Press Releases

Documenting our Progress

ᓯᓚᕐᔪᐊᒥ ᐃᒪᕕᓕᕆᓂᕐᒥ ᑎᒥᐅᔪᖅ (IMO) ᐊᓪᓚᕕᑦᓴᑎᒍᑦ

ᐃᓄᑐᐃᓐᓀᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᔨᖏᑦ (ICC) – ᓄᕕᐱᕆ 22, 2023-ᒥᓂᑌᑦ

ᓯᓚᕐᔪᐊᒥ ᐃᒪᕕᓕᕆᓂᕐᒥ ᑎᒥᐅᔪᖅ (IMO) ᓄᓇᖃᕐᖄᓯᒪᔪᑦ ᑲᑎᑦᓱᑎᒃ ᐱᓇᓱᕝᕕᖓ ᑲᒪᒋᔭᑦᓴᔭᖃᕐᓱᓂ ᓯᓚᕐᔪᐊᒥ ᐊᐅᓪᓚᑎᑦᓯᓂᕐᓂᒃ. ᐱᒍᑦᔨᓲᖅ ᑐᖕᖓᕕᐅᑦᓱᓂ ᓯᓚᕐᔪᐊᒥ ᐊᐅᓪᓚᑎᑦᓯᓂᕐᓄᑦ ᐱᖁᔭᓂᒃ ᐃᓚᐅᔪᖁᑎᖃᕐᓱᓂᓗ 175-ᓂᒃ ᓄᓀᑦ ᐊᕕᑦᑐᓯᒪᓂᖏᓐᓂᒃ, 66 ᑲᕙᒪᐅᖃᑎᒌᑦᑐᑦ ᑎᒥᖁᑎᖏᑦ (IGOs), ᐊᒻᒪᓗ 85 ᑲᕙᒪᒨᓕᖓᖕᖏᑐᑦ ᑎᒥᐅᔪᐃᑦ (NGOs).
ᐅᒥᐊᕐᔪᐊᑦ ᓯᓚᕐᔪᐊᓕᒫᒥ ᐱᓇᓱᒐᐅᕗᑦ ᐃᑳᓲᖑᑦᓱᑎᒃ ᓄᓀᑦ ᐊᕕᑦᑐᓯᒪᓃᑦ ᐃᒪᖏᑎᒍᑦ ᐊᒻᒪᓗ IMO ᐱᖁᔭᖃᕐᑎᓯᒐᓱᐊᕐᒪᑦ ᐊᕐᖁᑎᖃᕐᓂᒧᑦ ᐅᒥᐊᕐᔪᐊᓄᑦ ᐱᖁᔭᓂᒃ ᐊᐅᓚᓂᖏᓐᓂᓗ. ᓱᕐᖁᐃᓯᓯᒪᓂᕐᒧᑦ ᑐᑭᓯᓐᓇᓯᐊᕐᓂᖏᓐᓂᒃ ᐱᖁᔦᑦ ᐅᒥᐊᕐᔪᐊᓂ ᓄᓀᑦ ᐊᕕᑦᑐᓯᒪᓂᖏᑦᑕ ᐃᒪᖏᒍᑦ, ᓄᓀᑦ ᑭᒡᒐᑐᒡᒐᔪᓲᑦ ᓯᓚᕐᔪᐊᒥ ᐱᖁᔭᓂᒃ IMO-ᒥ. ᐃᓚᐅᓂᖃᕐᓂᖅ IMO-ᒧᑦ ᐃᓪᓚᕆᐅᕗᖅ ᑎᑭᐅᑎᔭᖃᑦᓯᐊᓂᕐᒧᑦ ᐊᑦᑕᓇᕐᓭᓕᒪᑦᔪᑎᓂᒃ ᓄᓀᑦ ᐊᕕᑦᑐᓯᒪᓂᖏᑦᑕ ᓂᕐᔪᑏᓐᓄ ᓴᐳᑎᔭᐅᓂᖏᓐᓄᑦ ᑎᑭᐅᑎᔭᐅᒐᓱᐊᕐᑐᓄᑦ.
ᓄᓇᖃᕐᖄᓯᒪᔪᑦ ᑲᑎᓐᓂᖏᑦᑕ ᐊᖏᖃᑎᒌᒍᑎᖓ ᐱᖁᔭᓂ ᐃᒪᕕᒻᒨᓕᖓᔪᓄᑦ (UNCLOS) ᑎᓕᔨᐅᖃᑎᖃᕐᓯᒪᔪᖅ ᓴᓗᒣᓪᓕᑎᕆᓂᕐᒨᓕᖓᔪᑦ ᐱᖁᔭᖏᓐᓂᒃ ᒥᑭᓂᕐᓴᐅᖃᔭᖕᖏᒪᑦ IMO ᐱᖁᔭᖏᓐᓂᒃ. UNCLOS ᐊᐅᓚᑦᓯᓂᖃᕐᒥᔪᖅ ᓄᓇᓂᒃ ᑲᒪᒋᔭᖃᕐᕕᐅᔪᓂᒃ ᓄᓀᑦ ᐊᕕᑦᑐᓯᒪᓂᖏᑦᑕ ᐃᒪᖏᓐᓂ: 12 ᐃᒫᒍᑦ ᐅᖓᓯᓐᓂᖓ ᓄᓇᐅᑉ ᐊᕕᑦᑐᓯᒪᓂᖓᑕ ᑲᒪᒋᔭᖃᕐᕕᖓ ᐃᒪᕐᒥ ᐅᓄᕐᓂᐸᐅᑎᓪᓗᒍ 200 ᐅᖓᓯᓐᓂᖓ ᐊᐅᓚᑦᓯᕕᐅᔪᖅ ᓄᓀᑦ ᐊᕕᑦᑐᓯᒪᐅᑎᖏᑦᑕ ᑲᒪᒋᔭᖃᕐᕕᖏᑦ ᒥᑭᓂᕐᓴᐅᑎᓪᓗᒋᑦ.
ᓯᓚᕐᔪᐊᒥ ᐊᐅᓪᓚᑎᑦᓯᓂᕐᒥ ᐱᖁᔦᑦ ᑐᖕᖓᕕᖏᓐᓂ ᓄᓇᖃᕐᖄᓯᒪᔪᑦ ᑲᑎᑦᓱᑎᒃ ᐱᔪᓐᓇᓂᖃᕐᕕᖏᓐᓂᒃ ᓄᓇᖃᕐᖄᓯᒪᔪᑦ ᐊᒻᒪᓗ ᐱᔪᓐᓇᓂᖃᕐᑎᓯᔨᒻᒪᕇᑦ, ᓄᓇᖃᕐᓂᕋᐅᑏᑦ, ᐆᒪᔪᕐᓂᐊᓂᕐᒥ ᐱᔪᓐᓇᐅᑏᑦ ᐊᒻᒪᓗ ᓇᒻᒥᓂᖅ ᐱᕈᕐᐸᓕᐊᕈᓯᖃᕐᓂᖏᓐᓂᒃ ᐃᓄᑐᐃᓐᓀᑦ. ᐊᑌᓐᓇᑐᒥᒃ ᐃᓄᑐᐃᓐᓀᑦ ᓂᐱᖃᕐᓂᖏᑦ IMO-ᒥ ᐱᓪᓚᕆᐅᕗᖅ ᓱᕐᖁᐃᓯᓯᒪᔭᖃᕐᓂᒧᑦ ᐃᓄᑐᐃᓐᓀᑦ ᐱᔪᓐᓇᐅᑎᖃᕐᓂᖏᑦᑕ ᓲᓱᒋᔭᐅᓂᖏᓐᓂᒃ ᐱᒋᔭᐅᖏᓐᓇᓚᖓᓗᑎᓪᓗ ᓯᕗᓂᕐᒥ, ᐃᓄᑐᐃᓐᓀᓗ ᐱᔪᒥᓇᕐᑎᓯᖏᓐᓇᓚᖓᓂᖏᓐᓂᒃ ᐱᖁᔭᖃᕐᑎᓯᓂᕐᒧᑦ ᐊᑦᑕᓇᕐᑐᒨᑦᑎᓯᑦᑌᓕᓂᕐᒧᑦ ᐃᒪᕕᓐᓂᒃ ᐋᕐᕿᓯᒪᔪᓂᓪᓗ ᐃᓄᑐᐃᓐᓀᑦ ᐱᔪᓐᓇᓂᖃᕐᕕᖏᓐᓂᒃ.

ᐃᓄᑐᐃᓐᓀᑦ ᑐᖕᖓᕕᖃᕐᖁᑦ ᐃᒪᕐᒥᐅᑕᓂᒃ ᓂᕐᔪᑎᓂᒃ ᑎᒥᒃᑯᑦ ᓲᖑᔫᖏᓐᓇᓂᕐᒧᑦ ᐃᓗᕐᖁᓯᕐᒥᓄᓪᓗ ᐊᒻᒪᓗ, ᑭᒡᒐᑐᕐᑎᐅᓱᑎᒃ ᐅᑭᐅᕐᑕᑑᑉ ᐃᒪᕐᒥᐅᑌᑦ ᓂᕐᔪᑎᖏᓐᓄᑦ ᒪᓕᑦᓱᑎᓗ ᓱᕐᖁᐃᓯᓯᒪᔭᖃᕐᓂᒧᑦ ᐊᑯᓃᓕᕿᔪᓄᑦ ᐃᓗᓯᕐᓱᓯᐊᕐᓂᒥᒃ ᐱᑕᙯᓐᓇᓂᕐᒥᓗ. ᐃᓄᑐᐃᓐᓀᑦ ᐃᓗᕐᖁᓯᒃᑯᑦ ᐊᑑᑎᓂᖏᑦ ᐲᕐᑕᐅᖃᔭᖕᖏᑐᒃᑯᑦ ᐱᑐᑦᓯᒪᓪᓚᕆᕐᖁᑦ ᐃᒪᕐᒧᑦ, ᓯᑯᓐᓄᑦ ᓯᓈᖏᓐᓄᓗ ᐃᓄᐃᑦ ᓄᓈᓐᓂ, ᐃᓄᑐᐃᓐᓀᑦ ᐊᓂᕐᕋᖓ ᓄᓇᖅ, ᑕᒪᓐᓇᓗ ᐱᑐᑦᓯᒪᐅᑎᓂᖅ ᓄᐃᑦᓯᓯᒪᕗᖅ ᐱᑕᖃᓚᕿᓂᕐᓂᒃ ᓄᓇᖃᕐᖄᓯᒪᔪᑦ ᖃᐅᔨᒪᐅᓯᖏᓐᓂᒃ ᐃᓪᓕᕆᔭᖏᓐᓂᓗ. ᑕᒐ ᐅᑭᐅᕐᑕᑐᒥ ᐃᒪᕕᓐᓂᒃ ᓴᐳᑦᔨᓯᒪᓂᐅᑉ ᐱᓪᓚᕆᐅᓂᖓ, ᐃᓗᕐᖁᓯᙯᓐᓇᑎᑦᓯᓱᓂ, ᖃᐅᔨᒪᐅᓯᕐᓂᒃ ᐃᓪᓕᕆᔭᖏᓐᓂᓗ, ᐊᒻᒪᓗ ᓯᕗᓂᖏᓐᓄᑦ ᐃᓄᑐᐃᓐᓀᑦ. ᑌᒣᒻᒪᑦ, ᐃᓄᑐᐃᓐᓀᑦ ᑐᖕᖓᕕᐅᑦᓯᐊᕆᐊᖃᕐᖁᑦ ᑐᑭᑖᕐᓂᓅᓕᖓᔪᓂ ᐊᐅᓚᑦᓯᓂᕐᓄᓗ ᐅᑭᐅᕐᑕᑐᒥ ᐃᒪᕕᒻᒨᓕᖓᔪᓂᒃ, ᓄᓇᓕᓐᓂᑦ ᑲᑎᑦᑐᓄᑦ ᓄᓇᖃᕐᖄᓯᒪᔪᓄᑦ ᑎᑭᓪᓗᒋᑦ. ᑕᒪᓐᓇ ᐃᓚᓕᒃ ICC ᐱᓇᓱᓐᓂᖏᓐᓂᒃ IMO-ᒥ. ICC ᑕᑯᓐᓇᒍᓯᖃᕐᖁᖅ ᓯᕗᓂᖃᕐᓂᒧᑦ ᐱᕙᓪᓕᐊᕈᑎᓕᒻᒥᒃ ᓇᓪᓕᖁᐊᕇᓐᓂᒥᒃ ᐃᒪᕖᑦ ᐱᓇᓱᑦᑕᐅᒍᑎᖏᓐᓂ, ᑐᑭᒧᐊᑦᑕᐅᑎᓪᓗᒋᑦ ᓄᓇᖃᕐᖄᓯᒪᔪᑦ ᖃᐅᔨᒪᐅᓯᖏᓐᓄᑦ ᐱᓪᓚᕆᓐᓂᓗ ᑐᕌᒐᖃᕐᓂᓄᑦ ᐱᕕᑦᓴᖃᕐᓂᖃᕈᑎᖏᓐᓂᓗ.

ᑎᑭᐅᑎᒍᒪᐅᑎᕗᑦ

ICC ᐊᑕᖏᕐᑐᑯᑦ ᑭᓪᓕᓯᓂᐊᕐᕕᖃᕐᓂᒧᑦ ᖃᓄᐃᑦᑐᒦᓐᓂᖓ 2025-ᒧᑦ ᑎᑭᓪᓗᒍ

ᓄᕕᐱᕆ 2021-ᒥ, ICC ᐱᓚᐅᔪᕗᖅ ᐃᒻᒪᖃᐅᑎᑦᓴᖃᕈᑎᓂᒃ NGO-ᑯᑦ ᑭᓪᓕᓯᓂᐊᕐᓂᖃᕈᑎᖏᓐᓄᑦ IMO-ᒥ ᓯᕗᓪᓕᐹᖕᖑᓱᓂ ᓄᓇᖃᕐᖄᓯᒪᔪᑦ ᑎᒥᐅᔪᖓᓂ ᐱᑎᑕᐅᑦᓱᓂ ᑌᒣᑦᑐᒥᒃ ᖃᓄᐃᑦᑑᓂᖃᕈᑎᖃᕐᓱᓂ. 2023-ᒥ ᐅᐱᕐᖔᑯᑦ, IMO ᑲᑎᒪᔨᖏᑦ ᕿᒥᕐᕈᓚᐅᔪᑦ ᐃᒻᒪᖃᐅᑎᖃᕈᑏᑦ ᖃᓄᐃᑦᑑᓂᖓᓂᒃ ᓄᑕᐅᓯᓕᕐᓱᒍᓗ ᐊᕐᕌᒎᓐᓄᑦ ᒪᕐᕉᓄᑦ. ICC ᐱᓇᓱᓲᖑᓕᕐᑐᖅ ᖃᓄᐃᓘᕈᓯᖃᕐᓂᑯᑦ ᓱᕐᖁᐃᓯᓯᒪᓂᕐᒧᑦ ᐊᑌᓐᓇᑐᒥᒃ ᖃᓄᐃᑦᑐᒦᓐᓂᖃᕐᓂᒧᑦ 2025-ᒥ. IMO-ᑯᑦ ᑐᑭᑖᕐᓂᖏᑦ ᓱᕐᕃᓂᖃᒻᒪᕆᓲᖑᕗᑦ ᐊᐅᓪᓚᑎᑦᓯᒍᑎᓂ ᐃᓄᑐᐃᓐᓀᑦ ᓄᓇᖏᓐᓂ ᐊᕙᑎᖏᓐᓂᓗ[1]. ᐃᓄᑐᐃᓐᓇᑯᑦ ᓂᐱᖃᕐᓂᖅ IMO-ᑯᑦ ᑲᑎᒪᓂᖏᓐᓂ ᓱᕐᖁᐃᓯᓯᒪᐅᑎᐅᕗᖅ ᐃᓄᑐᐃᓐᓀᑦ ᐱᔪᓐᓇᓂᖃᕈᑎᖏᑦᑕ ᑭᒡᒐᑐᕐᑕᐅᓂᖏᓐᓂᒃ ᓈᓚᑦᑕᐅᓗᑎᓗ. 2030-ᒧᑦ ᑕᑯᓐᓇᓗᓂ, ᑐᕋᒐᓱᐊᕐᑕᐅᔪᖅ ᑕᑯᒍᓐᓇᓯᒋᐊᕐᓂᐅᔪᖅ ᐊᒥᓱᓂᒃ ᓄᓇᖃᕐᖄᓯᓚᔪᑦ ᐃᒻᒥᒎᕐᑐᐃᓗ ᐃᑉᐱᒍᓱᑦᑎᐅᓂᖃᕐᓂᒧᑦ ᐊᑕᖏᕐᑐᒥᒃ IMO-ᑯᓐᓂ. ᑕᒪᓐᓇ ᓄᑭᖃᕐᑎᓯᓚᖓᔪᖅ ᓄᓇᖃᕐᖄᓯᒪᔪᓂᒃ ᑐᓂᕐᕈᑎᖃᕐᓂᒧᑦ ᑕᑯᓐᓇᕈᓯᖃᕐᓂᒥᓐᓂᒃ ᑐᑭᑖᕈᑎᖃᕐᓂᒧᓪᓗ ᓂᐱᖃᕐᓂᓂ ᐃᓘᓐᓈᒍᓪᓗ ᐃᒪᕕᓕᕆᓂᕐᒥ ᐊᐅᓚᑦᓯᓂᕐᒥᒃ.

[1] ᐃᓄᐃᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᒪᓂᖓ 2022 ᐃᓗᓪᓕᓵᑦ ᐅᖃᒻᒪᕆᓐᓂᖓ ᐊᓪᓚᓯᒪᔪᑦ ᐊᕕᑦᑐᓯᒪᓂᖓ 9

ᓱᕐᖁᐃᓯᓯᒪᓂᖅ ᐊᑐᓕᕐᑎᑕᐅᓂᖏᓐᓄᑦ ᓄᓇᖃᕐᖄᓯᒪᔪᑦ ᖃᐅᔨᒪᐅᓯᖏᓐᓂᒃ, ᐊᑐᓕᕐᑎᓯᓂᕐᒧᑦ UNDRIP-ᒥᒃ

ᐃᓄᑐᐃᓐᓀᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᔨᖏᑦ ᑕᑯᓐᓇᕈᓯᖃᕐᖁᑦ ᓄᓇᖃᕐᖄᓯᒪᔪᑦ ᖃᐅᔨᒪᐅᓯᖏᑦᑕ[2] ᐊᑐᕐᑕᐅᓂᖏᓐᓂᒃ ᐃᓘᓐᓈᒎᑦ IMO-ᑯᑦ ᐱᓇᓱᑦᑕᖏᓐᓂ 2030-ᒥ. ᑕᒪᓐᓇ ᓴᐳᑎᔭᐅᓚᖓᕗᖅ ᖃᓄᐃᓘᕈᓯᖃᕐᓂᒧᑦ ᐊᑐᓕᕐᑎᓯᓂᕐᒥ ᓄᓇᖃᕐᖄᓯᒪᔪᑦ ᑲᑎᑦᓱᑎᒃ ᐅᖃᒻᒪᕆᓐᓂᖓᒍᑦ ᐱᔪᓐᓇᐅᑎᖃᕈᑎᖏᓐᓂᒃ ᓄᓇᖃᕐᖄᓰᒪᔪᑦ (UNDRIP). ᐊᓂᒎᑎᑦᓯᐊᓂᖓ ᑕᒪᑦᓱᒪ ᑕᑯᓐᓇᕈᓯᖃᕐᓂᐅᑉ ᓂᑦᑕᑎᑕᐅᓯᒪᒌᕐᑐᖅ ᕿᒥᕐᕈᑕᐅᓯᒪᔪᓂ ᐃᒫᓂ ᓱᕐᕙᓗᖃᓪᓗᐊᖏᓐᓂᓴᐅᑎᑦᓯᓂᕐᒧᑦ ᑐᑭᒧᐊᒍᑎᓂ ᐅᒥᐊᕐᔪᐊᓄᑦ ᐃᓚᖃᓕᕐᑐᑦ ᓂᓪᓕᕈᑕᐅᑎᓪᓗᒋᑦ ᐊᐅᓚᓂᕐᒥ ᖃᓄᐃᑦᑐᒦᓐᓂᖃᕈᑎᖏᓐᓄᑦ ᐃᓄᐃᑦ ᓄᓈᓐᓂ ᖃᐅᔨᕙᓪᓕᒋᐊᖃᕐᓂᒧᓪᓗ ᐊᒻᒪᓗ ᐃᓚᐅᑎᑦᓯᓂᕐᒧᑦ ᓄᓇᖃᕐᖄᓯᒪᔪᑦ ᖃᐅᔨᒪᐅᓯᖏᓐᓂᒃ. ᐃᓚᒋᐊᕈᑎᒋᑦᓱᒍ, ᐱᐅᓯᐅᓪᓗᑯᖕᖏᑐᒃᑯᑦ ᑐᓴᐅᒪᖃᑎᒌᒍᑎᖃᕐᓂᖅ ᐃᒫᓂ ᓱᕐᕙᓗᖃᓪᓗᐊᖏᓐᓂᓴᐅᑎᑦᓯᓂᕐᒧᑦ ᐃᓄᐃᑦ ᓄᓈᑦ ᐃᒪᖏᓐᓂ ᐊᐅᓪᓚᑎᑕᐅᓯᒪᔪᖅ IMO-ᑯᑦ ᐃᓚᐅᔪᓕᒫᓄᑦ ᐅᑭᐊᑦᓴᐅᑎᓪᓗᒍ 2023-ᒥ(MEPC.1-CIRC.907). ICC-ᑯᑦ ᐱᓪᓚᕆᐅᓚᐅᔪᕗᖅ ᖃᓄᐃᓘᕐᑎᐅᓂᖓ ᑕᒪᑦᓱᒥᖓ ᐊᑑᑎᒍᓐᓇᓯᑎᑦᓯᓂᕐᒧᑦ ᐊᑐᓚᖓᑦᓱᒍᓗ ᐊᓂᒎᑎᔭᖃᕐᓂᒧᑦ ᑌᒣᑦᑐᓭᓐᓇᒐᓚᓐᓄᑦ ᐊᓯᑦᔨᑐᕐᓂᐅᓚᖓᔪᓄᑦ IMO-ᑯᑦ ᐊᖏᖃᑎᒌᒍᑎᖏᓐᓂ ᐱᖁᔭᖏᓐᓂᓗ ᐆᑦᑑᑎᒋᓗᒋᑦ ᐅᑭᐅᕐᑕᑐᒥᐅᑦ ᓇᓗᓀᒃᑯᑕᖓᑦ. ᐅᑭᐅᕐᑕᑐᒥᐅᑦ ᓇᓗᓀᒃᑯᑕᖓᑦ, ᐃᓄᑐᐃᓐᓀᑦ ᐃᓚᐅᕕᒋᓯᒪᖕᖏᑕᖓ ᐱᒋᐊᖕᖓᓂᖓᓂ, IMO-ᖑᕗᑦ ᐱᖁᔭᖁᑎᖏᑦ ᓄᐃᑦᓯᓱᑎᒃ ᐋᕐᕿᓯᒪᐅᑎᖓᓂᒃ, ᓴᓇᔭᐅᓂᖓᓂᒃ, ᐱᐅᒃᑯᑎᖏᓐᓂᒃ, ᐊᐅᓚᓂᖏᓐᓂᒃ, ᐱᒋᐅᕐᓴᑎᑦᓯᓂᖏᓐᓂᒃ, ᖃᐅᔨᒐᓱᐊᕐᓂᒥ, ᐅᐃᒪᓇᕐᑐᓕᕆᓂᕐᒥᓪᓗ ᐊᒻᒪᓗ ᓂᕐᔪᑎᓂᒃ ᓴᐳᑦᔨᓂᕐᒥ ᓈᒻᒪᑐᓄᑦ ᐅᒥᐊᕐᔪᐊᑦ ᐊᐅᓚᑕᐅᓂᖏᓐᓄᑦ ᐅᑭᐅᕐᑕᑐᒥ ᐃᓚᕕᖏᓐᓂ. ᕿᒥᕐᕈᔭᐅᓂᖓ ᐅᑭᐅᕐᑕᑐᒥᐅᑦ ᓇᓄᓀᒃᑯᑕᖓᑕ[3] ᑕᑯᓐᓇᑕᐅᒍᑎᖃᕐᑐᖅ ᑐᖕᖓᕕᐅᑎᓪᓗᒍ IMO-ᑯᑦ ᐱᓇᓲᑎᒋᔭᖓᓂ ᑐᑭᓯᓐᓇᓂᕐᓴᐅᓂᒃᑯᑦ ᐃᓚᐅᓂᖃᕐᑎᓯᓂᕐᒧᑦ ᐃᓄᑐᐃᓐᓀᑦ ᑕᑯᓐᓇᕈᓯᖏᓐᓂᒃ, ᓄᓇᖃᕐᖄᓯᒪᔪᑦ ᖃᐅᔨᒪᐅᓯᖏᓐᓂᒃ, ᐃᓱᓕᕝᕕᖏᑦᑕ ᐃᓚᒋᔭᐅᑎᓪᓗᒋᑦ ᐃᓄᐃᑦ ᓄᓈᑦ, ᓄᑕᐅᓯᓕᕐᓯᒪᔪᓪᓗ ᐅᑭᐅᕐᑕᑐᒥ ᓂᕐᔪᑏᑦ ᐋᕐᕿᓯᒪᐅᑎᖏᑦᑕ ᓴᐳᑎᔭᐅᓂᖏᑦ ᐊᑦᑕᓇᕐᑌᓕᒪᐅᑎᖃᕐᓂᒧᓪᓗ ᑐᖕᖓᕕᖏᑦ.

[2] ᐃᓄᐃᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᒪᓂᖓ 2022 ᐃᓗᓪᓕᓵᑦ ᐅᖃᒻᒪᕆᓐᓂᖓ ᐊᓪᓚᓯᒪᔪᑦ ᐊᕕᑦᑐᓯᒪᓂᖓ 29

[3] ᐃᓄᐃᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᒪᓂᖓ 2022 ᐃᓗᓪᓕᓵᑦ ᐅᖃᒻᒪᕆᓐᓂᖓ ᐊᓪᓚᓯᒪᔪᑦ ᐊᕕᑦᑐᓯᒪᓂᖓ 38

GHG ᒥᑭᔫᒋᐊᕐᑎᑕᐅᓂᖓᓄᑦ ᖃᓄᐃᓘᕈᓯᖅ ᑐᖕᖓᕕᓕᕐᑐᓴᐅᒪᔪᖅ ᓇᓪᓕᖁᐊᕇᕐᓂᑯᑦ ᐊᓯᑦᔨᓂᕐᒥ ᑐᖕᖓᕕᒻᒧᑦ ᓄᓇᖃᕐᖄᓯᒪᔪᑦ ᑐᑦᑕᕕᐅᑎᓪᓗᒋᑦ

ICC-ᑯᑦ ᐊᖏᕐᓯᒪᕗᑦ ᓴᐳᑦᔨᓂᕐᒧᑦ ᐃᓘᓐᓈᒍᑦ ᐊᓂᕐᓂᓴᒧᑦ ᐱᐅᖕᖏᓂᖃᖕᖏᓂᕐᓴᑯᑦ ᐊᐅᓪᓚᑎᑦᓯᓂᕐᓂᒃ^[4] ᐊᒻᒪᓗ ᐱᕈᕐᓰᕕᐅᑉ ᐊᓂᕐᓂᓴᖓᓂᒃ (GHG) ᐱᑕᖃᖕᖏᓂᕐᓴᐅᑎᑦᓯᓂᕐᒧᑦ ᖃᓄᐃᓘᕈᓯᖃᕐᓂᓄᑦ ᑐᖕᖓᕕᓕᒻᒥᒃ ᓇᓪᓕᖁᐊᕇᓐᓂᑯᑦ ᐊᓯᑦᔨᓂᕐᒧᑦ ᑐᖕᖓᕕᖃᕐᓂᒧᑦ. ᑕᒪᓐᓇ ᑐᖕᖓᕕᒃ ᓯᕗᓪᓕᐸᐅᑎᑦᓯᒋᐊᓕᒃ ᕿᑭᕐᑖᕈᕐᒥ ᐱᕙᓪᓕᐊᓂᕐᓂ ᓄᓀᑦ ᐊᑦᕕᑐᓯᒪᓂᕐᓂ (SIDS),ᐱᕙᓪᓕᐊᓯᒪᖕᖏᓂᕐᐹᓂ ᓄᓇᒻᒪᕆᓐᓂ (LDCs), ᐊᒻᒪᓗ ᓄᓇᖃᕐᖄᓯᒪᔪᑦ, ᐃᓚᐅᑎᓪᓗᒋᑦ ᑮᓇᐅᔭᖃᕐᑎᓯᓂᒃᑯᑦ ᓴᐳᑦᔨᒍᑏᑦ ᐃᑲᔪᕐᓯᓂᕐᒧᑦ ᑕᒪᒃᑯᓂᖓ ᓄᓇᖃᕐᖄᓯᒪᔪᓂᒃ ᐊᓯᑦᔨᓂᕐᒧᑦ ᓄᖑᑎᕆᖕᖏᓂᕐᓴᓄᑦ ᐊᓂᕐᓂᓴᑯᓪᓗ ᐱᐅᖕᖏᓂᖃᖕᖏᓂᕐᓴᑯᑦ ᐆᒪᒐᓱᐊᕈᑎᖃᕐᓂᓂ. ICC-ᑯᑦ ᓱᕌᒐᓱᐊᕐᑕᖓ ᓴᐳᑦᔨᓂᐅᕗᖅ 50%-ᒪᕆᓐᓄᑦ ᐱᕈᕐᓰᕕᒃᑯᑦ ᐊᓂᕐᓂᓴᕐᓗᑯᖃᖕᖏᓂᕐᓴᐅᑎᑦᓯᓂᕐᒧᑦ 2030-ᒥ ᐊᒻᒪᓗ ᐃᓘᓐᓈᒍᑦ ᐊᓂᕐᓂᓴᒃᑯᑦ ᐱᐅᖕᖏᓂᕐᓴᖃᖕᖏᓂᕐᓴᐅᑎᑦᓯᓂᕐᒧᑦ ᐅᒥᐊᕐᔪᐊᓂ 2040-ᒥ. ᑕᒪᑦᓱᒧᖓ ᑎᑭᐅᑎᔭᖃᕐᓂᒧᑦ, ICC-ᑯᑦ ᐃᓕᔭᐅᖁᔨᒐᔭᕐᑐᑦ ᐊᓄᕆᒧᑦ ᐊᐅᓚᑕᐅᒐᓚᓐᓂᓕᓐᓂᒃ ᐊᒥᓲᓂᕐᓭᑦ ᐅᒥᐊᕐᔪᐊᑦ ᓴᓇᔭᐅᓂᖏᓐᓄᑦ ᑭᒡᒐᑐᕐᓂᒧᓪᓗ ᐊᑑᑎᖃᑦᓯᐊᑐᓂᒃ ᐱᐅᓯᒋᐊᕈᑎᖃᕐᓂᓄᑦ ᓱᑲᑦᑐᒥᒃ ᓄᖑᑎᕆᓂᕐᓴᓄᑦ ᐳᔪᕐᓂᒃ ᐊᓂᐊᑎᕆᓂᕐᓂ ᐊᐅᓚᐅᑎᓂ. ICC-ᑯᑦ ᐃᑉᐱᒋᔭᖃᓗᐊᖕᖑᐊᒥᔪᑦ ᐱᓪᓚᕆᐅᓂᖓᓂᒃ ᐊᑐᓕᕐᑎᓯᓂᕐᒥ ᐊᑐᕐᑕᐅᕆᐊᖃᖕᖏᑎᑕᐅᓂᖏᓐᓄᑦ ᐅᕐᓱᐊᓗᑦᑐᑐᑦ (HFO) 2024-ᒥ, ᓯᓚᕐᔪᐊᓕᒫᒥ ᐊᑐᕐᖃᔦᕐᑎᑕᐅᔪᑦᓴᐅᑎᓪᓗᒋᑦ 2030-ᒥ. ᑭᖑᓪᓕᐹᒥ, ICC-ᑯᑦ ᑕᑯᓐᓇᖑᐊᕐᑐᑦ 2030-ᒥ ᓄᖑᑎᕐᑕᐅᒐᔭᕐᑎᓗᒋᑦ ᕿᕐᓂᑕᐅᑉ ᐊᓂᕐᓂᓴᒧᑦ ᐳᔪᓲᑦ[5] ᐅᒥᐊᕐᔪᐊᓂᑦ, ᐳᔫᑦᓱᓂ ᐊᓂᐊᔭᐅᔪᖅ ᐊᐅᓚᐅᑏᑦ ᐊᐅᓚᓂᖏᓐᓄᑦ. ᑕᒪᓐᓇ ᖃᐅᔨᒪᔭᐅᒍᓯᖃᓲᖅ ᓱᑲᓐᓂᓴᒥᒃ ᐊᐅᓭᓲᖑᑎᓪᓗᒍ ᓯᑯᓐᓂᒃ ᐊᐳᑎᒥᓪᓗ ᐊᓂᐊᔭᕐᓱᓂ. ᐃᓚᒋᐊᕈᑎᒋᑦᓱᒍ, ᐊᓂᐊᔭᕐᑕᐅᔪᑦ ᒥᑭᔪᐊᐱᐅᑦᓱᑎᒃ ᓂᕈᒥᑦᑑᖏᓐᓇᓲᑦ ᓯᕿᓐᓂᔮᕐᓂᒧᓪᓗ ᓂᑦᑕᕕᐅᓂᕐᒥᓄᑦ ᓂᕈᒦᓐᓇᓱᑎᒃ, ᐊᓂᕐᓂᒥᒃ ᐅᕐᖂᔫᑎᑦᓯᓚᕿᑦᓱᑎᒃ ᐊᕙᑎᖏᓐᓂ ᐳᔪᕐᕕᐅᑉ ᐱᐅᖕᖏᓕᕐᑎᕆᑦᓱᑎᓗ ᐃᒪᕕᒻᒥᒃ ᐊᓂᐊᔭᕐᑕᖏᑦ ᐃᕐᖃᒥ ᑲᑎᕐᓱᒪᑕ.

^[4]ᐃᓄᐃᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᒪᓂᖓ 2022 ᐃᓗᓪᓕᓵᑦ ᐅᖃᒻᒪᕆᓐᓂᖓ ᐊᓪᓚᓯᒪᔪᑦ ᐊᕕᑦᑐᓯᒪᓂᖓ 24

[5] ᐃᓄᐃᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᒪᓂᖓ 2022 ᐃᓗᓪᓕᓵᑦ ᐅᖃᒻᒪᕆᓐᓂᖓ ᐊᓪᓚᓯᒪᔪᑦ ᐊᕕᑦᑐᓯᒪᓂᖓ 32

ᓄᖑᑎᕆᒋᐊᕐᓂᖅ ᐅᕐᓱᐊᓗᓐᓂᒃ ᐃᓱᕐᑐᒥᓪᓗ ᓴᓗᒣᓪᓕᑎᕆᔪᓂᒃ[6] ᐃᓘᓐᓈᒍᑦ 2030-ᒥ, ᐃᑉᐱᒋᔭᖃᕐᓗᓂ ᕿᑎᕐᖃᓗᐊᖓᓄᑦ ᐃᒪᕐᒥ ᓱᕐᕙᓗᖃᖕᖏᓂᕐᓴᐅᑎᑦᓯᓂᕐᒧᑦ ᑕᒡᒐᓂᑦᓭᓇᖅ ᐊᕐᕌᒍᒥ, ᓯᕗᓪᓕᐸᐅᑎᔭᐅᑎᓪᓗᒍ ᐅᑭᐅᕐᑕᑐᖅ

[6] ᐃᓄᐃᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᒪᓂᖓ 2022 ᐃᓗᓪᓕᓵᑦ ᐅᖃᒻᒪᕆᓐᓂᖓ ᐊᓪᓚᓯᒪᔪᑦ ᐊᕕᑦᑐᓯᒪᓂᖓ 38

ᓄᖑᑎᕆᒋᐊᕐᓂᖅ ᐃᓱᐊᕐᓗᑦᑐᑐᓂᒃ ᐅᒥᐊᕐᔪᐊᓂᒃ, ᐊᓂᐊᑎᕆᓲᓂᒃ ᓱᒃᑯᓇᕐᑐᑕᓕᓐᓂᒃ[7] ᐃᒪᕕᒻᒧᑦ, ᐱᓪᓚᕆᐅᔪᖅ ᐃᓄᑐᐃᓐᓀᑦ ᐃᓗᓯᕐᓱᓯᐊᕐᓂᖏᓐᓄᑦ ᓂᕿᖃᕐᓂᑯᓪᓗ ᐊᑦᑕᓀᑦᑐᒦᓐᓂᒧᑦ. ᐅᒥᐊᕐᔪᐊᓂ ᐱᔪᑦ ᓱᒃᑯᑎᕐᓇᑐᑦ ᓱᕐᕃᕈᓐᓇᑐᑦ ᐃᒪᕕᐅᑉ ᐆᒪᔪᖁᑎᖏᓐᓂᒃ ᐊᑦᑕᓇᕈᓐᓇᓱᑎᓗ ᐃᓄᑐᐃᓐᓀᑦ ᐱᑦᓴᑖᕐᕕᒋᓲᖏᓐᓄᑦ ᐱᓪᓚᕆᓐᓄᑦ.

[7] ᐃᓄᐃᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᒪᓂᖓ 2022 ᐃᓗᓪᓕᓵᑦ ᐅᖃᒻᒪᕆᓐᓂᖓ ᐊᓪᓚᓯᒪᔪᑦ ᐊᕕᑦᑐᓯᒪᓂᖓ 38

ICC ᑕᑯᓐᓇᖑᐊᕐᓂᓕᒃ ᕿᑎᕐᖃᓗᐊᖏᓐᓄᑦ ᐃᒪᕐᒥ ᓱᕐᕙᓗᖃᖕᖏᓂᕐᓴᐅᑎᑦᓯᓂᕐᒧᑦ (URN) 2030-ᒥ ᐅᒥᐊᕐᔪᐊᓂ, ᐃᑉᐱᒋᔭᐅᓗᐊᖕᖑᐊᑎᓪᓗᒍ ᐅᑭᐅᕐᑕᑐᖅ. URN ᑐᓴᕐᓴᑯᑦ ᐅᓚᐱᑕᐅᓐᓇᑑᕗᖅ ᐅᒥᐊᕐᔪᐊᓂᑦ ᐅᓚᐱᑦᑐᓂᒃ ᑐᓴᐅᒪᖃᑎᒌᓐᓂᓂᒃ, ᓂᕿᑦᓴᓯᐅᕐᓂᓂᒃ, ᕿᑐᕐᖏᐅᓂᖏᓐᓂᒃ ᓂᕐᔪᑏᑦ ᐃᓄᑐᐃᓐᓀᑦ ᐊᒥᓱᑦ ᐱᑦᓴᑖᕐᕕᖏᑦ. ᐃᓚᒋᐊᕐᓱᒍ, ICC ᐃᓕᑕᕐᓯᓂᖃᕐᑐᖅ ᐱᐅᔪᒃᑯᑦ ᓱᕐᕃᓂᖏᓐᓂᒃ ᓱᑲᑦᑐᐃᑦ ᐱᑕᖃᖕᖏᓂᕐᓴᐅᓂᖏᓐᓂᒃ ᓱᕐᕙᖃᕐᓂᒥ ᐊᒻᒪᓗ GHG ᐳᔪᕐᑐᑦ ᐊᓂᐊᔭᕐᑕᐅᓂᖏᓐᓂ. ᓄᖑᑎᕆᒋᐊᕐᓂᑯᑦ ᓱᑲᓐᓂᖏᓐᓂᒃ ᐅᒥᐊᕐᔪᐊᑦ ᓯᓚᕐᔪᐊᒥ, ᑕᐯᕐᓇᑑᑦᓱᓂ 50%-ᖓᓄᑦ ᓄᖑᑎᕆᒋᐊᕐᓂᖅ GHG ᐊᓂᐊᔭᕐᑕᖏᓐᓂᒃ ᑎᑭᐅᑎᔭᐅᒍᓐᓇᓯᐊᕐᑐᖅ, ᓄᖑᑎᕐᑕᐅᓂᖏᓪᓗ ᐃᒪᕐᒥ ᓱᕐᕙᓗᐃᑦ ᓄᖑᕐᑎᑕᐅᒋᐊᕐᓂᖏᑦ ᐅᒥᐊᕐᔪᐊᑦ.

ᑌᒪ, ᐲᕐᐸᓕᐊᓂᖅ ᐃᒪᐅᑦᓱᓂ ᐅᕐᓱᐊᓗᒻᒥᑦ (LNG) ᐃᓛᒍᑦ ᐃᖏᕐᕋᐅᑎᓄᑦ ᐅᕐᓱᐊᓘᑎᓪᓗᒍ ᐱᔭᐅᑦᓴᐅᑎᒋᒋᐊᓕᒃ ᖃᒻᒥᐅᒍᓐᓇᕕᓕᒫᒃᑯᑦ. LNG ᐊᖏᔪᒻᒪᕆᒻᒥᒃ ᐊᓂᕐᓂᓴᒃᑯᑦ ᐱᐅᖕᖏᓂᖃᕐᖁᖅ, ᐊᑐᕋᑦᓴᐅᓯᐊᖕᖏᓂᕐᓴᐅᓚᕿᑦᓱᓂ ᐃᒪᒃᑯᑦ ᐊᐅᓚᔪᑦ ᐱᓇᓲᑎᖏᓐᓄᑦ, ᐅᑭᐅᕐᑕᑐᒥ ᐱᓗᐊᕐᑐᒥᒃ ᓯᓚᐅᑉ ᐊᓯᑦᔨᐸᓪᓕᐊᓂᖓᓄᑦ ᓱᕐᕋᑕᐅᒪᓂᕐᐹᓂ.

ᐃᓄᑐᐃᓐᓀᑦ ᐊᑐᒡᒐᔪᓲᖏᓐᓂᒃ ᓇᔫᑎᖃᕐᑌᓕᓂᖅ ᐋᕐᕿᓯᒪᐅᑎᖃᕆᐊᓖᓪᓗ ᓄᐃᑦᓯᒋᐊᖕᖓᑌᓕᓂᕐᒧᑦ ᓄᖑᑎᕆᒍᓐᓇᑐᓂᒃ ᐆᒪᔪᓂᒃ ᐱᓪᓚᕆᐅᕗᑦ ᐅᒥᐊᕐᔪᐊᓄᑦ ᓱᕐᕋᑕᐅᓪᓗᐊᑌᓕᑎᑦᓯᓂᕐᒧᑦ ᐃᓄᐃᑦ ᓄᓈᓐᓂ.

ᐱᓪᓚᕆᐅᕗᖅ ᐅᒥᐊᕐᔪᐊᖃᕐᑎᓯᑦᑌᓕᓂᕐᒧᑦ[8] ᐊᑦᑕᓇᕐᓯᓴᐅᑎᒋᒍᓐᓇᑐᓂ, ᐱᑕᖃᓗᐊᕐᓂᒥ ᐃᓄᑐᐃᓐᓀᓗ ᐊᑐᒡᒐᔪᕐᑕᖏᓐᓂ ᓱᕐᕃᓂᖃᓪᓗᐊᑌᓕᓂᕐᒧᑦ ᐃᓄᐃᑦ ᓄᓈᓐᓂᑦ. IMO-ᑯᑦ ᐊᐅᓚᓂᖏᑦᑕ ᑐᓴᐅᒪᖃᑎᒌᓐᓂᒃ ᕿᓂᕐᓂᓂ ᐅᐃᒪᓇᕐᑐᓕᕆᓂᕐᒥᓗ (NCSR)ᑲᑎᒪᔩᑦ ᐅᓐᓂᑐᓂᖃᕐᑯᑦ ᐊᕐᖁᑎᓂ ᑐᑭᒧᐊᒍᑎᖃᕐᓂᒧᑦ ᐊᑦᔨᒌᓕᕐᓯᒪᔪᓂ ᓯᓚᕐᔪᐊᒥ ᐅᒥᐊᕐᔪᐊᑦ. ᓄᓀᑦ ᐊᕕᑦᑐᓯᒪᓂᖏᑦ ᐊᓯᑦᔨᑕᐅᖁᔨᕗᑦ ᑕᒪᒃᑯᓄᖓ ᑲᑎᒪᔨᓄᑦ, ᓄᑖᓂᓪᓗ ᐊᕐᖁᑎᓂᒃ ᐃᓚᔭᐅᑦᓱᑎᒃ ᐅᒥᐊᕐᔪᐊᑦ ᐊᐅᓚᓂᖏᓐᓄᑦ. ᐆᑦᑑᑎᒋᑦᓱᒋᑦ ᐋᕐᕿᓯᒪᐅᑎᖃᕈᑎᖏᑦ Bering Strait Traffic Separation Scheme (TSS), ᐃᓂᒋᔭᐅᔪᑦ ᐅᐸᑦᑕᐅᑌᓕᒋᐊᓖᑦ (ATBAs), ᓱᑲᑦᑑᕕᐅᒋᐊᖃᖕᖏᑐᐃᓪᓗ ᐃᓄᕕᐊᓗᐃᑦ ᓄᓇᖃᕐᕕᖏᓐᓂ. ᐊᒥᓱᑦ ᑌᒣᑦᑐᒐᓓᑦ ᐋᕐᕿᓯᒪᐅᑎᖃᑐᐃᓐᓇᕆᐊᖃᕐᒥᔪᑦ ᓇᐅᒃᑯᑐᐃᓐᓇᖅ ᐃᓄᐃᑦ ᓄᓈᓐᓂ, ᐆᑦᑑᑎᒋᓗᒍ ᓱᕐᕃᓂᕐᑕᖃᓪᓗᐊᖏᑦᑐᑦ ᐅᒥᐊᕐᔪᐊᑦ ᐃᖏᕐᕋᕕᖏᑦ ᐱᒋᐊᕐᑎᑕᐅᓂᖓ ᑲᓇᑕᒥ.

[8] ᐃᓄᐃᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᒪᓂᖓ 2022 ᐃᓗᓪᓕᓵᑦ ᐅᖃᒻᒪᕆᓐᓂᖓ ᐊᓪᓚᓯᒪᔪᑦ ᐊᕕᑦᑐᓯᒪᓂᖓ 38

ᐅᒥᐊᕐᔪᐊᑦ ᓱᑲᑦᑐᒥᒃ ᐃᕐᐸᑎᕆᒍᓐᓇᖁᑦ ᓱᑲᑦᑐᐊᓗᒻᒥᒃ ᐊᒥᓱᖕᖑᕈᓐᓇᑐᓂᒃ ᐆᒪᔪᓂᒃ ᐃᒪᕕᒻᒥᑦ ᐃᒪᕕᒻᒧᑦ ᐊᓯᐊᓄᑦ ᐊᐅᓚᑦᓱᑎᒃ ᓱᒃᑯᑎᕆᒍᓐᓇᑐᓂᒃ. ᓯᐅᕋᕐᑕᖃᕐᓂᖓ ᐃᒪᐅᑉ ᐃᒪᕐᑑᑎᐅᕗᖅ ᐃᒪᕐᒥ ᑕᕆᐅᕐᒥᓘᓐᓃᑦ ᓱᓇᑕᖃᖕᖏᑐᓄᑦ ᐅᒥᐊᕐᔪᐊᒧᑦ ᓄᓪᓚᖓᑎᑦᓯᓯᐊᕐᓂᒧᑦ ᐊᓂᐊᔭᕐᑎᓯᓂᕐᒧᓗ ᐃᒪᕐᒧᑦ ᐃᓕᓪᓗᑐᐃᓂᕐᒧᑦ ᐅᓯᔭᑦᓴᓂᒃ. ᐃᒪᕐᒥ ᐱᔪᑦ ᐱᕈᕐᐸᓕᐊᓲᑦ ᐅᒥᐊᕐᔪᐊᒧᑦ ᓂᐱᑦᓱᑎᒃ ᐃᓂᑦᓴᔭᕆᖕᖏᑕᒥᓂ ᑲᑕᒐᕐᓱᑎᒃ. ᓯᐅᕋᕐᑕᖃᕐᓂᖓᓄᑦ ᐃᒪᐅᑉ ᐊᖏᖃᑎᒌᓐᓂᖅ (BWC), ᓄᐃᑕᐅᓯᒪᔪᖅ 2017-ᒥ, ᑎᓕᔨᓯᒪᐅᑎᐅᕗᖅ ᐅᒥᐊᕐᔪᐊᓄᑦ ᐲᔦᒋᐊᖃᕐᓂᖏᓐᓂᒃ ᐆᒪᔪᓂᒃ ᓂᐱᖕᖓᔪᓂᒃ ᐅᓯᖏᐊᓚᐅᕋᓯᒃ, ᐅᒥᐊᕐᔪᐊᓕᒫᓪᓗ ᑌᒣᑦᑐᓕᕆᐅᑎᖃᕆᐊᖃᕐᓱᑎᒃ 2024-ᒥ. ᑕᒪᒃᑯᓄᖓᓕᖓᔪᑦ ᑐᑭᒧᐊᒍᑏᑦ ᓄᑕᐅᓯᓕᕐᑕᐅᓯᒪᔪᑦ 2011-ᒥ ᐲᔦᓯᒪᒋᐊᖃᕐᓂᒧᑦ ᐆᒪᔪᐊᕈᕐᓂᒃ ᒥᖑᐊᕈᑎᓄᓪᓗ ᓂᐱᕐᕕᐅᑐᐃᓐᓇᖃᔭᖕᖏᑐᓄᑦ ᒥᖑᐊᕐᓯᒪᒋᐊᖃᕐᓱᑎᒃ, ᒫᓐᓇᐅᑎᓪᓗᒍᓗ ᕿᒥᕐᕈᔭᐅᓂᕐᒦᓱᑎᒃ IMO-ᒥ. ᐃᕐᐸᑎᖕᖏᓂᕐᓴᐅᑎᑦᓯᒋᐊᕐᓂᒧᑦ ᐆᒪᔪᓂᒃ, ᓄᑕᐅᓯᓕᕐᓯᒪᔪᖅ ᑐᑭᒧᐊᒍᑏᑦ ᐊᑑᑎᔭᐅᓪᓚᕆᓲᖕᖏᒋᐊᓖᑦ, ᖃᐅᔨᓭᓐᓇᓲᖑᓗᑎᓗ ᐃᑉᐱᒍᓱᓐᓂᒧᑦ ᓯᐅᕋᕐᑕᓕᓐᓂᒃ ᐃᒪᕐᒥ ᐊᑐᓲᑦ ᐋᕐᕿᓯᒪᐅᑎᖏᓐᓂᒃ ᐊᑭᓕᕋᑦᓴᑖᕐᑎᑕᐅᓲᖑᓗᑎᒃ ᒪᓕᖕᖏᑐᑦ. D2 (ᑕᐅᕐᓯᓂᖅ ᑲᒪᒋᔭᐅᓂᕐᓗ) ᐋᕐᕿᓯᒪᐅᑎ ᐊᑑᑎᔭᐅᖏᓐᓇᕆᐊᓕᒃ. ᐊᒻᒪᓗᒋᐊᓪᓚᖅ, ᐅᑭᐅᕐᑕᑐᒨᓕᖓᔪᑦ ᑐᑭᒧᐊᒍᖓᑏᑦ ᑕᒪᖏᓐᓄᑦ ᓯᐅᕋᕐᑕᓕᐅᑉ ᐃᒪᐅᑉ ᐊᑐᕐᑕᐅᓂᖓᑕ, ᑲᒪᒋᔭᐅᓂᖓᓗ ᐊᒻᒪᓗ ᐱᕈᕐᓯᒪᓃᑦ ᐱᒋᔭᐅᒋᐊᓖᑦ.

ᐃᓱᓕᒍᑎᖏᑦ ᖃᓄᐃᓕᓂᐊᕐᓂᖏᓪᓗ ᑭᖑᓂᐊᒍᑦ

ᐊᖏᖃᑎᒌᒍᑎᐅᓯᒪᑎᓪᓗᒍ ᑎᓕᔨᓯᒪᐅᑎ ᑕᑯᓐᓇᕈᓯᖃᕐᓂᓗ, ICC ᐃᓚᐅᓕᕐᑎᓂᖓ IMO-ᒥ ᐃᒣᓘᕈᒪᓚᖓᕗᖅ:

ᐊᑦᑕᓀᓕᑎᑦᓯᓂᖅ ᐊᑌᓐᓇᑐᒥᒃ ᑭᒡᒐᑐᕐᑎᖃᕐᓂᒧᑦ IMO-ᑯᓂ 2025-ᒥ
ᓱᕐᖁᐃᓯᓯᒪᓂᖅ ᐊᑐᕐᑕᐅᓂᖓᓂᒃ ᓄᓇᖃᕐᖄᓯᒪᔪᑦ ᖃᐅᔨᒪᐅᓯᖏᑦᑕ ᐃᓂᓕᒫᖏᓐᓂ IMO-ᑯᑦ ᐱᓇᓱᑦᑕᖏᓐᓂ
ᐅᖄᓚᓂᖅ ᓯᓚᐅᑉ ᖃᓄᐃᑦᑑᓂᖓᓄᑦ ᖃᓄᐃᓘᕈᑎᑦᓴᖃᕐᓂᒧᑦ ᑐᖕᖓᕕᓕᓐᓂᒃ ᓇᓪᓕᖁᐊᕇᒃᑯᑦ ᐊᓯᑦᔨᓂᕐᓄᑦ ᑐᖕᖓᕕᖏᓐᓂ ᑐᑦᑕᕕᐅᑎᓪᓗᒋᑦ ᓄᓇᖃᕐᖄᓯᒪᔪᑦ
ᐱᓇᓱᓐᓂᖅ ᓄᖑᑎᕆᒋᐊᕐᓂᒧᑦ ᓱᒃᑯᑎᕆᔪᑦ ᐃᒪᕐᒥ ᓱᕐᕙᑯᑦ ᕿᕐᓂᑕᓂᓪᓗ ᐳᔪᓲᓂ, ᓄᖑᑎᕆᒋᐊᕐᓂᖅ ᓱᑲᑦᑐᒥᒃ ᐊᒥᓱᖕᖑᒍᓐᓇᑐᓂᒃ ᐆᒪᔪᓂᒃ, ᑭᒡᒐᑐᕐᓂᓗ ᐅᒥᐊᕐᔪᐊᑦ ᐊᐅᓚᓂᖏᓐᓂᒃ ᐊᕐᖁᓵᕐᑌᓕᓂᒃᑯᑦ ᐃᓄᓱᐃᓐᓀᑦ ᐊᑐᓲᖏᒍᑦ ᐃᓄᐃᑦ ᓄᓈᓐᓂ

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.