Press Releases

Documenting our Progress

ᐱᕙᓪᓕᐊᓂᖃᑦᓯᒪᓂᑭᑦᑐᖅ ᓯᓚᒥ ᓴᕕᒃᓴᖃᕐᓂᖅ ᐱᓪᓗᒍ ᓯᑕᒪᖓᓂ ᑲᑐᔾᔨᖃᑎᒌᑦ ᓄᓇᕐᔪᐊᒥᐅᖃᑎᒌᑦ ᐋᔩᖃᑎᒌᖕᓂᖏᓐᓂ

ᔪᓚᐃ 10, 2012 – ᐳᓐᑕ ᑎᓪ ᐃᐊᔅᑎ, ᔪᕈᒍᐊᐃ / ᐋᑐᐋ, ᑲᓇᑕ – ᑲᑐᔾᔨᖃᑎᒌᑦ ᓄᓇᕐᔪᐊᒥᐅᖃᑎᒌᑦ ᐊᕙᑎᓕᕆᓂᕐᒧᑦ ᐱᓕᐊᖅᓴᖅ ᓯᑕᒪᖓᑦ ᒐᕙᒪᐅᖃᑎᒌᓂ ᐋᔩᖃᑎᒌᖕᓂᕐᒧᑦ ᑲᑎᒪᔨᕋᓛᓂ ᑲᑎᒪᔪᒥᓃᑦ ᐱᒋᐊᖅᓱᑎᒃ ᔫᓂ 27−ᖑᑎᓪᓗᒍ ᑎᑭᑦᓱᒍ ᔪᓚᐃ 2 ᐳᓐᑕ ᑎᓪ ᐃᐊᔅᑎ, ᔪᕈᒍᐊᐃᒥ. ᑐᕚᕆᔭᒥᓂᖅ ᐋᔩᖃᑎᒌᓐᓂᐅᔪᑦ. ᑐᕚᕆᓪᓗᒍ ᐋᔩᖃᑎᒌᖕᓂᕐᓂ ᒪᓕᒐᑎᒍᑦ ᑎᓕᔭᐅᔾᔪᑕᐅᓗᓂ, ᓄᓇᕐᔪᐊᒥ ᓄᓇᖃᖅᑳᖅᓯᒪᔪᓄᑦ ᓴᕕᒃᓴᖃᕐᓂᕐᒧᑦ ᐊᑐᐃᓐᓇᐅᓂᖅ ᐊᑐᓕᖅᑎᑕᐅᖁᓪᓗᒍ ᐋᒃᑑᕝᕙ 2013.

ᐋᔩᖃᑎᒌᖕᓂᖅᑕᖃᖃᑦᑕᕆᐊᖃᖅᐳᖅ ᐃᓄᐃᑦ ᐱᓪᓗᒋᑦ ᐱᔾᔪᑎᒋᓪᓗᒍ ᐃᓚᖏᑦ ᐅᑭᐅᖅᑕᖅᑐᒥ ᓱᕈᕐᓇᖅᑐᖃᐅᖅᑐᑦ ᐊᒥᓱᙳᐸᓪᓕᐊᑐᐃᓐᓇᕐᒪᑕ ᐊᑦᑐᐃᓂᕐᓗᒍᓐᓇᖅᑐᑦ ᐃᓗᓯᖏᓐᓂᑦ ᐆᒪᔪᑦ ᐃᓄᐃᓪᓗ. ᑕᒪᓐᓇ ᓇᓗᓇᐃᖅᑕᐅᓯᒪᒻᒪᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᑦ ᐅᖃᐅᔾᔨᒋᐊᖅᑎᖏᓐᓄᑦ ᐊᕐᓇᐃᑦ ᕿᑐᕐᖏᐅᖅᑐᑦ ᐃᓱᒫᓘᑕᐅᓯᒪᓕᕐᓂᖏᓐᓂᒃ ᒪᕐᕉᓐᓄᑦ ᑲᓇᑕᒥ ᐊᕕᑦᑐᖅᑕᐃᓯᒪᔪᑦ ᒐᕙᒪᖏᓐᓄᑦ ᑕᒪᓐᓇ ᓴᕕᒃᓴᖅ; ᓇᑦᐅᑉ ᑎᖑᖓᓂ, ᐊᒻᒪᓗ ᕿᓚᓗᒐᐅᑉ ᓂᕿᖓᓂ.

ᑕᒪᓐᓇ ᓴᕕᒃᓴᖅ ᓄᓇᒥᐅᑕᑦᓴᔭᐅᒐᓗᐊᖅᑎᓪᓗᒍ, ᖃᐅᔨᓴᕐᓂᒃᑯᑦ ᐅᖃᐅᓯᐅᓯᒪᔪᖅ 90−ᐳᓴᒦᒃ ᓴᕕᒃᓴᖃᕐᓂᖓ ᐅᑭᐅᖅᑕᖅᑐᒥ ᐅᓪᓗᒥ ᐃᓄᖕᓄᑦ ᐱᓗᖅᑯᓯᖅᑕᐅᓯᒪᓪᓗᓂ. ᒫᓐᓇᐅᔪᖅ, ᐊᖏᓂᖅᐹᒥᒃ ᓴᕕᒃᓴᔭ ᐳᔪᕐᓗᒻᒦᙶᖅᐸᑦᑐᑦ ᐊᐅᒫᓗᖅᑐᑦᑐᓂ−ᐆᒻᒪᖅᑯᑎᓕᐅᕈᑎᓃᖔᖅᑐᒥᒃ ᓱᑲᑦᑐᒥᒃ ᑮᓇᐅᔭᓕᐅᕈᑕᐅᓕᖅᐸᓪᓕᐊᔪᓄᑦ, ᐱᓗᐊᖅᑐᒥ ᐊᐃᓴᒥ. ᑕᒪᒃᑯᐊ ᐳᔪᕐᓗᒦᖔᖅᐸᑦᑐᑦ ᓯᕕᑐᔪᒧᑦ−ᐃᖏᕐᕋᕙᖕᒪᑕ ᐃᓂᑖᖅᐸᑦᓱᑎᓪᓗ ᐅᖓᓯᑦᑐᓂ−ᓄᓇᓂ ᓲᕐᓗ ᐅᑭᐅᖅᑕᖅᑐᒥ, ᓄᓇᕐᔪᐊᒥ ᓄᓇᖃᖅᑳᖅᓯᒪᔪᓄᑦ ᐊᐅᓚᑦᓯᓂᐊᖅᑐᓂᒃ ᑭᖒᒪᔭᐅᔪᖃᖅᑐᖅ ᐊᐅᓚᑕᐅᑦᓯᐊᓂᐊᕐᒪᑦ ᑕᒪᓐᓇ ᐃᖏᕐᕋᔫᒃᑯᑦ−ᐃᖄᕆᐊᖃᙱᑎᑕᐅᓂᖅ.

ᑭᓯᐊᓂᓕ, ᖃᐅᔨᓴᐅᑎᐅᕋᑖᒥᓂᖅ ᐊᑐᖅᓱᑎᒃ ᖃᕆᑕᐅᔭᑎᒍᑦ ᖃᐅᔨᓴᕐᓂᕐᓂ ᖃᐅᔨᔭᐅᓯᒪᔪᓂ ᐅᑭᐅᖅᑕᖅᑐᒥ ᑰᑦᑐᓂ ᐱᔾᔪᑕᐅᓂᖅᐸᐅᓂᖏᓐᓂᒃ ᓴᕕᒃᓴᖃᐅᓕᕐᓂᖏᓐᓄᑦ ᐅᑭᐅᖅᑕᖅᑐᒥ ᑕᕆᐅᕐᒧᐊᖃᖅᑐᑦ ᐊᑯᓂᐅᓕᖅᑐᒥᒃ ᑕᒪᓐᓇ ᖄᖏᓐᓈᕆᔭᐅᓯᒪᓕᕐᒪᑦ. ᓱᑲᑦᑐᒥᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᑕ ᖃᐅᔨᔭᐅᓂᖓ ᐅᑭᐅᖅᑕᖅᑐᒥ ᓱᓕᒃᑲᓐᓂᖅ ᐃᓚᓕᐅᑎᑎᑦᓯᒻᒪᑦ ᓇᒧᖔᔭᕐᓂᖓᓂᒃ ᓴᕕᒃᓴᐅᑉ ᓄᓇᒥ, ᓲᕐᓗ ᐊᐅᔪᐃᑦᑐᑦ ᐊᐅᑉᐸᓪᓕᐊᓂᖏᓐᓄᑦ ᐊᒻᒪᓗ ᐊᐅᔭᑦᑐᑦ ᐅᑭᐅᖅᑕᖅᑐᑦ ᐃᑯᐊᓚᕙᓕᕐᒪᑕ ᓄᓇᑐᓂᖏᑦ.

ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC) ᑭᒡᒐᑐᖅᑕᒥᓃᑦ ᓴᕕᒃᓴᖅ ᐋᔩᖃᑎᒌᒍᑕᐅᑎᓪᓗᒍ ᐄᕙ ᑯᕆᐊᒻᒧᓪᒧᑦ ᐅᑯᓇᖔᖅᓱᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᓇᑕᒥ ᐅᖃᐅᔾᔨᒋᐊᖅᑎᐅᓪᓗᓂ ᑲᓇᑕᒥ ᑲᑎᒪᔭᖅᑐᖅᓯᒪᔪᓄᑦ, ᐊᒻᒪᓗ ᐸᕐᓄᓇ ᐃᒋᑎ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᑎᒪᔨᐅᖃᑎ ᑲᓛᖡᑦ ᓄᓈᓂ ᐅᐸᒃᓯᒪᔪᒥᓂᖅ ᑖᓐᓇᑑᓪᓗᓂ ᖃᐅᔨᓴᖅᑎᐅᓪᓗᓂ.

ᐱᖃᑕᐅᕕᖃᕐᓂᖅ ᐅᖃᐅᓯᐅᑎᓪᓗᒍ ᑲᑎᒪᓂᕐᒥ ᐊᑕᖏᖅᑐᒥᒃ, ᐸᕐᓄᓇ ᐃᒋᑎ ᐅᖃᖅᑐᒥᓂᖅ: “ᐊᓂᖅᑎᕆᑐᐃᓐᓇᙱᓚᒍᑦ ᓱᕈᕐᓇᖅᑐᓂᒃ ᓱᕈᕐᓇᖅᑐᓃᖔᖅᑐᓂᒃ, ᓴᕕᒃᓴᖅ ᐃᓚᒋᔭᐅᓪᓗᓂ, ᓴᕕᒃᓴᖃᕐᓂᖅ ᓯᓚᑖᓃᖔᖅᐸᓐᓂᖅᓴᖅ ᐅᑭᐅᖅᑕᖅᑑᑉ. ᐊᒃᑐᖅᑕᐅᓂᖅᓴᐅᒻᒥᔪᒍᑦ ᓯᓚᐅᑉ ᐊᓯᔾᔨᕐᓂᖓᓄᑦ, ᓂᓪᓚᓱᓐᓃᑦ ᒪᕐᕈᐊᖅᑎᓗᐊᖅᑐᒥᒃ ᐅᖅᑰᓯᕙᓪᓕᐊᓂᖃᕐᒪ ᐊᓯᖏᑦ ᑕᐃᒪᐃᒻᒪᑕ ᓄᓇᕐᔪᐊᒥ. […] ᑕᒪᓐᓇ ᑲᑎᓐᓂᖓ ᓱᕈᕐᓇᖅᑐᑦ ᐊᒻᒪᓗ ᓯᓚᐅᑉ ᐊᓯᔾᔨᕐᓂᖓ ᐅᑭᐅᖅᑕᖅᑐᒥ ᒪᕐᕈᐊᑎᖅᑐᒥᒃ ᓱᕈᕈᑎᖃᕐᓂᖅ, ᐱᓂᐊᕐᓂᑎᓐᓅᖏᑦᑐᖅ. ᑕᐃᒪᐃᒻᒪᑦ ᓵᑉᐸᑦᑐᒍᑦ ᓄᓇᕐᔪᐊᒥ ᓄᓇᓕᖕᓄᑦ, ᐃᑲᔪᖅᑕᐅᒍᒪᓪᓗᑕ ᐃᓕᓐᓄᑦ ᓴᖅᑭᑎᑦᓯᓂᐊᕋᑦᑕ ᓴᙱᓂᖅᓴᒥᒃ ᐊᑐᕋᑦᓴᒥᒃ ᓴᕕᒃᓴᖅ ᐱᓪᓗᒍ, ᐱᓗᐊᖅᑐᒥ ᐃᑉᐱᒋᑦᓯᐊᕐᓗᒍ ᓯᓚᒧᑦ ᐊᐅᓚᑕᐅᔪᑦ ᐳᔪᐃᑦ ᐊᒻᒪᓗ ᓯᐊᒻᒪᐸᓐᓂᖏᑦ.”

ᐱᕙᓪᓕᐊᓂᖃᖅᓯᒪᒐᓗᐊᖅᑎᓪᓗᒍ ᐋᔩᖃᑎᒌᒎᑕᐅᖃᑦᑕᖅᓯᒪᔪᓄᑦ, ᑲᑎᒪᔭᖅᑐᖅᓯᒪᔪᑦ ᐊᐃᕙᒍᑎᓕᒥᓃᑦ ᓇᓪᓕᐊᒃ ᐃᓱᒫᓗᓐᓇᓂᖅᐸᐅᒻᒪᖔᖅ ᖃᓄᕐᓗ ᑲᒪᒋᔭᐅᔭᕆᐊᖃᕐᒪᖔᑕ – ᑲᑎᑦᓱᒋᑦ ᑖᒃᑯᓴᐃᓐᓇᐃᑦ ᐅᖃᖃᑎᒌᒎᑕᐅᖃᑦᑕᖅᓯᒪᔪᑦ ᐃᓚᖏᓐᓂ ᓯᕗᓪᓕᐅᑎᑕᐅᓪᓗᑎᒃ. ᐃᓚᖏᑦ ᓄᓇᓕᕐᔪᐊᑦ ᐃᑉᐱᒋᔭᓕᒥᓃᑦ ᓯᓚᒃᑯᑦ ᑎᑦᑕᐅᕙᑦᑐᑦ ᐱᓇᐃᓗᑕᐅᓂᖅᐸᐅᒋᐊᖏᓐᓂᒃ ᓄᓇᕐᔪᐊᒥ ᐊᑲᐅᖏᓪᓕᐅᕈᑕᐅᒻᒪᑕ ᓯᓚᒃᑯᑦ ᐅᓯᑲᑕᓐᓂᐊᕐᓗᓂ, ᐊᒻᒪᓗ ᐅᖃᐅᓯᐅᓪᓗᐊᕈᓐᓇᕋᓂ ᓄᓇᕐᔪᐊᒥ ᐱᓕᕆᐊᖑᓂᐊᕐᓗᓂ. ᐊᓯᖏᑦ ᓄᓇᓕᕐᔪᐊᑦ ᐅᖃᖃᑦᑕᖅᓯᒪᔪᑦ ᓯᐊᒻᒪᖃᑦᑕᕐᓃᑦ ᐃᒪᕐᒧᑦ ᓄᓇᒧᓪᓗ ᑲᒪᒋᔭᐅᒋᐊᖃᓪᓚᕆᓐᓂᖓᓂᒃ, ᐊᒻᒪᓗ ᐊᔾᔨᒋᔭᐅᑎᑕᐅᓗᓂ ᑲᒪᒋᔭᐅᒋᐊᖃᕐᓂᖓ. ᑲᓇᑕ ᐅᖃᖅᓯᒪᔪᖅ ᑲᑎᒪᓂᕐᓂᓐᓂ ᐱᒻᒪᕆᐅᓂᖓᓂᒃ ᓴᕕᒃᓴᐅᑉ ᓯᐊᒻᒪᖃᑦᑕᕐᓂᖓ ᓯᓚᒧᑦ, ᖃᓄᕐᓗ ᐊᑦᑐᐃᓂᖃᕐᒪᖔᖅ ᓄᓇᖃᖅᑳᖅᓯᒪᔪᓂᒃ.

ᓄᓇᓕᕐᔪᐊᑦ ᐊᖏᖃᑎᒌᑦᓯᒪᓕᕋᓗᐊᖅᑎᓪᓗᒋᑦ ᑕᒪᓐᓇ ᐱᓪᓗᒍ ᐃᓅᑉ ᑎᒥᖓᑕ ᐃᓗᓯᖓ ᐱᒻᒪᕆᐅᓂᖓᓂᒃ, ᑲᑎᒪᔭᖅᑐᖅᓯᒪᔪᑦ ᐊᖏᖃᑎᒌᒍᑎᖃᕈᓐᓇᓂᙱᑦᑐᑦ ᖃᓄᖅ ᐃᓅᑉ ᑎᒥᖓᑕ ᐃᓗᓯᖓ ᑲᒪᒋᔭᐅᒍᓐᓇᕐᒪᖔᖅ ᓄᓇᖃᖅᑳᖅᓯᒪᔪᓂ. ᐊᒥᓲᓂᖅᓴᐃᑦ ᓄᓇᓕᕐᔪᐊᒥᐅᑕᐃᑦ ᑕᑯᒍᒪᒐᓗᐊᖅᑎᓪᓗᒋᑦ ᐃᒻᒥᑰᖅᑐᒥᒃ ᑎᑎᕋᖅᓯᒪᔪᒥᒃ ᑎᒥᐅᑉ ᐃᓗᓯᖓᑕ ᒥᒃᓵᓅᖓᔪᒥᒃ, ᐊᒥᓱᑦ ᓄᓇᓕᕐᔪᐊᕈᖅᓯᒪᔪᑦ ᑕᒪᓐᓇ ᐅᖃᐅᓯᐅᓯᒪᒍᓐᓇᕆᐊᖓᓂᒃ ᓄᓇᖃᖅᑳᖅᓯᒪᔪᓅᖓᔪᒥ ᑎᑎᕋᖅᓯᒪᔪᒥ, ᑎᑎᕋᖅᑕᐅᓯᒪᕕᒋᒍᓐᓇᖅᑕᖏᓐᓂ.

“ᑲᔪᖏᕐᓇᖅᐳᖅ ᖃᐅᔨᓗᓂ ᑲᓇᑕᐅᑉ ᓯᕗᓪᓕᐅᑎᑕᖏᓐᓂᒃ ᐱᒻᒪᕆᐅᔪᓂᒃ ᐊᖏᖃᑎᒌᒍᑎᒥᒃ ᓄᓇᖃᖅᑳᖅᓯᒪᔪᓄᑦ ᐅᑭᐅᖅᑕᖅᑐᒥ.”, ᐅᖃᖅᑐᒥᓂᖅ ᑐᐊᐃᓐ ᓯᒥᔅ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᓇᑕᒥ ᐊᖓᔪᖅᑳᖓ. “ᓂᕆᐅᑦᑐᖓ ᓄᓇᓕᕐᔪᐊᓕᒫᑦ ᐊᑦᓱᕈᐊᖃᒃᑲᓐᓂᕐᓂᐊᕐᒪᑕ ᑲᑎᒪᐅᑎᒥᓐᓂᒃ ᐱᓕᕆᐊᖃᕐᓗᑎᒃ ᑐᕌᒐᖃᕐᓗᑎᒃ ᐊᑑᑎᖃᑦᓯᐊᖅᑐᒥᒃ ᐊᖏᖃᑎᒌᒍᑎᒥᒃ ᑭᖑᓪᓕᖅᐹᒥ ᑲᑎᒪᓕᕈᑎᒃ. ᐱᕕᒃᓴᑭᒻᒪᑦ ᖃᐅᔨᒪᒋᐊᑦᓯᐊᕐᓗᒋᑦ ᑕᒪᒃᑯᐊ ᐋᔩᖃᑎᒌᒍᑏᑦ ᑲᔪᓯᑎᑕᐅᑦᓯᐊᖃᑦᑕᕋᓗᐊᕐᒪᖔᑕ, ᐊᒻᒪᓗ ᑕᐃᒃᑯᐊ ᐃᓘᓐᓇᑎᒃ ᐃᓱᒫᓘᑕᐅᔪᑦ ᐅᖃᐅᓯᐅᔭᕆᐊᖃᕐᒪᑕ ᑐᓴᖅᑕᐅᑦᓯᐊᕐᓗᑎᓪᓗ.”

ᑲᑎᑦᓱᒋᑦ ᑕᓪᓕᒪᑦ ᐋᔩᖃᑎᖐᓐᓂᐅᒐᔭᖅᑎᓪᓗᒋᑦ ᑲᑎᒪᔨᕋᓛᑦ ᑲᑎᒪᓕᕋᐃᑉᐸᑕ ᓂᕆᐅᒋᔭᐅᓯᒪᒻᒪᑕ, ᐊᒻᒪᓗ ᑭᖑᓪᓕᖅᐹᕆᒐᔭᖅᑕᖓ ᐱᒋᐊᕋᔭᖅᑐᖅ 14−ᒥᒃ ᑎᑭᓪᓗᒍ 19 ᔮᓐᓄᐊᕆ ᐊᕐᕌᒎᓛᖅᑐᒥ ᔨᓂᕙᒥ, ᓱᐃᑦᓱᓚᓐ.

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.