ᒪᐃ 8, 2019 – ᐋᑐᐋ, ᑲᓇᑕ – ᐃᓄᐃᑦ ᓇᓗᓇᐃᖅᓯᑲᓐᓂᖅᓯᒪᒻᒪᑕ ᑲᓇᑕᒥ ᑎᒍᒥᐊᖅᑕᖓᓐᓂ ᐱᖓᓐᓇᖅᐸᓯᖓᓐᓂ ᐊᖅᑯᑕᐅᔪᒥᑦ ᐅᖃᐅᓯᕆᔭᐅᓚᐅᖅᑎᓪᓗᒍ ᐱᓇᓱᐊᕈᓯᕆᓚᐅᖅᑕᑎᓐᓂ ᒥᐊᓕᒐᐃᑦ ᐊᓪᓚᑦᑎᖓᓐᓂ ᒪᐃᒃ ᐸᒻᐱᐅ ᑲᓇᑕ ᑎᒍᓯᓯᒪᒻᒪᑦ ᑕᒪᑐᒥᖓ ᐊᖅᑯᑕᐅᔪᒥᑦ “ᒪᓕᒐᖅᑎᒎᓐᖏᑦᑎᐊᖅᑐᖅ ᐱᓯᒪᒻᒪᑕ.”
“ᐱᖓᓐᓇᖅᐸᓯᖓᓐᓃᑦᑐᖅ ᐊᖅᑯᑕᐅᔪᖅ ᐃᓄᐃᑦ ᓄᓇᖓᓐᓃᒻᒪᑦ, ᐅᑭᐅᖅᑕᖅᑐᒥ ᐊᖏᕐᕋᑎᓐᓂ,” ᐅᖃᖅᑐᓂ ᒫᓂᑲ ᐃᐅᓪ-ᑲᓇᔪᖅ, ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ. ᑲᑎᒪᖃᑕᐅᓚᐅᖅᑐᖅ ᐱᓇᓱᐊᕈᓯᕆᓚᐅᖅᑕᑎᓐᓂ ᐅᑭᐅᖅᑕᖅᑐᒥ ᑲᑎᒪᔨᓂᑦ ᒥᓂᔅᑕᒥ ᑕᐃᑲᓂ ᕕᓐᓛᒥ ᐸᒻᐱᐅ ᑕᐃᑲᓂ ᓂᓪᓕᐊᓚᐅᖅᑎᓪᓗᒍ. “ᐸᒻᐱᐅ ᐅᖃᐅᓯᕆᔭᖓ ᐅᑭᐅᖅᑕᖅᑐᒥ ᓲᕐᓗ ᓄᓇᒋᔭᐅᔪᖅ ᑲᑎᒪᔨᓄᑦ ᐅᓇᓕᓐᓄᓪᓗ ᓱᓕᓐᖏᒪᒡᒎ,” ᐅᖃᖅᑐᓂ ᐃᐅᓪ-ᑲᓇᔪᖅ, “ᓄᓇᖓ ᑲᑎᒪᔨᐅᔪᓂᒃ ᐊᔾᔨᒌᓐᖏᔾᔪᑎᖓᓪᓕ ᐅᑭᐅᖅᑕᖅᑐᒦᓐᓂᖓᓐᓂ ᓴᐃᓕᓇᖅᑐᒥ. ᓄᓇᖃᖅᑳᖅᑐᒥᓃᑦ ᐃᓅᕕᖓᓐᓂ ᐅᑭᐅᖅᑕᖅᑐᒥ ᓯᓚᕐᔪᐊᒥ ᑎᒥᐅᔪᓂᒃ ᐃᓱᒪᓕᐅᖅᑎᐅᔪᓂᓪᓗ ᑲᔪᓯᑎᓯᒪᔭᖏᓐᓂ”.
“ᑲᓇᑕᒥᐅᑦ ᑎᒍᒥᐊᕐᓂᖏᑦ ᒪᓕᑦᑐᑦ ᐃᓄᐃᑦ-ᒐᕙᒪᑐᖃᒃᑯᑦ ᓄᓇᑖᕈᑎᖓᓐᓄᑦ ᐊᖏᕈᑎᖓᓐᓂ ᐊᒻᒪᓗ ᐊᓯᖏᓐᓂ ᑎᓴᒪᐅᔪᓂᒃ ᐊᔾᔨᐅᖏᑦᑐᓂᑦ ᐃᓄᓐᓂ ᓄᓇᖏᓐᓂ ᐊᑐᖅᑕᐅᖃᑦᑕᕐᓂᖏᓐᓂ ᓇᔪᖅᑕᐅᓪᓗᑎᓪᓗ ᑖᒃᑯᓄᖓ,” ᐅᖃᖅᑐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑲᖅ ᒫᓂᑲ ᐃᐅᓪ-ᑲᓇᔪᖅ. “ᑲᓇᑕᒥ ᑎᒍᒥᐊᖅᑐᑦ ᒪᓕᑦᑐᑦ ᐊᖏᕈᑎᑐᖄᓗᓐᓂᑦ ᓴᓇᔭᐅᓚᐅᖅᓯᒪᔪᓂᒃ ᐊᖏᕈᑎᓂᒃ ᐃᓕᓴᕆᔭᐅᓪᓗᑎᓪᓗ ᐃᓄᓐᓄᑦ ᑎᒍᒥᐊᖅᑕᐅᓂᖏᓐᓄᑦ ᐊᒻᒪᓗ ᑲᓇᑕᒥ ᑎᒍᒥᐊᖅᑕᐅᓂᖏᓐᓄᑦ ᐅᑭᐅᖅᑕᖅᑐ, ᐱᖃᓯᐅᑎᓪᓗᒍ ᐱᖓᓐᓇᖅᐸᓯᖓᓐᓃᑦᑐᖅ ᐊᖅᑯᑎ.”
ᐃᐅᓪ-ᑲᓇᔪᖅ ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ 2009−ᒥ ᓯᓚᕐᔪᐊᑉ ᐅᑭᐅᖅᑕᖅᑐᖓᓐᓂ ᐃᓄᐃᑦ ᓇᓗᓇᐃᖅᓯᓚᐅᖅᑐᑦ ᑎᒍᒥᐊᕐᓂᖏᓐᓂ ᐅᑭᐅᖅᑕᖅᑐᒥ ᐅᖃᖅᓯᒪᓪᓗᑎᑦ, ᑎᒍᔭᐅᓯᒪᔪᑦ ᐱᔪᓐᓇᐅᑎᖏᑦ ᓇᒻᒥᓂᖅᓱᕐᓂᖏᓐᓂ, ᐃᓄᐃᑦ ᑎᒍᒥᐊᕐᓂᖏᓐᓂ ᐱᔪᓇᐅᑎᓂᑦ ᓯᓚᕐᔪᐊᑦ ᒪᓕᒐᖏᑦ ᒪᓕᑦᑐᒋᑦ, ᓄᓇᑖᕈᑎᒧᑦ ᐊᖏᕈᑎᖏᓐᓂ ᓇᒻᒥᓂᕐᓗ ᒐᕙᒪᖃᕐᓂᖏᓐᓂ.
ᐅᖃᖅᑐᓂᓗ ᓇᓗᓇᐃᖅᓯᓂᖓᓐᓂ ᐅᖃᐅᓯᖃᖅᑐᖅ ᐱᕙᓪᓕᐊᓂᕐᒥᑦ ᓯᓚᕐᔪᐊᒥ ᑎᒥᐅᔪᓂᒃ ᐅᑭᐅᖅᑕᖅᑐᒧ ᐊᒻᒪᓗ ᓄᓇᖃᖅᑳᖅᑐᒥᓃᑦ ᑲᑐᔾᔨᖃᑎᒌᖏᓐᓄᑦ, ᑕᒪᒃᑯᐊ ᓄᑖᑦ ᐋᖅᑭᑦᑕᐅᓯᒪᔪᑦ ᒪᓕᒐᐃᑦ “ᓅᑕᐅᒋᐊᓖᑦ ᐅᑭᐅᖅᑕᖅᑐᒥᑦ ᑎᒍᒥᐊᕐᓂᖏᓐᓂ ᐊᒻᒪᓗ ᐱᔪᓐᓇᐅᑎᖏᓐᓂ ᐊᒻᒪᓗ ᐱᖅᑯᓯᖏᓐᓂ ᒪᓕᓪᓗᑎᑦ ᐅᖃᖅᓯᒪᓗᑎᑦ ᓯᓚᑖᓃᓐᖔᖅᓯᒪᓐᖏᑦᑐᓂᓕ.”
ᑲᓇᑕᒥ ᒐᕙᒪᒃᑯᖏᑦ ᐃᓕᓴᖅᓯᓚᐅᖅᑐᑦ ᐱᓕᕆᐊᖏᓐᓂ ᐃᓄᐃᑦ ᐊᑦᑕᓇᐃᖅᓯᒪᑎᑦᑎᓂᖏᓐᓂ ᑲᓇᑕᒥ ᑎᒍᒥᐊᕐᓂᖏᓐᓂ, ᐅᖃᖅᑐᓂ ᐃᐅᓪ-ᑲᓇᔪᖅ, ᐅᖃᐅᓯᖃᖅᑐᓂᑦ 1985−ᓕᓴᕐᒥᑦ ᐱᓕᕆᐊᖏᓐᓂ ᒥᓂᔅᑕᐅᑉ ᔫ ᑲᓛᒃ ᐅᖃᖅᓯᒪᒻᒪᑦ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐊᖏᔪᖅᑲᖓ ᐅᖃᓚᐅᖅᑐᖅ ᑲᓛᒃ ᓇᓗᓇᐃᖅᓯᑦᑎᐊᓚᐅᖅᑐᖅ: “ᑲᓇᑕᒥ ᑎᒍᒥᐊᖅᑕᐅᔪᖅ ᐅᑭᐅᖅᑕᖅᑐ ᐊᕕᑦᑐᕋᔅᓴᐅᓐᖏᑦᑐᖅ. ᐱᔾᔪᑎᖃᖅᑐᖅ ᓄᓇᒥᑦ, ᐃᒪᕐᒥᑦ ᓯᑯᒥᓪᓗ. ᐊᓯᐊᓄᑦ ᑎᒍᔭᐅᒋᐊᖃᓐᖏᑦᑐᖅ ᐃᒪᖓ ᓯᔾᔭᖏᓐᓃᑦᑐᑦ ᐅᑭᐅᖅᑕᖅᑐᑦ ᕿᑭᖅᑕᖏᓐᓂ. ᑕᒪᒃᑯᐊ ᕿᑭᖅᑕᐃᑦ ᐊᑦᑐᐊᓂᖃᕐᖓᑕ, ᐊᕕᑦᑐᖅᑕᐅᒋᐊᖃᓐᖏᑦᑐᑦ, ᐃᒪᖏᑎᒍᑦ ᐊᑯᓐᓂᖏᓐᓂ. ᐊᖅᑯᑕᐅᒻᒪᑕ ᐊᕐᕌᒍᒧᑦ ᓯᑯᓯᒪᓂᖏᓐᓄᑦ. ᐅᐊᑦᑎᐊᕈᓂᕐᔪᐊᕌᓗᒃ ᑕᒪᒃᑯᐊ ᑲᓇᑕᒥᐅᑦ ᐃᓄᖏᓐᓄᑦ ᐊᑐᖅᑕᐅᓯᒪᓕᖅᑐᑦ ᓇᔪᖅᑕᐅᓪᓗᑎᓪᓗ ᓯᑯᑦ ᐊᑐᖅᑕᐅᖏᓐᓇᖅᑐᑦ ᓇᔪᖅᑕᐅᖏᓐᓇᖅᑐᓂᓪᓗ ᓄᓇ ᑕᒪᓐᓇ.”
ᐊᒻᒪᓗᒃᑲᓐᓂᖅ, ᒪᓕᑦᑐᒋᑦ ᐃᓄᐃᑦ ᓄᓇᖓᓐᓂ ᐊᑐᖃᑦᑕᑎᓪᓗᒋᑦ ᓇᔪᖅᑐᒋᓪᓗ ᐊᒻᒪᓗ ᐃᓄᐃᑦ ᒐᕙᒪᑐᖃᒃᑯᑦ ᓄᓇᑕᕈᑎᖓᑦᑕ ᐊᖏᕈᑎᖓᓐᓂ, ᐃᓚᖏᑦ ᐃᓄᐃᑦ ᐱᔪᓐᓇᐅᑏᑦ ᑎᒍᒥᐊᖅᑐᓂᑦ ᐱᓕᕆᖃᑎᖃᖃᑦᑕᖅᑐᑦ ᒐᕙᒪᑐᖃᒃᑯᓐᓂ ᐋᖅᑭᔅᓱᐃᓗᑎᑦ ᐊᑐᓕᖅᑎᑦᑎᓗᑎᓪᓗ ᐃᒪᕐᒥᐅᑕᓕᕆᓂᕐᒥᑦ ᐊᐅᓚᑦᑎᖃᑎᖃᕐᓗᑎᑦ ᐸᕐᓇᐅᑎᖃᕐᓗᑎᑦ ᑲᒪᒐᔭᖅᑐᓂᑦ ᐅᖓᑖᓄᑦ 157,000 (square) ᓯᓚᒦᑕᓂᑦ ᐱᖓᓐᓇᖅᐸᓯᖓᓐᓂ ᐊᖅᑯᑕᐅᔪᒥᑦ. ᑕᒪᓐᓇ ᐱᔾᔪᑎᒋᓪᓗᒍ ᐃᓄᐃᑦ ᐃᓚᒋᔭᐅᖏᓐᓇᕆᐊᖃᖅᑯᑦ ᐱᕙᓪᓕᐊᓂᖏᓐᓂ ᐊᕙᑎᓕᕆᓂᕐᒨᖓᔪᓂᒃ, ᐊᑦᑕᓇᕐᓗᒋᑦ, ᐃᖏᕐᕋᕕᐅᕙᑦᑐᖅ ᐱᕙᓪᓕᐊᓂᕐᒧᓪᓗ ᐱᒋᐊᕈᑎᖃᕐᓗᑎᑦ ᐃᓗᐊᓂ ᑲᓇᑕᐅᑉ ᐅᑭᐅᖅᑕᖅᑐᖓᓐᓂ.
“ᐃᓄᐃᑦ ᒫᓐᓇᐅᔪᖅ ᐱᓕᕆᖃᑎᖃᖃᑦᑕᖅᑐᑦ ᑲᓇᑕᒥ ᐱᕙᓪᓕᐊᓪᓗᑎᑦ ᐅᑭᐅᖅᑕᖅᑐᒥ ᐱᖁᔭᓕᐅᕐᓗᑎᑦ, ᒪᓕᒐᐅᒐᔭᖅᑐᓂ ᐊᐅᓚᑦᑎᖃᑎᖃᕐᓗᑎᑦ ᐱᖓᓐᓇᖅᐸᓯᖓᓐᓂ ᐊᖅᑯᑕᐅᔪᒥᑦ,” ᐅᖃᖅᑐᓂ ᐃᐅᓪ-ᑲᓇᑕᒥᖅ. “ᑐᑭᒧᐊᖅᑎᖃᑕᐅᓗᑎᑦ ᐱᒋᐊᕈᑎᓂᒃ ᐊᑦᑕᓇᐃᖁᔭᐅᓪᓗᑎᑦ, ᓴᓂᕐᕙᖅᑕᐅᓗᑎᑦ, ᐊᒻᒪᓗ ᓄᓇᓕᖃᑦᑎᐊᕐᓂᕐᒨᖓᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖏᓐᓂ.”
ᐃᓄᐃᑦ ᑕᑯᓐᓇᖅᑕᖏᑦ ᐃᓄᐃᑦ ᓄᓇᖓᓐᓂ ᐱᓕᕆᖃᑎᖃᕐᓗᑎᑦ ᓯᓚᕐᔪᐊᒥ ᐱᖃᑕᐅᔪᓂᒃ,” ᐅᖃᖅᑐᓂᓗ. “ᐱᓕᕆᖃᐅᖃᑦᑕᕐᓗᑎᑦ ᒪᑯᓂᖓ ᐃᓄᓐᓄᑦ ᐱᕙᓪᓕᐊᔭᐅᔪᒪᔪᓂᒃ, ᑲᑐᔾᔨᓂᕐᒦᑦᑐᒥᑦ ᐃᓄᓐᓂᑦ-ᑲᓇᑕᒥᐅᑕᕐᓂᑦ ᑎᒍᒥᐊᕐᓂᐅᔪᒥᑦ ᓄᓇᒥᑦ.”
ᑕᐃᑲᓂ ᓂᓪᓕᐊᓂᖓᓐᓂ, ᐸᒻᐱᐅ ᐅᖃᒃᑲᓐᓂᓚᐅᖅᑐᖅ ᐊᑯᓂᒧᑦ ᒥᐊᓕᒐᐃᑦ ᖃᓄᐃᓕᖓᓂᖏᓐᓄᑦ ᐱᖓᓐᓇᖅᐸᓯᒻᒦᑦᑐᒥᑦ ᐊᖅᑯᑎᒥᑦ ᓯᓚᕐᔪᐊᑉ ᐃᒪᖓᓐᓂ, ᒪᑐᐃᖓᔪᖅ ᐅᒥᐊᕐᔪᒃᑯᑦ ᑭᒃᑯᓕᒫᑦᑎᐊᕐᓄᑦ. ᑲᓇᑕᒥ ᐃᒪᐃᓕᖓᒻᒪᑕ ᑕᒪᓐᓇ ᐊᖅᑯᑎ ᓯᓚᑖᓂᓐᖔᖅᓯᒪᔪᓂᒃ ᐊᖅᑯᑕᐅᒻᒪᑦ ᑭᓇᑐᐃᓐᓇᕐᓗ ᐊᖅᑯᓵᕈᒪᔪᖅ ᐊᖏᖅᑕᐅᖅᑳᕐᓗᓂ ᑭᓯᐊᓂᐅᒐᔭᖅᑐᖅ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᖅ ᐃᐅᓪ-ᑲᓇᔪᖅ ᐅᖃᓚᐅᖅᑐᖅ ᒥᐊᓕᒐᐃᑦ ᐃᒪᒃᑰᕈᒪᓂᖏᑦ ᑕᒪᐅᓇ ᐱᖓᓐᓇᖅᐸᓯᒃᑯ ᐊᖅᑯᑕᐅᔪᒥᑦ ᓯᖁᒥᑦᑎᔪᑦ ᒪᓕᒐᕐᒥᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ ᓇᓗᓇᐃᖅᓯᒪᔪᓂᒃ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ, ᓲᕐᓗ ᒪᓕᒐᕐᒥᑦ 26−ᒥᑦ ᐅᖃᖅᓯᒪᒻᒪᑦ, “ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖃᕐᖓᑕ ᓄᓇᓂᑦ, ᑕᒪᔅᓱᒥᖓ ᐅᑭᐅᖅᑕᖅᑑᑉ ᐊᕕᑦᑐᖅᓯᒪᓂᖓᓐᓂ ᐊᒻᒪᓗ ᐃᓗᓕᖏᓐᓂ ᐱᖅᑯᓯᒃᑯᑦ ᓇᒻᒥᓂᕆᔭᐅᓪᓗᑎᑦ, ᓇᔪᖅᑕᐅᓪᓗᑎᑦ ᐅᕝᕙᓘᓐᓃᑦ ᐊᑐᖅᑕᐅᔪᑦ ᑎᒍᒥᐊᖅᑕᐅᔪᓪᓘᓐᓃᑦ.”