ᔮᓐᓄᐊᕆ 20, 2020 – ᐊᓈᑕᐃ – ᐋᓐᑯᕆᑦᔅ – ᐋᑕᐋ – ᓅᒃ – ᐅᓪᓗᒥ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᓇᓗᓇᐃᖅᓯᕗᑦ ᐃᓄᓐᓂᑦ ᐃᓄᓱᑦᑐᓂᑦ ᐃᓕᓴᕆᔭᐅᔪᓂᒃ ᕼᐊᓐᔅ-ᐱᕕᐊ ᕉᓯᖕ ᓯᕗᒃᑲᑕᕐᓂᕐᒧᑦ ᑐᓂᕐᕈᑎᒥᑦ:
ᔭᓂᓴ ᐃᓚᓂᒃ – ᑲᓇᑕ
ᑕᑦᔭᓇ ᐅᓚᐃᓂᑯᕙ – ᓱᑳᑦᑲ
ᓴᒫᓐᓇ ᕼᐃᐅᕆᓴᓐ – ᐊᓛᔅᑲ
ᐱᐸᓗᒃ ᕼᐊᒻᒥᑲᓐ – ᑲᓛᖡᑦ ᓄᓈᓂ
ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᓴᖅᑮᓚᐅᖅᓯᒪᔪᑦ ᐃᓕᓴᕆᔭᐅᔪᓂᒃ ᕼᐊᓐᔅ-ᐱᕕᐊ ᕉᓯᖕ ᓯᕗᒃᑲᑕᕐᓂᕐᒧᑦ ᑐᓂᕐᕈᑎᒥᑦ 2019−ᒥ ᐃᖅᑲᐅᒪᔭᐅᔪᒪᓪᓗ ᓴᖅᑮᓚᐅᖅᓯᒪᔪᖅ ᐊᖏᔪᖅᑲᖅ ᐃᓅᒍᓐᓃᔪᔪᖅ, ᑲᒪᒋᔭᐅᓪᓗᓂ 13−ᖓᓐᓂ ᐊᕐᕌᖑᑕᒫᖅᓯᐅᑎᖓᓐᓂ ᐅᑦᕿᐊᕕᒻᒥ, ᐊᓛᔅᑲᒥ ᔪᓚᐃᖑᑎᓪᓗᒍ 2018-ᒥ.
ᑐᓂᕐᕈᑎᐅᔪᖅ ᐃᓅᓱᑦᑐᓄᑦ ᐃᓄᓐᓄᑦ ᑐᕌᖓᔪᑦ ᐊᓯᖏᓐᓄᑦ ᐅᐱᒋᔭᐅᔪᓂᒃ – ᒪᓕᒐᔅᓴᖅᓯᐅᖅᑐᑦ. ᑕᐃᒫᒃ ᑕᑕᑎᕆᐊᓕᒻᒥ ᐅᖃᖅᓯᒪᒻᒪᑕ ᐊᒻᒪᓗ ᓂᕈᐊᕋᔅᓴᓕᐅᕈᑎᓂᒃ, “ᐃᓕᓴᖅᓯᒐᑦᑕ ᓇᓗᓇᐃᖅᓯᒍᒪᓪᓗᑕ ᑕᐃᒃᑯᓂᖓ ᓄᓇᓕᑦᑎᓐᓂ, ᓯᕗᒃᑲᑦᑕᐃᑦᑎᐊᕈᓐᓇᖅᑐᓂᒃ ᐊᐅᓚᑦᑎᒍᓐᓇᖅᑐᓂᓪᓗ. ᓇᓗᓇᐃᖅᓯᒍᒪᒐᑦᑕ ᐊᒻᒪᓗ ᓴᖅᑮᓗᑕ ᐊᒥᓱᓂᒃ ᐆᑦᑑᑎᑦᑎᐊᕙᓐᓂᒃ ᓯᕗᓕᖅᑎᐅᔪᓐᓇᖅᑐᓂᒃ ᖃᓄᐃᑦᑐᑐᐃᓐᓇᑦᑎᐊᖅᑎᒍᑦ. ᐊᒥᓲᒻᒪᑕ ᐃᓅᓱᑦᑐᐃᑦ ᓇᒻᒥᓂᖃᐅᖅᑐᑦ, ᐊᓯᕙᖅᑎᐅᔪᑦ, ᐃᑲᔪᖃᑦᑕᖅᑎᐊᖅᑐᑦ ᐊᑭᓕᖅᓱᖅᑕᐅᒐᑎᒃ ᒪᑯᓂᖓ ᐊᓐᓂᑭᑦᑐᐊᕐᔪᕕᒻᒥ, ᒪᑭᒪᔾᔪᑎᔅᓴᓂᒃ, ᐃᓄᓕᕆᓂᕐᒥᑦ, ᐱᖅᑯᓯᓕᕆᓂᕐᒥᑦ ᑲᑎᒪᔨᐅᓂᕐᒥᓪᓘᓐᓃᑦ.”
ᔭᓂᓴ ᐃᓚᓂᒃ ᖁᕕᐊᒋᔭᖃᓪᓚᕆᑦᑐᖅ ᑕᒧᐊᔅᓴᓕᐅᖃᑦᑕᕆᐊᔅᓴᖅ ᑕᐃᒪᐃᑦᑐᓕᕆᔨᐅᔪᒪᓪᓗᓂᓗ, ᑕᒧᐊᖅᓴᑖᕐᕕᒻᒥᓂᑦ ᒪᑐᐃᖅᓯᔪᒪᓪᓗᓂᓗ ᓄᓇᑦᑎᐊᕐᒥ, ᑲᓇᑕᒥ ᓯᕗᓂᑦᑎᓐᓂ. ᑕᑦᔭᓇ ᐅᓕᓂᑯᕙ ᐃᓕᓴᐃᔨ ᓯᕆᓂᑭᒥ, ᓱᑳᑦᑲᒥ ᑐᓂᕐᕈᓯᐊᖏᑦ ᐊᑐᕈᒫᕐᓂᐊᖅᑕᖏᑦ ᓴᖅᑎᔮᖅᑎᑦᑎᑲᓐᓂᕐᓗᓂ ᐊᓈᓇᖓᑕ ᐅᖃᐅᓯᖓᓐᓂ ᐊᑐᖅᑎᑦᑎᑲᓐᓂᕋᓱᐊᕐᓂᕐᒥᑦ ᐃᓕᓐᓂᐊᕐᕕᖓᓐᓂ. ᐋᓐᓂᐊᓯᐅᖅᑎᐅᓪᓗᓂ, ᓴᒫᓐᓇ ᕼᐊᐅᕆᓴᓐ ᐋᖅᑮᔪᒪᔪᖅ “ᐋᓐᓂᐊᕕᖕᒧᑦ ᐊᑎᒃᓗᒃ” ᐊᑐᕈᒪᓪᓗᓂᔾᔪᒃ ᐃᒻᒥᓄᑦ ᐊᓯᒥᓄᓪᓗ ᐋᓐᓂᐊᖅᑕᐃᓕᒪᔪᓕᕆᓂᕐᒥᑦ, ᐊᓛᔅᑲᒥ. ᐱᐸᓗᒃ ᕼᐊᒥᑲᓐ ᐃᓕᓐᓂᐊᕆᐊᕈᒪᔪᖅ ᐅᖃᐅᓯᓕᕆᓂᕐᒥᑦ ᓴᖅᑭᔮᖅᑎᑦᑎᑲᓐᓂᕈᒪᓪᓗᓂ ᐃᓄᐃᑦ ᐅᖃᐅᓯᖏᓐᓂ ᐱᖅᑯᓯᖏᓐᓂᓪᓗ ᑲᓛᖡᑦ ᓄᓈᓂ.
ᐱᔮᖅᑯᑕᐅᓐᖏᑦᑐᒥᑦ ᓯᕗᓪᓕᖅᐹᒥ ᑐᓂᔭᐅᓂᐊᖅᑐᓂᑦ ᓇᓗᓇᐃᖅᓯᓚᕿᔪᒍᑦ ᑕᕝᕙᓂ ᐊᕐᕌᒍᒥ ᓄᑖᒥᑦ ᓇᓪᓕᐅᓂᖅᓯᐅᖅᑎᓪᓗᒋᑦ 40−ᓂᑦ ᕼᐊᓐᔅ-ᐱᕕᐊ ᕉᓯᖕ ᓂᕈᐊᕐᓇᒥ ᓯᕗᓪᓕᖅᐹᖓᓐᓂ ᐊᖏᔪᖅᑳᒥᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ. 40−ᖓᓐᓂᑦᑕᐅ ᓇᓪᓕᐅᓂᖅᓯᐅᖅᑐᖅ ᑎᒍᓯᓚᐅᖅᓯᒪᓂᖓᓐᓂ ᒪᓕᒐᕐᓂᑦ ᒪᓕᒐᕋᓛᖏᓐᓂᓪᓗ ᑲᑐᔾᔨᖃᑎᒌᒻᒧᑦ.
ᓯᕗᓪᓕᖅᐹᒥ ᑐᓂᕐᕈᓯᐊᕐᕚᓪᓗᑎᓪᓗᒋᑦ, ᐃᓕᓴᕆᔭᐅᔪᖅ ᐱᐅᓯᕚᓪᓕᑲᓐᓂᕆᐊᖃᕐᓂᖏᓐᓂ ᐅᔾᔨᕈᓱᑦᑎᑦᑎᑲᓐᓂᕐᓗᑕ ᑐᓂᕐᕈᓯᐊᕐᓂᑦ ᐱᕙᓪᓕᐊᔪᒃᑯᑦ ᐃᓄᓐᓄᓪᓗ ᐱᐅᓯᕚᓪᓕᑲᓐᓂᕐᓗᒋᓪᓗ ᑐᔅᓯᕋᐅᑏᑦ ᓂᕈᐊᕋᔅᓴᓕᐅᕐᓂᒥᓪᓗ. ᓲᕐᓗ, ᐊᖏᖃᑎᒌᔅᓯᒪᒻᒪᑕ ᓴᖅᑭᔮᖅᑎᑦᑎᑲᓐᓂᕐᓗᓂ ᑐᓂᕐᕈᓯᐊᔭᐅᔾᔪᑎᒥᑦ ᐃᓄᓐᓄᑦ ᑲᑐᔾᔨᖃᑎᒌᓄᑦ ᓂᕈᐊᕋᔅᓴᓕᐅᕈᓐᓇᕋᔭᕐᒥᒻᒪᑕ ᓯᕗᓂᑦᑎᓐᓂ. ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᕿᒥᕐᕈᓂᐊᖅᑐᑦ ᑕᒪᑐᒥᖓ ᐊᓯᖏᓐᓂᓪᓗ ᒪᓕᔅᓴᓂᒃ.
ᐊᔾᔨᐅᖏᒻᒪᑕ ᐱᔪᒪᔪᑦ ᓲᕐᓗ ᓯᕗᓪᓕᐅᓚᐅᖅᓯᒪᔪᑦ ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ, ᐱᔾᔪᑎᖏᑦ ᕼᐊᓐᔅ-ᐱᕕᐊ ᕉᓯᖕ ᓯᕗᒃᑲᖅᑕᐃᓂᕐᒧᑦ ᑐᓂᔭᐅᔾᔪᑎ“ ᐃᑲᔪᖅᑐᐃᕗᑦ ᐱᕈᖅᐸᓪᓕᐊᔪᓂᒃ ᐱᕙᓪᓕᐊᒍᒪᔪᓂᓪᓗ ᐃᓅᓱᑦᑐᓂᑦ ᐃᓄᓐᓂᑦ ᐊᕐᓇᓂᑦ ᐊᖏᑎᓂᓪᓗ ᐊᔾᔨᐅᖏᑦᑐᓂᒃ, ᒪᑯᓂᖓ ᐊᓯᕙᖅᑎᓂᑦ ᐱᓕᒻᒪᔅᓯᒪᓂᖏᓐᓄᑦ ᐃᓕᓴᕆᔭᐅᔾᔪᑏᑦ ᐃᓐᓇᕐᓄᑦ ᐱᓕᕆᑦᑎᐊᒃᑲᐅᓂᖏᓐᓄᑦ, ᖁᑦᑎᓂᖅᓴᒥᓪᓗ ᐃᓕᓐᓂᐊᖅᓯᒪᔪᓂᒃ, ᓯᕗᒃᑲᖅᑕᐃᓂᕐᒧᑦ ᐃᓕᓐᓂᐊᖅᑎᑕᐅᔪᓐᓇᕐᓗᑎᑦ, ᕿᔅᓯᕆᓂᕐᒥᓪᓗ ᐅᕝᕙᓘᓐᓃᑦ ᐊᓯᖏᓐᓂ ᐃᓄᐃᑦ ᐃᓕᖅᑯᓯᖏᓐᓂ, ᐊᑐᖃᑦᑕᖅᑕᖏᓐᓂ ᐅᑉᐱᕆᔭᖏᓐᓂᓪᓗ.
ᑕᒪᓐᓇ ᐊᑦᑐᐊᔪᖅ ᐃᓕᓴᕆᔭᐅᔾᔪᑎᓄᑦ ᐊᒻᒪᓗ ᕼᐊᓐᔅ-ᐱᕕᐊ ᕉᓯᖕ ᐊᖏᕐᕋᖏᓐᓂ ᑲᓛᖡᑦ ᓄᓈᓂ, ᔭᓪᒧᕐ ᑕᓪ, ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᓛᖡᑦ ᓄᓈᓂ ᐃᔅᓯᕙᐅᑕᐅᑉ ᑐᖏᓕᕆᓪᓗᓂᐅᓪᓗ ᐅᖃᓚᐅᖅᑐᖅ, “ᐅᐱᒍᓱᑦᑎᐊᖅᑯᖓ ᓴᖅᑭᖅᑕᐅᓚᐅᕐᓂᖓᓐᓂ ᕼᐊᓐᔅ-ᐱᕕᐊ ᕉᓯᖕ ᓯᕗᒃᑲᑦᑕᐃᓂᕐᒧᑦ ᑐᓂᔭᐅᔾᔪᑎ ᐃᖅᑲᐅᒪᔭᐅᓪᓗᓂᓗ ᑕᐃᓐᓇ. ᐅᐱᒋᑦᑎᐊᖅᑲᒃᑲ ᑕᐃᒃᑯᐊ ᐃᓕᓴᕆᔭᐅᔪᑦ. ᓯᕗᓂᑦᑎᓂᓪᓗ ᕿᓂᕐᒥᔪᒍᑦ ᐃᓕᓴᕆᔭᐅᔪᓐᓇᖅᑐᓂᒃ ᐃᓅᓱᑦᑐᑎᓐᓄᑦ ᐃᑲᔫᑎᖃᕋᔭᕐᖓᑕ ᐱᔪᒪᓕᒃᑲᓂᕐᓗᑎᑦ ᐱᓇᓱᐊᓕᒃᑲᓂᕐᓗᑎᑦ ᐃᓄᐃᑦ ᐱᓕᕆᖃᑎᒌᓪᓗᑎᑦ ᓯᓚᕐᔪᐊᒧᓪᓗ ᐊᑦᑐᐊᔪᓂᒃ.”
ᓕᐅᐸᕝ ᑕᐃᓐ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓱᑳᑦᑲ ᐊᖏᔪᖅᑳᖓ ᐃᔅᓯᕙᐅᑕᐅᓪᓗ ᑐᖏᓕᖓ, ᐅᖃᓚᐅᖅᑐᑦ ᑖᓐᓇ “ᕼᐊᓐᔅ-ᐱᕕᐊ ᓯᕗᒃᑲᑕᖅᑎᓄᑦ ᐃᓕᓴᕆᔭᐅᔾᔪᑎ ᐊᔾᔨᐅᓐᖏᑦᑐᖅ ᐱᕕᖃᖅᑎᑕᐅᓪᓗᑕᓗ ᐃᖅᑲᐃᑎᑦᑎᒍᑕᐅᓗᓂᓪᓗ ᖃᓄᐃᑦᑐᖃᑦᑕᖅᓯᒪᓂᖓᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ), ᐊᒻᒪᓗ ᐃᓅᓱᑦᑐᑦ ᐃᓕᒃᑲᓐᓂᕈᓐᓇᖅᑐᑎᑦ ᓯᕗᖅᑎᐅᓂᕐᒥᑦ ᐅᕝᕙᓘᓐᓃᑦ ᓇᒻᒥᓂᖅ ᐱᕙᓪᓕᐊᑲᓐᓂᕋᓱᐊᕐᓗᑎᑦ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐊᖏᔪᖅᑳᖅ ᒫᓂᑲ ᐊᐅᓪ-ᑲᓇᔪᖅ ᐅᐱᒍᓱᑦᑎᐊᓚᐅᕐᒥᔪᖅ ᐃᓕᓴᕆᔭᐅᔪᓂᒃ ᕼᐊᓐᔅ-ᐱᕕᐊ ᕉᓯᖕ ᓯᕗᒃᑲᖅᑕᐃᓂᕐᒧᑦ ᑐᓂᔭᐅᔾᔪᑎᑖᖅᑐᓂᒃ. “ᑕᑯᔪᒪᑦᑎᐊᕆᕗᖓᓗ ᐃᓅᓱᑦᑐᓂᑦ ᓯᕗᓕᖅᑎᐅᒍᓐᓇᖅᑐᓂᒃ, ᐃᑲᔪᖅᑕᐅᓗᑎᑦ ᐃᓕᓴᕆᔭᐅᔾᔪᑎᑎᒍᑦ, ᐊᒻᒪᓗ ᐃᓄᐃᑦ ᐱᓇᓱᐊᒃᑲᓐᓂᖃᑦᑕᖁᕙᒃᑲ ᓯᕗᓂᑦᑎᓐᓂ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᓛᔅᑲᒥ ᐊᖏᔪᖅᑳᖓ ᐃᔅᓯᕙᐅᑕᐅᓪᓗ ᑐᖏᓕᖓ, ᔭᐃᒻᔅ ᓯᑕᑦᔅ ᐅᖃᓚᐅᖅᑐᖅ ᖁᕕᐊᒋᔭᖃᕋᒥ ᐃᒫᒃ “ᑕᒪᓐᓇ ᐃᓕᓴᖅᓯᓂᖅ ᐱᖃᓐᓇᕆᓚᐅᖅᑕᕐᓂᑦ ᐃᖅᑲᓇᐃᔭᖃᑎᒋᔪᔭᓐᓂᓪᓗ ᓴᖅᑭᖅᑕᓯᓐᓇᓕᖅᑐᖅ. ᖁᔭᒋᑦᑎᐊᖅᑕᕋ ᓇᒻᒥᓂᖅ ᑕᑯᓪᓗᓂ ᕼᐊᓐᔅ-ᐱᕕᐊ ᐃᖅᑲᐅᒪᔭᐅᑎᓪᓗᒍ ᑕᐃᒫᒃ. ᐅᐱᒋᑦᑎᐊᖅᑕᒃᑲ ᑕᐃᒃᑯᐊ ᓯᕗᓕᖅᐹᒥ ᐃᓕᓴᕆᔭᐅᔾᔪᑎᑖᑦᑐᑦ. ᖁᕕᐊᓇᖅᑐᐃᓐᓇᑦᑎᐊᖑᔪᓯ, ᓯᕗᓂᑦᑎᓐᓂ ᑲᔪᓯᔪᑯᓗᓐᓂ ᑕᑯᒃᑲᓐᓂᕈᒥᓇᖅ. ᐱᓇᓱᑦᑎᐊᕆᔅᓯᑐ.”