Aagiisi 10, 2021 – Aankurij, Alaaska – Inuit Ukiuqtaqtumiuqatigiit Katimajingit parnakpallialiqtillugit Nunarjuarmi Katujjiqatigiirjuat Silaup Asijjiqpallianinganut Katimarjuarniksamut (COP 26) nunanganni Galaasku, Sikaatlanmi Nuvipiriuliqpat taakkua Saqqitauniaqtut Nunarjuarmi Katimajinginnut Silaup Asijjiqpallianinganut (IPCC) Arvinilinganni Qaujisailauqtillugit Unikkaaliaq (AR6) aksukallak taakkua unuqtunut takujaujumajut. Taakkua unikkaat nalunaiqsittiakkanniqtut inuit uqainnaqattaqsimajanginnik takuqattaqtanginnik arraagut 30 aniguqsimaliqtut – sanavigjuaqaqtumut asijjiqtauninganik silavut tamannalu pillattaanguninganik, ukiuntaqtuq aksualuk asijjiqpallialiqtuq sukkajumik ammalu attarnaqtumiiliqtuq.
Inuit Ukiuqtaqtumiuqatigiit Katimajingita Iksivautaq Taili Saampu Turu imanna uqalauqtuq, “Inuit uqainnaqattaqsimangmata “pillaktaangukpat” silaup asijjiqpallianinga pillattaakkut aulajjaigiaqaliqtut sapummiusiqtauqullugu Inuit Nunangat – inuulluta angirravut – piqasiutillutik ukiuqtaqtup nunanga, imanga, sikunga ammalu Inuit iliqqusingat. Inuit tuksirainnaqsimaliqtut irngiinnaq aulajjaigiaqujillutik uqquusivallianinga isuqaqujaulluni tavvunga 1.5oc taimannatigi, sikuipallialiqtumik takuniaqtut ukiuqtaqturmi, aputiqattiangittumiglu ammalu nunaup quanguninga aungluni. Tamakkiik taakkuak Atuaganut Nainaaqsimajut ammalu Pijarningittunilirinirmut Nainaaqsimajut unikkaat titiraqsimajut ukpirusuttiaqtut asijjiqpallinganingata sukkaninga kajusikpat taimanna, sikutuqait nunguppallianiaqtut, siku saaglivallialuni ammalu aksukallaarluni (tamanna qaujimajaulluni ukpirijauttiaqtuq). Taimaittumik asijjirniqaqpat aksualuk aktuiniqarniaqtut niqittinnik ammalu unuqtunik qautamaan atuqpattattinnik inuugasuaqtilluta.”
“Inuit ilisaqsilauqtut pigiarningani sapummiusiqtausimajariaqarninga ukiuqtaqtuq taimailingakpat nunarjuaq sapummijaugajarmat – kisianili, taakkua tuksirautigijavut suli tusaqtaulaungittut. Naalaktiullutik katimajunut IPPCC katimaninginnut, Inuit Ukiuqtaqtumiuqatigiit Katimajingit ajauqtuilauqtut ikajuqatigiiglutik sanaqatigiiqullugit qaujimaninginnik arvinilinganni qaujisailauqtillugit qaujisarutinik katimaliqpata, taakkua piqasiujjigajarmata nunaqaqqaaqsimajut qaujimanirijanginnik tamakkualu pimmariuninginnik qaujimanirijangit,” taimanna uqalauqtuq Liisa Qupirrualuk, Inuit Ukiuqtaqtumiuqatigiit Katimajingikkut Kanatami Tugligijaujuq Angajuqqaap (Nunarjuarmi Katimajinginnut).
Taakkua IPCC-kut 6-Giliqtangani Qaujisailaurtutik Unikkaaliangat – Qanuilingallarilirmangaat Qaujisaqtimmarit Tunngavigijangat arraagunut 8-nut akuniuniqartuni sanajaulauqtuq. Kiggaqtuijuq unuqtunik iqqanaijaqtausimajunik qaujisaqtimmariujunut 100 ungataaniittunut ammalu kiggaqtuijuq iluittuuniqpaattiakkut qaujisarutausimajunik ullumimut tikillugu qanuillattaalirmangaat silaup asijjiqpallianinga. Qanuilingallattaalirmangaat Qaujisaqtimmariujunut Qaujisaqtaujut Tunngaviqalauqtut pingasunik pijariakiglitittijit Katimajingita Unikkaaliangitnik Piqasiujjilauqtut arvinilingannik Silaup Asijjiqpallianinganut Qaujisarutaulauqtunut Unikkaalianik atuinnaruqtaujariaqaqtut 2022-mi piqasiujjiqsimalutik qanuiliurutauniarmangaat unikkalianik. Nalunaiqsisimattiaqtut taimailirninganut sanavigjuaqaqtunit saqqisimaninganik silaup asijjiqpallianinga sukkajualungmik. Taakkua piqausijjisimajut sikutuqaaluit aukpallianinginnik ammalu sirmiit aukpallianinginnik, tariurlu imairuivalliatuinnalirninganik puqtusimallialluni, uqquurjuaqtuualuuvalirtunilu, ammalu nunaup imangit paniqpalliallutik.
-30-
Qaujigiarviksaq:
Kali Inunnguaq Inuit Ukiqtaqtumiuqatigiit Katimajingit (Alaaska) 907-274-9058 kelly@iccalaska.org
Tukumminnguaq Nikjair Uulsan Inuit Ukiqtaqtumiuqatigiit Katimajingit (Kalaałłiit Nunaat) tukumminnguaq@inuit.org
Kauru Saiman Inuit Ukiqtaqtumiuqatigiit Katimajingit (Kanata) 613 293-9728 csimon@inuitcircumpolar.com