Iippu 21, 2020 – Aankurits, Alaaskami – Tamanna kajusiinnatillugu puvvirinnaaluk silarjuami, Inuit Ukiuqtaqtumiuqatigiit Katimajingit, Ukiuttaqtumiiqatigiit Inuit Aanniaqtailimajulirijikkut Katimajiralaangit isumaaluutiqaqattaqqut suli quvvasippalliatuinnatillugu ungasittumiittunillu inunnut nunalinnut attuqtauninginnut. Kisutuinnarnit ikajuqtaujjutissanit pitaqanngiluarngat illukissaqtunik, niqissakittunik, imarmit kinaalunnillu ammalu asinginni kisutuinnarnit pijarialinngini piluaqtumit, atanginngippata, inuit nunalilimaat taimaittumiittuujaaliqtut Inuit nunanganni. Avittuqsimajunik ukiuqtaqtumi piqasiutillugit nunaliit Alaaskami, Kanatami, Kalaaɬiit Nunaani, Sukaatkamilu (Ulaasaami) ungasittualummata inuqaqtutit 180,000−nit.
“Inuit nunalinginniittut pilirimmata kamainnarasuaqtutit piqqusinginni assurunnaqtumiikkaluaqtillugit, “Uqalauqtuq Inuit Ukiuqtaqtumiuqatigiit Katimajingit Issivautanga Tali Sappu Turu. “Inuuqatigiinginnaraluaratta katimainnaqtuta taimaak qaujjitiqaratta. Ungasittumiigiaqaqtuni inuuqatimmit uattiarulu atulauqsimajattinni suurlu uqaujjaugiarniq qanimannaalunnit makuninga puvallunnamit, aupalakaarnit, nukiiqtigutaugavattunillu. Taimainninganut ilittuqattaqqugut. Akunialuk kamagiqattaqsimagattigu arraagunut quliuluaqtunut, suurlu inugialuaqattarniq illumit, kinaaluqarviqattianginniq imiqtavimmillu, amisullu puvalluqattaqtutit, qarasaujakkuurunnautitaqattiaranilu nalunanngittuq pijariatuniqsaujaaliqpattut qanimannaaluk pijjutigillugu, ammalu aittuiqattautigunnanginnginni tamatuminga. ”
Inuit Ukiuqtaqtumiuqatigiit Katimajingit Ukiuqtaqtumi Inuit Aanniaqtailimajulirinirmut Katimajiralaat, ukuangullutit kiggaqtuijingit tisamanit nunalirjuarnit katimauqtutit pinasuarusirilauqtatinni uqaalautikkut uqausiqtutit puvvirinnaalummit. Katimajiralaat uqaqtutit amisualuit inugiaqattarngata angirranginni illukissaqtutillu piunngilivalliallarinniaqtuq tamana aniqtiriniq amisunut atuqtaugiiqattaqtunut nunalinnit. Tamakkuangugiiqtutillu niqissakittut amisunut atuqtaugiiqtunit, isumaaluutivut pillarialummat pijariatullunilu.
Tamakkualu aanniavinnit pijittiqtauttiannginningit atuinnaqtaqanngiluarninginnut illarialummijuq isumaalunariallakanniqtunilu. Kamagijaunngippata, atturlutiqattautiniqsaugajaqtut inuugunniiqtuqaqattarlunilu. Taikkuali silataaniittut ukiuqtaqtumi qarasaujakkut qaujigiaqattarngata iqqanaijarvimminut asinginnulluunniit, pijunnaniqsaummatalu atuinnauniqsaullutillu akikinniqsaullutillu taakkua Inuit Nunanganniittut taimainnginiqsaummata, piluaqtumit silarjuami qanimannaaluttaqaqtillugu, ulurianaqtumiinniqsaullutit isumaalunaqtumiittutit. Pitaqariaqallarimmattau qarasaujakkuurunnautimit tukisigiarutissanik.