ᒫᔾᔨ 1, 2021 – ᐋᑐᐋ, ᑲᓇᑕ – ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC−ᑯᑦ) ᐅᓂᒃᑳᖅᑐᒥᓃᑦ ᐅᖃᐅᓯᕆᒍᒪᔭᕐᒥᓐᓂᑦ ᑐᑭᓯᒋᐊᕐᕕᑦᓴᐅᓂᐅᑉ ᖃᓄᐃᓕᖓᓕᕐᓂᕐᒥᑦ ᒥᒃᓵᓄᑦ ᑖᒃᑯᓄᖓ ᓄᓇᕐᔪᐊᒥ ᑕᕆᐅᕐᒥᐅᑕᓄᑦ ᑎᒥᖁᑎᒋᔭᐅᔪᒧᑦ (IMO−ᑯᑦ) ᐊᐱᖅᑯᑎᖃᕐᕕᐅᓂᖅᓱᑎᓪᓗ ᓄᓇᕐᔪᐊᒥ ᑲᑎᒪᔨᓃᙶᖅᑐᓂᑦ ᖃᕆᑕᐅᔭᒃᑯᑦ ᑲᑎᒪᓂᕐᖃᖅᑎᓪᓗᒋᑦ ᕖᕝᕗᐊᕆ 22−ᖑᑎᓪᓗᒍ.
ᑖᒃᑯᐊ IMO−ᑯᑦ ᒫᓐᓇ ᐱᖃᑕᐅᓕᕐᒥᔪᑦ ᖃᐅᔨᓴᖅᑎᐅᓂᕐᒥᑦ ᐅᑭᐅᖅᑕᖅᑐᒥ ᑲᑎᒪᔨᓄᑦ, ᐊᐅᓚᑦᓯᖃᓯᐅᑎᓪᓗᓂᓗ ᐃᓄᐃᑦ ᐅᓯᑲᑕᖃᑦᑕᕐᓂᖏᓐᓅᖓᔪᓄᑦ ᑖᒃᑯᓇᓂ ᑎᒥᖁᑎᒋᔭᐅᔪᓂ ᐱᒻᒪᕆᐅᖕᒪᑦ ᑲᒪᒋᔭᐅᑦᓯᐊᕆᐊᖃᖅᓱᓂᓗ ᐃᓄᐃᑦ ᐱᔪᓐᓇᐅᑎᖃᕐᓂᒃᑯᑦ ᐅᖃᕈᓐᓇᕐᓗᑎᒃ ᐊᐅᓚᑦᓯᔨᐅᓂᖏᑕ ᒥᒃᓵᓄᑦ ᐅᑭᐅᖅᑕᖅᑐᒥ ᑕᕆᐅᕐᒥᐅᑕᓂᑦ. “ᑎᑎᕋᖅᓯᒪᔪᖅ 9 ᐅᑦᕿᐊᕕᒃ ᐊᖏᖃᑎᒌᒍᑎᒥ ᑲᔪᖏᖅᓴᐃᔪᖅ ICC−ᑯᑦ ᐱᖃᑕᐅᒃᑲᓐᓂᖃᑦᑕᖁᓪᓗᒋᑦ ᓄᓇᕐᔪᐊᒥ ᑎᒥᐅᔪᓄᑦ,” ᐅᖃᖅᑐᒥᓂᖅ ICC−ᑯᑦ ᐃᒃᓯᕙᐅᑕᖓᑦ ᑕᓖ ᓴᒻᐳ ᑐᐊᕉ. “ ᐱᖃᑕᐅᒐᔪᒃᑲᓗᐊᑎᓪᓗᒋᒃ ᐊᒥᓱᓂ ᒐᕙᒪᐅᖃᑎᒌᑦᑐᑦ ᑎᒥᖁᑎᖏᓐᓂ, ᑖᒃᑯᐊ IMO−ᑯᓐᓄᑦ ᐃᓚᐅᔪᑦ ᐱᖃᑕᐅᕕᒋᒍᒪᔭᖓᑦ ᐱᔾᔪᑎᒋᓪᓗᒍ ᑕᑎᖃᕐᓂᕗᑦ ᑕᕆᐅᕐᒥᐅᑕᑦ ᐊᕙᑎᒥᐅᑕᖏᓐᓂᓪᓗ ᐊᒻᒪᓗ ᑕᒪᓐᓇ ᐅᑭᐅᖅᑕᖅᑐᒥ ᐅᓯᑲᑕᓐᓂᐅᕙᑦᑑᑉ ᐱᓕᖅᐸᓪᓕᐊᑐᐃᓐᓇᕐᓂᖓ. ᐃᓄᐃᑦ ᐃᒃᓯᕚᕐᕕᑦᓴᖃᕆᐊᓕᑦ ᑎᒥᖁᑕᐅᔪᓂ ᐃᓱᒪᓕᐅᕈᑕᐅᔪᖃᖅᑎᓪᓗᒍ ᑐᑭᑖᕈᑕᐅᓂᐊᖅᑐᒥᑦ ᑐᕌᖓᔪᓂᑦ ᐊᑦᑐᐃᓂᕐᓗᑦᑐᓂᑦ ᐅᕙᑦᑎᓐᓂᑦ. ᑕᒪᓐᓇ ᐊᑯᓂᐊᓗᒃ ᐱᓕᕆᐊᕆᔭᕗᑦ ᓂᕆᐅᖅᐳᒍᓪᓗ ᐊᑕᖏᕐᓗᑎᒃ IMO−ᖑᔪᑦ ᓄᓇᓕᕐᔪᐊᓂ ᐃᑲᔪᖅᑐᐃᓂᐊᕐᓂᖏᓐᓂᑦ ᑐᒃᓯᕋᐅᑎᑦᑎᓐᓂᑦ .”
ᓖᓴ ᖁᐱᕐᕈᐊᓗᒃ, ICC−ᑯᑦ ᑲᓇᑕᒥ ᑐᒡᓕᐊ ᐊᖓᔪᖅᑳᑉ ᓄᓇᕐᔪᐊᒥ ᐅᐸᖑᑎᖃᑦᑕᖅᓯᒪᔪᖅ IMO−ᑯᑦ ᐃᓚᐅᔪᖁᑎᖏᑕ ᑲᑎᒪᓂᖏᓐᓄᑦ ᐅᖓᑖᓄᑦ ᖄᖏᖅᑐᑦ ᐊᕐᕌᒍᑦ ᐱᖓᓱᑦ. ᓖᓴ ᑲᔪᓯᔪᖅ ᐃᑲᔪᕐᓂᕐᒥᒍ ᐊᔾᔨᖃᖏᑦᑐᒥᒃ ᐃᓄᐃᑦ ᖃᐅᔨᒪᓂᖓᓂᒃ ᑎᒍᒥᐊᕈᑎᒥᓐᓂᒃ ᐅᑭᐅᖅᑕᖅᑐᒥ ᑕᕆᐅᕐᒥᐅᑕᓂᑦ ᐊᕙᑎᖓᓂᓪᓗ ᐱᒻᒪᕆᐅᓂᖓᓂᓪᓗ ᑕᒪᓐᓇ ᓄᓇ ᓂᕿᑦᑎᓐᓄᑦ ᐊᑐᒐᓪᓚᕆᐊᓪᓘᓪᓗᓂᓗ ᐃᖏᕐᕋᕕᐅᓪᓗᓂ ᐊᖅᑯᑎᖏᑦ ᑕᒪᐅᖓ. “ᐃᓚᒋᔭᐅᓪᓗᖓ IMO−ᑯᓐᓄᑦ ᐃᓚᐅᔪᓄᑦ ᑐᑭᓯᒋᐊᕐᕕᐅᒍᓐᓇᓂᕐᒥᑦ ᖃᓄᐃᓕᖓᓕᕐᓂᐅᔪᒥᑦ ICC−ᑯᑦ ᐃᑲᔪᖅᑐᐃᓂᐊᖅᑐᑦ ᐊᐅᓚᑕᐅᑦᓯᐊᕈᓐᓇᕐᓂᖏᓐᓂᑦ ᓱᕐᕋᐃᑦᑑᓗᑎᓪᓗ ᐊᑑᑎᖃᕐᓂᖏᑦ ᐅᑭᐅᖅᑕᖅᑐᒥ ᐃᒪᒃᑯᑦ ᐊᖅᑯᑎᑦ ᐊᑕᓇᖁᓇᒋᑦ ᐊᖅᑯᑕᐅᕙᑦᑐᑦ ᐅᒥᐊᕐᔪᐊᓄᑦ ᐅᒥᐊᕐᔪᐊᒥᓗ ᐱᓕᕆᔨᓄᑦ ᐱᐅᖅᓱᕐᐊᓗᒍ ᐸᐸᑐᑦᓯᐊᕆᐊᕐᓗᒍ ᐊᔾᔨᖃᙱᑦᑐᖅ ᑕᒪᓐᓇ ᒫᓐᓇᓗ ᐊᑦᑕᓇᖅᑐᒦᓕᖅᑐᖅ ᐆᒪᓂᖃᖅᑐᓄᑦ. ᐱᓗᐊᖅᑐᒥ, ᐃᓗᓯᖏᓐᓄᑦ ᐅᑭᐅᖅᑕᖅᑐᒥ ᑕᕆᐅᕐᒥᐅᑕᑦ ᐆᒪᓂᖃᕐᕕᖏᓐᓂ ᓂᕿᒋᔭᐅᔪᓂ, ᐊᖓᓇᓱᐊᖅᑕᐅᖏᓐᓇᖅᑐᒥ, ᐃᖃᓗᒐᓱᐊᖅᑕᐅᖏᓐᓇᖅᑐᓂ, ᐊᒻᒪᓗ ᐊᙳᑕᐅᕙᐅᑦᑐᓂ, ᐃᓅᓯᕆᔭᐅᔪᓂ, ᐱᖅᑯᓯᕆᔭᐅᔪᓂ ᐅᖃᐅᓯᕐᒥᓐᓂᓗ ᐸᐸᑐᒍᑎᒋᓪᓗᒋᑦ, ᐃᓄᐃᓪᓗ ᐃᓗᓯᑦᓯᐊᕇᖕᓇᕐᓂᖓᑦ ᓴᙱᓂᖃᕐᓂᖓᓪᓗ.”
“ᐊᑐᕐᓗᒋᑦ ᐃᓄᐃᑦ ᐃᓱᒪᒋᔭᖏᑦ ᖃᐅᔨᒪᓂᖏᓪᓗ ᐅᖃᖃᑎᒌᖕᓂᕐᓂ ᐸᕐᓇᐅᑕᐅᔫᓪᓗ ᐱᕙᓪᓕᐊᓂᖓᓂᒃ ᐱᕕᖃᖅᑎᑦᓯᓂᐊᖅᑐᖅ IMO−ᒧᑦ ᐊᑐᖅᑕᐅᓕᕐᓗᓂ ᐱᓕᕆᒍᑕᐅᓗᓂ ᐊᑐᐊᒐᓕᕆᓂᕐᒧᑦ ᐃᖅᑲᓇᐃᔮᒧᓪᓗ. ᑐᑭᓯᐅᒪᓂᖅ ᑕᒪᒃᓱᒪᖓᑦ ᑲᑎᒪᔪᓄᓪᓗ ᓴᕝᕙᖃᑦᑕᖅᓱᒋᑦ ᐅᖃᖃᑎᒌᖕᓂᕐᓂ ᑭᐅᒍᑎᖃᕐᕕᐅᓪᓗᑎᓪᓗ ᑎᓕᔭᐅᔾᔪᑎᒋᓯᒪᔭᕐᒥᓐᓄᑦ, ᐱᕕᖃᖅᑎᑦᓯᓂᐊᖅᑐᑦ IMO−ᑯᓐᓄᑦ ᐃᓚᐅᔪᓂᑦ ᐊᑐᕋᑦᓴᑦᓯᐊᕙᒻᒥᒃ ᐊᔪᒐᐃᑦᑑᓪᓗᓂ ᐃᑲᔪᖅᓯᓂᐊᖅᑐᒥᒃ ᐊᑐᐊᒐᖏᓐᓂᑦ ᐃᖅᑲᓇᐃᔮᖏᓐᓂᓪᓗ, ᓖᓴ ᖁᐱᕐᕈᐊᓗᒃ ᐃᓚᓯᒋᐊᒍᑎᒥᓂᒃ ᐅᖃᒃᑲᓂᖅᑐᒥᓂᖅ.
ICC−ᑯᑦ ᑲᑎᓯᕙᑦᑐᑦ ᐊᑕᐅᓯᐅᖃᑎᒌᑦᑐᒥᒃ ᐃᓄᐃᑦ ᓂᐱᖏᓐᓂᑦ IMO−ᑯᓐᓄᑦ ᐃᓚᐅᔪᓄᑦ ᐃᓄᐃᑦ ᖃᐅᔨᒪᓂᖃᓪᓚᕆᖕᓂᖏᓐᓂᑦ ᐊᒻᒪᓗ ᖃᐅᔨᒪᓂᖃᕐᓂᖏᓐᓂᑦ ᐊᒥᓱᓂᒃ ᖃᓄᐃᓐᓂᐅᔪᓂᑦ ᖃᓄᐃᒍᑕᐅᔪᓂᑦ ᐊᑦᑐᓂᕐᓗᑦᑕᐅᓂᕐᒧᑦ ᓯᓚᐅᑉ ᐊᓯᔾᔨᕐᓂᖓᓄᑦ, ᓱᕐᕋᐃᑦᑑᑎᒋᓐᓇᕆᐊᕐᓗᒍ ᐊᑐᖃᑦᑕᖅᑕᖓᑦ ᐅᑭᐅᖅᑕᑑᑉ ᐃᒪᖏᑦ, ᐱᒻᒪᕆᐅᓂᖓᑕᓗ ᐅᓯᑲᑦᑕᕐᕕᐅᖃᑦᑕᕐᓂᖏᑦ ᐃᓄᐃᑦ ᓄᓇᓕᖏᑦ ᐱᓕᖅᑭᑦᑖᒋᐊᓕᓐᓂᑦ ᐱᕕᒃᓴᖃᖅᑎᑦᓯᔪᖅ ᐊᒻᒪᓗ ᑮᓇᐅᔭᓕᐅᕈᑎᖃᕈᓐᓇᓂᕐᒥᑦ ᐱᕙᓪᓕᐊᑎᑦᓯᓂᐅᓪᓗᓂ. ICC−ᑯᑦ ᑕᕝᕙᐅᕗᑦ ᐃᑲᔪᕈᒪᓪᓗᑎᒃ ᖃᐅᔨᒪᔭᒥᒍᑦ ᐊᒻᒪᓗ ᐃᓄᐃᑦ ᖃᐅᔨᒪᔭᖏᑎᒍ ᐊᒥᓱᓂ IMO−ᑯᓐᓄᑦ ᐃᓚᐅᔪᓄᑦ ᑐᑭᒧᐊᒍᑎᑦᓴᐅᓗᑎᒃ ᐊᑐᐊᒐᑦᓴᐅᒐᔭᖅᑐᓂ ᑖᒃᑯᐊ IMO−ᑯᑦ ᐊᑐᐊᒐᕆᒍᓐᓇᕋᔭᖅᑕᖏᓐᓂᑦ ᐊᑦᑕᓇᖅᑐᒦᓕᖅᑐᓄᑦ ᐆᒪᓂᖃᖅᑐᓄᑦ ᐊᐅᓚᓂᕆᔭᐅᔪᓄᑦ.
ICC−ᑯᑦ ᕿᓚᓈᕆᔭᖃᖅᐳᑦ ᐃᑲᔪᖅᑐᖅᑕᐅᓂᐊᕐᓂᕐᒥᓐᓂᑦ IMO−ᑯᑦᐃᓚᐅᔪᑯᑎᖏᓐᓄᑦ ᓄᓇᓕᕐᔪᐊᓂ, ᐅᑯᐊᖑᓪᓗᑎᒃ ᓯᑕᒪᐅᔪᖏᒐᖅᑐᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᑲᓇᑕᒦᙶᖅᓯᒪᔪᑦ, ᒥᐊᓕᒐᐃᑦ ᓄᓇᖓᓐᓂᒃ, ᓱᕖᑕᓐ, ᓄᐊᕗᐊᐃ, ᐊᐃᔅᓚᓐ, ᕕᓐᓚᓐ, ᐊᒻᒪᓗ ᐅᓚᓴᒥ. ᑐᑭᑖᕈᑎᒥᓂᖅ ᐃᓱᒪᓕᐅᕈᑕᐅᓚᐅᕐᓗᓂ IMO-ᑯᓐᓂ ᓂᕆᐅᒋᔭᐅᔪᖅ ᔪᓚᐃ 2021-ᒥ.
ᖃᐅᔨᒋᐊᕐᕕᒃᓴᑦ:
ᑭᐊᓕ ᐃᓂᖑᕗᒃ ICC (ᐊᓛᔅᑲ) kelly@iccalaska.org
ᑭᐅᕈᓪ ᓴᐃᒪᓐ ICC (ᑲᓇᑕ) csimon@inuitcircumpolar.com