ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᖁᕕᐊᒋᔭᖃᖅᑐᖅ ᒐᕙᒪᒃᑯᖏᓐᓂ ᑲᓇᑕᐅᑉ ᐱᒋᐊᖅᓯᓚᐅᖅᓯᒪᙱᓐᓂ ᒪᓕᒐᕐᓂᑦ ᐊᑐᓕᖅᑎᑕᐅᒋᐊᖃᕐᓂᖓᓐᓂ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᑕᐅᓯᒪᔪᒥᑦ ᑕᒪᑐᒥᖓ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓃᑦ

ᑎᓯᐱᕆᒥ 8, 2020 – ᐋᓐᑯᕆᑦᔅ, ᐊᓛᔅᑲ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᖁᕕᐊᒋᔭᖃᖅᑐᑦ ᐱᒋᐊᖅᓯᒪᓂᖏᓐᓂ ᑲᓇᑕᐅᑉ ᒐᕙᒪᒃᑯᖏᑦ ᓴᖅᑮᓪᓗᑎᑦ ᒪᓕᒐᕐᓂᑦ ᑲᓇᑕᐅᑉ ᒪᓕᒐᓕᐅᕐᕕᔾᔪᐊᖓᓐᓄᑦ ᑎᓯᐱᕆ 3−ᖑᑎᓪᓗᒍ ᐊᑐᓕᖅᑐᑕᐅᓂᐊᕐᓂᖓᓐᓂ ᓯᓚᕐᔪᐊᑉ ᑲᑐᔾᔨᖃᑎᒌᖏᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖓᑦᑕ ᓄᓇᖃᖅᑳᖅᑐᒥᓃᑦ  ᑲᓇᑕᒥ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ ᑕᓖ ᓴᒻᐳ ᑐᕈ ᐅᖃᖅᓯᒪᔪᖅ “ᐱᓕᕆᖃᑕᐅᖃᑦᑕᖅᓯᒪᓂᖏᑦ ᐅᑭᐅᒐᓵᓗᓐᓄᑦ ᖁᓕᐅᓗᐊᖅᑐᓄᑦ ᐋᖅᑭᔅᓱᐃᖃᑕᐅᖃᑦᑕᕐᓂᖏᓐᓄᑦ ᐃᓄᓐᓄᑦ ᐱᔪᓐᓇᐅᑎᓂᒃ ᓇᓗᓇᐃᖅᑕᐅᓯᒪᔪᓂᒃ ᓯᓚᕐᔪᐊᑉ ᑲᑐᔾᔨᖃᑎᒌᖏᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖓᑦᑕ ᓄᓇᖃᖅᑳᖅᑐᒥᓃᑦ, ᖁᕕᐊᒋᔭᐅᑦᑎᐊᖅᑐᑦ ᑕᒪᓐᓇ ᐱᕙᓪᓕᐊᔪᖅ ᐃᓄᐃᑦ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓴᖅᑮᓯᒪᔪᑦ ᐋᖅᑭᓱᖅᓯᒪᔪᓂᒃ ᐱᔪᓐᓇᐅᑎᖏᓐᓂ ᐃᓄᓐᓄᑦ ᒐᕙᒪᒃᑯᓐᓂᓪᓗ ᐅᖃᐅᓯᐅᓯᒪᓪᓗᑎᑦ ᓇᒥᑐᐃᓐᓇᖅ ᓯᓚᕐᔪᐊᒥ. ᑖᓐᓇ ᐊᔾᔨᐅᓐᖏᑦᑐᖅ, ᑐᓐᖓᕕᐅᔪᖅ ᑲᔪᓯᑎᑦᑎᑲᓐᓂᖅᑐᑎᑦ ᑐᕌᒐᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ, ᐱᒋᐊᖅᑎᑕᐅᓯᒪᔪᖅ ᒪᓕᔅᓴᖁᓪᓗᒋᓪᓗ ᓯᓚᕐᔪᐊᒦᑦᑐᑦ, ᑕᐃᑲᓂᐊᓗᒃ 1977−ᒥ, ᐃᐸᓐ ᕼᐊᑉᓴᓐ, ᐊᖏᔪᑦᑎ ᓇᓗᓇᐃᔭᓚᐅᖅᓯᒪᒻᒪᒋᑦ ᐊᖏᕈᑎᑕᖃᕆᐊᖃᕐᓂᖏᓐᓂ ᒐᕙᒪᒃᑯᑦ ᐊᑕᐅᓯᐅᓗᑎᑦ ᐱᔪᓐᓇᐅᑎᑦᑎᓐᓄᑦ ᑲᒪᓗᑎᑦ ᐊᒻᒪᓗ ᒫᓐᓇᐅᔪᖅ ᐱᒻᒪᕆᐅᓕᖅᑎᓪᓗᒍ, ᐃᓱᒪᒋᔭᐅᒋᐊᖃᓪᓚᕆᒻᒪᑦ ᒪᓕᒐᔅᓴᐅᔪᖅ ᐊᑐᓕᖅᑎᑕᐅᓪᓚᕆᓪᓗᓂ ᐊᐅᓚᑦᑎᒍᑎᒋᓕᕐᓗᑎᒍᓪᓘᓐᓃᑦ ᓲᕐᓗ ᐱᔪᓐᓇᐅᑎᖏᓐᓂ ᑲᓇᑕᒥ. ᐃᓕᓴᖅᓯᓯᒪᒐᑦᑕ ᐃᓄᐃᑦ ᐱᔪᓐᓇᐅᑎᖏᑦ ᑐᓐᖓᕕᐅᕙᒻᒪᑕ ᑭᓱᓕᒫᑦᑎᐊᕐᓄᑦ ᐊᑐᖅᑕᖏᓐᓂ ᐊᒻᒪᓗ ᒐᕙᒪᒃᑯᑦ ᐊᓯᖏᓪᓗ ᐱᒋᐊᖅᓯᒪᔪᑦ ᐃᓕᓴᖅᓯᓯᒪᒻᒪ ᑕᒪᒃᑯᓂᖓ ᐱᔪᓐᓇᐅᑎᑦᑎᓐᓂ ᑎᒍᔭᐅᑦᑎᐊᖁᓪᓗᒋᓪᓗ. ᑕᒪᓐᓇ ᓱᓕᑦᑎᐊᖅᑐᖅ ᐱᔪᓐᓇᐅᑎᕗᑦ ᓇᒻᒥᓂᕐᓗ ᐱᔪᒪᓂᑦᑎᓐᓂ ᐃᓕᓴᕆᔭᐅᓯᒪᓪᓗᓂᓗ ᑲᒪᒋᖃᑦᑕᕐᓗᒋᑦ ᐊᑐᕐᓗᑎᓪᓗ ᖁᕕᐊᒋᓗᒋᓪᓗ ᐃᓄᑦᑎᓐᓂ ᐱᔪᓐᓇᐅᑎᖃᕐᓂᑎᓐᓂ. ᑕᑯᔪᒪᑦᑎᐊᖅᑯᖓᓪᓕ ᑕᒪᓐᓇ ᒪᓕᒐᔅᓴᖅ “ᑲᔪᓯᑎᑕᐅᓗᑎᑦ ᐊᖏᖅᑕᐅᓗᓂᓗ ᐊᖏᔪᖅᑳᖑᓂᖅᓴᒻᒪᕆᓐᓄᑦ ᑕᕝᕙᑦᑕᐅᑎᒋᐸᓗᒃ.”

ᓇᐃᓪᓕᑎᖅᓯᒪᔪᒥᑦ ᐅᓂᒃᑳᕐᒥᑦ ᒪᓕᒐᔅᓴᒥᑦ C-15 ᐃᒫᒃ ᑎᑎᕋᖅᓯᒪᒻᒪᑦ: “ᑕᒪᓇ ᐱᒋᐊᖅᑎᑕᐅᓂᖓᓐᓄᑦ ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᔭᕆᐊᖃᖅᑐᑦ ᒪᓕᒐᖅᑎᒍᑦ ᑲᓇᑕᒥ ᒪᓕᓪᓗᑎᑦ ᐅᑯᓂᖓ ᓯᓚᕐᔪᐊᑉ ᑲᑐᔾᔨᖃᑎᒌᖏᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖓᑦᑕ ᓄᓇᖃᖅᑳᖅᑐᒥᓃᑦ, ᑎᑎᕋᕐᓗᑎᓪᓗ ᐊᑐᓕᖅᑎᑦᑎᓗᑎᓪᓗ ᐱᒋᐊᕈᑎᓂᒃ ᐸᕐᓇᐅᑎᓂᒃ ᑲᔪᓯᖁᓪᓗᒋᑦ ᐱᓕᕆᐊᖑᓂᐊᖅᑐᑦ ᓇᓗᓇᐃᖅᑕᐅᓯᒪᓂᖏᑦ.” 

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐊᖏᔪᖅᑳᖅ ᒫᓂᑲ ᐊᐅᓪ-ᑲᓇᔪᖅ ᐅᖃᓚᐅᖅᑐᖅ, “ᐅᑉᐱᕆᑦᑎᐊᕋᑦᑎᒍ ᐃᓄᐃᑦ ᑕᐃᕇᑦ ᑲᓇᑕᒥ ᐱᓕᕆᖃᑎᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᓐᓂ ᐋᖅᑭᔅᓱᐃᓇᓱᐊᒃᑲᓂᖅᑐᑎᑦ ᒪᓕᒐᔅᓴᓂᒃ. ᐃᓕᓴᕆᔭᕗᑦ ᑕᒪᒃᑯᐊ ᐱᓕᕆᐊᖏᓐᓂ ᐊᔅᓱᕉᑎᖃᕐᖓᑕ ᒪᓕᒐᔅᓴᒧᑦ C-15−ᒧ ᒪᓕᒐᖅᑎᒍᑦ ᐊᖅᑯᑎᖃᕆᐊᖃᓛᕐᒥᒻᒪᑦ ᒪᓕᒐᓕᐅᕐᕕᔾᔪᐊᕐᒥ ᐊᒻᒪᓗ ᐊᖏᔪᖅᑳᒻᒪᕆᓐᓅᕐᒥᓗᓂ. ᐃᑲᔪᖅᑐᐃᑦᑎᐊᖅᑐᒍᑦ ᐅᖃᐅᓯᒃᑯᑦ ᒪᓕᒐᓕᐅᖅᑎᒻᒪᕆᓐᓂᒃ ᑕᒪᑐᒥᖓ ᐱᓕᕆᐊᖑᔪᒥᑦ ᐊᔅᓱᕉᑕᐅᖃᑦᑕᖅᓯᒪᔪᒥᑦ ᐸᖅᑭᔭᐅᖁᓪᓗᒋᑦ ᐃᓄᐃᑦ ᐱᔪᓐᓇᐅᑎᖏᑦ ᓄᓇᖃᖅᑳᖅᑐᒥᓃᑦ. ᐱᕙᓪᓕᐊᔪᑦ ᑕᒪᒃᑯᐊ ᑲᓇᑕᐅᑉ ᒐᕙᒪᒃᑯᖏᑦ ᑕᒪᑐᒥᖓ, ᐅᑉᐱᕆᔭᖃᕋᑦᑕ, ᐃᑲᔫᑎᖃᕐᓂᐊᕐᖓᑕ ᐱᐅᔪᒃᑯᑦ ᒪᓕᒐᐃᑦ ᐱᒋᐊᕈᑕᐅᔪᑦ ᐃᓄᓐᓄᑦ ᐊᓯᖏᓐᓄᓪᓗ ᓇᒥᑐᐃᓐᓇᖅ ᓯᓚᕐᔪᐊᒥ.”