Inuit Pijumaliqsimaninga Sanngijumik Nunarjuami Ikajuqtaunirmut Amisunik Katujjiqatigiittunut Nunaliuqatigiinut Nunaqaqqaaqsimajuni Inungnit Katimatitsiningagut; Qunuummiqsutik Angiqatianngittunut Nipinut Tusaqtaminnut Kanatakkut Gavamakkunginnik

Sitipiri 25, 2014 – Niu Juak, Niu Juak – Taanna Inuit Ukiuqtaqtumiuqatigiit Katimajingit pijutsaujaarnirminnik uqqaritsautiqakainnaqput ullumi Kinguningagut Titiraqsimajuq pillugu Nunarjuami Katimaniujumi Inuit Nunaqaqqaaqsimajutta pillugit, qutsittumiittuq katujjiqatigiittunut nunaliuqatigiinut isulilauqtumi ikpaksaq Niu Juakmi.
Inuit Ukiuqtaqtumiuqatigiit Katimajingita Kanatami Angajuqqaanga, Tuain Ningaqsiq Simis, uqaqtuminiq quviasullarigiaksaq taqqigalannit uqaqatigiigutausimaliqtillugu ammalu aksururnaqtut aajiiqatigiingniit, nunarjuami sivuliqtiit ammalu nunaqaqqaaqsimajut Inuit upagutisimannirmata angikatigiigutaulluni katujjiqatigiittunut Nunaliuqatigiinut Katimaniqaqtillugi qanuq naammaniqpapugunnarmangaaq “aaqqisuqtautillugu Katujjiqatigiittunut Nunaliuqatigiinut Nalunaiqsigutingat Pijunnautingita Nunaqaqqaaqsimajut Inuit Kanatami, qanurlu atuliqpaliagunnarmangaagit”.
Simis, kisianili, nipaiqtitsisimammat pijutsaujaarnirijannik apirijaugami Kanatami Gavamaup taakkutuulutik Kinguningagut Titiraqtausimajuq. “Ii, tamaungaatuinnaanaqtuq”, uqaqtuminiq. “tukisitsianginnakkut qanuq pinasuarmangaaq gavamavut ilaliutititaugasuarninga Makimaqatautitsiluni Katujjiqatigiittunut Nunaliuqatigiinut Katimaninginni quviasuutaujutsatuinnautillugu iluunnainnut, ammalu qanuiliurniminingat”. Aippangata isumaaluutaujuup, asingilluniuk isumaaluutaujuq, uqausiminiq ᕼuli Siimuut.
Kanatami Gavamangita angajuqqautinginnut angiqataunningittuq pinasuarutaugumajut ammalu nalunaijaqsimaningita taaksuma kinguningani Katimaniup Titiraqtausimajuup, nalunairiaqsimajuqtaqaqsuni uqausiusimajuq ilanginnik iluliqaqsuni matuminga “aaqqittausimagunnangittuq Kanatami maligarmut”. Kanata taannatuulluni nangirutigillugu nalunaiqsigutinginni nalunangittunik titiraqtaugutiqaqsimajut angiqatigiigutausimaninganik uqausiqtaup akiqangittuq, sivulliujjijuq ammalu nalunaiqsigutausimalluni angiqtausimajuq, imaittuq malillugu Ukiuqtaqtumiuqatigiit Katimajingikkut Nunaliuqatigiinut Nunarjuami Iksivautarijaujuup, ukaliq ijitsiap, “gavamakkut tukiliurivammata qipiluaniqaqtumik, nunarjualimaami malingaqtigut atuagaqanngittunit. Nuatsijuujaarmata tavvanilu Katujjiqatigiittunut Nunaliuqatigiinut uqausiusimajunik sapunniarutigillugu tamansa Kajusiinnaqtuq nuqqangatitautuinnaqtut taaksuma atuqtausimajunit uqausiqaqsimajut sanngijumik ikajuqtuijuq tamatumunga, ikajuqtuqtaullunilu, Inungnut asinginnullu Nunaqaqqaaqsimajunut Inungnut”.
Taanna Katujjiqatigiittunut Nunaliuqatigiinut Uqausiusimajut Pijunnautingita Nunaqaqqaaqsimajut Inuit arraaguuni 24−nik aajiiqatigiigutausimajuq, Kanataup ikajuqturajuttanga atuliqtitaulauqsimajuq 2007−mi, ikajuqtuisikallammata sannginaaqtumik. Inuit Ukiuqtaqtumiuqatigiit Katimajingikkut Kalaałiit Nunaata angajuqqaanga, Jalmaar Taal, piqatauqattaqtuminiq taikkunani arraguni aajiiqatigiiqattarutaulirataaqtillugu uqaqtuminiq, “nalunaiqsimatsiaqtut angirutaujut pijariaqallarippuq annaumagutitsangat nunaqaqqaaqsimajut tamannalu aajiiqatigiigutigituinnariaqarunniirattigu.”
Kangaarutiqaliraluaqsuni itijumik Kanataup qanuilingalirninganik, Simis angiqatiliminiq Ijitsiarmik uqaqtuminirmik imaak, “ullumi quviasuutigivavut kajusititavut aniguqtisimajavut nunarjuami ullumi ammalu sailigutauliqsutik nunarjuaq sivumuattitsisimallarimmat piliriarisimajanginnit taakkua katujjiqatigiittunut Nunaliuqatigiinut Uqausiusimajut. Inuit, taimangalimaaq, tunisimaniqarmata piliriqataunirmut iqqagijaujunut gavamanut, Piqasiutitsugu Kanata uqausiusimajut atuutiqaqtillugit Inungnut.”