ᔫᓂ 1, 2021 – ᐋᓐᑯᕆᑦᔅ, ᐊᓛᔅᑲ − ᐃᓄᐃᑦ ᓯᓚᕐᔪᐊᒥ ᐅᑭᐅᖅᑕᖅᑐᒦᖑᖃᑎᒌᑦ ᐊᔾᔨᐅᖏᑦᑐᑎᑦ ᑲᑎᓐᖓᒻᒪᑕ ᓄᓇᖃᖅᑳᖅᑐᒥᓃᑦ ᑲᓇᑕᒥ ᐊᑦᑐᖅᑕᐃᓐᓇᐅᒻᒪᑕ ᓴᖅᑭᖅᑕᐅᕋᑖᓚᐅᖅᑐᒥᑦ ᐃᓅᒍᓐᓃᖅᑐᒥᓂᕐᓂᑦ 215−ᓂᒃ ᓱᕈᓯᕐᓂᑦ ᓄᓇᖃᖅᑳᖅᑐᒥᓂᕐᓂᑦ ᓇᓂᔭᐅᓚᐅᖅᑐᓂᒃ ᓇᓗᓇᐃᒃᑯᓯᖅᓱᖅᓯᒪᓐᖏᑦᑐᓂᑦ ᐃᓗᕕᖅᑕᒥᓂᕐᓂᑦ ᐃᓕᓐᓂᐊᕆᐊᕐᕕᐅᓚᐅᖅᓯᒪᔪᒥᑦ ᐃᓕᓴᕕᒻᒥ ᑳᒻᓗᒻᒥ, ᐳᕆᑎᔅ ᑲᓚᒻᐱᐊᒥ.
ᓇᓂᕙᐅᕋᑖᓚᐅᖅᑎᓪᓗᒋᑦ ᑕᐃᑲᓕ ᐃᓕᓐᓂᐊᕆᐊᕐᕕᐅᓚᐅᖅᓯᒪᔪᒥᑦ ᐊᓪᓚᓄᑦ (Tk’emlúps te Secwépemc) ᖁᐊᖅᓴᓪᓚᕆᓚᐅᖅᑐᑦ ᕿᔅᓵᓕᖅᑐᑎᓪᓗ ᓯᓚᕐᔪᐊᒥ ᑭᒃᑯᑐᐃᓐᓇᐃᑦ. “ᑲᑎᓐᖓᓪᓗᑕ ᒪᑭᑕᕗᒍᑦ ᓄᓇᖃᖅᑳᖅᑐᒥᓂᐅᔪᑎᒍᑦ ᑲᓇᑕᒥ ᓯᓚᕐᔪᐊᒥᓗ ᖁᐊᖅᓴᓇᖅᑐᕐᔪᐊᕌᓗᒻᒥ ᖃᓪᓗᓈᓄᑦ ᐱᔭᒥᓂᕐᓂᑦ.” ᐅᖃᓚᐅᖅᑐᖅ ᒫᓂᑲ ᐃᐊᓪᑲᓇᔪᖅ ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᖑᖃᑎᒌᑦ ᑲᑎᒪᔨᖏᑦ. “ᑕᒪᓐᓇ ᑖᖅᑐᐊᓗᒃ ᐃᓅᓯᑦᑎᓐᓂ ᖃᓄᐃᒍᑎᒥᓂᐅᔪᖅ ᑲᓇᑕᒥ ᒫᓐᓇ ᐊᑐᖅᑕᕗᑦ. ᓱᓕᔪᑦ ᒪᒥᓇᕋᓱᐊᕐᓂᒧᓪᓗ ᐱᓕᕆᐊᖑᔪᑦ ᓇᓗᓇᐃᖅᓯᓯᒪᒻᒪᑕ ᐊᑐᓕᖁᓯᒪᔭᒻᒥᓂᒃ ᑎᑎᕋᖅᓯᒪᔪᖃᕆᐊᖃᕐᓂᖏᓐᓂ ᑕᐃᒪᐃᑦᑐᓂᒃ, ᐊᔅᓱᕈᓐᓇᖅᑐᐊᓗᒃᑰᕐᓂᐊᖅᑐᒍᑦ ᒫᓐᓇ ᒪᒥᓴᕋᓱᐊᕐᓗᑕ ᐋᖅᑮᐅᓴᓇᓱᐊᕐᓗᑕᓗ. ᑕᒪᓐᓇ ᐅᐊᖅᓴᓇᖅᑐᐊᓗᒃ ᐱᕙᓪᓕᐊᔪᒃᑰᖅᑕᐅᓚᐅᖅᑐᖅ ᓇᓗᓇᓐᖏᖅᑐᖅ ᐋᓐᓂᐊᔾᔪᑎᓂᒃ ᓴᖅᑮᑲᓐᓂᓚᐅᖅᑐᖅ ᑕᐃᒃᑯᓇᓐᖓᑦ ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᔪᒥᓂᕐᓂᑦ.”
ᓇᓂᔭᐅᓚᐅᖅᓯᒪᔪᑦ ᐱᓇᓱᐊᕈᓯᐅᑉ ᓄᓐᖑᐊᓂ ᒪᐃ 22−ᖑᑎᓪᓗᒍ ᐃᓚᒋᔭᐅᔪᒧᑦ ᐊᓪᓚᒧᑦ (Tk’emlúps te Secwépemc) ᐳᕆᑎᔅ ᑲᓚᒻᐱᐊᒥ ᕿᓂᓚᐅᖅᓯᒪᒻᒪᑦ ᐊᑎᓕᐅᖅᓯᒪᓐᖏᑦᑐᓂᑦ ᐃᓗᕕᕐᓂᑦ ᑕᐃᑲᓂ.
ᐃᓄᐃᑦ ᐅᑭᐅᖅᑕᖅᑐᒥᖑᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ ᑕᓕ ᓴᐳ ᑐᕉ ᐅᖃᓚᐅᖅᑐᖅ, “ᓇᓪᓕᒋᑦᑎᐊᖅᑲᕗᑦ ᐊᓪᓚᐃᑦ ᑕᐃᑯᐊ (Tk’emlúps te Secwépemc) ᓇᓗᓇᓐᖏᓪᓚᕆᑦᑐᖅ ᖁᐊᖅᓵᕐᓇᖅᑐᒃᑰᑲᓐᓂᓕᕐᒥᔪᑦ ᓇᓂᓯᔪᖃᓚᐅᖅᑎᓪᓗᒍ. ᖃᐅᔨᒪᓂᐊᖅᑯᓯ ᐃᓄᓐᓄᑦ ᓇᖏᖃᑕᐅᒐᔅᓯ ᐊᔅᓱᕈᓐᓂᓯᓐᓂ ᓱᓕᔪᓂᓪᓗ ᑐᓴᕈᒪᓂᔅᓯᓐᓂ ᖃᓄᐃᓐᓂᕐᒪᖔᑕ. ᐃᑲᔪᖅᑐᐃᕗᒍᑦ ᓂᓪᓕᖅᑐᑕᓗ ᑲᓇᑕᐅᑉ ᒐᕙᒪᒃᑯᖏᓐᓄ ᑮᓇᐅᔭᖃᖅᑎᑕᐅᖁᓪᓗᒋᑦ ᕿᓂᒃᑲᓐᓂᕆᐊᓕᓐᓂᒃ ᐊᓯᖏᓐᓂ ᓱᕈᓯᕐᓂᑦ ᔭᒐᓯᒪᔪᓂᒃ ᐃᓕᓐᓂᐊᕐᕕᐅᖃᑦᑕᖅᓯᒪᔪᓂ ᑲᓇᑕᒥ ᐃᖅᑲᖅᑐᐃᕕᑎᒎᖅᑕᐅᓪᓗᑎᓪᓗ, ᑕᒪᓐᓇ ᐃᓱᓕᖁᓕᕐᓗᒍ, ᓄᓇᖃᖅᑳᖅᑐᒥᕐᓄᑦ ᓄᓇᓕᓐᓄᑦ ᐊᑐᖅᑕᐅᔪᖅ. ᐃᑲᔪᖅᑐᐃᕗᒍᓪᓗ ᐃᔅᓯᕋᕐᔪᐊᑉ ᐊᖏᔪᖅᑳᖓ ᕗᕌᓐᓴᔅ ᒪᒥᐊᖁᓪᓗᑎᒍ ᐃᓕᓐᓂᐊᕆᐊᖅᑎᑕᐅᖃᑦᑕᕐᓂᑯᓪᓗ ᑲᓇᑕᒥ, ᓴᖅᑮᓗᑎᓪᓗ ᐃᔅᓯᕋᕐᔪᐊᑉ ᑎᑎᖅᑲᖁᑎᖏᓐᓂ ᑭᒃᑰᓂᖏᓐᓂ ᓇᓗᓇᐃᖅᓯᒍᑕᐅᒍᓐᓇᖅᑐᓂᒃ ᓱᕈᓯᕐᓂᑦ ᐃᓗᕕᖅᑕᒥᓂᕐᓂᑦ ᐃᓕᓐᓂᐊᕐᕕᐅᓚᐅᖅᓯᒪᔪᒥᑦ ᑲᒻᓘᒻᒥ, ᐊᒻᒪᓗ ᐊᓯᖏᓐᓂ ᐃᓕᓐᓂᐊᕐᕕᐅᖃᑦᑕᖅᑐᒥᓂᕐᓂᑦ ᑲᓇᑕᒥ ᓇᒥᑐᐃᓐᓇᖅ.”
ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᖑᖃᑎᒌᑦ ᑲᑎᒪᔨᖏᑦ, ᕼᔭᓪᒪ ᑕᓪ ᐅᖃᓚᐅᖅᑐᖅ. “ᐃᓚᒌᑦᑎᐊᕋᑦᑕ ᓇᓪᓕᒋᓪᓗᑎᒍᓪᓗ ᑕᐃᒃᑯᐊ ᐃᓚᒥᓂᖏᑦ ᓄᓇᖃᖅᑳᖅᑐᓕᒪᓪᓗ ᑲᓇᑕᒥ ᑕᒪᑐᒥᖓ ᓴᖅᑮᔪᖃᓚᐅᖅᑎᓪᓗᒍ. ᑐᑭᓯᔪᖓ ᐊᒥᓱᕐᔪᐊᕌᓗᒃ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᒻᒪᑕ ᑲᓇᑕᒥ. ᑕᒪᓐᓇ ᐃᖅᑲᖅᑐᐃᕕᑎᒍᑦ ᐊᓂᒍᖅᑎᑕᐅᖁᔭᕋᓗᐊᕗᑦ ᐃᓚᒥᓐᓄᑦ, ᓱᓕᔪᓂᓪᓗ ᓴᖅᑮᓗᑎᑦ ᖃᓄᐃᑦᑐᒥᓂᐅᓂᖏᓐᓂ.”
ᔨᒥ ᓯᑳᑦ, ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᖑᖃᑎᒌᑦ ᑲᑎᒪᔨᖏᑦ ᐊᓛᔅᑲᒥ ᐃᓚᓯᓚᐅᕐᒥᔪᖅ, “ᖁᐊᖅᓵᓪᓚᕆᓚᐅᖅᑐᒍᑦ ᑐᓴᕋᑦᑕ ᑕᒪᑐᒥᖔᓗᒃ ᐆᒻᒪᑎᕗᓪᓗ ᐃᓚᑦᑎᓐᓄᖓᔪᖅ ᐊᖏᔪᑯᓗᑦᑎᓐᓄᑦ/ᓄᑲᑦᑎᓐᓄ ᓇᔭᑦᑎᓄᓪᓗ ᑲᓇᑕᒥ.”
-30-
ᑐᑭᓯᒋᐊᕐᕕᐅᔪᓐᓇᖅᑐᑦ:
ᑲᓕ ᐃᓂᓐᖑᐊᖅ ICC (ᐊᓛᔅᑲ) +1 907-274-9058 kelly@iccalaska.org
ᑐᑯᒥᓐᖑᐊᖅ ᓂᒃᔭ ᐆᓪᓴᓐ ICC (ᑲᓛᖡᑦ ᓄᓈ) +299 52 62 10 tukumminnguaq@inuit.org
ᓯᑎᐸᓂ ᕼᐊᓐᓄᕆ ICC (ᑲᓇᑕ) +1 613 668 1923 type88@post.com