ᔫᓂ 23, 2021 – ᐋᑐᐋ, ᑲᓇᑕ – ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᑎᒪᖃᑕᐅᓚᐅᖅᑐᑦ ᓯᓚᕐᔪᐊᒥ ᐃᒪᖏᓐᓄᑦ ᑲᑎᔾᔨᖃᑎᒌᓐᓄᑦ ᐃᒪᐃᑦ ᐸᖅᑭᑦᑎᔨᖏᑦ ᑲᑎᒪᔨᕋᓛᖏᑦ (MEPC 76) ᖃᕋᓴᐅᔭᒃᑯᑦ ᑲᑎᒪᓚᐅᖅᑐᑦ ᔫᓂᐅᑎᓪᓗᒍ 10-17, 2021. ᑖᒃᑯᐊ ᓯᓚᕐᔪᐊᒥ ᐃᒪᖏᓐᓄᑦ ᑲᑐᔾᔨᖃᑎᒌᑦ ᐃᒪᐃᑦ ᐸᖅᑭᑦᑎᔨᖏᑦ ᑲᑎᒪᔨᕋᓛᑦ ᐅᖃᐅᓯᖃᓚᐅᖅᑐᑦ ᐅᒥᐊᕐᔪᐊᖅᑕᖃᙱᓂᖅᓴᐅᒋᐊᖃᓕᕐᓂᖏᓐᓂ ᓴᓇᔨᓂᒃ ᐊᑦᑐᐃᓂᖃᕐᓂᖏᓐᓄᑦ ᓯᓚᒥᑦ ᐊᒻᒪᓗ ᐃᒪᕐᒥᑦ ᓯᔾᔭᖏᓐᓂᓪᓗ.
ᐱᓕᕆᐊᕆᔪᒪᔭᖏᓐᓂ ᑕᒪᒃᑯᓂᖓ ᐳᓪᓚᐸᓪᓕᐊᔪᑦ ᓯᓚᕐᔪᐊᒥ ᐅᖅᑰᓂᕐᒧᑦ, ᓯᓚᒥ ᓱᕈᓐᓇᖅᑐᖅ, ᕿᓐᓂᖅᑕᐅᓪᓗᓂ ᓲᕐᓗ ᑖᓚᑎᑐᑦ, ᐅᖅᓱᐊᓗᐃᑦ ᐃᓚᓯᒪᙱᑦᑐᑦ ᐊᒻᒪᓗ ᐃᒪᕕᒻᒥ ᓂᐱᖃᕐᓂᖏᓐᓄᑦ – ᐱᒻᒪᕆᐅᒻᒪᑦ ᓴᓗᒪᑎᑦᑎᑲᓐᓂᕆᐊᖃᕐᓂᑎᓐᓂ ᓯᓚᕐᔪᐊᒥ ᐅᒥᐊᕐᔪᐊᓂᑦ ᐃᖏᕐᕋᕙᑦᑐᓂᒃ.
ᐱᒋᐊᖅᐸᓪᓕᐊᔪᑦ ᐃᒪᕕᒻᒥ ᓂᐱᖃᓗᐊᖅᑎᑦᑎᑦᑕᐃᓕᒪᓂᕐᒧᑦ ᑐᐊᕕᕐᓇᖅᓯᓕᕐᖓᑦ ᕿᒥᕐᕈᔭᐅᑦᑎᐊᕆᐊᖃᖅᑐᑎᑦ ᐊᒻᒪᓗ ᓴᙵᑎᒃᑲᓂᕐᓗᒋᑦ ᑕᒪᒃᑯᐊ ᐊᑐᐊᒐᐃᑦ ᐃᒪᕕᒻᒥ ᓂᐱᖃᓗᐊᕐᓂᐅᕙᑦᑐᑦ 2014−ᖑᓪᓗᑎᑦ. ᑕᐃᒃᑯᐊ 2014 ᐊᑐᐊᒐᐃᑦ ᐊᑦᑐᐃᓂᖃᖅᓯᒪᙱᑦᑎᐊᕐᖓᑕ ᓂᐱᖃᓗᐊᖅᑎᑦᑎᑦᑕᐃᓕᒪᑎᑦᑎᑲᓐᓂᕋᓱᐊᕐᓂᕐᒧᑦ ᐅᓪᓗᒥᒧᑦ. ᑭᓯᐊᓂᓕ, ᐱᕙᓪᓕᐊᓯᒪᑦᑎᐊᕌᕐᔪᖏᒻᒥᔪᑦ ᕿᓚᒥᒧᑦ ᐊᑐᖅᑕᐅᓂᐊᖅᑐᓂᒃ ᓯᓚᕐᔪᐊᒥ ᐃᒪᖏᓐᓄᑦ ᑲᑎᔾᔨᖃᑎᒌᓐᓄᑦ ᐱᓕᕆᐊᖑᓇᓱᐊᖅᑐᒥᑦ ᑭᒥᓪᓕᕚᓪᓕᑎᑦᑎᑲᓐᓂᖁᓪᓗᒋᑦ ᐳᓪᓚᐸᓪᓕᐊᔪᑦ ᓯᓚᕐᔪᐊᒥ ᐅᖅᑰᓂᕐᒧᑦ ᐊᓂᕐᓂᑎᓐᓅᖅᐸᑦᑐᓂᑦ 40%−ᒥᑦ ᓯᓚᕐᔪᐊᒥ ᐅᒥᐊᕐᔪᐊᕐᓂᑦ ᑎᑭᒐᓱᐊᕐᓗᒍ 2030.
ᐅᒥᐊᕐᔪᐊᒃᑰᖅᐸᑦᑐᑦ ᐃᓄᐃᑦ ᓄᓇᖓᓐᓄᑦ, ᐅᑭᐅᖅᑕᖅᑐᒥ ᓯᓚᕐᔪᐊᒥ ᐃᓄᐃᑦ ᓄᓇᖏᓐᓄᑦ, ᐊᒥᓱᕈᖅᐸᓪᓕᖅᓯᒪᒻᒪᑕ 25%−ᒥᑦ 2015−ᒥᓂᑦ. ᐃᓄᐃᑦ ᓄᓇᖓᑦ, ᑲᓇᑕᒥᐅᑦ ᐃᓄᐃᑦ ᓄᓇᖓᑦ, ᐅᑭᐅᖅᑕᖅᑐᒥ ᐅᒥᐊᕐᔪᐊᖅᑰᖅᐸᑦᑐᑦ ᐊᒥᓱᕈᖅᐹᓪᓕᖅᓯᒪᓪᓗᑎᑦ 37%−ᒥᑦ ᐊᑯᓐᓂᖏᓐᓂ 2015-2019. ᐅᑭᐅᖅᑕᖅᑐᒥ ᐅᒥᐊᕐᔪᐊᖅᑰᖅᐸᖅᑐᑦ ᐊᒥᓱᕈᖅᐸᓪᓕᐊᑐᐃᓐᓇᖅᑐᑦ ᐅᑭᐅᖅᑕᖅᑐᖓᓐᓂ ᓯᓚᕐᔪᐊᑉ, ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐱᓕᕆᐊᖏᓪᓕ ᒐᕙᒪᒃᑯᓐᓂ ᐃᑲᔪᖅᑐᖅᑕᐅᑲᓐᓂᕐᓗᑎᑦ ᑕᒪᑐᒥᖓ ᐱᐅᓂᖅᓴᐅᑎᑦᑎᑲᓐᓂᕋᓱᐊᕐᓗᑎᑦ, ᐅᖅᓱᐊᓗᐃᓪᓗ ᐊᑦᑕᓇᖅᑑᖏᓪᓗᑎᑦ ᐊᑭᑦᑐᕆᐊᖅᑎᑕᐅᒃᑲᓐᓂᖁᓐᓇᖏᑦ ᑭᓱᐃᑐᐃᓐᓇᐃᑦ ᓄᓇᓕᖔᕐᓂᑦ.
“ᐃᓄᐃᑦ ᑕᑎᖃᖃᑦᑕᕐᖓᑕ ᐅᑭᐅᖅᑕᖅᑐᒥ ᐅᒥᐊᕐᔪᐊᖅᑰᖅᐸᑦᑐᓂᑦ ᓱᓇᒃᑯᑖᕐᓄᑦ ᑕᒪᓐᓇᓗ ᐊᑐᐃᓐᓇᕆᐊᖃᓪᓚᕆᑦᑐᓂ. ᐃᓅᓇᓱᐊᑦᑎᐊᕐᓂᑎᓐᓄᑦ, ᑭᓯᐊᓂᓕ, ᑕᑎᖃᕐᒥᔪᒍᑦ ᐃᓅᓇᓱᐊᑦᑎᐊᕐᔪᑎᒋᓪᓗᑎᒍ ᓂᕿᖃᕐᕕᕗᑦ ᐃᒪᖅ ᓯᔾᔭᒦᑦᑐᓪᓗ ᐊᒻᒪᓗ ᐊᑦᑕᓇᖅᑐᒥᑎᑕᐅᒋᐊᖃᙱᓐᓂᖏᓐᓂ ᐅᑭᐅᖅᑕᖅᑐᒨᖅᐸᑦᑐᓂ ᐅᒥᐊᕐᔪᐊᓐᓂᑦ ᓯᕗᓪᓕᖅᐸᐅᑎᒋᐊᓕᒃ” ᐅᖃᓚᐅᖅᑐᖅ ᓖᓴ ᖁᐱᕐᔪᐊᓗᒃ, ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐊᖏᔪᖅᑲᑉ ᑐᖏᓕᖓ ᓯᓚᕐᔪᐊᒥᑦ, ᑲᑎᒪᔭᖅᑐᖃᑕᐅᓚᐅᖅᓯᒪᔪᖅ ᓯᓚᕐᔪᐊᒥ ᐃᒪᖏᓐᓄᑦ ᑲᑎᔾᔨᖃᑎᒌᓐᓄᑦ ᑲᑎᒪᓂᖏᓐᓄᑦ.
ᑭᓯᐊᓂᑦᑕᐅ ᖁᓅᕐᒥᓇᕐᒥᔪᖅ, ᖃᑦᑎᑲᓪᓚᐃᒃᑭᐊᖅ ᐱᒋᐊᕈᑏᑦ ᐸᖅᑭᑦᑎᔾᔪᑕᐅᖓᔭᖅᑐᑦ ᐅᑭᐅᖅᑕᖅᑐᒥ ᐳᓪᓚᐸᓪᓕᐊᔪᑦ ᓯᓚᕐᔪᐊᒥ ᐅᖅᑰᓂᕐᒧᑦ ᐊᓂᕐᓂᑎᓅᖅᐸᑦᑐᓂᑦ ᕿᓐᓂᖅᑖᓗᐃᓪᓗ ᓲᕐᓗ ᑖᓚᑦ ᐅᑭᐅᖅᑕᖅᑐᒨᖅᐸᑦᑐᓄᑦ ᐅᒥᐊᕐᔪᐊᒦᓐᖔᖅᑐᑦ. ᕿᓐᓂᖅᑕᑦ ᑖᓚᐅᔮᖅᑐᑦ, ᓴᖅᑭᖃᑦᑕᖅᑐᑦ ᐃᑭᑕᐅᔪᓂᒃ ᐃᓚᖃᙱᑦᑐᓂ ᐅᖅᓱᐊᓗᓐᓂ, ᕿᓚᒥᑲᐃᓐᓇᕈᓗᓪᓗ ᓯᓚᑦᑎᓃᑲᐃᓐᓇᖅᑐᑎᑦ ᑭᓯᐊᓂᑦᑕᐅ ᓯᑯᓂᑦ ᐊᐅᓴᕋᐃᑦᑎᑦᑎᕙᑦᑐᑦ ᐊᐳᑎᒨᕋᐃᒻᒪᑦ ᓯᑯᓄᓪᓗ. ᐊᒻᒪᓗ, ᐅᖅᓱᐊᓗᐃᑦ ᐃᓚᓯᒪᙱᑦᑐᑦ ᑯᕕᔪᖃᕐᓂᖅᑲᑦ ᐅᑭᐅᖅᑕᖅᑐᒥ ᐱᐅᙱᑐᐊᕐᔪᐊᕌᓘᓪᓗᓂ ᐃᒪᕐᒥᐅᑕᕐᓄᑦ.
“ᐱᒋᐊᓚᐅᙱᓐᓂᓕᒫᖏᓐᓂ, ᐃᓅᓯᕆᕙᑦᑕᕗᑦ ᐅᓗᕆᐊᓇᖅᑐᒥᓐᓂᐊᖅᑐᖅ. ᓄᓇᓕᑉᐳᑦ ᑕᑎᖃᖃᑦᑕᕐᖓᑦ ᐃᒪᕐᒥᐅᑕᕐᓂᑦ ᓯᑯᒥᓪᓗ − ᔭᒐᓕᖅᑐᖅ ᒫᓐᓇ. ᐱᒋᐊᕈᑎᐅᔪᒃ ᐊᑦᑕᓇᐃᖅᑎᑦᑎᓇᓱᐊᖅᑐᑦ ᐅᑭᐅᖅᑕᖅᑐᑎᓐᓂ ᒫᓐᓇᐅᔪᖅ. ᕿᓐᓂᖅᑕᑦ ᓲᕐᓗ ᑖᓚᐅᔮᖅᑐᑦ ᐅᑭᐅᖅᑕᖅᑐᒦᑦᑐᑦ ᐅᖃᐅᓯᐅᒋᐊᓕᑦ ᑲᑎᒪᓂᐅᔪᓂᒃ, ᑭᓯᐊᓂᓕ ᑕᒪᓐᓇ ᓅᑕᐅᓯᒪᔪᖅ ᐃᒪᐃᑦ ᐸᖅᑭᑦᑎᔨᖏᑦ ᑲᑎᒪᔨᕋᓛᖏᑦ (MEPC 77) ᓄᕕᐱᕆᒧᑦ, ᔭᒐᐸᓪᓕᐊᑐᐃᓐᓇᖅᑐᑦ, ᓱᕋᑉᐸᓪᓕᐊᑐᐃᓐᓇᖅᑐᑎᓪᓗ”, ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖅ ᑕᓕ ᓵᒻᐳ ᑐᕉ.
ᐊᖏᕈᑎᒥᑦ “ᑐᐊᕕᕐᓇᓕᖅᑐᖅ” ᕿᓚᒥᑲᐃᓐᓇᕈᓗᒃ ᖃᑦᑏᓐᓇᕈᖅᐸᓪᓕᖁᓪᓗᒋᑦ ᐅᒥᐊᕐᔪᐊᒦᓐᖔᖅᐸᑦᑐᑦ ᐳᔪᕐᓗᑎᑦ ᐊᑦᑐᐃᓂᖃᙱᖔᕈᓐᓇᖅᑐᓂᑦ ᐊᑐᖔᓕᕐᓗᑎᑦ ᐊᒻᒪᓗ ᐱᐅᓂᖅᓴᓪᓚᕆᐅᒐᔭᖅᑐᓂ, ᐅᓗᕆᐊᓇᙱᓂᖅᓴᐅᓗᑎᓪᓗ ᓯᓚᑦᑎᓐᓄᑦ. ᑕᒪᓐᓇ ᑲᔪᓯᑎᒐᓱᐊᕐᓗᒍ ᐸᕆᒥ ᐊᖏᕈᑎᐅᔪᖅ 1.5C ᐆᓇᕐᓂᖓ ᑎᑭᒐᓱᐊᖅᑕᕗᑦ, ᐊᕐᕌᒍᑕᒫᑦ 7%−ᒥᑦ ᕿᓐᓂᖅᑕᒥᑦ ᓱᕈᓐᓇᖅᑐᒥᑦ ᐅᒥᐊᕐᔪᐊᒦᙵᖅᑐᓂᑦ ᒥᑭᓪᓕᕚᓪᓕᑎᑦᑎᒋᐊᖃᕋᔭᖅᑐᒍᑦ ᑲᔪᓯᑎᓐᓂᐊᕈᑦᑎᒍ. ᑖᓐᓇ 1.5% ᐊᕐᕌᒍᑕᒫᑦ ᑕᐃᒪᐃᑦᑐᑐᐃᓐᓇᕐᒥᑦ ᒥᑭᓪᓕᕚᓪᓕᖃᑦᑕᖅᑲᑦ ᐸᕆᐅᑉ ᑲᔪᓯᑎᒍᒪᔭᖓᓂ ᓱᕐᕋᐃᓪᓗᐊᕋᔭᙱᑦᑐᖅ.
ᖁᐱᕐᕈᐊᓗᒃ ᐅᖃᓚᐅᖅᑐᖅ, “ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᖁᕕᐊᒋᔭᐅᓪᓗᑎᑦ ᑲᓇᑕ ᓯᕗᓪᓕᖅᐸᐅᔾᔨᓇᓱᐊᓕᕐᓂᖏᓐᓂ ᑐᐊᕕᕐᓇᑐᒃᑯᑦ ᒥᑭᓪᓕᕚᓪᓕᑎᑦᑎᓇᓱᐊᕐᓗᑎᑦ ᕿᓐᓂᖅᑖᓗᒻᒥ ᓲᕐᓗ ᑖᓚᑎᑐᑦ ᐅᑭᐅᖅᑕᖅᑐᒨᖅᐸᑦᑐᓂ ᐅᒥᐊᕐᔪᐊᕐᓂᑦ − ᑕᒫᓂᖃᐃ 2%−ᒥᑦ ᕿᓐᓂᖅᑕᒥ ᓴᖅᑮᖃᑦᑕᕋᔭᖅᑐᖅ ᐅᒥᐊᕐᔪᐊᓃᓐᖔᖅᑐᓂᑦ ᐅᑭᐅᖅᑕᖅᑐᒨᖅᑲᖅᑐᓂ. ᐱᕕᑭᓪᓚᕆᒃᑲᑦᑕ ᒫᓐᓇ, ᓄᑖᕐᒥᑦ ᐅᓂᒃᑳᕐᒥᑦ ᐅᖃᖅᓯᒪᒻᒪᑦ ᐅᑭᐅᖅᑕᖅᑐᒥ ᐱᖓᓱᐊᖅᑎᙳᐊᖅᑐᓂ ᐆᓇᖅᓯᕙᓪᓕᐊᓕᖅᑐᖅ ᓯᓚᕐᔪᐊᒥ ᓱᒃᑲᓕᓂᖅᓴᒥᑦ − ᐊᓪᓛᒃ ᓱᒃᑲᓕᓂᖅᓴᐅᔪᖅ ᒥᔅᓴᐅᓴᑦᑕᐅᓚᐅᖅᓯᒪᔪᒥᑦ. ᐸᖅᑭᔭᕆᐊᖃᕋᑦᑎᒍ ᐅᑭᐅᖅᑕᖅᑐᒥ ᐃᒪᖓ ᐊᒻᒪᓗ ᐱᐅᖅᓱᐊᕐᓗᑎᒍ ᐃᒪᕐᒥᐅᑕᐃᑦ ᓯᓚᕐᔪᐊᒥᓗ ᐱᕈᖅᑐᑦ ᖃᓄᐃᑦᑕᐃᓕᒪᖁᓪᓗᒋᑦ ᐱᐅᔪᒦᑏᓐᓇᕋᓱᓪᓗᒋᑦ. ᐅᑭᐅᖅᑖᖅᑑᑉ ᐃᒪᕕᖏᑦ ᐊᒻᒪᓗ ᐆᒪᔪᓂᒃ ᐱᕈᖅᑐᓪᓗ ᐱᓪᓚᕆᐊᓘᒻᒪᑕ ᓯᓚᕐᔪᐊᒥ ᐊᑐᖅᑕᐅᕙᑦᑐᓂᒃ. ᐃᒪᕕᑉᐳᑦ ᐊᑦᑐᐊᒻᒪᑦ ᑭᓱᓕᒫᑦᑎᐊᕐᒧ, ᔭᒐᑉᐸᓪᓕᐊᓕᖅᑐᑎᓪᓗ ᓯᑯᐃᑦ, ᕿᑭᖅᑕᑲᐃᓪᓚᐃᓪᓗ ᐅᓕᒍᔾᔭᐅᓂᖅᓴᐅᕙᓕᖅᑐᑎᑦ ᐃᒪᕕᒃ ᐃᑎᓪᓕᕙᓪᓕᐊᒻᒪᑦ. ᑕᒪᒃᑯᐊ ᐱᓇᓱᐊᖅᑕᑎᓐᓂ ᐊᖏᓂᖅᓴᓂᒃ, ᐊᓐᓇᐃᓂᖅᓴᐅᒍᓐᓇᖅᑯᒍᑦ.”
ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐅᑕᖅᑭᔪᑦ ᓯᓚᕐᔪᐊᒥ ᐃᒪᖏᓐᓄᑦ ᑲᑎᔾᔨᖃᑎᒌᓐᓄᑦ ᐃᓱᒪᓕᐅᕆᐊᖃᕐᓂᖏᓐᓂ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᓇᒻᒥᓂᖅ ᓂᐱᖃᖅᑎᑕᐅᔪᓐᓇᕐᓂᐊᕐᒪᖔᑕ, ᐊᖅᑯᑎᖃᕐᓗᑎᑦ ᓯᓚᕐᔪᐊᒥ ᐃᒪᖏᓐᓄᑦ ᑲᑎᔾᔨᖃᑎᒌᓐᓄᑦ ᑲᑎᒪᖃᑎᒌᓐᓂᒃᑯᑦ, ᑕᒪᒃᑯᐊ ᐱᒻᒪᕆᐅᒻᒪᑕ ᑲᑎᒪᓃᑦ. ᐃᓄᐃᑦ ᐱᖃᑕᐅᒋᐊᖃᕐᖓᑕ ᐅᒥᐊᕐᔪᐊᒃᑰᖃᑦᑕᖅᑐᓂᒃ ᓯᔾᔭᑯᓪᓗ ᐊᐅᓚᑕᐅᒋᐊᖃᓂᖏᓐᓂ ᐱᖁᔭᖃᕐᓗᑎᑦ ᐊᒻᒪᓗ ᐊᖏᓂᖅᓴᒥᑦ ᑐᑭᑖᖅᑎᑕᐅᒋᐊᖃᓪᓚᕆᒻᒪᑦ ᐊᒻᒪᓗ ᓇᒻᒥᓂᖅ ᐱᔭᐅᔪᓐᓇᕐᓗᓂ.
-30-
Contact:
Stephen Hendrie
ICC Canada
Email: type88@post.com
(613) 563-2642