ᖁᔭᓕᔭᐅᔭᕆᐊᓖᑦ ᑲᓇᑕᐅᑉ ᒐᕙᒪᒃᑯᑦ ᐃᖃᓇᐃᔭᕐᕕᖓ ᑕᐃᑲᓂ ᑲᓇᑕᒥᐅᑦ ᐱᐅᓯᑐᖃᕆᔭᖏᓐᓂᒃ – ᓄᓇᓕᑐᖃᐃᑦ ᐅᖃᐅᓯᑐᖃᖏᓐᓄᑦ ᐃᓚᒋᔭᐅᖃᑕᐅᓂᖏᑦ, ᐊᐃᓯᓰᒃᑯᑦ ᑲᓇᑕᒥ ᑐᓂᔭᐅᓯᒪᓕᕐᒪᑕ ᑮᓇᐅᔭᓂᒃ ᐃᑲᔫᑎᒃᓴᓂᒃ ᖁᕕᐊᓲᑕᐅᓂᖏᓐᓂ ᐃᓕᖅᑯᓯᑐᖃᕆᔭᐅᔪᑦ ᐊᒻᒪᓗ ᐅᖃᐅᓯᑐᖃᕆᔭᐅᔪᑦ ᑲᓇᑕᒥ.
ᖁᕕᐊᓲᑕᐅᓂᕐᒧᑦ ᓯᕗᓪᓕᕆᔭᖅ ᐊᕐᕌᒍᖓ ᑖᒃᑯᓄᖓ ᓄᓇᕐᔪᐊᕐᒥ ᑕᐱᕇᑦ ᖁᓕᓂᒃ 10 ᐊᕐᕌᒍᓂᒃ ᐃᓕᑕᕆᔭᐅᑎᑦᑎᓐᓂᖏᑦ ᓇᓂᑐᐃᓐᓇᖅ ᐅᖃᐅᓯᑐᖃᕆᔭᐅᔪᓂᒃ, ᐊᐃᓯᓯᒃᑯᑦ ᑲᓇᑕᒥ ᑲᔪᓯᑎᑦᑎᓂᐊᓕᖅᑐᑦ ᐱᓕᕆᐊᒃᓴᖏᓐᓂᒃ ᑕᐃᔭᐅᔪᓂᒃ “ᐊᐃᓯᓯᒃᑯᑦ ᑲᓇᑕᒥ ᐃᓄᐃᑦ ᓴᓇᐅᒐᓕᐅᖅᑎᖏᓂᒃ ᑕᕿᑕᒪᖅ”.
ᑕᕿᑕᒫᖑᓂᐊᖅᑐᖅ ᐱᒋᐊᕐᓗᑎᒃ ᔭᓄᐊᕆ 2023-ᒥᒃ ᑎᓯᐱᕆ 2023-ᒧᑦ, ᐃᓄᖕᓂ ᐃᓕᑕᖅᓯᖃᑕᕐᓂᐊᖅᑐᑦ ᑕᐃᑰᓇ ᑐᓴᖅᓴᐅᕙᒃᑐᑎᒍᑦ ᖃᕆᑕᐅᔭᒃᑯᑦ ᐊᑐᖅᑕᐅᖃᑕᕈᓐᓇᕐᓂᖅ ᑕᐃᔭᐅᔪᓂᒃ ᐅᓂᒃᑳᑦ – ᐃᓄᐃᑦ ᓴᓇᐅᒐᓕᐅᖅᑏᑦ ᐃᓕᑕᕆᔭᐅᓂᖏᓐᓂᒃ ᑐᓵᔭᒃᓴᐃᑦ ᑭᖑᓕᕇᖃᑕᕐᓂᐊᖅᑐᑦ. ᓴᓇᐅᒐᓕᐅᖅᑏᑦ ᐃᓕᖅᑯᓯᑐᖃᕐᒥᓂᒡᓗ ᐊᑐᕐᓂᖏᓐᓂ ᖃᓄᐃᓕᐅᖅᑎᐅᕙᒃᑐᑦ ᒪᑯᐊᖑᔪᓐᓇᖅᑐᑦ ᑭᓇᒃᑯᑐᐃᓐᓇᐃᑦ ᓂᔾᔭᐅᓯᔭᖅᑏᑦ/ᑐᓴᕐᓈᒐᒃᓴᓕᐅᖅᑏᑦ, ᑲᑕᔾᔭᖅᑏᑦ, ᕿᓚᐅᔾᔭᖅᑏᑦ, ᐅᓪᓗᒥᓯᐅᑎᐅᓂᖅᓴᓂᒃ ᑐᓴᕐᓈᒐᑦᓴᓕᐅᖅᑏᑦ ᒪᑯᓂᖓᓗ ᖃᓗᓈᑎᑐᑦ ᑕᐃᔭᐅᔪᓂᒃ ᐅᖃᐅᓯᖅᓱᖅᐸᒃᑐᓂᒃ ᐃᓐᖏᐅᑎᓂᒃ ᕌᑉ-ᒥᒃ, ᐹᑉ-ᖑᓂᕋᖅᑕᐅᔪᓂᒡᓗ ᓂᔾᔭᐅᓯᔭᖅᐸᒃᑐᓂᒃ, ᒥᖅᓱᖅᑕᐅᕙᓂᖏᓗ ᐃᓄᖕᓄᑦ ᐊᑎᒋᓕᐊᕆᔭᐅᕙᓕᖅᑐᑦ ᐊᓐᓄᕌᓪᓗ, ᒥᖅᓱᖅᑎᐅᕙᒃᑐᓪᓗ, ᑕᑯᒥᓇᖅᑐᓪᓗ ᐊᑐᖅᑕᐅᔪᓐᓇᖅᑐᓂᒃ ᓴᓇᔨᐅᕙᒃᑐᑦ, ᓱᖓᐅᔭᓂᒃ ᐊᑐᒐᒃᓴᓂᒃ ᓴᓇᔩᑦ, ᐊᒪᐅᔅᓯᐅᖅᑏᑦ, ᓴᓇᖑᐊᖅᑏᑦ, ᐊᑐᒐᒃᓴᓂᒃ ᐅᔭᒥᖕᓂᒃ ᐊᓯᖏᓐᓂᓗ ᓴᓇᔭᐅᔩᑦ, ᓂᕿᓕᐅᖅᑎᑦ/ᐃᓄᐃᑦ ᓂᕿᓪᓕᕆᕙᒃᑕᖏᓐᓂᒃ ᑎᑎᕋᖅᑏᑦ/ᓂᕆᔭᒃᓴᓂᒃ ᓂᐅᕐᕈᑎᒃᓴᖃᓲᑦ ᐊᒻᒪᓗ ᖃᓄᖅ ᓴᓇᔭᐅᕙᓐᓂᖏᓐᓂᒃ ᖃᐅᔨᒪᔨᑕᐃᑦ, ᒧᒥᖅᑏᑦ, ᑕᑯᒥᓇᖅᑐᓂᒃ ᓴᓇᕙᒃᑐᑦ, ᐃᕕᕋᓕᐅᖅᑏᑦ ᐃᓕᓯᕝᕕᒃᓴᑯᓗᖕᓂᒃ, ᐃᒡᓗᕐᔪᐊᑦ ᐃᓗᓕᖏᓐᓂᒃ ᖃᓄᐃᓕᖓᓂᖏᓐᓂᒃ ᐋᕿᒃᓱᐃᔩᑦ ᐊᒻᒪᓗ ᐃᓄᖕᓂᒃ ᐱᖑᐊᖅᑎᐅᕙᒃᑐᓂᒃ ᑎᒥᒃᑯᑦ ᐊᒃᓱᕈᕐᓇᖅᑐᓂᒃ ᐊᓯᒃᑲᓐᓂᖏᓐᓂᒡᓗ.
ᐃᓕᑕᕆᔭᐅᔪᑦ ᓴᓇᐅᒐᓕᐅᖅᑏᑦ ᖃᓄᐃᓕᐅᖅᑏᓪᓗ ᐊᓯᖏᑦ ᑐᓂᔭᐅᕙᖕᓂᐊᖅᑐᑦ $5000.00-ᓂᒃ ᐃᑲᔫᑕᐅᓂᐊᖅᑐᓂᒃ ᐱᓕᕆᐊᕆᕙᒃᑕᖏᓐᓄᑦ, ᓂᐱᐅᓕᖅᑕᐅᓗᑎᒡᓗ ᖃᕆᑕᐅᔭᒃᑯᑦ ᑐᓵᔭᒃᓴᓂᒃ ᐅᓂᒃᑳᓂᒃ – ᑐᓴᒐᒃᓴᓕᐊᕆᕙᒃᑕᖏᓐᓂᒃ ᐊᒻᒪᓗ ᓈᓚᐅᑎᒃᑰᕐᓗᑎᒡᓗ ᐊᒻᒪᓗ ᑕᑯᔭᒃᓴᓕᐊᕆᔭᐅᓗᑎᒃ ᖃᕆᑕᐅᔭᒃᑯᑦ ᐊᐃᓯᓯᒃᑯᓐᓄᑦ ᐃᑲᔪᖅᑕᐅᓗᑎᒃ, ᐊᒻᒪᓗ ᐊᑐᐃᓐᓇᐅᑎᑕᐅᓗᑎᒃ ᐊᐃᓯᓰᒃᑯᑦ ᑐᓴᒐᒃᓴᓕᐅᕐᕕᒋᕙᒃᑕᖓᒍᑦ, ᐅᖓᑖᓅᓪᓗ.
ᐊᐃᓯᓯᒃᑯᑦ ᑲᒪᔨᐅᓂᐊᖅᑐᑦ ᐃᑲᔪᖅᑎᐅᓂᖅ ᓴᓇᐅᒐᓕᐅᖅᑎᓂᒃ ᑐᓴᒐᒃᓴᓕᐅᖃᑕᕐᓗᑎᒃ ᖃᕆᑕᐅᔭᒃᑯᑦ ᐊᑐᖅᑕᐅᔪᓐᓇᖅᑐᓂᒃ ᑐᓵᔪᒪᔪᓄᑦ, ᐊᒻᒪᓗ ᐊᓯᖏᓐᓂᒃ ᑐᓴᒐᒃᓴᓕᐅᕈᑕᐅᓗᑎᒃ ᐊᒻᒪᓗ ᑐᓴᐅᒪᔭᐅᕙᓪᓕᐊᔪᓐᓇᕐᓂᖏᓐᓂᒃ ᑕᖃᐅᖓ.
ᐃᓚᐅᔪᓐᓇᖅᑐᑦ ᐃᒪᐃᓕᖓᔭᕆᐊᓖᑦ:
- ᐃᓄᐃᑦ ᐃᓕᖅᑯᓯᖏᓐᓂᒃ ᐊᑐᕈᒪᖃᑦᑕᕐᓗᑎᒃ, ᐃᓅᓯᖏᓐᓂᒡᓗ ᑕᒪᐃᓐᓂᒃ ᐊᕕᒃᑐᖅᓯᒪᓂᖏᓐᓂ ᑲᓇᑕᓕᒫᒥᓗ ᐃᓄᖕᓂ ᐊᓯᖏᓐᓂᒃ ᓄᓇᓕᒡᔪᐊᕐᓂ.
- ᐊᔪᖏᑦᑕᕆᐊᓖᑦ ᐅᖃᕈᓐᓇᕐᓂᖅ ᐊᐱᖅᓱᖅᑕᐅᓂᖏᓐᓂ ᐃᓄᒃᑎᑐᑦ, ᖃᓪᓗᓈᑎᓗᓐᓂᑦ.
- ᐊᔾᔨᓕᐅᖅᑕᐅᔪᓐᓇᕐᓗᑎᒃ ᐊᓯᒥᓂ ᓴᓇᒐᓕᐅᖃᑕᐅᕙᖕᒥᔪᓂᒃ ᐊᒻᒪᓗ ᐱᓕᕆᐊᕆᔭᖏᓐᓂᒃ ᐊᐃᓯᓰᒃᑯᑦ ᑕᑯᓂᐊᖅᑕᐅᕝᕕᖓᒍᑦ ᖃᕆᑕᐅᔭᒃᑯᑦ ᓴᕿᑎᑕᐅᓯᒪᓂᐊᖅᑐᓂᒃ.
- ᖃᕆᑕᐅᔭᒃᑯᑦ ᑭᓇᐅᖕᒪᖔᑦ ᖃᐅᔨᒋᕐᕕᐅᔪᓐᓇᕆᐊᓖᑦ ᑕᑯᔭᒃᓴᓂᒃᑕᐅᓯᒪᓗᓂ ᑕᒪᐃᓐᓂᒃ ᐃᓄᖕᓂᒃ ᐃᑲᔪᖅᑎᒋᔭᒥᓂᒃ ᐃᓚᖃᕐᓗᓂ.
- ᐊᑎᓕᐅᖅᑕᐅᓯᒪᓗᔭᕆᐊᓕᒃ ᓇᓕᐊᖕᓂᑐᐃᓐᓇᖅ ᐃᓄᐃᑦ ᓄᓇᑖᕈᑎᖏᓐᓂ ᐊᖏᕈᑎᖃᖃᑕᐅᔪᓂ ᑲᓇᑕᒥ.
- ᐊᓯᖏᓐᓂᒃ ᑮᓇᐅᔭᖅᑖᖅᑎᑕᐅᓯᒪᓯᒪᔪᕕᓂᐅᓐᖏᓪᓗᓂ, ᖃᓄᑐᐃᓐᓇᖅ ᐅᕝᕙᓗᓐᓃᑦ ᐃᓕᓐᓂᐊᒃᑲᓐᓂᕈᑎᒃᓴᓂᒃ ᐱᓯᒪᔪᕝᕕᐅᓂᖏᓪᓗᓂ ᐱᓕᕆᐊᕆᔪᓐᓇᖅᑕᖏᓐᓄᑦ ᐱᕚᓪᓕᕈᑕᐅᔪᓐᓇᖅᑐᓂᒃ ᑕᒫᓂ 12-ᓂᒃ ᑕᕿᓂᒃ ᓯᕗᓂᐊᒍᑦ ᐃᓕᑕᕆᔭᐅᕝᕕᒃᓴᖓᑕ ᐱᒋᐊᕐᓗᓂ ᑕᒫᓂ ᓄᕕᐱᕆ 2022-ᒥᒃ.
*ᐃᓄᐃᑦ ᓄᓇᖃᓕᖅᑐᑦ ᓯᓚᑖᓂ ᐊᕕᒃᑐᖅᓯᒪᓂᖏᓐᓂᒃ ᓄᓇᑖᕐᕕᒋᓯᒪᔭᒥᓂᒃ ᓱᓕ ᐃᓚᐅᔪᓐᓇᖅᑐᑦ ᑭᓯᐊᓂ ᑎᑎᖃᐅᑎᖃᕆᐊᖃᖅᑐᑦ ᑕᑯᔭᒃᓴᖃᕐᓗᑎᒡᓗᓐᓂᑦ ᓄᓇᑖᖃᑕᐅᓯᒪᓂᕐᒥᓂᒃ.*