ᓅᕖᑉᐱᕆ 27, 2023 – ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᑐᐸᐃᒦᓛᖅᑐᑦ (Dubai) ᓂᓪᓕᐊᔭᖅᑐᕐᓗᑎᑦ ᐃᓄᐃᑦ ᒥᔅᓵᓄᑦ ᑕᐃᑯᖓ ᓯᓚᕐᔪᐊᒥ ᑲᔾᔨᔩᑦ ᑲᑎᒪᓂᖏᓐᓂ ᓯᓚ ᐊᓯᔾᔨᐸᓪᓕᐊᓂᖓᓐᓂ (UNFCCC) 28-ᖓᓐᓂ ᑲᑎᒪᓂᕐᔪᐊᒥ ᑲᑐᔾᔨᔨᓂᒃ (COP 28). 70,000−ᖑᓗᐊᖅᑐᑦ ᑲᑎᒍᒫᕐᓂᐊᖅᑐᑦ ᑕᐃᑲᓂ ᐋᕋᑉ (Arab) ᓄᓇᓕᕐᔪᐊᖓᓐᓂ ᑕᐃᑲᓂ ᑭᓱᑐᐃᓐᓇᑦ ᐊᓯᔾᔨᐸᓪᓕᐊᓂᐊᖅᑐᒋᔭᐅᔪ ᓯᓚᕐᔪᐊᒥ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐱᒋᐊᕈᑕᐅᓗᑎᑦ. ᐊᒥᓱᓂᑦ ᓴᖅᑭᖅᑐᖃᕐᓂᐊᖅᑐᒋᔭᐅᒻᒪᑦ ᑲᑎᒪᓂᕐᔪᐊᒥ ᑲᑐᔾᔨᔨᓂᒃ (COP 28), ᐱᖃᓯᐅᑎᓪᓗᒋᑦ ᐱᔭᕇᔭᕆᐊᓕᖓᓐᓂ ᓯᕗᓪᓕᖅᐹᑦᑎᐊᕐᒥ ᖃᐅᔨᓴᖅᑕᐅᓗᑎᑦ ᑎᑎᕋᖅᑕᐅᓪᓗᑎᓪᓗ ᐊᒻᒪᓗ ᐊᐅᓚᔾᔭᑦᑕᐅᓕᕐᓗᑎᑦ ᔭᒐᐃᓂᕐᒧᑦ ᓱᕋᑦᑐᓂᓪᓗ ᑭᓱᑐᐃᓐᓇᕐᓂᑦ ᑮᓇᐅᔭᓂᒃ. ᐅᐊᑦᑎᐊᕈᒃᑲᓐᓂᖅ ᐊᖏᖃᑎᒌᓚᐅᖅᓯᒪᔪᑦ ᐊᕐᕌᓂ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐊᐃᕙᓂᖏᓐᓂ ᐄᔾᔭᑉᒥ (Egypt). ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᐱᖃᑕᐅᖁᔨᓪᓗᑎᑦ ᓇᓗᓇᐃᖅᓯᒻᒪᑕ ᓄᓇᖃᖅᑳᖅᑐᒥᓂᕐᓂᑦ ᐅᑭᐅᖅᑕᖅᑐᒦᓐᖔᖅᓯᒪᔪᓂᑦ ᐃᓚᓕᐅᔾᔭᐅᓗᑎᑦ ᑖᒃᑯᓄᖓ ᑮᓇᐅᔭᓄᑦ.
ᖃᐅᔨᓴᖅᑕᐅᓗᑎᑦ ᑎᑎᕋᖅᑕᐅᓪᓗᑎᓪᓗ ᐃᓕᖅᑯᓯᐅᕙᑦᑐᖅ ᖃᐅᔨᒍᑕᐅᓪᓗᓂ ᓄᓇᓕᕐᔪᐊᓂ ᓯᓚᕐᔪᐊᒥ ᑭᓱᑦ ᐱᕙᓪᓕᐊᒻᒪᖔᑕ − ᐅᕝᕙᓘᓐᓃᑦ ᐱᕙᓪᓕᐊᓐᖏᓗᐊᕐᒪᖔᑕ − ᑲᔪᓯᑎᑦᑎᓇᓱᐊᖅᓯᒪᑎᓪᓗᒋᑦ 2015−ᒥ ᐸᕆᒥ (Paris) ᐊᖏᕈᑎᖃᓚᐅᖅᓯᒪᔪᑦ. ᐃᓚᖏᑦ ᑐᕌᒐᖏᑦ ᓯᓚᕐᔪᐊᒥ ᐆᓇᕐᓂᖓ/ᓂᓪᓚᓱᓐᓂᖓ ᑕᕝᕙᓃᑏᓐᓇᕋᓱᐊᕐᓗᒍ ᐊᑖᓂ 1.5C, ᑐᕌᒐᕆᔭᐅᔪᖅ ᓯᓚᕐᔪᐊᒥ ᐅᓗᕆᐊᓇᖅᑐᒦᓕᕐᖓᑦ ᐅᖓᑖᓅᖃᑦᑕᕐᖓᑦ. ᑐᕌᒐᕆᔭᐅᔪᖅ ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᑕᐃᒪᐃᔅᓯᒪᒻᒪᑕ, ᑕᐃᒪᐃᖏᓐᓇᕐᓂᐊᖅᑐᑎᓪᓗ, ᓂᓪᓕᐊᔨᐅᓗᑎᑦ, ᐊᖏᓂᖅᐹᑎᒎᓐᖏᑦᑑᒐᓗᐊᖅ, ᓄᖅᑲᑎᑦᑎᒐᓱᐊᕐᓗᓂ ᑕᐃᑲᓂ ᑲᑎᒪᓂᕐᔪᐊᒥ ᑲᑐᔾᔨᔨᓂᒃ (COP 28).
“ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᐃᓚᐅᑎᑦᑎᓂᐊᖅᑐᖅ ᓴᓐᖏᔪᐊᓗᓐᓂ ᑎᓕᔭᐅᓯᒪᔪᓂᒃ ᑲᑎᒪᓂᕐᔪᐊᒥ ᑲᑐᔾᔨᔨᖏᓐᓄᑦ (COP 28). ᒫᓐᓇᐅᔪᖅ, ᑐᐊᕕᕐᓗᑕ ᐱᒋᐊᕆᐊᖃᓕᕋᑦᑕ ᑲᒪᓗᑕᓗ ᑕᐃᒫᒃ ᐃᓄᐃᑦ ᐃᓚᒋᔭᐅᑦᑎᐊᖁᓪᓗᒋᑦ ᐃᓱᒪᓕᐊᖑᔪᓂᒃ ᐊᑦᑐᖅᑕᐅᕙᒃᑲᑦᑕ” ᐅᖃᖅᑐᓂ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᐃᔅᓯᕙᐅᑕᐅᑉ ᑐᖏᓕᖓ, ᓖᓴ ᕿᓗᖅᑭ ᖁᐱᕐᕈᐊᓗᒃ. “ᐊᑯᓂᐅᓗᐊᖅᑐᐊᓗᒃ, ᐱᓕᕆᔩᑦ ᐃᓱᒪᓕᐅᖃᑦᑕᕐᖓᑕ ᐅᕙᑦᑐᓐᓄᑦ, ᑭᓯᐊᓂᓕ ᓯᓚᕐᔪᐊᕐᒥ ᑕᐃᒫᒃ ᐱᕕᖃᖅᑎᑕᐅᒍᓐᓃᕐᖓᑕ. ᐱᕕᖃᕈᓐᓃᓕᕋᑦᑕ ᐃᓅᓪᓗᑕ ᐅᕙᒍᑦ ᑭᔾᔪᑎᔅᓴᖃᖅᑎᓪᓗᑕ. ᐊᐃᕙᖃᑕᐅᑦᑎᐊᕈᒪᔪᒍᑦ ᐱᓕᕆᖃᑎᖃᑦᑎᐊᕐᓗᑕᓗ ᐅᕙᒍᑦ ᖃᓄᐃᑎᑕᐅᔾᔮᖏᓐᓇᑦᑕ, ᐃᓚᐅᑎᓐᓇᑕ ᓲᕐᓗ ᐱᑕᖃᓐᖏᒻᒪᑦ ᑕᒪᓐᓇ.”
ᑲᑎᒪᓂᕐᔪᐊᒥ ᑲᑐᔾᔨᔨᓂᒃ (COP 28) ᐱᒋᐊᕐᕕᔅᓴᓕᒃ ᓅᕕᑉᐱᕆ 30−ᒥ – ᑏᓰᑉᐱᕆ 12−ᒥ ᑐᐸᐃᒥ (Dubai). ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᑎᓕᓯᓂᐊᖅᑐᑦ ᐃᔅᓯᕙᐅᑕᕐᒥᑦ ᓯᐅᕋ ᐅᓪᔅᕕᒡᒥᑦ, ᐃᔅᓯᕙᐅᑕᐅᑉ ᑐᖏᓕᖓ ᓖᓴ ᕿᓗᖅᑭ ᖁᐱᕐᕈᐊᓗᒻᒥᑦ, ᐊᒻᒪᓗ ᓄᓇᖃᖅᑳᖅᑐᒥᓂᕐᓂᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ ᖃᐅᔨᒪᔪᓂᒃ, ᐃᓅᓱᑦᑐᓕᒃ ᐱᓕᕆᔨᒻᒪᕆᓐᓂᓪᓗ ᐃᓄᓐᓂᑦ ᓄᓇᖓᓐᓃᓐᖔᖅᓂᒃ.
ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᑎᑎᕋᓚᐅᖅᓯᒪᔪᑦ ᖃᓄᐃᓕᖓᓂᖏᓐᓂ ᑎᑎᕋᖅᓯᒪᔪᓂᒃ ᑲᑎᒪᓂᕐᔪᐊᒥ ᑲᑐᔾᔨᖏᓐᓄᑦ (COP 28) ᑕᓪᓕᒪᓂᒃ ᐊᑐᓕᖁᔭᒥᓂᒃ ᓴᖅᑮᓪᓗᑎᑦ ᐃᓄᐃᑦ ᐃᓱᒫᓘᑎᖏᓐᓂ ᐊᒻᒪᓗ ᐱᒋᐊᕈᑕᐅᒋᐊᓕᓐᓂᒃ ᓯᓚᕐᔪᐊᒥ ᓯᕗᓕᖅᑎᓄᑦ, ᖃᐅᔨᓴᖅᑎᒻᒪᕇᓪᓗ, ᐃᒻᒥᒃᑰᖅᑐᓪᓗ ᓴᓇᔩᑦ ᐊᓯᖏᓪᓗ. ᑖᓐᓇ ᖃᓄᐃᓕᖓᓂᑦᑎᓐᓂ ᑎᑎᕋᖅᓯᒪᔪᖅ ᖃᓄᖅ ᓄᓇᖃᖅᑳᖅᑐᒥᓂᑦ ᖃᐅᔨᒪᓂᖏᑦ ᐊᒻᒪᓗ ᓄᓇᖃᖅᑳᖅᑐᒥᓃᑦ ᐃᓕᑦᑐᕆᐊᖃᕐᓂᖏᓐᓂ ᒥᑭᓪᓕᕚᓪᓕᑎᑦᑎᓇᓱᐊᕐᓗᑎᓪᓗ ᐸᕐᓇᐅᑎᓂᒃ ᐊᐅᓚᑦᑎᒍᓐᓇᕐᓗᑎᓪᓗ ᑲᒪᒋᔭᕆᐊᖃᓪᓚᕆᑦᑐᓂᒃ ᐊᔅᓱᕈᓐᓇᖅᑐᓂᒃ ᐊᓯᔾᔨᐸᓪᓕᐊᔪᓂᓪᓗ ᐅᑭᐅᖅᑕᖅᑐᒥ. ᓯᕗᓕᑦᑎᓐᓃᓐᖔᖅᑐᑕ ᐱᔪᓐᓇᐅᑎᕗᑦ ᓇᒻᒥᓂᖅ ᐱᔪᓐᓇᓂᑦᑎᓐᓂ ᐅᑉᐱᕆᔭᐅᒋᐊᖃᕐᖓᑕ ᓯᓚᕐᔪᐊᒥ ᐊᓯᔾᔨᐸᓪᓕᐊᒋᐊᖃᕐᖓᑕ ᑕᒪᓐᓇ ᓯᕗᓂᑦᑎᓐᓄᑦ ᐊᑐᕐᓂᖅᓴᐅᖁᓪᓗᒋᑦ. ᐱᒋᐊᖅᑕᐅᖁᔭᕗᑦ ᓯᓚᕐᔪᐊᒥ ᑐᐊᕕᕐᓇᓕᕐᖓᑦ. ᑕᕝᕙᑦᑕᐅᑎᒋ ᐊᖏᔪᐊᓗᒻᒥᓪᓗ ᑲᒪᓗᑎᑦ ᓯᓚ ᐱᔾᔪᑎᒋᓗᒍ ᐃᓕᓴᕆᔭᐅᒻᒥᓗᑎᓪᓗ ᐱᔪᓐᓇᐅᑎᕗᑦ, ᐊᑐᖅᑕᐅᓕᕐᓗᑎᓪᓗ ᐃᓱᒪᖅᓱᕈᓐᓇᓂᑦᑎᓐᓂ, ᓯᕗᓪᓕᖅᐸᐅᑎᒋᐊᓕᓐᓂᒃ, ᑐᓴᐅᒪᑎᑕᐅᑦᑎᐊᕐᓗᑎᓪᓗ ᐊᖏᕈᓐᓇᕐᓗᑎᑦ, ᐃᓕᓴᕆᔭᐅᓗᑎᓪᓗ ᓯᕗᓕᒥᓂᖅᐳᑦ ᐊᑦᑐᐊᓂᖃᐃᓐᓇᖅᑐᑦ ᓄᓇᒧᑦ, ᐃᒪᕐᒧᑦ ᓯᑯᒧᓪᓗ ᐊᒻᒪᓗ ᓂᕿᖁᑎᕗᑦ. ᑕᒪᒃᑯᐊ ᐊᑐᐃᓐᓇᑐᐃᓐᓇᐅᖏᒻᒪᑕ ᐅᕙᑦᑎᓐᓄᑦ, ᑭᓯᐊᓂᓕ ᑐᓐᖓᕕᒋᒐᑦᑎᒍ ᐱᖅᑯᓯᕆᓪᓗᑎᒍ ᓯᓚᕐᔪᐊᒥᓗ ᑕᐃᒫᒃ ᑕᑯᓐᓇᖅᑕᐅᒻᒪᑕ.
“ᐃᓄᐃᑦ ᐱᔪᓐᓇᐅᑎᖏᑦ, ᐱᖃᓯᐅᔾᔨᔪᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓂᑦ, ᐱᒻᒪᕆᐅᒋᐊᖃᕐᖓᑕ ᑕᒪᒃᑯᐊ ᐱᓕᕆᑎᓪᓗᒋᑦ ᑲᑎᒪᓂᕐᔪᐊᒥ ᑲᑐᔾᔨᔨᓂᒃ (COP 28)”, ᐅᖃᓚᐅᖅᑐᖅ ᓯᐅᕋ ᐳᓪᔅᕕᒡ, ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᐃᔅᓯᕙᐅᑕᖓ. “ᑕᑯᓯᒪᒐᑦᑕ ᐱᓕᕆᖃᑎᒌᓐᓂᒃ ᐅᖃᐅᓯᖃᖅᑐᖅ ᑕᒪᑐᒥᖓ ᐊᓯᔾᔨᐸᓪᓕᐊᓂᖓᓐᓂ ᓅᑉᐸᓪᓕᐊᓂᖓᓂ, ᑭᓯᐊᓂᓕ ᐃᓕᓴᕆᔭᐅᖃᑦᑕᖏᑦᑎᐊᕐᖓᑕ ᑐᓐᖓᕕᒋᓇᓱᐊᖅᑕᕗᑦ ᑲᒪᒋᔭᕆᐊᖃᓪᓚᕆᑦᑕᕗᑦ ᐊᔅᓱᕈᓐᓇᖅᑐᒃᑰᓕᖅᑎᓪᓗᑕ ᓯᓚ ᐱᔾᔪᑎᒋᓪᓗᒍ. ᐃᓕᓴᕆᔭᐅᒋᐊᓖᑦ ᓯᓚᕐᔪᐊᒥᓗ ᑕᑯᓐᓇᖅᑕᐅᓂᖏᑦ ᓄᓇᖃᖅᑳᖅᑐᒥᓂᑦ ᐃᓱᒪᒋᔭᐅᒋᐊᖃᓪᓚᕆᑦᑐᑦ ᓇᑭᓐᖔᖅᓯᒪᓂᖏᓐᓂ ᑭᒡᒐᖅᑐᐃᓂᓕᒫᖏᓐᓂᓪᓗ ᐱᒋᐊᕈᑎᓕᒪᓂᒃ ᐃᓱᒪᓕᐅᕈᑕᐅᓯᒪᔪᓂᓪᓗ ᑕᒪᑐᒧᖓᖓᔪᓂᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ. ᑕᒪᒃᑯᐊ ᐊᓯᔾᔨᖅᑐᕋᓱᑦᑑᒐᓗᐊᑦ ᑲᔪᓯᔾᔮᖏᑦᑐᑦ ᐊᑐᓕᖁᔭᐅᔪᑦ ᐊᑐᓕᖅᑎᑕᐅᓐᖏᑉᐸᑕ ᐱᔪᓐᓇᐅᑎᖏᑦ ᓄᓇᖃᖅᑳᖅᑐᒥᓃᑦ. ᖃᓄᐃᓕᖓᓂᑦᑎᓐᓂ ᑎᑎᕋᖅᓯᒪᔪᑦ ᐅᖃᐅᓯᖃᕐᖓᑦ ᑐᐊᕕᕐᓇᖅᓯᓕᕐᓂᖏᓐᓂ ᓯᕗᒧᓪᓗ ᑕᑯᓐᓇᕆᐊᖃᓕᖅᑐᑕ ᑕᒪᒃᑯᐊᓗ ᑐᓴᖅᑕᐅᑎᓪᓗᒋᑦ ᑕᐃᑯᖓ ᑲᑎᒪᓂᕐᔪᐊᒥ ᑲᑐᔾᔨᔪᓄᑦ (COP 28) ᐅᖓᑖᓄᒃᑲᓐᓂᐊᓗᓪᓗ ᐱᓗᑕ.”
ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᑲᑎᒪᓂᕐᔪᐊᒥ ᑲᑐᔾᔨᔨᓂᒃ (COP 28) ᖃᓄᐃᓕᖓᓂᐊᕐᒪᖓᑕ ᑎᑎᕋᖅᓯᒪᒻᒪᑕ ᑕᓪᓕᒪᑦ ᐊᑐᓕᖁᔭᐅᔪᑦ ᓇᓗᓇᐃᔭᖅᓯᒪᔭᖏ ᐃᓄᐃᑦ ᑐᔅᓯᕌᖏᑦ ᓯᓚᕐᔪᐊᒥ ᓯᕗᓕᖅᑎᓄᑦ, ᖃᔨᓴᖅᑐᓕᕆᕙᑦᑐᓄᑦ, ᓇᒻᒥᓂᖃᖅᑎᐅᔪᓄᑦ ᓴᓇᔨᓄᑦ ᐊᓯᖏᓐᓄᓪᓗ.
ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᐊᑐᓕᖁᔨᕗᑦ ᑎᑎᕋᖅᓯᒪᔪᓐᓃᓐᖓᖅᑐᓂᒃ:
ᐊᑐᓕᖁᔭᖅ 1: ᐃᓕᓴᕆᔭᐅᓗᑎᑦ ᐃᓄᐃᑦ ᐊᓯᖏᓪᓗ ᓄᓇᖃᖅᑳᖅᑐᒥᓃᑦ ᐊᔾᔨᐅᖏᑦᑐᓂᑦ ᑎᒍᒥᐊᕐᖓᑕ ᐱᖃᕐᖓᑕ, ᓯᓚ ᐊᓯᔾᔨᖅᑐᓕᒫᓄᑦ ᐱᓕᕆᐊᑦ ᒪᓕᒋᐊᓖᑦ ᓴᓐᖏᔪᐊᓗᓐᓂᓐᖔᖅᑐᓂᒃ ᐃᓄᓐᓂᑦ ᑐᓐᖓᕕᖃᑦᑎᐊᖅᑐᓂ ᐃᓄᐃᓪᓗ ᐱᔪᓐᓇᐅᑎᖏᓐᓂ ᒪᓕᓪᓗᑎᑦ ᑖᒃᑯᑎᒎᓇ ᓯᓚᕐᔪᐊᒥ ᑲᑎᒪᔪᓂᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓂᑦ;
ᐊᑐᓕᖁᔭᖅ 2: ᖃᐅᒪᑦᑎᐊᕐᓗᒋᑦ ᖃᐅᔨᓴᕐᓂᐅᔪᓕᒫᑦ ᐃᓱᒪᓕᐅᖅᑕᐅᔪᓕᒫᓪᓗ ᐊᑦᑐᐃᓂᖃᖅᑐᑦ ᐃᓄᓐᓂᑦ ᐃᓄᐃᓪᓗ ᓄᓇᖏᓐᓂ, ᓄᓇᑦᑎᓐᓂ, ᒪᑯᓂᖓᓗ ᑕᐃᒪᐃᓪᓗᐊᑎᑦᑎᓂᕐᒥᑦ ᓇᑭᓐᖔᖅᓯᒪᓂᑦᑎᓐᓂ ᐱᓕᕆᖃᑎᖃᕆᐊᓖᑦ ᐃᓄᓐᓂᑦ ᐊᑐᓕᖅᑎᑕᐅᓗᑎᓪᓗ ᓄᓇᖃᖅᑳᖅᑐᒥᓂᑦ ᖃᐅᔨᒪᓂᑐᖃᖏᑦ;
ᐊᑐᓕᖁᔭᖅ 3: ᐱᒋᐊᕈᑕᐅᔪᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐊᑐᕆᐊᖃᓐᖏᑦᑐᑦ ᓇᑭᓐᖔᖅᓯᒪᓂᑦᑎᓐᓂ ᐊᔾᔨᐅᖏᑦᑐᒥᑦ ᐱᔪᓐᓇᐅᑎᖃᕐᓂᑎᓐᓂ, ᒪᑯᓂᖓᓗ ᐱᔪᓐᓇᐅᑎᑦᑎᓐᓂ ᓇᒻᒥᓂᖅ ᐱᓇᓱᐊᕐᓂᕐᒧᑦ, ᐊᒻᒪᓗ ᓄᓇᖃᖅᑳᖅᑐᒥᓂᕐᓂᑦ;
ᐊᑐᓕᖁᔭᖅ 4: ᓴᖅᑮᓗᑎᑦ ᐊᖅᑯᑕᐅᓂᐊᖅᑐᓂᒃ ᓄᓇᖃᖅᑳᖅᑐᒥᓂᕐᓄᑦ ᐱᔪᓐᓇᕐᓗᑎᑦ ᑕᐃᒫᓪᓗᐊᖅᑕᐅ ᓯᓚ ᐱᔾᔪᑎᒋᓪᓗᒋᑦ ᑮᓇᐅᔭᓂᒃ, ᒪᑯᓂᖓᓗ ᔭᒐᐃᔭᐅᓯᒪᔪᓂᒃ ᓱᕋᔅᓯᒪᔪᓄᑦ ᑮᓇᔭᐅᖅᑖᕈᑕᐅᕙᑦᑐᓂᒃ, ᐊᓯᖏᓐᓂᓪᓗ ᐃᓕᑦᑐᓂᕐᒧᑦ ᒥᑭᓪᓕᕚᓪᓕᑎᑦᑎᓇᓱᐊᕐᓂᒧᓪᓗ ᐊᑲᐅᓐᖏᓕᐅᕈᑕᐅᔪᓂᒃ ᑮᓇᐅᔭᓂᒃ;
ᐊᑐᓕᖁᔭᖅ 5: ᒐᕙᒪᒃᑯᑦ ᐃᓕᓴᖅᓯᒋᐊᖃᕐᒥᔪᑦ ᑕᒪᒃᑯᓂᖓ ᐊᑦᑐᐊᔪᓂᒃ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐊᒻᒪᓗ ᐊᓯᖏᓐᓂ ᐊᕙᑎᑦᑎᓐᓄᑦ ᐅᓗᕆᐊᓇᖅᑐᓂᒃ ᐊᒻᒪᓗ ᓂᓪᓕᐊᖃᑎᖃᕈᓐᓇᕐᓗᑎᑦ ᐱᓇᓱᐊᕐᓂᖏᓐᓂᓪᓗ ᓄᓇᖃᖅᑳᖅᑐᒥᓂᑦ ᐊᓯᖏᓐᓂ ᓯᓚᕐᔪᐊᒥ ᐱᓕᕆᐊᖑᕙᓪᓕᐊᔪᓂᒃ.
ᐃᓄᐃᑦ ᐱᖃᑕᐅᔪᑦ ᐱᓕᕆᐊᖑᓂᐊᖅᑐᓂᒃ ᐱᓯᒪᑦᑎᔪᑦ ᑲᑎᒪᓂᐅᔪᓂᓪᓗ ᒥᓂᔅᑕᓂᒃ ᒐᕙᒪᒃᑯᓐᓂᓐᖔᖅᑐᓂᓪᓗ, ᐱᖃᑕᐅᓪᓗᑎᓪᓗ ᓄᓇᖃᖅᑳᖅᑐᒥᓃᑦ ᒥᓂᔅᑕᖏᑕ ᑲᑎᒪᔨᖏᓐᓂ, ᐱᖃᑕᐅᓯᒪᓪᓗᑎᓪᓗ ᓄᓇᖃᖅᑳᖅᑐᒥᓂᑦ ᖃᐅᔨᒪᓂᖏᓐᓂ ᑎᒍᒥᐊᖅᑎᓄᑦ ᐃᓕᓐᓂᐊᑲᐃᓐᓇᖅᓯᒪᔪᓂᒃ ᐊᔾᔨᒌᓐᖏᑦᑐᓂᓪᓗ ᐃᓅᓱᑦᑐᓂᒃ ᐱᓕᔪᒫᕐᓂᐊᖅᑐᓂᒃ, ᐊᒻᒪᓗ ᐃᓄᐃᑦ ᑐᓴᖅᑎᔾᔪᑎᒋᔪᒪᔭᖏᓐᓂ ᐊᒥᓱᓄᑦ ᐱᓕᕆᔨᒻᒪᕆᓐᓄᑦ ᖃᓄᐃᓘᖅᑐᓄᑦ ᐊᐃᕙᔾᔪᑕᐅᔪᓄᓪᓗ.
ᑎᑎᕋᖅᑕᐅᓯᒪᔪᑦ ᐅᖃᓕᒫᕈᒪᓐᓂᕈᕕᒋᑦ, ᐅᓇ ᓇᕿᓪᓗᒍ ᐅᓇ ᓇᕿᓪᓗᒍ.
ᕿᒥᕐᕈᔪᓐᓇᕐᒥᔪᑎᑦ ᐊᓯᐊᒍᑦ ᑕᑯᔭᐅᒐᔪᑦᑐᓂᒃ ᑭᒃᑯᑐᐃᓐᓇᕐᓄᑦ ᐅᓪᓗᒥᒧᑦ ᑕᑯᔪᒪᖃᑦᑕᕈᕕᑦ ᐅᕙᒍᑦ ᑲᑎᒪᓂᕐᔪᐊᒥ ᑲᑐᔾᔨᔨᓂᒃ (COP 28) ᖃᓄᐃᓘᕐᓂᐅᔪᓂᒃ!
-30-
ᖃᐅᔨᒋᐊᕐᕕᔅᓴᖅ:
ᑯᕇᔅᑏᓇ ᕕᐅᓪᑦᔅ
ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ᐊᓛᔅᑲ)
907-274-9058
christina@iccalaska.org
ᑯᓗᒃ ᓕᐳᑦ
ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ
(ᑲᓛᖡᑦ ᓄᓈᓂ)
+299 34 22 25
kuluk@inuit.org
ᑲᓵᓐᑐᕋ ᐊᓕᐊᑦ
ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ᑲᓇᑕ)
613-407-2642
celliott@inuitcircumpolar.com
ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᓄᓇᖃᖅᑳᖅᑐᒥᓂᐅᓪᓗᑦ ᑲᑐᔾᔨᖃᑎᒌᑦ (IPO), ᓴᖅᑭᓚᐅᖅᓯᒪᔪᖅ 1977−ᒥ ᓴᖅᑭᔮᖅᑎᑦᑎᒍᒪᓪᓗᑎᒃ ᖁᕕᐊᓲᑎᖃᕈᒪᓪᓗᑎᓪᓗ ᑲᑐᔾᔨᔪᓂᒃ 180,000−ᓂᒃ ᐃᓄᓐᓂᑦ ᐊᓛᔅᑲᒥ (ᒥᐊᓕᒐᐃᑦ ᓄᓇᖓᓐᓂ), ᑲᓇᑕ, ᑲᓛᖦᖡᑦ ᓄᓈᓂᑦ ᐊᒻᒪᓗ ᓯᑳᑦᑲᒥ (ᐅᓛᓵᒥ). ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ICC) ᓴᖅᑭᔮᖅᑎᑦᑎᔪᑦ ᐃᓄᐃᑦ ᐱᔪᓐᓇᐅᑎᖏᓐᓂ, ᐊᑦᑕᓇᖅᑕᐃᓕᒪᔾᔪᑎᔅᓴᖏᓐᓂ ᐅᑭᐅᖅᑕᖅᑑᑉ ᐊᕙᑎᖓᓐᓂ, ᐸᖅᑭᔭᐅᓂᖏᓐᓂ ᓴᖅᑭᔮᖅᑎᑦᑎᑲᓐᓂᖅᑐᑎᓪᓗ ᐃᓄᐃᑦ ᐃᓅᓯᖏᓐᓂ.
ᑕᒪᒃᑯᐊ ᐱᔾᔪᑎᒋᓪᓗᒋᑦ ᓯᓚ ᐊᓯᔾᔨᐸᓪᓕᐊᓂᖏᑦ, ᐱᒻᒪᕆᐅᒋᒐᑦᑎᒍ ᓯᕗᓕᖅᑏᑦ ᒐᕙᒪᒃᑯᓪᓗ ᑕᒪᒃᑯᓂᖓ ᐃᓕᓴᖅᓯᓯᒪᖁᒐᑦᑎᒍ, ᐅᑉᐱᕆᔭᖃᑦᑎᐊᕐᓗᑎᑦ ᐊᑐᓕᖅᑎᑦᑎᓪᓚᕆᓪᓗᑎᓪᓗ ᐃᓄᐃᑦ ᐱᔪᓐᓇᐅᑎᖏᓐᓂ ᐃᓄᓐᓂᑦ ᐊᓯᖏᓐᓂᓪᓗ ᓄᓇᖃᖅᑳᖅᑐᒥᓂᕐᓂᑦ ᓯᓚᕐᔪᐊᓕᒫᒥ.