Press Releases

Documenting our Progress

ᐊᐃᓯᓯᒃᑯᑦ ᑐᓴᒐᒃᓴᓕᐊᖏᑦ

ᓄᓇᕐᔪᐊᕐᒥ ᐅᑭᐅᖅᑕᖅᑑᑉ ᐃᓄᐃᑦ ᑲᑎᒪᔨᖏᑦ 14-ᒋᔭᖓᓐᓂᒃ ᑕᒪᐃᓐᓂᒃ ᑲᑎᒪᕐᔪᐊᖅᑐᑦ

ᓄᑖᖅ ᓂᕈᐊᖅᑕᐅᕋᑖᖅ ᐃᒃᓯᕙᐅᑕᖓᑦ: ᓯᐊᔭ ᐆᓪᓯᕕᒡ

2022-ᒥ-ᒥ ᑐᓴᒐᒃᓴᐃᑦ ᓇᓗᓇᐃᔭᐅᑎᖏᑦ ᐊᖏᕈᑕᐅᔪᑦ

ᔪᓚᐃ 21, 2022 – ᖃᕆᑕᐅᔭᒃᑯᑦ ᑕᕐᕆᔭᐅᑎᒃᑯᑦ ᑲᑎᒪᓗᑎᒃ – ᐃᓄᐃᑦ ᑲᑎᒪᔨᖏᑦ ᐊᓛᔅᑲᒥᒃ (ᐊᒥᐊᓕᑲᒥᒃ), ᑲᓚᖡᑦ ᓄᓈᓂᒃ, ᑲᓇᑕᒥᒃ, ᐊᒻᒪᓗ ᑦᓱᑳᑦᑲᒥᒃ (ᕌᓯᐊᒥᒃ) ᑲᑎᒪᔭᕇᖅᐳᑦ ᑲᔪᓯᑦᑎᐊᓚᐅᖅᑐᓂᒃ 14-ᒋᔭᖓᓂᒃ ᐃᓄᐃᑦ ᓄᓇᕐᔪᐊᑉ ᐅᑭᐅᖅᑕᖅᑐᖅᐸᓯᐅᑉ ᑲᑎᒪᔨᖏᑦ (ᐊᐃᓯᓰᒃᑯᑦ) ᑲᑎᒪᕐᔪᐊᕐᓂᖏᓐᓂ ᐅᓪᓗᒥ. ᑲᑎᒪᓗᑎᒃ ᐃᓱᒪᒋᔭᐅᑎᑕᖅ ᑕᐃᔭᐅᓚᐅᖅᑐᖅ “ᐃᓄᐃᑦ ᓴᓐᖏᓂᖏᑦ ᐊᒻᒪᓗ ᓴᐃᒪᓂᖃᕐᓂᖏᑦ” ᓂᕈᐊᖅᑕᐅᓚᐅᖅᑐᖅ ᐃᓄᐃᑦ ᓴᖏᓂᖃᕐᓂᖏᓐᓄᑦ ᓄᓇᕐᔪᐊᒥ ᓱᓕ ᓄᕙᖕᓇᕐᔪᐊᖃᖅᑐᐊᓘᑎᓪᓗᒍ. ᑲᑎᒪᕐᔪᐊᕐᓂᕐᒥ ᐃᑲᔪᖅᓱᐃᔨᒋᔭᐅᓚᐅᖅᑐᖅ ᑲᓛᖡᑦ ᓄᓇᖓᓂᒃ ᓯᕗᓕᐅᖅᑎᖓᑦ ᒨᑦᑎ ᐴᓪ ᐄᒍ.

ᐃᒃᓯᕙᐅᑕᐅᓂᕐᒥᒃ ᐱᔭᕇᖅᑐᖅ ᑏᓕ ᓵᒻᐴ ᑐᐊᕉ ᐅᖃᓚᐅᖅᑐᖅ ᐃᒫᒃ, “ᐃᓱᒪᓘᑕᐅᓂᖏᑦ ᒫᓐᓇᐅᔪᖅ ᓄᓇᕐᔪᐊᕐᒥ ᖃᓄᐃᓕᐅᕈᑕᐅᕙᓕᐊᔪᑦ ᐱᕙᓪᓕᐊᑐᐃᓐᓇᖅᑐᒥᒃ ᐊᒃᑐᐃᕙᓪᓕᐊᖕᒪᑕ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖓᓂ, ᑕᒪᓐᓇ ᐱᔾᔪᑎᒋᓪᓗᒋᑦ ᓂᕈᐊᓕᓚᐅᖅᑐᒍᑦ ᑐᓴᐅᒪᔭᐅᖁᔨᓂᖅ ᐃᓄᖁᑦᑎᑦᑕ ᓴᖏᓂᕆᔭᖏᑦ ᑕᐃᒪᖓᓪᓗ ᑐᕌᒐᖃᓲᖑᓂᑦᑎᓐᓂᒃ ᐅᔾᔨᖅᑐᑦᑎᐊᕐᓂᖅ ᐱᑦᑎᐊᔪᓴᐃᓐᓇᕐᓂᒃᑯᑦ ᐊᒻᒪᓗ ᐊᑭᕋᕇᒍᑕᐅᑦᑕᐃᓕᒪᔪᓂᒃ ᓴᐃᒪᓂᒃᑯᑦ ᐊᑐᖅᑕᐅᖃᑦᑕᖁᔨᓂᖅ, ᑕᐃᒪᖓᑦ ᓄᓇᖁᑎᒋᔭᑦᑎᓐᓂᒃ ᐃᓱᖃᖏᑦᑐᒧᑦ.”

ᑲᑎᒪᕐᔪᐊᕐᓂᖏᓐᓂ ᐱᓕᕆᓚᐅᖅᑐᑦ ᐅᓂᒃᑳᓕᐊᕆᔭᐅᔪᓂᒃ ᐱᓕᕆᐊᕆᔭᐅᓯᒪᔪᓂᒃ ᐊᒻᒪᓗ ᐊᖏᕈᑕᐅᓪᓗᑎᒃ 2022-ᒥ ᑐᓴᒐᒃᓴᐃᑦ ᓇᓗᓇᐃᔭᐅᑎᓕᐊᕆᔭᐅᓚᐅᖅᑐᑦ. ᑲᑎᒪᓂᖏᓐᓂ ᐱᖓᓱᓂᒃ ᐅᓪᓗᓂᒃ, 66 ᐃᓄᐃᑦ ᑲᑎᒪᔭᖅᑐᖅᓯᒪᔪᑦ ᐅᓂᒃᑳᕐᕕᐅᓚᐅᖅᑐᑦ ᒪᑯᓂᖓ: ᓯᕗᓂᒃᓴᒥᒃ ᓄᓇᕐᔪᐊᕐᒥ ᐃᓚᒌᓕᕐᕕᒃᓴᓂᒃ: ᓄᓇᕐᔪᐊᕐᒥ ᓄᓇᓕᑐᖃᐃᑦ ᐃᓄᖁᑎᖏᑦ ᐱᔪᓐᓇᐅᑎᖃᕐᓂᖏᑦ ᐊᒻᒪᓗ ᓄᓇᕐᔪᐊᕐᒥ ᐃᓚᒌᓕᕐᕕᒃᓴᖏᑦ; ᓂᕿᒃᓴᖃᑦᑎᐊᕈᓐᓇᕆᐊᖃᕐᓂᖅ, ᐃᓚᒌᒃᑐᑦ ᒪᒃᑯᒃᑐᓪᓗ; ᐋᓐᓂᐊᖃᖏᑦᑐᓕᕆᓂᖅ ᐊᒻᒪᓗ ᖃᓄᐃᖏᓐᓂᖅ; ᐃᓕᓐᓂᐊᖅᑐᓕᕆᓂᖅ ᐊᒻᒪᓗ ᐅᖃᐅᓯᓕᕆᓂᖅ; ᐊᒻᒪᓗ ᓄᓇᓕᑐᖃᐃᑦ ᖃᐅᔨᒪᓂᖏᑦ.

ᐃᒃᓯᕙᐅᑕᐅᓂᖅ ᓄᓇᕐᔪᐊᕐᒥ ᑲᑐᔾᔨᖃᑎᒌᖏᓐᓂᒃ ᑐᓂᔭᐅᓚᐅᖅᑐᖅ ᑲᓛᖡᑦ ᓄᓈᖓᓄᑦ ᓯᑕᒪᓄᑦ ᐊᕐᕌᒍᓄᑦ. ᓯᐊᔭ ᐆᓪᓯᕕᒡ ᑕᒪᐃᓐᓄᑦ ᓂᕈᐊᖅᑕᐅᓚᐅᖅᑐᖅ ᐃᒃᓯᕙᐅᑕᐅᓂᕐᒧᑦ, ᐃᓇᖐᓪᓗᓂ ᐊᓛᔅᑲᒥᒃ ᐃᒃᓯᕙᐅᑖᓂᒃ, ᒪᓕᒐᓕᕆᔨᒥᒃ ᑕᐃᓕ ᓵᒻᐴ ᑐᐊᕈ.

“ᐃᓄᐃᑦ ᓄᓇᕐᔪᐊᑉ ᐅᑭᐅᖅᑕᖅᑐᖅᐸᓯᖓᓂᒃ ᑲᑎᒪᔨᖏᑦ ᐱᔪᓐᓇᐅᑎᖃᖅᐸᒌᓚᐅᖅᑐᑦ ᐱᒋᐊᓕᓵᖅᑎᓪᓗᒋᑦ – ᑕᐃᒪᖓᓂᒃ ᓯᕗᓪᓕᒥ ᑲᑎᒪᔭᕆᐅᕋᒥᒃ 1977-ᖑᑎᓪᓗᒍ – ᑐᑭᓯᓇᖅᑐᓂᒃ ᐱᓇᓱᐊᕈᑎᖃᖅᓯᒪᔪᑦ ᑕᐱᕇᒎᒪᓂᖅ ᓄᓇᖁᑎᑦᑎᓐᓂᒃ ᐊᑭᕋᖅᑑᑎᖃᕐᕕᐅᖏᑦᑐᒥᒃ ᐊᑐᕐᓗᑎᒃ ᓴᐃᒪᓂᒃᑯᑦ, ᓄᓇᓕᒡᔪᐊᖁᑎᑦᑎᓂ ᐱᓕᕆᖃᑎᖃᕈᒪᓗᑕ ᐱᕙᓪᓕᐊᑎᑦᑎᓂᕐᒥᒃ ᐃᓱᒪᖅᓲᑕᐅᔪᓐᓇᖅᑐᓂᒃ ᐊᐅᓚᑦᑎᔨᐅᖃᑕᐅᔪᓐᓇᕐᓂᒃᑯᑦ ᐱᐅᓯᕆᔭᐅᕙᒃᑐᓂᒃ ᐊᑐᕈᒪᓗᑕ ᐊᒻᒪᓗ ᐃᓚᒌᒎᓐᓇᕐᓂᒃᑯᑦ ᓴᕿᑎᑦᑎᔪᓇᕐᓂᖅ ᐱᐅᓯᒋᐊᕈᑕᐅᔪᓐᓇᖅᑐᓂᒃ, ᐊᔪᕐᓇᕈᓐᓃᕈᓐᓇᖅᑐᓂᒃ ᐃᓄᖁᑎᑦᑎᓐᓄᑦ – ᐋᕿᐅᒪᔭᐅᖁᓪᓗᒋᑦ ᐊᒻᒪᓗ ᐱᕙᓪᓕᐊᑎᑕᐅᖁᓪᓗᒋᑦ ᑕᐱᕇᒎᓐᓇᕐᓂᕗᑦ,” ᐅᖃᓚᐅᖅᑐᖅ ᓂᕈᐊᖅᑕᐅᕋᑖᖅᑐᖅ ᐃᒃᓯᕙᐅᑕᖓᑦ ᓯᐊᔭ ᐆᓪᓯᕕᒡ. “ᖃᐅᔨᒪᒐᑦᑕ ᐅᑭᐅᖅᑕᖅᑐᒥ – ᐊᖏᕐᕋᕆᓪᓗᑎᒍᑦ – ᐃᓄᐃᑦ ᓄᓈᑦ ᐃᓂᒋᔭᐅᓂᖅ ᐱᓕᕆᖃᑎᒌᒌᐊᖃᕐᓂᕐᒧᑦ, ᐅᖃᖃᑎᒌᒎᓐᓇᕐᓂᒃᑯᑦ ᐊᒻᒪᓗ ᐱᔭᕇᖃᑎᒌᑦᑎᐊᕋᓱᐊᕐᓂᕐᒧᑦ ᑐᕌᖓᔪᓂᒃ ᖃᓄᖅᑑᕈᑎᒃᓴᓄᑦ. ᑕᐃᒫᒃ ᑕᒡᕙ ᑲᑐᔾᔨᖃᑎᒌᒃᐳᑦ – ᐃᓄᐃᑦ ᓄᓇᕐᔪᐊᑉ ᐅᑭᐅᖅᑕᖅᑐᖅᐸᓯᖓᓂᒃ ᑲᑎᒪᔨᖏᑦ – ᓴᕿᑎᑕᐅᓚᐅᖅᐳᑦ ᑕᐃᒪᐃᓕᖓᔪᒥᒡᓗ ᐱᓕᕆᓐᓇᕐᓂᐊᖅᓱᑎᒃ.”

ᑲᑎᒪᕐᔪᐊᕐᓂᖓᑦ ᐃᓱᓕᒻᒪᑦ, ᐊᐃᓯᓰᒃᑯᑦ ᐊᐅᓚᑦᑎᔩᑦ ᑲᑎᒪᔨᖏᑦ ᑲᑎᒪᓚᐅᖅᑐᑦ ᐃᓚᓕᐅᑎᓪᓗᑎᒃ ᓂᕈᐊᖅᑕᐅᕋᑖᖅᑐᑦ ᓄᓇᓕᒡᔪᐊᖏᓐᓂᒃ ᐊᒻᒪᓗ ᑕᒪᐃᓐᓄᑦ ᐃᒃᓯᕙᐅᑕᕆᔭᐅᓕᖅᑐᖅ. ᐊᐅᓚᑦᑎᔩᑦ ᑲᑎᒪᔨᖏᑦ ᐅᑯᓂᖓ ᐃᓚᖃᓕᖅᐳᑦ:

ᐃᒃᓯᕙᐅᑕᖅ: ᓯᐊᔭ ᐆᓪᓯᕕᒡ (ᑲᓚᓖᑦ ᓄᓈᑦ)

ᐊᓛᔅᑲ: ᐃᒃᓯᕙᐅᑕᐅᑉ ᑐᒡᓕᐊ: ᒧᕇ ᒍᕇᓐ; ᑲᑎᒪᔨᐅᖃᑕᖅ: ᓂᑰᓪ ᑲᓇᔪᕋᖅ ᐅᔾᔨᑦᓴᐅᔅᑭ

ᑲᓇᑕᒥ: ᐃᒃᓯᕙᐅᑕᐅᑉ ᑐᒡᓕᐊ: ᓖᓴ ᖁᐱᕐᕈᐊᓗᒃ; ᑲᑎᒪᔨᐅᖃᑕᖅ: ᕼᐄᑉ ᓇᑭᒪᔭᒃ

ᑦᓱᑲᑦᑲ: ᐃᒃᓯᕙᐅᑕᐅᑉ ᑐᒡᓕᐊ: ᐊᐃᕇᓇ ᒥᓯᓇ; ᑲᑎᒪᔨᐅᖃᑕᖅ: ᓯᓇᐃᑕ ᑦᓯᕐᓄᓲᕙ

ᑲᓚᓖᑦ ᓄᓈᑦ: ᐃᒃᓯᕙᐅᑕᐅᑉ ᑐᒡᓕᐊ: ᑯᐱᒃ V. ᒃᓚᐃᔅᑦ; ᑲᑎᒪᔨᐅᖃᑕᖅ: ᓄᑲ ᒃᓖᒪᓐ

ᑕᒡᕙᓂ ᑲᑎᒪᓂᖏᑦ 14-ᒋᔭᒥᒃ ᖃᕆᑕᐅᔭᒃᑯᑦ ᑕᕐᕆᔭᐅᑎᒃᑯᑦ ᑲᑎᒪᓚᐅᖅᑐᑦ ᐱᔾᔪᑕᐅᓗᓂ ᓄᕙᖕᓇᕐᔪᐊᖅ ᐊᖏᖃᑎᒌᓚᐅᕐᒪᑕ ᑲᑎᒪᔪᒫᕐᓂᖅ ᔪᓚᐃ 2023-ᒥ ᑕᐅᕙᓂ ᑎᑭᓯᒪᓗᑎᒃ ᐃᓗᓕᔅᓴᑦ, ᑲᓛᖡᑦ ᓄᓈᓂ. ᑭᖑᓂᐊᒍᑦ 15-ᒋᔭᖓᓂ ᐊᐃᓯᓰᒃᑯᑦ ᑕᒪᐃᓐᓂᒃ ᑲᑎᒪᕐᔪᐊᕐᕕᒃᓴᖃᖅᑐᑦ ᑕᒫᓂ ᑲᓇᑕᒥ 2026-ᒥ.

-30-

ᐅᖃᕐᕕᒃᓴᐃᑦ:

ᐊᐃᓖᓐ ᐋᑕᒻᔅ Eilene Adams ᑰᐱᒃ V. ᒃᓚᐃᔅᑦ Kupik V. Kleist ᒥᐊᓚᑎ ᓚᕙᓕ Melodie Lavallée

ᐊᐃᓯᓰ (ᐊᓛᔅᑲ) ᐊᐃᓯᓰ (ᑲᓚᖡᑦ ᓄᓈᑦ) ᐊᐃᓯᓰ (ᑲᓇᑕ)

eilene@iccalaska.org kvk@ggnuuk.gl Mlavallee@inuitcircumpolar.com

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.