Press Releases

Documenting our Progress

ᑲᓇᑕᒥ ᐊᓪᓚᕕᖓᓐᓂ ᓄᑖᕐᒥᑦ ᑲᒥᓴᓇᖅᑖᖅᑐᖅ ᓄᓇᖃᖅᑳᖅᑐᒥᓃᑦ ᐅᖃᐅᓯᓕᕆᓂᕐᒧᑦ ᐱᖃᓯᐅᑎᓪᓗᒋᑦ ᐃᓄᐃᓪᓗ ᑭᒡᒐᖅᑐᖅᑕᐅᑦᑎᐊᕐᓂᐊᕐᓂᖏᓐᓄᑦ

ᔫᓂ 16, 2021 – ᐋᑐᐋ, ᐊᓐᑎᐅᕆᔪ – ᓇᓗᓇᐃᖅᓯᕗᒍᑦ ᑲᓇᑕᒥ ᓄᑖᕐᒥᑦ ᐊᓪᓚᕕᒻᒥ ᑲᒥᓴᓇᐅᑉ ᐃᓚᑖᖅᑐᑦ ᓄᓇᖃᖅᑳᖅᑐᒥᓂᑦ ᐅᖃᐅᓯᖏᓐᓂ ᐊᔾᔨᐅᖏᑦᑐᒥᑦ ᐊᔅᓱᕉᑕᐅᖏᓐᓇᖅᑐᒥᑦ ᐱᐅᖅᓱᐊᖅᑕᐅᓇᓱᓐᓂᖓᓐᓂ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ. ᐱᑕᖃᕆᐊᖃᕐᓂᖏᓐᓂᓪᓗ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ.

“ᖁᕕᐊᑉᐳᒍᑦ ᓇᓗᓇᐃᖅᓯᒍᓐᓇᕋᑦᑕ ᕌᐳᑦ ᐅᐊᑦ ᑎᒃᑯᐊᖅᑕᐅᒻᒪᑦ ᐊᐅᓚᑦᑎᔨᐅᓂᐊᓕᖅᑐᓂ,” ᐅᖃᖅᑐᓂ ᒫᓂᑲ ᐃᐊᓪ-ᑲᓇᔪᖅ, ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᓇᑕᒥ. “ᐃᓅᓯᕐᒥᓂᒃ ᐃᖅᑲᓇᐃᔮᕆᖃᑦᑕᖅᑕᒥᓂᒃ ᑕᑯᔅᓴᓕᓯᒪᑦᑎᐊᕐᖓᑦ ᓴᓐᖏᔫᓪᓗᓂ ᓂᓪᓕᐊᔨᐅᓯᒪᓪᓗᓂ ᐃᓄᐃᑦ ᐅᖃᐅᓯᖏᓐᓂ, ᐊᖏᕐᕋᖃᖅᑐᖅ ᑰᔾᔪᐊᕐᒥ, ᓄᓇᕗᒻᒥ, ᑲᓇᑕᒥᓗ ᑕᐃᒪᐃᖃᑦᑕᖅᓯᒪᕗᖅ, ᐊᒻᒪᓗ ᐃᓄᐃᑦ ᓄᓇᖓᓐᓂᑦ. ᐅᑉᐱᕈᓱᑦᑎᐊᖅᑐᒍᑦ ᐃᓄᑦᑎᑐᑦ ᓴᓐᖓᑎᑦᑕᐅᑲᓐᓂᕐᓂᐊᓕᖅᑐᖅ ᑲᒪᒋᔭᐅᑦᑎᐊᓂᖅᓴᐅᒃᑲᓐᓂᓕᕐᓗᑎᓪᓗ.” ᐊᐅᓚᑦᑎᔨ ᐅᐊᑦ ᐱᔨᑦᑎᓚᐅᖅᓯᒪᒻᒥᔪᖅ 2018−ᒥ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᑎᒪᕕᔾᔪᐊᕐᓂᖏᓐᓂ, ᐃᓚᒋᔭᐅᓚᐅᖅᓯᒪᓪᓗᓂᓗ ᐃᓄᐃᑦ ᐃᓕᓐᓂᐊᖅᑐᓕᕆᓂᕐᒥᑦ ᑲᑎᒪᔨᕋᓛᖏᓐᓄᑦ.

ᓇᒡᒐᔾᔭᐅ ᔫᓂ 14−ᒥ, 2021 ᒥᓂᔅᑕ ᑲᓇᑕᒥ ᐃᑦᑕᕐᓂᓴᓕᕆᔨᒃᑯᖏᓐᓂ, ᓯᑏᕙᓐ ᒋᐅᓪᐳᑦ, ᓇᓗᓇᐃᖅᓯᓚᐅᖅᑐᖅ ᓄᑖᕐᒥᑦ ᑲᒥᓴᓇᒥᑦ, ᕌᓄᑦ ᐃᒡᓇᔅᒥᑦ, ᐃᓚᒋᔭᐅᔪᖅ ᐊᓪᓚᖓᔪᓄᑦ ᐳᕆᑎᔅ ᑲᓚᒻᐱᐊᒥ. ᐊᓯᖏᓪᓗ ᐊᐅᓚᑦᑎᔩᑦ ᔪᐊᔾᔨ ᓕᐳᑎᒧᑦ ᐃᖅᑭᓕᓐᓂᑦ ᒫᓂᑑᐸᒥ, ᐊᒻᒪᓗ ᔪᐊᓐ ᕋᐃᔭᔅ ᐃᓚᒋᔭᐅᒋᓪᓗᓂ ᐃᖅᑭᓕᓐᓄᑦ ᐊᖏᕈᑎᒥᑦ 6 ᓴᔅᑳᑦᓱᐊᒥ.

ᓴᖅᑭᖅᑕᐅᓂᖓᓐᓂ ᑖᓐᓇ ᑲᒥᓴᓇᐅᑉ ᐊᓪᓚᕕᖓᓐᓂ ᓄᓇᖃᖅᑳᖅᑐᒥᓂᕐᓄᑦ ᐅᖃᐅᓯᖅ ᐱᓪᓚᕆᐊᓘᕗᖅ ᐊᑐᓕᖅᑎᑦᑎᕙᐊᔪᖅ ᑲᓇᑕᒥ ᓄᓇᖃᖅᑳᖅᑐᒥᓂᑦ ᐱᖁᔭᖏᓐᓂ, ᑲᔪᓯᑎᑕᐅᓚᐅᖅᓯᒪᔪᒥᑦ ᔫᓂ 21−ᒥ, 2019−ᖑᑎᓪᓗᒍ. ᑖᓐᓇ ᑲᒥᓴᓇᐅᑉ ᐊᓪᓚᕕᖓᓐᓂ ᓄᓇᖃᖅᑳᖅᑐᒥᓂᕐᓄᑦ ᐅᖃᐅᓯᖅ ᐊᐅᓚᓂᐊᖅᑐᖅ ᐃᒻᒥᓂᒃ ᑲᓇᑕᐅᑉ ᒐᕙᒪᖓᓂᓐᖔᕐᓗᓂ ᐃᑲᔪᖅᑐᖅᑕᐅᓗᑎᑦ ᓄᓇᑲᖅᑳᖅᑐᒥᓃᑦ ᐆᒻᒪᑲᓐᓂᖁᓗᒋᑦ, ᐊᐅᓚᐃᓐᓇᖁᓪᓗᒋᑦ ᓴᓐᖓᑎᒃᑲᓐᓂᖁᓪᓗᒋᓪᓗ ᓄᓇᖃᖅᑳᖅᑐᒥᓃᑦ ᐅᖃᐅᓯᖏᑦ. ᓴᖅᑭᔭᖅᑎᑦᑎᑲᓐᓂᕐᒥᔪᖅ ᑭᒃᑯᑐᐃᓐᓇᕐᓄᑦ ᐅᔾᔨᓱᖁᔨᓪᓗᑎᑦ ᓄᓇᖃᖅᑳᖅᑐᒥᓃᑦ ᐅᖃᓯᖏᓐᓂ, ᑮᓇᐅᔭᖃᖅᑎᑕᐅᓗᑎᓪᓗ ᖃᐅᔨᓴᖅᑕᐅᓂᖏᓐᓄᑦ ᐊᒻᒪᓗ ᐊᑐᖅᑕᐅᖃᑦᑕᕐᓂᖏᓐᓂ ᓄᓇᖃᖅᑳᖅᑐᒥᓃᑦ ᐅᖃᐅᓯᖏᑦ ᑲᓇᑕᒥ. ᐱᖅᑯᓯᒃᑯᓪᓗ ᓴᖅᑭᔮᖅᑎᑐᑦᑎᑲᓐᓂᕐᒥᔪᖅ ᐊᑲᐃᓪᓕᐅᕈᑕᐅᓯᒪᔪᒥᑦ ᐱᔨᑦᑎᕋᕐᓂᒃᑯᑦ ᕿᒥᕐᕈᔭᐅᖃᑦᑕᕆᐊᖃᕐᓂᖏᓐᓂᓪᓗ ᐅᓐᓂᕐᓘᑕᐅᓯᒪᔪᓂᒃ.

“ᑕᒪᓇ ᑕᑯᓐᓇᕋᑦᑎᒍᑦ ᐱᒻᒪᕆᐊᓘᓂᖓᓐᓂ,” ᐅᖃᖅᑐᓂ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ ᑕᓕ ᓵᒻᐳ ᑐᕉ. “ᐸᕐᓇᐸᓪᓕᐊᓕᖅᑎᓪᓗᑕ ᓴᖅᑭᓛᖅᑕᑎᓐᓂ ᓯᓚᕐᔪᐊᒥ ᑲᑐᔾᔨᖃᑎᒌᑦ ᐅᑭᐅᑦ ᐊᕙᑏᑦ ᓄᓇᖃᖅᑳᖅᑐᒥᓂᕐᓂᑦ ᐅᖃᐅᓯᕐᓂᑦ ᐱᒋᐊᖅᑐᒍ 2022−ᒥ – 2032−ᒧᑦ, ᑲᓇᑕᒥ ᐱᒋᐊᕈᑕᐅᔪᑦ ᐊᓯᖏᓐᓂᓪᓗ ᓄᓇᓕᕐᔪᐊᕐᓂᑦ ᒪᓕᔅᓴᕈᒪᖅᑐᓂᑦ ᐱᐅᖅᓱᐊᕐᓂᕐᒥᑦ ᓴᖅᑭᔮᖅᑎᑦᑎᓂᕐᒥᓪᓗ ᓄᓇᖃᖅᑳᖅᑐᒥᓃᑦ ᐅᖃᐅᓯᖏᓐᓂ.” ᐃᓄᐃᑦ ᐅᖃᐅᓯᖏᑦ, ᐅᖃᓚᐅᖅᑐᖅ ᑕᐃᒫᒃ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑭᒡᒐᖅᑐᐃᔩᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᐅᑭᐅᑦ ᐊᕙᑏᑦ ᓄᓇᖃᖅᑳᖅᑐᒥᓂᕐᓂᑦ ᐅᖃᐅᓯᕐᓂᑦ ᓄᓇᕗᑦ ᑐᓐᖓᕕᖓᓐᓂ ᐊᖏᔪᖅᑳᖅ ᐊᓗᑭ ᑰᑦᑎᖅ, ᐅᑉᐱᓇᑦᑎᐊᖅᑐᖅ ᓂᓪᓕᐊᔨᐅᖃᑦᑕᓲᖅ ᐃᓄᐃᑦ ᐅᖃᐅᓯᖏᓐᓂ ᐱᔾᔪᑎᖃᖅᑐᓂ.

ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ, ᐃᓚᖓ 13 ᐅᖃᖅᓯᒪᔪᖅ ᐱᔪᓐᓇᐅᑎᖏᓐᓂ ᐅᖃᐅᓯᕐᓂᑦ ᐃᓚᖓᓃᑦᑐᓂ 1: “ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖃᖅᑐᑦ ᐆᒻᒪᑎᑦᑎᑲᓐᓂᕋᓱᐊᕐᓗᑎᑦ, ᐊᑐᕐᓗᑎᑦ, ᐋᖅᑮᓗᑎᑦ ᑐᓂᓗᒋᓪᓗ ᓯᕗᓂᔅᓴᖏᓐᓄᑦ ᐱᒻᒪᕆᐅᓕᕈᒫᕐᓗᑎᑦ, ᐅᖃᐅᓰᑦ, ᐅᓂᒃᑳᖅᑐᐊᑐᖃᐃᑦ, ᐃᓱᒪᑐᓃᑦ, ᑎᑎᕋᕐᓃᑦ ᐅᖃᒫᕐᓃᑦ, ᐊᒻᒪᓗ ᓇᓗᓇᐃᖅᑕᐅᓯᒪᓂᖏᑦ ᐱᓯᒪᑦᑎᐊᕆᐊᖃᕐᓂᖏᓐᓂᓪᓗ ᓇᒻᒥᓂᖅ ᐊᑎᖏᑦ ᓄᓇᓕᓐᓂᑦ, ᓄᓇᖏᑦ ᐃᓅᓯᖏᓪᓗ.”

-30-

ᑐᑭᓯᒋᐊᕐᕕᒋᔪᓐᓇᖅᑕᐃᑦ:

ᓯᑏᕙᓐ ᕼᐊᕆ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᓇᑕᒥ +1 613 668 1923 type88@post.com

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.