ᔫᓂ 2, 2016 – ᖁᒻᒧᐊᑦᑎᑕᐅᓯᒪᔪᖅ ᓱᐱᔪᐊᓗᒃ ᑲᑕᒍᒪᕐᖓᑦ ᑲᓇᑕᐅᑉ ᐅᑭᐅᖅᑕᖅᑐᖏᑦᑕ ᐃᒪᖏᓐᓄᑦ ᑕᒫᓂ ᐱᓇᓱᐊᕈᓯᕐᒥᑦ ᐃᓱᒫᓗᒋᔭᐅᓪᓗᑎᓪᓗ ᐃᓄᓐᓄᑦ. “ᐊᐱᕆᔪᖃᓚᐅᕐᖓᑦ ᐊᕙᑎᕗᑦ ᐊᑦᑐᖅᑕᐅᓂᐊᕐᒪᖔᖅ ᐅᖅᓱᐊᓗᖓᓐᓄ ᐅᑭᐅᖅᑕᖅᑑᑉ ᐃᒪᖏᑦ ᐊᒻᒪᓗ ᓴᕕᕋᔭᒥᓂᐊᓗᐃᑦ ᐅᓗᕆᐊᓇᕐᒪᖔᑕ ᐅᑭᐅᖅᑕᖅᑑᑉ ᓂᕐᔪᑎᖏᓐᓄᑦ ᐃᓄᓐᓄᓪᓗ”, ᐅᖃᓚᐅᖅᑐᖅ ᐅᑲᓕᖅ ᐃᔨᑦᓯᐊᖅ, ᐃᔅᓯᕙᐅᑕᕆᔭᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᒻᒪᓗ ᓯᓚᕐᔪᐊᒥ ᑲᒥᓴᓇᖓᓐᓄᑦ ᐱᑭᐊᓚᓱᕐᓱᐊᖅ ᑲᑎᒪᔨᖏᓐᓂ.
ᐅᑭᐅᖅᑕᖅᑑᑉ ᐃᒪᖏᑕ ᐊᐅᒃᑲᕐᓂᓕᖏᑦ, ᐅᕝᕙᓘᓐᓃᑦ ᐱᑭᐊᓚᓱᕐᓱᐊᖅ ᓯᑯᒍᓐᓇᖏᑦᑐᖅ ᐊᕙᓗᐊ ᓯᑯᐃᓐᓇᐅᓪᓗᓂ. ᐱᖓᓐᓇᖓᓂ ᑕᓪᓗᕈᑎᐅᑉ ᐃᑭᖓ/ᓴᓂᕈᑎᐅᑉ ᐃᒪᖓᓐᓂ ᐊᑯᓐᓂᖏᓐᓂ ᑲᓛᖡᑦ ᓄᓈᓂ ᑲᓇᑕᒥᓗ ᐊᐅᓱᐃᑦᑑᑉ ᕿᑭᖅᑕᖓᓐᓂ ᖃᓂᑦᑐᒥᑦ ᓯᒥᑦ ᑲᖏᖅᖢᖓᓂ ᓂᐅᔅ ᐃᒪᖓᓂᓗ. ᐱᑭᐊᓚᓱᕐᓱᐊᖅ ᐱᕈᖅᑐᓕᒃ ᐱᖅᑯᓯᖅᑎᒍᓪᓗ ᐊᔾᔨᐅᖏᑦᑐᖅ ᐃᕐᓂᐅᕐᕕᐅᕙᑦᑐᓂᓗ ᐊᖅᑯᓴᖅᑕᕐᕕᐅᕙᑦᑐᓂᓗ ᐊᓯᐊᓅᖅᑕᖅᑐᓂᒃ ᓂᕐᔪᑎᓂᑦ ᓲᕐᓗ ᑑᒑᓕᓐᓂᒃ, ᕿᓚᓗᒐᕐᓂᑦ, ᐊᐃᕕᕐᓂᑦ, ᐊᕐᕕᓐᓂᑦ ᑎᒻᒥᐊᓂᓪᓗ. “ᑖᓐᓇ ᖁᒻᒧᐊᑦᑎᑕᐅᓯᒪᔪᖅ ᓱᐱᔪᐊᓗᒃ ᐃᓄᓕᒻᒧᑦ ᑲᑕᔾᔮᖏᑦᑐᖅ. ᐃᒪᕐᒨᕋᔭᖅᑐᖅ ᐆᒪᔪᖅᑕᓕᓐᓄᑦ ᓂᕿᔅᓴᖅᓯᐅᕕᐅᕙᑦᑐᓂᒃ ᐃᓄᓐᓄᑦ ᑲᓛᖡᑦ ᓄᓈᓂᒥᐅᑕᕐᓄᑦ ᑲᓇᑕᒥᐅᑕᕐᓄᓪᓗ” ᐃᔨᑦᓯᐊᖅ ᐅᖃᖅᑐᓂᓗ. “ᐃᓄᐃᑦ ᑕᒫᓂᒥᐅᑕᐅᒻᒪᑕ, ᐃᓄᐃᑦ ᐆᒪᔪᕋᓱᐊᖅᐸᑦᑐᑦ ᑕᒫᓂ ᐃᒪᖏᓐᓂ ᓂᕆᕙᑦᑐᑎᓪᓗ ᐃᓚᒌᑦ, ᐊᖏᕐᕋᒋᒐᑦᑎᒍ ᑕᒪᓐᓇ”.
ᐱᑭᐊᓚᓱᕐᓱᐊᖅ ᑲᑎᒪᔨᖏᑦ ᓴᖅᑭᓚᐅᖅᓯᒪᔪᑦ ᔮᓐᓄᐊᕆᒥ 2016−ᒥ ᐊᔾᔨᐅᖏᑦᑐᓂᑦ ᑲᒪᖁᔭᐅᓪᓗᑎᑦ ᓄᓇᒥᑦ ᐊᒻᒪᓗ ᓈᓚᓪᓗᑎᑦ ᐃᓄᓐᓂᑦ ᐊᑐᖃᑦᑕᖅᑐᓂᑦ, ᑕᑎᖃᖃᑦᑕᖅᑐᓂᒃ ᓇᔪᖅᑐᓂᒋᓪᓗ ᑕᑯᓐᓇᖅᑕᖏᓪᓗ ᓯᕗᓂᑦᑎᓐᓂ
ᐱᑭᐊᓚᐅᕐᓱᐊᖅ ᑲᑎᒪᔨᖏᑦ ᐱᖓᓱᓄᑦ ᑲᑎᒪᔨᓄᑦ ᑲᒪᒋᔭᐅᓂᐊᖅᑐᖅ, ᓯᕗᓪᓕᖅᐹᒥ ᑲᑐᔾᔨᖃᑎᒌᓐᓂᖏᓐᓄᑦ ᑲᑎᒪᒍᒫᖅᑐᑦ ᐅᓪᓗᒥᐅᔪᖅ ᐃᖃᓗᓐᓂ, ᑲᑎᒪᔨᖏᑦ ᐅᑯᐊᖑᓪᓗᑎᑦ: ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ, ᐅᑲᓕᖅ ᐃᔨᑦᓯᐊᖅ (ᓯᓚᕐᔪᐊᒧᑦ ᑲᑎᒪᔨᐅᔪᑦ); ᓯᕗᓕᖅᑎᐅᓚᐅᖅᓯᒪᔪᖅ ᓄᓇᕗᒻᒧᑦ, ᐄᕙ ᐋᕆᐊᒃ (ᑲᓇᑕᒥ ᑲᒥᓴᓇᐅᓂᕐᒧᑦ), ᐊᒻᒪᓗ ᑲᓛᖡᑦ ᓄᓈᓂ ᓯᕗᓕᖅᑎ, ᑰᐱᒃ ᑭᖠᔅᑎᑦ (ᑲᓛᖡᑦ ᓄᓈᓂ ᑲᒥᓴᓇ).
ᑲᑎᒪᔩᑦ ᒫᓐᓇ ᓈᓚᑦᑎᑦᑎᔪᑦ ᓄᓇᓕᓐᓂᑦ ᑕᒪᒃᑮᓐᓂᒃ ᐅᑭᐅᖅᑕᖅᑐᒥ ᐃᒪᖏᓐᓂ ᐊᐅᒃᑲᓐᓂᓕᕐᒥᑦ ᐅᕝᕙᓘᓐᓃᑦ (ᐱᑭᐊᓚᓱᕐᓱᐊᖅ) ᐱᔾᔪᑎᖃᖅᑐᑦ ᓄᓇᓖᑦ ᐃᓱᒫᓘᑎᖏᓐᓂ ᐃᓱᒪᒋᔭᖏᓐᓂᓪᓗ ᑕᒪᒃᑯᓂᖓ ᐱᕈᖅᑐᑦ ᐊᑦᑕᓇᖅᑐᒦᒍᓐᓇᕐᓂᖏᓐᓂ. “ᓇᒧᓐᖓᑐᐃᓐᓇᕋᓗᐊᕈᑦᑕ, ᑐᓴᖃᑦᑕᖅᑐᒍᑦ ᓄᓇᓕᓐᓂ ᐱᖃᑕᐅᖃᑦᑕᕈᒪᔪᒍᑦ ᐃᒪᓕᕆᔪᓂᑦ ᐃᓱᒪᓕᐅᖃᑦᑕᖅᑐᓂᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂᒃ”, ᐅᖃᖅᑐᓂ ᐃᔨᑦᓯᐊᖅ.
“ᐅᑭᐅᖅᑕᖅᑐᒥ ᐃᒪᖏᑦ ᐊᑦᑐᖅᑕᐅᔪᓐᓇᑦᑎᐊᕐᖓᑦ ᐊᓯᔾᔨᖅᑐᑦ ᓲᕐᓗ ᓯᓚᒧᑦ, ᐳᓚᕋᖅᑐᓕᕆᓂᕐᒧᑦ ᐅᕝᕙᓘᓐᓃᑦ ᓴᓇᔨᓂᒃ ᓱᕈᓐᓇᖅᑐᑖᕐᓗᑎᑦ ᐃᒪᐃᑦ ᓴᕕᕋᔭᒥᓂᐊᓗᓐᓂᓪᓗ ᑲᓇᒐᖅᑐᓂᑦ ᕿᓚᒻᒥ”, ᐅᖃᓚᐅᖅᑐᖅ ᐄᕚ ᐋᕆᐊᒃ. “ᐃᒋᑦᑎᑐᐃᓐᓇᕆᐊᖃᓐᖏᑦᑑᒐᓗᐊᑦ ᐅᒥᐊᕐᔪᐊᒦᓐᖔᖅᑐᓂᑦ ᐅᕝᕙᓘᓐᓃᑦ ᓄᓇᒧᑦ ᑕᐃᒫᔅᓴᐃᓐᓇᖅᑕᐅ ᐃᒋᑦᑎᑐᐃᓐᓇᕆᐊᖃᓐᖏᒻᒥᔫᒐᓗᐊᑦ ᐊᓂᕐᓂᖃᕐᓇᖏᑦᑐᒧᑦ”.
ᐃᓄᐃᑦ ᐊᑐᖃᑦᑕᖅᑐᑦ ᓇᔪᖅᑐᓂᒋᓪᓗ ᑕᒪᓐᓇ ᐅᖃᖅᓯᒪᔪᑦ ᕿᒥᕐᕈᑲᓐᓂᕈᒪᒻᒪᑕ ᓄᓇᓕᓐᓂ ᐊᐅᓚᑕᐅᓗᓂ ᓯᕗᕙᖅᑎᑦᑎᑲᓐᓂᕐᓗᑎᑦ ᐅᒥᐊᕐᔪᐊᒃᑰᖅᐸᑦᑐᓂᑦ, ᐳᓚᕋᖅᑐᓕᕆᓂᖅ, ᐃᖃᓗᒐᓱᐊᕐᓂᖅ, ᐱᕈᖅᑐᓂᐅᓐᖏᑦᑐᖅ ᓄᓇᒥᓐᖔᖅᑐᓂᒃ ᕿᒥᕐᕈᓂᖏᓐᓂ. “ᐅᑭᐅᖅᑕᖅᑐᖅ ᓯᓚᕐᔪᐊᓕᒫᒥ ᐊᑦᑕᕐᕕᐅᑐᐃᓐᓇᕆᐊᖃᓐᖏᒃᑲᓗᐊᕐᖓᑦ ᑭᒃᑯᑐᐃᓐᓇᕐᓄᑦ”, ᐅᖃᖅᑐᓂ ᑰᐱᒃ ᑲᓚᐃᔅᑦ.
