Inuit Ukiuqtaqtumiuqatigiit Katimajingit Kanatami Katimatitsisuunguvut Ilinniaqatigiitsinnaat Pivalliatitsiniulluni Ukiuqtaqtumi Uuttuutaujunit Atuagarnit Ajjigiititsinirmuungajumik Ammalu Akaujukkut Ilautitsiqattanirmik Inungnit Nunalimmiungujunik Ammalu Nunaqaqqaaqsimajut Qaujimaninginnik

Auggusi 30, 2021 – Ankurij, Alaaska – Inuit tilijausimajut kiggatuqtut ukiuqtaqtumi nunaliujunit – Alaaska, Kanata, Kalaałłiit Nunaat, ammalu Sukutka (Rasa) – ullumi katimajut, sivulliqpaami katiqatigiinniuqattaniaqtuni ilinniasinnaat katimaniuqattaniaqtuni, pigiarutigitsugu pivalliatitsinirmik Inuit Ukiuqtaqtumiuqatigiit uuttuutaujunit atuagarnit ajjigiititsinirmuungajumik ammalu Akaujukkut Ilautitsiqattanirmik Inungnit (EEE) Inungnit nunalimmiungujunik ammalu nunaqaqqaaqsimajut qaujimaninginnik. Taakkua uuttuutaujut atuagait aturiaqallarinniarmata pivaallitikkanirniarlugu Inuit aulatsigunnarningit, imaangairningitigut tukimuannirmut, ammalu sivulliutitaujarialittigut kanatami pilirivitigulluttauq ammalu nunarjuami katimaqatauqattanikkut, suurlu Ukiuqtaqtumut Katimajinut ammalu Katujjiqatigiitigut Nunaliujunut.

“Ajuinnaangummat kinguumajauninga angijumik−amisuuniq malillugu pilirivitsanik qanuigiaqarviqarunnaqtunik iliqturunnaqtunillu tukisijauqullugu qanuigiarutaulutillu ajjigiingittut isumaaluutaujut amisuuningit malillugit inuqarnikkut. Ilitturiaqarniq pillugu imautiqattanikkut atuqtaulutillu nunaqaqqaaqsimajut qaujimaningit qaujisaqtulirinirmi, qaujisarnirmi nautsiturnimullu piliriani, pijunnautiqarnirlu.” uqaqtuminiq ICC−kut Iksivautangat Saampu Tuaruu.

Taanna 2018 inuit Ukiuqtaqtumiuqatigiit Katimajingita Kanatami  ICC−kut Utqiavik angiqatigiigut – aqqusiurutausimajuq timiqutigijaujumut nunarjuami piliriqatigiinnirmut iqqanaijaarilugu – tilisijuq ICC−kut tukimuattitsiqullugit pivalliajauluni taavvuuna EEE−mut uuttuutaujut atuagait Pivallianiarlugit uuttuutauniaqtut atuagait, ICC−kut tukimuattitsijiuniaqtut uqaqatigiigutaujunit taakkununga Inungnut tilijausimajunut kiggaqtuinikkut Inuit nunaani qaritaujakkut katimaniqtigut ilinniaqatigiisinnaat, pigiarlugu ullumi tunngasuttiqattautinikkut katimanirmi. Iluunnatit tilijausimajut kiggaqtuijut sanngijumik tunngaviliit inuit qaujimaningitigut ujjirusunningitigullu aksururnaqtunik apurutauvattunik ammalu aaqqigiarigutaugunnaqtunik nunalimmi qaujimajaujunut, nunait avittuqtausimaningitigut ammalu nunarjualimaami. Tamanna iqqanaijaanguninga tusaumatitaugutaujuq  katiqsuqtausimajutigut unikkaaliarisimajutigut pigiaqtitausimajut ICC−kunnut. Unikkaaliarisimajut katititsivattuq tusaumajjutiksanit ammalu titiraqsimajunit Inuit−saqqiqtisimajanginnik atuagarnit, maligarnit, pillariqutigijaujunit, atuarialinnik, uuttuutaujut atuagait, ammalu qaujimajaujut tukimuagutitsait qanuq asingit inuit ilautiriaqarmangaata nunaliqutittinni ammalu qaujimanittigut.

Iqqanaijaariluaqtangata ilulingit pivalliatitsiniq amma titiraqtaugiangarningata taaksuma EEE uuttuutauniaqtut atuagait pigiaqtaugajaqtut akuniuniqsaq marruuk ilinniaqatigiitsinnaat katimaniugajaqtuunni Sittavvami Aaktuuvvamilu. Atunik ilinniaqatigiitsinnaat katimaniugajaqtuuk pingasunut ullunut, iqarrat pingasut ungataanuungittuq ullutamaat. Kingulliqpaanguluni ulluuk−marruuk katimaniuluni parnatausimajuq Nuuvaimvami qimirrunaqtauniarlutik uqausiusimajunik pijariaqallarittunik aturatsaujut aulajjagiarutaulutik nalunaiqtausimajut ilinniasinnaat katimaniuqattaqsimajuni ilaliutijaugajaqtunik titiraqtaugiarngaliqpat taanna EEE uuttuutaujuksat atuagait.

Kingullipaanguluni titiraqtauninga titiraqsimaliqtillugu niriugijaujuq tuniuqqautaugajarninga iluunnanginnut ICC−kunnut ilaugutilinnut timiujunut pigialirataaqtillugu arraagu 2022 taqqilimaamiq qimirrunaqtauviqarluni. Kingullipaanguluni titiraqtausimaliqtillugu tunijaugumaarniaqtuq ICC−kut aulatsijinginnut katimajinut upirngatsaangani 2022 naammagijauqullugu tusaratsaulirlunilu kikkutuinnarnut sivungani 14−giliqtangata ICC−kut Katimaniqalirmippata. Taakkua uuttuutaujut atuagait atuutiqarajaqtut taikkunungalimaaq piqataugumajunut iqqanaijaaqarnirmik Inuit Nunaanit, iqqanaijaqatiqarlutik mitsiqaqtukkut katujjiqatiqarnikkut uvattinnit, ikajuqsisimaniarmat ikajuqtuinikkut ajjigiititsinirmuungajumik ammalu akaujukkut ilautitsiqattanirmik inungnit nunalimmiungujunik ammalu Nunaqaqqaaqsimajut qaujimaninginnik, ammalu ikajuqtuikannirajaqtuq Inuit aulatsigunnarninginnit.