ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏ ᒥᓂᔅᑕᐅᑎᑦ ᐅᖃᐅᓯᒃᓴᖏᑦ
ᐅᓂᒃᑳᖏᑦ ᔨᒥ ᓯᑖᑦᔅ, ᐊᖓᔪᖅᑳᖓᑦ ICC−ᑯᑦ (ᐊᓛᔅᑲ) 20 ᒪᐃ 2021 ᕋᒃᔭᕕᒃ, ᐊᐃᔅᓚᓐ
ᐊᖓᔪᖅᑲᐅᑎᑦ, ᐃᖅᑲᓇᐃᔭᖃᑎᑦ, ᐱᖃᑏᓪᓗ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏ (ICC−ᑯᑦ) ᖁᕕᐊᓱᑉᐳᑦ ᐃᓚᒋᔭᐅᒋᑦᓴᖅ ᖁᕕᐊᓲᑕᐅᑎᓪᓗᒍ ᐊᕙᑎᑦ ᑕᓪᓕᒪᓪᓗᓂᑦ ᑲᑎᒪᔨᐅᓕᕐᓂᖏᑕ ᐅᑭᐅᖅᑕᖅᑐᒧᑦ ᑲᑎᒪᔩᑦ. ᐊᒥᓲᓂᖅᓴᐅᖁᓇᓚᐅᖅᑑᒐᓗᐊᑦ ᐅᕙᓃᑦᑐᑦ, ᑭᓯᐊᓂ ᐊᔪᕐᓇᕐᒪᑦ ᓄᕙᒡᓇᕐᔪᐊᖅ-19−ᒧᑦ ᖃᓂᒪᓐᓇᐅᓂᖓᓄᑦ.
ᑕᐃᒃᑯᐊ ᐃᓄᐃᑦ ᐱᖃᑕᐅᖃᑦᑕᖅᓯᒪᔪᑦ ᑕᒪᒃᓱᒪᓂ ᐱᓇᓱᐊᕐᓂᒥᒃ ᐅᖓᑖᓄᑦ 25 ᐊᕐᕌᒍᐃᑦ ᐅᐱᒋᔭᒃᓴᖃᒻᒪᕆᑉᐳᑦ. ᐱᖓᓲᔪᖅᑐᑦ ᐱᓕᕆᖃᑎᒌᑦᑐᑦ ᐃᖅᑲᓇᐃᔭᖃᑎᒌᑦ, ᐊᒥᓱᑦ ᐊᔾᔨᒌᖏᑦᑐᑦ ᐃᖅᑲᓇᐃᔭᕐᕕᐅᔪᑦ, ᐊᔾᔨᒌᖏᑐᓂᓪᓗ ᖃᐅᔨᒪᓂᖃᐅᖅᑐᑦ ᑲᔪᓯᑎᑦᓯᑦᓯᐊᖅᓯᒪᒻᒪᑕ ᑎᒥᐅᔪᒥᑦ ᐱᒋᐊᓚᐅᖅᓯᒪᒻᒪᑕ ᑕᐃᒪᖓᑦ ᑲᑎᒪᔩᑦ ᐱᒋᐊᖅᑎᑕᐅᓪᓗᑎᒃ 1996−ᒥ, ᐋᑐᐊᒥ. ᓇᓴᐃᕐᕕᒋᕙᕗᑦ ᐅᐱᒋᓪᓗᒋᑦ ᐊᒥᓱᑦ ᐊᖓᔪᖅᑲᐅᑎᑦ ᐅᑭᐅᖅᑕᖅᑐᒧᑦ ᐱᓕᕆᔪᑦ ᐊᒻᒪᓗ ᐱᖃᑕᐅᖏᓐᓇᕐᕕᖃᖅᓱᑎᒃ ᐱᖃᑕᐅᕙᑦᑐᑦ ᐊᔭᐅᖅᑐᐃᓪᓗᑎᒃ ᐊᑐᐊᒐᑦᓴᓂᑦ ᐊᑐᓕᖁᔭᐅᔪᓂᑦ ᓴᕝᕙᖅᐸᑦᓱᒋᑦ ᐊᑐᓕᖅᑎᑕᐅᓂᐊᕐᒪᑕ ᒥᓂᔅᑕᐅᔪᓄᑦ ᓯᑕᒪᐅᔪᖏᒐᖅᑐᓂ ᐅᑭᐅᖅ ᑕᖅᑐᒥ ᓄᓇᓕᕐᔪᐊᓂᑦ ᐅᖓᑖᓄᑦ ᐊᕐᕌᖑᑦ ᐊᕙᑎᑲᓴᐃᑦ ᐊᓂᒍᖅᑐᓂ.
ICC−ᑯᑦ ᖁᕕᐊᓱᑉᐳᑦ ᓇᓗᓇᐃᖅᓯᒋᒃᓴᖅ ᐊᖅᑯᓯᐅᖅᑕᐅᓂᖓᓂᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᑐᑭᒧᐊᒍᑎᖓᓄᑦ ᐸᕐᓇᐅᑦ ᐊᑯᓂᐊᓗᐊᖅᑐᖅ ᐱᓕᕆᐊᖑᓇᓵᖅᑐᒥᓂᖅ. ᐊᐃᒡᓚᓐᑯᑦ ᐃᒃᓯᕙᐅᑕᐅᓂᖓᑦ ᖁᕕᐊᒋᔭᐅᔭᕆᐊᖃᖅᐳᖅ ᐱᓇᓱᐊᖅᓯᒪᓂᖏᑦ ᐱᓪᓗᒋᑦ ᐊᔭᐅᕆᓂᕐᒧᑦ ᑕᒪᒃᓱᒥᖓ ᑐᑭᒧᐊᒍᑎᒧᑦ ᐸᕐᓇᐅᑎᒧᑦ ᐃᖅᑲᓇᐃᖅᑕᐅᓂᖓᓄᑦ.
ᓄᖅᑲᐅᒥᑲᐃᓐᓇᕈᑎᖃᓚᐅᖅᓱᑎᒃ, ᑲᑎᒪᔩᑦ ᐅᑎᒃᑲᓂᖅᓯᒪᓕᕐᒥᔪᑦ ᑐᕌᖅᑕᒥᓄᑦ ᓇᓕᒧᒌᑎᑦᓯᒐᓱᐊᕐᓂᕐᒥᑦ ᐊᑐᕈᓐᓇᖅᑐᑎᒍᑦ ᐱᕙᓪᓕᐊᓂᕐᒥᑦ ᓴᐳᑎᔭᐅᔭᕆᐊᖃᕐᓂᖓᓂᓗ ᐊᕙᑎᐅᑉ. ᐅᖃᓕᒪᔪᔪᖓ ᑖᒃᑯᓅᖓ ᒪᕐᕉᓐᓄᑦ ᑎᒥᖁᑕᐅᔫᓐᓄᑦ ᐊᕐᕌᒎᒃ ᒪᕐᕉᒃ ᐊᓂᒍᖅᑑᓐᓂ ᕈᕙᓂᒥ ᑭᖒᓴᔭᐅᓂᖓᑕ ᓇᓕᒧᒌᒋᐊᖃᕐᓂᐅᑉ ᐱᓪᓗᒍ.. ICC−ᑯᑦ ᓱᓕᔪᖅᓴᖅᑐᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᓱᓕ ᖃᐅᔨᒐᓱᐊᕐᒪᑕ ᓇᓕᒧᒌᒋᐊᓕᒻᒥᒃ. ᖁᔭᓇᖅᐳᖅ, ᓄᓇᕐᔪᐊᒥ ᓯᓚᐅᑉ ᐊᓯᔾᔨᕐᓂᖓ ᑲᑎᒪᔾᔪᑎᒃᓴᓅᒃᑲᓂᕐᓂᖓ.
ᐃᓄᐃᑦ ᐃᓱᒫᓘᑎᖃᖅᐳᑦ ᓄᖑᑎᕆᓂᕐᒥᒃ ᐃᒪᕐᒥᐅᑕᓂᒃ ᓴᐳᔾᔭᐅᓯᒪᔪᓂᒃ ᐃᓂᓂᒃ. ᐃᓚᐅᔭᕆᐊᖃᖅᐳᒍᑦ ᐸᕐᓇᐃᑎᓪᓗᑕ, ᓴᖅᑭᑦᑎᓗᑕ ᐊᒻᒪ ᐊᐅᓚᑦᑎᓗᑕ ᑕᐃᒃᑯᓂᖓ ᓴᐳᔾᔭᐅᓯᒪᔪᓂᒃ ᓄᓇᓂᒃ ᖃᓂᒋᔭᖏᓐᓂᒃ ᐅᕝᕙᓘᓐᓃᑦ ᓄᓇᒋᔭᑦᑕ ᖃᓂᒋᔮᓂ. ᐃᓄᐃᑦ ᐊᑐᕈᒪᔪᑦ ᐃᓅᓯᕐᒥᓐᓂ ᐊᑐᖅᐸᑦᑕᒥᓐᓂᑦ. ᓇᓂᔭᕆᐊᖃᖅᐳᖅ ᓇᓕᒧᒌᑎᑕᐅᓂᖅ ᑕᒪᒃᑯᑎᒎᓇ ᐱᕙᓪᓕᐊᑎᑦᓯᓂᒃᑯᑦ ᐱᐅᖅᓱᐊᓂᒃᑯᓪᓗ. ᐃᖅᑲᒋᔭᖃᕆᐊᖃᕐᓂᕐᓗ ᐊᓯᑦᑕ ᐱᖅᑯᓯᖏᓐᓂᑦ ᐊᔾᔨᒌᖏᑕᖏᓐᓂᑦ ᐃᓱᒪᒋᔭᓖᑦ ᓯᕗᓪᓕᐅᑎᔭᖏᓪᓗ ᐊᔾᔨᒋᖏᑦᓱᓂᖏᑦ.
ᐃᓄᐃᑦ ᐃᓱᒫᓘᑎᖃᕐᒪᑕ ᓯᐊᒻᒪᐃᕕᐅᕙᓪᓕᐊᓂᖏᓐᓂᑦ ᑕᕆᐅᕐᒥᐊᑕᐃᑦ ᓴᐳᑎᔭᐅᓯᒪᔪᑦ. ᐱᖃᑕᐅᑎᑕᐅᖃᑦᑕᕆᐊᖃᖅᑐᒍᑦ ᐸᕐᓇᐅᔾᔨᔪᓂ, ᓴᖅᑭᑎᑦᓯᔪᓂ ᐊᒻᒪᓗ ᐊᐅᓚᑕᐅᓂᖏᓐᓂᑦ ᑕᐃᒃᑯᐊ ᓴᐳᑎᔭᐅᓯᒪᔪᑦ ᓄᓇᑦᑎᓐᓂ ᐊᖏᕐᕋᖃᕐᕕᕗᑦ. ᐊᖏᖅᑕᐅᓯᒪᒋᐊᖃᖅᑐᒍᑦ ᑕᒪᒃᑯᓄᖓ ᓴᐳᑎᔭᐅᓯᒪᔪᓄᑦ ᐃᓅᓯᖃᕐᕕᒋᓗᒋᓪᓗ ᐊᑐᖅᑕᑎᓐᓂᑦ ᑕᐃᒃᑯᐊ ᐊᑐᕋᑦᓴᑦ ᓄᓇᒥ ᓂᕿᒋᔭᕗᑦ ᐱᖅᑯᓯᑦᑎᓐᓄᓗ ᐊᓐᓇᐅᒪᒍᑏᑦ. ᐊᕕᑎᑕᐅᔾᔮᖏᓐᓇᑦᑕ ᓂᕿᑦᑎᓐᓂᑦ ᐱᖅᑯᓯᑎᓐᓂᓪᓗ.
ᐃᓱᒫᓘᑎᖃᕐᒥᔪᒍᑦᑕᐅᖅ ᐱᓇᓱᐊᕐᓂᒥᓂᕐᓂᑦ ᑭᓪᓕᖃᖅᑎᑦᓯᒐᔭᖅᑐᓂᑦ ᐊᖑᓇᓱᐊᕈᓐᓇᓂᑦᑎᓐᓂᑦ ᓂᕿᑦᓴᒥᒃ ᓂᕆᒃᑲᐃᒍᑎᑦᓴᑎᓐᓂᑦ ᐃᓚᔮᑦᑎᓐᓂᒃ. ᑭᑭᑕᐅᔾᔮᖏᓇᑦᑕ ᐅᖃᖃᑎᒌᒍᑕᐅᔪᓄᑦ ᑐᑭᑖᕈᑕᐅᕙᑦᑐᓄᓪᓗ ᖃᓄᖅ ᓂᕿᑦᓴᕗᑦ ᓇᐅᑦᓯᑐᖅᑕᐅᒋᐊᖃᕐᒪᖔᑕ ᐊᐅᓚᑕᐅᓗᑎᓪᓗ. ᐱᖃᑕᐅᑎᑕᐅᔭᕆᐊᖃᕐᓂᖅᐸᐅᔪᒍᑦ ᓇᓕᐊᓐᓂ ᐅᑭᐅᖅᑕᖅᑐᒥ ᐆᒪᔪᓕᕆᓂᕐᒥ ᐊᐅᓚᑦᓯᓂᐅᒐᓱᐊᖅᑐᓄᑦ ᓴᖅᑭᖅᑕᐅᑐᐃᓐᓇᕆᐊᓕᓐᓄᑦ. ᐊᖏᕈᑎᖃᔾᔮᙱᓇᑦᑕ ᐱᖅᑯᓯᕗᑦ ᐊᑐᖅᑎᑕᐅᑎᓐᓇᒍ. ᑕᒪᑐᒧᖓ ᐊᖏᖃᑎᒌᒍᑎᑕᖃᕆᐊᖃᖏᑦᑐᖅ.
ᑲᔪᙱᖅᓴᓪᓚᕆᑉᐸᕗᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐱᖃᑕᐅᖁᓪᓗᒋᑦ ᐃᓄᖕᓄᑦ ᐱᕙᓪᓕᐊᑎᑕᐅᑎᓪᓗᒍ ᐊᑐᐊᒐᒃᓴᑦ ᐊᑐᓕᖁᔭᓕᐊᖑᓯᒪᔪᑦ ᐅᖃᐅᓯᓖᑦ ᑕᒪᒃᑯᓂᖓ ᐃᓱᓛᓗᒋᔭᑦᑎᓐᓂᑦ ᒪᕐᕉᓐᓂᒃ ᐃᓱᓛᓘᑕᐅᔫᓂ. ᓴᒻᒥᕙᕗᑦ ᑕᐃᒃᑯᐊ ᑎᒥᖁᑕᐅᔪᑦ ᐃᓱᒫᓘᑎᓖᑦ ᐊᕙᑎᐅᑉ ᐱᐅᖅᓱᐊᖅᑕᐅᒋᐊᖃᕐᓂᖓᓂᒃ ᐊᒻᒪᓗ ᐆᒪᔪᓐᓇᕐᕕᐅᔪᑦ ᐃᓕᑕᕆᔭᐅᓗᑎᒃ ᐱᔪᓐᓇᐅᑎᖏᑦ ᐅᑭᐅᖅᑕᖅᑐᒥ ᓯᕗᓪᓖᑦ ᐃᓄᖏᑦ ᐱᖅᑯᓯᕐᒥᒍᓪᓗ ᐊᓐᓇᒋᐊᓖᑦ. ᖃᐅᔨᒪᔪᑎᑦ ᑭᓇᐅᒻᒪᖔᖅᐱᑦ, ᐱᔭᕆᐊᖃᕈᑕᓗ, ᑕᐃᒍᕋᔭᖅᑲᑦᑎᒋᑦ.
ICC−ᑯᑦ ᑲᔪᖏᖅᓴᐃᕗᑦ ᖃᐅᔨᒪᔭᐅᑦᓯᐊᕆᐊᖁᓪᓗᒍ ᓯᕗᓪᓕᖅᐹᖅ ᑲᑎᒪᔾᔪᑎᒥᓂᖅ ᕋᐃᒃᔭᕕᖕᒥ ᐊᖏᖃᑎᒌᒍᑎᒦᑦᑐᒥᑦ ᐃᒪᐃᓕᖓᔪᖅ “ᐃᓄᐃᑦ ᐊᒻᒪᓗ ᓄᓇᓖᑦ ᐅᑭᐅᖅᑕᖅᑐᒥᐅᑕᑦ”. ᑕᒪᓐᓇ ᐱᑐᐃᓐᓇᓂᖏᑦᑐᖅ, ᐱᔪᒐᑦᓴᐃᔪᖃᖅᑐᒥᓂᖅ ᑕᒪᒃᑯᐊ ᑲᑎᒪᔾᔪᑕᐅᑎᓪᓗᒋᑦ ᐋᔩᖃᑎᒌᒍᑕᐅᓂᖓᓂ ᐊᖏᖃᑎᒌᒍᑦ. ᐅᖃᖃᑎᒌᒍᑕᐅᓪᓗᐊᑕᖅᓱᓂ ᐱᕙᓪᓕᐊᑎᑦᓯᓂᖅ ᐱᐅᖅᓱᐊᕆᐊᖃᕐᓂᓘᓐᓃᑦ ᓯᕗᓪᓕᐅᔭᕆᐊᖃᕐᒪᖔᑦ. ᖁᕕᐊᓱᑉᐳᒍᑦ ᐅᑭᐅᖅᑕᖅᑐᒥ ᐃᓄᐃᑦ ᓄᓇᓖᓪᓗ ᓯᕗᓪᓕᑎᑕᐅᒻᒪᑕ ᑕᒪᑐᒪᓂ. ᓱᓕᔪᕆᔭᕗᑦ ᑕᒪᓐᓇ ᑕᐃᒪᐃᓕᖓᔭᕆᐊᖃᕐᓂᖓᓂᒃ.
ᐅᑉᐱᕆᒐᑦᑎᒍ ᐃᓄᐃᑦ ᐃᓅᓯᖃᕆᐊᓖᑦ ᐃᓗᒥᓐᓂᑦ ᐱᒋᐊᖅᑐᒥᒃ, ᐱᓕᕆᖃᑎᖃᕐᓗᓂᓗ, ᓄᓇᒥᑦ. ᑕᑯᓐᓇᖅᑕᕗᑦ ᐃᓛᓐᓂᒃᑯᑦ ᐊᐳᕈᑎᖃᖃᑦᑕᕐᒪᑦ ᑕᑯᓐᓇᖅᑕᖏᓐᓂᑦ ᓵᓚᖃᖅᓯᒪᔫᑉ ᐃᓅᓇᓱᐊᕐᓂᐅᑉ ᓱᓕᔪᖅᓴᓂᓕᒻᒥᒃ ᐃᓄᒃ ᐊᐅᓚᑦᓯᒍᓐᓇᕐᓂᖓᓂᒃ ᓄᓇᒥᑦ. ᑕᐃᒪᐃᓕᖓᓂᕐᒧᑦ ᐊᑐᖅᑕᐅᔪᑦ ᐅᓗᕆᐊᓇᖅᑑᖃᑦᑕᖅᓯᒪᔪᑦ ᐅᑭᐅᖅᑕᖅᑐᒧᑦ ᓄᓇᕐᔪᐊᒧᓪᓗ. ᐊᓯᐊᓂᒃ ᑕᐅᑐᓐᓂᖃᖅᑐᒍᑦ, ᐊᔾᔨᒋᖏᑕᖓᓂᒃ ᐃᓱᒪᒋᔭᖃᖅᑐᒍᑦ ᐊᑑᑎᖃᑦᓯᐊᓂᐊᖅᑐᒥᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐊᓂᒍᖅᑎᑦᓯᐊᕈᒪᔭᖓᓂᑦ.
ᐱᖃᑕᐅᔪᑦ ᐊᑕᐅᓯᕐᒥᒃ ᐸᐸᑦᓯᒻᒪᑕ, ᓴᖑᑦᓯᓂᖅ ᐊᓯᖏᓪᓗᓂᐅᒃ. ᐱᖃᑕᐅᓂᖅ ᐊᑑᑎᖃᖏᑦᑐᖅ ᓈᓚᑦᑐᖃᙱᑉᐸᑦ ᐃᓱᒫᓗᑎᒋᔭᕗᓪᓗ ᐃᑉᐱᒋᔭᐅᖏᑦᑐᑦ ᐃᑉᐱᒋᔭᐅᒋᐊᖃᖅᑐᕆᔭᕗᑦ. ᒫᓐᓇᐅᔪᒥ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐃᓱᒫᓗᓐᓇᖅᓯᓯᒪᒻᒪᑕ ᐅᕙᑦᑎᓐᓄᑦ. ᑐᑭᖓ ᐊᑑᑎᓕᒻᒥᒃ ᐱᖃᑕᐅᑎᑕᐅᓂᐅᑉ ᐊᔾᔨᒋᖏᑕᖓᓂᑦ ᑐᑭᖃᕐᒪᑦ ᐅᑭᐅᖅᑕᖅᑐᖅ ᑕᐃᔭᐃᓂᖓᑕ ᐱᖃᑕᐅᖏᓐᓇᖅᑐᓄᑦ ᐱᖃᑕᐅᔪᑦ ᑕᐃᒪᐃᓕᖓᑎᓪᓗᒋᑦ.
ICC−ᑯᑦ ᑕᑯᒍᒪᔪᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐅᖃᐅᓯᖃᖅᑎᓪᓗᒋᑦ ᐃᓚᖏᓐᓂᑦ ᓯᕗᓪᓕᐅᑎᔭᐅᔪᑦ ᐱᒻᒪᕆᐅᔪᓂᑦ ᐅᕙᑦᑎᓐᓄᑦ: ᓂᕿᖃᑦᓯᐊᕆᐊᖃᕐᓂᖅ ᐊᐅᓚᑕᐅᑦᓯᐊᕆᐊᖃᕐᓂᖏᑕᓗ ᐆᒪᔪᑦ ᐃᓂᖏᓪᓗ ᐊᑦᑐᐊᖃᑎᖏᑦ; ᐊᑐᖅᑐᒃᓴᓕᕆᓂᖅ ᐊᒻᒪᓗ ᐃᓄᓕᕆᔨᒃᑯᑦ ᐊᔪᕐᓇᕈᑕᐅᔪᑦ ᓄᓇᓕᑦᑎᓐᓂ; ᐊᕙᑎᓕᕆᓂᕐᒧᑦ ᐃᓗᓯᕐᒧᖓᔪᓂᑦ ᐃᓱᒫᓘᑎᖃᕐᓃᑦ; ᐱᖅᑯᓯᐅᑉ ᐊᓐᓇᒋᐊᖃᕐᓂᖓ; ᐊᒻᒪᓗ ᓱᓕᔪᒥᒃ ᐊᑑᑎᓕᒻᒥᒃ ᐱᖃᑕᐅᓂᖅ. ᓈᒻᒪᑦᓯᕗᖅ ᐊᑐᕐᓗᒍ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓ ᐱᖃᑕᐅᓗᓂ ᑭᓪᓕᓯᓂᐊᕐᓂᒃᑯᑦ ᖃᐅᔨᓴᕐᓂᒃᑯᑦ ᑐᒃᓯᕌᖑᓯᒪᓕᕐᒪᑦ ᐊᕐᕌᒍᓄᑦ ᐊᕙᑎᑦ ᑕᓪᓕᒪᓪᓗ ᐊᓂᒍᖅᓯᒪᓕᖅᑐᓂ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᑕᑲᔪᖅᑐᐃᖃᑦᑕᖅᓯᒪᐃᓐᓇᖅᐳᑦ ᐅᑭᐅᖅᑕᖅᑐᖅ ᓴᐃᓕᓂᕐᒦᓪᓗᓂ ᓄᓇᐅᓂᖓᓂᒃ. ᑭᖑᓂᑦᑎᓐᓂ ᐅᖃᐅᓯᕆᖃᑦᑕᖅᓯᒪᔭᕗᑦ ᐅᑭᐅᖅᑕᖅᑐᖅ ᓱᕈᕐᓇᖅᑐᖃᕆᐊᖃᖏᓐᓂᖓᓂᒃ. ᐃᓱᒫᓘᑎᖃᕋᑦᑕ ᒫᓐᓇᖃᒻᒥᐅᓚᐅᖅᑐᑦ ᓂᙵᐅᒪᓂᖃᖅᓱᑎᒃ ᐊᒻᒪᓗ ᐅᖃᓕᒪᓂᕐᓗᑦᑐᓂᑦ ᐃᓚᖏᓐᓂᑦ ᐅᑭᐅᖅᑕᖅᑐᒥ ᓄᓇᓕᕐᔪᐊᑦ. ᑕᑯᒍᒪᙱᑕᕗᑦ ᓄᓇᕗᑦ ᐊᖏᕐᕋᖃᕐᕕᕗᑦ ᓵᓚᖃᕋᓱᐊᕈᑕᐅᑎᓪᓗᒍ ᐊᑲᐅᙱᓪᓕᐅᕈᑎᖃᖅᑎᓪᓗᒍᓗ. ᑕᑯᒍᒪᙱᑦᑐᒍᑦ ᓄᓴᕐᔪᐊᕗᑦ ᓇᖑᓗᑕᐅᑎᓪᓗᒍ ᐊᓯᑦᑕ ᐃᓄᐃᑦ ᐱᓇᐃᓗᑕᖏᓐᓄᑦ.
ᖁᔭᒋᕙᕗᑦ ᐊᐃᔅᓛᓐᒥ ᐱᓕᕆᖃᑕᐅᔪᑦ ᓴᙱᓂᖃᕐᒪᑕ ᓯᕗᓕᖅᓱᑎᒃ ᑎᒥᖁᑕᐅᔪᒥᑦ ᐃᒃᓯᕙᐅᑕᐅᓂᕐᒥᓐᓂ. ᐃᖅᑲᓇᐃᔭᑦᓯᐊᖅᓯᒪᔪᑦ ᐅᖁᒪᐃᒃᓴᖃᓐᓂᕈᑕᐅᒐᓗᐊᖅᑎᓪᓗᒍ ᓄᕙᒡᓇᕐᔪᐊᖅ-19−ᒧᑦ ᖃᓂᒪᓐᓇᖅ. ᐃᑲᔪᖅᑐᐃᕗᒍᑦ ᕋᓴᒥᐅᑦ ᐃᒃᓯᕙᐅᑕᐅᓂᖓᓂᑦ ᐱᓂᐊᕐᓂᕋᖅᓯᒪᓂᖏᓐᓂᓪᓗ ᐊᒃᓱᕈᕐᓗᑎᒃ ᐃᖅᑲᓇᐃᔮᕆᓂᐊᕐᓗᒍ ᑲᔪᓯᓂᖃᑦᓯᐊᕈᒪᒧᑦ.
ᖁᔭᓐᓇᒦᒃ ᑕᒪᒃᓱᒥᖓ ᐱᕕᖃᕐᕕᖃᕋᕕᑦ.