ᔮᓐᓄᐊᕆ 24, 2022 – ᐋᓐᑯᕆᑦᔅ, ᐊᓛᔅᑲᒥ- ᐃᓄᐃᑦ ᓂᐱᖏᑦ ᑐᓴᖅᑕᒥᓃᑦ ᐱᒻᒪᕆᐅᔪᒥ ᑲᑎᒪᓂᕐᒥ ᐃᖅᑲᕐᒥ ᐃᕗᒥᔭᖅᑎᑕᐅᓂᐅᕙᑐᖅ ᐅᒥᐊᕐᔪᐊᓄᑦ ᐱᓪᓗᒍ ᑲᑎᒪᔾᔪᑕᐅᑎᓪᓗᒍ ᐃᓄᐃᑦ ᓄᓇᕐᔪᐊᒥ ᑕᕆᐅᕐᒥᐅᑕᓕᕆᓂᕐᒧᑦ ᑎᒥᖁᑎᖏᓐᓄᑦ (IMO−ᑯᑦ) ᑕᕝᕙᓂ ᐱᓇᓱᐊᕈᓯᕐᒥ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC−ᑯᑦ) ᐊᑐᖅᓱᑎᒃ ᓄᑖᒥᒃ ᐃᓚᒋᔭᐅᔪᓐᓇᖅᑎᑕᐅᔪᒥᒃ ᑐᑭᓯᒋᐊᕈᑕᐅᑎᓪᓗᒍ ᖃᓄᐃᓕᖓᓕᕐᓂᐅᔪᖅ IMO−ᑯᑦ ᑲᑎᒪᔩᑦ−ᑲᑎᒪᔨᕋᓛᖏᓐᓄᑦ ᐅᖃᖃᑎᒌᒍᑕᐅᓪᓗᓂ ᐃᖅᑲᕐᒥ ᐃᕗᒥᔭᖅᑎᑕᐅᓂᐅᕙᑐᖅ ᐅᒥᐊᕐᔪᐊᓄᑦ ᐱᓪᓗᒍ ᑲᑐᔾᔨᖃᑎᒌᑦ ᑖᒃᑯᐊ ᐃᕗᒥᔭᓗᐊᕈᓐᓃᑎᑦᓯᖁᔨᑎᓪᓗᒋᑦ ᐅᒥᐊᕐᔪᐊᓄᑦ ᐱᓗᖅᑯᓯᐅᑦᑐᓂᑦ ᖓᑐᕐᓂᐊᖅᑕᖓᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖃᕐᓂᖓᑦ ᐱᖃᑕᐅᓗᑎᓪᓗ ᐃᓄᐃᑦ ᓄᓇᓕᖁᑎᒋᔭᕗᓪᓗ.
ᑐᑭᑖᕈᑕᐅᔪᔪᖅ ᑕᒪᓐᓇ ᓖᓴ ᖁᐱᕐᕈᐊᓗᒃ ᓂᓪᓕᐊᓚᐅᖅᑎᓪᓗᒍ ᓴᐳᒻᒥᑦᓯᓂᐅᑉ ᒥᒃᓵᓄᑦ, ICC−ᑯᑦ ᑲᓇᑕᒥ ᐊᖓᔪᖅᑳᖓᑕ ᑐᒡᓕᐊ ᓄᓇᕐᔪᐊᒥ, ᑐᒃᓯᕋᖅᑎᓪᓗᒍ “ ᑐᑭᖏᑦ ᑐᑭᒧᐊᒍᑎᑦ ᐃᖅᑲᓇᐃᔮᕆᓂᐊᕐᓗᒍ ᐸᕐᓇᐅᑎᒧᑦ ᐃᖅᑲᕐᒥ ᐃᕗᒥᔭᖅᑎᑕᐅᓂᐅᕙᑐᖅ ᐅᒥᐊᕐᔪᐊᓄᑦ ᐱᓪᓗᒍ ᓂᑦᑕᔪᒥᑦ ᐱᖃᓯᐅᔾᔨᔪᖅ ᐱᖃᑕᐅᑎᑦᓯᓂᕐᒥᑦ ᐊᑐᖅᑕᐅᑎᑦᓯᓂᕐᒥᓪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓᓂᒃ.”
ᑲᑎᒪᔩᑦ−ᑲᑎᒪᔨᕋᓛᖏᑦ ᑲᑎᑦᑐᒥᓃᑦ ᐱᒋᐊᕈᒪᓪᓗᒍ ᐱᕙᓪᓕᐊᑎᑕᐅᓂᖓ ᐃᖅᑲᓇᐃᔮᕆᓂᐊᕐᓗᒍ ᐸᕐᓇᐅᑎᒧᑦ ᐃᖅᑲᕐᒥ ᐃᕗᒥᔭᖅᑎᑕᐅᓂᐅᕙᑐᖅ ᐅᒥᐊᕐᔪᐊᓄᑦ ᐃᕗᒥᔭᓗᐊᕈᓐᓃᖅᑐᖃᖁᓪᓗᒍ ᐃᖅᑲᕐᒥ ᐅᒥᐊᕐᔪᐊᓄᑦ ᐃᖏᕐᕋᕕᐅᕙᑦᑐᓂ. ᑕᒪᓐᓇ ᐃᓱᒫᓘᑕᐅᓪᓚᕆᖕᒪᑦ ᐃᓄᖕᓄᑦ ᐅᓗᕆᐊᓇᖅᑐᒦᑎᑦᓯᒍᓐᓇᕐᓂᖓ ᐃᕗᒥᔭᖅᑎᑦᓯᓂᒃᑯᑦ ᐃᖅᑲᕐᒥ ᑕᒪᒃᑯᓄᖓ ᐳᐃᔨᓄᑦ ᐃᓄᐃᑦ ᓂᕿᒋᕙᑦᑕᖏᓐᓂᑦ. ᐅᓪᓗᒥᒧᑦ, ᒫᓐᓇᐅᔪᒥ ᑖᒃᑯᐊ IMO−ᑯᑦ ᐅᒥᐊᕐᔪᐊᑉ ᐃᕗᒥᔭᕐᓂᖓᓄᑦ ᓱᕈᐃᑦᑕᐃᓕᓂᕐᒥᑦ ᐊᑐᐊᒐᐃᑦ ᐃᓱᒪᖅᓲᑎᒋᔭᐅᔪᑦ, ᑖᓐᓇᓗ ᓯᕗᓕᕈᑕᐅᓕᖅᓯᒪᔪᖅ ᐊᑐᓕᖅᑎᑕᐅᓂᖓ ᐱᓕᕆᕕᐅᔪᓂ.
ᑕᐃᒪᖓᓂᑦ ᐃᓚᓕᐅᑎᑎᑕᐅᔪᖅ ᐊᑐᕈᓐᓇᓕᖅᑎᑕᐅᓯᒪᓂᖓᑕ, ᑖᓐᓇ ᓯᕗᓪᓕᖅᐸᐅᕗᖅ ᐱᕕᖃᕐᕕᐅᓗᓂ ᐃᒻᒥᑰᕐᓗᓂ, ᐊᑑᑎᖃᕐᓗᓂᓗ ᓇᐅᑦᓯᑐᕐᓂᕐᒨᖓᔪᒧᑦ. ᓖᓴ ᖁᐱᕐᕈᐊᓗᒃ ᑎᒃᑯᐊᖅᑐᖅᓱᓂ ᑲᑎᒪᔨᕋᒫᓄᑦ ᐃᓘᓐᓇᑦᓯᐊᖏᓐᓄᓪᓗ IMO−ᑯᓐᓄᑦ ᐃᓚᒋᔭᐅᔪᓂᑦ ᐃᒪᐃᑯᓪᓗᒋᑦ ᑲᑐᔾᔨᖃᑎᒌᑦᑐᑦ ᓄᓇᓕᕐᔪᐊᑦ ᓇᓗᓇᐃᖅᓯᒪᔭᖓᑦ ᐱᔪᓐᓇᐅᑎᖏᑕ ᓄᓇᖃᖅᑳᖅᓯᒪᔪᑦ (UNDRIP) ᓇᓗᓇᐃᖅᓯᒻᒪᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖃᕐᓂᖏᓐᓂᑦ ᒥᐊᓂᖅᓯᓗᑎᒃ, ᐊᐅᓚᑦᓯᓗᑎᒃ, ᓴᐳᔾᔨᓗᑎᒃ ᐱᕙᓪᓕᐊᑎᑦᓯᓗᑎᓪᓗ ᐱᖅᑯᓯᕐᒥᓐᓂᑦ ᖃᐅᔨᒪᔭᑐᖃᒥᓐᓂᓪᓗ.
“ᑲᑐᔾᔨᖃᑎᒌᑦᑐᑦ ᓄᓇᓕᕐᔪᐊᑦ ᑎᒥᐅᓪᓗᑎᒃ, ᑖᒃᑯᐊ IMO−ᑯᑦ ᐃᓱᒪᒃᓴᖅᓯᐅᕈᑎᖃᕆᐊᖃᖅᐳᑦ ᐊᑕᖏᖅᑐᒥᓪᓗ ᐊᑐᓕᖅᑎᓪᓗᒍ ᑖᓐᓇ UNDRIP, ᐱᖃᓯᐅᑎᓗᒍ ᑲᑐᔾᔨᖃᑎᒌᑦᓱᑕ ᐃᖅᑲᓇᐃᔮᕗᑦ ᐅᓪᓗᒥ,” ᓖᓴ ᐅᖃᖅᑐᒥᓂᖅ. ᓯᕗᓪᓕᖅᐸᐅᓪᓗᑕ ᓄᓇᖃᖅᑳᖅᓯᒪᔫᓪᓗᑕ ᑎᒥᐅᕗᒍᑦ ᐊᖏᖅᑕᐅᓪᓗᑕ ᑕᒪᒃᓱᒥᖓ ᐱᔪᓐᓇᕐᓂᖃᖅᑎᑕᐅᓂᕐᒥᒃ ᓂᕆᐅᒍᑎᒋᕙᕗᓪᓗ ᐱᒋᐊᕈᑕᐅᓂᐊᖁᓪᓗᒍ ᓄᑖᒥᑦ ᐱᓕᕆᖃᑎᒌᖕᓂᕐᒥᒃ IMO−ᑯᓐᓄᑦ ᐃᓚᐅᔾᔪᑎᓕᓐᓄᓪᓗ ᑖᒃᑯᓄᖓ ᓄᓇᖃᖅᑳᖅᓯᒪᔪᓄᑦ ᓄᓇᕐᔪᐊᓕᒫᒥ, ᐱᓗᐊᖅᑐᒥᓗ ᐅᑭᐊᖅᑕᖅᑐᖅ” ᖁᐱᕐᕈᐊᓗᒃ ᐅᖃᐅᔾᔨᓪᓗᓂ ᑲᑎᒪᔩᑦ− ᑲᑎᒪᔨᕋᓛᖏᓐᓂᒃ. “ᐃᓄᐃᑦ ᑕᑎᒋᔭᖃᖃᑦᑕᕐᒪᑕ ᐅᓯᑲᑦᑕᐸᑦᑐᓂᑦ ᓂᕿᓂᑦ ᐱᔨᑦᓯᕈᑕᐅᔪᓂᓪᓗ, ᐃᓄᐃᓪᓗ ᓄᓇᓕᖏᑦ ᑕᑎᒋᔭᖃᖃᓯᐅᑎᕙᒻᒥᔪᑦ ᑕᕆᐅᒥᑦ ᐃᓅᓯᓂᕐᒥᓐᓂ ᐊᓐᓇᐅᒪᐅᑕᐅᑎᓪᓗᒋᑦ ᓂᕿᒋᓪᓗᒋᓪᓗ. ᑮᓇᐅᔭᓕᐅᕋᓱᐊᕈᑎᕗᑦ ᐱᖅᑯᓯᕗᓪᓗ ᑕᑎᒋᔭᓕᒃ ᐅᓗᕆᐊᓇᖏᑦᑐᒥᑦ, ᐊᑦᑐᓂᕐᓗᑦᑕᐅᓯᒪᓗᐊᖏᑦᑐᒥᑦ, ᐊᒻᒪᓗ ᓴᓗᒪᓗᓂ ᐅᓯᑲᑦᑕᕐᓂᖅ.”
ICC−ᑯᑦ ᑭᒡᒐᖅᑐᐃᓂᖓᑦ ᓇᓗᓇᐃᖅᓯᓯᐊᖅᑯᖅ ᐊᑐᖅᑕᐅᒍᓐᓇᕋᔭᖅᑐᒥᒃ ᑖᒃᑯᐊ ᑐᑭᖏᑦ ᑐᑭᒧᐊᒍᑎᑦ ᐊᑐᐊᖅᑕᐅᓗᑎᒃ ᐱᕙᓪᓕᐊᒍᑕᐅᓂᕐᓗᓂ ᐃᖅᑲᓇᐃᔮᖃᕐᓂᕐᒧᑦ ᑕᒪᒃᓱᒥᖓ ᐸᕐᓇᐅᑎᒧᑦ ”ᓂᑦᑕᕐᓂᖅ ᐱᖃᓯᐅᔾᔨᒻᒪᑦ ᐱᖃᑕᐅᑎᑦᓯᓂᕐᒥᒃ ᐊᒻᒪᓗ ᐊᑐᖅᑕᐅᑎᑦᓯᓂᐅᓗᓂ ᐃᓄᐃᑦ ᖃᐅᔨᒪᓂᖏᓐᓂᑦ, ᑕᒪᓐᓇᓗ ᑭᖒᒪᒋᔭᐅᖕᒪᑦ ᐃᓗᐊᓂ ᐃᖅᑲᓇᐃᔮᖑᓂᖓᑕ ᐃᖅᑲᓇᐃᕐᓂᐊᓗᒍ ᓇᓗᓇᕐᓂᖏᑦ ᑕᒪᒃᓱᒪ ᐃᖅᑲᓇᐃᔮᖑᓂᖓᑕ ᑖᒃᑯᓄᖓ ᑲᑎᒪᔩᑦ− ᑲᑎᒪᔨᕋᓛᖏᓐᓄᑦ.”
ᐊᑐᖅᑕᐅᖁᒐᔭᖅᓯᒪᔭᖓᓗ ᐊᑐᓕᖅᑎᑕᒥᓂᐅᓪᓗᓂ. ICC−ᑯᑦ ᑭᒡᒐᖅᑐᐃᓂᖓ ᐱᖃᑕᐅᓂᖓᓗ ᓇᓗᓇᐃᖅᐳᖅ ᒫᓐᓇᐅᔪᒥ ᓄᓇᕐᔪᒥ ᐅᓯᑲᑕᓐᓂᐅᕙᑦᑐᖅ ᓴᒻᒥᔭᑦᓴᐅᓕᕐᒪᑦ ᐃᓄᐃᑦ ᓂᐱᖏᑎᒍᑦ ᓄᓇᖃᖅᑳᖅᓯᒪᔪᓪᓗ ᑕᐅᑐᑦᑕᖏᑎᒍᑦ. ᓄᓇᕐᔪᐊᒥ ᐊᑐᐊᒐᐃᑦ ᐃᖅᑲᕐᒥ ᐃᕗᒥᔭᖅᑎᑕᐅᓂᐅᕙᑦᑑᑉ ᑲᑦᓱᕐᔫᒥᒐᔭᕐᓂᖓ ᒫᓐᓇ ᐃᓄᖕᓄᑦ ᑐᕌᖓᓕᖅᑯᖅ ᐃᓱᒫᓘᑎᖏᑦ ᓄᓇᓕᒻᒥᐅᖑᔪᓪᓗ ᐅᖃᐅᓯᕆᓯᒪᔭᖏᑎᒍ ᐱᖃᑕᐅᔭᕆᐊᖃᓕᕐᒪᑕ . ᑖᒃᑯᐊ ICC−ᑯᑦ ᑲᑎᒪᕕᐅᕕᖃᕐᕕᖓᑦ IMO−ᑯᓐᓂ ᐱᕕᖃᖅᑎᑦᓯᓯᒪᒻᒪᑦ ᑲᓇᑕᒥ ᐅᖃᐅᓯᐅᔪᑦ ᐊᒻᒪᓗ ᐱᕕᑦᓴᖃᕐᓂᖅ ᑲᓇᑕᒥ ᐃᓄᐃᑦ ᐃᓱᒪᒋᔭᖏᑕ ᐱᔪᒪᔭᖏᑕᓗ ᑭᒡᒐᑐᖅᑕᐅᒍᑎᖏᓐᓂᑦ.
-30-
ᖃᐅᔨᒋᐊᕐᕕᒋᒍᒃ:
ᑭᐊᓕ ᐃᓂᖑᕗᒃ ICC (ᐊᓛᔅᑲ) +1 907-274-9058 kelly@iccalaska.org
ᑐᑯᒻᒥᙳᐊᖅ ᓂᐊᒃᔨᐅ ᐅᓪᓴᓐ ICC (ᑲᓛᖡᑦ ᓄᓈ) +299 323632 tukumminnguaq@inuit.org
ᑭᐅᕈ ᓴᐃᒪᓐ ICC (ᑲᓇᑕ) +1 613 293-9728 csimon@inuitcircumpolar.com