Inuit Katujjivigillugu Tunijangat Katujjiqatigiittunut Nunaliujunut Pijariaqallarittut Pillugit: Sitamat Atuliqujaliangusimajut Sivulliutitaujarialiit Aaqqigiaqtaukullugu Imitsiavangmik Imaqaqtitautsiariaqarniq Ammalu Salummaqsaivimmik Illurjuaqariaqarniq

Auggusi 27, 2021 – Ankurij, Alaaska – Inuit Ukiuqtaqtumiuqatigiit Katimajingit Kanatami (ICC−kut), ammalu Inuit Tapiriit Kanatamikkut (ITK−Kut) Kanatami, katujjiviqaqsutik tunisisimavut taakkununga Katujjiqatigiittunut Nunaliujunut Pijariaqallarittut Pillugit (UNSR) inuit timiqaqtut pijunnautinga atuqsugu imitsiavangmik imiratsaqtaqatsiariaqarniq pillugu ammalu salumajumiigiaqarniq Tunijaujut piqasiutisimallutik sitamanik sivulliutitaujunik atuliqujaliangusimajunik pigiaqtautsautigiqullugik aaqqigiaqtauningit atuqtauvattut amisut siquttiratsatuinnait inigijautitaujut ammalu salumagatik.

“Ilitaqsinikkut taakkua ICC−kut tilijaujjutiqaqsimammata nipigijaulutik Inuit pijunnautingit pijjutigillugit kakiattumik imiqariaqarnirmik uvangangaaqsimajumi 2018 Utqiagvik Angiqatigiigut tiliuqpavut gavamaujut Kanatami, Kalaałłiit Nunaani, ammalu Mialigait Nunangani pigiatsautigiqullugit taakkuanangat sitamanit atuliqujaliangusimajunik tavvaniittunik unikkaaliangusimajumi uqaqtuminiq ICC−kut Iksivautangat Talii Sampu Tuaruu. “Sulikkanniq, taanna 2011 ICC−kut Angiqatigiiguutingat Nunamiingaaqtunik Pivalliatitsinirmut Inuit Nunaani uqaqsimajuqtalik, ‘ullumisiutitigut, qanuingisiaqullugit nunaliit ukiuqtaqtumi saqqititsinikkuuriaqaqpuq, aulatsinikkut ammalu aaqqigiarlugit pijariaqallarittut illurjuaq pillugu kinguumajaujut…’ asianik tuavirnaluaqtuqaqtuujaangimmat imitsiavangmik imiratsaqtaqatsiariaqarniup, ammalu salumatitsinirmut illurjuaqariaqarniq pillugu nunaliqutittinni.”

Katujjiqatigiivviulluni tunisijausimajuq titiraqtausimaninga mitsauttuq ajuqsarninginnik taakkua 211 nunaliit iniqaqtut Sukutkami (Rasaup Kanannaqpasianiinniqpat), Ukiuqtaqtuq Alaaska, Ukiuqtaqtuq Kanata (Inuvialummi Nunaliit, Nunavut, Nunavik ammalu Nunatsiavut), ammalu Kalaałłiit Nunaat (Akukittuq). Titiraqsimajut nalunaiqsisimajut amisut pinaulutauningita sitamani nunalirjuani aaqqitsiaqsimangittunik imitsiavangmik imiqatsianginniup ammalu salumaqsaiviuluni illurjuaq, nalunaijaqtausimatsiaqsutik tavvungangajut isumaaluutaujut atunik nunalirjuamut.

Taakkua sitamat atuliqujaliangusimajut piqasiujjisimajut tavvani Inuit Katujjiqatigiivvigillugu tunisimajanganik taakkununga UNSR−kunnut ukuangujut:

1. Nunalirjuat avittuqtausimanikkut angijuutaujunik nutaanik Inungnut−turaangajunik atunginnaniaqtunit saqqititsigiaqarniq inuit nunanginni imilirinirmut ammalu salummaqsarviuluni illurjuamik uttuutajunillu aulatsigutitsanit pivalliatitsijuqarluni nunalimmut niuvirnirmut kiinaujaqaqtitsigutaujutigut.
2. Taakkua Ukiuqtaqtumut Katimajiit ikajuqsikanniriaqaqput aaqqigiarutitsanit aaqqigiaqtauqullugu imirmik imiqarniq ammalu salumajariaqarninga.
3. Taakkua Gavamakkungit Kanataup sivulliutitsijarialiit aaqqigiarigutaugumajunik imilirinirmut ammalu salummaqsaiviksauluni illurjuaksamik Inuit Nunangani.
4. Nunalirjuat ammalu paippajjirinikkut ilinniarviit sivulliutitsijariaqaqput atunginnaqtaugunnaqtunit inungnut−sivuliqtaulutik qaujisaqtuliriniq pijjutigillugu imiq imiratsaq ammalu salummaqsaitiksat Inuit nunalinginni.

Taanna katujjiviutsuni tunijausimajuq uqaqsimajuqtalik imaimmat “Imiqtavitsaqtaqatsianginniq imirmik ammalu/uvvaluunniit sanasimatsiangittunik salumaqsaigunnaqtunik aulatsijjutitsaqatsianginniq Inungnut siammaqattasuunik aanniagutaugajuqasiutivuq ammalu qanimmasaraigutauqasiutivu, piqasiutitsugit aniqtirinirmuungajut, amirlunni, ammalu naarluqattarniit… Kanatami ammalu Kanatamiuni imiq imitsiavaugiaqarningata maligangit, piqasiutillugi imirnut aqqutauvattut qaujisaqtauqattariaqarningit imiratsatsiavaujariaqarninganik, nautsituqtauvattut qakutikkut atuqtitaullutillu piliriqatigiingnikkut taakkununga ajjigiingittunut tilijaujjutauvattunut gavamaujunut. Atuinnautitaujut tuqquqtausimajut tusagiakkannirutitsaillu qanuilinganingata imiup imiqtauvattut ammalu salumaqsaiviuluni illujjuat Inuit nunalinginniittut piqasiutiqasiutimmijuqtauq pijunnarningat inuit aturningata pijunnautittinnik imiq pillugu ammalu salumaqsaivit ajjigiippangittut nunait killiliuqtausimaningitigut nunaliit malitsugit.”

Taanna atangiqtuq Katujjigutaulluni Tunijaujuq atuinnaujuq qaritaujakkut uvani: https://bit.ly/3sR7pVx

-30-