ᓇᕿᓪᓗᒍ ᒪᐅᓇ ᑐᖅᑯᕐᓗᒋᑦ ᐊᔾᔨᒌᑎᑦᑎᓂᒃᑯᑦ ᐊᒻᒪᓗ ᐱᓇᓱᐊᑦᑎᐊᕐᓂᒃᑯᑦ ᐃᓚᐅᑎᑦᑎᓂᕐᒧᑦ ᐊᑐᖅᑕᐅᔭᕆᐊᓖᑦ ᑎᑎᕋᖅᓯᒪᔪᑦ ᖃᓪᓗᓈᑎᑐᑦ
ᔫᓂ 3, 2022 – ᐋᓐᑯᕆᔾ, ᐊᓛᔅᑲ – ᐅᓪᓗᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓴᖅᑭᑦᑎᕗᑦ ᓄᑖᓂᒃ ᒪᓕᑦᑕᐅᔪᔅᓴᓂᒃ ᐊᔾᔨᒌᑎᑦᑎᓂᒃᑯᑦ, ᐱᓇᓱᐊᑦᑎᐊᕐᓂᒃᑯᑦ ᐃᓚᐅᑎᑕᐅᓂᖏᓐᓄᑦ ᐃᓄᐃᑦ ᐅᑭᐅᖅᑕᖅᑐᒥ ᓄᓇᖃᖅᑐᑦ ᑐᕌᒐᖃᕐᓗᑎᒃ ᑕᒪᐃᓐᓄᑦ ᐃᓱᒪᓕᐅᕆᔨᓄᑦ ᐊᒻᒪᓗ ᐊᑐᐊᒐᓕᐅᖅᑎᓄᑦ, ᖃᐅᔨᓴᖅᑎᓄᑦ ᐊᒻᒪᓗ ᐊᓯᖏᓐᓄᑦ ᐊᐅᓚᓂᖃᖅᑐᓄᑦ ᐅᑭᐅᖅᑕᖅᑐᒥ.
ᑖᒃᑯᐊ ᓄᑖᖑᔪᑦ ᐊᑐᖅᑕᐅᔭᕆᐊᓖᑦ ᓴᖅᑭᑕᐅᓯᒪᔪᑦ ᐊᖏᔪᒻᒪᕆᒻᒥᒃ ᐅᑭᐅᓄᑦ-ᐱᖓᓱᓄᑦ ᐱᕙᓪᓕᐊᓂᐅᔪᓂᑦ ᐃᓚᖃᖅᑐᑎᒃ ᐃᓄᓐᓂᒃ ᐊᓛᔅᑲᒥᑦ, ᑲᓇᑕᒥᑦ, ᑲᓛᖡᑦ ᓄᓈᓐᓂᑦ, ᐊᒻᒪᓗ ᓱᑯᑦᑲ (ᕋᓯᐊ). ᐊᕐᕌᒎᕋᑖᖅᑐᒥ, ᐃᓄᐃᑦ ᑲᑎᒪᔭᖅᑐᖅᓯᒪᔪᑦ ᑲᑎᖃᑦᑕᓚᐅᒻᒪᑕ ᑭᖑᓕᕇᓂᒃ ᖃᕆᑕᐅᔭᒃᑯᑦ ᑲᑎᒪᓂᐅᔪᓂ ᐋᖅᑭᔅᓯᖃᑎᒌᖁᓪᓗᒋᑦ ᒪᓕᑦᑕᐅᔭᕆᐊᓕᓐᓂᒃ ᑲᒪᒋᔭᐅᖁᓪᓗᒋᑦ ᑲᔪᓰᓐᓇᖅᑐᑦ ᐃᓱᒫᓘᑕᐅᔪᑦ. ᐅᑭᐅᖅᑕᖅᑐᓕᒫᒥ, ᐊᖏᓪᓕᕙᓪᓕᐊᒻᒪᑕ ᐅᖃᒪᔭᐅᑕᐅᔪᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐊᖏᓕᕙᓪᓕᐊᓂᖏᓐᓄᑦ ᑭᓱᔅᓴᖅᓯᐅᖅᑐᑦ, ᐊᖏᓕᕙᓪᓕᐊᓂᖏᓐᓄᑦ ᖃᐅᔨᓴᕐᓂᕐᒧᑦ ᐱᒋᐊᕈᑕᐅᓯᒪᔪᑦ, ᐊᒻᒪᓗ ᐊᖏᓪᓕᕙᓪᓕᐊᓂᖏᓐᓄᑦ ᐃᓱᒪᒋᔭᐅᓯᒪᔪᑦ ᐊᐅᓚᑦᑎᓂᕐᒨᖓᔪᓄᑦ ᐱᓕᕆᐊᓄᑦ. ᑕᕝᕙᓂᑦᑕᐃᓐᓇᖅ, ᓄᓇᕐᔪᐊᓕᒫᒥ ᐋᔩᖃᑎᒌᓐᓃᑦ ᑲᔪᓯᔪᑦ ᑖᒃᑯᓄᖓ ᐱᔾᔪᑎᓕᓐᓄᑦ ᐊᒻᒪᓗ ᖄᒃᑲᓐᓂᐊᒍᑦ ᐱᔾᔪᑕᐅᔪᓄᑦ ᓲᕐᓗ ᐆᒪᔪᑦ ᐊᔾᔨᒌᖏᓐᓂᖏᓐᓄᑦ, ᐅᒥᐊᕐᔪᐊᑦ ᓄᑦᑕᕐᓂᖏᓐᓄᑦ, ᓂᕐᔪᑎᓄᑦ ᐊᒻᒪᓗ ᐱᕈᖅᑐᓄᑦ, ᐊᒻᒪᓗ ᓂᕿᖃᑦᑎᐊᕐᓂᕐᒧᑦ ᒪᓐᓇ ᐊᐅᓚᓂᖃᕐᑐᓄᑦ ᐊᑦᑐᐃᓲᓄᑦ ᐅᑭᐅᖅᑕᖅᑐᒥᒃ ᐊᒻᒪᓗ ᐃᓅᓯᕆᔭᐅᔪᓂᒃ.
ᐊᔾᔨᒌᑎᑦᑎᓂᒃᑯᑦ ᐊᒻᒪᓗ ᐱᓇᓱᐊᑦᑎᐊᕐᓂᒃᑯᑦ ᐃᓚᐅᑎᑦᑎᓂᖅ ᐱᑕᖃᕆᐊᓕᒃ ᐃᓄᐃᑦ ᓯᕗᓕᖅᑎᐅᓗᑎᒃ ᑖᒃᑯᓇᓂ ᐱᓕᕆᐊᓂ, ᐅᖃᒪᔭᖃᑎᒌᓐᓂᐅᔪᓂ, ᐊᒻᒪᓗ ᐊᑐᐊᒐᐃᑦ ᓴᓇᔭᐅᓂᖏᓐᓂ. ᓯᓚᕐᔪᐊᓕᒫᒥ ᐃᓄᓐᓄᑦ ᐊᑐᖅᑕᐅᔭᕆᐊᓖᑦ ᐊᔾᔨᒌᑎᑦᑎᓂᒃᑯᑦ ᐊᒻᒪᓗ ᐱᓇᓱᐊᑦᑎᐊᕐᓂᒃᑯᑦ ᐃᓚᐅᑎᑦᑎᓂᕐᒥᒃ ᐊᑐᖅᑕᐅᔭᕆᐊᓖᑦ ᐊᑐᐃᓐᓇᕈᐃᕙᒻᒪᑕ ᐊᖅᑯᑎᓂᒃ ᑲᔪᓯᑦᑎᐊᕐᓂᕐᒧᑦ ᓯᓚᕐᔪᐊᓕᒫᒥ ᑎᒥᐅᔪᓄᑦ, ᖃᐅᔨᓴᖅᑎᓄᑦ, ᐃᓱᒪᓕᐅᕆᔨᓄᑦ – ᐊᒻᒪᓗ ᐊᑐᐊᒐᓕᐅᖅᑎᓄᑦ, ᐅᖃᐅᓯᕆᑐᐃᓐᓇᕐᓗᒍ, ᐊᔾᔨᒌᑎᑦᑎᓂᒃᑯᑦ ᐊᒻᒪᓗ ᐱᓇᓱᐊᑦᑎᐊᕐᓂᒃᑯᑦ ᐃᓚᐅᑎᑦᑎᓂᕐᒥᒃ ᐊᑐᖅᑕᐅᔭᕆᐊᓖᑦ ᑕᐃᒎᓰᑦ ᓂᕆᐅᒋᔭᕗᑦ ᐊᑐᖅᑕᐅᓂᐊᖅᑐᑦ ᑕᒪᐃᓐᓂ ᐱᓕᕆᐊᓂ ᐊᑦᑐᐃᔪᓂ ᐊᖏᕐᕋᕆᔭᑦᑎᓐᓂᒃ.
ᐃᓄᖁᑎᕗᑦ ᑎᒍᒥᐊᖅᑎᐅᒻᒪᑕ ᐅᑭᐅᑦ ᑕᐅᓴᖏᓐᓂᑦ ᖃᐅᔨᒪᓂᐅᔪᓂᒃ ᐊᒻᒪᓗ ᓇᓗᓇᐃᖅᑕᐅᓯᒪᔪᓂᒃ ᑲᔪᓰᓐᓇᕈᓐᓇᖅᑐᓂᒃ ᐊᑐᕐᓂᒃᑯᑦ. ᑭᓯᐊᓂ, ᓄᓇᓕᒋᔭᕗᑦ ᐊᒻᒪᓗ ᖃᐅᔨᒪᓂᕆᔭᕗᑦ ᐊᔾᔨᒌᑎᑦᑎᓂᒃᑯᑦ ᐊᒻᒪᓗ ᐱᓇᓱᐊᑦᑎᐊᕐᓂᒃᑯᑦ ᐃᓚᐅᖃᑕᐅᓯᒪᖏᒻᒪᑕ ᐱᓕᕆᐊᓂ, ᐃᓱᒪᓕᐊᓂ, ᐅᕝᕙᓘᓐᓃᑦ ᐊᑐᐊᒐᓂ ᐊᑦᑐᐃᔪᓂᒃ ᐅᕙᑦᑎᓐᓂᒃ. “ᓄᓇᖃᖅᑳᖅᓯᒪᓪᓗᑕ ᐊᒻᒪᓗ ᒥᐊᓂᖅᓯᔨᐅᑎᓪᓗᑕ ᐅᑭᐅᖅᑕᖅᑐᒥ, ᐱᔪᓐᓇᕐᓂᖃᖅᑐᒍᑦ ᐊᒻᒪᓗ ᑲᒪᒋᔭᖃᕆᐊᖃᑦᑐᑕ ᓴᐳᒻᒥᓗᒍ ᐊᕙᑎᕗᑦ ᐊᒻᒪᓗ ᐱᖅᑯᓯᕗᑦ.” ᐅᖃᓚᐅᖅᑐᖅ ᔭᐃᒥᓯ ᓯᑖᑦᔅ, ᐊᖓᔪᖅᑳᕆᔭᐅᔪᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐊᓛᔅᑲᒥ. “ᖃᐅᔨᒪᓂᕆᔭᕗᑦ ᑕᑎᒋᔭᐅᔭᕆᐊᓕᒃ ᑐᓴᐅᒪᓂᒃᑯᑦ ᐃᓱᒪᓕᐅᕆᔪᖃᕐᓂᐊᖅᑎᓪᓗᒍ ᑕᒪᐃᓐᓂ ᐱᓕᕆᐊᓂ.”
“ᓴᐱᓕᙱᓚᒍᑦ ᑕᒪᐃᓐᓄᑦ ᑐᔅᓯᕋᖅᑐᑕ ᐃᓕᑕᕆᔭᐅᖁᓪᓗᒋᑦ ᑭᓲᓂᕗᑦ, ᐱᔪᓐᓇᕐᓂᕗᑦ, ᐊᒻᒪᓗ ᐱᔭᔅᓴᕆᔭᕗᑦ ᐊᑦᑐᐊᔪᓄᑦ ᑕᒪᐃᓐᓄᑦ ᐱᔾᔪᑕᐅᔪᓄᑦ ᐃᓱᒫᓘᑕᐅᔪᓄᑦ ᐅᕙᑦᑎᓐᓄᑦ,” ᐅᖃᓚᐅᖅᑐᖅ ᓘᒃᑖᖅ ᑖᓕ ᓵᒻᐳ ᑐᕈ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᓄᓇᕐᔪᐊᓕᒫᒥ ᐃᔅᓯᕙᐅᑕᖓᑦ.ᐊᔾᔨᖓ ᓱᓕᔪᖅ ᐊᑐᕐᓗᑕ ᓇᒻᒥᓂᖅᓱᕈᒪᓂᑦᑎᓐᓂᒃ ᐊᑦᑐᐊᔪᓄᑦ “ᐱᔭᕐᓂᖏᑦᑐᒃᑯᑦ ᖃᐅᔨᒪᓂᕆᔭᑦᑎᓐᓂᒃ” ᐱᒋᐊᖅᑎᑦᑎᔨᒋᓚᐅᖅᑕᑦᑕ, ᐄᐱᓐ Hᐋᑉᓴᓐ, ᐅᖃᐅᓯᕆᓚᐅᖅᓯᒪᔭᖓ 1977-ᒥ. ᑕᓐᓇ ᑎᑎᕋᖅᓯᒪᔪᖅ ᐊᑐᐃᓐᓇᕈᐃᓯᒪᔪᖅ ᓴᓇᓯᒪᓂᖏᓐᓂᒃ ᐊᖏᓕᒋᐊᖅᓯᒪᓂᖏᓐᓄᑦ ᐊᒻᒪᓗ ᐱᓕᕆᔾᔪᓯᕐᓄᑦ ᑐᙵᕕᐅᔪᓂᒃ ᐃᓚᐅᖃᑕᐅᖁᓪᓗᒋᑦ ᐃᓄᐃᑦ ᐊᒻᒪᓗ ᐊᔾᔨᒌᖏᑦᑐᑦᓄᑦ ᐅᖃᐅᓯᐅᔪᓄᑦ ᐊᑦᑐᐃᓂᖃᖅᑐᓂᒃ ᑕᒪᐃᓐᓂᑦᑎᐊᖅ ᐃᓅᓯᑦᑎᓐᓂᒃ ᐃᓅᓪᓗᑕ, ᖃᐅᔨᒪᓂᕆᔭᕗᑦ ᐃᓚᐅᓪᓗᓂ.”
8-ᖑᔪᑦ ᐊᑐᖅᑕᐅᔭᕆᐊᓖᑦ ᑕᕝᕙᓂ ᑎᑎᕋᖅᓯᒪᔪᒥ. ᐃᓛᒃᑯᑦ ᐊᑐᐃᓐᓇᕈᐃᔪᖅ ᒪᓕᑦᑕᐅᔪᔅᓴᓂᒃ ᐊᒻᒪᓗ ᑎᓕᓯᔾᔪᑕᐅᓯᒪᔪᓂᒃ ᑲᔪᓯᑎᑕᐅᖁᓪᓗᒋᑦ ᐊᒥᖅᑳᕈᑕᐅᓯᒪᔪᑦ ᑐᕌᒐᕆᔭᐅᔪᑦ ᐃᑉᐱᒋᓯᓐᓈᑦ ᐃᓄᐃᑦ ᓇᔪᖅᑕᖏᑦ ᐊᒻᒪᓗ ᓇᒻᒥᓂᖅᓱᕈᒪᓂᖏᑦ. “ᓯᕗᓪᓕᖅᐹᖁᑎᒋᔭᕗᑦ ᒪᓕᑦᑕᐅᔭᕆᐊᓕᒃ ᐃᓚᖃᖅᑐᖅ ᐱᒻᒪᕆᐅᔪᒥᒃ ᐅᖃᐅᓯᐅᓯᒪᔪᒥᒃ” ‘ᐱᑕᖃᖏᑦᑐᖅ ᐅᕙᑦᑎᓐᓄᑦ ᐃᓚᐅᑎᓐᓇᑕ.’ ᐃᓚᖃᖅᑐᖅ ᑕᒪᐃᓐᓂᒃ: ᓂᓪᓕᐅᑕᐅᓂᖓ, ᐱᒻᒪᕆᐅᒋᔭᐅᓂᖓ, ᑐᙵᕕᖓ, ᐊᒻᒪᓗ ᒪᓕᑦᑕᐅᔪᔅᓴᖅ ᐅᑉᐱᒍᓱᑦᑐᖓ ᒪᓕᑦᑕᐅᔭᕆᐊᖃᖅᑐᖁᑎᕗᑦ ᐃᑲᔫᑎᖃᕐᓂᐊᒻᒪᑕ ᐃᓅᖃᑎᖃᕈᓐᓇᖁᓪᓗᑕ ᑭᒃᑯᓕᒫᓂᒃ,” ᐅᖃᓚᐅᖅᑐᖅ ᓕᐅᐸᕝ ᑕᐃᐋᓐ, ᐊᖓᔪᖅᑳᕆᔭᐅᔪᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓱᑯᑦᑲ.
ᐊᑐᓕᖅᑎᑕᐅᓂᖏᑦ ᑕᒪᕐᒥᒃ 8-ᖑᔪᑦ ᐊᑐᖅᑕᐅᔭᕆᐊᓖᑦ ᓴᖅᑮᓂᐊᖅᑐᖅ ᐱᐅᓂᖅᓴᓂᒃ ᖃᐅᔨᓴᕐᓂᐅᔪᓂᒃ. ᐅᖃᓚᐅᕐᒪᑦ ᑰᐱᒃ ᑲᓚᐃᔅᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓛᖦᖡᑦ ᓄᓈᓐᓂᑦ. “ᐅᐱᕐᖔᑕᒫᑦ, ᑕᑯᖃᑦᑕᖅᑐᒍᑦ ᐊᕕᑦᑐᖅᓯᒪᔪᓂᒃ ᖃᐅᔨᓴᖅᑎᓂᒃ ᓄᓇᑦᑎᓐᓄᑦ. ᖃᐅᔨᒪᓇᑕ ᖃᓄᐃᓕᐅᕐᓂᐊᕐᒪᖔᑕ ᐊᒻᒪᓗ ᑐᓴᓚᐅᖅᓯᒪᓇᑕᓗᑦᑕᐅ ᖅᑲᐅᔨᓴᖅᑕᕕᓂᖏᑕ ᒥᔅᓵᓄᑦ. ᑕᐃᒃᑯᐊ ᐊᒻᒪᓗ ᐅᕙᒍᑦ ᐱᕚᓪᓕᕋᔭᖅᑐᒍᑦ ᒪᓕᒃᑯᑦᑕ ᐊᑖᓃᑦᑐᓂᑦ ᐊᔾᔨᒌᑎᑦᑎᓂᒃᑯᑦ ᐊᒻᒪᓗ ᐱᓇᓱᐊᑦᑎᐊᕐᓂᒃᑯᑦ ᐃᓚᐅᑎᑦᑎᓂᕐᒥᒃ ᐱᓕᕆᓂᒃᑯᑦ ᐊᑐᖅᑕᐅᔭᕆᐊᓕᓐᓂ.”
ᐊᔾᔨᒌᑎᑦᑎᓂᒃᑯᑦ ᐊᒻᒪᓗ ᐱᓇᓱᐊᑦᑎᐊᕐᓂᒃᑯᑦ ᐃᓚᐅᑎᑦᑎᓂᕐᒧᑦ ᐊᑐᖅᑕᐅᔭᕆᐊᓖᑦ ᐱᔾᔪᑎᖃᑐᐃᓐᓇᖏᑦᑐᑦ ᖃᐅᔨᓴᕐᓂᕐᒥᒃ. ᑖᒃᑯᐊᑦᑕᐅᖅ ᐱᔾᔪᑎᖃᖅᑐᑦ ᐃᓱᒪᓕᐅᕆᓂᕐᓄᑦ ᐊᒻᒪᓗ ᐊᑐᐊᒐᓄᑦ. “ᑎᒥᐅᔪᑦ ᐊᒻᒪᓗ ᐃᓕᓐᓂᐊᕝᕕᔾᔪᐊᑦ ᓲᕐᓗ ᐅᑭᐅᖅᑕᖅᑐᒥ ᑲᑎᒪᔨᖏᑦ ᐊᒻᒪᓗ ᐱᓕᕆᔨᐅᔪᑦ ᓄᓇᕐᔪᐊᕐᒥ ᑲᑐᔾᔨᖃᑎᒌᖏᓐᓂᑦ ᓈᓚᑦᑎᓪᓗᐊᑕᐅᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂᒃ.” ᐅᖃᓚᐅᖅᑐᖅ ᒫᓂᑲ ᐃᐅᓪ-ᑲᓇᔪᖅ, ᐊᖓᔪᖅᑳᕆᔭᐅᔪᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᓇᑕᒥ. “ᓴᓇᔭᐅᓂᖏᑦ ᑖᒃᑯᐊ ᓯᓚᕐᔪᐊᓕᒫᒥ ᐊᑐᖅᑕᐅᔭᕆᐊᓖᑦ ᐱᓇᓱᐊᑦᑎᐊᕐᓂᒃᑯᑦ ᐊᒻᒪᓗ ᐊᔾᔨᒌᑎᑦᑎᓂᒃᑯᑦ ᐃᓚᐅᑎᑕᐅᓂᖏᓐᓄᑦ ᐃᓄᐃᑦ ᓄᓇᒋᔭᖏᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᐱᒻᒪᕆᐅᒻᒪᑦ ᓯᕗᒻᒧᐊᖁᓪᓗᒋᑦ ᐊᐅᓚᑦᑎᓂᕆᔭᕗᑦ ᐊᒻᒪᓗ ᓯᕗᓂᔅᓴᒥ ᐃᓚᐅᖃᑕᐅᓂᑦᑎᓐᓄᑦ ᓯᓚᕐᔪᐊᓕᒫᒥ ᑲᑎᒪᕕᓐᓄᑦ.”
ᐊᔾᔨᒌᑎᑦᑎᓂᒃᑯᑦ ᐊᒻᒪᓗ ᐱᓇᓱᐊᑦᑎᐊᕐᓂᒃᑯᑦ ᐃᓚᐅᑎᑦᑎᓂᕐᒧᑦ ᐊᑐᖅᑕᐅᔭᕆᐊᓖᑦ ᐊᒻᒪᓗ ᐃᓚᒋᔭᖏᑦ ᑎᑎᕋᖅᓯᒪᔪᑦ ᐊᑭᖃᖏᑦᑐᒃᑯᑦ ᑐᖅᑯᖅᑕᐅᔪᓐᓇᕐᑐᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐃᑭᐊᖅᑭᕕᖏᓐᓂ: iccalaska.org (ᐊᓛᔅᑲ) inuitcircumpolar.com (ᑲᓇᑕ), inuit.org (ᑲᓛᖦᖡᑦ ᓄᓈᑦ) ᐊᒻᒪᓗ iccchukotka.ru (ᓱᑯᑦᑲ).
ᑐᓴᕝᕕᔅᓴᑦ:
ᑭᐅᕈᓚᐃᓇ ᐱHᐃ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᐊᓚᔅᑲ) carolina@iccalaska.org
ᒥᓚᑎ ᓚᕙᓖ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᑲᓇᑕ) mlavallee@inuitcircumpolar.com
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓛᖦᖡᑦ ᓄᓈᑦ iccgreenland@inuit.org