Inuit Ukiuqtaqtumiuqatigiit Katimajingit Unikkaaqput Qanuilingalirningata Tukisigiarvitsauniup Miksanut Unikkaarvigillugit IMO−Kut Katimajingit

Maajji 1, 2021 – Aatuaa, Kanata – Taakkua Inuit Ukiuqtaqtumiuqatigiit Katimajingit (ICC−kut) unikkaaqtuminiit uqausirigumajarminnit tukisigiarvitsauniup qanuilingalirnirmit miksaanut taakkununga Nunarjuami Tariurmiutanut Timiqutigijaujumut (IMO−kut) apiqqutiqarviuniqsutillu Nunarjuami Katimajiniinngaaqtunit qaritaujakkut katimanirqaqtillugit Viivvuari 22−ngutillugu.

Taakkua IMO−kut maanna piqataulirmijut Qaujisaqtiunirmit Ukiuqtaqtumi Katimajinut, aulatsiqasiutillunilu Inuit usikataqattarninginnuungajunut taakkunani timiqutigijaujuni pimmariungmat kamagijautsiariaqaqsunilu Inuit pijunnautiqarnikkut uqarunnarlutik aulatsijiuningita miksaanut Ukiuqtaqtumi tariurmiutanit. “Titiraqsimajuq 9 Utqiavik Angiqatigiigutimi Kajungiqsaijuq ICC−kut piqataukkanniqattaqullugit nunarjuami timiujunut,” uqaqtuminiq ICC−kut Iksivautangat Talii Sampu Tuaruu. “Piqataugajukkaluatillugik amisuni gavamauqatigiittut timiqutinginni, taakkua IMO−kunnut ilaujut piqatauvigigumajangat pijjutigillugu tatiqarnivut tariurmiutat avatimiutanginnillu ammalu tamanna Ukiuqtaqtumi usikatanniuvattuup piliqpalliatuinnarninga. Inuit iksivaarvitsaqarialit timiqutaujuni isumaliurutaujuqaqtillugu tukitaarutauniaqtumit turaangajunit attuinirluttunit uvattinnit Tamanna akunialuk piliriarijavut niriuqpugullu atangirlutik IMO−ngujut nunalirjuani ikajuqtuiniarninginnit tuksirautittinnit ”.

Liisa Qupirrualuk, ICC−kut Kanatami Tuglia Angajuqqaap Nunarjuami upangutiqattaqsimajuq IMO−kut ilaujuqutingita katimaninginnut ungataanut qaangiqtut arraagut pingasut. Liisa kajusijuq ikajurnirmigu ajjiqangittumik Inuit qaujimaninganik tigumiarutiminnik Ukiuqtaqtumi tariurmiutanit avatinganillu pimmariuninganillu tamanna nuna niqittinnut atugallarialluullunilu ingirraviulluni aqqutingit tamaunga “ilagijaullunga IMO−kunnut ilaujunut tukisigiarviugunnanirmit qanuilingalirniujumit ICC−kut ikajuqtuiniaqtut aulatautsiarunnarninginnit surraittuulutillu atuutiqarningit ukiuqtaqtumi imakkut aqqutit atanaqunagit aqqutauvattut umiarjuanut umiarjuamilu pilirijinut piuqsuralugu papatutsiariarlugu ajjiqanngittuq tamanna maannalu attanaqtumiiliqtuq uumaniqaqtunut. Piluaqtumi, ilusinginnut Ukiuqtaqtumi tariurmiutat uumaniqarvinginni niqigijaujuni, anganasuaqtaunginnaqtumi, iqalugasuaqtaunginnaqtuni, ammalu anngutauvauttuni, inuusirijaujuni, piqqusirijaujuni uqausirminnilu papatugutigillugit, inuillu ilusitsiariingnarningat sannginiqarningallu.”

“Aturlugit Inuit isumagijangit qaujimaningillu uqaqatigiingnirni parnautaujuullu pivallianinganik piviqaqtitsiniaqtuq IMO−mut atuqtaulirluni pilirigutauluni atuagalirinirmut iqqanaijaamullu. Tukisiumaniq tamaksumangat katimajunullu savvaqattaqsugit uqaqatigiingnirni kiugutiqarviullutillu tilijaujjutigisimajarminnut, piviqaqtitsiniaqtut IMO−kunnut ilaujunit aturatsatsiavammik ajugaittuulluni ikajuqsiniaqtumik atuaganginnit iqqanaijaanginnillu, Liisa Qupirrualuk ilasigiagutiminik uqakkaniqtuminiq.

ICC−kut katisivattut atausiuqatigiittumik Inuit nipinginnit IMO−kunnut ilaujunut inuit qaujimaniqallaringninginnit ammalu qaujimaniqarninginnit amisunik qanuinniujunit qanuigutaujunit attunirluttaunirmut silaup asijjirninganut, surraittuutiginnariarlugu atuqattaqtangat Ukiuqtatuup imangit, pimmariuningatalu usikattarviuqattarningit inuit nunalingit piliqqittaagialinnit piviksaqaqtitsijuq ammalu kiinaujaliurutiqarunnanirmit pivalliatitsiniulluni. ICC−kut tavvauvut ikajurumallutik qaujimajamigut ammalu inuit qaujimajangitigu amisuni IMO−kunnut ilaujunut tukimuagutitsaulutik atuagatsaugajaqtuni taakkua IMO−kut atuagarigunnarajaqtanginnit attanaqtumiiliqtunut uumaniqaqtunut aulanirijaujunut.

ICC−kut qilanaarijaqaqput ikajuqtuqtauniarnirminnit IMO−katilaujukutinginnut Nunalirjuani, ukuangullutik sitamaujungigaqtut Ukiuqtaqtumut Katimajiit Kanatamiinngaaqsimajut, Mialigait Nunangannik, Suviitan, Nuavuai, Aislan, Vinlan, ammalu Ulasami. Tukitaarutiminiq isumaliurutaulaurluni IMO-kunni niriugijaujuq Julai 2021-mi.