Viivvuari 10, 2015 – Aatuaa, Kanata – Aałapaasikain, Inuit, Saami, Aliut, Guvi’sin, ilagijaullutik nunaqaqqaaqsimajunut kiggaqtuijiit Rasamiinngaaqsimajut katimajut Aatuaami tavvani pinasuarusirmi ilagilluniuk anginiqpauaqasiutitillugu Ukiuqtaqtumi Katimajiit pinasuagangata qaujijautsiaqullugit atuqpattangat uummarittut ukiuqtaqtumi nunaqaqqaaqsimajut uqausingit. Taakkua piqataujut uqausilirijiit, atuagalirinirmut qaujimalitait, ammalu asingit nunaqaqqaaqsilamut Inuit uqausilirivattut.
Taakkua kamajiutillugit katimanirmi Inuit Ukiuqtaqtumiuqatigiit Katimajingit ilaqaqasiutillutik tallimanik nunaqaqqaaqsimajunik inungnut timiqutaujunik taakkununga ilagijaunnginnarnialirlutik piviqatautitaujunut Ukiuqtaqtumi Katimajinut, pingasunut−ullunut Ukiuqtaqtumi Nunaqaqqaaqsimajut Uqausiq pillugu qaujisarnirmut katimaniq piviqaqtitsivuq tunngavigijaulluni tamakkiinnut Nunaqaqqaaqsimajut katujjiqatigiinnginnut qaujisaqtinullu qimirrunanniarmata qutsitumi−Ukiuqtataqtumi qaujisautigilugit nunaqaqqaaqsimajut uqausinginnit, ammalu amiqqautiqarlutik atuqsimajarminnit ammalu atuqtaugunnaqtunit qaujijautitsiarlugu uummaringninga nunaqaqqaaqsimajut uqausingit atuqtauvattuq Ukiuqtaqtumi
“Uqausivut kinaunittinnit nalunaiqsimmat – piqqusittinnit, nakinngaaqsimanittinnit ammalu sivuniksatinnit,” uqaqtuminiq Ukaliq Ijitsiaq, Inuit Ukiuqtaqtumiuqatigiit Katimajingikkut iksivautangata matuiqsigutiminnik uqausiminingit. “Tamakkua sivuliqtinniinngaaqmata qiturngatinnut atuqtaullutik, ammalu qiturngata qiturngaginnut.”
Gan Purit Riattu saamikkut Saamikkut Katimajinginniingaaqsimajuq uqaqtuminiq, “taanna katimaniq tunngavigiliutiniaqtuq naammaniqsauqunaqtuq qaujisarutauningata Saamiit uqausingannik Vinlammi, Nuaui, Suviitan, ammalu Rasa qaujisaqtaugumaarniaqtut uqausingit, ikajuqsigajaqtillugit sivuniqarutauniaqtut aturatsait atuqtaukannirniarmata uqausingita uummaringninga.”
Iqqagijautsiaqtuq Liuna Agluukaq, Kanatami Minista Avatilirinirmut, Minista Kanatami Ukiuqtaqtumi Kiinaujaliurasuarniq Pivalliatitauningata Pilirivingata ammalu Minista Ukiuqtaqtumi Katimajinut, uqaqtuminiq Katimaniq Matuiqtautillugu imaililluni: “Kanatamut arraaguunnut−marruunnut Ukiuqtaqtumi Katimajinut Iksivautarijaullunga, iliqasiutisimajavut qanuingisiarnirmuungajuq ammalu ajuqsarunniiqullugit Ukiuqtaqtumiutait sivulliutillugu takunnagarillugu pivallianingat inuit ukiuqtaqtumiutait. Ukiuqtaqtumi Katimajiit Nunaqaqqaaqsimajut uqausinginnit piliriaq ikajuqtuivuq ammalu pivaallititsikanniqpuq Ukiuqtaqtumi nunaliujunit.”
Katimanirmi inuusuttut piqatauninga sanngijuuniqaqpuq. Inuusuttut kiggaqtuijiit Ukiuqtatumiinngaaqsimajut katipput ullaaq, ammalu uqausigumaarniaqtut atangiqtillugu ullulumikkanniq.
Atuliqujaliat saqqiniarmijut katimanirmi ikajuqsiniaqtut aaqqisuigutigilugit sivumuagutitsauniaqtunik taaksumunga pigiaqtaugumajumut niriugijaujuq kajusiniqarniarningat Ukiuqtaqtumi Katimajiit ikajuqtuininga, kinguningani Mialigait Nunangani titiraqti Jaan Kiuri, kinguvviutippat iksivautaunirmut.