕ ᓄᓇᖃᖅᑳᖅᓯᒪᔪᑦ ᐃᓄᐃᑦ

ᐊᑐᓂᒃ ᑖᒃᑯᐊ ᑎᒥᐅᔪᑦ ᐃᑭᐊᖅᑭᕕᖁᑎᓖᑦ ᓴᖕᒥᓂᖅ, ᑐᓴᕋᑦᓴᖃᐅᑦᓯᐊᖅᓱᓂᒃ ᐱᓕᕆᓂᖏᑕ ᒥᒃᓵᓄᑦ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᒥᒃᓵᓄᑦ: ᑲᓇᑕᒥ ᖁᑦᓯᑦᑐᓂ ᐅᑭᐅᖅᑕᖅᑐᓂ ᐊᒻᒪᓗ ᐅᑭᐅᖅᑕᖅᑐᒥ ᐊᑐᐊᒐᕐᒧᑦ ᑎᑎᕋᖅᓯᒪᓂᖓ−ᓄᓇᕐᔪᐊᒥᐅᖃᑎᒌᑦ ᐱᒋᐊᕐᓂᖓ

ᐅᑐᐱᕆ, 2019−ᖑᑎᓪᓗᒍ ᑲᓇᑕᒥ ᒐᕙᒪᒃᑯᑦ ᐅᖃᓕᒫᒐᙳᑎᑦᓯᓂᕐᒪᑕ ᓄᑖᒥᒃ ᑲᓇᑕᒥ ᖁᑦᓯᑦᑐᓂ ᐅᑭᐅᖅᑕᖅᑐᓂ ᐊᒻᒪᓗ ᐅᑭᐅᖅᑕᖅᑐᒥ ᐊᑐᐊᒐᕐᒧᑦ ᑎᑎᕋᖅᓯᒪᔭᒥᖕᓂᒃ, ᐊᕐᕌᒍᒐᓴᒐᓚᖕᓂᑦ ᐋᖅᑭᓱᒃᑕᐅᕙᓪᓕᐊᓯᒪᔪᖅ. ᑲᓇᑕᒥ, ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᑦ ᐃᓚᓕᐅᑎᑎᑦᓯᖃᑕᐅᓯᒪᔪᑦ ᐱᕙᓪᓕᐊᔭᐅᓂᖓᓄᑦ ᑖᒃᓱᒪ ᐊᑐᐊᒐᐅᑉ. ᐱᔾᔪᑎᒋᓪᓗᒍ ᓄᓇᕐᔪᐊᕐᒥᐅᖃᑎᒌᑦ ᐱᒋᐊᕐᓂᖓ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐱᖃᑕᐅᓯᒪᔪᑦ ᑐᑭᓯᓂᐊᖃᑎᒌᙱᓂ ᐃᓚᓯᐅᑎᑎᑦᓯᓂᕐᓂᓗ ᑭᖑᓪᓕᖅᐹᒥᒃ ᑎᑎᖅᑲᐅᓂᐊᓕᖅᑎᓪᓗᒍ ᑕᕝᕙᓂ ᑎᑎᖅᑲᕈᖅᑕᐅᒐᓱᐊᖅᓯᒪᔪᒥ.

ᓄᓇᕐᔪᐊᒥᐅᖃᑎᒌᑦ ᐱᒋᐊᕐᓂᖓ ᐃᓚᒋᕙᐅᒃ ᐃᔾᔪᓂᖅᓴᐅᑉ ᐊᑐᐊᒐᐅᑉ ᑎᑎᕋᖅᑕᐅᓯᒪᓂᖓᑕ ᑕᐃᔭᖅ “ᑲᓇᑕᐅᑉ ᖁᑦᓯᑦᑐᖏᓐᓄᑦ ᐊᒻᒪᓗ ᐅᑭᐅᖅᑕᑐᓄᑦ ᐊᑐᐊᒐᐅᑉ ᑎᑎᕋᖅᓯᒪᓂᖓ” ᐃᓗᓕᓕᒃ ᓯᑕᒪᐅᔪᖅᑐᓂᒃ ᐱᒻᒪᕆᐅᑎᓪᓗᒋᑦ ᑐᕚᖑᔪᓂᒃ ᐊᒻᒪᓗ ᑐᕌᖓᔪᓄᑦ ᐱᓕᕆᐊᖑᒍᒪᔪᑦ ᑕᒪᑐᒧᖓᓕᖓᔪᑦ. ᐊᕐᕕᓂᓖᑦ ᐃᓗᓕᖏᑦ ᓄᓇᕐᔪᐊᒥᐅᖃᑎᒌᑦ ᐱᒋᐊᕐᓂᖓᓂᒃ ᒥᑦᓴᐅᓪᓗᓂ ᐊᒻᒪᓗ ᑐᕚᖑᑦ ᑎᑎᕋᖅᑕᐅᓯᒪᓗᑎᒃ ᑎᑎᖅᑲᕐᒥ ᑎᑎᕋᖅᑕᐅᒋᐊᙵᖅᑐᒥᓂᕐᒥ.

ᓄᓇᕐᔪᐊᒥᐅᖃᑎᒌᑦ ᐱᒋᐊᕐᓂᖓ ᐱᒋᐊᕈᑎᓕᒃ ᓇᓗᓇᐃᔭᖅᓱᒋᑦ ᐅᓪᓗᒥᓯᐅᑎᐅᓕᖅᑐᑦ ᓄᓇᕐᔪᐊᒥ ᐅᑭᐅᖅᑕᖅᑐᓂ. ᐅᑭᐅᖅᑕᖅᑐᒧᑦ ᑲᑎᒪᔩᑦ ᐱᓕᕆᖃᑕᐅᕗᑦ ᐊᑐᐊᒐᕐᒥ ᑲᓇᑕ ᓯᑕᒪᐅᔪᖅᑐᕆᔭᐅᓪᓗᓂ ᓄᓇᓕᕐᔪᐊᖑᓂᖓ ᐅᑭᐅᖅᑕᖅᑐᒧᑦ ᑲᑎᒪᔨᓕᒃ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᖓᓲᔪᖅᑐᕆᔭᐅᓪᓗᓂ ᓄᓇᖃᖅᑳᖅᓯᒪᔪᑦ ᐃᓄᐃᑦ ᑎᒥᖁᑎᖓ ᐱᖃᑕᐅᖏᓐᓇᖅᑐᑦ.

ᓴᖅᑭᑎᑕᒥᓂᖅ 1996−ᖑᑎᓪᓗᒍ ᐋᑐᐋᒥ, ᑐᙵᕕᓕᐅᖅᑕᐅᓯᒪᑦᓯᐊᖅᓱᓂ ᐃᖅᑲᓇᐃᔮᖑᓯᒪᓂᖓ ᓯᕗᓕᖅᑎᐅᖃᑕᐅᓯᒪᔪᒧᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᓇᑕᒥ ᐃᒃᓯᕙᐅᑕᖓᓄᑦ ᒥᐊᓕ ᓴᐃᒪᓐᒧᑦ, ᐅᑭᐅᖅᑕᖅᑐᒥ ᑲᑎᒪᔩᑦ ᑲᑎᑎᑦᓯᕙᑦᑐᑦ ᐅᑭᐅᖅᑕᖅᑐᓂ ᓄᓇᓕᒋᔭᐅᔪᓃᙶᖅᑐᓂᒃ, ᓄᓇᖃᖅᑳᖅᓯᒪᔪᓂᒃ ᐊᒻᒪᓗ ᖃᐅᔨᓴᖅᑎᓂᒃ ᐅᖃᐅᓯᐅᖁᓪᓗᒋᑦ ᐊᕙᑎᑦᑎᓐᓂᑦ ᐱᕙᓪᓕᐊᔪᓂᑦ ᑲᒪᑦᓯᐊᕈᓐᓇᕐᓂᖅ ᐊᒻᒪᓗ ᐊᕙᑎᒨᖓᔪᓂᒃ ᓴᐳᔾᔨᓂᕐᒥᒃ ᐅᑭᐅᖅᑕᖅᑐᒥ.

ᓄᓇᕐᔪᐊᒥᐅᖃᑎᒌᑦ ᐱᒋᐊᕐᓂᖓ ᓇᓗᓇᐃᖅᓯᓯᒪᔪᑦ ᐱᕙᓪᓕᐊᔭᐅᒍᒪᓂᖓᓂᒃ ᐅᑭᐅᖅᑕᖅᑐᖅ. ᖁᓕᓪᓗ ᐱᖓᓱᓪᓗ ᐅᑭᐅᖅᑕᖏᑦᑐᓂ ᓄᓇᓖᑦ ᐃᐅᕈᑉᒥ ᐊᐃᓴᒥᓗ ᐊᖏᖅᑎᑕᐅᓯᒪᕗᑦ ᐃᓕᑕᕆᔭᐅᓯᒪᓪᓗᑎᒃ ᓇᐅᑦᓯᑐᖅᑏᑦ ᐅᑭᐅᖅᑕᖅᑐᒥ ᑲᑎᒪᔨᓄᑦ. ᐊᒥᓱᑦ ᓴᖅᑭᑎᑦᓯᓯᒪᔪᑦ ᓇᖕᒥᓂᖅ ᐅᑭᐅᖅᑕᖅᑐᒧᑦ ᐊᑐᐊᒐᕐᒥᓐᓂᒃ ᐊᒻᒪᓗ ᑐᑭᒧᐊᒍᑎᒃᓴᓂᒃ, ᐃᓚᐅᑎᒃᑲᓐᓂᖅᑐᓂᒃ ᑕᑯᒍᒪᔪᑦ ᐅᑭᐅᖅᑕᖅᑐᒥ.

ᓄᓇᕐᔪᐊᒥ ᐱᓕᕆᑕᐅᒍᒪᓕᖅᐸᓪᓕᐊᑐᐃᓐᓇᖅᑐᑦ ᐅᑭᐅᖅᑕᖅᑐᒥ ᐅᑭᐅᖅᑕᕐᓃᑦ. ᓯᓚᐅᑉ ᐊᓯᔾᔨᕐᓂᖓᓄᑦ−ᐊᐅᓚᑕᐃᑦ ᐅᑭᐅᖅᑕᖅᑐᓂ ᐃᒪᒃᑯᑦ ᐊᖅᑯᑎᑖᖅᐸᓪᓕᐊᑐᐃᓐᓇᖅᑐᖅ, ᑐᕌᖅᑎᑦᓯᔪᖅ ᑕᒪᓐᓇ ᓄᓇᕐᔪᐊᒥ ᐅᓯᑲᑦᑕᕈᒪᓂᖅ ᐅᑭᐅᖅᑕᖅᑐᒧᑦ, ᐃᖃᓗᓕᕆᓂᖅ ᐊᒻᒪᓗ ᓱᕐᕋᐃᑦᑐᑦ ᐊᑐᖅᑕᐅᒍᓐᓇᕐᓂᖏᓐᓄᑦ ᐱᕙᓪᓕᐊᑎᑦᓯᓂᕐᒧᑦ. ᑕᒪᓐᓇᐅᑎᓪᓗᒍ ᓄᓇᕐᔪᐊᒥ ᓴᐳᔾᔨᓇᓱᐊᖅᑐᑦ ᐊᒥᓱᙳᐸᓪᓕᐊᑐᐃᓐᓇᖅᑐᑦ ᐊᑦᑕᓇᖅᑐᒦᑦᑐᑦ ᐅᑭᐅᖅᑕᖅᑐᒥ ᐆᒪᓂᖃᖅᑐᑦ ᓇᔪᒐᕐᒥᓂᑦ ᐊᑦᑐᐊᖃᑎᒌᓐᓂᖏᓐᓂᒃ ᐊᑦᑐᓂᕐᓗᑦᑕᐅᓯᒪᓕᕐᓂᖏᑦ ᓯᓚᐅᑉ ᐊᓯᔾᔨᕐᓂᖓᓄᑦ.

ᑎᑎᕋᖅᓯᒪᔪᖅ ᐅᖃᖅᓯᒪᔪᖅᑕᓕᒃ ᐃᒪᐃᒻᒪᑦ “ᑲᓇᑕ ᑲᔪᓯᑎᑦᓯᓂᐊᖅᑐᖅ ᐊᑐᖅᑕᐅᑎᑦᓯᓗᓂ ᐃᓘᓐᓈᒍᑦ ᐱᔪᓐᓇᐅᑎᒋᔭᐅᔪᑦ ᐊᒻᒪᓗ ᓇᖕᒥᓂᖅ ᒐᕙᒪᐅᓂᕐᒧᑦ ᓄᓇᒥᓂ ᐊᒻᒪᓗ ᐅᑭᐅᖅᑕᖅᑑᑉ ᐃᒪᖏᓐᓂ, ᐱᖃᓯᐅᑎᑦᓱᒍ ᐊᖅᑯᑦ ᐅᐊᖕᓇᖅᐸᓯᒃᑯᑦ ᑐᓄᕕᐊᒃᑯᑦ.”

ᑎᑎᕋᖅᓯᒪᔪᒥ ᐱᖓᓱᑦ ᑎᑎᕋᖅᑕᐅᓯᒪᔪᑦ ᐱᕕᒃᓴᖃᕐᕕᐅᔪᑦ:

1. ᓴᙱᑦᓯᒋᐊᕐᓗᒋᑦ ᐊᑐᐊᒐᐃᑦ−ᑐᙵᕕᓖᑦ ᓄᓇᕐᔪᐊᒥ ᐊᑐᐊᒐᐅᑎᑕᐅᔪᓄᑦ ᐅᑭᐅᖅᑕᖅᑐᒥ.
2. ᓇᓗᓇᙱᑑᑎᓪᓗᒋᑦ ᓇᓗᓇᐃᔭᖅᓯᒪᓗᒋᑦ ᑲᓇᑕᐅᑉ ᐅᑭᐅᖅᑕᖅᑐᖏᑕ ᑭᒡᓕᖏ, ᐱᖃᓯᐅᑎᓗᒋᑦ ᓇᓗᓇᐃᔭᖅᓯᒪᓂᖏᑦ ᓯᓚᑎᖏᑕ ᑭᒡᓕᒋᔭᐅᑎᑕᐅᔪᑦ ᑲᓇᑕᐅᑉ ᐃᒪᖏᓐᓂ ᐃᓗᐃᓕᕐᓂ ᐅᑭᐅᖅᑕᖅᑐᒥ ᑕᕆᐅᒥ.
3. ᓯᕕᑦᑐᕆᐊᕐᓗᒍ ᑲᓇᑕᐅᑉ ᓄᓇᕐᔪᐊᒥ ᐱᖃᑕᐅᕕᖏᑦ ᓯᕗᓪᓕᐅᑎᔭᖏᑕ ᑲᓇᑕᐅᑉ ᖁᑦᓯᑦᑐᖏᓐᓄᑦ ᐊᒻᒪᓗ ᐅᑭᐅᖅᑕᖅᑐᖏᓐᓄᑦ. ᑕᒪᓐᓇ ᐱᖃᓯᐅᔾᔨᔪᖅ ᐃᓅᖃᑎᒌᑦ−ᑮᓇᐅᔭᓕᐅᕋᓱᐊᕈᑎᑎᒍᑦ ᐱᕙᓪᓕᐊᓂᖓ, ᓯᓚᑦᑐᕆᐊᒃᑲᓐᓂᕐᓂᖅ ᖃᐅᔨᒪᓂᒃᑯᑦ, ᐊᕙᑎᒥᒃ ᓴᐳᔾᔨᓂᖅ ᐊᒻᒪᓗ ᓴᐃᒪᑎᖃᕐᓂᖅ ᓄᓇᖅᑳᖅᓯᒪᔪᓂᒃ ᐃᓄᖕᓂᑦ.

ᑕᒪᒃᑯᐊ ᐱᖓᓱᑦ ᓯᕗᓪᓕᐅᑎᑕᐅᒍᒪᔪᑦ ᑲᔪᓯᑎᑕᐅᖁᓪᓗᒋᑦ, ᑲᓇᑕᐅᑉ ᓄᓇᕐᔪᐊᒥ ᐱᑕᐅᕕᒋᔭᖏᑦ ᑐᑭᒧᐊᒃᑎᑕᐅᓂᐊᖅᑐᑦ ᐅᑯᓄᖓ ᐱᖓᓲᔪᖅᑐᓄᑦ ᑐᕚᕆᔭᐅᔪᓄᑦ:

1. ᐊᑐᐊᒐᐃᑦ−ᑐᙵᕕᓖᑦ ᓄᓇᕐᔪᐊᒥ ᐊᑐᖅᑕᐅᖁᔭᐅᔪᓂᒃ ᐅᑭᐅᖅᑕᖅᑐᒥ ᑐᕌᖓᑦᓯᐊᖁᓪᓗᒍ ᓄᑖᓄᑦ ᐊᑐᖅᑕᐅᓕᖅᑐᓄᑦ ᐊᒻᒪᓗ ᐱᕕᑦᓴᖃᕐᕕᐅᑎᑕᐅᒍᑕᐅᔪᓄᑦ.
   • ᑕᒪᓐᓇ ᐃᓱᒪᒃᓴᖅᓯᐅᕈᑕᐅᑎᒋᔭᐅᑦᓯᐊᕆᐊᓕᒃ ᐃᓗᓕᓕᒃ ᓯᑕᒪᓂᒃ ᐱᔾᔪᑎᓂᑦ:
   • ᐆᒻᒪᕆᓯᑎᒃᑲᓂᕐᓗᒍ ᑲᓇᑕᒧᑦ ᓯᕗᓕᖅᑎᐅᓂᖅ ᑲᑐᔾᔨᖃᑎᒌᑦ ᑲᑎᒪᓂᖏᓐᓂ ᐅᑭᐅᖅᑕᑐᒧᑦ ᐃᓱᒫᓘᑕᐅᔪᑦ ᐅᖃᖃᑎᒌᒎᑕᐅᑎᓪᓗᒋᑦ ᐊᒻᒪᓗ ᑐᑭᑖᕈᑕᐅᔪᖃᕐᓂᐊᑎᓪᓗᒍ.
   • ᐱᕚᓪᓕᑎᒃᑲᓂᕐᓗᒍ ᑭᒡᒐᖅᑐᐃᓂᖅ ᐊᒻᒪᓗ ᐱᖃᑕᐅᓂᖅ ᖁᑦᓯᑦᑐᖏᑦ ᐊᒻᒪᓗ ᐅᑭᐅᖅᑕᖅᑐᒥ ᑲᓇᑕᒥᐅᑦ ᐱᖃᑕᐅᕕᒋᒋᐊᓕᙱᓐᓄᑦ ᓄᓇᕐᔪᐊᒥ ᑲᑎᒪᓂᕐᓂ ᐊᒻᒪᓗ ᐋᔨᖃᑎᒌᙱᓐᓂᕐᓂ.
   • ᓴᙱᑦᓯᒋᐊᕐᓗᒍ ᑲᑐᔾᔨᖃᑎᒌᙱᓐᓂᒃᑯᑦ ᐱᓕᕆᖃᑎᒌᖕᓂᖅ ᐅᑭᐅᖅᑕᖅᑐᒧᑦ ᐊᒻᒪᓗ ᐱᖃᑕᐅᒋᐊᖃᓪᓚᕆᑦᑐᓄᑦ ᐅᑭᐅᖅᑕᖏᑦᑐᓂ−ᓄᓇᕐᔪᐊᓂ ᐊᒻᒪᓗ ᐱᓕᕆᖃᑕᐅᔪᓄᑦ ᐊᐅᓚᑦᓯᔪᓄᑦ.
   • ᓇᓗᓇᐃᔭᑦᓯᐊᕐᓗᒋᑦ ᓇᓗᓇᖏᓪᓗᑎᒃ ᑲᓇᑕᒥ ᑕᕆᐅᑦ ᐃᒪᐅᓂᖏᑦ ᐊᒻᒪᓗ ᑭᒡᓕᖏᑦ ᐅᑭᐅᖅᑕᖅᑐᒥ.
2. ᑲᓇᑕᒥ ᖁᑦᓯᑦᑐᖏᑦ ᐊᒻᒪᓗ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᑦ ᓴᙱᓂᖃᖅᐳᐅᑦ ᐊᒻᒪᓗ ᐃᓗᓯᑦᓯᐊᕆᑦᓱᑎᒃ.
   • ᑕᒪᑐᒥᖓ ᑐᕚᖃᕐᓂᖅ ᑲᓇᑕ ᐅᑯᓂᖓ ᐃᑲᔪᖅᑐᐃᓂᐊᖅᐳᖅ:
   • ᑳᖃᑦᑕᖅᑐᖃᕈᓐᓃᕐᓗᓂ.
   • ᓇᖕᒥᓂᖅ ᐃᓅᓯᕐᒥᒃ ᑭᐱᓯᖃᑦᑕᕐᓂᖅ ᐃᓄᐃᓴᓪᓕᕚᓪᓕᑎᑉᐸᓪᓕᐊᓗᒍ.
   • ᓴᙱᑦᓯᒋᐊᕐᓗᒍ ᐃᓱᒪᒃᑯᑦ ᐃᓗᓯᖅ ᐊᒻᒪᓗ ᑎᒥᐅᑉ ᖃᓄᐃᙱᑦᓯᐊᖅᑐᒥᒃ−ᐃᓅᓯᖃᕐᓂᖓ.
   • ᐊᕙᑎᖃᑦᓯᐊᕐᓂᖅ ᓱᕈᓰᑦ ᐃᓅᓯᖃᕐᕕᒋᓂᐊᖅᑕᖏᓐᓂ, ᐃᓕᓐᓂᐊᖅᑐᓕᕆᓂᖅᑕᖃᕐᓗᓂ, ᐱᖅᑯᓯᓕᕆᓂᖅ, ᐃᓗᓯᓕᕆᓂᖅ ᐊᒻᒪᓗ ᖃᓄᐃᙱᑦᓯᐊᖅᑐᒥᒃ−ᐃᓅᓯᖃᕐᓂᕐᒥᒃ.
   • ᐊᕝᕕᐊᕈᑕᐅᔪᓐᓃᕐᓗᓂ ᐃᓕᓐᓂᐊᓂᓕᕆᓂᖅ ᐱᓪᓗᒍ ᐃᓕᓐᓂᐊᖅᓯᒪᓃᑦ.
   • ᑲᔪᓯᔪᒥᒃ ᐃᓕᓐᓂᐊᑎᑦᓯᖃᑦᑕᕐᓂᖅ ᐊᒻᒪᓗ ᐱᔪᓐᓇᖅᑕᐅᔪᑦ ᐱᕙᓪᓕᐊᑲᓐᓂᕐᕕᖏᑎᒍᑦ ᐱᕕᖃᖅᑎᑕᐅᕕᐅᓗᑎᒃ ᓄᓇᕐᔪᐊᒥ ᑭᒡᓕᓕᐅᖅᑕᐅᓯᒪᔪᓂ.
3. ᓴᙱᔪᖅ, ᐊᐅᓚᑦᓯᒍᓐᓇᖅᑐᖅ, ᓯᐊᒻᒪᖅᓯᒪᔪᖅ ᐊᒻᒪᓗ ᐊᑕᖐᔪᖅ ᓄᓇᓕᐅᔪᒥᒃ ᐊᒻᒪᓗ ᐊᕕᑦᑐᖅᑕᐅᓯᒪᓂᖏᑎᒍᑦ ᓄᓇᐃᑦ ᑮᓇᐅᔭᓕᐅᕋᓱᐊᕐᓂᖏᑎᒍᑦ.
   • ᑐᕚᖃᕐᓂᖅ ᑖᒃᓱᒥᖓ ᓯᕗᓪᓕᐅᑎᔭᐅᒍᒪᔪᒥᒃ ᐱᕚᓪᓕᑎᓪᓗᒋᑦ ᐱᕕᒃᓴᖃᕐᕕᐅᒍᓐᓇᖅᑐᑦ ᓴᓇᔪᓕᕆᓂᕐᒧᑦ ᐊᒻᒪᓗ ᑮᓇᐅᔭᓕᐅᕈᑎᒋᓗᒍ.
4. ᖃᖃᐅᔨᒪᓂᖅ ᐊᒻᒪᓗ ᑐᕿᓯᐊᓂᖅ ᑐᑭᒧᐊᒃᑎᑦᓯᕘᒃ ᐃᓱᒪᓕᐅᕈᑕᐅᔪᖃᖅᑎᓪᓗᒍ ᑐᑭᑖᕈᑕᐅᓂᐊᖅᑐᒥᒃ.
   • ᑐᕚᖃᕐᓂᖅ ᑖᒃᓱᒥᖓ ᐃᑲᔪᖅᑐᐃᕗᖅ ᓄᓇᕐᔪᐊᒥ ᐅᑭᐅᖅᑕᖅᑐᓂ ᑭᓪᓕᓯᓂᐊᕐᓂᕐᒥᒃ ᐊᒻᒪᓗ ᖃᐅᔨᓴᖅᑐᓕᕆᓂᕐᒥᒃ ᑲᑐᔾᔨᖃᑎᒌᖕᓂᕐᒥᒃ ᑐᓴᖅᐸᒃᓱᑎᒃ ᖃᐅᔨᒪᓂᖃᖅᑐᓂ ᐱᖃᑕᐅᑎᑕᐅᖏᓐᓇᕐᓂᖓᓂ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓᑦ.
5. ᑲᓇᑕᒥ ᖁᑦᓯᑦᑐᖏᑕ ᐊᒻᒪᓗ ᐅᑭᐅᖅᑕᖅᑐᒥ ᐆᒪᓂᖃᖅᑐᑦ ᓇᔪᒐᕐᒥᓂᑦ ᐊᑦᑐᐊᖃᑎᒌᓐᓂᖏᑦ ᖃᓄᐃᙱᑦᑐᑦ ᐊᒻᒪᓗ ᐆᒻᒪᕆᑦᑐᑦ.
   • ᐊᒥᓱᑦ ᓯᕗᓪᓕᐅᑎᔭᕆᐊᓕᑦ ᐃᑲᔪᖅᑐᐃᔪᑦ ᑖᒃᓱᒥᖓ ᑐᕚᖑᔪᒥᒃ, ᐱᖃᓯᐅᑎᓪᓗᒋᑦ:
   • ᖁᕝᕙᕆᐊᕐᓗᒍ ᐊᒻᒪᓗ ᐊᑐᖅᑕᐅᑎᓪᓗᒍ ᑲᓇᑕᒥ ᐊᒻᒪᓗ ᓄᓇᕐᔪᐊᒥ ᐊᑐᙱᓂᖅᓴᐅᓂᖅ ᐳᔪᕐᓗᓕᐅᖅᑐᓂᑦ ᐳᔪᕐᓗᓂᒃ ᓯᓚᒨᖅᑲᐃᔪᓂᒃ ᐊᒻᒪᓗ ᐊᑯᓂᐅᖏᑦᑐᒥᒃ−ᐆᓚᓂᖃᖅᕋᐸᑦᑐᑦ ᓯᓚᒧᑦ ᓱᓱᕈᑕᐅᔪᑦ.
   • ᐊᑐᖅᑕᐅᑦᓯᐊᕐᓗᓂ ᐱᐅᖅᓱᐊᕐᓂᖅ, ᐊᑐᓕᖅᑎᑦᓯᑲᓐᓂᕐᓂᖅ ᐊᒻᒪᓗ ᐊᐅᓚᑦᓯᓂᖅ ᐊᑐᖅᑕᐅᓂᖏᓐᓂᒃ ᐆᒪᓂᖃᖅᑐᑦ ᓇᔪᒐᕐᒥᓂᑦ ᐊᑦᑐᐊᖃᑎᒌᓐᓂᖏᑦ ᐊᒻᒪᓗ ᐆᒪᔪᑦ.
   • ᐃᑲᔪᖅᑐᐃᓂᖅ ᐊᐅᓚᑦᓯᓂᕐᒥᑦ ᐊᑐᖅᑕᐅᓂᖏᑕ ᐆᒪᔪᑦ ᒥᒃᓵᓐᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ.
   • ᓇᖕᒥᓂᖃᖃᑎᖃᕐᓂᖅ ᓄᓇᓂᑦ ᐊᕕᑦᑐᖅᑕᐅᓯᒪᔪᓂ, ᑭᓪᓕᓕᐅᖅᑕᐅᓯᒪᔪᓂ ᐊᒻᒪᓗ ᓄᓇᖃᖅᑳᖅᓯᒪᔪᓂ. ᓄᓇᖃᖅᑳᖅᓯᒪᔪᑦ ᐃᓄᐃᑦ ᐃᓕᑕᖅᓯᖁᓪᓗᒋᑦ, ᐊᐅᓚᑦᓯᖁᓪᓗᒋᑦ ᐊᒻᒪᓗ ᐱᐅᖅᓱᐊᖁᓪᓗᒋᑦ ᐱᐅᓯᕐᒥᑎᒍᑦ ᐊᒻᒪᓗ ᐊᕙᑎᒥ ᑲᓴᒋᑦᓯᐊᕆᐊᓖᑦ.
   • ᑐᑭᒧᐊᑦᑎᑦᓯᓂᖅ ᑐᑭᓯᐅᒪᓗᒍ ᓯᓚᐅᑉ ᐊᓯᔾᔨᐸᓪᓕᐊᓂᖓᑕ ᐊᑦᑐᐃᓂᕐᓗᓂᖏᑦ ᐊᒻᒪᓗ ᐃᓕᑦᑐᓂᕐᒧᑦ ᐊᑐᕋᑦᓴᐅᔪᓐᓇᖅᑐᑦ ᓇᐅᑦᓯᑐᕐᓂᒃᑯᑦ ᐊᒻᒪᓗ ᖃᐅᔨᓴᕐᓂᒃᑯᑦ, ᐱᖃᓯᐅᑎᓗᒍ ᓄᓇᖃᖅᑳᖅᑎᓯᒪᔪᓄᑦ−ᓯᕗᓕᖅᑕᐅᓂᖅ ᐊᒻᒪᓗ ᓄᓇᓕᒻᒥᒃ−ᑐᙵᕕᖃᕐᓗᑎᒃ ᐱᓇᓱᐊᕐᓃᑦ.
   • ᐱᕚᓪᓕᑎᓪᓗᒍ ᐃᑲᔪᖅᑐᐃᓂᖅ ᓯᓚᒧᑦ ᐃᓕᑦᑐᐸᓪᓕᐊᓂᖅ ᐊᒻᒪᓗ ᐱᓇᓱᐊᖃᑎᒌᙱᓐᓂᕐᒧᑦ ᐱᓇᓱᐊᕐᓃᑦ.
   • ᐱᕚᓪᓕᑎᓪᓗᒍ ᑐᑭᓯᐅᒪᖃᑎᒌᓐᓂᖅ ᐊᑦᑐᖅᑕᐅᒍᓐᓇᕐᓂᖏᓐᓂᒃ ᐆᒪᓂᖃᖅᑐᑦ ᓇᔪᒐᕐᒥᓂᑦ ᐊᑦᑐᐊᖃᑎᒌᓐᓂᖏᑦ ᐊᒻᒪᓗ ᐊᔾᔨᒌᙱᑦᑐᑦ ᐆᒪᓂᓖᑦ ᐊᒻᒪᓗ ᐊᑦᑐᐃᓂᐅᔪᑦ ᐊᕙᑎᐅᑉ ᐊᓯᔾᔨᕐᓂᖓᓄᑦ.
   • ᖃᐅᔨᒪᒋᐊᑦᓯᐊᕐᓗᒍ ᐊᑦᑕᓇᑦᑕᐃᓕᒪᓂᖅ ᐊᒻᒪᓗ ᐊᕙᑎᒥᒃ−ᑲᒪᑦᓯᐊᕆᐊᖃᕐᓂᖅ ᐅᓯᑲᑦᑕᓂᕐᓂ.
   • ᓇᙱᑦᓯᒋᐊᕐᓗᒍ ᓱᕈᕐᓇᖅᑐᖃᑦᑕᐃᓕᓂᕐᒧᑦ ᐱᓇᓱᐊᕐᓂᖅ ᐊᒻᒪᓗ ᓄᖑᑉᐹᓪᓕᑎᓪᓗᒍ ᓄᓇᐃᑦ ᐊᕕᑦᑐᖅᑕᐅᓯᒪᓂᖏᑎᒍᑦ, ᑲᓇᑕᒥ, ᐊᒻᒪᓗ ᓄᓇᕐᔪᐊᒥ.
6. ᓴᐃᒻᒪᖃᑎᒌᙱᓐᓂᕐᒥᒃ ᐃᑲᔪᖅᑐᐃᓂᖅ ᓇᖕᒥᓂᖅ−ᐱᓇᓱᐊᕐᓂᐅᕗᖅ ᐊᒻᒪᓗ ᐆᒻᒪᕆᑦᑎᓯᓪᓗᓂ ᐃᖅᑲᒌᖃᑦᑕᐅᑎᓂᒃᑯᑦ ᐱᓕᕆᖃᑎᒌᓐᓂᕐᓂᒃ ᑖᒃᑯᓄᖓ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᓄᓇᖃᖅᑳᖅᓯᒪᙱᑦᑐᓄᑦ−ᐃᓅᖃᑎᒌᓄᑦ.
   • ᐱᓪᔪᑎᓪᓚᕆᐊ ᑖᒃᓱᒪ ᓯᕗᓪᓕᐅᑎᔭᐅᔪᒪᔫᑉ ᐃᑲᔪᖅᑐᖅᓱᒍ ᑐᕚᖃᕐᓂᖅ ᐅᑎᖅᑎᑦᓯᓂᕐᒥᒃ, ᐆᒻᒪᕆᑦᓯᒋᐊᕆᓂᕐᒥᒃ, ᐸᐸᑖᖃᕐᓂᕐᒥᒃ ᐊᑐᕐᓗᒍᓗ ᐊᒻᒪᓗ ᓇᙱᑦᓯᒋᐊᕐᓗᒋᑦ ᐱᖅᑯᓯᕆᔭᐅᔪᑦ ᖁᑦᓯᑦᑐᓂ ᐊᒻᒪᓗ ᐅᑭᐅᖅᑕᖅᑐᑦ ᓄᓇᖃᖅᑳᖅᓯᒪᔪᑦ ᐃᓄᖏᓐᓂ, ᐱᖃᓯᐅᑎᓗᒋᑦ ᐅᖃᐅᓲᓰᑦ ᐊᒻᒪᓗ ᖃᐅᔨᒪᓕᑕᐃᑦ.

ᓄᓇᕐᔪᐊᒥᐅᖃᑎᒌᑦ ᐱᒋᐊᕐᓂᖓᑕ ᐃᑭᐊᖅᑭᕕᖓ ᐅᕙᓃᑦᑐᖅ:

(ᖃᓪᓗᓈᑎᑐᑦ) https://www.rcaanc-cirnac.gc.ca/eng/1562867415721/1562867459588

(ᐃᓄᒃᑎᑑᖅᑐᑦ ᖃᓂᐅᔮᖅᐸᐃᑦ) https://www.rcaanc-cirnac.gc.ca/iku/1562867415721/1562867459588

ᑲᓇᑕᐅᑉ ᖁᑦᓯᑦᑐᖏᓐᓄᑦ ᐊᒻᒪᓗ ᐅᑭᐅᖅᑲᖅᑐᖏᓐᓄᑦ ᐊᑐᐊᒐᐅᑉ ᑎᑎᕋᖅᓯᒪᓂᖓᑕ ᐃᑭᐊᖅᑭᕕᖓ ᐅᕙᓃᑦᑐᖅ:

(ᖃᓪᓗᓈᑎᑐᑦ) https://www.rcaanc-cirnac.gc.ca/eng/1560523306861/1560523330587#s6