Press Releases

Documenting our Progress

ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᖃᐃᖁᔨᕗᖅ ᓯᓚᕐᔪᐊᒥ ᓄᓇᓕᓐᓂ ᐱᓕᕆᖃᑎᒌᖁᔨᓪᓗᓂ ᐃᓄᓐᓂᑦ ᓯᕗᓂᑦᑎᓐᓂ ᐅᑭᐅᖅᑕᖅᑑᑉ ᐃᒪᕕᖏᓐᓂ

ᔫᓂ 7, 2017 – ᓯᓚᕐᔪᐊᒥ ᑲᑐᔾᔨᖃᑎᒌᑦ ᑐᑦᑕᕐᕕᖓ, ᓅ ᔪᐊᒃ, − ᓇᓪᓕᐅᓂᖅᓯᐅᑎᖃᖅᑐᑎᑦ ᓯᓚᕐᔪᐊᒥ ᐃᒪᕕᓕᕆᓂᕐᒧᑦ ᐅᓪᓗᖓᓐᓂ ᔫᓂ 8−ᒥ, ᕼᐅᑉ ᐊᖏᒃ ᓇᑭᒪᔭᒃ, ᐊᖏᔪᖅᑳᑉ ᑐᖏᓕᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ, ᖃᐃᖁᔨᓚᐅᖅᑐᖅ ᓯᓚᕐᔪᐊᓕᒫᒦᑦᑐᓂᒃ, ᓄᓇᓕᓐᓂ ᐊᑐᓕᖅᑎᑦᑎᓗᑎᑦ ᐃᑯᐱᑦᑐᓕᕆᓂᕐᒥᑦ ᑐᕌᒐᖓᓐᓂ 14−ᒥᑦ “ᐱᐅᖅᓱᐊᕐᓗᑎᑦ ᑲᒪᑦᑎᐊᕐᓗᑎᑦ ᐃᒪᕕᒻᒦᑦ, ᐃᒪᕐᒥᑦ ᐃᒪᐃᓪᓗ ᑭᓱᖏᓐᓂ” ᐊᒻᒪᓗ ᐱᓕᕆᖃᑎᖃᑦᑎᐊᕐᓗᑎᑦ ᐃᓄᐃᑦ ᐊᒻᒪᓗ ᑕᐃᒃᑯᐊ ᐅᑭᐅᖅᑕᖅᑐᒥᐅᑕᐅᔪᑦ ᓄᓇᓖᑦ ᐃᓱᒪᑦᑎᐊᖁᓪᓗᒋᑦ ᐅᑭᐅᖅᑕᖅᑑᑉ ᐃᒪᕕᖓᓐᓂ.

ᐃᓄᐃᑦ ᐃᓱᒪᓕᐅᖃᑕᐅᖃᑦᑕᕐᓗᑎᑦ, ᐊᑐᕐᓂᐊᕋᓗᐊᖅᑲᑕ ᐅᑭᐅᖅᑕᖅᑑᑉ ᐃᒪᕕᖓᓐᓃᑦᑐᓂᒃ ᓴᓇᔨᓂᒃ, ᐃᖃᓗᓕᕆᓂᕐᒥᑦ, ᐅᒥᐊᕐᔪᐊᒃᑰᖃᑦᑕᓂᕐᒥᑦ, ᒪᓕᒐᓕᐅᕐᓂᕐᒥᑦ ᐅᕝᕙᓘᓐᓃᑦ ᐃᒪᓕᕆᓂᕐᒧᑦ ᐱᖁᔭᓕᐅᖅᑲᑕ ᐊᑦᑐᐃᓂᖃᕐᓂᐊᖅᑐᓂᒃ ᑕᐃᑲᓂᒥᐅᑕᕐᓂᑦ. ᐃᓄᐃᑦ ᐱᑕᖃᐅᒋᐊᖃᕐᒥᒻᒪᑕ ᐱᒋᐊᕈᑎᐅᓂᐊᖅᑐᓂᒃ ᓄᖅᑲᑎᑦᑎᒐᓱᐊᕐᓗᑎᓪᓘᓐᓃᑦ ᐊᑦᑐᐃᓂᖃᖅᑐᓂᑦ ᓯᑯᒥᑦ, ᐅᑭᐅᖅᑕᖅᑑᑉ ᐃᒪᕕᖓᓐᓂ ᓄᓇᖓᓐᓂᓪᓘᓐᓃᑦ ᓇᔪᖅᑕᑎᓐᓂ ᐸᖅᑭᔭᕆᐊᖃᕋᑦᑎᒍ ᐊᕙᑎᕗᑦ, ᓂᕐᔪᑏᑦ ᐊᒻᒪᓗ ᑕᐃᒪᐃᓐᓂᖓᓐᓄᑦ, ᐃᓄᐃᑦ ᐃᓅᕕᒌᓐᓇᖃᑦᑕᕐᓂᐊᕋᑦᑎᒍ ᓱᓕ ᓄᓇ ᐃᒪᕐᓗ. ᑕᒪᓐᓇ ᒪᓕᒐᐅᒻᒪᑦ ᑲᒪᑦᑎᐊᕐᓂᖅ ᑕᐃᒪᐃᖁᔨᓪᓚᕆᑦᑐᑕᓗ,” ᐅᖃᖅᑐᓂ ᓇᑭᒪᔭᒃ. “ᐱᕈᖅᓴᓚᐅᕋᒪ ᒪᑲᓐᔨ ᑎᐅᓪᑕᒥ ᐊᒻᒪᓗ ᐅᐊᓕᓂᐅᑉ ᑕᕆᐅᖓᓂᓗ. ᓱᕈᓯᐅᓂᕐᓂᑦ ᐃᖏᕐᕋᕕᒋᖃᑦᑕᐃᓐᓇᖅᓯᒪᒐᒃᑯ ᑕᒪᓐᓇ ᓯᑯ. ᐊᓯᕙᖃᑦᑕᖅᑐᖓ ᐃᒪᒃᑯᑦ ᐃᒪᕐᒥᐅᑕᕐᓂᑦ ᓂᕿᔅᓴᖅᓯᐅᖅᐸᑦᑐᖓᓪᓗ ᐅᑎᖅᑕᐸᑦᑐᑎᓪᓗ ᓄᓇᑦᑎᓐᓄᑦ”, ᐃᖅᑲᐅᒪᔭᖏᑦ ᓇᑭᒪᔭᑉ.

ᓯᓚ ᐊᓯᔾᔨᕐᓂᕐᓂᖓ ᐅᓗᕆᐊᓇᖅᑐᓪᓚᕆᐊᓗᒻᒪᑦ ᐅᑭᐅᖅᑕᖅᑑᑉ ᐃᒪᕕᖓᓐᓄᑦ, ᑭᓯᐊᓂᓕ ᑕᒪᒃᑯᐊ ᖄᖅᑎᑦᑎᖃᑦᑕᖅᑐᑎᑦ ᖃᐅᔨᓴᖅᑐᑦ, ᐅᒥᐊᕐᔪᐊᓪᓗ ᓂᐱᐊᓗᖏᑦ ᐃᖏᕐᕋᐃᓐᓇᖅᑐᐊᓗᐃᓪᓗ, ᐃᒪᕐᓗ ᓱᕈᓐᓇᖅᑐᖅᑕᖅᐸᓪᓕᐊᓪᓗᓂ, ᓄᑖᕐᓂᓪᓗ ᐃᓚᔅᓴᓂᒃ ᐱᑕᖃᓕᖅᑐᓂ, ᐃᒪᕕᓪᓗ ᑐᖁᓐᓇᖅᑐᓂᑦ ᑯᕝᕕᕕᐅᕙᑦᑐᓂ ᐊᔅᓱᐊᓗᒃ ᐃᓱᒫᓗᒋᔭᐅᒻᒪᑕ ᑕᒪᒃᑯᐊ ᐊᐅᑦᑕᔫᕋᓛᕌᓗᐃᑦ ᑕᑯᔅᓴᐅᓐᖏᑦᑐᑦ ᐃᒪᕐᒥᐅᑕᒦᑉᐸᑦᑐᑦ ᐆᒪᔪᓂᒃ. ᐃᓄᐃᑦ ᐋᖅᑭᒋᐊᕈᑎᖃᖅᑯᑦ ᐊᐅᓚᑦᑎᓗᑎᑦ ᐃᒪᕐᒥᐅᑕᓕᕆᓂᕐᒥᑦ, ᓲᕐᓗ ᐊᑐᓕᖁᔭᐅᓯᒪᔪᓂᒃ ᑖᒃᑯᓂᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓯᕗᒃᑲᖅᑕᐃᓪᓗᓂ ᐱᑭᐊᓚᓱᕐᓱᐊᖅ ᑎᓕᔭᐅᔾᔪᑎᐅᓯᒪᔪᑦ.

ᐱᑭᐊᓚᓱᕐᓱᐊᖅ, ᐅᕝᕙᓘᓐᓃᑦ “ᓴᖅᑭᖅᑎᐊᖅᑐᐊᓗᒃ ᐱᐅᔪᐊᓗᒃ”, ᐊᖏᓂᖅᐹᖑᒻᒪᑦ ᐅᑭᐅᖅᑕᖅᑐᒥ ᐊᐅᒃᑲᕐᓂᓕᒃ ᐊᒻᒪᓗ ᐆᒪᔪᖃᕐᓂᖅᐹᖑᓪᓗᓂ ᑕᒪᓐᓇ ᐃᒪᕐᒥᐅᑕᕐᓂᑦ ᐅᑭᐅᖅᑕᖅᑐᒥ ᓯᓚᕐᔪᐊᑉ ᑲᔾᔨᖓᓐᓃᑦᑐᖅ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᒋᐊᖅᑎᑦᑎᒋᐊᖅᓯᒪᒻᒪᑦ ᐱᑭᐊᓚᓱᕐᓱᐊᖅ ᑎᓕᓯᔾᔪᑎ ᑲᒪᒋᔭᐅᖁᓪᓗᒋᑦ ᒪᑭᒪᔾᔪᑎᔅᓴᐅᔪᓂᒃ ᐃᑲᔪᖅᑐᐃᓯᒪᓪᓗᑎᑦ ᐃᓄᐃᑦ ᓄᓇᓕᖏᓐᓂ ᐊᕐᕌᒍᒐᓱᕐᒧᐊᕌᓗᓐᓂᒃ ᒥᓕᐊᖏᓐᓃᑦᑐᓂᒃ ᐊᒻᒪᓗ ᐅᓗᕆᐊᓇᕐᖓᑦ ᑕᒪᓐᓇ ᓯᓚ ᐊᓯᔾᔨᐸᓪᓕᐊᓂᖓ ᐊᒻᒪᓗ ᓴᓇᔨᐊᓗᐃᑦ ᐅᒥᐊᕐᔪᐊᕌᓗᐃᓪᓗ ᐃᖏᕐᕋᔭᑦᑐᑦ. ᐱᑭᐊᓚᓱᕐᓱᐊᖅ ᑎᓕᓯᔾᔪᑕᐅᔪᑦ ᑐᕌᒐᖏᑦ ᑎᒥᐅᔪᒥᑦ ᓴᖅᑭᔮᖅᑎᑦᑎᓗᑎᑦ, ᒪᓕᒐᖃᕐᓗᑎᑦ ᐊᒻᒪᓗ ᐊᑐᓕᖁᔭᒥᓂᒃ ᓴᖅᑮᓗᑎᒃ ᐃᓄᓐᓄᑦ ᑐᓐᖓᕕᒋᔭᐅᔪᓄᑦ ᓯᕗᓂᑦᑎᓐᓂ ᐱᑭᐊᓚᓴᕐᓱᐊᕐᒥᑦ ᐊᒻᒪᓗ ᐃᓄᐃᑦ ᑕᑯᓐᓇᖅᑕᖏᓐᓂ ᐊᐅᓚᑕᐅᑦᑎᐊᕐᓗᑎᑦ ᑕᒫᓂ ᐊᑐᓕᖅᑎᑕᐅᓗᑎᓪᓗ.

ᒪᑯᐊ ᐱᔭᕆᐊᑐᔪᐊᓗᓐᓂᒃ ᐱᐅᔪᐊᓗᓐᓂᒃ ᓄᓇᖃᖅᑳᖅᑐᒥᓂᑦ ᖃᐅᔨᒪᓂᖏᑦ ᑐᑭᓯᐅᒪᓂᖏᓪᓗ ᐊᕕᑦᑐᖅᓯᒪᔪᓂᒃ ᐊᑐᖅᑕᐅᔪᓐᓇᖅᑐᑦ ᐋᖅᑭᑦᑕᐅᓗᑎᑦ ᐊᒥᓱᓄᑦ, ᐊᔾᔨᐅᖏᑦᑐᓂᓪᓗ. ᑎᓕᓯᔾᔪᑕᐅᔪᖅ ᐋᖅᑭᓱᖅᑕᐅᕙᓪᓕᐊᔪᖅ ᐃᓄᓐᓄᑦ ᐊᐅᓚᑕᐅᓗᓂ ᖃᐅᔨᓴᖅᑕᐅᖃᑦᑕᕐᓗᑎᓪᓗ ᐸᕐᓇᐅᑎᖃᕐᓗᑎᑦ ᐃᑲᔪᖅᑐᖅᑕᐅᓗᑎᓪᓗ ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᑦ ᐊᒻᒪᓗ ᐱᖁᔭᖏᑦ/ᐊᐅᓚᑦᑎᓂᖏᓪᓗ ᒪᓕᑦᑕᐅᑦᑎᐊᕐᓗᑎᑦ ᓄᓇᖃᖅᑳᖅᑐᒥᓃᑦ ᐸᖅᑭᔭᐅᓕᕐᓗᑎᑦ (IPA), ᑕᒪᑐᒥᖓ ᒪᓕᓪᓗᑎᑦ ᐊᑑᑎᖃᑦᑎᐊᖅᑎᓪᓗᒋᓪᓗ ᓇᒻᒥᓂᖅ ᑲᒪᓇᓱᐊᕐᓂᖏᓐᓂ.

“ᐃᓄᓐᓄᑦ, ᐱᔭᐅᖃᑦᑕᖅᑐᑦ ᓄᖑᓴᖅᑕᐅᖏᑦᑎᐊᕐᓗᑎᑦ ᐅᑭᐅᖅᑕᖅᑐᒥ ᐃᒪᕐᒥᑦ ᐱᔭᐅᖃᑦᑕᕐᓂᖏᑦ ᓯᕗᓂᑦᑎᓂᓪᓗ ᐅᑭᐅᖅᑕᖅᑐᒥ ᐃᒪᕕᖏᓐᓂ ᓯᑯᖏᓐᓂᓪᓗ ᑲᔾᔭᐅᓴᕐᕕᑐᐃᓐᓇᐅᒐᓱᓐᖏᒻᒪᓪᓕ − ᐃᓅᓯᐅᒻᒪᑦ, ᐸᖅᑭᑦᑎᓂᖅ ᐱᖅᑯᓯᖏᓐᓂ. ᐃᓄᐃᑦ ᐃᓕᑦᑐᐸᓪᓕᐊᔪᑦ ᐊᓯᔾᔨᖅᑐᓂᑦ ᒪᓕᑦᑐᑎᑦ ᓱᓕ ᐊᓯᔾᔨᐸᓪᓕᐊᖏᓐᓇᑎᓪᓗᒍ ᐅᑭᐅᖅᑕᖅᑐᖅ ᑕᐃᒪᐃᖏᓐᓇᕐᓂᐊᖅᑐᑦ − ᐃᓕᓐᓂᐊᕋᔅᓴᓕᖅᐹᓘᒐᑦᑕ ᐊᒻᒪᓗ ᐃᓕᓐᓂᐊᑎᑦᑎᒋᐊᓕᖅᐹᓘᓪᓗᑕ ᓯᓚᕐᔪᐊᒥᑦ” ᐅᖃᖅᑐᓂ ᓇᑭᒪᔭᒃ.

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.