ᓯᕗᕐᖓᓂ ᓄᓇᐅᑉ ᐅᓪᓗᖃᖅᑎᑕᐅᓂᖓᑕ 2021, ICC−ᑯᑦ ᐱᔪᓐᓇᐅᑎᑖᖅᑎᑕᐅᕗᑦ ᓇᐅᑦᓯᑐᕐᓂᕐᒥᑦ ᒐᕙᒪᐅᖃᑎᒌᑦᑐᑦ ᑲᑎᒪᔨᖏᓐᓂᒃ ᓯᓚᐅᑉ ᐊᓯᔾᔨᕐᓂᖓᓄᑦ (IPCC)

ᐄᑉᐳ 21, 2021 – ᐊᓐᑯᕆᔾ, ᐊᓛᔅᑲ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC−ᑯᑦ) ᖁᕕᐊᓱᑉᐳᑦ ᐅᖃᐅᓯᖃᕆᐊᒃᓴᖅ ᑲᔪᓯᑦᓯᐊᕐᓂᖓᓂᑦ ᑐᒃᓯᕋᐅᑦ ᓇᐅᑦᓯᑐᖅᑎᐅᓂᕐᒧᑦ ᒐᕙᒪᐅᖃᑎᒌᑦᑐᓂ ᑲᑎᒪᔨᖏᓐᓄᑦ ᓯᓚᐅᑉ ᐊᓯᔾᔨᕐᓂᖓᓄᑦ (IPCC−ᑯᑦ). ICC−ᑯᑦ ᓯᕗᓪᓕᖅᐸᐅᓪᓗᑎᒃ ᓄᓇᖃᖅᑳᖅᓯᒪᔪᓄᑦ ᑎᒥᖁᑕᐅᔪᑦ ᑎᒍᒥᐊᖅᑎᐅᓂᐊᖅᑐᑦ ᓇᐅᑦᓯᑐᖅᑎᐅᓂᕐᒥᑦ ᑖᒃᑯᓇᓂ IPCC−ᑯᓐᓂ. ᑖᒃᑯᐊ IPCC−ᑯᑦ ᑎᒥᐅᔪᑦ ᐃᖅᑲᓇᐃᔮᒃᓴᖃᖅᓱᑎᒃ ᖃᐅᔨᓴᖅᑐᓕᕆᓂᒃᑯᑦ ᑭᓪᓕᓯᓂᐊᕐᓂᕐᒥᑦ ᑐᕌᖓᔪᓂᑦ ᓯᓚᐅᑉ ᐊᓯᔾᔨᕐᓂᖓᓄᑦ. ᑎᒥᐅᔪᖅ ᓴᖅᑭᖅᑎᑕᒥᓂᖅ ᑲᑐᔾᔨᖃᑎᒌᑦᑐᑦ ᓄᓇᓕᕐᔪᐊᑦ ᐊᑎᓕᕆᓂᕐᒧᑦ ᐱᓕᕆᐊᒧᑦ (UNEP) ᐊᒻᒪᓗ ᓄᓇᕐᔪᐊᒥ ᓯᓚᓕᕆᓂᕐᒧᑦ ᑎᒥᖁᑎᐅᔪᖅ (WMO−ᑯᑦ) 1988−ᖑᑎᓪᓗᒍ. ᑖᒃᑯᐊ IPCC−ᑯᑦ ᒫᓐᓇᐅᔪᒥ 195−ᓂᑦ ᐃᓚᒋᔭᐅᔪᖁᑎᓖᑦ ᓄᓇᓕᕐᔪᐊᓂᑦ ᐊᒻᒪᓗ ᑕᐅᓴᖏᓐᓃᑦᑐᓂᑦ ᐃᑲᔪᖅᐸᑦᑐᓂᑦ. ICC−ᑯᑦ ᑐᒃᓯᕋᐅᑎᓕᐅᖅᑐᒥᓃᑦ ᓇᐅᑦᓯᑐᖅᑎᐅᓂᕐᒧᑦ ᑎᑎᕋᖅᑎᖓᓐᓄᑦ IPCC−ᑯᑦ ᕖᕝᕗᐊᕆᐅᑎᓪᓗᒍ 2020. ᑕᒪᓐᓇ ᑕᒪᒃᓱᒥᖓ ᐱᔪᓐᓇᖅᑎᑕᐅᓂᖅ ᐊᖏᖅᑕᒥᓂᖅ 53−ᒋᓕᖅᑕᖓᓂᑦ ᑲᑎᒪᓂᖏᑕ IPCC−ᑯᑦ, ᑲᑎᒪᓪᓗᑎᒃ ᖃᕆᑕᐅᔭᒃᑯᑦ, ᐱᒋᐊᖅᓱᑎᑦ ᒫᔾᔨ 22 ᑎᑭᑦᓱᒍ 26, 2021−ᒥ. ICC−ᑯᑦ ᑐᓴᖅᑎᑕᐅᓪᓗᑎᒃ ᐄᑉᐳ 15−ᒥ.

ICC−ᑯᑦ ᐃᒃᓯᕙᐅᑕᖓᑦ ᑕᓖ ᓴᒻᐳ ᐅᖃᖅᑐᒥᓂᖅ, “ᑎᑎᕋᖅᑕᕗᓐᓂ ᑎᑎᖅᑲᓕᐊᕗᑦ IPCC−ᑯᑦ ᑎᑎᕋᖅᑎᖓᓐᓄᑦ, ‘ICC−ᑯᑦ ᐱᖃᑕᐅᒍᒪᓂᖃᖅᐳᑦ IPCC−ᑯᑦ ᐃᖅᑲᓇᐃᔮᖏᓐᓂ ᐱᕙᓪᓕᐊᓂᖏᓐᓂᓗ, ᐱᓗᐊᖅᑐᒥ ᑐᕌᖓᔪᓄᑦ ᓄᓇᑦᑎᓐᓄᑦ ᐊᖏᕐᕋᖃᕐᕕᑎᓐᓄᑦ ᖃᓄᕐᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓ ᐃᓱᒪᒋᔭᐅᒻᒪᖔᑦ ᐊᑐᖅᑕᐅᖃᑦᑕᕐᓂᖓᑕᓗ.’ ᐊᕐᕌᒎᓂ ᐊᓂᒍᖅᑐᓂ ᐃᑲᔪᖅᓯᒪᔪᒍᑦ ᐱᔭᕆᐊᖃᓪᓚᕆᑦᑐᓂ IPCC−ᑯᑦ ᐅᓂᒃᑳᓕᐊᖏᓐᓂ ᐱᔾᔪᑎᓕᓐᓂᑦ ᓯᓚᐅᑉ ᐊᓯᔾᔨᕐᓂᖓᓂᑦ ᐊᒻᒪᓗ ᐱᓗᐊᖅᑐᒥ, ᑕᕆᐅᒥ ᐃᒪᕐᓂ ᐊᒻᒪᓗ ᓄᓇᐅᑉ ᖁᐊᖑᓂᖓ ᓂᓚᐅᓂᖓᑕ. ᓯᕗᓪᓕᖅᐸᓪᓗᑎᒃ ᓄᓇᖃᖅᑳᖅᓯᒪᔪᑦ ᑎᒥᖁᑎᖓᑦ ᑎᒍᒥᐊᕐᓂᐊᖅᑐᑦ ᑕᒪᒃᓱᒥᖓ, ᓯᕗᓂᖃᖅᐳᒍᑦ ᐊᒥᓱᙳᕆᐊᕐᓂᐊᕐᓂᖏᓐᓂᑦ ᐱᑲᑕᐅᓂᖅ ᐊᒻᒪᓗ ᑲᔪᓯᑎᑕᐅᓂᖓ ᐃᖅᑲᓇᐃᔭᖃᑎᖃᕐᓂᕗᑦ ᑖᒃᑯᓂᖓ IPCC−ᑯᑦ ᓯᕗᓕᖅᑎᖏᓐᓂᑦ ᐊᒻᒪᓗ ᐃᖅᑲᒋᔭᐅᔪᖅ ᑲᑐᔾᔨᖃᑎᒌᑦᑐᓄᑦ−ᐱᕙᓪᓕᐊᔭᐅᓂᖓ ᖃᐅᔨᒪᓂᖏᑕ ᑭᓪᓕᓯᓂᐊᖅᑎᒻᒪᕇᑦ ᖃᐅᔨᓴᕐᓂᒃᑯᑦ ᐱᓕᕆᐊᖏᑎᒍᑦ ᑕᕝᕙᓂ ᑲᑎᒪᓂᕐᒥ. ᑕᒫᓂ ᐱᓇᓱᐊᕈᓯᕐᒥ ᓇᓗᓇᐃᕐᓂᐊᖅᑕᕗᑦ ‘ᓄᓇᐅᑉ ᐅᓪᓗᖃᖅᑎᑕᐅᓂᖓ’  ᐄᐳᓘ 22−ᖑᓕᖅᐸᑦ.  ᕈᕕᐊᒋᓪᓗᑎᒍ ᓇᓗᓇᐃᖅᑕᕗᑦ ᑖᓐᓇ ᓯᕗᕐᖓᓂ ᐱᒻᒪᕆᐅᔪᖅ ᐅᓪᓗᖃᖅᑎᑕᐅᓂᖓᑕ, ᐱᔭᒃᓴᕗᑦ ᑕᐃᔭᐅᓂᖓ ‘ᐅᑎᖅᑎᓪᓚᕗᑦ ᓱᕐᕋᐃᑦᑑᓂᖓᓄ ᓄᓇᕗᑦ’.”

ICC−ᑯᑦ ᐃᑲᔪᖅᓯᒪᔪᑦ ᑕᕝᕙᓂ IPCC−ᑯᑦ ᐱᒻᒪᕆᐅᑎᓪᓗᒍ ᐅᓂᒃᑳᓕᐊᕆᓯᒪᔭ ᑕᕆᐅᑉ ᐃᒪᐅᑉ ᐊᒻᒪᓗ ᓄᓇᐅᑉ ᖁᐊᖑᓂᖓ ᓂᓚᐅᓂᖓᑕ ᐊᓯᔾᔨᐸᓪᓕᐊᔪᒥ ᓯᓚᒥᒃ, ᓴᖅᑭᖅᑎᑕᐅᓪᓗᓂ ᓯᑎᐱᕆ 2019. ᓄᓇᐅᑉ ᖁᐊᖑᓂᖓ ᓂᓚᐅᓂᖓ ᑐᕌᖓᔪᖅ ᖁᐊᖑᓂᐊᔪᓄᑦ ᓄᓇᒥ. 10−ᐳᓴᖓ ᓄᓇᐅᑉ ᕗᓴᐅᓂᖓᑕ ᐊᐅᔪᐃᑦᑐᓕᒃ ᐅᕝᕙᓘᓐᓃᑦ ᓯᑰᓂᓖᑦ. ICC−ᑯᑦ ᑲᒪᒋᔭᖃᕐᓂᖅᓴᒥᓃᑦ ᐅᓂᒃᑳᑎᓐᓃᑦᑐᒥᑦ ᐱᑭᐊᓚᓱᐊᕐᓱᐊᖅ ᑎᓕᔾᔭᐅᔪᑎᒋᓯᒪᔭᖓᑦ ᐆᑦᑑᑎᒋᔭᐅᓪᓗᓂ ᐃᓄᐃᑦ ᖃᐅᔨᒪᓂᖃᕐᓂᖏᓐᓂᑦ ᐊᒻᒪᓗ ᐃᓄᖕᓄᑦ−ᐊᐅᓚᑕᐅᓂᖓ ᓄᓇᒥ ᖁᐊᖑᓂᐅᔪᑦ ᐊᓯᔾᔨᕐᓂᖓᑕ ᐅᑎᐅᖅᑕᖅᑐᒥ ᐃᒪᖏᓐᓂ, ᓴᓂᐊᓃᑦᑐᑦ ᑖᒃᑯᐊ ᑲᓛᖡᑦ ᓄᓈᑕ ᐊᒻᒪᓗ ᕿᑭᖅᑖᓘᑉ ᑲᓇᑕᒥ.

“ᐊᒥᓱᑦ ᐊᑦᑐᓂᕐᓗᑦᑕᐅᑎᓪᓗᒋᑦ ᓯᓚᐅᑉ ᐊᓯᔾᔨᕐᓂᖓᓄᑦ ᓄᓇᓕᑦᑎᓐᓂᓗ ᓄᓇᕐᔪᐊᒥ, ᑖᓐᓇ ᐊᑕᐅᓯᖅ ᐆᑦᑑᑕᐅᒍᓐᓇᖅᑐᖅ ᖃᓄᖅ ᐃᓄᐃᑦ ᓂᐱᖃᕈᑎᒋᒻᒪᖔᒍ ᐃᑲᔪᖅᓯᓂᐊᖅᑎᓪᓗᒍ ᖃᐅᔨᔭᐅᔪᓂᑦ ᕼᐊᓐᓇᓚᖏᓐᓃᑦᑐᓂ ᑭᓪᓕᓯᓂᐊᖅᑎᕐᔪᐊᑦ ᖃᐅᔨᓴᖅᑎᑦ ᐃᖅᑲᓇᐃᔮᖏᓐᓂᑦ ᐱᓕᕆᖃᑎᖃᖅᓱᑎᒃ ᑕᒪᒃᑯᓂᖓ ᐅᓂᒃᑳᓕᐊᖑᔪᓂᑦ ᑖᒃᑯᓄᖓ IPCC−ᑯᓐᓄᑦ, ”ᐅᖃᖅᑐᒥᓂᖅ ICC−ᑯᑦ ᑲᓇᑕᒧᑦ ᑐᒡᓕᐊ ᐊᖓᔪᖅᑳᖅ) ᓖᓴ ᑯᐱᕐᕈᐊᓗᒃ. “ᓇᐅᑦᓯᑐᖅᑎᐅᓂᕐᒥᑦ ᐱᔭᒃᓴᖃᕐᓂᖅ ᓴᙱᑦᓯᒋᐊᕆᓂᐊᖅᐳᑦ ᐃᓄᐃᑦ ᓂᐱᖏᓐᓂᑦ ᑕᒪᒃᓱᒪ ᓯᓚᐅᑉ ᒥᒃᓵᓄᑦ ᑲᑎᒪᓂᕐᓂ ᐃᑲᔪᖅᑐᐃᒋᐊᒃᑲᓂᕐᓂᐊᖅᓱᓂᓗ ᐃᓄᖕᓂᑦ ᐱᖃᑕᐅᓂᖏᓐᓂᑦ ᐃᖅᑲᓇᐃᔮᖓᓂᒃ ᑖᒃᑯᐊ IPCC−ᑯᑦ.”

“ICC−ᑯᑦ ᐃᖅᑲᓇᐃᔭᖃᑎᖃᐃᓐᓇᖅᑐᑦ IPCC−ᑯᓐᓂᑦ ᖃᐅᔨᒪᒋᐊᑦᓯᐊᖅᓱᑎᒃ ᐃᓱᒪᑦᓴᖅᓯᐅᕈᑕᐅᑦᓯᐊᕋᓗᐊᕐᒪᖔᖅ ᓄᓇᖃᖅᑳᖅᓯᒪᔪᓄᑦ ᖃᐅᔨᒪᓂᖅ ᓯᕗᓂᕐᒥ ᖃᐅᔨᓴᐅᑕᐅᓂᐊᖅᑐᓂ, ”ᐃᓚᖏᐊᖅᓱᓂᐅᒃ ᐅᖃᐅᓯᓂ. “ᓂᕆᐅᒋᔭᖃᖅᐳᒍᑦ ᓇᐅᑦᓯᖅᑎᐅᓂᕐᒥᑦ ᐱᔪᓐᓇᕐᓂᖃᖅᑎᑕᐅᓂᖅ ᐃᑲᔪᖅᓯᓂᐊᖅᑐᖅ ᐅᕙᑦᑎᓐᓂᑦ ᑐᑭᓯᔭᐅᕙᓪᓕᐊᓗᓂ ᑖᒃᑯᓄᖓ ᓯᓚᒥᑦ ᖃᐅᔨᓴᕐᓂᒃᑯᑦ ᑭᓪᓕᓯᓂᐊᖅᑎᒻᒪᕆᖕᓂᑦ ᐱᒻᒪᕆᐅᓂᖓ ᑲᑐᔾᔨᖃᑎᒌᓪᓗᓂ−ᐱᓕᕆᓂᖅ ᖃᐅᔨᒪᓂᖅ ᐊᑐᕐᓗᒍ.”

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏ ᓇᐅᑦᓯᑐᖅᑎᐅᓂᕐᒥᑦ ᐱᔪᓐᓇᕐᓂᖃᖅᑎᑕᐅᒻᒥᔪᑕᐅᖅ ᑖᕝᕙᓂ ᑲᑐᔾᔨᖃᑎᒌᑦᑐᑦ ᓄᓇᓕᕐᔪᐊᑦ ᐊᑐᐊᒐᒃᓴᖓᓂᒃ ᑲᑎᒪᓂᕐᒥ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ (UNFCCC−ᑯᑦ), ᐊᒻᒪᓗ ᑎᒍᒥᐊᖅᑐᑦ ᖃᐅᔨᒋᐊᕐᕕᑦᓴᐅᓗᑎᒃ ᐱᔪᓐᓇᐅᑎᖃᖅᑎᑕᐅᓂᖅ ll ᑲᑐᔾᔨᖃᑎᒌᑦᑐᓂ ᓄᓇᓕᕐᔪᐊᓂ, ᐱᔪᓐᓇᐅᑎᑖᒥᓂᖓ 1983−ᖑᑎᓪᓗᒍ.