ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔩᑦ
UNFCCC COP 26 ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ ᑎᑎᕋᖅᓯᒪᔪᖅ
ᐃᓄᐃᑦ ᐊᐅᓚᑦᓯᑎᑕᐅᓕᑦ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ ᓴᐳᑎᒍᒪᓪᓗᒍ ᐅᑭᐅᖅᑕᖅᑐᖅ ᓄᓇᕐᔪᕐᓗ ᓴᐳᑎᓗᒍ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔩᑦ (ICC) ᓄᓇᖃᖅᑳᖅᓯᒪᔪᓄᑦ ᑎᒥᖁᑎᐅᔪᖅ, ᐱᒋᐊᖅᑎᑕᒥᓂᖅ 1977−ᒥ ᖃᐅᔨᔭᐅᖁᓪᓗᒋᑦ ᐅᐱᒋᓗᒍᓗ ᐊᑕᐅᓯᐅᖃᑎᒌᖕᓂᖓ 180,000-ᓃᑦᑐᑦ ᐃᓄᐃᑦ ᐊᓛᔅᑲᒥᐅᑦ, ᑲᓇᑕᒥᐅᑦ, ᑲᓛᖡᑦ ᓄᓈᓂᒥᐅᑦ, ᐊᒻᒪᓗ ᓱᑯᑦᑲᒥᐅᑦ. ICC−ᑯᑦ ᐃᖅᑲᓇᐅᔮᖃᖅᐸᑦᑐᑦ ᐃᓄᐃᑦ ᐱᔪᓐᓇᐅᑎᖃᕐᓂᖏᓐᓂᒃ ᖃᐅᔨᔭᐅᖁᓪᓗᒋᑦ, ᓴᐳᔾᔨᐅᓂᖏᑦ ᐅᑭᐅᖅᑕᖅᑐᒥ ᐊᕙᑎᒥᒃ, ᓴᐳᔾᔨᔨᐅᓪᓗᑎᓪᓗ ᐃᓅᓯᕐᒥᓐᓂᒃ ᖃᐅᔨᔭᐅᑎᕙᑦᓱᒍᓗ ᑕᒪᓐᓇ ᐃᓄᐃᑦ ᐃᓅᓯᖃᐅᓯᖓ. ᓄᓇᕐᔪᐊᓕᒫᒥ ᓂᐱᒋᔭᐅᓪᓗᑎᒃ ᐃᓄᖕᓄᑦ, ICC−ᑯᑦ ᑐᒃᓯᕋᕐᕕᓖᑦ ᑖᒃᑯᓇᖓᑦ ᓄᓇᕐᔪᐊᒥ ᓯᕗᓕᖅᑎᓂᑦ ᓄᓇᕐᔪᐊᒥ ᓄᓇᓕᐅᖃᑎᒌᑦ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ ᑲᑎᒪᓂᖃᖅᑎᓪᓗᒋᑦ ᑲᑎᒪᔨᐅᖃᑎᒌᑦ (COP26) ᒐᓛᔅᒍᒥ, ᓯᑳᑦᓚ ᓈᓚᖁᓪᓗᒋᑦ, ᐃᑲᔪᖅᑐᐃᖁᓪᓗᒋᑦ, ᐊᒻᒪᓗ ᐊᐅᓚᔾᔭᒋᐊᕈᑎᒋᓗᒋᑦ ᓯᓚᐅᑉ ᐊᓯᔾᔨᕐᓂᖓᓄᑦ ᐃᓱᒫᓘᑕᐅᔪᑦ ᓇᓗᓇᐃᖅᑕᐅᓯᒪᔪᑦ ᐃᓄᖕᓄᑦ ᐊᒻᒪᓗ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ.
ᐃᓄᐃᑦ ᕿᓄᕕᓖᑦ ᓄᓇᕐᔪᐊᒥ ᓯᕗᓕᖅᑎᓄᑦ ᑲᑎᒪᓂᖃᖅᑎᓪᓗᒋᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᑕ ᒥᒃᓵᓄᑦ UNFCCC−ᑯᑦ COP26 ᒐᓛᔅᒍᒥ, ᓯᑳᑦᓚᓐᒥ ᐅᑯᐊ:
- ᐱᒋᐊᕐᓗᑎᒃ ᐊᔪᐃᓐᓇᕐᕕᒋᓗᒍᓗ ᖃᑦᓱᕐᔫᒥᑎᓪᓗᒍ ᓄᓇᕐᔪᐊᑉ ᓂᕈᒥᑦᓯᕙᓪᓕᐊᓂᖓ.
- ᐅᒃᐱᕆᓗᒋᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓ ᐊᒻᒪᓗᓯᕗᓕᕈᓐᓇᕐᓂᖏᑦ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ ᑲᒪᒍᓐᓇᓂᒃᑯᑦ ᐃᑲᔪᖅᑐᖅᑕᐅᓗᓂᓗ ᓄᓇᖃᖅᑳᖅᓯᒪᔪᑦ ᐱᖃᑕᐅᖃᑦᑕᕐᓂᖓ ᐊᐅᓚᑦᓯᓂᒃᑯᑦ ᓯᓚᒥᒃ.
- ᐃᓕᑕᕆᒋᑦ ᐃᒪᕖᑦ ᐊᒻᒪᓗ ᐃᒪᐃᑦ ᖁᐊᖑᐃᓐᓇᖅᑐᑦ ᓂᒡᓚᓱᑦᑐᒧᑦ ᑐᐊᕕᕐᓇᖅᑐᒦᓕᕐᓂᖏᓐᓂᒃ ᓴᐳᑎᔭᐅᔭᕆᐊᓖᑦ ᓇᒻᒥᓂᖃᖃᑕᐅᓗᑎᒃ ᐱᓕᕆᖃᑕᐅᓂᒃᑯᑦ ᐃᓄᐃᑦ.
ᐃᓄᐃᑦ ᐅᓗᕆᐊᓇᖅᑐᒦᓕᕐᒪᑕ ᐊᑑᑎᓕᖅᓱᑎᓪᓗ ᐃᓅᓗᓂ ᑎᒥᖃᕐᓗᓂ ᑲᒪᒋᔭᐅᑦᓯᐊᖏᓂᑉᒥᒃ ᑎᒥᖃᕐᓗᓂ ᐱᔪᓐᓴᐅᑕᐅᑎᓪᓗᒍ ᐊᑦᑕᓇᖏᑦᑐᒥ ᖃᓄᐃᖏᓯᐊᖅᑐᒥᓪᓗ ᐊᕙᑎᖃᕆᐊᖃᕐᓂᕐᒥᒃ, ᐅᖃᖅᑐᒥᓂ ICC−ᑯᑦ ᐃᒃᓯᕙᐅᑕᖓ ᑕᓖ ᓴᒻᐳ ᑐᐊᕉ. ᐅᖓᑖᓄᑦ ᐊᕐᕌᒍᑦ 30 ᐃᓄᐃᑦ ᑕᑯᓯᒪᓕᖅᐳᑦ ᐅᑭᐅᖅᑕᖅᑑᑉ ᐊᕙᑎᖓ ᓱᕋᑦᑕᐅᑎᓪᓗᒍ ᓯᓚᐅᑉ ᐊᓯᔾᔨᕐᓂᖓᓄᑦ. ᓄᓇᓕᖁᑎᕗᑦ ᐱᖅᑯᓯᕗᓪᓗ ᐊᐅᓚᓂᖃᕈᓐᓃᕐᒪᑕ ᐊᐅᓚᓂᖃᑦᓯᐊᖅᐸᔪᒐᓗᐊᕐᒪᑕ ᐅᕝᕙᓘᓐᓃᑦ ᑲᔪᓯᓂᖃᑦᓯᐊᖅᐸᔪᒐᓗᐊᕐᒪᑕ. ᑎᒍᒥᐊᕋᑦᑕ ᖃᐅᔨᒪᓂᕐᒥᒃ ᐊᒃᑐᐊᓂᖃᖅᓱᑕᓗ ᓄᓇᒧᑦ, ᐃᒪᕐᒧᑦ, ᐊᒻᒪᓗ ᓯᑯᒧᑦ ᐊᕐᕌᒎᒐᓴᓗᓐᓂᒃ ᓯᑯᖃᖃᑦᑕᖅᓯᒪᔪᒧᑦ ᐃᓄᖕᓄᑦ ᐊᖅᑯᑎᒋᔭᐅᖃᑦᑕᖅᓯᒪᓪᓗᑎᒃ ᑕᒪᒃᑯᐊ ᓄᓇᒋᔭᐅᓪᓗᑎᓪᓗ ᐅᑭᐅᖅᑕᖅᑐᒥ ᓯᓈᓂ ᓯᔾᔭᖅᐸᓯᒻᒥ ᐊᒻᒪᓗ ᑕᕆᐅᓕᓐᓂ ᐃᒪᕐᒥᐅᑕᖃᖅᑐᓂᒃ ᓄᓇᓕᐅᔪᓂ. ᐃᓄᐃᑦ ᓄᓈᑦ (ᓄᓇᕗᑦ ᐱᕈᖅᓴᕐᕕᒋᓯᒪᔭᕗᑦ) ᐊᓯᔾᔨᐸᓪᓕᐊᔪᖅ ᖃᐅᔨᑎᓪᓗᑕ, ᐋᓐᓂᕐᓇᖅᑐᖃᐅᖅᑐᓂᒃ ᑎᑎᕋᖅᓯᒪᔪᒍᑦ ᐊᓯᔾᔨᖅᑐᓂᒃ ᑕᑯᔭᑦᑎᓐᓂᒃ ᐅᑭᐅᖅᑕᖅᑐᒥ ᓄᓇᑦᑎᓐᓂ – ᐊᓯᔾᔨᖅᑐᑦ ᓯᓚ ᐊᒻᒪᓗ ᓯᒃᑯᖃᑦᑕᕐᓃᑦ, ᐊᓯᔾᔨᖅᑐᑦ ᓂᕿᑖᖅᑎᑦᓯᓂᖅ ᐊᒻᒪᓗ ᓂᕐᔪᑎᖃᑦᓯᐊᕐᓂᖅ ᐊᒥᒐᙱᑦᑐᓂᒃ, ᓄᑖᑦ ᐆᒪᔪᑦ, ᐱᑐᖃᐅᓗᐊᓕᕐᓂᖏᑦ ᓴᓇᔭᐅᓯᒪᔪᑦ ᐃᓪᓗᕐᔪᐊᑦ, ᐊᒻᒪᓗ ᐃᓕᖅᑯᓯᕐᒨᖓᔪᑦ ᐃᓅᖃᑎᒌᖕᓂᕐᒨᖓᔪᓪᓗ ᐊᒃᑐᖅᑕᐅᓯᒪᓂᖃᖅᑐᑦ ᑕᒪᒃᑯᓄᖓ ᐊᓯᔾᔨᖅᑐᓄᑦ.
2009−ᒥ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ ᑲᑎᒪᓂᕐᒥ COP15, ᐃᓄᖕᓂᑦ ᓂᐱᖃᖅᑎᑦᓯᔪᖅ ᓰᓚ ᕗᐊᑦ−ᑯᓘᑦᑎᐊ ᐅᖃᐅᓯᖃᖅᑐᒥᓂᖅ ᐅᑭᐅᖅᑕᖅᑐᖅ ᓇᓗᓇᐃᒃᑯᑕᐅᒋᐊᖓᓂᒃ ᓯᓚᕐᔪᐊᓕᒫᒥᒃ. ᐅᑭᐅᖅᑕᖅᑐᖅ ᐅᓗᕆᐊᓇᖅᑐᒦᓕᕇᖅᓯᒪᓂᖓ ᖃᐅᔨᒪᒋᐊᑦᓯᐊᖅᑕᐅᖁᓪᓗᓂᐅᒃ. ᑭᓯᐊᓂᑦᑕᐅᖅ ᐃᒫᖓᐃᕈᑎᒋᑦᓱᓂᒋᑦ ᐅᖃᐅᓯᓂ: ᓴᐳᑎᒍᑦᑎᒍ ᐅᑭᐅᖅᑕᖅᑐᖅ, ᓴᐳᔾᔨᕗᒍᑦ ᓄᓇᕐᔪᐊᒥᒃ. ᐊᕐᕌᒎᒐᐅᓕᖅᑐᓂᒃ, ᓯᓚᓐᓂᐅᑏᑦ ᑲᑉᐱᐊᓇᖃᑦᑕᖅᓯᒪᓕᕐᒪᑕ. ᐃᓄᐃᑦ ᐱᕕᖃᕐᕕᖃᖅᓯᒪᔪᑦ ᐊᑯᓂᐅᕙᒃᓱᓂ ᑕᒪᓐᓇ ᐱᓕᕆᐊᕆᓪᓗᒍ, ᐱᔪᒃᓴᐅᔮᕐᕕᒋᓗᒍ, ᐊᒻᒪᓗ ᐊᑐᕋᒃᓴᑎᒍᑦ ᑐᓴᖅᑎᑦᓯᒍᑎᒋᑦᓱᒋᑦ ᓄᓇᕐᔪᐊᒧᑦ ᑕᒪᓐᓇ ᓯᓚᐅᑉ ᐊᓯᔾᔨᐸᓪᓕᐊᑐᐃᓐᓇᕐᓂᖓ ᐊᒻᒪᓗ ᑭᖒᒪᔭᐅᓂᖓ ᑕᒪᒃᑯᐊ ᓄᓇᕐᔪᐊᒥᐅᑦ ᐊᐅᓚᔾᔭᖁᔭᐅᓕᕐᓂᖓ ᓄᖅᑲᐅᒥᑎᑕᐅᖁᓪᓗᒍ ᑕᒪᓐᓇ ᓱᒃᑲᓕᓂᖓ ᐊᒻᒪᓗ ᐊᓯᔾᔨᐸᓪᓕᐊᑐᐃᓐᓇᕐᓂᖓ ᐊᓯᖏᑦ ᓄᓇᓖᑦ ᓄᓇᕐᔪᐊᒥ ᐊᒃᑐᖅᑕᐅᖏᓐᓂᖏᓐᓂ ᐅᑭᐅᖅᑕᖅᑑᑉ ᐊᑐᖅᓯᒪᔭᖏᑎᑐᑦ ᐊᑑᑎᙱᓐᓂᖏᓐᓂ ᑕᒪᓐᓇᓗ ᓱᓕ ᐊᓯᔾᔨᐸᓪᓕᐊᑐᐃᓐᓇᕐᓂᖓ ᐊᑑᑎᔭᐅᕗᖅ.
ᖁᓚᕐᓇᖏᓪᓚᖅ ᐃᓄᐃᑦ ᖃᐅᔨᒪᓂᖃᕐᓂᖓ ᐊᒻᒪᓗ ᓂᐱᖃᕐᕈᔾᔨᓂᖓ ᓴᙵᑦᓯᒋᐊᕆᓯᒪᒻᒪᑦ ᐋᖅᑭᑦᑕᐅᖁᓪᓗᒍ ᑕᒪᓐᓇ ᓄᓇᕐᔪᐊᒥᐅᑦ ᐱᓪᓚᕆᓪᓗᑎᒃ ᐱᓇᓱᐊᕐᕕᒋᓗᒍ ᐊᑐᖅᑎᑦᓯᓂᕐᓗ ᑕᒪᓐᓇ ᑭᓪᓕᖃᖅᑎᑦᓯᒍᑕᐅᓗᓂ ᓯᓚᒨᖅᑲᖅᑐᑦ ᐅᖅᓱᐊᓗᐃᑦ ᓱᕈᓃᖔᖅᑐᑦ. ᑭᓯᐊᓂᓕ, ᐋᖅᑭᒋᐊᕆᓂᖅ ᑖᓐᓇᑑᖏᓪᓗᓂ ᐅᑭᐅᖅᑕᖅᑐᖅ ᖃᐅᔨᒪᔭᕗᑦ ᐊᕐᕌᒎᒐᓵᓗᓐᓄᑦ ᐊᓯᐅᕙᓪᓕᐊᓕᕐᒪᑦ ᐊᐅᔪᐃᑦᑐᑦ ᒪᖒᒪᓕᕐᓂᖏᓐᓄᑦ ᓯᑰᓗ ᐊᐅᓴᖃᐃᓕᕐᓂᖓᓄᑦ. ᓄᓇᕗᑦ ᐃᓕᑕᕐᓇᕈᓐᓃᖅᐸᓪᓕᐊᓕᕐᒪᑦ. ᓯᑯᐃᑦ ᐊᐅᑉᐸᓪᓕᐊᒻᒪᑕ. ᓂᓪᓕᐊᒍᑎᖃᖅᓯᒪᓕᖅᑐᒍᖑᑦ ᐃᑲᔪᖅᑕᐅᔾᔪᑎᖃᕈᒪᓪᓗᑕ ᐃᓕᑦᑐᕈᑎᓂᑦ ᐊᒻᒪᓗ ᐊᑐᕐᓂᐊᕐᓗᒋᑦ ᑐᑭᒧᐊᒍᑎᓂᒃ ᐊᑐᕆᐊᖃᓪᓚᕆᑦᑐᑦ ᐋᓐᓇᐅᒪᓂᑦᑎᓐᓄᑦ ᐊᒻᒪᓗ ᒪᑭᒪᑦᓯᐊᕈᓐᓇᕐᓂᖏᑦ ᓄᓇᓕᑦᑕ, ᓄᑕᐅᓚᐅᕐᓂᑰᓪᓗᑎᒃ ᐃᓪᓗᕐᔪᐊᒦᓕᖅᓱᑎᒃ ᓴᐳᔾᔨᔭᕆᐊᖃᓕᖅᓱᑎᒃ.
ᐃᓅᓯᕆᖃᓯᐅᑎᑦᓱᒍ ᓯᓚᐅᑉ ᐊᓯᔾᔨᕐᓂᖓ ᐊᑐᖅᑎᓪᓗᒍ ᓱᓕᔫᕗᑦ ᐊᕐᕌᒍᒐᓴᓐᓄᑦ. ᓄᓇᕐᔪᐊᒥᐅᑦ ᐊᑑᑎᓕᖅᑐᑦ ᖃᓄᖅ ᑐᑭᖃᕐᒪᖔᖅ ᖃᐅᔨᓪᓗᑎᒃ ᐃᓅᓯᖃᕆᐊᒃᓴᖅ ᓯᓚᐅᑉ ᐊᓯᔾᔨᕐᓂᖓ ᐊᑐᖅᑎᓪᓗᒍ. ᑕᕝᕙᓂ ᐊᕐᕌᒍᒥ 2021, ᐃᓄᐃᑦ ᐅᓕᕕᔾᔪᐊᒃᑐᓂ ᐊᑑᑎᓯᒪᓕᖅᑐᑦ ᐃᐅᕈᒻᒥ ᐊᐃᓴᒥᓗ, ᐃᑯᐊᓚᔪᑦ ᑲᓇᑕᒥ, ᕋᓴᒥ, ᐊᒻᒪᓗ ᒥᐊᓕᒐᐃ ᓄᓇᖏᓐᓂ, ᐸᓂᖅᑐᖅᓯᐅᑐᓪᓗ ᐳᕋᔨᐅᓪᒥ ᒫᑕᒑᔅᑲᒥᓗ. ᑕᕝᕙᓂ ᐊᕐᕌᒍᒥ ᐅᓂᒃᑳᓕᐊᕆᓯᒪᔭᖓ ᒐᕙᒪᐅᖃᑎᒌᑦᑐᑦ ᑲᑎᒪᔩᑦ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ (IPCC) ᓇᓗᓇᖏᑎᑦᓯᑦᓯᐊᖅᓯᒪᕗᖅ: ᓯᓚᐅᑉ ᐊᓯᔾᔨᕐᓂᖓ ᐱᓪᓚᕆᑦᑐᖅ; ᒫᓐᓇ ᐊᑑᑎᓕᖅᑐᖅ ᐊᓯᔾᔩᓯᒪᓕᖅᓱᓂᓗ ᐅᑎᖅᑎᒐᒃᓴᐅᖏᑦᑐᓂᒃ. ᐅᕙᒍ ᐃᓱᒪᓕᐅᕈᑎᒋᒋᐊᖃᓕᖅᑕᕗᑦ ᑕᒪᓐᓇ ᖃᓄᑎᒋ ᐱᐅᖏᓕᐅᒻᒥᑎᓪᓗᒍ ᐱᐅᖏᓕᐅᒥᑎᖏᑎᓪᓗᒍᓘᓐᓃ.
ᐃᓄᐃᑦ ᓈᒪᓴᙱᒻᒥᔪᑦ ᐅᕙᖑ ᓯᕗᓪᓕᖅᐸᐅᓪᓗᑕ ᑐᓴᖅᑎᑦᓯᒋᐊᖃᕐᓂᖏᑎᓐᓂᒃ ᑐᐊᕕᕐᓇᖅᑑᓕᖅᑎᓪᓗᒍ ᖃᐅᔨᒪᐃᓐᓇᕋᑦᑎᒍ ᓄᓇᕗᑦ ᐊᖏᕐᕋᖃᕐᕕᕗᑦ ᐱᖏᐊᕐᓂᖓᓂᒃ ᐊᓯᔾᔨᕐᓂᖓᓄᑦ. ᐃᓕᑕᖅᓯᔪᒍᑦ ᐅᓗᕆᐊᓇᖅᑐᒦᓕᕐᓂᕗᑦ ᐊᒻᒪᓗ ᓱᕋᑦᑕᐅᓯᒪᓂᖏᑦ ᐱᔪᓐᓇᐅᑎᑦᑕ ᐊᒥᓱᓄᑦ ᐊᑐᖅᑕᐅᔪᖅ. ᑕᐃᒪᐃᒻᒪᑦ ᓴᖅᑭᖃᑦᑕᐃᓇᖅᑐᒍᑦ, ᓂᐱᖃᕈᑎᓪᓗᒋᑦ ᓄᓇᖃᖅᑳᖅᓯᒪᖃᑎᕗᑦ ᐱᖃᑎᕗᓪᓗ, ᓱᓕᓗ ᑕᒪᓐᓇ ᑐᓴᖅᑕᐅᑎᖏᓐᓇᓚᖓᑦᓱᑎᒍ ᐊᐅᓚᔾᔭᕝᕕᐅᖁᓪᓗᒍᒍ ᖃᓄᐃᒋᐊᕈᑕᐅᓗᓂ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑐᒃᓯᕋᖅᑐᑦ ᓄᓇᕐᔪᐊᒥ ᓯᕗᓕᖅᑏᑦ ᐃᑲᔪᖅᑐᐃᖁᓪᓗᒋᑦ ᐃᓄᖕᓂᑦ ᓯᕗᓪᓕᖅᑐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ ᐅᑯᐊ ᐊᐅᓚᔾᔭᒋᐊᕈᑕᐅᓗᑎᒃ:
ᑐᐊᕕᕐᓇᑎᓪᓗᒍ ᐊᔪᐃᓐᓇᕐᕕᒋᓗᒍᓗ ᖃᑦᓱᕐᔫᒥᑎᓪᓗᒍ ᓯᓚᒨᖅᑲᐸᑦᑐᑦ
ᐅᑭᐅᖅᑕᖅᑐᒧᑦ ᑲᑎᒪᔨᖏᑕ ᐅᓂᒃᑳᓕᐊᒥᓂᖓ ᐅᑭᐅᖅᑕᖅᑐᒥ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ ᑐᓴᖅᑎᑦᓯᒍᑎ 2021 ᐃᓱᓕᑦᓯᒍᑎᓕᒃ ᐅᑭᐅᖅᑕᖅᑐᖅ ᐱᖓᓱᐊᖅᑎᓗᐊᖅᑐᒥ ᓱᒃᑲᓕᓂᓕᒃ ᓂᕈᒥᑦᓯᕙᓪᓕᐊᓂᖓ ᐊᓯᖏᓐᓂᒃ ᓄᓇᕐᔪᐊᒥ ᓂᕈᒥᑦᓯᕙᓪᓕᐊᓃᑦ ᓂᕈᒥᑦᓯᕙᓪᓕᐊᓂᕐᓗ ᑕᒪᓐᓇ ᐊᒃᑐᐃᓂᖃᕐᔪᐊᕐᓂᐊᖅᑐᖅ ᓯᑯᒥ, ᓄᓇᒥ ᐊᒻᒪ ᐃᒪᕕᖕᓂᑦ. ᓄᖅᑲᐅᒥᑎᑦᓯᒐᓱᐊᕐᓃᑦ ᓱᕈᓂᑦ ᒑᓴᓖᓂᑦ ᓯᓚᒨᖅᑲᖅᑐᓂ ᐊᕐᕌᒎᓂ ᐊᒡᒋᖅᑐᓂ ᓄᖅᑲᐅᒥᒍᑕᐅᒍᓐᓇᖅᑐᖅ ᐅᑭᐅᖅᑕᖅᑑᑉ ᓯᓚᖓᑕ ᐊᓯᔾᔨᐸᓪᓕᐊᓂᖓᓂᒃ, ᐱᓗᐊᖅᑐᒥ ᐊᕐᕌᒍᑦ ᐊᒥᓱᑦ ᐊᓂᒍᖅᓯᒪᓕᖅᑐᑦ ᐊᑯᓐᓂᖏᓐᓂ, ᑭᓯᐊᓂ ᐅᑭᐅᖅᑕᖅᑐᖅ ᓯᕗᓂᒃᓴᒥ ᐊᔾᔨᒋᖏᑕᐹᓗᒋᒐᔭᖅᑕᖓ ᓯᓚᒨᖅᖃᖅᓯᒪᓕᖅᑐᑦ ᐱᒐᓱᐊᓗᖅᑎᓪᓗᒋᑦ.
ᓄᓇᕐᔪᐊᒥ ᑲᓇᑕᒥᓗ ᐊᑐᖅᑕᐅᓂᐊᕐᓂᕋᖅᓯᒪᔪᑦ ᓱᒃᑲᐃᓗᐊᑦᑐᑦ ᓴᙲᓗᐊᖅᓱᓂᓗ ᓂᒡᓚᓱᓐᓂᐅᖁᔭᖅ ᑲᑎᓪᓗᒋᒃ ᓄᓇᕐᔪᐊᒥ ᓄᓇ ᐊᒻᒪᓗ ᐃᒪᐃᑦ ᐊᑖᓂᐊᕐᔪᖅ 1.5°C ᐊᖏᓪᓕᒋᐊᖅᓯᒪᓕᖅᑎᓪᓗᒍ ᓯᕗᕐᖓᓂ−ᓴᓇᐅᔭᓯᒪᔪᑦ ᓴᓇᓂᒃᑯᑦ ᒪᓕᓪᓗᒋᑦ. ᒐᕙᒪᐅᔪᑦ ᐅᓚᕕᑕᐅᒐᓗᐊᖅᑎᓪᓗᒋᑦ ᐊᓯᖏᓐᓄᑦ ᐊᐱᖅᑯᑕᐅᔪᓄᑦ ᑕᒪᒃᓱᒪ ᓯᓚᒨᖅᑲᖅᑐᑦ ᒥᒃᓵᓐᓄᑦ, ᖃᐅᔨᒪᑐᐃᓐᓇᕈᓐᓇᐃᓪᓕᒐᑦᑎᒍ ᖃᓄᐃᑦᑐᒦᓐᓂᖓᑦ ᐃᓄᖁᑎᑦᑕ ᓯᓚᒨᖅᑲᖅᑐᓂᒃ ᓱᕈᕐᓇᖅᑐᓂᑦ ᐃᒃᓯᓐᓇᑰᑎᑕᐅᑎᓪᓗᒍ ᑕᒪᓐᓇ ᓂᕈᒥᑦᓯᕙᓪᓕᐊᓂᖓ ᐱᖓᓱᐊᖅᑎᓗᐊᖅᑐᒥᒃ ᓱᒃᑲᓕᓂᖃᖅᑎᓪᓗᒍ ᐊᓯᖏᓐᓂ ᓄᓇᕐᔪᐊᒥ ᒪᓕᓪᓗᒋᑦ ᓂᕈᒥᓐᓃᑦ. ᑲᔪᖏᖅᓴᖅᑲᕗᑦ ᓄᓇᕐᔪᐊᒧᑦ ᑲᑎᒪᔨᐅᔪᑦ ᑖᒃᑯᓄᖓ ᕿᓄᐃᓐᓇᖁᓪᓗᒋᑦ UNFCCC−ᑯᓐᓄᑦ ᐃᑉᐱᒋᔭᐅᖏᓐᓇᖁᓪᓗᒍ ᐃᑯᓪᓚᖅᑎᑕᐅᒐᓱᐊᕐᓂᖓ ᓯᓚᒨᖅᑲᖅᑐᑦ ᓱᕈᑦ ᐅᖅᓱᐊᓗᑦ.
- ᕿᓄᕕᒋᕙᕗᑦ ᓯᑕᒪᐅᔪᖅᑐᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᓄᓇᓖᑦ ᐊᒻᒪᓗ ᑲᓇᑕᒥ ᓇᐅᑦᓯᑐᖅᑕᐅᓯᒪᓕᕐᓂᖓ ᑲᑎᒪᓕᖅᐸᑕ ᐊᐅᓚᔾᔭᒋᐊᖁᓪᓗᒋᑦ ᑎᓕᔭᐅᔾᔪᑎᒋᓯᒪᔭᓂ ᒪᓕᓪᓗᒋᑦ ᐃᑯᓪᓚᐅᒥᑎᒍᒪᓪᓗᒍ ᓯᓚᒨᖅᑲᖅᑐᑦ ᓱᕈᑦ ᐅᖅᓱᐊᓗᑦ. ᑕᒪᒃᑯᐊ ᓄᓇᓕᕐᔪᐊᑦ ᑭᒡᒐᖅᑐᐃᒻᒪᑕ ᐊᖏᔪᓂ ᓄᓇᓂᒃ ᓄᓇᕐᔪᐊᒥ ᓯᓚᒨᖅᑲᖅᑐᑦ ᓱᕈᑦ ᐅᖅᓱᐊᓗᑦ. ᓄᑕᐅᓂᖅᐹᒥ ᐅᑭᐅᖅᑕᖅᑐᒧᑦ ᑲᑎᒪᔩᑦ ᒥᓂᔅᑕᐅᑏᑦ ᐅᖃᐅᓯᕆᓯᒪᔭᖓᑦ ᐅᑭᐅᖅᑕᖅᑐᖅ ᐅᖃᐅᓯᒥᓂᖓ ᓇᓗᓇᐃᖅᓯᓯᒪᔪᖅ ᑭᖒᒪᔭᐅᓂᖓᓂᒃ ᐊᐅᓚᔾᔭᒋᐊᕈᑎᖃᕐᓃᑦ ᐊᐅᓚᔾᔭᒋᐊᕈᑕᐅᒋᐊᓕᑎᒍᑦ ᑲᔪᓯᑎᑕᐅᖁᓪᓗᒍ ᐱᐅᕆᔅ ᐊᖏᖃᑎᒌᒍᑎᖓᑦ ᓂᒡᓚᓱᓐᓂᖃᕈᒪᓂᕐᒧᑦ ᐋᖅᑭᑦᑕᐅᓯᒪᔪᒥᒃ ᑎᑭᑕᐅᖁᓪᓗᒍ. ᑕᒪᒃᑯᐊ ᐅᖃᖃᐅᓯᒥᓃᑦ ᐱᓂᐊᕐᓂᕈᑯᒐᑦᑎᒍ ᐊᐅᓚᔾᔭᐃᒍᑕᐅᓗᑎᒃ ᑕᕝᕙᓂ ᑲᑎᒪᓂᕐᒥ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ COP.
- ᐃᑲᔪᖅᓯᓂᖅ ᑮᓇᐅᔭᖃᖅᑎᑕᐅᒍᑎᒋᒍᓐᓇᖅᑕᖏᑦ ᓄᓇᖃᖅᑳᖅᓯᒪᔪᑦ ᐊᒻᒪᓗ ᐃᓕᑕᕆᔭᐅᓗᑎᒃ ᑭᖒᒪᔭᐅᓕᖅᑐᑦ ᐃᓄᐃᑦ ᓄᓇᖏᓐᓂ ᒥᑦᓴᐅᒻᒪᑕ ᓯᓚᒥᓐᓂ ᐊᓯᔾᔨᐸᓪᓕᐊᓚᑦᓯᔪᑦ ᓄᓇᓖᑦ G20−ᒦᖏᑦᑐᑦ ᓄᓇᓕᕐᔪᐊᑦ ᐱᕈᖅᐸᓪᓕᐊᔪᓂᒃ ᑮᓇᐅᔭᓕᐅᕈᑎᓖᑦ.
- ᐱᓕᕆᖃᑎᒋᓗᒋ ᐃᑲᔪᖅᓯᒪᓂᖃᕐᕕᒋᓗᒍᓗ ᐃᓄᓐᓄᑦ−ᐊᐅᓚᑕᐅᔪᑦ ᐊᑐᕈᓐᓇᖅᑐᑦ ᐆᒻᒪᖅᑯᑎᖃᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᒃ ᐅᑭᐅᖅᑕᖅᑐᒥ ᓄᓇᓕᐅᔪᓂ ᐊᑐᕐᓗᓂ ᓇᓖᕌᕋᒃᓴᓂᑦ ᐃᑲᔪᖅᓯᓂᖃᕐᓂᐊᖅᑐᓂ ᓄᓇᓕᒻᒥ ᑮᓇᐅᔭᓕᐅᕈᑎᑎᒍᑦ ᐊᒻᒪᓗ ᐊᖏᓪᓕᒋᐊᕐᓗᒍ ᓇᒻᒥᓂᖅᓱᕈᓐᓴᕐᓂᖅ ᐆᒻᒪᖅᑯᑎᖃᕐᓂᕐᒥᒃ ᓂᐅᕐᕈᑎᖃᕐᓂᒃᑯᑦ ᓯᓚᑖᓂᓗ ᐊᑐᕈᓐᓇᖅᑐᑎᒍᑦ.
ᐃᑲᔪᖅᑐᕐᓗᒋᑦ ᐃᓄᐃᑦ ᐱᖃᑕᐅᑎᑕᐅᓂᖓ ᓄᓇᕐᔪᐊᒥ ᑲᑎᒪᓂᐅᕙᑦᑐᓂ ᐱᕙᓪᓕᐊᒍᑕᐅᔪᓂᓗ ᐃᒪᕐᔪᐊᒻ ᐊᒻᒪᓗ ᐃᓄᐃᑦ ᓄᓇᖏᓐᓂ ᑕᕆᐅᕐᒥ ᓇᔪᐊᖅᑕᐅᔪᑦ ᐆᒪᔪᓄᑦ
ᐋᖅᑭᒋᐊᕆᓂᖅ ᓯᕗᓪᓕᐅᑎᑕᐅᔭᖏᓐᓇᕋᓗᐊᖅᑎᓪᓗᒍ, ᐊᐱᕆᒻᒥᔪᒍᑦᑕᐅᖅ ᓄᓇᕐᔪᐊᒥ ᓄᓇᓖᑦ ᐊᐅᓚᔾᔭᒋᐊᖁᓪᓗᒋᑦ ᐊᐅᓚᔾᔭᐅᒍᑕᐅᒋᐊᓖᑦ ᐱᓪᓗᒋᑦ ᑲᒪᒋᔭᐅᖁᓪᓗᒍ ᓯᓚᐅᑉ ᐊᓯᔾᔨᐸᓪᓕᐊᓂᖓᑕ ᐊᒃᑐᐃᓂᕐᓗᒍᑎᖏᑦ ᐃᓄᖕᓂᑦ ᐱᔪᓐᓇᖅᑎᑕᐅᓗᑕ ᐊᔪᖏᑎᑕᐅᓗᑕ ᐃᓕᑦᑐᕈᑎᑎᒍᑦ ᐅᓪᓗᒥᐅᓕᖅᑐᖅ ᐊᒡᒋᑐᓪᓗ ᐊᑑᑎᕕᕗᑦ ᓱᓕᓪᓗᑕ ᐅᑭᐅᖅᑕᖅᑐᒥ ᐊᖏᕐᕋᑎᓐᓂ.
ᓄᓇᕐᔪᐊᒥ ᓄᓇᓖᑦ ᐃᖅᑲᒋᔭᖃᕆᐊᖃᕐᒪᑕ ᐃᓄᐃᑦ ᐊᐅᓚᑦᓯᒍᓐᓴᕐᓂᖓᓂᒃ ᐊᒻᒪᓗ ᑭᖑᔮᖑᓂᒃᑯᑦ ᑐᓂᔭᐅᓯᒪᓂᕗᑦ ᓇᒻᒥᓂᖅᓱᕈᓐᓇᕐᓂᕐᒥᒃ−ᐊᔪᐃᓐᓇᕈᓐᓴᕐᓂᖅ ᐃᓱᒪᓕᐅᕈᑕᐅᔪᓕᒫᑎᒍᑦ ᐱᖃᑕᐅᕕᒋᓗᒋᑦ ᐅᑭᐅᖅᑕᖅᑐᒥ ᐱᖃᑕᐅᑎᑕᐅᕕᐅᓗᓂᓗ ᖃᐅᔨᒪᓂᖃᕐᓂᕗᑦ. ᐊᒥᓱᓄᑦ ᑭᖑᕙᖑᔪᓄᑦ ᐃᓄᖕᓄᑦ ᑲᒪᒋᔭᐅᑦᓯᐊᖅᓯᒪᒻᒪᑦ ᓱᕐᕋᐃᑦᑑᑎᑕᐅᓪᓗᓂ ᐊᐅᓚᑕᐅᓪᓗᑎᒃ ᐃᒪᕐᒥᐊᑕᐃᑦ ᓄᓇᑦᑎᓐᓂ ᐊᖏᕐᕋᖃᕐᕕᑎᓐᓂ. ᑲᔪᓯᑎᑦᓯᔪᓐᓇᕐᓂᕗᑦ ᖓᖑᓚᑦᓯᓂᕐᒥᒃ ᑕᒪᒃᑯᓂᖓ ᐆᒪᔪᓄᑦ ᓇᔪᒐᐅᔪᓂᒃ ᐊᒃᓱᕈᓐᓇᖅᑐᒦᒍᑕᐅᓕᕐᒪᑦ ᓄᓇᕐᔪᐊᒥ ᐊᓯᔾᔨᖅᑐᓄᑦ ᐱᕙᓪᓕᐊᔪᓄᓪᓗ. ᑕᒪᓐᓇ ᑐᑭᓕᒃ ᐃᓄᐃᑦ ᓂᐱᖃᕆᐊᖃᓕᕐᓂᖏᓐᓂᒃ ᑕᒪᑐᒧᖓ ᐊᐅᓚᑦᓯᒍᓐᓇᓂᐊᕐᒪᑕ ᐱᕙᓪᓕᐊᔪᓂᒃ ᐅᖓᑖᓄᑦ ᐊᒃᑐᐃᓂᓂᖃᕐᓂᐊᖅᑐᓂᒃ ᓄᓇᑦᑕ ᐃᒪᑦᑕᓗ. ᐱᓗᐊᖅᑐᒥ, ᐃᑲᔪᖅᑕᐅᒋᐊᖃᓕᖅᑐᒍᑦ ᓄᓇᓕᕐᔪᐊᓄᑦ ᖓᑑᑎᓕᒃᑯᑦ, ᓇᒻᒪᑐᒃᑯᑦ, ᑐᑭᓕᒃᑯᓪᓗ ᐃᓄᓐᓄᑦ ᐱᖃᑕᐅᔪᓄᑦ ᓄᓇᕐᔪᐊᒥ ᑲᑎᒪᓂᕐᓂ ᐊᒻᒪᓗ ᐱᕙᓪᓕᐊᓂᐅᔪᓂ ᐊᒃᑐᐃᓂᖃᖅᑐᓂᒃ ᓯᕗᓂᒃᓴᒥᒃ ᐃᓗᓯᐅᒍᒫᖅᑐᓂᒃ ᐊᒻᒪᓗ ᐃᒪᕆᒍᒫᖅᑕᑎᓐᓂᑦ.
- ᐱᖃᓯᐅᑎᓗᒋᑦ ᐃᓄᐃᑦ ᐅᖃᖃᑎᒌᒍᑕᐅᑎᓪᓗᒍ ᐅᑭᐅᖅᑕᖅᑐᒥ ᐅᓯᑲᑦᑕᕐᓃᑦ ᓄᓇᕐᔪᐊᒥ ᐃᒪᐃᑦ ᐱᓪᓗᒋᑦ ᑎᒥᖁᑎᐅᔪᒧᑦ.
- ᐱᕕᖃᖅᑎᓪᓗᒋᑦ ᐃᓄᐃᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᒐᕙᒪᐅᖃᑎᒌᑦ ᑲᑎᒪᓂᖏᓐᓂ ᓄᓇᕐᔪᐊᒥ ᒪᓕᒐᑎᒍᑦ ᓇᕿᑕᐅᔪᖃᕐᓂᐊᑎᓪᓗᒍ ᐱᓕᕆᔾᔪᑎᑎᒍᑦ ᐱᐅᖅᓱᐊᕆᐊᖃᕐᓂᕐᒧᑦ ᐊᒻᒪᓗ ᓱᕐᕋᐃᑑᑎᑦᓯᓂᕐᒧᑦ ᐊᑐᕐᓂᒃᑯᑦ ᐃᒪᕐᒥᐅᑕᐃᑦ ᐆᒪᔪᖏᓐᓂᒃ ᐊᔾᔨᒌᖏᑦᑐᓂᒃ ᒪᓕᓪᓗᒍ ᓄᓇᐃᑦ ᑲᑐᔾᔾᔪᑦ ᑲᑎᒪᓂᖓᓂ ᒪᓕᒐᖅ ᑕᕆᐅᕐᒧᑦ ᐃᒪᕕᒻᒧᑦ ᐱᓪᓗᒍ.
- ᐃᓚᓕᐅᑎᔭᐅᓗᑎᒃ ᐃᓄᐃᑦ ᐅᖃᐅᓯᒃᓴᖏᑦ ᖃᐅᔨᒪᓂᖏᓪᓗ ᐅᖃᖃᑎᒌᒍᑕᐅᑎᓪᓗᒍ ᐱᐅᖅᓱᐊᕆᐊᖃᕐᓂᖅ ᓱᕐᕋᐃᑑᑎᑦᓯᓂᕐᓗ ᐊᑐᖅᑕᒥᓐᓂ ᑕᕆᐅᕐᒥᐅᑕᐃ ᐆᒪᔪᑦ ᓇᔪᒐᖏᓐᓂᒃ ᐅᖓᑖᓄᑦ ᑲᓇᑕᐅᑉ ᑭᓪᓕᓕᐅᖅᑕᐅᓯᒪᓂᖓᑕ.
- ᐊᑐᓕᖅᑎᑦᓯᓂᖅ ᐊᑐᖅᑕᐅᓂᐊᕐᓂᕋᖅᓯᒪᔪᓂᒃ ᕿᑎᖅᐸᓯᐊᓂ ᐅᑭᐅᖅᑕᖅᑑᑉ ᑕᕆᐅᖓᓂ ᐊᖏᖃᑎᒌᒍᑎᐅᑉ ᐱᖃᓯᐅᔾᔨᓗᓂ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓᓂᒃ ᐃᓱᒪᓕᐅᕈᑎᖃᖅᑐᖃᓕᕋᐃᑉᐸᑦ ᓂᐱᖃᖅᑎᑕᐅᓗᑎᓪᓗ ᐃᓄᐃᑦ.
ᐃᓕᑕᕆᓗᒋᑦ ᐊᑑᑎᖃᖅᑐᑦ ᐊᒻᒪᓗ ᐱᔭᕆᐊᓖᑦ ᐃᓄᐃᑦ ᓯᕗᓕᕐᓂᖏᑎᒍᑦ ᐊᒻᒪᓗ ᐃᓄᐃᑦ ᖃᐅᔨᒪᓂᖓ ᓯᓚᒥᒃ ᐊᐅᓚᑦᓯᓂᕐᒥᒃ ᐊᒻᒪᓗ ᓯᓚᒥᒃ ᖃᐅᔨᓴᖅᐸᓐᓂᖏᑦ
ᑕᑯᒋᐊᖃᕋᑦᑕ ᐃᑲᔪᖅᑐᖅᑕᐅᓂᕐᒥᒃ ᐊᔾᔨᒌᑎᑕᐅᓂᖃᕐᓗᓂ ᐱᖃᑕᐅᑎᑦᓯᓂᖅ ᐃᓄᖕᓂᑦ ᓯᓚᐅᑉ ᐊᓯᔾᔨᕐᓂᖓ−ᐱᓪᓗᒍ ᐊᒃᑐᐊᔪᓄᑦ ᑕᒪᒃᑯᓄᖓ ᐱᕙᓪᓕᐊᓂᐅᔪᓄᑦ ᐊᒻᒪᓗ ᐱᓕᕆᐊᑎᒍᑦ ᓄᓇᓕᒻᒥ, ᑲᓇᑕᒥ, ᓄᓇᐃᑦ ᐊᕕᑦᑐᖅᑕᐅᓯᒪᓂᖏᓐᓂ ᐊᒻᒪᓗ ᓄᓇᕐᔪᐊᒥ ᐳᖅᑐᓕᕇᓄᑦ. ᓯᕗᓕᖅᑕᐅᓯᐊᕐᓂᖅ ᐱᓂᐊᕐᓂᖃᕐᓂᕐᓗ ᑕᑯᑦᓴᐅᑎᑕᐅᖃᑦᑕᕇᖅᑐᖅ ᐃᓄᖕᓄᑦ. ᑕᒪᓐᓇ ᐃᓕᑕᕆᔭᐅᔭᕆᐊᓕᒃ ᐃᑲᔪᖅᑐᖅᑕᐅᓗᓂᓗ ᓱᕐᕋᐃᑐᑎᒍᑦ ᐊᑐᕈᓐᓇᖅᑐᑎᒍᑦ. ᐱᖃᑕᐅᑎᑕᐅᓂᒃᑯᑦ, ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓ ᐃᓕᑕᕆᔭᐅᒋᐊᓕᒃ, ᐃᖅᑲᒋᔭᐅᓗᓂ, ᐊᑐᖅᑕᐅᓗᓂᓗ ᓄᓇᐃᑦ ᐊᕕᑦᑐᖅᑕᐅᓯᒪᓂᖏᓐᓂ, ᑲᓇᑕᒥ, ᐊᒻᒪᓗ ᓄᓇᕐᔪᐊᒥ ᓯᓚ ᖃᐅᔨᓴᖅᑕᐅᓂᖏᓐᓂ, ᖃᐅᔨᒪᓂᖃᕐᓂᒃᑯᑦ, ᐊᒻᒪᓗ ᐊᑐᐊᒐᕐᓂᒃ ᐱᕙᓪᓕᐊᑎᑦᓯᓂᒃᑯᑦ.
- ᐃᑲᔪᖅᑐᕐᓗᒍ ᓄᓇᓕᒻᒨᖓᔪᑦ ᓇᐅᑦᓯᑐᕐᓂᒃᑯᑦ ᐊᕙᑎᐅᑉ ᐊᓯᔾᔨᕐᓂᖓᓂᒃ ᐊᑐᕐᓗᒋᓪᓗ ᓄᓇᖃᖅᑳᖅᓯᒪᔪᑦ ᖃᐅᔨᓯᒪᔭᖏᑦ ᓇᐅᑦᓯᖅᑐᕈᓯᖏᓪᓗ ᓄᓇᐃᑦ ᐊᕕᑦᑐᖅᑕᐅᓯᒪᓂᖏᓐᓂ ᓄᓇᕐᔪᐊᒥᓗ ᐊᑐᖅᑕᐅᕙᑦᑐᑦ.
- ᐃᓕᑕᕆᓗᒍ ᑮᓇᐅᔭᑎᒍᓪᓗ ᐃᑲᔪᖅᓯᒪᓗᒍ, ᓯᓚᕐᔪᐊᒥ ᑲᓇᑕᒥᓗ, ᐃᓄᐃᑦ ᓇᓗᓇᐃᔭᖅᓯᒪᔭᖓ ᐃᓕᖅᑐᓂᕐᒧᖓᔪᑦ ᐋᖅᑭᒋᐊᕆᓂᕐᒧᓪᓗ ᑐᑭᒧᐊᒍᑎᒃᓴᐃᑦ ᑐᑭᒧᐊᑦᑎᑦᓯᒍᑕᐅᑦᓯᐊᕐᓂᐊᕐᒪᑕ ᐅᖃᐅᓯᕆᔭᑦᑎᓐᓂᒃ ᐅᓪᓗᒥ ᐊᑐᖅᑕᐅᔪᓂᒃ ᓯᕗᓂᒃᓴᒥᓗ ᑕᒪᒃᑯᐊᓗᑦᑕᐅᖅ ᐊᑯᓐᓂᖃᖅᑐᑦ ᑲᓲᕇᕈᑕᐅᓯᒪᖏᑦᑐᑦ ᐃᓄᐃᑦ ᓄᓇᖏᓐᓂ, ᐱᖃᓯᐅᑎᔪᑦ ᐃᒡᓗᕐᔪᐊᓂᒃ, ᓄᑦᑎᕆᓂᖅ, ᓴᐳᑎᔭᐅᔾᔪᑎᒥᒃ ᐋᖅᑭᑦᓯᓂᖅ, ᐊᒻᒪᓗ ᐊᓯᖏᑦ ᓯᓚ ᐱᓪᓗᒍ ᐊᒃᑐᐊᓂᓖᑦ.
- ᐊᑐᕐᓗᒍ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓ IPCC−ᖃᐅᔨᓴᐅᒻᒥ ᐱᕙᓪᓕᐊᓂᕐᒥ ᐊᓯᖏᓐᓂᓗ ᐱᕐᔪᐊᖅᑐᓂ ᓯᓚᒧᑦ−ᐊᒃᑐᐊᓂᓕᓐᓂ ᐅᓂᒃᑳᓕᐊᖑᓯᒪᔪᓂ ᓇᓗᓇᕈᓐᓃᕈᑕᐅᒍᒫᕐᓂᐊᖅᑐᑦ ᑕᒪᒃᑯᐊ ᓯᓚ ᐱᓪᓗᒍ ᐊᑐᐊᒐᓕᐅᕐᓂᕐᒧᑦ, ᐃᑲᔪᖅᑐᕐᓗᒋᓪᓗ ᐃᓄᐃᑦ ᖃᐅᔨᒪᓂᕐᒥᒃ ᑎᒍᒥᐊᖅᑏᑦ ᐱᔨᑦᓯᕈᓐᓇᓂᐊᕐᒪᑕ ᐱᔪᓐᓴᕐᓂᖃᖅᑎᑕᐅᖃᓯᐅᑎᓗᑎᒃ ᐃᑲᔪᖅᑏᓪᓗ ᑐᑭᒧᐊᑦᑎᑕᐅᑎᓪᓗᒍ ᓄᓇᕐᔪᐊᒥ ᐊᑐᖅᑕᐅᔪᖅ ’ ᖃᐅᔨᒪᓂᓖᑦ ᐊᒻᒪᓗ ᖃᐅᔨᒪᓂᕐᒥᒃ ᑎᒍᒥᐊᖅᑏᑦ ᐅᖃᐅᔾᔨᒋᐊᖅᑏᑦ ᑎᒥᖓ ᑖᒃᓱᒧᖓ IPCC−ᒧᑦ.
- ᖃᐅᔨᒪᒋᐊᑦᓯᐊᕐᓗᒍ ᓄᓇᕐᔪᐊᒥ ᐊᑐᖅᑕᐅᔪᖅ ᒪᓕᓪᓗᒍ ᐱᐅᕆᔅ ᐊᖏᖃᑎᒌᒍᑦ ᐱᖃᓯᐅᔾᔨᔪᖅ ᐅᓂᒃᑳᓕᐊᕆᓯᒪᔪᓂᒃ ᓄᓇᓕᒻᒦᖔᖅᑐᓂᒃ ᓇᐅᑦᓯᑐᕐᓂᕐᒧᑦ ᐊᒻᒪᓗ ᑐᓴᐅᒪᔾᔪᑎᓕᕆᓂᒃᑯᑦ (CBMIS) ᐱᖃᓯᐅᑎᔭᐅᖃᓯᐅᑎᒻᒥᔪᑦᑕᐅᖅ ᐊᓯᖏᑦ ᑐᖅᑯᖅᑕᐅᓯᒪᔪᑦ ᐊᒻᒪᓗ ᖃᐅᔨᔭᐅᓯᒪᔪᑦ ᐃᓄᖕᓄᑦ ᐊᓯᖏᓐᓄᓪᓗ ᓄᓇᖃᖅᑳᖅᓯᒪᔪᓄᑦ. ᓄᓇᕐᔪᐊᒥ ᐊᑐᖅᑕᐅᔪᖅ ᐱᖃᓯᐅᔾᔨᔪᒃᓴᐅᕗᖅ ᕿᒥᕐᕈᔭᐅᓂᖓᓂᒃ ᐊᑐᖅᑕᐅᓂᖏᑦ ᐊᑐᐊᒐᐃᑦ ᐊᒻᒪᓗ ᐊᑐᖅᑕᐅᒍᒫᕐᓂᐊᖅᓯᒪᔪᑦ ᐱᐅᕆᔅ ᐊᖏᖃᑎᒌᒍᑎᒦᑦᑐᑦ, ᐱᖃᓯᐅᑎᔪᖅ ᑐᕌᖅᑕᓕᒻᒥᒃ ᐃᓄᐃᑦ ᑎᒥᓖᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᑦ.
- ᐊᑐᐃᓐᓇᐅᑎᓯᓗᓂ ᓱᕐᕋᐃᑑᑎᑦᓯᓂᕐᒧᑦ ᑮᓇᐅᔭᖃᖅᑎᑦᓯᒍᑎᓂᒃ ᐊᑕᖏᕐᓗᖑ ᐊᑑᑎᖃᕐᓂᖓᓗ ᐱᖃᑕᐅᓂᖏᑎᒍᑦ ᐃᓄᐃᑦ ᐊᕕᑦᑐᖅᑕᐅᓯᒪᔪᓂ ᓄᓇᓂ ᐊᒻᒪᓗ ᑲᓇᑕᒥ ᓯᓚ ᐱᓪᓗᒍ ᐱᓂᐊᕐᓂᖃᕐᓂᕐᒧᑦ ᐊᐅᓚᔾᔭᒋᐊᕐᕕᒋᓗᖑ ᐸᕐᓇᐅᔾᔨᓂᕐᓂ.
ᑐᒃᓯᕋᖅᑕᕗᑦ ᐅᖓᑖᓄᑦ ᐱᔭᒃᓴᐅᑎᑕᐅᔪᑦ ᑲᑐᔾᔨᔪᑦ ᓄᓇᓕᐅᖃᑎᒌᑦ ᐱᓕᕆᐊᒃᓴᖓᑕ ᑲᑎᒪᐅᑎᖃᕐᓂᕐᒧᑦ ᓯᓚᐅᑉ ᐊᓯᔾᔨᕐᓂᖓᓂᒃ. ᐃᓄᐃᑦ, ᓲᕐᓗ ᓄᓇᖃᖅᑳᓯᒪᔪᑦ ᐊᒥᓱᑦ ᐃᓱᒪᖃᕐᒪᑕ ᓄᓇᕐᔪᐊᒥᒃ ᐊᑕᖏᖅᑐᒥᒃ−ᐃᒻᒥᑯᐊᖅᑎᕈᓐᓇᖏᓐᓇᑦᑎᒍ ᐃᓱᒫᓘᑕᐅᓂᖏᑦ ᓯᓚᐅᑉ ᐊᓯᔾᔨᕐᓂᖓᓄᑦ, ᑕᕆᐅᒥᒃ ᐊᐅᓚᑦᓯᒍᓐᓇᕐᓂᖅ, ᑎᒥᖃᖅᑐᑦ ᐱᔪᓐᓇᐅᑎᖏᑦ, ᐅᕝᕙᓘᓐᓃᑦ ᓂᕿᖃᑦᓯᐊᖏᓐᓂᖅ ᐱᓪᓗᒍ. ᐃᓘᓐᓇᑎᓐᓄᑦ, ᑕᒪᒃᑯᐊ ᐃᓱᒫᓘᑕᐅᔪᑦ ᑲᑎᙵᐅᕐᒪᑕ ᐊᒃᑐᐊᓂᖃᖅᓱᑎᒃ, ᓴᒻᒥᕙᕗᑦ ᓄᓇᓕᕐᔪᐊᑦ ᑲᑎᒪᔨᐅᔪᑦ ᑕᒪᑐᒧᖓ ᑲᑎᒪᔾᔪᑎᖃᖅᐸᑦᑐᑦ ᓯᓚᐅᑉ ᐊᓯᔾᔨᕐᓂᖓᓂᒃ, ᐊᒥᓱᓄᓪᓗ ᐊᓯᖏᓐᓄᑦ ᑕᒪᑐᒧᖓᓕᖓᔪᓕᕆᔪᓄᑦ ᓄᓇᕐᔪᐊᒥ ᑲᑐᔾᔨᔪᓄᑦ, ᑕᑯᓐᓇᖁᓪᓗᒋᑦ ᓄᓇᕐᔪᐊᒥᒃ ᐊᔾᔨᒌᒥᒃ; ᑲᓱᖃᑎᒌᒍᑎᒋᔭᕆᐊᓖᑦ ᑲᓱᖃᑎᒌᖑᑕᐅᓗᑎᒃ ᑖᒃᑯᓄᖓ ᐃᓘᓐᓇᖏᓐᓄᑦ ᐊᔾᔨᒌᖏᑦᑐᓄᑦ ᑲᑎᒪᔾᔪᑎᖃᖅᐸᑦᑐᓄᑦ ᑕᒪᒃᓱᒥᖓ ᖃᑐᔾᔨᕕᒋᓗᒍ ᐊᑕᖏᖅᑎᓪᓗᒋᑦ ᐃᓱᒫᓘᑕᐅᔪᑦ ᑲᒪᒋᓂᐊᕐᒪᔾᔪᒃ.
ᐃᓄᐃᑦ ᓯᕗᓕᖅᑏᑦ, ᐃᓄᑐᖃᐃᑦ, ᖃᐅᔨᒪᓂᕐᒥᒃ ᑎᒍᒍᒥᐊᖅᑏᑦ ᐃᓅᓱᑦᑐᓪᓗ ᑲᑎᒪᔭᖅᑐᖅᓯᒪᓛᖅᑐᑦ ᑲᑎᒪᓕᖅᐸᑦ COP26 ᙳᒪᐅᑉ ᐊᓯᔾᔨᕐᓂᖓ ᐱᓪᓗᒍ ᐊᓯᖏᑕᓗ ᐊᒥᓱᑦ ᑕᒪᒃᑯᐊ ᑲᑎᒪᖃᑦᑕᕐᓂᐅᓯᒪᔪᑦ COP−ᑎᒍᑦ ᐊᒻᒪᓗ ᑲᑎᒪᓂᒃᑯᑦ ᑲᑎᒪᒍᑎᒋᖃᑦᑕᖅᓯᒪᔭᕗᑦ ᐱᕕᖃᕐᕕᕗᑦ ᓱᓕ ᐊᔪᐃᓐᓇᕈᑎᖃᖅᑎᓪᓗᑕ ᐅᔾᔨᕆᔭᐅᖁᓪᓗᒍ ᖃᓄᐃᑦᑐᒦᓕᕐᓂᕗᑦ ᓄᓇᑦᑎᓐᓂ ᐊᖏᕐᕋᖃᕐᕕᑎᓐᓂ, ᓱᕋᑦᑕᐅᓯᒪᓂᖓ ᐊᒃᑐᐊᖃᑎᒌᒍᑎᕗᑦ ᑎᒥᖃᕐᓗᑕ ᐱᔪᓐᓇᐅᑎᑦ, ᐊᒻᒪᓗ ᐊᑐᖅᑕᐅᓕᖅᑐᖅ ᐅᓗᕆᐊᓇᖅᑐᒦᓐᓂᖅ ᓄᓇᓕᑦᑎᓐᓄᑦ ᐱᖅᑯᓯᑦᑎᓄᓪᓗ. ᓄᓇᕐᔪᐊᒥ ᓄᓇᓖᑦ ᒫᓐᓇ ᐱᓂᐊᕐᓂᖃᕆᐊᖃᓕᖅᑐᑦ ᐊᐅᓚᔾᔭᕝᕕᒋᓗᒍ ᑕᒪᓐᓇ ᐅᓗᕆᐊᓇᖅᑐᒦᓐᓂᖅ ᐱᓕᕆᖃᑎᖃᕐᓗᑎᒃ ᐅᕙᑦᑎᓐᓂᒃ ᐱᔪᓐᓇᖅᑕᐅᔪᑎᒍᑦ ᓴᖁᑕᐅᖁᓪᓗᒍ ᑕᒪᓐᓇ ᓯᓚᐅᑉ ᐊᓯᔾᔨᐸᓪᓕᐊᓂᖓ, ᐅᑕᖅᑭᑐᐃᓐᓇᕈᓐᓇᐃᓪᓕᒐᑦᑕ.
_________________________
ᑕᓖ ᓴᒻᐳ ᑐᐊᕉ, ICC−ᑯᑦ ᐃᒃᓯᕙᐅᑕᖓᑦ