ᓯᓚᕐᔪᐊᒥ ᑲᑐᔾᔨᖃᑎᒌᑦ ᐱᓕᕆᐊᔅᓴᖏᑦ ᑲᑎᒪᓂᕐᔪᐊᖅ ᓯᓚᐅᑉ ᐊᓯᔾᔨᐸᓪᓕᐊᓂᖓᓐᓂ ᓯᓚᕐᔪᐊᒥ ᐊᕙᑎᓕᕆᓂᕐᒧᑦ ᐊᖏᕈᑎ ᑎᒍᔭᐅᓚᐅᖅᓯᒪᔪᖅ ᒪᐃ 9−ᒥ, 1992−ᖑᑎᓪᓗᒍ ᐊᒻᒪᓗ “ᒪᑐᐃᖅᓯᓪᓗᑎᑦ ᐊᑎᓕᐅᕈᓯᕐᒧᑦ ᐊᑎᓕᐅᖅᑕᐅᓂᐊᕐᓗᓂ” ᑲᑎᒪᓂᕐᔪᐊᒥ ᓯᓚᕐᔪᐊᒧᑦ ᕆᐅ ᑏ ᔨᓂᐅᕈᒥ, ᐳᕆᔨᐅᓪ ᔫᓂᐅᑎᓪᓗᒍ 3-14, 1992. ᐊᖏᖃᑎᒌᒍᒻᒨᓚᐅᖅᑐᑦ ᒫᔾᔨᐅᑎᓪᓗᒍ 1994 ᓄᓇᓕᕐᔪᐊᑦ ᐊᒥᓱᑲᓪᓚᑦ ᐱᒋᐊᖅᑎᑕᐅᓚᐅᖅᑎᓪᓗᒋᑦ. ᑏᓰᑉᐱᕆᒥ 1995, 197 ᓄᓇᓕᕐᔪᐊᑦ ᐊᑎᓕᐅᓚᐅᖅᓯᒪᔪᑦ.

ᑐᕌᒐᖏᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᐱᓕᕆᐊᔅᓴᖏᑦ ᑲᑎᒪᓂᕐᔪᐊᖅ ᓯᓚᐅᑉ ᐊᓯᔾᔨᐸᓪᓕᐊᓂᖓᓐᓂ ᑕᐃᒪᐃᓪᓗᐊᖅᑎᒐᓱᐊᕐᓗᒋᑦ ᓴᓇᕕᒻᒥ ᐳᔪᕐᓗᐃᑦ ᐊᓂᕐᓂᒨᖅᑲᖅᑐᑦ ᐅᓗᕆᐊᓇᕈᓐᓃᑎᑦᑎᑲᓐᓂᕋᔭᕐᓂᖏᓐᓂ ᓯᓚ ᖃᓄᐃᑦᑑᓂᖓᓐᓂ. ᐱᓕᕆᐊᖑᔪᑦ ᐃᓱᖃᖅᑎᑦᑎᓐᖏᑦᑐᑦ ᐋᖅᑭᔅᓯᒪᓂᖏᑦ ᓱᕈᓐᓇᖅᑐᓂᑦ ᐳᔪᕐᓗᓐᓂ ᐊᓂᕐᓂᒨᖅᑲᖅᑐᑦ ᐃᒻᒥᒃᑯᑦ ᓄᓇᓕᕐᔪᐊᑦ ᐊᒻᒪᓗ ᐊᔭᐅᖅᑐᐃᔾᔪᑎᓂᒃ ᐱᑕᖃᓐᖏᑦᑎᐊᕐᓂᖓᓄᑦ. ᑕᐃᒪᓕ, ᐱᓕᕆᐊᖑᔪᖅ ᓇᓗᓇᐃᔭᐃᓯᒪᔪᖅ ᖃᓄᖅ ᑕᒪᒃᑯᐊ ᓯᓚᕐᔪᐊᒥ ᐊᖏᕈᑎᐅᔪᑦ (ᒪᓕᒐᑦ ᐅᕝᕙᓘᓐᓃᑦ ᐊᖏᕈᑏᑦ) ᐊᐃᕙᔾᔪᑕᐅᓗᑎᑦ ᐋᖅᑭᑲᓐᓂᖁᓪᓗᒋᑦ ᑕᐃᒪᐃᑦᑐᓄᖓᔪᓂᒃ ᐱᒋᐊᕈᑎᖃᒃᑲᓐᓂᕋᓱᐊᕐᓗᑎᑦ ᑐᕌᒐᖏᓐᓅᖅᑲᕐᓗᒋᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᐱᓕᕆᐊᔅᓴᖏᑦ ᑲᑎᒪᓂᕐᔪᐊᖅ ᓯᓚᐅᑉ ᐊᓯᔾᔨᐸᓪᓕᐊᓂᖓᓐᓂ.

ᐱᓕᕆᖃᑎᒌᑦ ᑲᑎᒪᓂᕐᔪᐊᒥ ᐊᕐᕌᑕᒫᑦ ᑲᑎᒪᖃᑎᒌᖃᑦᑕᓲᑦ 1995−ᒥᓂᑦ “ᑲᑎᒪᖃᑎᒌᑦᑐᑦ ᐱᓕᕆᖃᑎᖅᒌᑦ” ᑲᒪᓪᓗᑎᑦ ᐱᕙᓪᓕᐊᒋᐊᖃᕐᓂᖏᓐᓂ ᒪᑯᓂᖓ ᓯᓚ ᐊᓯᔾᔨᐸᓪᓕᐊᓂᖓᓐᓂ. 1997−ᒥ, ᑭᐅᑐ ᐊᖏᕈᑎ ᐃᓚᐅᓕᔾᔭᐅᓚᐅᖅᓯᒪᔪᖅ ᓴᖅᑭᖅᑕᐅᓪᓗᓂ ᒪᓕᒐᖅᑎᒍ ᐱᓕᕆᐊᖑᔭᕆᐊᖃᖅᑐᓂᑦ ᐱᕙᓪᓕᐊᒍᓐᓇᖅᑐᓂᒃ ᓄᓇᓕᕐᔪᐊᓂ ᐳᔪᕐᓗᐊᓗᓐᓂ ᓴᓇᕕᓐᓂ ᐱᑕᖃᓐᖏᓂᖅᓴᐅᓕᖁᓪᓗᒋᑦ ᐱᒋᐊᖅᑐᒋᑦ 2008-2012. ᑕᐃᒪᓕ 2010−ᒥ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᑲᑎᒪᓂᐅᔪᒥᑦ ᓴᖅᑮᓚᐅᖅᓯᒪᔪᑦ ᐊᖏᕈᑎᒥᒃ ᐅᖃᖅᓯᒪᔪᖅ ᓯᕗᓂᑦᑎᓐᓂ ᓯᓚᕐᔪᐊ ᐅᖅᑰᓯᕙᓪᓕᐊᓂᖓ ᐃᓱᖃᖅᑎᑕᐅᒐᓱᒋᐊᓕᒃ 2.0°C−ᒥᑦ ᓴᓇᕕᓐᓃᓐᖔᖅᑐᓂᒃ.

2015−ᒥ ᐸᕇᒥ ᐊᖏᕈᑎᒃ ᑎᒍᔭᐅᓪᓗᓂ, ᐊᐅᓚᑦᑎᔾᔪᑕᐅᓂᐊᓕᖅᑐᖅ ᒥᑭᓪᓕᕚᓪᓕᖁᓪᓗᒋᑦ ᐳᔪᕐᓗᐃᑦ ᐊᓂᕐᓂᑎᓐᓅᐸᑦᑐᑦ 2020 ᓴᖅᑭᓚᐅᖅᓯᒪᔪᖅ, ᑖᒃᑯᑎᒎᓇ ᐱᓕᕆᓂᐊᖅᑐᑦ ᓄᓇᓕᕐᔪᐊᕐᒥᐅᑦ ᐃᑲᔪᖃᑦᑕᕆᐊᖃᕐᓂᐊᕐᓂᖏᓐᓂ, ᑐᕌᒐᖓ ᐊᑦᑎᓂᖅᐹᖑᑎᒐᓱᐊᕐᓗᒍ 1.5°C. ᐸᕇᒥ ᐊᖏᕈᑎ ᐊᑐᓕᖅᑎᑕᐅᓚᐅᖅᑐᖅ ᓄᕕᐱᕆ 4, 2016−ᒥ.

ᓯᕗᓪᓕᖅᐹᖅ ᐱᓕᕆᐊᕆᔭᕆᐊᓕᖏᑦ ᐋᖅᑭᖅᑕᐅᔪᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᐱᓕᕆᐊᔅᓴᖏᑦ ᑲᑎᒪᓂᕐᔪᐊᖅ ᓯᓚᐅᑉ ᐊᓯᔾᔨᐸᓪᓕᐊᓂᖓᓐᓂ ᐊᑎᓕᐅᖅᑎᑕᐅᓗᑎᑦ ᓄᓇᓕᕐᔪᐊᑦ ᐊᕕᑦᑐᖅᓯᒪᔪᑦ ᐋᖅᑮᓗᑎᑦ ᓄᓇᓕᕐᔪᐊᒥ ᐳᔪᕐᓗᐃᑦ ᐊᓂᕐᓂᑎᓐᓄᐸᑦᑐᑦ ᖃᐅᔨᓴᖅᑕᐅᓗᑎᑦ ᐲᔭᖅᑕᐅᓇᓱᐊᕐᓗᑎᓪᓗ, ᓴᖅᑭᖅᑕᐅᕚᓪᓗᓚᐅᖅᓯᒪᔪᑦ 19090−ᒥ ᐊᖏᕈᑎᓕᐅᖅᑐᑎᑦ ᑕᒪᑐᒥᖓ ᓄᓇᓕᕐᔪᐊᓂ ᑭᐅᑐ ᒪᓕᒐᖓᓐᓂ ᐊᒻᒪᓗ ᐱᓕᕆᐊᔅᓴᖏᓐᓂ ᑕᒃᑯᐊ ᓄᓇᓕᕐᔪᐊᑦ ᐊᕕᑦᑐᖅᓯᒪᔪᓂᒃ GHG ᒥᑭᓪᓕᕚᓪᓕᖁᓪᓗᒍᓗ. ᐅᓪᓗᒥᒧᑦ ᐋᖅᑭᖅᑕᐅᓗᓂ ᖃᐅᔨᓴᖅᑕᐅᓗᑎᑦ ᑐᓂᔭᐅᖃᑦᑕᕐᓗᑎᓪᓗ ᐊᕐᕌᒍᑕᒫᑦ ᐃᓚᒍᑕᐅᓗᑎᑦ ᓄᓇᓕᕐᔪᐊᓂᑦ ᐊᕕᑦᑐᖅᓯᒪᔪᓂᒃ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᔨᒻᒪᕇᑦ ᑲᑎᒪᖃᑕᐅᓚᐅᖅᓯᒪᔪᑦ ᓄᓇᕐᔪᐊᒥ ᑲᑎᒪᓂᐅᔪᒥ ᕆᐅᒥ 1992−ᒥ, ᓂᓪᓕᐊᓪᓗᑎᑦ ᐃᓄᐃᑦ ᐃᓱᒪᒋᔭᖏᑦ ᓯᓚ ᐊᓯᔾᔨᐸᓪᓕᐊᓂᖓᓐᓂ ᑲᑎᒪᖃᑎᒌᑦ ᐱᓕᕆᖃᑎᒌᑦ ᑕᐃᒪᓐᖓᓂ. ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᕗᑦ ᓇᓗᓇᐃᖅᓯᓯᒪᔪᑦ ᑲᔪᓯᑎᑦᑎᓯᓪᓗᑎᑦ ᑲᑎᒪᓂᕐᔪᐊᖓᓐᓂ ᐃᓛᒃᑰᖓᔪᓂᒃ ᑎᑎᕋᖅᓯᒪᔪᓂᓪᓗ ᓯᓚ ᐊᓯᔾᔨᐸᓪᓕᐊᓂᖓᓐᓂ.

ᑕᐃᓐᓇ 2018−ᒥ ᐅᑦᕿᐊᕝᕕᒃ ᓇᓗᓇᐃᖅᑕᐅᓚᐅᖅᓯᒪᔪᖅ ᐅᖃᖅᓯᒪᔪᑦ, “ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓯᕗᓪᓕᖅᐹᖑᓚᐅᖅᓯᒪᔪᖅ ᒐᕙᒪᐅᓐᖏᑦᑐᖅ ᑲᑐᔾᔨᖃᑎᒌᖏᓪᓗᑎᑦ ᐅᔾᔨᕈᓱᑦᑎᐊᖁᔨᓪᓗᑎᑦ ᒪᓕᒐᖅᑎᒍᑦ ᓂᓪᓕᐊᒍᓐᓇᕐᓗᑎᓪᓗ ᐃᓄᐃᑦ ᐱᔪᓐᓇᐅᑎᖏᑦᑕ ᐃᓱᒪᒋᔭᖓᓐᓂ ᐊᑦᑐᖅᑕᐅᔪᓐᓇᕐᓂᖏᓐᓂ ᓱᒃᑲᓕᔪᐊᓗᒻᒥ ᓯᓚ ᐅᑭᐅᖅᑕᖅᑐᖓᓐᓂ.”

ᐊᒻᒪᓗᒃᑲᓐᓂᖅ, ᒪᓕᒐᕐᒥᑦ 38−ᒥ ᐅᑦᕿᐊᕝᕕᒃ ᓇᓗᓇᐃᖅᑕᐅᑎᓪᓗᒍ ᒪᓕᒐᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᒪᐃᒋᐊᓖᑦ: “ᐱᖃᑕᐅᓗᑎᑦ ᐊᐅᓚᓂᖏᓐᓂ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ “ᓄᓇᓕᓐᓂ ᓄᓇᖃᖅᑳᖅᑐᒥᓂᕐᓂᓪᓗ ᑲᑎᒪᔨᐅᔪᓂᒃ” ᐱᕕᖃᖅᑎᑕᐅᓗᑎᑦ ᐱᓕᒻᒪᓴᑦᑎᐊᕈᓐᓇᖃᑦᑕᕐᓗᑎᑦ, ᐊᑑᑎᔪᓄᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐃᑲᔫᑎᐅᔪᓄᑦ ᐊᒻᒪᓗ ᐱᖁᔭᕐᓄᑦ, ᐊᒻᒪᓗ ᐊᖏᓪᓕᑲᓐᓂᕋᓱᐊᕐᓗᑎᑦ ᓄᓇᖃᖅᑳᖅᑐᒥᓃᑦ ᐱᓕᕆᖃᑎᖃᕐᓗᑎᑦ ᓯᓚᕐᔪᐊᒥ ᑲᑐᔾᔨᖃᑎᒌᓐᓂᒃ ᐱᓕᕆᓂᕐᒧᑦ ᑲᑎᒪᓂᕐᔪᐊᖓᓐᓂ ᓯᓚ ᐊᓯᔾᔨᐊᓪᓕᐊᓂᖓᓂ.”