ᒫᔾᔨ 1, 2022 – ᐋᓐᑯᕆᔾ, ᐊᓛᔅᑲ – ᓯᕗᓪᓕᖅᐸᐅᓪᓗᓂ ᑖᒃᑯᐊ ᒐᕙᒪᐅᖃᑎᒌᑦ ᑲᑎᒪᔩᑦ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ (IPCC−ᑯᑦ), ᓄᓇᖃᖅᑳᖅᓯᒪᔪᑦ ᑎᒥᖁᑎᖓ ᐱᖃᑕᐅᖃᑦᑕᖅᓯᒪᓕᖅᐳᑦ ᖃᐅᔨᓴᖅᑎᓪᓗᐊᑕᐅᓪᓗᑎᒃ ᒐᕙᒪᐅᖃᑎᒌᑦᑐᑦ ᑲᑎᒪᔨᓂ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ ᐊᖏᖅᑕᐅᓂᖃᖅᑎᓪᓗᒍ. ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC) ᐊᖏᖅᑕᐅᒍᑎᖃᕐᓂᕐᒪᑕ ᖃᐅᔨᓴᖅᑎᐅᓂᕐᒥᒃ ᑖᒃᑯᓄᖓ IPCC−ᑯᓐᓄᒃᑦ ᕖᕝᕗᐊᕆᐅᑎᓪᓗᒍ 2020 ᓇᓗᓇᐃᖅᑕᐅᓪᓗᑎᒃ ᓯᕗᓪᓕᖅᐹᒥ ᓄᓇᖃᖅᑳᖅᓯᒪᔪᑦ ᑎᒥᖁᑎᖓᑦ ᐃᓕᑕᕆᔭᐅᓂᒃᑯᑦ ᖃᐅᔨᓴᖅᑎᐅᓂᐊᖅᑎᓪᓗᒋᑦ.
ᐱᓇᓱᐊᕈᓯᐅᑉ ᓄᙳᐊᓂ, ᑖᒃᑯᐊ IPCC−ᑯᑦ – ᓄᓇᕐᔪᐊᒥ ᑎᒥᖁᑎᐅᔪᑦ ᖃᐅᔨᓴᐅᑎᒥᓂᕐᓂᒃ ᐅᓂᒃᑳᓕᐅᖅᐸᑦᑐᑦ ᑭᓪᓕᓯᓂᐊᕐᓂᐅᑉ ᒥᒃᓵᓄᑦ ᖃᐅᔨᓴᖅᑐᓕᕆᓂᒃᑯᑦ ᓯᓚᐅᑉ ᐊᓯᔾᔨᕐᓂᖓᑕ ᒥᒃᓵᓄᑦ –ᑲᑎᒪᔭᕇᖅᑐᒥᓃᑦ 55−ᒋᓕᖅᑕᖓᓂᑦ ᑲᑎᒪᓂᕐᒥ ᐱᖃᑕᐅᕕᒋᓪᓗᒍ ᐊᖏᖅᑕᐅᓂᕐᒧᑦ ᑲᑎᒪᓂᖅ ᐱᓕᕆᖃᑎᒌᓪᓗᑎᒃ ᑲᑐᔾᔨᖃᑎᒌᑦ 2 (WGII) ᐱᔭᕆᐊᖃᓕᕋᐃᒐᒥ ᑕᕝᕙᓴᐃᓐᓇᖅ ᐊᑐᐊᒐᓕᐅᖅᑎᑦ (SPM−ᑯᑦ). ᑲᑐᔾᔨᖃᑎᒌᑦ WGII ᐅᓂᒃᑳᓕᐅᖅᐸᑦᑐᑦ ᐊᑦᑐᓂᕐᓗᐃᔪᑦ, ᐃᓕᑦᑐᕈᑎᖃᖅᐸᓪᓕᐊᓂᖅ, ᐊᒻᒪᓗ ᐊᑦᑐᖅᑕᐅᒍᓐᓇᖅᑐᑦ ᒥᒃᓵᓐᓄᑦ ᐱᖃᓯᐅᑎᑦᓱᒍ ᑕᕝᕙᓴᐃᓐᓇᖅ ᐱᔭᕆᐊᖃᓕᕋᐃᒐᒥ ᐊᑐᐊᒐᓕᐅᖅᑎᓂᑦ, ᓴᖅᑭᖅᑎᑕᐅᓚᐅᖅᑐᖅ ᑕᒪᓐᓇ ᐃᑉᐸᑦᓴᖅ.
ᑖᒃᑯᐊ WGII ᐊᖏᖅᑕᐅᓂᕐᒧᑦ ᑲᑎᒪᓂᖃᖅᑎᓪᓗᒋᑦ ᓄᖅᑲᐅᓯᕈᑕᐅᓪᓗᓂ, ICC−ᑯᑦ ᓄᓇᕐᔪᐊᒥ ᐃᒃᓯᕙᐅᑕᖓᑦ, ᑖᒃᑕ. ᑕᓖ ᓴᒻᐳ ᑐᐊᕉ ᐅᖃᓕᒪᓪᓗᓂ ᐃᓚᓕᐅᑎᓂᖅ ᐱᓪᓗᒍ. ᑖᓐᓇ ᓇᐃᓈᖅᑎᓪᓗᒍ ᑐᙵᓱᑦᑎᑦᓱᒋᑦ ICC−ᑯᑦ ᐅᖃᐅᓯᖃᖅᓱᓂᓗ ᐃᓚᓕᐅᑎᔭᐅᓂᖏᑕ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᑕᓗ ᓄᓇᖃᖅᑳᖅᓯᒪᔪᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂᒃ ᑖᒃᑯᐊ ᐱᔭᕆᐊᖃᓕᕋᐃᒐᒥ ᑕᕝᕙᓴᐃᓐᓇᖅ ᐊᑐᐊᒐᓕᐅᖅᑎᑦ:
“…ᖁᕕᐊᒋᔭᖃᖅᑐᒍᑦ ᓇᓗᓇᐃᖅᓯᒍᑎᒋᒋᐊᒃᓴᖓᓂᒃ ᐱᒻᒪᕆᓂᐅᖓᑕ ᐃᓕᑕᕆᔭᐅᓯᒪᓂᐅᑉ ᐱᔪᓐᓇᐅᑎᖏᑦᑕᓗ ᓄᓇᖃᖅᑳᖅᓯᒪᔪᑦ ᒥᒃᓵᓐᓄᑦ, ᐃᓗᓕᖃᕐᓂᖓ ᑲᔪᓯᓂᖃᖅᑎᑕᐅᓂᖓᑕ ᐃᓕᑦᑐᐸᓪᓕᐊᓂᐅᑉ ᑕᒪᒃᓱᒧᖓ. ᑖᓐᓇ ᐱᔭᕆᐊᖃᓪᓚᕆᖃᑕᐅᒻᒪᑦ ᐃᓗᓕᖏᑦ ᑕᒪᒃᑯᐊ ᐱᔪᓐᓇᐅᑕᔪᑦ ᐱᔪᓐᓇᐅᑎᒋᒐᑦᑎᒍ ᓇᖕᒥᓂᖅ−ᐊᔪᐃᓐᓇᕈᓐᓇᓂᑦᑎᓐᓂᑦ, ᓂᕆᐅᒋᔭᖃᖅᐳᒍᓪᓗ ᑕᑯᒍᒪᓪᓗᒍ ᑕᒪᓐᓇ ᐃᓕᑕᕆᔭᐅᓂᖏᑕ ᐱᔪᓐᓇᐅᑎᑦ ᐊᖏᓪᓕᒋᐊᖅᑕᐅᖁᓪᓗᒋ ᐃᓘᓐᓇᖏᓐᓄᑦ ᐃᓕᑦᑐᓂᕐᒧᑦ ᑐᕌᖓᔪᑦ ᐊᒻᒪᓗ ᐋᖅᑭᒋᐊᕆᒍᑕᐅᔪᑎᒍᑦ.”
ᑕᒪᓐᓇ ᐃᓚᓕᐅᑎᓂᖅ ᑭᖑᓪᓕᖅᐸᐅᓯᒪᔪᖅ ᑲᑎᒪᔪᖃᓚᐅᖅᑎᓐᓇᒋᑦ WGII−ᒧᑦ ᑲᑎᒪᔪᓂᑦ ᓄᖅᑲᐅᓯᕈᑕᐅᓪᓗᓂ ᐊᑐᖅᑕᐅᓚᐅᖅᓯᒪᖏᑦᑐᒥᒃ ᐊᑐᕐᓂᕐᒥᒃ ᐱᕕᖃᖅᑎᑕᐅᓂᖅ ᑖᒃᑯᓇᓂ IPCC−ᑯᑦ ᐊᑐᖃᑦᑕᖅᓯᒪᔭᖏᓐᓂ ᐊᓚᒡᒐᐃᑦᑐᒥᓪᓗ ᐊᓪᓗᕆᐊᕐᓂᐅᓪᓗᓂ ᓯᕗᒧᑦ ᐱᕚᓪᓕᖅᑎᒍᒪᓪᓗᒍ ᓄᓇᖃᖅᑳᖅᓯᒪᔪᑦ ᐃᓚᐅᑎᑕᐅᕙᖕᓂᖏᑦ ᑕᕝᕙᓂ IPCC−ᑯᑦ ᐱᕙᓪᓕᐊᓂᖏᓐᓂ.
ᐊᕐᕌᓂ, ᐋᒡᒌᓯᐅᑎᓪᓗᒍ 2021, ᐱᓕᕆᑎᑕᐅᓕᕐᓂᖏᑕ ᑲᑐᔾᔨᖃᑎᒌᑦᑐ 1 ᐅᓂᒃᑳᓕᐊᒥᓂᕐᒥ ᐱᔾᔪᑎᓕᒃ ᑕᑯᑦᓴᐅᓂᖓᑕ ᑭᓪᓕᓯᓂᐊᒃᓂᒃᑯᑦ ᖃᐅᔨᓴᕈᑕᐅᕙᑦᑐᑦ ᑐᕌᖅᑎᑕᐅᓂᖓ ᑭᖑᓂᖓᓂ ᑲᑐᔾᔨᖃᑎᒌᑦᑐᑦ ᓄᓇᓕᕐᔪᐊᑦ ᑎᑎᕋᖅᑎᒻᒪᕆᐊᓄᑦ, ᐋᓐᑑᓂᐅ ᒐᑦᑐᕋᔅ, ᐅᖃᐅᓯᕆᔭᖓᓂ ᐃᓕᑕᖅᓯᓂᒃᑯᑦ “ᓇᓗᓇᐃᒃᑯᓯᖅᑕᐅᓂᖓ ᐊᐅᐸᖅᑐᒥᒃ ᐃᓄᖕᓄᑦ ᑎᒥᓕᓐᓄᑦ”. ᐱᓕᕆᖃᑎᒌᑦᑐᑦ ᑲᑐᔾᔨᖃᑎᒌᑦᓱᑎᒃ 3 ᐅᓂᒃᑳᓕᐅᖅᑐᒥᓃᑦ ᐱᕚᓪᓕᖅᑎᑕᐅᒐᓱᐊᕐᓂᖓᑕ ᓯᓚᐅᑉ ᐊᓯᔾᔨᕐᓂᖓᑕ ᐱᐅᓂᖅᓴᒧᑦ ᓴᖅᑭᑕᐅᔪᒃᓴᒫᖅ ᐄᑉᐴᓕᖅᐸᑦ ᑕᕝᕙᓂ ᐊᕐᕌᒍᒥ.
ᐅᓂᒃᑳᓕᐊᒥᓂᖅ ᓴᖅᑭᖅᑎᑕᐅᓚᐅᖅᑐᖅ ᐃᑉᐸᑦᓴᖅ ᓇᓗᓇᐃᔭᐃᓯᒪᔪᖅ ᑲᑎᖅᓱᖅᑕᐅᓯᒪᓂᖏᑕ ᐊᑦᑐᐃᓂᕐᓗᑦᑐᑦ ᓱᕋᐃᕙᓪᓕᐊᔪᑦ ᓄᓇᕐᔪᐊᓕᒫᒥ ᐃᓄᖕᓄᑦ−ᐱᓂᐊᕐᓂᐅᔪᑎᒍ ᓯᓚᐅᑉ ᐊᓯᔾᔨᕐᓂᖓᑕ. “ᐊᖏᖅᑕᐅᓯᒪᔪᖅ ᐅᓂᒃᑳᓕᐊᒥᓂᖅ ᐊᒻᒪᓗ ᐱᓕᕆᐊᖏᑦ ᐊᑐᐊᒐᓕᐅᖅᑎᑦ ᖃᐅᔨᓴᕐᓂᐅᓯᒪᔪᖅ ᓇᓗᓇᐃᖅᓯᒍᑕᐅᓯᒪᓪᓗᓂ ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᓂᖓ ᖁᐊᖅᓵᕈᑕᐅᓯᒪᓪᓗᑎᓪᓗ ᖃᐅᔨᔭᐅᓯᒪᓂᖏᑦ ᐊᑦᑐᓂᕐᓗᑦᑕᐅᓯᒪᔪᓪᓗ ᐅᑭᐅᖅᑕᖅᑑᑉ ᓄᓇᓕᖏᑦ ᐃᓘᓐᓇᑎᒃ ᑭᓪᓕᓕᐅᖅᑕᐅᓯᒪᔪᑦ ᓄᓇᖁᑕᐅᔪᑦ. ᑕᒪᓐᓇ ᑐᓴᕋᑦᓴᓕᐊᖑᓯᒪᔪᖅ ᐅᖃᐅᓯᖃᒃᑲᓐᓂᖅᑐᖅ ᐃᓄᐃᑦ ᐅᖃᐅᓯᕆᓯᒪᔭᖏᓐᓂᑦ ᐅᖃᐅᓯᕇᓐᓇᖅᑕᖏᓐᓂᓪᓗ ᖃᐅᔨᓯᒪᓕᖅᑕᑎᓐᓂᑦ ᐃᓅᓯᖃᕐᕕᒋᓯᒪᓕᖅᑕᑎᓐᓂᓗ, ᓯᕗᓪᓕᖅᐹᖑᑎᓪᓗᒍ ᖃᐅᔨᓯᒪᔭᕗᑦ,” ᐅᖃᖅᑐᒥᓂᖅ ᓘᒃᑖᖅ ᑕᓖ ᓴᒻᐳ ᑐᐊᕉ.
ᖄᖏᖅᓯᒪᓕᖅᑐᑦ ᐊᒥᓲᓗᐊᖏᑦᑐᑦ ᐊᕐᕌᒍᐃᑦ, ICC−ᑯᑦ ᓄᖅᑲᔪᐃᑦᑑᓪᓗᑎᒃ ᐱᖃᑕᐅᓯᒪᕕᖓᑦ ᑖᒃᑯᐊ IPCC−ᑯᑦ ᐊᕐᕕᓂᓕᕆᓕᖅᑕᖓᓂᑦ ᖃᐅᔨᓴᖃᑦᑕᕐᓂᖏᑦᑕ ᖃᐅᔨᒪᓕᑕᐅᓪᓗᑎᒃ ᕿᒥᕐᕈᔩᑦ ᐃᑲᔪᖅᓯᓯᒪᔪᓪᓗ ᑎᑎᕋᖅᐸᑦᑐᑦ ᑕᒪᒃᓱᖓ ᒥᒃᓵᓐᓄᑦ ᐊᒥᓲᓗᐊᖏᑦᑐᑎᒍᑦ ᐅᓂᒃᑳᓕᐅᕐᓂᕐᒥᒍᑦ ᐱᖃᓯᐅᑎᑦᓱᒍ ᐊᔾᔨᖃᖏᑦᑐᖅ ᐅᓂᒃᑳᓕᐊᒥᓂᖅ ᐃᒪᐅᑉ ᐊᒻᒪᓗ ᓯᓚᐅᑉ ᒥᒃᓴᓄᑦ ᐊᓯᔾᔨᐸᓪᓕᐊᑎᓪᓗᒍ ᓯᓚ (SROCC), ᓴᖅᑭᖅᑎᑕᒥᓂᖅ ᓯᑎᐱᕆᐅᑎᓪᓗᒍ 2019, ᐊᒻᒪᓗ ᓇᓗᓇᐃᒃᑯᓯᖅᑕᐅᓯᒪᔪᑦ−ᒪᑉᐱᒐᐃᑦ ᐸᐃᑉᐹᒦᑦᑐᑦ ᐅᑭᐅᖅᑕᖅᑐᒥ ᓄᓇᓖᑦ ᒥᒃᓵᓐᓄ ᑕᕝᕙᓃᑦᑐᑦ WGII−ᑯᑦ ᐅᓂᒃᑳᓕᒥᓂᖏᓐᓂ ᓴᖅᑭᖅᑎᑕᐅᓚᐅᖅᑐᓂᒃ ᐃᑉᐸᑦᓴᖅ. ᑕᕝᕙᓂ ᐃᑲᔪᖅᓯᒍᑕᐅᔪᒥ ᐱᒻᒪᕆᐅᓂᖓ ᓄᓇᖃᖅᑳᖅᓯᒪᔪ ᓇᖕᒥᓂᖅ−ᐊᔪᐃᓐᓇᕈᓐᓇᓂᖏᑦ ᖃᐅᔨᓴᖅᑐᓕᕆᓂᕐᒥ ᓄᓇᖃᖅᑳᖅᓯᒪᔪᓪᓗ ᓯᕗᓕᖅᑎᐅᓂᖏᓐᓂᒃ ᐊᑐᓕᖅᐸᓪᓕᐊᓗᒋᑦ ᐃᓕᑦᑐᖅᑕᐅᒍᓐᓇᖅᑐᑦ ᐊᒻᒪᓗ ᓯᓚᒥᑦ ᓱᕋᐃᑦᑕᐃᓕᒪᓂᐅᑉ.
ᐱᓕᕆᖃᑎᖃᕐᓂᒃᑯᑦ ᒐᕙᒪᒃᑯᖏᓐᓂᑦ ᑲᓇᑕᐅᑉ, ICC−ᑯᑦ ᐱᖃᑕᐅᖃᑦᑕᖅᓯᒪᔪᖅ ᑭᖑᓂᑦᑎᓐᓂ IPCC−ᑯᑦ ᐊᖏᖅᑕᐅᒍᑎᖏᓐᓂ ᐃᓚᒋᓪᓗᓂᐅᒃ ᑲᓇᑕᒥᐅᓄᑦ ᑲᑎᒪᔭᖅᑐᖃᑕᐅᖃᑦᑕᖅᑐᓄᑦ. ᑕᒪᓐᓇ ᐊᑑᑎᖃᑦᓯᐊᖅᑐᖅ ᐱᓕᕆᖃᑎᒌᖕᓂᖅ ᑲᔪᓯᑎᑕᐅᓯᒪᔪᖅ ᑖᒃᓱᒪᓂ ᑲᑎᒪᑕᐅᓂᕐᒥ ᐱᔾᔪᓯᑦᓯᐊᕙᐅᓪᓗᓂᓗ ᖃᓄᖅ ᓄᓇᓕᔾᔪᐊᒥᐅᑦ ᐱᓕᕆᖃᑕᐅᓂᕐᒧᑦ ᐃᓚᐅᔪᑦ ᐃᑲᔪᖅᑐᐃᒍᓐᓇᕐᒪᖔᑕ ᐃᖅᑲᓇᐃᔭᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᑦ ᑎᒥᖁᑎᖏᓐᓂᑦ.
ᑖᒃᑕ. ᑕᓖ ᓴᒻᐳ ᑐᐊᕉ ᓇᓗᓇᐃᖅᓯᒍᑎᒋᓯᒪᒻᒪᒍ ᑭᖑᓂᖓᓂ ᐃᓚᓕᐅᑎᕕᒥ, “ᑖᒃᑯᐊ ICC−ᑯᑦ ᐃᖅᑲᓇᐃᔭᖃᑎᖃᖅᓯᒪᓕᖅᑐᑦ ᑖᒃᑯᓂᖓ IPCC−ᑯᓐᓂᑦ ᐃᓱᒪᑦᓴᖅᓯᐅᕈᑕᐅᑦᓯᐊᖁᓪᓗᒍ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓ ᓯᕗᓂᒃᓴᒥ ᖃᐅᔨᓴᐅᑎᑦᓴᓄᑦ, ᓯᕗᓂᕆᑦᓯᐊᖅᐸᕗᓪᓗ ᑲᔪᓯᑎᑕᐅᓂᐊᕐᓂᖓ ᑕᒪᓐᓇ ᐱᒻᒪᕆᐅᔪᖅ ᐃᖅᑲᓇᐃᔮᖑᓂᖓ.”
-30-
ᑐᑭᓯᒋᐊᕐᕕᔅᓴᖅ:
ᑭᐊᓕ ᐃᓂᖑᕗᒃ ICC (ᐊᓛᔅᑲ) +1 907-274-9058 kelly@iccalaska.org
ᑭᐅᕈ ᓴᐃᒪᓐ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᑲᓇᑕ) 613-563-2642 csimon@inuitcircumpolar.com