Inuit Ukiuqtaqtumi Katimajingit (ICC) Ikajuqtuiniraqtut Pikialasursuamit Inuit Imarmi Aulattinirmut Inunnullu Ingirravigijaugunaqullugu Pijunnautitigut Malillutit

Attuuppiri 19, 2023 – Raikjavik, Aislan (Reykjavik, Iceland) – Inuit Ukiuqtaqtumi Katimajinginnut (ICC) pattatuqtuq atiliuqsiningannut Titiqqamit Pijjutauniaqtumit (LOI) taakkuninga Kanataup Gavamakkunginnut ammalu Kalaałłiit Nunaani atuliqujillutit 2017−mi Inuit Ukiuqtaqtumi Katimajinginnut (ICC) aulataulutit pikialasursua Katimajinginnut unikkarmit, Inuit Nilamiutait Aqqutiqarningit: Sivunissavut Pikialasursuaq. Pikialasursuaq imaimiittut akunninganni Avanirsuaq ammalu uannaqpasinganni tappaani Kalaałłiit Nunaani ammalu uannangani Nunavummi Kanatami.

Titiqqaq Pijjutaujuq ikajuqtuinirmut piliriqatiqaqtut taakkua Inuit Ukiuqtaqtumi Katimajinginnut, Qikiqtani Inuit Katujjiqatigiingit, Kanataup Gavamakkungit, Kalaałłiit Nunaani ammalu Tanmaak (Denmark), aqqutaujunnarlutit niqissasiuqattarlutit aulattilutillu imarmit ammalu avativut paqqijauluni taikani pikialasursuami, ammalu ingirraviujunnattiarluni Inunnut tamaaniittunut.

Pikialasursuaq Kalaałłiisut (Pingangnaqpasinga Kalaałłiit Nunaanni) atilik tukiqaqtuni “kuuttualuk”, ammalu Sarvarjuaq Inuttitut “quarunnangittuq” Qikiqtamilu Uannangani Sikusuittuq. Tamanna katujjaummat imaq Kanatami (Nunavut) Kalaałłiit Nunaanilu. Sikusuittuq tamanna qangalimaaq ukiukkut sikulauqsimanngittuq imavik ingirraniqainnaqtunilu. Piujurjuaraaluk imaq uumajulialuk. Pikialasursuaq anginiqpaanguqataujuq sikusuittuq Ukiuqtaqtumi ammalu uumajuqarniqpaangulluni uannangani Ukiuqtaqtunganni Silarjuap.

Pikialasursuaq asijjipalliammat. Nunaliit tamakkinnik amavimmi ujjirusummata asijjipallialinginni tamanna inuunasuvviunasuttunillu, kisiani atuqtauniqsauqattalirngat silallu asijjipallianinganni.

Inuit Ukiuqtaqtumi Katimajinginnut (ICC) issivautanga Siura Uulsvik ujjirusummijuq, “Inuit qaujimajatuqanginni kajusiinnarniaqtuq tusaumatittiqattarlututit Pikialasursuaq/Sarvarjuamit. Nunaqaqqaaqtuminiillu qaujimaninginni asinginnillu, inuit aulattiqatiqaqtut tamatuminga, nalunaiqsimallutillu killingit. Pikialasursuaq piqqusituqaalunnik atuqtausimajuq inunnut, silarjualimaami piuniqpaanguqatallarik suurlu akilirassaungittuq akimit. Aulattittiarumagatta atuqtauqattarluni tamanna Pikialasursuaq kinguvaattinut avungaalullu. Sivumuappallinganginnarluta ingirraviuqattarluni inunnut quviagijauttiarlunilu Inuit Nunanganni ammalu ilagiinnut attuatiinnarlugut piqqusittinullu”. Tamanna ajjiungimmat makimajjutaujunnaqtuq uvattinnut sanngatikkanirlugillu Inuit tigumiarunnarningit imarmi piuqsuarlutit nutaanillu pinasuarlutit katujjiqatiqarlutit inunnut imattinni aulattinikkut sivunittinullu pivissaqtaqainnarluni.”

Ulaaju Akisu, Angijuqqaaq Qikiqtani Inuit Katujjiqatigiinginnut atuinnautittilaurngat, ”Atiliuqtaulluni Titiqqaq pijjutauniaqtuq atuliqtitaullunillu sivulliqpaujjaugumajut piuqsuaqtauluni Pikialasursuaq pimmariuluummat piliriqatigiittiarlutit aaqqiiqatiqarunnarngata Inuit Ukiuqtaqtumi. Katujjittiarluta piqqusituinnaunngittunit kisianili aulattinirmit imavimmi piunginnaqullugu assurunnaqtullu kamaginasuaqattarlutit makua sila asijjipallianingalu. Atuliqtittigiaqaratta atuliqujausimajumit 2017−lisarmit Katimajiit Unikkaanginni Inunnut Ukiuqtaqtumi Sikusuittumit. Qikiqtaalummiutaillu Inuit piuqsuarumaninginni uumajunik tamaani aluani qanigijanginnimilu Pikialasursuami piunginnaqullugit ilulingit ammalu qanuiqunagi Qikiqtaaluup nunalinginni.

Pikialasursuaq/Sarvajuaq pimmariugijaummat piqqusingitigut inunnut, pisimajaunginnaqtunilu, aulataullunilu, atuqtauvattutillu imanga akunirjuaraaluuliqtuq tausanginniiluaqtunik. “Pikialasurjuaq itijualummit tukiqarijaummat Inunnut Nunavummi ammalu Kalaałłiit Nunaanimiutarnut,” uqalauqtuq Inuit Ukiuqtaqtumi Katimajinginnut Issivautangatta Tungilingannut Qupirrualummut. “Tatigiqattaqsimagattigu tausanginniittunut ukiunut niqissaqarvigillutigu, piqqusituqarillutigullu, qaujimajatuqavullu, ingirravigiqattaqtugullu, kativviuqattaqtunillu ilagiinnut. Tamanna pigiarutik ikajuqtuijuq inunnit nunalinginni paqqijauluni avativut piuqsuaqtaullutillu uumajut ajjigiinngittut tamaani.”

“Taanna titiqqaq pinasuuti pimmariummat Inunnut aulattinirmuungammat Inuit Nunanginni ikajuqturlugillu atuliqtittinasuaqtillugit Silarjuami Katujjiqatigiinnik Nalunaiqtausimajumit Tamakkuninga Pijunnautinginni Nunaqaqqaaqtuminiit.” atuinnautitaujuq Inuit Silarjuami Katimajingatta Issivautangannut Uulsvik.

-30-

CONTACT: