ᑎᓯᐱᕆ 13, 2019 – ᐱᐅᑐᕋᑦ, ᓯᐸᐃᓐ – ᐃᓄᐃᑦ ᓯᕗᓕᖅᑏᑦ ᓴᖅᑭᖅᑐᑦ UNFCCC−ᒥ COP25 ᓯᓚ ᐊᓯᔾᔨᐸᓪᓕᐊᓂᖓᓐᓂ ᑲᑎᒪᓂᐅᔪᒥᑦ ᓇᓗᓇᐃᖅᓯᓂᐊᕐᒥᔪᑦ ᐱᒋᐊᕈᑎᖏᓐᓂ ᐆᑦᑐᕈᓐᓇᕐᓂᖏᓐᓂᓪᓗ ᑲᒪᒋᔭᐅᒋᐊᓕᓐᓂᒃ ᒐᕙᒪᒃᑯᓐᓂ, ᑯᐊᐳᕇᓴᓐᓂᑦ, ᐃᓄᑐᐃᓐᓇᓂᓪᓗ ᑕᒪᒃᑯᓂᖓ ᑲᒪᒍᓐᓇᖅᑐᓂᑦ ᓯᓚ ᐊᔾᔨᐸᓪᓕᐊᓂᖓᓂ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᔅᓯᕙᐅᑕ ᑕᓕ ᓵᒻᐳ ᑐᕈ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᑉ ᑐᖏᓕᖓ ᓖᓴ ᖁᐱᕐᕈᐊᓗᒃ, ᐊᒻᒪᓗ ᑲᓇᑕᒥ ᐃᓄᐃᑦ ᐃᓄᓱᑦᑐᓄᑦ ᑲᑎᒪᔨ ᐊᖏᔪᖅᑲᖓ ᑯᕆᔅᑐ ᒫᕐᑎᓐ-ᓚᐸᓐᔅᑭ ᐊᑐᓂ ᐅᓂᒃᑳᓛᖅᑐᑦ ᑲᑎᒪᑎᓗᒋᑦ − ᑕᐃᑲᓐᖔᕐᓗᑎᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐊᒻᒪᓗ ᖃᐅᔨᓴᖅᑎᒻᒪᕇᑦ ᐅᖃᐅᓯᕆᓯᒪᔭᖏᓐᓂ − ᐃᑲᔪᖅᑐᐃᓗᑎᑦ ᑕᒪᑐᒥᖓ ᐅᖃᐅᓯᐅᔪᒥᑦ ᐱᒋᐊᕈᑎᖃᕆᐊᖃᓪᓚᕆᓕᕐᓂᖏᓐᓂ ᑕᒪᑐᒥᖓ ᑐᐊᕕᕐᓇᖅᓯᔪᒥᑦ ᓯᓚᓕᕆᓂᕐᒥᑦ ᓯᓚᕐᔪᐊᒥ.
COP25 ᐋᖅᑭᑦᑕᐅᓯᒪᔪᖅ ᑲᒪᒋᔭᐅᒋᐊᓕᒻᒥ ᐱᒋᐊᖅᐸᓪᓕᐊᓗᑎᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᑕ ᓯᓚ ᐊᓯᔾᔨᐸᓪᓕᐊᓂᖓᓐᓂ ᑲᒪᔪᓂᒃ. ᑕᒪᓐᓇ ᑐᕌᒐᖓ ᐊᒥᓱᑲᓪᓚᓐᓂᒃ ᑲᒪᒋᐊᖃᕋᔭᕐᖓᑕ ᐃᓚᓕᐅᔾᔨᓗᑎᑦ ᐸᕇᔅᒥ ᓯᓚ ᐊᓯᔾᔨᕐᓂᖓᓐᓄᑦ ᐊᖏᕈᑎᖓᑦᑕ ᐱᒋᐊᕈᑎᔅᓴᖏᓐᓂ, ᐱᖃᓯᐅᓗᑎᒋᑦ ᒪᓕᒐᓕᐅᕐᓗᑎᑦ ᐳᔪᕐᓗᐊᓗᓐᓂ ᓴᖅᑭᐸᑦᑐᓂᑦ ᓴᓇᕕᓐᓂᒃ.
ᑭᓯᐊᓂᓕ, ᑖᓐᓇ ᑲᑎᒪᓂᐅᔪᖅ ᑕᑯᔭᐅᒻᒪᑦ ᐊᒥᓱᓄᑦ ᓅᑦᑎᒋᐊᖅᑐᖅ ᑭᓯᐊᓂ ᓱᒃᑲᐃᓗᐊᕐᖓᑦ ᐊᑐᓕᖅᑎᑕᐅᒋᐊᓖᑦ ᑕᐃᒃᑯᐊ ᖃᐅᔨᒪᔭᐅᔪᑦ ᐸᕆᔅᒥ “ᒪᓕᒐᐃᑦ ᑎᑎᕋᖅᓯᒪᔪᑦ” − ᓄᖅᑲᑎᑦᑎᑲᓐᓂᕋᓱᒋᐊᖃᓕᕋᑦᑕ ᐳᔪᕐᓗᐊᓗᓐᓂᒃ ᐊᓂᕐᓂᑎᓐᓅᖅᐸᑦᑐᓂ ᐊᖏᕈᑎᑎᒍᑦ ᐱᓗᒍ. ᐊᒥᓱᑦ ᑕᑯᓯᒪᓕᕐᖓᑕ ᑕᒪᓐᓇ ᑕᖅᑭᕆᓚᐅᖅᑕᑎᓐᓂ ᓯᓚᕐᔪᐊᒥ ᑲᑐᔾᔨᖃᑎᒌᑦ ᐊᕙᑎᓕᕆᓂᕐᒧᑦ ᐊᓂᕐᓂᑎᓐᓅᖅᑲᖅᑐᓂᑦ ᐅᓂᒃᑳᒃ ᐃᓚᑰᓂᖓᓐᓂ, ᐊᖏᓪᓕᒋᐊᖅᓯᒪᒻᒪᕆᒻᒪ ᐳᔪᕐᓗᐊᓗᒃ ᐊᓂᕐᓂᑎᓐᓅᖅᑲᓕᕐᖓᑕ 1.5%−ᒪᕆᒻᒥᑦ ᐊᕐᕌᒍᑕᒫᑦ ᐅᑭᐅᓄᑦ ᖁᓕᐅᓕᖅᑐᓄᑦ. ᐅᓂᒃᑳᖅ ᐅᖃᖅᓯᒪᒻᒥᔪᖅ ᑕᒪᓐᓇ ᓱᒃᑲᓕᓂᖓ, ᐆᓇᖅᓯᓪᓕᐊᔪᖅ ᐊᖏᓪᓕᒋᐊᕈᒫᖅᑐᖅ 3.2°C−ᒥᑦ ᑕᒫᓂ 2000−ᖏᓐᓃᑦᑐᓂᑦ ᐊᕐᕌᒍᖃᖅᑎᓪᓗᑕ. ᑕᒪᓐᓇ ᑐᕌᒐᕆᔭᐅᔪᒥᑦ ᐊᖏᓂᖅᓴᒻᒪᕆᒃ 1.5°C− ᐸᕇᔅᓯ ᐊᖏᕈᑕᐅᓯᒪᔪᒥᑦ ᐊᒻᒪᓗ ᑲᑉᐱᐊᓇᖅᑐᕐᔪᐊᕌᓗᒃ ᑕᒪᓐᓇ ᓯᓚᕐᔪᐊᒧ ᐱᓗᐊᖅᑐᒧᑦ ᐅᑭᐅᖅᑕᖅᑐᒧ.
ᐃᓄᐃᑦ ᐱᓕᕆᖃᑎᖃᖅᓯᒪᒻᒪᑕ ᐃᖅᑲᓇᐃᔭᕐᕕᐅᔪᓂᒃ ᓲᕐᓗ ᒐᕙᒪᒃᑯᑦ ᑲᑎᒪᔨᖏᓐᓂ ᓯᓚ ᐊᓯᔾᔨᐸᓪᓕᐊᓐᖓᓄᑦ ᑐᓴᖅᑕᐅᓇᓱᐊᖅᑐᑎᑦ ᐱᒋᐊᕈᑎᒋᔪᒪᔭᖏᓐᓂ ᒫᓐᓇᐅᔪᖅ. “ᐃᓚᒋᔭᐅᓚᐅᕋᑦᑕ ᒪᐅᓇᑐᐃᓐᓇᖅ ᐅᓂᒃᑳᓕᐊᖑᓯᒪᔪᒥᑦ ᐃᒪᕕᒻᒥ ᓯᑯᐃᓪᓗ ᒥᔅᓵᓄᑦ,” ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᔅᓯᕙᐅᑕᖓ ᑕᓕ ᓵᒻᐳ ᑐᕈ. “ᑐᓴᐅᒪᓪᓗᑕ ᐅᓂᒃᑳᓚᐅᖅᑐᒍᑦ ᑲᑎᒪᓂᕐᒥᑦ, ᓈᒻᒪᓴᓐᖏᓂᑦᑎᓐᓂ ᓱᒃᑲᓕᔪᐊᓗᒻᒥ ᓯᓚ ᐊᓯᔾᔨᐸᓪᓕᐊᓂᖓᓐᓂ ᐅᑭᐅᖅᑕᖅᑐᒥ ᑕᕝᕙᓂ ᓯᓚᕐᔪᐊᒥ − ᐊᖏᕐᕋᑎᓐᓂ. ᑕᒪᒃᑯᐊ ᐅᖃᐅᓯᕇᓐᓇᖃᑦᑕᕋᑦᑎᒍ ᑕᐃᑲᓂ ᒐᕙᒪᒃᑯᑦ ᑲᑎᒪᔨᖏᓐᓂ ᓯᓚ ᐊᓯᔾᔨᐸᓪᓕᐊᓐᖓᓄᑦ ᐅᓂᒃᑲᖅ ᐱᓇᓱᐊᕈᓯᐅᓚᐅᖅᑑᓐᓂᒃ ᒪᕐᕉᓐᓂᒃ. ᓯᑯᕗᑦ ᐊᐅᓕᕐᖓᑦ, ᐃᒪᕕᕗᑦ ᐅᓗᕆᐊᓇᖅᑐᒦᓕᖅᑐᑎᑦ ᓯᓚᕐᔪᐊᕗᓪᓗ ᐃᑭᓕᖅᑐᓂ.”
ᓵᒻᐳ ᓴᕈ ᐅᖃᖅᑐᓂᓗ ᓯᓚᕐᔪᐊᒥ ᐃᓄᓐᓄᑦ ᐱᔪᓐᓇᐅᑎᑏᑦ ᐅᓪᓗᖃᓚᐅᖅᑐᑦ ᑎᓯᐱᕆᒥ 10−ᖑᑎᓪᓗᒍ ᐱᓇᓱᐊᕈᓰᑦ ᒪᕐᕉᓐᓂᒃ ᑲᑎᒪᑎᓪᓗᒋᑦ COP25. “ᑕᒻᒪᓐᓇ ᐊᔅᓱᕈᓇᖅᑐᐊᓘᓕᖅᑐᖅ ᑭᖑᕚᑦᑎᓐᓄᑦ ᐊᑦᑐᐃᓂᖃᕐᓂᖅᐹᖑᓂᐊᖅᑐᖅ, ᐊᒻᒪᓗ ᐅᖃᖅᑐᓂ ᐃᓄᓐᓄᑦ ᐱᔪᓐᓇᐅᑎᓕᔭᕆᐊᖃᓪᓚᕆᓕᖅᑐᒍ ᓱᕈᓯᑦᑎᓐᓄᑦ ᐃᓅᑦᓱᑐᓄᓪᓗ,” ᐅᖃᖅᑐᓂᓗ, “ᐱᔪᓐᓇᐅᑎᖃᕆᐊᖃᕐᖓᑕ ᓯᕗᓂᖃᑦᑎᐊᕐᓗᑎᑦ.”
ᐊᖏᔪᖅᑳᕗᑦ ᑕᐃᑲᓂ NIYC ᑯᕆᔅᑕ ᒫᕐᑎᓐ−ᓚᐸᓐᔅᑭ, ᑲᑎᒪᖃᑕᐅᓚᐅᖅᑐᖅ COP25 ᐱᕕᖃᖅᑐᓂᓗ ᓇᓗᓇᐃᖅᓯᒍᓐᓇᓚᕈᕐᓂᖓᓐᓂ ᖃᓄᐃᑦᑑᕙᒻᒪᖔᑕ ᐃᓄᐃᑦ ᓄᓇᖓᓐᓂ − ᐃᓄᐃᑦ ᐊᖏᕐᕋᖏᐃᓐᓂ − ᓯᓚ ᐊᓯᔾᔨᕐᓂᖓ ᖃᓄᖅ ᐊᕙᑎᒋᔭᐅᒻᒪᖔᖅ ᐃᓄᓐᓄᑦ ᐊᕐᕌᒍᓕᒫᑉ ᐃᓗᐊᓂ ᐃᓅᓇᓱᐊᖅᑎᓪᓗᒋᑦ ᐊᓯᕙᖅᑎᓪᓗᒋᓪᓗ. “ᐃᓄᐃᑦ ᐃᓄᓱᑦᑐᑦ ᐊᔾᔨᓕᐅᕆᓯᒪᔪᑦ ᑕᑯᔅᓴᐅᑎᒍᒪᔭᖏᓐᓂ COP25 ᐊᑎᓕᒃ ᐃᒪᐃᑦᑐᒦᓕᖅᑐᒍᑦ ᑐᑦᑑᔭᖅᑐᒻᒥ ᑕᕐᕆᔭᓕᐊᒥᓂᖅ, ᑲᓇᑕᒥ, ᑕᑯᔅᓴᐅᑎᑦᑎᔪᖅ ᓯᔾᔭᖓ ᓄᖑᑉᐸᓪᓕᐊᓕᕐᓂᖓᓐᓂ ᐅᓕᒍᔾᔭᐅᖃᑦᑕᖅᑐᓂ, ᖃᖓᑦᑕᖅᑎᑕᐅᓯᒪᔪᒃᑯᓪᓗ ᑕᑯᔅᓴᐅᓪᓗᑎᑦ ᐊᐅᑉᐸᓪᓕᐊᓂᖓ ᓄᓇᐅᑉ ᐃᑭᐊᖓ. ᑕᑯᔅᓴᐅᓂᖓ ᖁᐊᖅᓵᓇᒻᒪᕆᑦᑐᑦ,” ᐅᖃᖅᑐᓂ ᒪᕐᑎᓐ−ᓚᐸᓐᔅᑭ.
“ᐃᓅᓱᑦᑐᐃᑦ ᓱᒋᐊᖁᔨᓪᓚᕆᓕᕐᖓᑕ,” ᐅᖃᖅᑐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓛᖡᑦ ᓄᓈᓂ ᐊᖏᔪᖅᑳᖅ ᕼᐊᔭᒪᕐ ᑕᓪ. “ᐃᓄᖁᑎᕗᑦ ᐃᓅᓱᑦᑐᑦ ᖁᐊᖅᓵᓇᖅᑐᓂᑦ ᑕᕐᕆᔭᕐᓂᑦ ᑕᑯᔅᓴᐅᑎᑦᑎᔪᑦ ᐃᒪᑦᑎᓐᓂ ᖃᓄᐃᓕᕐᒪᖔᖅ ᓱᒃᑲᓐᓂᕆᐊᖃᕐᓂᑎᓐᓂ ᓯᓚ ᐊᓯᔾᔨᐸᓪᓕᐊᓂᖓᓐᓂ. ᐊᕐᕌᒍᓂᒃ ᖁᓕᐅᓐᖏᑦᑐᓂᑦ ᑕᒪᓐᓇ ᑲᒪᒋᔭᕆᐊᖃᓕᕋᑦᑎᒍ ᓯᓚᕐᔪᐊᒥ ᐆᓇᖅᓯᕙᓪᓕᐊᒻᒪᑦ 1.5°C ᐊᕐᕌᒍᑕᒫᕐᓗ ᑲᑉᐱᐊᓇᖅᓯᕙᓪᓕᐊᑐᐃᓐᓇᖅᑐᓂ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓯᑳᑦᑲ ᐊᖏᔪᖅᑲᖓ ᓕᐅᐸᕝ ᑕᐃᐊᓐ ᐅᖃᓚᐅᖅᑐᖅ, “ᐊᖏᕐᕋᖃᕋᑦᑕ ᓱᒃᑲᓕᔪᐊᓗᒻᒥ ᓯᓚᖓᓐᓂ ᐊᓯᔾᔨᐸᓪᓕᐊᔪᒥᑦ ᑕᑯᔅᓴᓪᓚᕆᐅᓪᓗᓂᓗ, ᐊᐅᑉᐸᓪᓕᐊᓪᓚᕆᑦᑐᐊᓗᓐᓂᑦ ᓯᑯᒥᑦ, ᓄᓇᐅᑉ ᐃᑭᐊᖓ, ᐊᒻᒪᓗ ᐊᐳᑎᑕᖃᓐᖏᓂᖅᓴᐅᓕᖅᑐᓂᓗ. ᐊᒻᒪᓗ ᐱᐅᓐᖏᑦᑐᒃᑯᑦ ᐊᑦᑐᐃᓂᖃᖅᑐᓂ ᓯᓚ ᐊᓯᔾᔨᐸᓪᓕᐊᓂᖓᓐᓂ ᐱᒻᒪᕆᐊᓗᓐᓂᒃ ᐃᓄᐃᑦ ᑎᒥᖓᓐᓄᑦ. ᑎᒥᑦᑎᐊᕙᖃᕋᔭᓐᖏᑦᑐᑦ ᐃᓄᐃᑦ ᐊᑦᑐᐊᖏᑉᐸᑕ ᐃᓄᐃᑦ ᐃᓅᓯᖏᑦ ᐃᓚᒌᓪᓗ.”
ᑕᒪᓐᓇ ᑐᐊᕕᕐᓇᓪᓚᕆᓕᕐᖓᑦ ᐃᒪᕕᕗᑦ ᓱᕈᓐᓇᖅᑐᖅᑖᑉᐸᓪᓕᐊᖏᓐᓇᓕᖅᑐᓂ ᐅᖃᐅᓯᐅᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᑉ ᑐᖏᓕᖓᑕ (ᓯᓚᕐᔪᐊᒧᑦ) ᓖᓴ ᖁᐱᕐᕈᐊᓗᒃ ᑲᑎᒪᑎᓪᓗᒋᑦ. “ᖃᐅᔨᒪᑎᑕᐅᓕᕋᑦᑕ ᐅᑭᐅᖅᑕᖅᑑᑉ ᐃᒪᕕᖏᑦ ᓱᕈᓐᓇᖅᑐᖅᑖᑉᐸᓪᓕᐊᖏᓐᓇᓕᕐᖓᑕ ᒪᕐᕈᐊᖅᑎᓐᖑᐊᒻᒪᕆᑦᑐᒥᑦ ᐱᓂᖅᓴᐅᓕᖅᑐᖅ ᐳᓯᐱᒃᒥᑦ ᐊᒻᒪᓗ ᐋᑦᓛᓐᑎᒃᒥᑦ ᐃᒪᕕᖏᓐᓂ. ᓱᕈᓐᓇᖅᑐᓂᑦ ᐊᓂᕐᓂᖔᖅᑐᓂᒃ (carbon dioxide) ᐃᒪᕐᒥᐅᑕᕐᓂᑦ ᐱᑕᖃᓕᖅᑐᖅ ᓂᕿᒋᔭᑦᑎᓐᓂ − ᐃᓅᑦᑐᑦᑎᓐᓂ − ᐅᓗᕆᐊᓇᖅᑐᒦᓕᖅᑐᑦ. ᐅᑭᐅᖅᑕᖅᑐᒥ ᐃᒪᖏᑦ ᓱᕈᖅᑕᐅᓕᕐᒥᔪᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐊᒻᒪᓗ ᐊᑦᑐᖅᑕᐅᓕᖅᑐᑎᑦ ᐊᖏᕐᕋᑎᓐᓂ. ᓂᓪᓕᐊᖏᓐᓇᖃᑦᑕᕆᐊᖃᖅᑐᒍᑦ ᐸᖅᑭᔭᐅᒋᐊᖃᕐᓂᖏᓐᓂ ᐊᕙᑎᕗᑦ, ᐱᖅᑯᓯᕗᑦ ᐃᓅᓇᓱᐊᕐᓂᕗᑦ.
“ᐊᕕᑦᑐᖅᓯᒪᔪᓂ ᓄᓇᓕᕐᔪᐊᓂ ᓴᖅᑮᑲᓐᓂᕆᐊᖃᖅᑐᑦ ᑖᒃᑯᓂᖓ ᐱᓕᕆᖃᑎᒌᓪᓗᑕ ᐊᐃᕙᔾᔪᑎᒋᔭᕆᐊᖃᓕᖅᑕᕗᑦ ᐊᑐᓕᖅᑎᓪᓗᑎᒍᓪᓗ ᒪᓕᒐᐃᑦ ᑎᑎᕋᖅᓯᒪᔪᑦ,” ᖁᐱᕐᕈᐊᓗᒃ ᐅᖃᖅᑐᓂ.
ᑭᖑᓪᓕᕐᒥ UNFCCC COP26 ᓯᓚ ᐊᓯᔾᔨᐸᓪᓕᐊᓂᖓᓐᓂ ᑲᑎᒪᓂᐅᓛᖅᑐᖅ ᒐᓛᔅᒍᒥ, ᓯᑳᑦᓚᒥ ᑎᓯᐱᕆᒥ 2020. ᐊᕐᕌᒍᒋᓛᖅᑕᑎᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓂᓪᓕᐊᖏᓐᓇᖃᑦᑕᕆᐊᖃᕐᓂᐊᖅᑐᒍᑦ ᑕᒪᑐᒥᖓ ᐱᒋᐊᕈᑎᖃᕆᐊᕐᓗᑕ ᒐᕙᒪᒃᑯᓪᓗ ᐅᑭᐅᖅᑕᖅᑎᒥᐅᑕᓪᓗ ᐱᓕᕆᖃᑎᒌᓪᓗᑎᑦ ᓱᕈᓐᓇᖅᑐᐊᓗᓐᓂ ᐳᔪᕐᓗᓂᑦ ᐊᓂᕐᓂᑎᓐᓅᖅᑐᖃᓐᖏᓂᖅᓴᐅᓕᕋᓱᐊᕐᓗᒋᑦ ᑐᐊᕕᕐᓇᖅᑐᒥᓪᓗ ᐃᓕᑦᑐᕋᓱᐊᕐᒥᓗᑕ ᑐᖅᑑᔭᖅᑐᕐᒥ ᓲᕐᓗ ᐊᓯᖏᓐᓂᓪᓗ ᐃᓄᐃᑦ ᓯᔾᔭᒥᐅᑕᐅᔪᓂᒃ.
Contact:
Kelly Eningowuk
ICC (Alaska)
(907) 274-9058
kelly@iccalaska.org
Carole Simon
ICC (Canada)
(613) 563-2642
CSimon@inuitcircumpolar.com