ᓯᑎᐱᕆ 30, 2021 – ᐋᑐᐋ, ᑲᓇᑕ – ᐅᓪᓗᒥ, ᑲᓇᑕ ᓄᑖᒥᒃ ᒐᕙᒪᑐᖃᒃᑯᑦ ᒪᓕᒐᑎᒍᑦ ᕿᑲᕐᓇᖃᓕᕐᒪᑦ ᑕᐃᔭᐅᔪᖅ ᑲᓇᑕᓕᒫᒥ ᐅᓪᓗᖓ ᓱᓕᔪᒥᒃ ᑭᒡᓕᓯᓂᐊᕐᓂᕐᒥᒡᓗ. ᐅᓪᓗᖅ ᐃᖅᑲᐅᒪᔾᔪᑕᐅᕗᖅ ᐊᑐᖅᑕᐅᖃᑦᑕᕐᓂᑯᓂᒃ ᐊᒻᒪ ᖁᐊᖅᓵᕐᓇᖅᑐᒃᑰᕈᑕᐅᖃᑦᑕᓚᐅᖅᑐᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᐅᐱᒋᓗᒋᓪᓗᒋᑦ ᐊᓂᒍᐃᓯᒪᔪᑦ, ᐊᒻᒪ ᐃᓚᒌᑦ, ᐊᒻᒪ ᓄᓇᓕᓕᒫᑦ ᕿᒃᓵᖃᐃᓐᓇᖅᑐᑦ ᑕᐃᒃᑯᓄᖓ ᐃᓚᙵᐅᑎᐅᓚᐅᖅᑐᓄᑦ.
“ᓴᖅᑭᑕᐅᓂᖓ ᑲᓇᑕᓕᒫᒥ ᐅᓪᓗᖅ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᖕᓂᕐᒧᓪᓗ ᐱᒻᒪᕆᐅᓪᓗᓂ ᐊᓪᓗᕆᐊᕈᑎᐅᔪᖅ ᒪᒥᓴᕐᓂᕐᒧᑦ,” ᐅᖃᖅᑐᖅ ᐃᓄᐃᑦ ᓯᓚᕐᔪᐊᕐᒥ ᑲᑎᒪᔨᕐᔪᐊᑦ ᐊᖓᔪᖅᑳᖓᑦ ᒫᓂᑲ ᐃᐅᓪ−ᑲᓇᔪᖅ. “ᒪᒥᓴᕐᓂᖅ ᐊᑯᓂᐅᓲᖑᕗᖅ, ᐃᓛᓐᓂᒃᑯᑦ ᐃᓅᓯᓕᒫᖅ ᐱᓕᕆᐊᖑᓲᖑᕗᖅ. ᐊᒥᓱᑦ ᐃᓄᐃᑦ ᒪᒥᓴᕐᓂᕐᒦᒻᒪᑕ. ᓄᓇᓕᖁᑎᕗᑦ ᒪᒥᓴᕆᐊᖃᕐᒪᑕ ᑭᖑᕚᕇᑦ ᖁᐊᖅᓵᖅᓯᒪᓂᕆᓚᐅᖅᑕᖏᑦ ᖃᑕᙳᑎᒌᑦ ᐊᕐᕌᒍᑦ ᖁᓕᑦ ᐃᓗᐊᓂ. ᐅᓪᓗᖅ ᑕᐃᒫᒃ ᐱᕕᖃᖅᑎᑦᓯᔪᖅ ᑭᒃᑯᓕᒫᓂᑦ ᑲᓇᑕᒥᑦ ᐃᓱᒪᒋᔭᖃᕐᓂᕐᒥᑦ ᖃᓄᐃᓐᓂᐅᓚᐅᖅᑐᓂᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ. ᑕᒪᑐᒪᓂ ᐊᕐᕌᒍᒥ ᐱᓗᐊᙳᐊᖅᖢᓂ, ᖃᐅᔨᔭᐅᑎᓪᓗᒋᑦ 100−ᖏᓐᓃᑦᑐᑦ ᓇᓗᓇᐃᖅᑕᐅᓯᒪᙱᑦᑐᑦ ᐃᓗᕖᑦ ᓄᓇᖃᖅᑳᖅᓯᒪᔪᑦ ᓄᑕᖅᑲᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᑦ ᖃᓂᒋᔮᓂ, ᐱᔾᔪᑎᖃᖅᐳᒍᑦ ᓄᖅᑲᓚᐅᑲᒍᒪᓪᓗᑕ ᑕᑯᒃᓴᐅᑎᑦᑎᓗᑕᓗ ᑐᑭᑦᑎᐊᕙᖕᒥᒃ ᓱᓕᔪᒥᒃ ᑭᒡᓕᓯᓂᐊᕐᓂᕐᒥᒡᓗ.”
ᔫᓂ 2021−ᒥ, ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓ ᑕᒪᐃᓐᓄᑦ ᐊᓂᒍᖅᑎᑦᑎᓚᐅᖅᐳᑦ ᒪᓕᒐᓕᐊᖑᔪᒪᔪᒥᒃ ᓯᑎᐱᕆ 30−ᒥ ᑲᓇᑕᒥ ᐅᓪᓗᕆᔭᐅᓂᐊᖅᑐᒥᒃ ᓱᓕᔪᒥᒃ ᑭᒡᓕᓯᓂᐊᕐᓂᕐᒥᒡᓗ. ᑎᒃᑯᐊᖅᑕᐅᓯᒪᔪᖅ ᐊᑭᓕᖅᓱᖅᑕᐅᓪᓗᓂ ᕿᑲᕐᓇᖅ ᒐᕙᒪᑐᖃᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐅᖃᐅᓯᖃᕆᕗᖅ ᐃᓚᖓᓐᓂᒃ 94−ᓂᒃ ᖃᓄᐃᓕᐅᖁᔨᔪᓂᒃ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᖕᓂᕐᒧᓪᓗ ᑭᒡᓕᓯᓂᐊᖅᑎᒃᑯᓐᓂᑦ: ᑎᓕᐅᖅᐸᕗᑦ ᒐᕙᒪᑐᖃᒃᑯᑦ, ᐱᓕᕆᖃᑎᖃᕐᓗᑎᒃ ᓄᓇᖃᖅᑳᖅᓯᒪᔪᓂᒃ, ᐋᖅᑭᒃᓯᒪᓕᖅᑎᑦᑎᔪᒪᓪᓗᑕ ᐱᖁᔭᑎᒍᑦ ᕿᑲᕐᓇᐅᓂᖓᓂᒃ, ᑲᓇᑕᓕᒫᒥ ᐅᓪᓗᕆᔭᐅᓂᐊᖅᑐᒥᒃ ᓱᓕᔪᒥᒃ ᑭᒡᓕᓯᓂᐊᕐᓂᕐᒥᒡᓗ ᐅᐱᒋᔭᖃᕐᓂᕐᒧᑦ ᐊᓂᒍᐃᓯᒪᔪᓄᑦ, ᐃᓚᒥᓄᑦ, ᓄᓇᓕᖕᒥᐅᓄᓪᓗ, ᓇᓗᙱᑦᑎᐊᕈᒪᓂᕐᒧᓪᓗ ᑭᒃᑯᑐᐃᓐᓇᓄᑦ ᐃᖅᑲᐅᒪᔾᔪᑕᐅᕙᓚᐅᖅᑐᓂᒃ ᖃᓄᐃᓕᐅᖅᑕᐅᕙᓚᐅᖅᑐᓄᑦ ᐊᑐᖅᑕᐅᕙᓚᐅᖅᑐᓄᓪᓗ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᐱᒻᒪᕆᐊᓘᖏᓐᓇᖅᐳᖅ ᐃᓚᒋᔭᐅᓪᓗᓂ ᐋᖅᑭᒋᐊᕈᑎᖃᕐᓂᕐᒧᑦ ᑲᔪᓯᓂᕆᔭᐅᕙᒃᑐᒧᑦ.”
“ᓇᓗᙱᓚᖓ ᑕᑯᓂᐊᖅᑐᒍᑦ ᐊᒥᓱᓂᒃ ᐃᓄᖕᓂᒃ ᐊᑐᖅᑐᓂᒃ ᐊᐅᐸᔮᖅᑐᓂᒃ ᐅᕕᓂᕈᕐᓂᒃ ᐅᓪᓗᒥ,” ᐅᖃᖅᑐᖅ ᒫᓂᑲ ᐃᐅᓪ−ᑲᓇᔪᖅ. “ᓇᓗᓇᐃᒃᑯᑕᑦ ᐱᒻᒪᕆᐅᔪᑦ. ᐊᑐᕐᓂᖅ ᐊᐅᐸᔮᖅᑐᒥᒃ ᐅᕕᓂᕈᕐᒥᒃ, ᑕᑯᒃᓴᐅᑎᑦᑎᓗᓂᓘᓐᓃᑦ ᐊᐅᐸᔮᖅᑐᒥᒃ ᓴᐃᒻᒪᑎᒥᒃ, ᐅᕝᕙᓘᓐᓃᑦ ᐊᐅᐸᔮᖅᑐᒥᒃ ᖃᕿᖅᑯᐊᕐᒥᒃ ᑕᑯᒃᓴᐅᑎᑦᑎᔪᖅ ᑲᒪᒋᑦᑎᐊᕐᓂᕐᓂᒃ ᐃᑲᔪᕐᑐᓂᓗ ᑲᓇᑕᓕᒫᒥ ᒪᒥᓴᕐᓂᕐᒥ ᐱᕙᓪᓕᐊᓂᕐᒥ. ᐱᒃᑯᒋᕙᒃᑲ ᑲᓇᑕᒥ ᐅᑭᐅᖅᑕᖅᑐᒥᓗ ᐊᕕᒃᓯᒪᓂᕆᔭᐅᔪᑦ ᑲᑎᒪᔨᐅᖃᑕᐅᓕᖅᑐᑦ ᓇᓗᓇᐃᖅᓯᓪᓗᑎᒡᓗ ᓄᖅᑲᖓᓐᓇᐅᓂᐊᖅᑐᒥᒃ ᐅᓪᓗᒥ, ᑕᒪᒃᑯᐊ ᐅᓄᕐᓂᖅᓴᑦ ᐃᓄᐃᑦ ᐱᕕᒃᓴᖃᕈᓐᓇᖁᓪᓗᒋᑦ ᐃᓱᒪᒋᔭᖃᕈᓐᓇᖁᓪᓗᒋᑦ ᖃᓄᐃᓐᓂᐅᓚᐅᖅᑐᓂᒃ ᑕᒪᕐᒥᑦᑎᐊᖅ ᐊᑕᐅᑦᑎᒃᑯᑦ.”
-30-
ᖃᐅᔨᒋᐊᕐᕕᒋᒍᒃ:
ᓯᑏᕙᓐ Hᐊᓐᑐᕆ
ICC (ᑲᓇᑕ)
+1 613 668-1923
type88@post.com